Jehova o Nahanela Maemo!

“Bohlale bo tsoang holimo . . . bo nahanela maemo.”—JAKOBO 3:17, NW.

 1. Ba bang ba bontšitse Molimo e le ea sa nahaneleng maemo joang, ’me u ikutloa joang ka pono e joalo ka Molimo?

U RAPELA Molimo oa mofuta ofe? Na u lumela hore ke Molimo ea sa tenyetseheng, ea khomarelang toka ka matla, ea thata le ea sa fetoheng sebōpehong sa hae? Ho raliphetoho oa Moprostanta John Calvin, e tlameha ebe Molimo o ne a bonahala a le joalo. Calvin o ile a bolela hore Molimo o na le “morero oa ka ho sa feleng o sa fetoheng” mabapi le motho ka mong, o khethela motho ka mong esale pele ho phela ka ho sa feleng ka thabo kapa ho hlokofatsoa ka ho sa feleng mollong oa lihele. Nahana: Haeba sena e ne e le ’nete, ha ho letho leo u neng u ka le etsa le ka mohla, ho sa tsotellehe hore na u leka ka matla hakae, le neng le ka fetola morero oa Molimo oa nako e telele, morero o sa fetoheng ka uena le bokamoso ba hao. Na u ne u tla khahloa ke Molimo ea sa nahaneleng maemo hakaalo?—Bapisa le Jakobo 4:8.

 2, 3. (a) Re ka tšoantša ho se nahanele maemo ha litsi tse sebelisoang ke batho le mekhatlo ea bona joang? (b) Pono ea Ezekiele ea koloi ea Jehova ea leholimo e senola ho ikamahanya ha Hae le maemo joang?

² Re imolohile hakaakang ha re hlokomela hore Molimo oa Bibele o nahanela maemo ka ho hlaheletseng! Hase Molimo empa ke batho ba sekamelang ho ba ba sa fetoheng le ba sa tenyetseheng, ba behetsoeng meeli ke ho se phethahale ha bona. Mekhatlo ea batho e ka ba e sa laoleheng habonolo joaloka literene tse nkang thepa. Ha terene e khōlō e nkang thepa e tsamaea e lebile ntho e ka e sitisang ho fetela pele tseleng ea eona, e ke ke ea tjeka, ebile ho thata hore e ka ema. Literene tse ling li lebelo haholo ha li e-ea pele hoo li emang ka mor’a ho tsamaea sebaka se fetang k’hilomithara ka mor’a hore ho hatoe mariki! Ka ho tšoanang, sekepe se seholo se nkang litanka tsa lintho tse metsi se ka tsoela pele ho sesa sebaka sa lik’hilomithara tse robeli ka mor’a hore ho tingoe lienjine. Leha se chechisetsoa morao, se ka ’na sa sesa se ea pele sebaka sa lik’hilomithara tse tharo! Empa joale nahana ka koloi e susumetsang tšabo e nang le tlhompho ho feta tsena tse peli, e emelang mokhatlo o hlophisitsoeng oa Molimo.

³ Lilemong tse fetileng tse fetang 2 600, Jehova o ile a bontša moprofeta Ezekiele pono e neng e tšoantšetsa mokhatlo oa Hae o hlophisitsoeng oa leholimo oa libōpuoa tsa moea. E ne e le koloi eo boholo ba eona bo neng bo susumetsa tšabo, “koloi” ea Jehova eo ka linako tsohle e leng tlas’a tataiso ea hae. Se thahasellisang ka ho fetisisa e ne e le tsela eo e neng e tsamaea ka eona. Mabili a maholo a ne a na le mahlakore a mane ’me a na le mahlo hohle, kahoo a ne a ka bona hohle ’me a ne a ka nka tsela e fapaneng ka ho panya ha leihlo, ka ntle le hore e eme kapa e tjeke. ’Me ho ne ho sa hlokahale hore koloi ena e khōlō e sutumeletsehe pele joaloka sekepe se seholo se nkang litanka tsa lintho tse metsi kapa terene e nkang thepa. E ne e ka tsamaea ka lebelo la lehalima, esita le ho tjeka hang-hang ho ea moo e batlang ho ea! (Ezekiele 1:1, 14-28) Jehova o fapane le Molimo oo Calvin a neng a ruta ka oona joalokaha koloi ea Hae e fapane le mechine e entsoeng ke motho eo ho leng thata ho e laola. O ikamahanya le maemo ka tsela e phethahetseng. Ho ananela tšobotsi ena ea botho ba Jehova ho lokela ho re thusa ho lula re ikamahanya le maemo ’me re qobe leraba la ho ba ba sa nahaneleng maemo.

