Ho Bontša Tlhompho Bakeng sa Lipokano Tsa Rōna Tse Halalelang
“Ke tla boela ke ba tlise thabeng ea ka e halalelang ’me ke etse hore ba thabe ka har’a ntlo ea ka ea thapelo.”—ESAIA 56:7.
1. Ke mabaka afe a Mangolo ao re nang le ’ona a hore re bontše tlhompho e loketseng bakeng sa liboka tsa rōna?
JEHOVA o bokeletse batho ba hae, e leng Bakreste ba tlotsitsoeng le metsoalle ea bona hore ba mo rapele ‘thabeng ea hae e halalelang.’ O ba fa thabo ka hare ho “ntlo ea [hae] ea thapelo,” tempele ea hae ea moea, e leng “ntlo ea thapelo bakeng sa lichaba tsohle.” (Esaia 56:7; Mareka 11:17) Liketsahalo tsena li bontša hore borapeli ba Jehova boa halalela, bo hloekile ebile bo phahame. Ka ho bontša tlhompho e loketseng bakeng sa liboka tsa rōna tsa ho ithuta le ho rapela, re paka hore re talima lintho tse halalelang ka tsela eo Jehova a li talimang ka eona.
2. Ke’ng se bontšang hore Jehova o ne a nka sebaka seo a se khethetseng borapeli ba hae se halalela, hona Jesu o ile a bontša joang hore le eena o na le pono e tšoanang?
2 Iseraele ea boholo-holo, sebaka seo Jehova a neng a se khethetse borapeli ba hae se ne se lokela ho nkoa se halalela. Tabernakele, thepa le lisebelisoa tsa eona li ne li lokela ho tlotsoa le ho hloekisoa “e le hore li halalele ka ho fetisisa.” (Exoda 30:26-29) Likarolo tse peli tsa sehalalelo li ne li bitsoa “Sebaka se Halalelang” le “Sehalalelisiso.” (Baheberu 9:2, 3) Hamorao tabernakele e ile ea nkeloa sebaka ke tempele e neng e le Jerusalema. Kaha Jerusalema e ne e le setsi sa borapeli ba Jehova, e ne e bitsoa ‘motse o halalelang.’ (Nehemia 11:1; Matheu 27:53) Ha Jesu a ntse a sebeletsa lefatšeng, le eena o ile a bontša tlhompho e loketseng bakeng sa tempele. O ile a halefela batho kaha ka ho hloka tlhompho ba ne ba sebelisetsa sebaka sa tempele merero ea khoebo ebile ba paroletsa ho sona ha ba isa lintho karolong e ’ngoe ea Jerusalema.—Mareka 11:15, 16.
3. Ke’ng se bontšang hore liboka tsa Baiseraele li ne li halalela?
3 Baiseraele ba ne ba bokana kamehla hore ba rapele Jehova le ho mamela ha ho baloa Molao oa hae. Matsatsi a mang a mekete ea bona a ne a bitsoa likopano tse halalelang kapa seboka se hlomphehang, e leng se bontšang kamoo lipokano tsena li neng li halalela kateng. (Levitike 23:2, 3, 36, 37) Sebokeng se seng sa phatlalatsa se ileng sa tšoaroa mehleng ea Esdrase le Nehemia, Balevi “ba ne ba hlalosetsa batho molao.” Kaha “batho bohle ba ne ba lla ha ba ntse ba utloa mantsoe a molao,” Balevi “ba ne ba laela batho bohle hore ba khutse, ba re: ‘Khutsang! kaha letsatsi lena lea halalela.’” Ka mor’a moo Baiseraele ba ile ba keteka Mokete oa Maphephe ka matsatsi a supileng ka “ho thaba ho hoholo.” Ho feta moo, ‘buka ea molao oa Molimo oa ’nete e ne e balloa holimo letsatsi le letsatsi, ho tloha ka letsatsi la pele ho fihlela ka letsatsi la ho qetela; ’me ba ne ba tsoela pele ho tšoara mokete ka matsatsi a supileng, ’me ka letsatsi la borobeli ho ne ho e-ba le seboka se hlomphehang, ho ea ka molao.’ (Nehemia 8:7-11, 17, 18) Ka sebele tsena e ne e le liketsahalo tse halalelang tseo batho ba tlileng ho tsona ba neng ba lokela ho mamela ka tlhompho.
Liboka Tsa Rōna ke Lipokano Tse Halalelang
4, 5. Ke litšobotsi life tsa liboka tsa rōna tse pakang hore ke lipokano tse halalelang?
