Amohela Moea oa Molimo, Eseng oa Lefatše

“Ha rea ka ra amohela moea oa lefatše, empa re amohetse moea o tsoang ho Molimo, e le hore re ka tseba lintho tseo re li filoeng ka mosa ke Molimo.”—1 BAKOR. 2:12.

1, 2. (a) Bakreste ba ’nete ba ntoeng ka tsela efe? (b) Re tla tšohla lipotso life?

BAKRESTE ba ’nete ba ntoeng! Sera sa rōna se matla, se bolotsana ebile se tiisitsoe pelo ke ntoa. Se na le sebetsa se matla hoo se seng se hlōtse boholo ba batho ka sona. Empa ha rea lokela ho nyahama, re nahana hore re se ntse re hlōtsoe. (Esa. 41:10) Re na le thebe e ke keng ea robeha, e ka re sireletsang tlhaselong efe kapa efe.

² Ntoa ea rōna hase ea nama empa ke ea moea. Sera sa rōna ke Satane Diabolose ’me sebetsa se ka sehloohong seo a se sebelisang ke “moea oa lefatše.” (1 Bakor. 2:12) Ntho e ka sehloohong eo re ka e itšireletsang ka eona ha a re hlasela, ke moea oa Molimo. E le hore re ka hlōla ntoeng ena ra ba ra lula re le matla moeeng, ho hlokahala hore re kōpe moea oa Molimo re be re bonahatse tholoana ea oona bophelong ba rōna. (Bagal. 5:22, 23) Leha ho le joalo, moea oa lefatše ke eng, hona ho tlile joang hore o be le tšusumetso e matla hakaale? Re ka bona joang haeba re susumetsoa ke moea oa lefatše? Hape, re ka ithuta’ng ho Jesu mabapi le ho amohela moea oa Molimo le ho hana moea oa lefatše?

Ke Hobane’ng ha Moea oa Lefatše o Atile Hakaale?

 3. Moea oa lefatše ke eng?

³ Moea oa lefatše lena o tsoa ho Satane, e leng “’musi oa lefatše,” ’me o khahlanong le moea o halalelang oa Molimo. (Joh. 12:31; 14:30; 1 Joh. 5:19) Ke moea o atileng haholo lefatšeng ’me o susumetsa batho hore ba etse lintho tse itseng. Matla ana a susumetsang batho a etsa hore ba be khahlanong le thato ea Molimo le morero oa hae.

4, 5. Ho tlile joang hore moea o susumetsoang ke Satane o ate hakaale?

⁴ Ho tlile joang hore moea o susumetsoang ke Satane o ate hakaale? Taba ea pele, Satane o ile a thetsa Eva serapeng sa Edene. O ile a mo kholisa hore ho itokolla ho Molimo ho ne ho tla ntlafatsa bophelo ba hae. (Gen. 3:13) Ruri o ile a bontša hore ke raleshano! (Joh. 8:44) Joale, o ile a sebelisa mosali ho susumetsa Adama hore le eena a se ke a mamela Jehova. Ka lebaka la khetho eo Adama ileng a e etsa, batho ba ile ba fetoha makhoba a sebe, kahoo ba futsa mokhoa oa ho susumetsoa ke moea oa Satane oa ho se mamele.—Bala Baefese 2:1-3.

⁵ Satane o ile a boela a susumetsa mangeloi a mangata a ileng a fetoha bademona. (Tšen. 12:3, 4) A ile a fetohela Molimo ka tsela eo nako e itseng pele ho Moroallo oa mehleng ea Noe. Mangeloi ao a ne a lumela hore lintho li ne li tla a tsamaela hantle haeba a ne a ka furalla sebaka sa ’ona leholimong ebe a inehella litakatso tseo e seng tsa tlhaho mona lefatšeng. (Juda 6) A thusoa ke bademona bana bao hona joale ba khutletseng sebakeng sa moea, Satane o ‘khelosa lefatše lohle leo ho ahiloeng ho lona.’ (Tšen. 12:9) Ka masoabi, boholo ba batho ha bo hlokomele tšusumetso eo bademona ba nang le eona.—2 Bakor. 4:4.

Na U Susumetsoa ke Moea oa Lefatše?

