Ke Hobane’ng ha U Lokela ho Itela?

Bill ke monna oa lelapa oa sehahi ea lilemong tsa bo-50 ea rutang mahlale a ho haha. Selemo kaofela o sebelisa chelete ea hae hore a qete libeke tse ngata a thusa ho lokisetsa le ho haha Liholo tsa ’Muso tsa liphutheho tsa Lipaki tsa Jehova. Emma o lilemo li 22, ’me ke lesoha le rutehileng le le tsebang mosebetsi. Ho e-na le ho phehella lipakane tsa hae feela le menyaka, o qeta lihora tse 70 khoeli ka ’ngoe e le mosebeletsi ea thusang batho ho utloisisa Bibele. Maurice le Betty ba tlohetse mosebetsi ka lebaka la ho hōla. Ho e-na le ho hlaba khobe ka lemao hona joale, ba falletse naheng e ’ngoe ho ea thusa batho ba moo ho ithuta ka merero ea Molimo ka lefatše lena.

BATHO bana ha ba inke hore ba khethehile kapa hore ba na le matla a fetang a ba bang. Ke batho feela ba tloaelehileng ba etsang seo ba nkang hore se nepahetse. Ke hobane’ng ha ba sebelisa nako ea bona, matla a bona, bokhoni ba bona le maruo a bona molemong oa ba bang? Ba susumetsoa ke lerato le tebileng ho Molimo le moahisani. Lerato lena le hotelitse ka ho e mong le e mong oa bona moea oa boitelo oa ’nete.

Re bolela eng ka moea oa boitelo? Ha e le hantle, ho itela ha ho hloke ho itšehla thajana kapa ho itšotla. Ha ho hlokahale hore e be ho itela ho feteletseng hoo ho re hlokisang thabo kapa khotsofalo. Joalokaha The Shorter Oxford English Dictionary e beha taba, ho itela ho bolela feela “ho behella ka thōko lithahasello, thabo le litakatso tsa hao, molemong oa hore u phethe mesebetsi eo u tšoanelang ho e etsa kapa oa ho itella ba bang.”

Jesu Kreste—Mohlala o ka Sehloohong

Mora oa Molimo ea tsoetsoeng a ’notsi, Jesu Kreste, ke eena mohlala o ka sehloohong oa motho ea nang le moea oa boitelo. Pele e e-ba motho oa nama, e tlameha ebe bophelo ba hae bo ne bo thabisa bo bile bo khotsofatsa ka mokhoa o fetisisang. O ne a ntšana se inong le Ntat’ae le libōpuoa tse ling tsa moea. Ho feta moo, e le “mosebetsi ea hloahloa,” Mora enoa oa Molimo o ne a sebelisa bokhoni ba hae mesebetsing e batlang kelello le e thabisang. (Liproverbia 8:30, 31, NW) Ka sebele o ne a phela maemong a phahameng ho feta eng le eng e neng e ka thabeloa ke motho ea ruileng ka ho fetisisa lefatšeng. Leholimong, o ne a hlahlama Jehova Molimo ka boemo bo phahameng le tokelo.

Leha ho le joalo, Mora oa Molimo “o ile a ikhokhotha ’me a nka sebōpeho sa lekhoba ’me ea e-ba ea tšoanang le batho.” (Bafilippi 2:7) Ka boithatelo o ile a tela bophahamo bohle ba hae ka ho ba motho oa nama le ka ho nyehela bophelo ba hae e le thekollo e le hore a etsolle tšenyo e bakuoeng ke Satane. (Genese 3:1-7; Mareka 10:45) Seo se ne se bolela ho phela har’a moloko oa batho ba baetsalibe lefatšeng le rapaletseng matleng a Satane Diabolose. (1 Johanne 5:19) Hape se ne se bolela ho mamella tšotleho le tšitiso. Leha ho le joalo, ho sa tsotellehe hore na se ile sa mo hloka eng, Jesu Kreste o ne a ikemiselitse ho etsa thato ea Ntat’ae. (Matheu 26:39; Johanne 5:30; 6:38) Sena se ile sa leka lerato la Jesu le botšepehi ba hae ka ho feletseng. O ne a ikemiselitse ho tela ho hokae? Moapostola Pauluse o itse: “O ile a ikokobetsa ’me a mamela ho isa lefung, e, lefu thupeng ea tlhokofatso.”—Bafilippi 2:8.