4 Ke ’nete hore kajeno Jehova ha a na motse o itseng o halalelang lefatšeng, o nang le tempele e khethehileng e nehetsoeng bakeng sa borapeli ba hae. Leha ho le joalo, ha rea lokela ho lebala hore liboka tsa borapeli ba Jehova ke lipokano tse halalelang. Re kopana hararo ka beke e le hore re bale ’me re ithute Mangolo. Lentsoe la Jehova lea “qaqisoa,” ’me joaloka mehleng ea Nehemia, le “kenngoa moelelo.” (Nehemia 8:8) Liboka tsohle tsa rōna li buloa le ho koaloa ka thapelo, ’me ho tse ngata tsa tsona, re binela Jehova lipina tsa thoriso. (Pesaleme ea 26:12) Ka sebele liboka tsa phutheho ke karolo ea borapeli ba rōna ’me ho hlokahala hore ha re le ho tsona re be moeeng oa thapelo le ho mamela ka tlhompho.
5 Jehova o hlohonolofatsa batho ba hae ha ba kopane ’moho hore ba mo rapele, ba ithute Lentsoe la hae ’me ba thabele botsoalle bo mofuthu ba Bokreste. Ha ho fihla nako ea hore re ee sebokeng, re ka kholiseha hore ke hona teng moo ‘Jehova a laelang tlhohonolofatso hore e be teng.’ (Pesaleme ea 133:1, 3) Re fumana tlhohonolofatso eo haeba re ea ho tsona ’me re mamela lenaneo leo la moea ka hloko. Ho feta moo, Jesu o ile a re: “Moo ho nang le ba babeli kapa ba bararo ba bokaneng ka lebitso la ka, ke teng moo har’a bona.” Ho latela taba e neng e tšohloa moo, temana ena e sebetsa ha baholo ba Bakreste ba kopana hore ba sebetse litaba tse tebileng pakeng tsa batho, empa ha e atolosoa, e boetse e sebetsa le libokeng tsa rōna. (Matheu 18:20) Haeba ka moea o halalelang, Kreste o ba teng ha Bakreste ba kopana ’moho ka lebitso la hae, na lipokano tse joalo ha lia lokela ho nkoa li halalela?
6. Ho ka thoe’ng ka libaka tseo re tšoarelang liboka ho tsona, ebang ke tse khōlō kapa ke tse nyenyane?
6 Ke ’nete hore Jehova ha a lule litempeleng tse entsoeng ke batho. Leha ho le joalo, Liholo tsa rōna tsa ’Muso ke libaka tsa borapeli ba ’nete. (Liketso 7:48; 17:24) Re kopana teng hore re ithute Lentsoe la Jehova, re mo rapele re be re mo binele lithoriso. Ho boetse ho joalo le ka Liholo tsa rōna tsa Likopano. Libaka tse khōlō tse hireloang ho tšoara likopano tsa rōna tse khōlō—tse kang liholo tsa sechaba, liholo tsa ho tšoarela lipontšo, kapa mabala a lipapali—li fetoha libaka tsa borapeli ha li ntse li sebelisetsoa lipokano tse halalelang. Re lokela ho hlompha liketsahalo tsena tsa borapeli, ebang ke tse khōlō kapa ke tse nyenyane ’me seo se lokela ho bonahatsoa ka boikutlo le boitšoaro ba rōna.
Litsela Tsa ho Bontša Tlhompho Bakeng sa Lipokano Tsa Rōna
7. Re ka bontša tlhompho bakeng sa lipokano tsa rōna ka tsela efe e totobetseng?
7 Ho na le litsela tse totobetseng tseo ka tsona re ka bontšang tlhompho bakeng sa lipokano tsa rōna. Tsela e ’ngoe ke ka hore re be teng ha ho binoa lipina tsa ’Muso. Boholo ba lipina tsena li ngotsoe ka mokhoa oa thapelo ’me ka lebaka leo, li lokela ho binoa ka tlhompho. Ha moapostola Pauluse a qotsa Pesaleme ea 22, o ile a ngola tjena mabapi le Jesu: “Ke tla bolela lebitso la hao ho barab’eso; ke tla u rorisa ka pina har’a phutheho.” (Baheberu 2:12) Kahoo, re lokela ho itloaetsa hore re be re lutse fatše ha molula-setulo a bolela pina ’me re nahanisise moelelo oa mantsoe a pina eo ha re ntse re bina. E se eka mokhoa oo re binang ka oona o ka bontša maikutlo a mopesaleme ea ileng a ngola a re: “Ke tla roka Jehova ka pelo ea ka eohle sehlopheng sa metsoalle e haufi-ufi sa ba lokileng le phuthehong.” (Pesaleme ea 111:1) Ka sebele, ho binela Jehova lithoriso ke lebaka le leng le utloahalang la hore re fihle esale nako libokeng tsa rōna ’me re lule ho fihlela qetellong.