 6. Ke ka tsela efe feela re ka hahlameloang ke moea oa lefatše?

⁶ Batho ba bangata ha ba hlokomele tšusumetso eo Satane a nang le eona, empa ha ho na lebaka la hore Bakreste ba ’nete ba se ke ba hlokomela maqiti a hae. (2 Bakor. 2:11) Ha e le hantle, moea oa lefatše o ke ke oa re susumetsa ntle le haeba re o lumella. A re ke re tšohleng lipotso tse ’nè tse tla re thusa hore re bone hore na re susumetsoa ke moea oa Molimo kapa oa lefatše.

 7. Ke tsela efe e ’ngoe eo ka eona Satane a lekang ho re arohanya le Jehova?

⁷ Boithabiso boo ke bo khethang bo bontša’ng ka ’na? (Bala Jakobo 3:14-18.) Satane o leka ho re arohanya le Molimo ka ho etsa hore re rate pefo. Diabolose oa tseba hore Jehova o hloile mang kapa mang ea ratang pefo. (Pes. 11:5) Kahoo, Satane o leka ho sebelisa lingoliloeng, lifilimi, ’mino le lipapali tsa elektronike—tseo tse ling tsa tsona li susumetsang batho ba li bapalang hore ba etsise boitšoaro bo litšila kapa sehlōhō—ho tsosa litakatso tsa rōna tsa nama. Satane ha a na taba haeba pelo e ’ngoe ea rōna e rata se nepahetseng, o thabela hafeela pelo e ’ngoe e rata se fosahetseng, e leng seo a se khothalletsang.—Pes. 97:10.

8, 9. Re lokela ho ipotsa lipotso life mabapi le boithabiso?

⁸ Ka lehlakoreng le leng, moea oa Molimo o susumetsa batho ba o amohelang hore ba hloeke, ba be le khotso ’me ba be mohau. Re lokela ho ipotsa, ‘Na boithabiso boo ke bo khethang bo ntšusumetsa hore ke be le litšobotsi tse ntle?’ Bohlale bo tsoang holimo “ha bo na boikaketsi.” Batho ba susumetsoang ke moea oa Molimo ha ba bolelle baahelani ba bona ka boitšoaro bo hloekileng le khotso feela ebe bona ba thabela ho shebella pefo e sehlōhō le boitšoaro bo litšila ha ba le malapeng a bona.

⁹ Jehova o lebeletse hore re inehele ho eena feela. Leha ho le joalo, Satane eena o tla khotsofala leha re ka etsa ketso e le ’ngoe feela ea borapeli, e leng seo a ileng a se batla ho Jesu. (Luka 4:7, 8) Re ka ’na ra ipotsa: ‘Na boithabiso boo ke bo khethang bo etsa hore ke nolofalloe ho inehela ho Molimo feela? Na khetho ea ka e etsa hore ho be bonolo kapa ho be thata hore ke hane moea oa lefatše? Na nakong e tlang ke lokela ho etsa liphetoho boithabisong boo ke bo khethang?’

10, 11. (a) Moea oa lefatše o etsa hore re be le maikutlo afe mabapi le lintho tse bonahalang? (b) Lentsoe la Molimo le bululetsoeng ka moea, le re khothalletsa ho ba le maikutlo afe?

¹⁰ Maikutlo a ka ke afe ka lintho tse bonahalang? (Bala Luka 18:24-30.) Moea oa lefatše o khothalletsa “takatso ea mahlo” ka ho khothalletsa meharo le ho rata lintho tse bonahalang. (1 Joh. 2:16) O entse hore batho ba bangata ba ikemisetse ho rua. (1 Tim. 6:9, 10) Moea oo o etsa hore re lumele hore ho ba le lintho tse ngata tse bonahalang ho fana ka tšireletso ea ka ho sa feleng. (Liprov. 18:11) Leha ho le joalo, haeba re rata chelete ho feta Molimo, Satane o tla be a hlōtse. Re lokela ho ipotsa, ‘Na bophelong ke shebane feela le ho batla mabothobotho a lintho tse bonahalang le menyaka?’

