Hōlang Tsebong e Nepahetseng ka ‘Tabatabelo ea Kelello’

BAHLANKA bohle ba Jehova ba batla ho amoheleha ho eena. Ka lebaka leo, re labalabela ho ntlafatsa tumelo ea rōna le ho etsa tšebeletso e halalelang ka mafolofolo. Leha ho le joalo, moapostola Pauluse o re hlokomelisa kotsi e ka ’nang ea hlaha, e ileng ea ama Bajuda ba bang mehleng ea hae: “Ba chesehela Molimo; empa eseng ho ea ka tsebo e nepahetseng.” (Bar. 10:2) Ho hlakile hore ho rapela ha rōna Jehova le tumelo ea rōna ha lia lokela ho thehoa maikutlong feela. Re lokela ho ba le tsebo e nepahetseng ka ’Mōpi oa rōna le thato ea hae.

Mangolong a mang a hae, Pauluse o ile a amahanya boitšoaro bo amohelehang ho Molimo le ho chesehela ha rōna ho fumana tsebo. O ile a rapella hore balateli ba Kreste ba ‘tlale tsebo e nepahetseng’ ea thato ea Molimo ‘e le hore ba tsamaee ka mokhoa o tšoanelang Jehova e le hore ba mo khahlise ka botlalo’ ha ba ntse ba “tsoela pele ho beha litholoana mosebetsing o mong le o mong o molemo le ho hōla tsebong e nepahetseng ea Molimo.” (Bakol. 1:9, 10) Ke hobane’ng ha ho fumana ha rōna “tsebo e nepahetseng” e le habohlokoa hakaale? Hona ke hobane’ng ha re lokela ho hōla tsebong eo?

Se ka re Thusang ho ba le Tumelo

Tsebo e nepahetseng ea Molimo le thato ea hae joalokaha li senotsoe Bibeleng ke motheo oa tumelo ea rōna. Ntle ho tsebo e tšepahalang joalo, tumelo ea rōna ho Jehova e ne e tla tšoana le ntlo e hahiloeng ka likarete e ka oang neng kapa neng ha ho foka moea o mosesanyane. Pauluse o re khothalletsa hore re etsetse Molimo tšebeletso e halalelang ka ‘matla a rōna a ho nahana’ le hore re ‘fetole likelello tsa rōna.’ (Bar. 12:1, 2) Ho ithuta Bibele kamehla ho ka re thusa ntlheng ena.

Pula-maliboho e mong oa Poland ea bitsoang Ewa, o re: “Haeba ke ne ke sa ithute Lentsoe la Molimo kamehla, ke ne ke sa tl’o hōla tsebong e nepahetseng ea Jehova. Botho ba ka ba Bokreste bo ne bo tla qala ho senyeha ka potlako, tumelo ea ka ho Molimo e ne e tla fokola, ’me sena se ne se tla senya kamano ea ka le Molimo.” E se eka le ka mohla seo se ke ke sa etsahala ho rōna! Nahana ka mohlala oa monna ea ileng a hōla tsebong e nepahetseng ea Jehova eaba ka lebaka leo o amoheleha ho Eena.

“Molao oa Hao ke o Rata Hakaakang!”

Thoko eo Libibeleng tsa rōna e leng Pesaleme ea 119, e bolela maikutlo a mopesaleme mabapi le melao, likhopotso, litaelo le liqeto tsa boahloli tsa Jehova. Mopesaleme o ile a ngola: “Ke tla rata litaelo tsa hao tse hlomamisitsoeng. . . Ke rata likhopotso tsa hao.” O ile a boela a ngola a re: “Molao oa hao ke o rata hakaakang! Ke nahanisisa ka oona letsatsi lohle.”—Pes. 119:16, 24, 47, 48, 77, 97.

