Litholoana—Tse Molemo le tse Mpe

“Jehova a mpontša pono; ’me bonang, liroto tse peli tsa lifeie . . . Seroto se seng se ne se na le lifeie tse monate joalo ka lifeie tsa lithakangoaha, seroto se seng se e-na le lifeie tse mpe haholo, tse se nang ho jeoa ke hoba li le mpe.”—JEREMIA 24:1, 2.

 1. Jehova o bontšitse sechaba sa hae sa Iseraele kutloelo-bohloko joang, empa se ile sa arabela joang?

SELEMO e ne e le sa 617 B.C.E. E ne e le lilemo tse leshome feela pele kahlolo ea Jehova e loketseng e phethahatsoa khahlanong le Jerusalema le batho ba eona. E ne e se e le lilemo tse 30 Jeremia a bolela ka matla. Hlokomela tlhaloso e hlakileng ea Esdrase ea boemo, joalokaha e fumanoa ho 2 Likronike 36:15: “Jehova, Molimo oa bo-ntat’a bona, a ’na a romela ho bona ka manģosa a hae, a ’na a a roma e sa le hosasa, hobane a na a utloela sechaba sa hae le bolulo ba hae bohloko.” ’Me phello ea boiteko boo kaofela e bile efe? Ka masoabi, Esdrase o tsoela pele ho tlaleha ho temana ea 16: “Empa ba ’na ba soma ka manģosa a Molimo, ba nyelisa lipolelo tsa oona, ba tšeha baporofeta ba oona, ho fihlela khalefo ea Jehova e ba e phahamela sechaba sa oona, ho se ho se kamoo ho ka thusoang kateng.”

 2, 3. Hlalosa pono ea bohlokoa eo Jehova a ileng a e bontša Jeremia.

² Na see se ne se bolela hore sechaba sa Juda se ne se tla felisoa ka ho feletseng? Bakeng sa ho fumana karabo, a re hlahlobeng pono ea bohlokoa eo joale e ileng ea bontšoa Jeremia ’me ea tlalehoa ho khaolo 24 ea buka e reheletsoeng ka eena. Molimo o ile a sebelisa liroto tse peli tsa feiga ponong ena ho tšoantšetsa tsoelo-pele ea batho ba hae ba selekane. Li ne li tla tšoantšetsoa ke mefuta e ’meli e ikhethang ea litholoana, tse monate le tse mpe.

³ Jeremia khaolo 24, litemana 1 le 2, li hlalosa seo moprofeta oa Molimo a ileng a se bona: “Jehova a mpontša pono; ’me bonang, liroto tse peli tsa lifeie li ne li beiloe pel’a tempele ea Jehova. Seroto se seng se ne se na le lifeie tse monate joalo ka lifeie tsa lithakangoaha, seroto se seng se e-na le lifeie tse mpe haholo, tse se nang ho jeoa ke hoba li le mpe.”

Lifeiga tse Monate tsa Tšoantšetso

 4. Pono ea lifeiga e ne e tšoaretse Baiseraele ba tšepahalang molaetsa ofe o tšelisang?

⁴ Ka mor’a ho botsa Jeremia ka seo a se boneng, Jehova o ile a tsoela pele litemaneng 5 ho ea ho 7 ho re: “Joalo ka ha lifeie tsena li le monate, ba tšoeroeng ba Juda, bao ke ba tlositseng nģalong ena, ke ba isitseng lefatšeng la ba-Kalde, ke tla ’ne ke ba talime ho ba etsa hantle. Ke tla ba talima ka leihlo le letle, ke ba busetse lefatšeng lena, ke ba ahise, ke se ke ka ba senya; ke ba hlome, ke se ke ka ba epolla. Ke tla ba nea pelo e ntsebang hoba ke Jehova; ’me e tla ba sechaba sa ka, ’na ke be Molimo oa bona, hobane ba tla sokolohela ho ’na ka pelo eohle.”

 5, 6. (a) Baiseraele ba bang ba ne ‘ba isitsoe hantle’ Kalde joang? (b) Jehova o ile ‘a talima Baiseraele ba tšepahalang ba leng kholehong ka leihlo le letle’ joang?

⁵ Kahoo ho tsoa ho seo Jehova a se boletseng mona ho bonahala eka linako tse molemonyana li ne li larile ka pele, hore sechaba sa Juda se ne se ke ke sa felisoa ka ho feletseng. Empa seroto sena sa lifeiga tse monate se bolela’ng?