“Bolokang Boikutlo Bona ba Kelello ho Lōna”

Re khothalletsoa ho latela mohlala oa Jesu. Pauluse o ile a khothatsa tjena: “Bolokang boikutlo bona ba kelello ho lōna bo neng bo le teng le ho Kreste Jesu.” (Bafilippi 2:5) See re ka se etsa joang? Tsela e ’ngoe ke ka ho ‘beha leihlo, eseng thahasellong ea botho litabeng tsa rōna feela, empa hape le thahasellong ea botho ho tsa ba bang.’ (Bafilippi 2:4) Lerato la ’nete “ha le batle lithahasello tsa lona.”—1 Bakorinthe 13:5.

Hangata batho ba tsotellang ba ’nile ba bontša boitelo ba ho sebeletsa ba bang. Leha ho le joalo, kajeno batho ba bangata ba sekametse boithating. Lefatše le na le moea oa ho iketelletsa pele. Ho hlokahala hore re ikalose moeeng oa lefatše hobane haeba o atleha ho fetola pono ea rōna le boikutlo ba rōna, ho ka etsahala hore re etelletse pele lithahasello tsa rōna. Joale eng le eng eo re e etsang—kamoo re sebelisang nako ea rōna, matla a rōna le maruo a rōna kateng—e tla laoloa ke maikutlo a boithati. Kahoo, ho hlokahala hore re loantše tšusumetso ena ka matla.

Ka linako tse ling, esita le keletso e etsoang ka moea o motle e ka bobisa moea oa rōna oa boitelo. Ha moapostola Petrose a ne a hlokomela moo tsela ea boitelo ea Jesu e lebisang teng, o ile a re: “Ikhauhele, Morena.” (Matheu 16:22) Ho hlakile hore o ne a thatafalloa ke hore Jesu a ithaopele ho shoela bobusi ba Ntat’ae le poloko ea moloko oa batho. Kahoo o ile a leka ho nyahamisa Jesu hore a se ke a phehella tsela e joalo.

“Itatole”

Jesu o ile a itšoara joang? Tlaleho e re: “A reteleha, a talima barutuoa ba hae ’me a khalemela Petrose ka matla, ’me a re: ‘E-ea ka mor’a ka, Satane, hobane u nahana, eseng menahano ea Molimo, empa ea batho.’” Ka mor’a moo Jesu a bitsetsa bongata le barutuoa ba hae ho eena ’me a re ho bona: “Haeba leha e le mang a batla ho ntšala morao, a a itatole ’me a nke thupa ea hae ea tlhokofatso ’me a ntatele ka ho tsoelang pele.”—Mareka 8:33, 34.

Lilemo tse ka bang 30 ka mor’a hore Petrose a fe Jesu keletso ena, o ne a bontša hore ka nako eo oa utloisisa hore na boitelo ke eng. Ha aa ka a khothalletsa balumeli-’moho le eena hore ba qhoaolle likobo le ho iqenehela. Ho e-na le hoo, Petrose o ile a ba khothalletsa hore ba hlomelle likelello tsa bona bakeng sa tšebetso le hore ba khaotse ho ea ka litakatso tsa lefatše tseo ba neng ba e-na le tsona pele. Ho sa tsotellehe liteko, thato ea Molimo e ne e lokela ho etelletsoa pele bophelong ba bona.—1 Petrose 1:6, 13, 14; 4:1, 2.

Tsela e molemo ka ho fetisisa eo leha e le mang ho rōna a ka e phehellang ke hore re phelele Jehova, re latele Jesu Kreste ka botšepehi ’me re tlohele Molimo hore a tsamaise liketso tsa rōna. Ntlheng ena, Pauluse o ile a beha mohlala o motle. Kaha o ne a utloisisa hore boemo bo potlakile a bile a e-na le teboho ho Jehova o ile a susumelletseha ho tela lipakane kapa litebello tsa lefatše tse ka beng li ile tsa mo khelosa ho etseng thato ea Molimo. O ile a re: “Ka lehlakoreng la ka ka nyakallo e khōlō ka sebele ke tla sebelisa le ho sebelisoa ka ho feletseng.” (2 Bakorinthe 12:15) Pauluse o ile a sebelisa matla a hae ho ntšetsa pele lithahasello tsa bomolimo, eseng tsa hae.—Liketso 20:24; Bafilippi 3:8.

