Ho Tloha ho Beng Liithuti Tse Atlehileng ho ea ho Beng Baromuoa ba Atlehileng
WILL ha a bua ka koetliso eo eena le mosali oa hae, Patsy ba sa tsoa feta ho eona ka katleho e le liithuti tsa sehlopha sa bo103 tsa Sekolo sa Bibele sa Gileade sa Watchtower o ile a khotsa: “Ke ntse ke sitoa ho lumela hore re bile le tokelo ena!” Zahid le Jeni ba ile ba lumela. Ba ile ba re: “Re ikutloa re filoe tokelo e khethehileng hore ebe re mona.” Mosebetsi oa sekolo oa liithuti tsohle o ne o le motle. Joale li ne li labalabela ho qalisa mosebetsi oa tsona e le baromuoa. Empa pele, lenaneong la kabo ea mangolo ka la 6 September, 1997, li ile tsa amohela keletso e lerato e neng e tla li thusa ho atleha likabelong tsa tsona tsa boromuoa.
Molula-setulo oa lenaneo lena e ne e le Theodore Jaracz, setho sa Sehlopha se Busang. O ile a bontša hore—hammoho le lelapa la Bethele le baemeli ba makala a 48 a Mokhatlo oa Watch Tower—metsoalle ea liithuti le beng ka tsona ba tsoang Canada, Europe, Puerto Rico le United States ba ne ba le teng ho tiisetsa liithuti hore baa li tšehetsa le ho li rata. Mor’abo rōna Jaracz o ile a hlokomela hore baromuoa ba romeloang ke likereke tsa Bokreste-’mōtoana hangata ba ’nile ba khelosoa mosebetsing oa boromuoa ’me ba qala ho lelekisa lipakane tsa thuto ea sekolo kapa esita le ho tšoaseha lipolotiking. Ho fapana le hoo, liithuti tse qetileng koetliso ea Gileade li etsa seo li se koetliselitsoeng. Li ruta batho Bibele.
Joale Robert Butler ea tsoang ofising ea Mokhatlo ea Brooklyn o ile a fana ka puo eo sehlooho sa eona se reng “Atlehisang Tsela ea Lōna.” O ile a hlalosa hore le hoja batho ba lekanya katleho ka leruo la chelete kapa ka seo ba se finyeletseng, seo e hlileng e leng taba ke hore na Molimo o lekanya katleho joang. Tšebeletso ea Jesu e bile e atlehileng, eseng hobane a ile a sokolla batho ba bangata, empa hobane a ile a tšepahala kabelong ea hae. Jesu o ile a tlisetsa Jehova khanya, ’me o ile a lula a hloekile lefatšeng. (Johanne 16:33; 17:4) Tsena ke lintho tseo Mokreste e mong le e mong a ka li etsang.
Robert Pevy, eo e kileng ea e-ba moromuoa linaheng tsa Bochabela o ile a eletsa: “E-bang Makhoba a Batho Bohle.” Moapostola Pauluse e ne e le moromuoa ea atlehang. Lekunutu la hae e ne e le lefe? O ile a iketsa lekhoba la bohle. (1 Bakorinthe 9:19-23) Sebui se ile sa hlalosa: “Seithuti se qetileng koetliso ea Gileade se nang le boikutlo boo se ke ke sa talima tšebeletso ea boromuoa e le tsela e ’ngoe ea ho phahamisoa mosebetsing, monyetla o lebisang maemong a bohlokoa haholoanyane ka har’a mokhatlo o hlophisitsoeng. Moromuoa o ea kabelong ea hae a e-na le pakane e le ’ngoe feela—e leng ho sebeletsa, hobane ke sona seo makhoba a se etsang.”