⁶ Jekonia, kapa Jojakine, e ne e bile morena oa Juda ka likhoeli tse tharo feela le matsatsi a leshome pele a ithaopela ho nehelana ka Jerusalema ho Morena Nebukadnezare. Har’a ba ileng ba isoa kholehong le eena e le batšoaruoa e ne e le Daniele le metsoalle ea hae e meraro ea Baheberu Hanania, Mishaele, le Azaria hammoho le Ezekiele. Bophelo ba bona bo ile ba bolokoa ke morena oa Babylona, kahoo ho ne ho ka thoe Jehova o ile a nka batšoaruoa bana bohle joalokaha eka ba isitsoe hantle lefatšeng la ba-Kalde. Na u hlokometse hore Jehova o ile a boela a tšepisa ho “ba talima ka leihlo le letle”? See se ile sa phethahatsoa joang? Ka 537 B.C.E., lilemo tse 80 hamorao, Jehova o ile a etsa hore Morena Cyruse a fetise molao o lumellang masala a litloholo tsa bona ho khutlela naheng ea Juda. Bajode bana ba tšepahalang ba ile ba tsosolosa motse oa Jerusalema; ba ile ba aha tempele e ncha bakeng sa borapeli ba Molimo oa bona, Jehova; ’me ba ile ba khutlela ho eena ka lipelo tsa bona tsohle. Kahoo ho sena sohle, ho Jehova batšoaruoa bana le litloholo tsa bona e ne eka lifeiga tsa pele tse monate haholo.

 7. Ke neng hona e le joang leihlo la Jehova le ileng la sheba sehlopha sa kajeno sa Jeremia “ka tsela e ntle”?

⁷ U ka hopola hore sehloohong sa rōna se qalang mabapi le mantsoe a Jeremia a boprofeta, re ile ra bona hore a na le moelelo bakeng sa lekholo la rōna la bo20 la lilemo. ’Me khaolo 24 hase mokhelo. Nakong ea lilemo tse tepeletsang tsa Ntoa ea I ea Lefatše, bongata ba bahlanka ba inehetseng ba Jehova bo ile ba e-ba tlas’a tšusumetso ea Babylona e Moholo ka tsela e ’ngoe e itseng. Empa Jehova o ne a ba ‘talimile ka leihlo le letle’ le seli. Kahoo ke ka Cyruse e Moholoanyane, Kreste Jesu, Jehova a ileng a fokotsa matla a Babylona e Moholo holim’a bona ’me butle-butle a ba kenya paradeiseng ea moea. Baiseraele bana ba moea ba ile ba arabela hantle ’me ba khutlela ho Jehova ka lipelo tsohle tsa bona. Eaba, ka 1931, ba thabela ho amohela lebitso Lipaki tsa Jehova. Ka sebele, ho ne ho ka thoe ba ne ba le joaloka seroto sa lifeiga tse monate haholo mahlong a Jehova.

 8. Ke ka tsela efe Lipaki tsa Jehova li boletseng hohle monate o kang oa feiga oa molaetsa oa ’Muso?

⁸ ’Me Lipaki tsa Jehova ha lia lahleheloa ke morero oa mosa o sa tšoanelang oa Molimo oa ho li lokolla Babylona e Moholo. Ha lia ipolokela monate o kang oa feiga oa molaetsa oa ’Muso oa litaba tse molemo, empa li o boletse hohle ha li boloka mantsoe a Jesu ho Mattheu 24:14: “Evangeli ena ea ’muso e tla boleloa lefatšeng lohle, e tle e be bopaki ho lichaba tsohle; ’me e tla ba hona bofelo bo hlahang.” ’Me phello e bile efe? Ba kang linku ba fetang 4 700 000 bao eseng Baiseraele ba moea ba itokolotse Babylona e Moholo!

Lifeiga tse Mpe tsa Ponong

 9. Ke bo-mang ba neng ba tšoantšetsoa ke lifeiga tse mpe ponong ea Jeremia, hona ho ne ho tla etsahala eng ka bona?

⁹ Empa ho thoe’ng ka seroto sa lifeiga tse mpe ponong ea Jeremia? Joale Jeremia o lebisa tlhokomelo ea hae mantsoeng a Jehova ho Jeremia khaolo 24, litemana 8 ho isa ho 10: “Joalo ka lifeie tse mpe tse se nang ho jeoa ke hoba li le mpe, ho itsoe ke Jehova, ke tla etsa joalo ho Tsedekia, morena oa Juda, le ho matona a hae, le ho masala a Jerusalema a sa setseng lefatšeng lena, le ho ba ahileng lefatšeng la Egepeta. Ke tla ba neela ho tsukutloa le ho tšoenyeha mebusong eohle ea lefatše, e tle e be nyeliso, le sesomo, le thohako nģalong tsohle moo ke tla ba qhalanyetsa teng. Ke tla romela lerumo har’a bona, le tlala, le lefu la seoa, ba tle ba fele lefatšeng leo nkileng ka le neela bona le bo-ntat’a bona.”