Lentsoe “rata” le lentsoe “nahanisisa” a fana ka maikutlo a ho thuisa Lentsoe la Molimo, ha e le hantle, ho thabela ho nahanisisa ka lona. Mantsoe ao a totobatsa lerato leo mopesaleme a neng a e-na le lona la ho ithuta molao oa Molimo. Lerato leo e ne e se feela ho nkeha maikutlo ha mopesaleme. Ho e-na le hoo, o ne a e-na le takatso e tiileng ea ho “nahanisisa” ka molao oo, e le hore a be le temohisiso mantsoeng a Jehova. Boikutlo ba hae bo re bontša hore o ne a batla ho tseba Molimo le thato ea hae ka tsela e nepahetseng ka hohle kamoo ho ka khonehang.

Ho hlakile hore lerato leo mopesaleme a neng a rata Lentsoe la Molimo ka lona le ne le tsoa botebong ba pelo. Re ka ’na ra ipotsa: ‘Na le ’na ke joalo? Na ke thabela ho bala le ho sekaseka karolo e itseng ea Bibele letsatsi le letsatsi? Na ke khothalletse ho bala Lentsoe la Molimo le ho rapela Jehova pele ke le bala?’ Haeba re ka araba lipotso tseo ka e, ho ka etsahala hore ebe rea “hōla tsebong e nepahetseng ea Molimo.”

Ewa o re: “Kamehla ke leka ho ntlafatsa tsela eo ke ithutang ka eona. Haesale re fumana bukana ea ‘Bona Naha e Ntle,’ ke e sebelisitse hoo e ka bang ka lekhetlo le leng le le leng ha ke ithuta. Ha ho hlokahala, ke leka haholo ho sheba lintho bukeng ea Insight on the Scriptures le libukeng tse ling.”

Nahana hape ka mohlala oa Wojciech le Małgorzata, ba nang le boikarabelo bo bongata ba lelapa. Ba khona joang hore ba be le kemiso ea ho ithuta Bibele empa ba phathahane hakaalo? “Re ipha nako ea ho ithuta Lentsoe la Molimo re le batho ka bomong ha ho khoneha. Joale, nakong ea thuto ea rōna ea lelapa leha re ntse re qoqa letsatsi le leng le le leng, re bua ka lintlha tse thahasellisang kapa tse susumetsang tseo re li fumaneng.” Ho ithuta ka botebo ho ba thabisa haholo ebile ho ba thusa hore ba ‘hōle tsebong e nepahetseng.’

Ithute ka Boikemisetso ba ho Amohela Seo U Ithutang Sona

Re le Bakreste, rea lumela hore thato ea Molimo ke “hore batho ba mefuta eohle ba pholohe ’me ba fihle tsebong e nepahetseng ea ’nete.” (1 Tim. 2:3, 4) Ntlha ena e hatisa bohlokoa ba ho bala Bibele le ho loanela ho e ‘utloisisa.’ (Mat. 15:10) Ntho e ’ngoe e ka re thusang ho etsa seo ke ho ithuta ka boikemisetso ba ho amohela seo re ithutang sona. Bona ke boikutlo bo ileng ba bontšoa ke Baberea ba boholo-holo ha Pauluse a ne a ba bolella litaba tse molemo: “Ba ile ba amohela lentsoe ka tabatabelo e khōlō ea kelello, ba hlahloba Mangolo ka hloko letsatsi le leng le le leng mabapi le hore na lintho tsena li joalo kapa che.”—Lik. 17:11.

Na u latela mohlala oa Baberea oa ho ba le tabatabelo ea kelello le ho etsa hore ha u ntse u ithuta Bibele, kelello ea hao e se ke ea sitisoa ke lintho tse sa hlokahaleng? Mokreste a ka leka ho etsisa Baberea, le haeba nakong e fetileng a ne a sa thabele ho ithuta. Ho feta moo, ha ba ntse ba tsofala, batho ba bang ba atisa ho bala le ho ithuta seoelo, empa Mokreste ha aa lokela ho etsa joalo. Ho sa tsotellehe hore na motho o lilemo li kae, ho ka khoneha hore a leke ho qoba lintho tse ka mo sitisang. Kahoo, ha u bala, u ka chesehela ho batla litaba tseo u ka li bolellang ba bang. Ka mohlala, na u ka ikemisetsa ho bolella molekane oa hao kapa motsoalle oa hao oa Mokreste lintho tseo u li balileng kapa tseo u ithutileng tsona? Ha u etsa joalo, u ka etsa hore lintho tsena li tebe kelellong ea hao le pelong ea hao ua ba ua susumetsa ba bang hantle.