8. Ke mohlala ofe o ka Bibeleng o bontšang hore re lokela ho mamelisisa lithapelo ka tlhompho libokeng tsa rōna?
8 Tšobotsi e ’ngoe e re matlafatsang moeeng ea liboka tsohle tsa rōna ke thapelo e tlohang botebong ba pelo e etsoang molemong oa bohle ba leng teng sebokeng. Ka lekhetlo le leng, Bakreste ba lekholong la pele la lilemo ba neng ba le Jerusalema ba ile ba kopana ’moho ’me “ka tumellano ba phahamisetsa mantsoe a bona ho Molimo” ba rapela ka tieo. Ka lebaka leo, ho sa tsotellehe mahloriso, ba ile ba tsoela pele ho “bolela lentsoe la Molimo ka sebete.” (Liketso 4:24-31) Na re nahana hore ho ba neng ba le teng moo ho na le ba ileng ba lumella likelello tsa bona ho lelera ha ho ntse ho rapeloa? Che, ba ne ba rapela “ka tumellano.” Lithapelo tse etsoang libokeng tsa rōna li emela maikutlo a bohle ba leng teng. Re lokela ho mamelisisa lithapelo tsena ka tlhompho.
9. Re ka bontša tlhompho joang bakeng sa lipokano tsa rōna tse halalelang ka moaparo le boitšoaro ba rōna?
9 Ho feta moo, re ka bontša tlhompho e tebileng bakeng sa khalalelo ea lipokano tsa rōna ka tsela eo re aparang ka eona. Tsela e hlomphehang eo re shebahalang ka eona ka moaparo oa rōna le litaele tsa moriri e ka eketsa seriti libokeng tsa rōna. Moapostola Pauluse o ile a eletsa tjena: “Ke lakatsa hore sebakeng se seng le se seng banna ba tsoele pele ho rapela, ba phahamisa matsoho a tšepahalang, kantle le khalefo le ho pheha khang. Ka ho tšoanang ke lakatsa ha basali ba ikhabisa ka moaparo o hlophehileng hantle, ka boitlhompho le ho hlaphoheloa kelellong, eseng ka mekhoa ea ho loha moriri le khauta kapa liperela kapa liaparo tsa theko e boima haholo, empa ka tsela e tšoanelang basali ba ipolelang hore ba fa Molimo tlhompho ea borapeli.” (1 Timothea 2:8-10) Ha re ea likopanong tse khōlō tse tšoareloang mabaleng a lipapali a bulehileng, re ka apara ka tsela e lumellanang le maemo a leholimo empa e le e hlomphehang. Ho phaella moo, ho hlompha ketsahalo eo ho tla re thusa ho qoba ho ja lijo kapa ho hlafuna chepisi ha mananeo a ntse a tsoela pele. Re hlompha Jehova Molimo, borapeli ba hae le barapeli-’moho le rōna ha re apara hantle ebile re itšoara hantle ha re le lipokanong tsa rōna.
Boitšoaro bo Tšoanelang Ntlo ea Molimo
10. Moapostola Pauluse o ile a bontša joang hore re lokela ho itšoara hantle haholo ha re le libokeng tsa Bokreste?
10 Ho 1 Bakorinthe, khaolo ea 14, re fumana keletso e bohlale ea moapostola Pauluse mabapi le kamoo liboka tsa Bokreste li lokelang ho tsamaisoa kateng. O ile a phethela ka ho re: “Lintho tsohle li ke li etsahale ka mokhoa o hlomphehang le ka tlhophiso.” (1 Bakorinthe 14:40) Liboka tsa rōna ke karolo ea bohlokoa ea mosebetsi oa phutheho ea Bokreste, ’me ho hlokahala hore ha re le ho tsona re itšoare ka tsela e tšoanelang ntlo ea Jehova.
11, 12. (a) Ke’ng se lokelang ho hatisoa likelellong tsa bana ba tlang libokeng tsa rōna? (b) Bana ba ka bontša tumelo ea bona ka tsela e loketseng joang ha ba le libokeng tsa rōna?