Jehova—Motho ea Ikamahanyang le Maemo ka ho Fetisisa Bokahohleng

 4. (a) Lebitso la Jehova ka bolona le mo senola ka tsela efe hore ke Molimo ea ikamahanyang le maemo? (b) Litlotla tse ling tse sebelisoang ho Jehova Molimo ke life, hona ke hobane’ng ha li lokela?

⁴ Lebitso la Jehova ka bolona le bolela ho ikamahanya ha hae le maemo. Ha e le hantle “Jehova” e bolela hore “O Etsa Hore ho be Teng.” Ho hlakile hore seo se bolela hore Jehova o etsa hore eena ka boeena e be Mophethahatsi oa litšepiso tsa hae kaofela. Ha Moshe a botsa Molimo lebitso la hae, Jehova o ile a tsoela pele ho fana ka makolopetso a moelelo oa lona ka tsela ena: “Ke tla ipaka ho ba seo ke tla ipaka ho ba sona.” (Exoda 3:14, NW) Phetolelo ea Rotherham ka ho toba e beha taba tjena: “Ke Tla Ba eng kapa eng eo ke ratang ho ba eona.” Jehova o ipaka ho ba, kapa o khetha ho ba, eng kapa eng eo ho hlokahalang hore a be eona bakeng sa ho phethahatsa morero le litšepiso tsa hae tse lokileng. Kahoo, o na le letoto la litlotla tse khahlehang, tse kang ’Mōpi, Ntate, Morena ’Musi, Molisa, Jehova oa makhotla, Moutloi oa lithapelo, Moahloli, Morupeli e Moholo, Morekolli. O entse hore e be lintho tsena kaofela le tse eketsehileng e le hore a ka phetha merero ea hae e lerato.—Esaia 8:13; 30:20, NW; 40:28; 41:14, NW; Pesaleme ea 23:1; 65:2; 73:28, NW; 89:26; Baahloli 11:27; bona le New World Translation, Appendix 1J.

 5. Ke hobane’ng ha re sa lokela ho etsa qeto ea hore ho ikamahanya ha Jehova le maemo ho bolela hore sebōpeho sa hae kapa litekanyetso lia fetoha?

⁵ Na joale see se bolela hore sebōpeho sa Molimo kapa litekanyetso tsa hae lia fetoha? Che; joalokaha Jakobo 1:17 e re, “eo ho seng tika-tiko ho eena, leha e le seriti sa ho fetoha.” Na ho na le ho ikhanyetsa moo? Le letho. Ka mohlala, ke ofe motsoali ea lerato ea sa fetoleng likarolo tseo a li phethang molemong oa bana ba hae? Ka letsatsi le le leng feela, motsoali e ka ba moeletsi, seapehi, mohlokomeli oa ntlo, tichere, ea laeang, motsoalle, setehi, mooki—lethathamo lena le tsoela pele le sa fele. Motsoali ha a fetole sebōpeho sa hae ha a phetha likarolo tsena; o mpa a ikamahanya le litlhoko tse leng teng ka nako eo. Ho joalo le ka Jehova empa e le ka tekanyo e khōloanyane. Ha ho na moeli tabeng ea hore na a ka etsa hore e be eng e le hore a tsoele libōpuoa tsa hae molemo. Botebo ba bohlale ba hae boa hlolla ka sebele!—Ba-Roma 11:33.