Mabapi le linako tsa hao tsa ho ithuta, latela mohlala oa Esdrase, e leng mohlanka oa Molimo oa boholo-holo ea neng a ‘lokisa pelo ea hae hore a bale molao oa Jehova.’ (Esd. 7:10) U ka etsa see joang? U ka ba sebakeng se ka etsang hore u nolofalloe ke ho ithuta. Ka mor’a moo, lula fatše ebe u kōpa Jehova ka thapelo hore a u tataise a be a u fe bohlale. (Jak. 1:5) Ipotse, ‘Ha ke ntse ke ithuta, ebe ke lebeletse ho ithuta eng lekhetlong lee?’ Ha u ntse u bala, ela hloko lintlha tse ka sehloohong. U ka ’na ua li ngola kapa ua tšoaea likarolo tseo ka ho khetheha u batlang ho li hopola. Nahana kamoo u ka sebelisang taba eo kateng boboleling, ha u etsa liqeto kapa ha u khothatsa balumeli-’moho le uena. Ho ella qetellong ea nako ea hao ea ho ithuta, ka bokhutšoanyane ikhopotse seo u ithutileng sona. Seo se tla u thusa hore u se ke ua lebala lintho tseo u ithutileng tsona.

Ewa o hlalosa mokhoa oo a ithutang ka oona: “Ha ke bala Bibele, ke sebelisa litšupiso tse bohareng ba leqephe, Watch Tower Publications Index le Watchtower Library e ho CD-ROM. Ke ingolla lintlha ka morero oa hore ke tle ke li sebelise boboleling.”

Ba bang e se e le khale ba ithuta ka botebo, le ho tebisa maikutlo litabeng tsa moea. (Liprov. 2:1-5) Ho ntse ho le joalo, ba na le boikarabelo bo bongata ebile ha ho bonolo hore ba iphe nako ea ho ithuta. Haeba u boemong boo, u ka etsa liphetoho life kemisong ea hao?

Nka Fumana Nako Joang?

Mohlomong u tla lumela hore ho bonolo haholo ho ipha nako ea ho etsa lintho tseo u li ratang. Ba bangata ba hlokometse hore ntho e ba thusang hore ba tebise maikutlo ha ba ithuta ke ho ipehela pakane eo ba ka e finyellang, e kang ho bala Bibele kaofela. Ke ’nete hore, ho ka ’na ha bonahala ho le thata ho bala mathathamo a malelele a meloko, litlhaloso tse lokolisang tempele ea boholo-holo, kapa boprofeta bo rarahaneng boo ho bonahalang bo sa amane le lintho tse etsahalang letsatsi le letsatsi. Leka ho etsa lintho tse tla u thusa ho finyella pakane ea hao. Ka mohlala, pele u bala karolo e itseng ea Bibele eo ho bonahalang e le thata, u ka bala histori e amanang le eona kapa hore na taba eo e ka sebelisoa joang. Boitsebiso boo bo ka fumanoa bukeng ea “Lengolo Lohle le Bululetsoe ke Molimo ’me le Molemo,” e fumanehang ka lipuo tse ka bang 50.

Hoa hlasimolla ho iketsetsa setšoantšo ka kelellong ha u ntse u bala Bibele. Sena se ka u thusa hore ka kelellong ea hao, u bone liketsahalo le batho bao ho buuoang ka bona. Ho sebelisa litlhahiso tsena tse ’maloa ho ka ’na ha etsa hore nako ea hao ea ho ithuta e be e monate e be e u tsoele molemo haholo. Kahoo, u tla labalabela ho ipha nako ea ho ithuta. Ho tla ba bonolo hore ho bala Bibele letsatsi le leng le le leng, e lule e le tloaelo ea rōna.