10. Ke hobane’ng ha Jehova a ile a re Tsedekia ke ‘feie e mpe’?

¹⁰ Kahoo ka sebele Tsedekia o ile a fetoha ‘feie e mpe’ mahlong a Jehova. Hase feela hore o ile a fetohela Morena Nebukadnezare ka ho roba kano ea botšepehi eo a neng a e entse ho morena eo ka lebitso la Jehova empa o boetse a qhela ka ho feletseng mohau oa Jehova o neng o fetisetsoa ho eena ka Jeremia. Ha e le hantle, o ile a ba a ea bohōleng ba ho etsa hore Jeremia a koalloe teronkong! Ha ho makatse ha Esdrase a bolela ka bokhutšoaane boikutlo ba morena joalokaha a etsa ho 2 Likronike 36:12: “A etsa ho leng hobe mahlong a Jehova, Molimo oa hae; ha a ka a ikokobetsa.” Mahlong a Jehova Tsedekia le ba neng ba setse Jerusalema ba ne ba tšoana le seroto sa lifeiga tse mpe, tse bolileng!

Lifeiga tsa Tšoantšetso tse Bolileng Mehleng ea Rōna

11, 12. Ke bo-mang ba tsebahatsoang e le lifeiga tse mpe kajeno, hona ho tla etsahala eng ka bona?

¹¹ Joale ak’u talime ho potoloha lefatše kajeno. Na u nahana hore re ka fumana seroto sa tšoantšetso sa lifeiga tse mpe? A re hlahlobeng linnete ka ho bapisa mehla ea rōna le ea Jeremia. Lekholong lena la bo20 la lilemo, Jehova o sebelisitse sehlopha sa Jeremia, masala a tlotsitsoeng, ho lemosa lichaba khafetsa ka bohale ba hae bo tlang mahlomoleng a maholo. O pheheletse lichaba hore li mo fe khanya e tšoanelang lebitso la hae, ho mo rapela ka moea le ka ’nete, le ho hlokomela Mor’a hae ea busang, Kreste Jesu, e le ’Musi ea tšoanelehang oa lefatše. Karabelo e ’nile ea e-ba efe? E tšoanang le ea mehleng ea Jeremia. Lichaba li tsoela pele ho etsa se sebe mahlong a Jehova.

¹² Ke bo-mang ba hlohleletsang boikutlo boo ba bofetoheli? Ke bo-mang ba lulelang ho tloka manģosa aa a Molimo a kang Jeremia ka ho belaella matla a ’ona a ho sebetsa joaloka bahlanka ba Molimo? Ke bo-mang ba tsoelang pele ho nyelisa Lentsoe la Molimo? Ke bo-mang kajeno ba ’nileng ba khothaletsa bongata ba mahloriso a Lipaki tsa Jehova? Karabo e hlakile hore bohle ba e bone—ke Bokreste-’mōtoana, haholo-holo baruti! ’Me ak’u bone feela litholoana tsohle tsa Bokreste-’mōtoana tse bolileng, tse mpe tseo re li tšohlileng sehloohong se qalang. E, ka sebele ho na le seroto sa tšoantšetso sa lifeiga tse mpe lefatšeng kajeno. Ha e le hantle, Jehova o re “ha li na ho jeoa, ke hoba li le mpe.” Mantsoe a Jehova ka Jeremia a utloahala le mehleng ea rōna: ‘Ba tla fela’! Bohale ba Jehova khahlanong le Bokreste-’mōtoana bo ke ke ba kokobela.

Thuto e Lemosang Bakeng sa Rōna

13. Motheong oa mantsoe a Pauluse a fumanoang ho 1 Ba-Korinthe 10:11, re lokela ho utloisisa pono ea liroto tse peli tsa lifeiga joang?

¹³ Ha re hlahloba se boleloang ke molaetsa oa Jeremia oa temoso o bululetsoeng, mantsoe a moapostola Pauluse a ho 1 Ba-Korinthe 10:11 a luma ka litsebeng tsa rōna: “Taba tseo tsohle li ne li ba hlahele hore e be litemoso, ’me li ngoliloe hore re ithute ka tsona, rōna ba hlahetsoeng ke mehla ea bofelo.” Na rōna ka borōna re nkile ka ho teba temoso e fetiselitsoeng ho rōna ka pono ee ea liroto tse peli tsa lifeiga? Seo re se tšohlileng ke karolo ea bohlokoa ea lintho tse ileng tsa hlahela Iseraele e le mohlala o lemosang bakeng sa rōna.