Ho Nahanela Maemo ke Letšoao la Bohlale ba Bomolimo

 6. Lentsoe la Segerike leo Jakobo a le sebelisitseng ho hlalosa bohlale ba bomolimo ha e le hantle le bolela’ng, ’me le fana ka maikutlo afe?

⁶ Morutuoa Jakobo o sebelisitse lentsoe le thahasellisang ho hlalosa bohlale ba Molimo enoa ea ikamahanyang le boemo ka mokhoa o phahameng ka ho fetisisa. O ile a ngola: “Bohlale bo tsoang holimo . . . bo nahanela maemo.” (Jakobo 3:17, NW) Ho thata ho fetolela lentsoe la Segerike (e·pi·ei·kesʹ) leo a le sebelisitseng mona. Bafetoleli ba sebelisitse mantsoe a kang “bonolo,” “mohau,” “mamello,” le “ho nahanela.” New World Translation e le fetolela e le “ho nahanela maemo,” mongolong o botlaaseng ba leqephe e bontša hore moelelo oa lona oa sebele ke “ho feto-fetoha le maemo.”a Hape lentsoe lena le fetisa kutloisiso ea ho se tsitlellele ho khomarela makolopetsong ’ohle a molao, ho sa be thata kapa ho tiea ka ho sa hlokahaleng. Ho New Testament Words setsebi William Barclay sea hlalosa: “Taba ea motheo le ea sehlooho mabapi le epieikeia ke hore e simoloha ho Molimo. Haeba Molimo a ne a ile a phehella litokelo tsa hae, haeba ho rōna Molimo a ne a ile a sebelisa feela litekanyetso tsa molao tse sa fetoheng feela ho rōna, re ka be re le hokae? Molimo ke mohlala o phahameng ka ho fetisisa oa motho ea epieikēs le ea sebetsanang le ba bang ka epieikeia.”

 7. Jehova o bonahalitse ho nahanela maemo joang tšimong ea Edene?

⁷ Nahana ka nako eo ka eona moloko oa batho o neng o fetohela bobusi ba Jehova. Ho ka be ho bile bonolo hakaakang hore Molimo a bolaee bafetoheli bao ba bararo ba se nang teboho—Adama, Eva, le Satane! A ka be a ile a iqobisa masisa-pelo a mangata hakaakang! ’Me ke mang ea ka beng a ile a pheha khang ea hore o ne a se na tokelo ea ho qobella tšebeliso ea toka e thata hakaalo? Leha ho le joalo, le ka mohla Jehova ha a e-so ho etse hore mokhatlo oa hae o hlophisitsoeng o kang koloi ea leholimo o khomarele tekanyetso ea toka e sa fetoheng, e sa ikamahanyeng le maemo. Kahoo koloi eo ha ea ka ea silakanya ka ho hloka mohau lelapa la motho le litebello tsohle bakeng sa bokamoso bo thabileng ba moloko oa batho. Ho fapana le seo, Jehova o ile a tsamaisa koloi ea hae ka lebelo le kang la lehalima. Hang-hang ka mor’a bofetoheli, Jehova Molimo o ile a bontša morero oa hae oa nako e telele o fanang ka mohau le tšepo ho bohle ba neng ba tla hlaha ka Adama.—Genese 3:15.

 8. (a) Pono ea Bokreste-’mōtoana e fosahetseng ka ho nahanela maemo e fapana joang le ho nahanela maemo ha sebele ha Jehova? (b) Ke hobane’ng ha re ka bolela hore ho nahanela maemo ha Jehova ha ho bolele hore a ka ’na a sekisetsa melao-motheo ea hae ea bomolimo?