Gerrit Lösch oa Sehlopha se Busang, a thehile keletso ea hae haholo-holo ho 2 Bakorinthe khaolo ea 3 le ea 4, o ile a khothalletsa liithuti ho “Bonahatsa Khanya ea Jehova Joaloka Liipone.” O ile a li hopotsa hore tsebo ea Molimo e tšoana le leseli le khantšang Mokreste ha a bula pelo ea hae ho e amohela. Re bonahatsa leseli leo ka ho bolela litaba tse molemo le ka ho ba le boitšoaro bo botle. O ile a lumela: “Ka linako tse ling u ka ’na ua ikutloa u sa tšoanelehe. Ha u e-ba le boikutlo bo joalo, tšepa Jehova, e le hore ‘matla a ka ’nģane ho se tloaelehileng e ka ba a Molimo.’” (2 Bakorinthe 4:7) Ha a pheta mantsoe a Pauluse a tlalehiloeng ho 2 Bakorinthe 4:1, Mor’abo rōna Lösch o ile a ipiletsa ho liithuti: “Le se ke la tlohela kabelo ea lōna ea boromuoa. Etsang hore liipone tsa lōna li lule li hloekile!”
Karl Adams, e mong oa bakoetlisi sekolong sa Gileade, o ile a fana ka puo eo sehlooho sa eona se thahasellisang se reng “Jehova o Kae?” Potso ena ha e bue ka tulo eo Molimo a leng ho eona bokahohleng, empa e bua ka tlhokahalo ea ho nahana ka pono ea Jehova le litsela tseo a li sebelisang ho fana ka tataiso. O ile a re: “Tlas’a khatello, esita le motho ea bileng tšebeletsong ea Jehova ka nako e telele a ka ’na a lahleheloa ke pono eo.” (Jobo 35:10) Ho thoe’ng ka mehla ea rōna ea kajeno? Ka 1942, batho ba Molimo ba ne ba hloka tataiso. Na mosebetsi oa ho bolela o ne o fihlile qetellong kapa na ho ne ho e-na le mosebetsi o eketsehileng o lokelang ho etsoa? Thato ea Jehova e ne e le efe bakeng sa batho ba hae? Ha ba ntse ba ithuta Lentsoe la Molimo, karabo e ile ea hlaka. Mor’abo rōna Adams o ile a re: “Pele selemo se fela, ho ne ho se ho entsoe litokiso bakeng sa Sekolo sa Bibele sa Gileade sa Watchtower.” Ka sebele Jehova o hlohonolofalitse mosebetsi oa baromuoa ba rometsoeng ke sekolo seo.
Mark Noumair e bile eena mokoetlisi oa bobeli ea ileng a fana ka puo. Puong ea hae, eo sehlooho sa eona se neng se re “U Tla Sebelisa Talenta ea Hao Joang?,” o ile a khothalletsa liithuti ho sebelisa koetliso eo li e fumaneng Gileade hang ha li fihla likabelong tsa tsona tse ncha. O ile a re: “Ikitlaelletseng ho tloaela ba bang. Thahasellang batho le mokhoa oa bona oa bophelo. Labalabelang ho ithuta litloaelo, histori le lintho tseo batho ba naha eo ba li nkang li qabola. Haeba le ithuta puo kapele, le tla nolofalloa ke ho tloaela kabelo ea lōna.”
Liithuti Tse Chesehang li Fumana Thabo Tšebeletsong
Ho phaella boikitlaetsong ba tsona lithutong ha li le Gileade, liithuti li ne li abetsoe liphuthehong tse 11 tsa sebaka seo. Mafelong a beke, li ne li kopanela ka cheseho mosebetsing oa boboleli. Wallace Liverance eo e leng mokoetlisi sekolong sa Gileade o ile a mema tse ’maloa ho tsona hore li phetele bamameli tse ling tsa liphihlelo tsa tsona. Ho ne ho totobetse hore li thabile ha li ntse li pheta liphihlelo tseo li bileng le tsona ha li ntse li paka litsing tsa mabenkele, moo ho pakoang likoloi, tšimong ea khoebo, seterateng le ka ntlo le ntlo. Tse ling tsa tsona li ile tsa batla litsela tsa ho finyella batho ba buang lipuo tsa linaha tse ling ba neng ba lula le ho sebetsa tšimong ea phutheho ea tsona. Litho tsa sehlopha sa bo103 li ile tsa qalisa bonyane lithuto tsa Bibele tse leshome le ho li khanna nakong ea likhoeli tse hlano tsa koetliso ea tsona.