Re ka itlhahloba joang ho bona hore na re na le pono e kang ea moapostola Pauluse? Re ka ’na ra ipotsa lipotso tse kang tsena: Nako ea ka, matla a ka, bokhoni ba ka le maruo a ka, ke li sebelisa joang? Na limpho tsee le tse ling tsa bohlokoa ke li sebelisetsa lithahasello tsa ka feela, kapa ke li sebelisetsa ho thusa ba bang? Na nkile ka nahana ka ho kopanela haholoanyane mosebetsing o pholosang bophelo oa ho bolela litaba tse molemo, mohlomong ke le ’moleli oa ’Muso oa nako e tletseng? Na nka ameha haholoanyane mesebetsing e kang ho haha kapa ho lokisa Liholo tsa ’Muso? Na ke sebelisa menyetla ea ho thusa bahloki? Na ke fa Jehova se molemohali seo ke nang le sona?—Liproverbia 3:9.

“Ho na le Thabo e Eketsehileng ho Faneng”

Empa, na e hlile ke bohlale hore motho a itele? Ho joalo ka sebele! Pauluse o tsebile ka tse mo hlahetseng hore moea o joalo o putsa haholo. O ile oa mo thabisa haholo oa ba oa mo khotsofatsa ka tsela e hlollang. O ile a hlalosetsa banna ba baholo ba Efese sena ha a kopana le bona Mileta. Pauluse o ile a re: “Ke le bontšitse linthong tsohle hore ka ho sebetsa ka tsela [e bontšang boitelo] le lokela ho thusa ba fokolang, ’me le lokela ho hopola mantsoe a Morena Jesu, ha eena ka boeena a re, ‘Ho na le thabo e eketsehileng ho faneng ho feta e teng ho amoheleng.’” (Liketso 20:35) Batho ba limilione ba fumane hore ho bontša moea oa mofuta ona ho thabisa haholo le hona joale. Ho tla thabisa le nakong e tlang ha Jehova a putsa ba etelletsang lithahasello tsa hae le tsa ba bang ka pele ho tsa bona.—1 Timothea 4:8-10.

Ha Bill a ne a botsoa hore na ke hobane’ng ha a ikitlaelletsa ho thusa ba bang ho haha Liholo tsa ’Muso, o ile a re: “Ke khotsofalla haholo ho thusa ka tsela ena liphutheho tseo hangata e leng tse nyenyane. Ke thabela ho sebelisa bokhoni leha e le bofe le tsebo leha e le efe e khethehileng eo ke nang le eona molemong oa ba bang.” Ke hobane’ng ha Emma a khethile ho tela matla a hae le bokhoni hore a thuse ba bang ho ithuta ’nete ea Mangolo? “Ha ke bone eka ho na le ho hong hoo ke neng nka ho etsa. Kaha ke sa le mocha ebile ke khona ho ho etsa, ke batla ho etsa ka hohle kamoo nka khonang ho khahlisa Jehova le ho thusa ba bang. Ho ’na hase bothata ho tela melemo e itseng ea lintho tse bonahalang. Ke mpa ke etsa feela seo ke tšoanelang ho se etsa ka lebaka la seo Jehova a nketselitseng sona.”

Maurice le Betty ha ba ikoahlaele hore ba tetse bophelo bo mabothobotho, ka mor’a lilemo tsa mosebetsi o boima oa ho hōlisa le ho hlokomela bana ba bona. Ha e le mona ba tlohetse mosebetsi ka lebaka la ho hōla, ba batla ho tsoela pele ba sebelisa bophelo ba bona ba etsa ho hong ho molemo le ho nang le morero. Ba re: “Ha re batle ho hlaba khobe ka lemao hona joale. Ho thusa ba bang ho ithuta ka Jehova naheng esele ho re fa monyetla oa ho tsoela pele re etsa ho hong ho nang le morero.”

Na u ikemiselitse ho itela? Ho ke ke ha e-ba bonolo. Ho na le ntoa e sa feleng lipakeng tsa litakatso tsa rōna batho ba sa phethahalang le takatso ea rōna e tiileng ea ho khahlisa Molimo. (Baroma 7:21-23) Empa ke ntoa e ka hlōloang haeba re tlohella hore Jehova a tataise bophelo ba rōna. (Bagalata 5:16, 17) Ka sebele o tla hopola mosebetsi oa rōna o bontšang boitelo tšebeletsong ea hae ’me o tla re hlohonolofatsa ka ho enneng. Ka sebele, Jehova Molimo o tla ‘thibolla liphororo tsa leholimo, a re tšollele hlohonolofatso ka tekanyo e fetisisang.’—Malakia 3:10; Baheberu 6:10.

[Setšoantšo se leqepheng la 23]

Jesu o ne a e-na le moea oa boitelo. Na u na le oona?

[Litšoantšo tse leqepheng la 24]

Pauluse o ile a sebelisa matla a hae ka ho khetheha mosebetsing oa ho bolela ka ’Muso