¹¹ Leha ho le joalo, Lentsoe la Molimo le bululetsoeng ka moea, le re khothalletsa ho ba le maikutlo a loketseng ka chelete le hore re sebetse ka thata ho itlhokomela le ho hlokomela ba malapa a rōna ka lintho tseo ba li hlokang nameng. (1 Tim. 5:8) Moea oa Molimo o thusa batho ba o amohelang hore ba etsise Jehova ka hore le bona ba fane ka seatla se bulehileng. Batho ba joalo ba tsebahala ka ho fana eseng ho amohela feela. Ba nka batho e le ba bohlokoa ho feta lintho, ’me ha ho khoneha ba thabela ho arolelana seo ba nang le sona le batho ba bang. (Liprov. 3:27, 28) Hape, le ka mohla ha ba lumelle ho lelekisa chelete hore ho tle pele ho ho sebeletsa Molimo.

12, 13. Ho fapana le moea oa lefatše, moea oa Molimo o ka re ama joang ka tsela e ka re tsoelang molemo?

¹² Botho ba ka bo bontša hore ke na le moea ofe? (Bala Bakolose 3:8-10, 13.) Moea oa lefatše o ntšetsa pele mesebetsi ea nama. (Bagal. 5:19-21) Ntho e hlileng e bontšang hantle hore na re na le moea ofe ke ha lintho li sa tsamaee hantle, joalokaha mora kapa morali oabo rōna oa Mokreste a re hlokomoloha, a re utloisa bohloko kapa a bile a re siteloa. Ho phaella moo, ha re le malapeng moo re le bang, ho ka ’na ha hlaka hore na re laoloa ke moea ofe. Ho ka ’na ha hlokahala hore re itlhahlobe. Ipotse, ‘Likhoeling tse tšeletseng tse fetileng, na botho ba ka bo bile joaloka ba Kreste haholoanyane kapa ke khutletse mekhoeng ea ka e mebe lipuong le boitšoarong?’

¹³ Moea oa Molimo o ka re thusa hore re ‘hlobole botho ba khale le litloaelo tsa bona’ le hore re ikapese “botho bo bocha.” Seo se tla re thusa hore re be le lerato le ho feta le hore re be mosa. Ho tla ba bonolo hore re tšoarelane ka bolokolohi, le haeba re e-na le lebaka le utloahalang la ho utloa bohloko. Ha re sa tla hlola re bontša “lehloeo le nang le lonya le bohale le khalefo le ho tleroha le puo e nyefolang” haeba re nahana hore re sebelitsoe ka ho hloka toka. Ho e-na le hoo, re tla etsa boiteko ba hore re be le “qenehelo e bonolo.”—Baef. 4:31, 32.

14. Batho ba bangata lefatšeng ba nka Lentsoe la Molimo joang?

¹⁴ Na ke hlompha melao ea boitšoaro e ka Bibeleng ebile kea e rata? (Bala Liproverbia 3:5, 6.) Moea oa lefatše o susumelletsa batho hore ba fetohele Lentsoe la Molimo. Batho ba susumetsoang ke moea ona ba hlokomoloha likarolo tse itseng tsa Bibele tseo ba nkang hore li hanana le bona, ho e-na le hoo ba thabela lineano le lifilosofi tsa batho. (2 Tim. 4:3, 4) Athe ba bang ho hang ha ba natse Lentsoe la Molimo. Batho ba joalo ba belaella molemo le bonnete ba Bibele, ’me ba ipona ba le bohlale. Ba khella fatše melao ea eona e hloekileng mabapi le bofebe, bosodoma le tlhalo. Ba ruta hore “botle ke bobe le [hore] bobe ke botle.” (Esa. 5:20) Na moea oo o re tšoaelitse? Na ha re thulana le mathata re tšepa bohlale ba batho ho akarelletsa le maikutlo a rōna? Kapa na re ikitlaelletsa hore re latele keletso ea Bibele?