⁸ Leha ho le joalo, ho nahanela maemo ha Jehova ha ho bolele hore a ka sekisetsa melao-motheo ea bomolimo. Likereke tsa kajeno tsa Bokreste-’mōtoana li ka ’na tsa nahana hore li nahanela maemo ha li iphapanyetsa boitšoaro bo hlephileng feela ho phoqa mehlape ea tsona e sa laoleheng hore e li rate. (Bapisa le 2 Timothea 4:3.) Le ka mohla Jehova ha a tlōle melao ea hae, leha e le hona ho sekisetsa melao-motheo ea hae. Ho e-na le hoo, o bontša hore o ikemiselitse ho feto-fetoha le maemo, ho ikamahanya le maemo, e le hore melao-motheo eo e ka sebelisoa ka tsela e lokileng le ka mohau. Ka linako tsohle o ela hloko hore a leka-lekanye tšebeliso ea hae ea toka le matla ka lerato la hae le bohlale bo nahanelang maemo. A re tšohleng litsela tse tharo tseo Jehova a bontšang ho nahanela maemo ka tsona.

‘O Lula a Loketse ho Tšoarela’

 9, 10. (a) Ho “lula u loketse ho tšoarela” ho amana joang le ho nahanela maemo? (b) Davida o ile a fumana molemo joang ka ho lula ha Jehova a loketse ho tšoarela, hona hobane’ng?

⁹ Davida o ile a ngola: “Hobane uena, Jehova, u molemo ’me u lula u loketse ho tšoarela; ’me mosa o lerato ho bohle ba ipiletsang ho uena o mongata.” (Pesaleme ea 86:5, NW) Ha Mangolo a Seheberu a ne a fetoleloa Segerikeng, lentsoe bakeng sa “lula u loketse ho tšoarela” le ile la fetoleloa e le e·pi·ei·kesʹ, kapa “ho nahanela maemo.” Ka sebele, ho lula u loketse ho tšoarela le ho bontša mohau mohlomong ke tsela e ka sehloohong ea ho bontša ho nahanela maemo.

¹⁰ Davida ka boeena o ne a hlokomela ka ho feletseng hore na Jehova o nahanela maemo hakae tabeng ena. Ha Davida a etsa bofebe le Bathe-Sheba a bile a lokisetsa hore monna oa hae a bolaoe, eena hammoho le Bathe-Sheba ba ne ba tšoaneloa ke kotlo ea lefu. (Deuteronoma 22:22; 2 Samuele 11:2-27) Haeba baahloli ba batho ba thata ba ne ba ile ba ahlola nyeoeng ena, batlōli bana ba ka be ba ile ba shoa ka bobeli. Empa Jehova o ile a bontša ho nahanela maemo (e·pi·ei·kesʹ), hoo, joalokaha Vine’s Expository Dictionary of Biblical Words e e beha, “ho bontšang ho nahanela hoo ho shebang ‘linnete tsa taba ka qenehelo le ka ho nahanela maemo.’” Linnete tse ileng tsa susumetsa qeto ea Jehova e mohau ho ka etsahala hore li ne li akareletsa pako e tiileng ea bafosi le mosa oo Davida ka boeena a neng a ile a o bonahatsa ho ba bang nakong e fetileng. (1 Samuele 24:4-6; 25:32-35; 26:7-11; Mattheu 5:7; Jakobo 2:13) Leha ho le joalo, tumellanong le tsela eo Jehova a itlhalosang ka eona ho Exoda 34:4-7, ho ne ho utloahala hore Jehova o ne a tla khalemela Davida. O ile a romela moprofeta Nathane ho Davida ka molaetsa o matla, o hatisang ho Davida ’nete ea hore o ne a nyelisitse lentsoe la Jehova. Davida o ile a baka ’me kahoo a se ke a shoela sebe sa hae.—2 Samuele 12:1-14.

11. Jehova o ile a bontša joang hore o lutse a loketse ho tšoarela tabeng ea Manasse?

¹¹ Mohlala oa Morena Manasse oa Juda ke o hlollang haholoanyane tabeng ena, hobane Manasse, ho fapana le Davida, o bile khopo haholo ka nako e telele. Manasse o ile a phahamisa liketso tsa bolumeli tse nyonyehang ka hare ho naha, ho akareletsa le mahlabelo a batho. E ka ’na eaba o ne a boetse a ikarabella bakeng sa ho etsa hore ebe moprofeta ea tšepahalang Esaia o “sehliloe ka lisakha.” (Ba-Heberu 11:37) E le ho otla Manasse, Jehova o ile a lumella hore a isoe Babylona e le motlamuoa. Leha ho le joalo, Manasse o ile a baka ha a le teronkong ’me a kōpa mohau ka tieo. Ha a arabela pakong ena e tiileng, Jehova o ne a ‘lutse a loketse ho tšoarela’—esita le boemong bona bo feteletseng.—2 Likronike 33:9-13.

