Lipotso Tse Tsoang ho Babali

Ke hobane’ ng ha Bibele e re motho o lokela ho hoeletsa ha a sokeloa ka ho betoa?

Motho ea e-s’o tšosoe ke ho hlaseloa ke motho ea betang, a ke ke a utloisisa e le kannete hore na ho ka senya bophelo ba motho hakae. Ke ketsahalo e tšosang hoo e ka tšoenyang motho bophelo bohle.a Mosali e mong e mocha oa Mokreste ea ileng a hlaseloa lilemong tse seng kae ke motho ea betang, o re: “Ke sitoa ho hlalosa hore na ke ile ka tšoha hakae bosiung boo kapa pherekano eo ke ileng ka tlameha ho loana le eona ho tloha ka nako eo.” Hoa utloahala hore ebe ba bangata ha ba rate le ho nahana ka taba ena e tšosang. Leha ho le joalo, ho sokeloa ka ho betoa ke ntho e etsahalang lefatšeng lena le khopo.

Bibele ha e qobe ho pheta liketsahalo tsa peto le tsa ho leka ho beta tse etsahetseng nakong e fetileng. (Genese 19:4-11; 34:1-7; 2 Samuele 13:1-14) Empa e boetse e fana ka keletso ea hore na ke eng seo motho a lokelang ho se etsa ha a sokeloa ka ho betoa. Seo Molao o se bolelang tabeng ena se ho Deuteronoma 22:23-27. Sena se akaretsa maemo a mabeli. Tabeng ea pele, monna o ile a fumana moroetsana motseng ’me a robala le eena. Empa moroetsana eo ha aa ka a hoeletsa kapa a bokolla hore a thusoe. Ka lebaka leo o ile a ahloloa ka hore o molato “kahobane a sa ka a hoeletsa motseng.” Haeba a ne a hoelelitse, batho ba haufi ba ka be ba ile ba mo thusa. Ketsahalong ea bobeli, monna o ile a fumana moroetsana naheng, eaba “oa mo tšoara ’me o robala le eena.” Mosali enoa o ile a itšireletsa ka ho “hoeletsa, empa ho ne ho se ea mo pholosang.” Ho fapana le mosali ea boletsoeng ketsahalong ea pele, ho hlakile hore mosali enoa ha aa inehela ketsong ea motho ea mo hlasetseng. O ile a mo hanyetsa ka matla, a hoeletsa hore a thusoe empa o ile a mo fekisa. Ho hoeletsa ha hae ho bontšitse hore o ne a sa batle; o ne a se molato.

Le hoja kajeno Bakreste ba se tlas’a Molao oa Moshe, melao-motheo e boletsoeng ho oona ea ba tataisa. Tlaleho e boletsoeng e hatisa bohlokoa ba ho hana le ho hoeletsa ho kōpa thuso. Ho hoeletsa ha motho a sokeloa ka ho betoa ho sa ntsane ho nkoa e le ntho e bohlale. Setsebi se seng sa thibelo ea tlōlo ea molao se ile sa re: “Haeba mosali a hlaseloa, sebetsa se molemo e sa ntsane e le hore a hoeletse.” Ha mosali a hoeletsa, a ka etsa hore batho ba bang ba ka mo thusang ba utloe, kapa a ka tšosa ea mo hlasetseng ’me sena sa mo leleka. Mosali e mocha oa Mokreste ea ileng a hlaseloa ke motho ea betang o ile a re: “Ke ile ka hoeletsa ka matla a ka kaofela, eaba oa checha. Eitse ha a nkatamela hape, ke ile ka hoeletsa ’me ka baleha. Nakong e fetileng ke ne ke atisa ho ipotsa, ‘Ho hoeletsa ho ka nthusa ka eng ha monna oa sefonthoane a ntšoara a hopotse ho mpeta?’ Empa ke ithutile hore hoa sebetsa!”

Esita le ketsahalong e bohloko ea ha mosali a hlōloa ka matla ’me a betoa, ho loana ha hae le ho hoeletsa hore a thusoe hase ha lefeela. Ho e-na le hoo, ke bopaki ba hore o entse sohle seo a neng a ka se khona ho sitisa ea mo hlasetseng. (Deuteronoma 22:26) Ho sa tsotellehe hore o betiloe, letsoalo la hae le tla ’ne le hloeke, o tla ’ne a itlhomphe ’me a kholisehe hore o hloekile mahlong a Molimo. Ketsahalo ena e tšosang e ka ’na ea mo utloisa bohloko maikutlong, empa ho tseba hore o entse sohle seo a ka se khonang ho hanyetsa ketso eo ho tla mo thusa hore a fole butle-butle.

E le hore re utloisise hore na Deuteronoma 22:23-27 e sebetsa joang, re lokela ho hlokomela hore tlaleho ena e khutšoanyane ha e akarelletse maemo ’ohle. Ka mohlala, ha e bue letho ka boemo boo ho bona mosali ea hlasetsoeng a sitoang ho hoeletsa hobane a sa tsebe ho bua, a ilibane kapa a tšohile hoo a sitoang ho hoeletsa kapa a qobelloa hore a se ke a hoeletsa ka ho koaheloa molomo ka letsoho kapa ka ntho e ’ngoe. Leha ho le joalo, kaha Jehova a ka bona maemo ’ohle, ho kopanyelletsa le sepheo, o sebetsa litaba tse joalo ka kutloisiso le ka toka, hobane “litsela tsohle tsa hae ke toka.” (Deuteronoma 32:4) O bone se hlileng se etsahetseng le boiteko boo motho a bo entseng ho loantša ea mo hlasetseng. Kahoo, motho ea sitiloeng ho hoeletsa empa a entse sohle tlas’a maemo ao a neng a le ho ’ona, a ka tlohela litaba matsohong a Jehova.—Pesaleme ea 55:22; 1 Petrose 5:7.

Ho sa tsotellehe seo, basali ba bang ba Bakreste ba ileng ba hlaseloa le ho betoa, ka linako tsohle ba ikutloa ba le molato. Ha ba nahana ka se etsahetseng, ba nka hore ba ka be ba ile ba etsa ho eketsehileng ho thibela ketsahalo eo. Leha ho le joalo, ho e-na le ho ipeha molato, batho ba joalo ba ka rapela Jehova, ba kōpe thuso ea hae ’me ba kholisehe ka mosa oa hae o lerato o mongata.—Exoda 34:6; Pesaleme ea 86:5.

Kahoo, basali ba Bakreste bao hona joale ba loanang le maikutlo a bohloko ka lebaka la ho betoa, ba ka kholiseha hore Jehova o utloisisa ka ho feletseng bohloko boo ba bo utloang. Lentsoe la Molimo lea ba tiisetsa le re: “Jehova o haufi le ba lipelo li robehileng; o pholosa ba sithabetseng moeeng.” (Pesaleme ea 34:18) Ba ka fumana thuso e eketsehileng ea ho loana le pherekano ea bona ka ho lumela hore balumeli-’moho le bona ka phuthehong ea Bokreste ba utloisisa boemo ba bona ka tieo ’me ba ba tšehelitse ka mosa. (Jobo 29:12; 1 Bathesalonika 5:14) Ho feta moo, ha motho ea betiloeng a etsa boiteko ba ho nahana ka lintho tse ntle, sena se tla mo thusa ho fumana “khotso ea Molimo e fetang monahano oohle.”—Bafilipi 4:6-9.

[Mongolo o botlaaseng ba leqephe]