15. Ho e-na le hore re itšetlehe ka bohlale ba rōna, re lokela ho etsa’ng?

¹⁵ Moea oa Molimo o etsa hore re hlomphe Bibele. Joaloka mopesaleme, re nka lentsoe la Molimo e le lebone la maoto a rōna le leseli tseleng ea rōna. (Pes. 119:105) Ho e-na le hore re itšetlehe ka bohlale ba rōna, ka kholiseho re itšetleha ka Lentsoe la Molimo le ngotsoeng hore le re thuse ho hlokomela se nepahetseng le se fosahetseng. Re ithuta hore re se ke ra hlompha Bibele feela empa re rate le molao oa Molimo.—Pes. 119:97.

Ithute Mohlaleng oa Jesu

16. Ho ba le “kelello ea Kreste” ho akarelletsa’ng?

¹⁶ E le hore re fumane moea oa Molimo, re lokela ho loanela ho ba le “kelello ea Kreste.” (1 Bakor. 2:16) E le hore re be le “boikutlo ba kelello bo tšoanang le boo Kreste Jesu a neng a e-na le bona” ho hlokahala hore re tsebe tsela eo a neng a nahana ka eona le eo a neng a etsa lintho ka eona, ebe rea mo etsisa. (Bar. 15:5; 1 Pet. 2:21) Nahana ka litsela tse ling tseo re ka etsang seo ka tsona.

17, 18. (a) Re ithuta’ng ho Jesu mabapi le thapelo? (b) Ke hobane’ng ha re lokela hore ‘re ’ne re kōpe’?

¹⁷ Rapella moea oa Molimo. Pele a thulana le liteko, Jesu o ile a rapella moea oa Molimo hore o mo thuse. (Luka 22:40, 41) Le rōna re lokela ho kōpa Molimo hore a re fe moea oa hae o halalelang. Jehova o o fa batho bohle ba mo kōpang oona ka tumelo, ka seatla se bulehileng. (Luka 11:13) Jesu o ile a re: “Le ’ne le kōpe, ’me le tla fuoa; le ’ne le batle, ’me le tla fumana; le ’ne le kokote, ’me le tla buleloa. Etsoe e mong le e mong ea kōpang oa amohela, e mong le e mong ea batlang oa fumana, ’me e mong le e mong ea kokotang o tla buleloa.”—Mat. 7:7, 8.

¹⁸ Ha u batla moea oa Jehova le thuso ea hae, u se ke ua potlakela ho khaotsa ho li kōpa. Ho ka ’na ha hlokahala hore re rapele hangata le hore re nke nako re ntse re rapela. Ka linako tse ling Jehova o lumella barapeli ba hae hore ba bontše hore na likōpo tsa bona li tiile hakae le hore na tumelo ea bona ke ea sebele hakae pele a arabela lithapelo tsa bona.a

19. Kamehla Jesu o ne a etsa’ng, hona ke hobane’ng ha re lokela ho mo etsisa?

¹⁹ Mamela Jehova ka botlalo. Kamehla Jesu o ne a etsa lintho tse khahlisang Ntate oa hae. Empa ka lekhetlo le leng tsela eo Jesu a neng a batla ho sebetsa taba ka eona, e ne e fapane le seo Ntate oa hae a neng a se batla. Leha ho le joalo, ka kholiseho o ile a re ho Ntate oa hae: “Ho ke ho etsahale thato ea hao, eseng ea ka.” (Luka 22:42) Ipotse, ‘Na ke mamela Molimo esita le haeba ho etsa joalo ho se bonolo?’ Ho mamela Molimo ke habohlokoa e le hore re phele. Re lokela ho mo hlompha ka hohle-hohle kaha ke Moetsi oa rōna, Mohloli le ’Maballi oa bophelo ba rōna. (Pes. 95:6, 7) Ho mamela ke ntho ea bohlokoa haholo. Ha re sa mamele, Molimo a ke ke a re amohela.

