Ba Ile ba Etsa Thato ea Jehova

Pauluse o Paka ka Sebete ka Pel’a ba Boholong

HO NE ho bonahala phapang e khōlō pakeng tsa banna bana ba babeli. E mong o ne a roetse moqhaka ha e mong a tlanngoe ka mahlaahlela. E mong e ne e le morena; e mong e le motšoaruoa. Ka mor’a ho qeta lilemo tse peli a le teronkong, joale moapostola Pauluse o ne a eme ka pel’a ’musi oa Bajuda, Heroda Agripa II. Morena le molekane oa hae, Bernise, ba ne ba tlile “ka pontšo e khōlō ea makōkō ’me ba kena ka kamoreng ea bamameli hammoho le balaoli ba sesole hammoho le banna ba boemo bo phahameng motseng.” (Liketso 25:23) Buka e ’ngoe ea litšupiso e re: “Ho ka etsahala hore ebe batho ba makholo a ’maloa ba ne ba le teng.”

’Musisi ea sa tsoa khethoa, Festase, o ne a lokiselitse hore ho tšoaroe seboka seo. Eo e neng e le ’musisi pele ho eena, Felixe, o ne a khotsofaletse ho tlohella Pauluse a le boemong boo bo sithabetsang ba teronko. Empa Festase o ile a batlisisa bonnete ba liqoso tseo Pauluse a neng a qosoa ka tsona. Pauluse o ile a tsitlella ho bolela hore ha a na molato hoo a neng a bile a batla ho teka taba ea hae ho Sesare! Taba ea Pauluse e ile ea tsosa thahasello ea Morena Agripa. O ile a re: “Le ’na ka bonna ke ne ke tla rata ho utloa motho eo.” Festase o ile a lokisetsa seo ka potlako, mohlomong a ipotsa hore na morena o tla nahana joang ka motšoaruoa enoa ea ikhethang.—Liketso 24:27–25:22.

Letsatsing le latelang, Pauluse o ile a iphumana a eme ka pel’a letšoele le leholo la ba boholong. O ile a re ho Agripa: “Ke inka ke le ea thabileng hore ebe ke tla itšireletsa ka pel’a hao letsatsing lena, haholo-holo kaha u le setsebi litloaelong tsohle hammoho le litsekong har’a Bajuda. Ka hona ke kōpa hore u nkutloe ka ho se fele pelo.”—Liketso 26:2, 3.

Pauluse o Itšireletsa ka Sebete

Ha a qala, Pauluse o ile a bolella Agripa ka bophelo ba hae ba nakong e fetileng ha e ne e le mohlorisi oa Bakreste. O ile a re: ‘Ke ile ka leka ho ba qobella ho latola tumelo. Ke ile ka ba ka ea bohōleng ba ho ba hlorisa esita le metseng e ka ntle.’ Pauluse o ile a tsoela pele ho pheta kamoo a ileng a ba le pono e makatsang kateng eo ho eona Jesu ea tsositsoeng bafung a ileng a mo botsa: “Ke hobane’ng ha u ntlhorisa? Ho ’na u raha litsenene ho thatafaletsa uena.”a—Liketso 26:4-14.

Joale Jesu o ile a laela Saule hore a pakele batho ba lichaba tsohle “lintho tseo u li boneng hammoho le lintho tseo ke tla u bontša tsona mabapi le ’na.” Pauluse o ile a bolela hore o ile a phehella ka mafolofolo ho phethahatsa kabelo ea hae. Leha ho le joalo, o ile a bolella Agripa hore “ka lebaka la lintho tsena Bajuda ba ile ba ntšoara ka tempeleng ’me ba leka ho mpolaea ka mabifi.” Ha a ipiletsa thahasellong ea Agripa Tsamaisong ea Bolumeli ea Sejuda, Pauluse o ile a hatisa hore bopaki ba hae bo ne bo hlile bo akarelletsa ho se “bolele letho haese lintho tseo Baprofeta hammoho le Moshe ba ileng ba bolela hore li ne li tla etsahala” mabapi le lefu la Mesia le tsoho ea hae.—Liketso 26:15-23.