Ho Fetola Tsela ea ho Etsa Lintho ha Maemo a Macha a Hlaha

12, 13. (a) Tabeng ea Ninive, ke ho fetoha hofe ha boemo ho ileng ha susumetsa Jehova hore a fetole tsela ea ho etsa lintho? (b) Jonase o ile a ipaka e le ea sa nahaneleng maemo joang ho fapana le Jehova Molimo?

¹² Ho nahanela maemo ha Jehova le hona ho bontša hore o ikemiselitse ho fetola tsela eo a rerileng ho etsa lintho ka eona ha maemo a macha a hlaha. Ka mohlala, ha moprofeta Jonase a tsamaea ho pholletsa le literata tsa Ninive ea boholo-holo, molaetsa oa hae o bululetsoeng o ne o le bonolo: Motse ona o moholo o ne o tla senngoa ka mor’a matsatsi a 40. Leha ho le joalo, maemo a ile a fetoha—ka potlako! Batho ba Ninive ba ile ba baka.—Jonase, khaolo ea 3.

¹³ Ho bapisa kamoo Jehova le Jonase ba ileng ba itšoara kateng mabapi le ho fetoha hona ha maemo hoa ruta. Ha e le hantle Jehova o ile a fetola tsela ea koloi ea hae ea leholimo. Tabeng ena o ile a ikamahanya le boemo, a etsa hore e be ea tšoarelang libe ho e-na le ho ba “mohale.” (Exoda 15:3) Jonase, ka lehlakoreng le leng, o ne a sa tenyetsehe ho hang. Ho e-na le ho khema le koloi ea Jehova, o ile a itšoara joaloka terene e nkang thepa kapa sekepe se seholo se nkang litanka tsa lintho tse metsi tse boletsoeng pejana. O ne a ile a bolela timetso, kahoo ho tlameha ho tle timetso! Mohlomong o ile a ikutloa hore phetoho leha e le efe tseleng eo lintho li etsahalang ka eona e ne e tla mo hlabisa lihlong ho batho ba Ninive. Leha ho le joalo, ka mamello Jehova o ile a ruta moprofeta enoa oa hae ea hlooho e thata thuto e sa lebaleheng mabapi le ho nahanela maemo le mohau.—Jonase, khaolo ea 4.

14. Ke hobane’ng ha Jehova a ile a fetola tsela ea hae ea ho etsa lintho tabeng ea moprofeta oa hae Ezekiele?

¹⁴ Jehova o fetotse tsela ea ho etsa lintho maemong a mang—esita le linthong tseo ha ho bapisoa li leng nyenyane. Ka mohlala, nakong eo a neng a laela moprofeta Ezekiele hore a nke karolo tšoantšisong ea boprofeta, litaelo tsa Jehova li ne li akareletsa molao-taelo oa hore Ezekiele a phehe lijo tsa hae mollong oa mantle. Sena se ne se imela moprofeta enoa, ea ileng a hooa, “Oho Morena Jehova!” ’me a kōpa hore ho se etsoe hore a etse ntho eo a e nyonyang hakaalo. Jehova ha a ka a hlokomoloha maikutlo a moprofeta enoa joaloka a se nang mabaka; ho e-na le hoo, O ile a lumella Ezekiele hore a sebelise bolokoe ba khomo e leng libeso tse tloaelehileng linaheng tse ngata ho fihlela kajeno.—Ezekiele 4:12-15.

15. (a) Ke mehlala efe e bontšang hore Jehova o ’nile a ikemisetsa ho mamela le ho arabela batho? (b) See se ka re ruta thuto efe?