14. Iseraele e ile ea arabela joang tlhokomelong ea Jehova e lerato?

¹⁴ Qetellong, a re hopoleng mantsoe a Jehova ho Morena Davida mabapi le Iseraele, joalokaha a fumanoa ho 2 Samuele 7:10 (NW): “Ka sebele ke tla khetha sebaka bakeng sa sechaba sa ka sa Iseraele ’me ke se hlome.” Ka bonolo Jehova o ile a hlokomela sechaba sa hae, e leng Iseraele, ka litsela tsohle. Ho ne ho e-na le mabaka a utloahalang hore Baiseraele ba hlahise litholoana tse monate bophelong ba bona. Ho ne ho hlokahala feela hore ba mamele thuto ea bomolimo ea Jehova le ho boloka melao ea hae. Empa, ke ba fokolang feela ba ileng ba etsa joalo. Ba bangata ba ne ba le manganga ’me ba tsoile tseleng hoo ba ileng ba hlahisa litholoana tse mpe, tse bolileng.

15. Iseraele oa moea kajeno le metsoalle ea eona e kang linku ba arabetse joang moseng oa Jehova?

¹⁵ Joale, ho thoe’ng ka mehla ea rōna? Jehova o bontšitse mosa o mongata mabapi le masala a hae a Iseraele oa moea le metsoalle ea ’ona e kang linku. Leihlo la hae le ’nile la ba talima ka linako tsohle ho tloha nakong ea topollo ea bona ea moea ka 1919. Joalokaha a boletse esale pele ka Esaia, letsatsi le letsatsi ba amohela taelo ea bomolimo ho Tichere e khōlō ka ho fetisisa bokahohleng, Jehova Molimo. (Esaia 54:13) Thuto ena ea bomolimo, e laoloang ke Mor’a hae ea ratoang, Jesu Kreste, e feletse ka khotso e ngata har’a bona ’me e ’nile ea tsoela pele ho ba kenya kamanong e haufi le Jehova. Sena se fana ka tikoloho e babatsehang hakaakang ea moea bakeng sa rōna bohle hore re tsebe Jehova, ho mo mamela, le ho tsoela pele ho hlahisa litholoana tse molemo bophelong ba rōna—litholoana tse tlisetsang Jehova thoriso! Hoo ho bolela bophelo ba rōna!

16. E mong le e mong oa rōna a ka sebelisa pono ea liroto tse peli tsa lifeiga joang ho eena ka boeena?

¹⁶ Empa ho sa tsotellehe mosa ’ohle o sa tšoanelang oa Molimo, ho sa ntse ho e-na le ba bang ba iketsang bafetoheli le ba thatafatsang lipelo, joalokaha ba bangata ba ile ba etsa Juda oa boholo-holo, ’me ba hlahisa litholoana tse mpe, tse bolileng bophelong ba bona. Sena se baka masisa-pelo a makaakang! E se eka re ke ke ra hlokomoloha thuto e lemosang eo re e hlokomelisoang ka ho hlakileng ke liroto tsena tse peli tsa lifeiga le litholoana tsa tsona—tse molemo le tse mpe. Kaha kahlolo e loketseng ea Jehova khahlanong le Bokreste-’mōtoana ba bokoenehi e atamela ka potlako, e se eka re ka nka ka ho teba keletso ea moapostola Pauluse: “Tsamaeang ka tsela e loketseng Jehova ho isa pheletsong ea ho mo khahlisa ka ho feletseng ha le ntse le tsoela pele ho beha litholoana mosebetsing o mong le o mong o motle.”—Ba-Kolosse 1:10, NW.

Tlhahlobo “Litholoana—Tse Molemo le tse Mpe” le lirapa 1-4 tsa “Tseko ea Jehova le Lichaba”

◻ Seroto sa lifeiga tse molemo se emela eng?

◻ Seroto sa tšoantšetso sa lifeiga tse mpe se pepesitsoe joang?

◻ Molaetsa oa Jeremia o na le thuto efe e lemosang bakeng sa rōna?

◻ Ke eng seo e neng e le sa bohlokoa ka selemo sa 607 B.C.E.? le 1914 C.E.?

[Setšoantšo se leqepheng la 15]

Joaloka lifeiga tse monate, batho ba Molimo ba hlahisitse litholoana tse monate tsa ’Muso

[Setšoantšo se leqepheng la 15]

Bokreste-’mōtoana bo ipakile ho ba joaloka seroto sa lifeiga tse mpe