11 Haholo-holo, ho hlokahala hore bana ba rutoe ho itšoara hantle ha ba le libokeng. Batsoali ba Bakreste ba lokela ho hlalosetsa bana ba bona hore Holong ea ’Muso le sebakeng seo ho tšoareloang Thuto ea Buka ea Phutheho ho sona, hase libaka tseo ho bapalloang ho tsona. Ke moo re rapelang Jehova le ho ithuta Lentsoe la hae. Morena Solomone ea bohlale o ile a ngola a re: “Lebela maoto a hao neng kapa neng ha u e-ea ntlong ea Molimo oa ’nete; u ke u atamele hore u utloe.” (Moeklesia 5:1) Moshe o ile a ruta Baiseraele hore ba bokane hammoho, batho ba baholo hammoho le “ba banyenyane.” O ile a re: “Phutha sechaba, . . . e le hore ba mamele le hore ba ithute, kaha ba lokela ho tšaba Jehova Molimo oa lōna ’me ba ele hloko hore ba phethe mantsoe ’ohle a molao ona. Bara ba bona ba sa kang ba tseba ba lokela ho mamela, ’me ba tla ithuta ho tšaba Jehova.”—Deuteronoma 31:12, 13.
12 Ka ho tšoanang, kajeno bana ba rōna ba banyenyane ba tla libokeng le batsoali ba bona, haholo-holo hore ba mamele le ho ithuta. Hang ha bana ba se ba khona ho mamela ’me bonyane ba utloisisa linnete tsa motheo tsa Bibele, ba ka boela ba ‘bolela tumelo ea bona phatlalatsa’ ka hore ba fane ka litlhaloso tse khutšoanyane. (Baroma 10:10) Ngoana e monyenyane a ka qala ka ho bua mantsoe a seng makae ha a arabela potso eo a e utloisisang. Qalong, a ka ’na a tlameha ho bala karabo, empa qetellong, o tla leka ho hlalosa taba ka mantsoe a hae. Sena se molemo ho ngoana ebile sea mo thabisa, ’me lipolelo tse joalo tse buuoang ka mokhoa oa tlhaho tse bontšang tumelo li thabisa lipelo tsa batho ba baholo ba leng teng. Ka tloaelo, batsoali ba beha mohlala ka hore ka bobona ba fane ka litlhaloso. Moo ho khonehang, ho molemo hore bana ba be le Bibele ea bona, buka ea lipina le sengoliloeng se ithutoang. Ba lokela ho ithuta ho bontša tlhompho e loketseng bakeng sa lingoliloeng tseo. Sena sohle se tla hatisa likelellong tsa bana hore liboka tsa rōna ke lipokano tse halalelang.
13. Re tšepa hore batho ba qalang ho tla libokeng tsa rōna ba tla etsa joang?
13 Ka sebele ha re batle hore liboka tsa rōna li tšoane le litšebeletso tsa likereke tsa Bokreste-’mōtoana. Li ka tšoana le tsona ka hore e be tseo ho se nang botsoalle le tse bonahatsang bohalaleli bo feteletseng kapa tse lerata joaloka likonsarete tsa ’mino oa rock. Re batla hore re bontše botsoalle le moea oa ho amohela baeti libokeng tsa rōna Liholong Tsa ’Muso, empa le teng ho se ke ha tšoana le ’mokeng oa boithabiso oa motse. Morero oo re kopanang ka oona ke ho rapela Jehova, kahoo liboka tsa rōna li lokela hore kamehla li be le seriti. Takatso ea rōna ke hore batho ba qalang ho tla libokeng tsa rōna, ka mor’a hore ba mamele boitsebiso bo fanoeng le ho hlokomela boitšoaro ba rōna le ba bana ba rōna, ba bue tjena: “Ka sebele Molimo o har’a lōna.”—1 Bakorinthe 14:25.
Tšobotsi ea Kamehla ea Borapeli ba Rōna
14, 15. (a) Re ka qoba ‘ho hlokomoloha ntlo ea Molimo oa rōna’ joang? (b) Esaia 66:23 e se e ntse e phethahala joang?