Festase o ile a mo kena hanong. A hooa: “Thuto e ngata e u khannela bohlanyeng!” Pauluse o ile a araba: “Ha ke hlanye, Mohlomphehi ea Khabane Festase, empa ke bua lipolelo tsa ’nete le tsa ho hlaphoheloa kelellong.” Joale Pauluse a re ho Agripa: “Morena eo ke buang le eena ka bolokolohi ba puo o tseba hantle ka lintho tsena; etsoe ke susumelletsoa ho lumela hore ha ho le e ’ngoe ea lintho tsena e phonyohang tlhokomelo ea hae, kaha ntho ena ha ea etsetsoa sekhutlong.”—Liketso 26:24-26.

Joale Pauluse o ile a bua le Agripa ka ho toba. “Na uena, Morena Agripa, u lumela Baprofeta?” Ha ho pelaelo hore potso eo e ile ea etsa hore Agripa a ikutloe a sa phutholoha. Etsoe o ne a tlameha ho sireletsa seriti sa hae, ’me ho lumellana le Pauluse e ne e tla ba ho emela seo Festase a neng a se bitsa “bohlanya.” Mohlomong a hlokomela ho tsilatsila ha Agripa, Pauluse o ile a ikaraba potsong ea hae. O ile a re: “Kea tseba hore ua lumela.” Joale Agripa o ile a bua, empa o ne a sa batle ho itlama ka seo a se buang. O ile a re ho Pauluse: “Ka nako e khutšoanyane u ne u tla ntšusumelletsa ho lumela ho ba Mokreste.”—Liketso 26:27, 28.

Ka bohlale Pauluse o ile a sebelisa polelo eo ea Agripa e koekoetlang taba bakeng sa ho hlahisa ntlha e matla. O ile a re: “Ke ne nka lakatsa ho Molimo hore ebang ke ka nako e khutšoanyane kapa ka nako e telele eseng uena feela empa le bohle ba nkutloang kajeno e ne e ka ba batho ba kang ’na kamoo ke leng kateng, ka ntle ho litlamo tsena.”—Liketso 26:29.

Agripa le Festase ha baa ka ba fumana letho ho Pauluse le etsang hore a tšoaneloe ke lefu kapa ho kenngoa teronkong. Leha ho le joalo, kōpo ea hae ea ho teka taba ea hae ho Sesare e ne e ke ke ea qheleloa ka thōko. Ke kahoo Agripa a ileng a re ho Festase: “Monna enoa a ka be a lokolotsoe haeba a ne a sa ipiletsa ho Sesare.”—Liketso 26:30-32.

Thuto eo re Ithutang Eona

Mokhoa oa Pauluse oa ho paka ka pel’a ba boholong ke mohlala o ikhethang bakeng sa rōna. Ha a bua le Morena Agripa, Pauluse o ile a sebelisa temoho. Ntle ho pelaelo o ne a tseba manyofonyofo a amang Agripa le Bernise. Lenyalo la bona e ne e le la batho ba amanang haufi, kaha Bernise e ne e hlile e le khaitseli ea Agripa. Empa lekhetlong lena Pauluse ha aa ka a khetha ho fana ka thuto ea boitšoaro. Ho e-na le hoo, o ile a hatella lintlha tseo eena le Agripa ba neng ba lumellana ho tsona. Ho feta moo, le hoja Pauluse a ne a rutiloe ke Mofarisi Gamaliele, o ile a lumela hore Agripa e ne e le setsebi sa litloaelo tsa Bajuda. (Liketso 22:3) Ho sa tsotellehe tsela eo Agripa a neng a itšoere ka eona, Pauluse o ile a bua le eena ka tlhompho kaha Agripa o ne a le boemong ba bolaoli.—Baroma 13:7.

Ha re ntse re paka ka sebete ka seo re se lumelang, pakane ea rōna hase ho pepesa kapa ho nyatsa mekhoa e sa hloekang ea bamameli ba rōna. Ho e-na le hoo, e le hore re ba nolofaletse ho amohela ’nete, re lokela ho hatisa lintlha tse hahang tsa litaba tse molemo, re hatelle tšepo eo ka ho tšoanang re nang le eona. Ha re bua le batho ba baholo kapa ba nang le matla a ho laela, re lokela ho hlokomela boemo ba bona. (Levitike 19:32) Ka tsela ena, re ka khona ho etsisa Pauluse, ea ileng a re: “Ke fetohile lintho tsohle ho batho ba mefuta eohle, e le hore ka mekhoa eohle nka pholosa ba bang.”—1 Bakorinthe 9:22.

[Mongolo o botlaaseng ba leqephe]