20. Ntho ea bohlokoa haholo bophelong ba Jesu e ne e le eng, hona re ka mo etsisa joang?

²⁰ Tseba Bibele hantle. Ha Satane a ne a hlasela tumelo ea Jesu ka ho toba, Jesu o ile a qotsa Mangolo hore a mo hlōle. (Luka 4:1-13) Ha a ne a nyatsa bahanyetsi ba hae ba bolumeli, Jesu o ile a sebelisa Lentsoe la Molimo. (Mat. 15:3-6) Bophelong ba hae bohle ntho eo Jesu a neng a e nka e le ea bohlokoa ka ho fetisisa, e ne e le ho tseba molao oa Molimo le ho o phethahatsa. (Mat. 5:17) Le rōna re batla ho lula re fepa likelello tsa rōna ka Lentsoe la Molimo le matlafatsang tumelo. (Bafil. 4:8, 9) Ho ka ’na ha e-ba thata hore ba bang ba rōna re fumane nako ea thuto ea botho le ea lelapa. Leha ho le joalo, ho e-na le hore re fumane nako, ho ka ’na ha hlokahala hore re iphe nako.—Baef. 5:15-17.

21. Ke tokisetso efe eo re ka e sebelisang ho re thusa hore re tsebe Lentsoe la Molimo haholoanyane re be re le sebelise bophelong ba rōna?

²¹ “Lekhoba le tšepahalang le le masene” le re thusitse hore re be le nako ea thuto ea botho le ea lelapa ka ho etsa hore ho be le mantsiboea a Borapeli ba Lelapa beke e ’ngoe le e ’ngoe. (Mat. 24:45) Na u sebelisa tokisetso ee ka bohlale? E le ho u thusa hore u be le kelello ea Kreste, na lenaneong la hao la ho ithuta u ka hlahloba ka tsela e hlophisehileng seo Jesu a ileng a se ruta mabapi le lihlooho tse itseng tseo u tla ikhethela tsona? U ka ’na ua sebelisa Watch Tower Publications Index hore u fumane boitsebiso bo mabapi le sehlooho seo u batlang ho ithuta ka sona. Ka mohlala, ho tloha ka 2008 ho fihlela ka 2010, khatiso ea batho ka kakaretso ea makasine ena, e ne e e-na le letoto la lihlooho tse 12 tse neng li e-na le sehlooho se reng, “Seo re Ithutang Sona ho Jesu.” U ka ’na ua sebelisa lihlooho tsena e le motheo oa thuto ea hao. Ho tloha ka 2006, Tsoha! e ile ea ba le sehlooho se reng, “U Tla Araba Joang?” Morero oa tlhahlobo ena e ne e le ho u thusa hore u be le tsebo ea Lentsoe la Molimo e batsi le e tebileng. E ka ba hantle hore nako le nako u akarelletse boitsebiso bo tsoang lihloohong tse joalo lenaneong la lōna la Borapeli ba Lelapa.

Re ka Hlōla Lefatše

22, 23. Re tlameha ho etsa’ng e le hore re hlōle lefatše?

²² E le hore re tataisoe ke moea oa Molimo, re lokela ho hana moea oa lefatše. Ho o hana ha ho bonolo. Ho ka ba boima, e ka ba ntoa e thata. (Juda 3) Empa re ka hlōla! Ha Jesu a ne a bua le barutuoa ba hae o ile a re: “Lefatšeng le ba le matšoenyeho, empa le be sebete! Ke hlōtse lefatše.”—Joh. 16:33.

²³ Le rōna re ka hlōla lefatše haeba re hana moea oa lona re bile re etsa sohle seo re ka se khonang hore re amohele moea oa Molimo. Ka sebele, “haeba Molimo a eme le rōna, ke mang ea tla ba khahlanong le rōna?” (Bar. 8:31) Ha re fumana moea oa Molimo le ha re latela tataiso ea oona joalokaha e boletsoe ka Bibeleng, re tla khotsofala, re be le khotso le thabo hammoho le kholiseho ea hore re tla fumana bophelo bo sa feleng lefatšeng le lecha le seng le le haufi.

[Mongolo o botlaaseng ba leqephe]

Na U sa Hopola?

• Ke hobane’ng ha moea oa lefatše o atile hakaale?

• Ke lipotso life tse ’nè tseo re lokelang ho ipotsa tsona?

• Ke lintho life tse tharo tseo re ithutang tsona ho Jesu mabapi le ho amohela moea oa Molimo?

[Setšoantšo se leqepheng la 8]

Mangeloi a mang a ile a fetoha bademona joang?

[Setšoantšo se leqepheng la 10]

Satane o sebelisa moea oa lefatše hore a laole batho, empa re ka itšoasolla tšusumetsong ea oona