Bao e Bileng Baromuoa ka Nako e Telele ba Ntša Makunutu a Katleho
Ka mor’a karolo ena e thabisang ea lenaneo, Patrick Lafranca le William Van de Wall ba ile ba memela litho tse supileng tsa Likomiti tsa Makala hore li lokolise seo li ithutileng sona mosebetsing oa tsona oa boromuoa molemong oa sehlopha sena. Li ile tsa eletsa liithuti tse qetileng koetliso ea sekolo ho nka kabelo ea tsona ea boromuoa e le e tsoang ho Jehova le ho ikemisetsa ho khomarela kabelo eo. Li ile tsa bua ka tšusumetso e molemo eo baromuoa ba koetlisitsoeng Gileade ba bileng le eona mosebetsing oa linaha tse ling.
Litho tsee tsa Likomiti tsa Makala li ile tsa thusoa ke’ng ho sebeletsa ka lilemo tse mashome e le baromuoa ba thabileng ba behang litholoana? Li ile tsa sebetsa haufi-ufi le barab’abo rōna ba libakeng tseo ’me tsa ithuta ho bona. Li ile tsa ikitlaelletsa ho ithuta puo ea moo hang feela ha li fihla likabelong tsa tsona. Li ile tsa ithuta ho tenyetseha le maemo le ho itloaetsa litloaelo tsa libaka tseo. Charles Eisenhower, seithuti se qetileng koetliso sehlopheng sa pele sa sekolo sa Gileade ’me e bile moromuoa ka lilemo tse 54, o ile a bolela “makunutu” a mahlano ao baromuoa ba atlehang ba ithutileng ’ona: (1) Ho ithuta Bibele kamehla, (2) ho ithuta puo, (3) ho ba mafolofolo tšebeletsong, (4) ho boloka khotso lehaeng la baromuoa, le (5) ho rapela Jehova kamehla. Liithuti li ne li sa khahloa feela ke keletso eo e sebetsang eo li e fumaneng empa li ne li boetse li khahliloe ke thabo e totobetseng eo baromuoa bana ba nang le phihlelo ba nang le eona tšebeletsong ea Jehova. Ho joalokaha Armando le Lupe ba ile ba bolela, “ba thabile ha ba bua ka bophelo ba bona.”
Ka mor’a lipuisano, ho ne ho setse puo e le ’ngoe. Albert Schroeder, setho sa Sehlopha se Busang, o ile a khetha sehlooho sena se reng “Botsamaisi bo Tšepahalang ba Lentsoe la Molimo bo Senola Mahakoe a Bohlokoa a ’Nete.” Kaha Bibele ke buka ea ho ithuta e ka sehloohong Sekolong sa Gileade, liithuti li ne li thahasella seo a neng a tla se bua. Mor’abo rōna Schroeder o ile a bontša hore ha mosebetsi oa New World Translation of the Holy Scriptures o ne o qalisoa lilemong tse 50 tse fetileng, litho tse tlotsitsoeng tsa Komiti ea Phetolelo ea Bibele ea Lefatše le Lecha ha lia ka tsa batla tumello ea batho empa li ile tsa tšepa tataiso ea moea o halalelang. (Jeremia 17:5-8) Leha ho le joalo, morao tjena ba bang ba boholong ba hlokometse boleng bo phahameng ba New World Translation. Lengolong le eang ho Mokhatlo, setsebi se seng se ile sa ngola: “Ke tseba sengoliloeng sa boleng bo phahameng ha ke se bona, ’me ‘Komiti [ea lōna] ea Phetolelo ea Bibele ea Lefatše le Lecha’ e entse mosebetsi oa eona hantle.”