¹⁵ Na hase ho thabisang ho nahanisisa ka hloko ka boikokobetso ba Molimo oa rōna Jehova? (Pesaleme ea 18:35, NW) O re phahametse haholo; empa o mamela batho ba sa phethahalang ka mamello ’me o bile o fetola tsela ea hae ea ho etsa lintho ka ho loketseng ka linako tse ling. O ile a lumella Abrahama hore a mo kōpe ka tieo ka nako e telele mabapi le timetso ea Sodoma le Gomorrha. (Genese 18:23-33) ’Me O ile a lumella Moshe hore a hanyetse tlhahiso ea Hae ea ho timetsa Baiseraele ba marabele ’me sebakeng sa bona a etse sechaba se seholo ka Moshe. (Exoda 32:7-14; Deuteronoma 9:14, 19; bapisa le Amose 7:1-6.) Kahoo o ile a beha mohlala o phethahetseng bakeng sa bahlanka ba hae ba batho, ba lokelang ho bonahatsa ho lula ba loketse ho mamela ba bang ka tsela e tšoanang ha ho utloahala ho bile ho khoneha.—Bapisa le Jakobo 1:19.

Ho Nahanela Maemo Tšebelisong ea Bolaoli

16. Jehova o fapane le batho ba bangata joang mabapi le tsela eo a sebelisang bolaoli ba hae ka eona?

¹⁶ Na u kile ua hlokomela hore batho ba bang ha ba ba le bolaoli bo eketsehileng, ba fetoha ba sa nahaneleng? Ka ho fapaneng, Jehova o boemong bo phahameng ka ho fetisisa ba bolaoli bokahohleng, empa ke mohlala o phahameng ka ho fetisisa oa ho nahanela maemo. O sebelisa bolaoli ba hae ka tsela e nahanelang maemo ka ho sa hlōleheng. Ho fapana le batho ba bangata, Jehova hase ea sa sireletsehang mabapi le bolaoli ba hae, kahoo ha a ikutloe a tlamehile ho bo sireletsa ka ho bo boulela—joalokaha eka ho abela ba bang bolaoli bo itseng ho ka sokela ba hae ka tsela e itseng. Ha e le hantle, ha ho ne ho sa na le motho a le mong feela ntle ho eena bokahohleng, Jehova o ile a mo abela bolaoli bo boholo. O ile a etsa Logos “mosebetsi ea ka sehloohong” oa hae, ho tloha ka nako eo ho ea pele a etsa hore lintho tsohle li be teng ka Mora enoa oa hae ea ratoang. (Liproverbia 8:22, 29-31, NW; Johanne 1:1-3, 14; Ba-Kolosse 1:15-17) Hamorao o ile a mo abela “borena [bolaoli, NW] bohle leholimong le lefatšeng.”—Mattheu 28:18; Johanne 5:22.

17, 18. (a) Ke hobane’ng ha Jehova a ile a romela mangeloi Sodoma le Gomorrha? (b) Ke hobane’ng ha Jehova a ile a kōpa mangeloi hore a etse litlhahiso mabapi le mokhoa oa ho thetsa Akabe?

¹⁷ Ka ho tšoanang, Jehova o beha tlhokomelong ea libōpuoa tsa hae tse ngata mesebetsi eo a neng a ka e etsa hamolemo ho li feta. Ka mohlala, ha a ne a bolella Abrahama, “ke sa theoha [ke ee Sodoma le Gomorrha], ke tle ke bone hore na ba fela ba entse kamoo mohoo o fihlileng ho ’na kateng,” o ne a sa bolele hore ho tla ea eena ka seqo. Ho e-na le hoo, Jehova o ile a khetha ho aba bolaoli, a khetha mangeloi hore a mo fumanele boitsebiso bo joalo. O ile a a neha bolaoli hore a tsamaise mosebetsi ona oa ho fumana linnete le ho mo tlalehela.—Genese 18:1-3, 20-22.