14 Joalokaha ho boletsoe pejana, Jehova o ntse a bokella batho ba hae ’me o etsa hore ba thabe ka har’a “ntlo [ea hae] ea thapelo,” e leng tempele ea hae ea moea. (Esaia 56:7) Nehemia, monna ea tšepahalang o ile a hopotsa Bajuda ba habo hore ba ne ba lokela ho bontša tlhompho e loketseng bakeng sa tempele ea sebele ka hore ba e tšehetse ka lintho tse bonahalang. O ile a re: “Ha rea lokela ho hlokomoloha ntlo ea Molimo oa rōna.” (Nehemia 10:39) Ho feta moo, ha rea lokela ho hlokomoloha memo ea Jehova ea hore re mo rapele ka har’a “ntlo ea [hae ea] thapelo.”
15 Ha Esaia a bontša hore re lokela ho kopana kamehla bakeng sa borapeli, o ile a profeta: “‘Ka sebele ho tloha ha khoeli e ’ngoe e thoasa ho ea ho e ’ngoe le ho tloha sabatheng e ’ngoe ho ea ho e ’ngoe nama eohle e tla tla hore e tl’o inama ka pel’a ka,’ ho boletse Jehova.” (Esaia 66:23) Kajeno sena sea etsahala. Kamehla, beke e ’ngoe le e ’ngoe khoeli le khoeli, Bakreste ba inehetseng ba bokana hammoho hore ba rapele Jehova. Har’a tse ling, ba etsa sena ka ho ba teng libokeng tsa Bokreste le ka ho kopanela tšebeletsong ea phatlalatsa. Na u e mong oa ba ‘tlang ho tla inama ka pel’a Jehova’ kamehla?
16. Ke hobane’ng ha ho ba teng kamehla libokeng e lokela hore e be tšobotsi ea kamehla bophelong ba rōna hona joale?
16 Esaia 66:23 e tla phethahala ka botlalo lefatšeng le lecha leo Jehova a le tšepisitseng. Nakong eo, “nama eohle,” ka tsela ea sebele, beke le beke le khoeli le khoeli, “e tla tla hore e tl’o inama,” kapa e rapele Jehova, ho isa ka ho sa feleng. Kaha ho kopana hammoho ka morero oa ho rapela Jehova e tla ba tšobotsi ea kamehla ea bophelo ba rōna ba moea tsamaisong e ncha ea lintho, na ha rea lokela ho etsa hore ho ba teng kamehla lipokanong tsa rōna tse halalelang e be tšobotsi ea kamehla bophelong ba rōna hona joale?
17. Ke hobane’ng ha re hloka liboka tsa rōna “haholo kaha [re] bona letsatsi le ntse le atamela”?
17 Ha bofelo bo ntse bo atamela, re lokela ho ikemisetsa ho feta leha e le neng pele hore re be teng lipokanong tsa rōna tsa Bokreste tsa borapeli. Kaha re hlompha taba ea hore liboka tsa rōna lia halalela, ha re lumelle mosebetsi oa boipheliso, mosebetsi oa sekolo o etsetsoang hae kapa sekolo sa mantsiboea ho re sitisa ho ba teng kamehla libokeng le balumeli-’moho. Re hloka ho fumana matla a tlisoang ke ho kopana hammoho. Liboka tsa rōna tsa phutheho li re fa monyetla oa ho tsebana, oa ho khothatsana le oa ho susumelletsana “leratong le mesebetsing e metle.” Ho hlokahala hore re etse sena “haholo kaha [re] bona letsatsi le ntse le atamela.” (Baheberu 10:24, 25) Ka hona, e se eka kamehla re ka bontša tlhompho e loketseng bakeng sa lipokano tsa rōna tse halalelang ka ho ba teng kamehla ho tsona, ka ho apara hantle le ka ho itšoara hantle. Ha re etsa joalo, re bontša hore re talima lintho tse halalelang ka tsela eo Jehova a li talimang ka eona.
Tlhahlobo
• Ke’ng se bontšang hore lipokano tsa batho ba Jehova li lokela ho nkoa li halalela?
• Ke litšobotsi life tsa liboka tsa rōna tse pakang hore ke lipokano tse halalelang?
• Bana ba ka bontša joang hore ba hlompha taba ea hore liboka tsa rōna lia halalela?
• Ke hobane’ng ha re lokela ho etsa hore ho ba teng kamehla libokeng e be tšobotsi ea kamehla bophelong ba rōna?
[Litšoantšo tse leqepheng la 28]
Liboka tseo ho rapeloang Jehova ho tsona ke lipokano tse halalelang kae kapa kae moo li tšoareloang teng
[Setšoantšo se leqepheng la 31]
Bana ba rōna ba banyenyane ba tla libokeng hore ba mamele le ho ithuta