Le hoja litlhahiso tse ka holimo li ka re thusa re le batho ka bomong, lelapa le phathahaneng lona le ka etsa’ng? Ke hobane’ng ha le sa lule fatše hore le ke le buisane le phutholohile ka melemo ea thuto ea lelapa? Puisanong eo ho ka ’na ha hlaha maikutlo a ka le tsoelang molemo a kang a hore le tsohe metsotso e seng mekae pele ho nako eo le tloaetseng ho tsoha ka eona letsatsi le leng le le leng kapa ka matsatsi a itseng e le hore le tšohle karolo e itseng ea Bibele. Kapa mohlomong puisano ea lōna e tla bontša hore ho hlokahala hore le etse liphetoho tse itseng kemisong ea lelapa. Ka mohlala, malapa a mang a fumane ho le molemo hore a buisane ka temana ea letsatsi kapa a bale karolo e itseng ea Bibele ha a qeta ho ja. Pele mang kapa mang a qala ho hleka tafole kapa a tloha ho ea etsa mosebetsi o mong, lelapa le qeta metsotso e 10 kapa e 15 le buisana ka Mangolo kapa le etsa ’malo oa Bibele o kemisong. Qalong, ho ka ’na ha bonahala ho le thata ho etsa sena, empa ho e-s’o ee kae lelapa le ka ’na la tloaela ho se etsa ’me la se thabela haholo.

Wojciech le Małgorzata ba hlalosa se thusitseng lelapa la bona: “Nakong e fetileng, re ne re senya nako linthong tseo e seng tsa bohlokoa. Re ile ra etsa qeto ea ho fokotsa nako eo re neng re e qeta re romela li-e-mail. Re boetse re fokolitse nako ea rōna ea boikhathollo ’me re khethile letsatsi le nako ea ho ithuta ka botebo.” Ka sebele lelapa lena ha le ikoahlaee ka hore ebe le ile la etsa liphetoho tseo, ’me sena se ka ’na sa etsahala le lelapeng la hao.

Ho Hōla Tsebong e Nepahetseng Hase Tšenyo ea Nako!

Ho ithuta Lentsoe la Molimo ka botebo ho ka “beha litholoana mosebetsing o mong le o mong o molemo.” (Bakol. 1:10) Ha seo se etsahala bophelong ba hao, tsoelo-pele ea hao e tla bonahala ho bohle. U tla ba motho oa moea ea nang le kutloisiso e batsi ea linnete tsa Bibele. U tla etsa liqeto tse loketseng ’me u tla ba boemong bo botle ba ho thusa ba bang, ’me ha u thusa ba bang u ke ke ua feteletsa lintho, e leng ntho eo batho ba se nang tsebo ba tloaetseng ho e etsa. Ka holimo ho tsohle, u tla atamela haholo ho Jehova. U tla ananela makhabane a hae haholo, ’me sena se tla bonahala ha u bolella ba bang ka eena.—1 Tim. 4:15; Jak. 4:8.

Ho sa tsotellehe hore na u lilemo li kae kapa u na le tsebo e kae, leka ka hohle hore u lule u thabela Lentsoe la Molimo u bile u ithuta lona ka botebo ka boikemisetso ba ho amohela seo u ithutang sona. U ka kholiseha hore Jehova a ke ke a lebala boiteko boo u bo etsang. (Baheb. 6:10) O tla u hlohonolofatsa haholo.

[Lebokose le leqepheng la 13]

HA RE ‘HŌLA TSEBONG E NEPAHETSENG’. . .

Re matlafatsa tumelo ea rōna ho Molimo ebile re tsamaea ka mokhoa o tšoanelang Jehova.​—Bakol. 1:9, 10

Re fumana temohisiso, re khona ho sebelisa temoho le ho etsa liqeto tse bohlale.​—Pes. 119:99

Re thabela ho thusa batho ba bang haholo hore ba atamele ho Jehova.​—Mat. 28:19, 20

[Litšoantšo tse leqepheng la 14]

Ho fumana sebaka se ka etsang hore u nolofalloe ke ho ithuta ho ka ba thata, empa hoa hlokahala

[Litšoantšo tse leqepheng la 15]

Malapa a mang a bala karolo e itseng ea Bibele ha a qeta ho ja