Ka mor’a puo ena, liithuti li ile tsa amohela mangolo a tsona, ’me bamameli ba tsebisoa moo li abetsoeng teng. Litho tsa sehlopha sena li ile tsa ameha maikutlo motsotsong ona. Ha moemeli oa sehlopha a ntse a bala lengolo la kananelo, ba bangata ba ne ba amehile maikutlo ka lebaka la kananelo ’me ba tletse likhapha ka mahlong. Liithuti tse ling li ne li ’nile tsa lokisetsa mosebetsi oa boromuoa ka nako e telele. Ha ba hlokomela hore thupelo ea Gileade e ne e tla tsamaisoa ka Senyesemane, ba seng bakae ba ile ba ea liphuthehong tsa Senyesemane bakeng sa ho ntlafatsa tsebo ea bona ea puo eo. Ba bang ba ile ba fallela moo tlhokahalo ea bo-pula-maliboho e leng khōloanyane, ebang ke naheng ea habo bona kapa ka ntle ho eona. Ba bang ba ile ba itokisa ka ho bala liphihlelo, ho etsa lipatlisiso kapa ho shebella k’hasete ea video ea Mokhatlo e reng To the Ends of the Earth khafetsa.
Will le Patsy, ba boletsoeng qalong, ba ne ba hloletsoe ke thahasello eo liithuti li neng li e bontšoa. “Batho ba neng ba sa re tsebe ba ne ba re kopa ba bile ba re nka lifoto. Setho se seng sa Sehlopha se Busang se ile sa re tšoara ka letsoho ’me sa re, ‘Re motlotlo ka lōna!’” Ha ho pelaelo hore, liithuti tsa sehlopha sa bo103 li ratoa haholo. Li koetlisitsoe hantle. Thuto eo li e fumaneng Gileade e tla li lumella ho etsa phetoho ea ho tloha ho beng liithuti tse atlehileng ho ea ho beng baromuoa ba atlehileng.
[Lebokose le leqepheng la 23]
Lipalo-palo Tsa Sehlopha
Palo ea linaha tse emetsoeng: 9 Palo ea linaha tseo ba abetsoeng ho tsona: 18 Palo ea liithuti: 48 Palo ea malapa: 24 Karolelano ea lilemo tsa bona: 33 Karolelano ea lilemo tseo ka tsona ba bileng ’neteng: 16 Karolelano ea lilemo tseo ka tsona ba bileng tšebeletsong ea nako e tletseng: 12
[Setšoantšo se leqepheng la 23]
Sehlopha sa Bo103 sa Sekolo sa Bibele sa Gileade sa Watchtower se Abeloang Mangolo
Lethathamong le ka tlaase mona, mela e baloa ho tloha ka pele ho ea ka morao, ’me mabitso a thathamisitsoe ho tloha ka letsohong le letšehali ho ea ho le letona moleng ka mong.
(1) Bunn, A.; Dahlstedt, M.; Campaña, Z.; Boyacioglu, R.; Ogando, G.; Nikonchuk, T.; Melvin, S.
(2) May, M.; Mapula, M.; Lwin, J.; Hietamaa, D.; Hernandez, C.; Boyacioglu, N.; Sturm, A.; Melvin, K.
(3) Thom, J.; Mapula, E.; Nault, M.; Teasdale, P., Wright, P.; Pérez, L.; Shenefelt, M.; Pak, H.
(4) Murphy, M.; Campaña, J.; Stewart, S.; Cereda, M.; Reed, M.; Pérez, A.; Teasdale, W.; Pak, J.
(5) Stewart, D.; Wright, A.; Cereda, P.; Nikonchuk, F.; Reed, J.; Hietamaa, K.; Ogando, C.; Shenefelt, R.
(6) Murphy, T.; Hernandez, J.; Nault, M.; Bunn, B.; Thom, R.; Dahlstedt, T.; Lwin, Z.; May, R.; Sturm, A.
[Setšoantšo se leqepheng la 24]
Re ea hokae?