¹⁸ Ka lekhetlo le leng, ha Jehova a etsa qeto ea ho ahlola Morena Akabe ea khopo, O ile a mema mangeloi sebokeng sa leholimo hore a fane ka litlhahiso mabapi le hore na morena eo oa mokoenehi a ka “thetsoa” joang e le hore a ka ea ntoeng eo a tla bolaeloa ho eona. Ruri, Jehova, Mohloli oa bohlale bohle, o ne a sa hloke thuso hore a hlahise tsela e molemohali ea ho etsa lintho! Empa, o ile a fa mangeloi seriti ka ho a fa tokelo ea ho hlahisa litharollo le ho fa eo a mo khethileng bolaoli ba ho nka khato.—1 Marena 22:19-22.

19. (a) Ke hobane’ng ha Jehova a lekanyetsa lenane la melao eo a e etsang? (b) Jehova o iponahatsa joang hore o nahanela maemo mabapi le seo a se lebeletseng ho rōna?

¹⁹ Jehova ha a sebelise bolaoli ba hae bakeng sa ho laola ba bang ka ho sa hlokahaleng. Tabeng ena hape o bonahatsa ho nahanela maemo ho ke keng ha bapisoa. Ka hloko o lekanyetsa lenane la melao eo a e etsang ’me o thibela bahlanka ba hae ho “tlōlisa se ngoliloeng” ka ho eketsa melao e boima eo ba iketselitseng eona. (1 Ba-Korinthe 4:6; Liketso 15:28; bapisa le Mattheu 23:4.) Le ka mohla ha a batle ho mamela ho se nang mabaka ho libōpuoa tsa hae, empa hangata o fana ka boitsebiso bo lekaneng ho li tataisa ’me o beha khetho ka pel’a tsona, a etsa hore li tsebe melemo ea ho mamela le liphello tsa ho se mamele. (Deuteronoma 30:19, 20) Ho e-na le ho tšosa batho hore ba mo sebeletse ka lebaka la ho ikutloa ba le molato, la ho soaba, kapa la tšabo, o batla ho finyella lipelo; o batla hore batho ba mo sebeletse ka lebaka la lerato la ’nete ho e-na le ho qobelloa. (2 Ba-Korinthe 9:7) Tšebeletso ena kaofela ea pelo eohle e thabisa pelo ea Molimo, kahoo ha ‘ho thata ho mo khahlisa.’—1 Petrose 2:18, NW; Liproverbia 27:11; bapisa le Mikea 6:8.

20. Ho nahanela maemo ha Jehova ho u ama joang?

²⁰ Na hase ho babatsehang hore ebe Jehova Molimo, ea nang le matla a fetang a motho leha e le ofe pōpong, le ka mohla ha a sebelise matla ao a sa nahanele maemo, le ka mohla ha a a sebelise ho hatella ba bang ka matla kapa ka litšokelo? Leha ho le joalo, batho, e le bao eseng ba bohlokoa ba letho ha ho bapisoa, ba na le histori ea ho hatellana. (Moeklesia 8:9) Ho hlakile hore ho nahanela maemo ke tšoaneleho ea bohlokoa, e re susumeletsang ho rata Jehova haholoanyane. Ka lehlakoreng le leng, seo se ka re susumeletsa ho hlaolela tšoaneleho ena ka borōna. Re ka etsa seo joang? Sehlooho se latelang se tla tšohla taba ena.

[Mongolo o botlaaseng ba leqephe]

U ne U Tla Araba Joang?

◻ Lebitso la Jehova le pono ea koloi ea hae ea leholimo li hatisa ho ikamahanya ha hae le maemo joang?

◻ Ho nahanela maemo ke eng, hona ke hobane’ng ha e le letšoao la bohlale ba bomolimo?

◻ Jehova o bontšitse ka litsela life hore o ‘lutse a loketse ho tšoarela’?

◻ Ke hobane’ng ha Jehova a khethile ho fetola tsela eo a rerileng ho etsa lintho ka eona maemong a itseng?

◻ Jehova o bontša ho nahanela maemo joang tseleng eo a sebelisang bolaoli ka eona?

[Setšoantšo se leqepheng la 10]

Ke hobane’ng ha Jehova a ile a tšoarela Morena Manasse ea khopo?