Ho Thoe’ng ka Beng ka Uena?
1 Bongata ba rōna re na le beng ka rōna ba bangata ba seng ’neteng. Re labalabela hakaakang hore baratuoa ba rōna ba joalo ba kopanele le rōna tseleng e isang bophelong! Kameho ea rōna ka bokamoso ba bona ba ka ho sa feleng e ka ba khōlō haholo haeba e le litho tsa lelapa ka ho toba. Le hoja re lekile ka lilemo tse ngata ho etsa hore ba thahaselle ’nete, ha rea lokela ho fihlela qeto ea hore boemo ba bona ke bo hlokisang tšepo.
2 Ha Jesu a ntse a etsa mosebetsi oa hae oa boboleli, “barab’abo ba ne ba sa sebelise tumelo ho eena.” (Joh. 7:5) Ka nako e ’ngoe, beng ka eena ba bile ba nahana hore o lahlehetsoe ke kelello. (Mar. 3:21) Leha ho le joalo, Jesu ha aa ka a lahla tšepo ka bona. Hamorao, barab’abo ba ile ba amohela ’nete. (Lik. 1:14) Jakobo mor’abo Jesu e bile tšiea ka phuthehong ea Bokreste. (Bagal. 1:18, 19; 2:9) Haeba u lakatsa ho thabela ho bona beng ka uena ba amohela ’nete, u se ke ua khaotsa ho leka ho ba finyella ka litaba tse molemo tsa ’Muso.
3 E-ba ea Khathollang, Eseng ea Sithabetsang: Ha Jesu a ne a bolella ba bang, bamameli ba hae ba ne ba ikutloa ba khatholohile, ba sa ikutloe ba hateletsoe. (Mat. 11:28, 29) O ne a sa ba sithabetse ka lithuto tseo ba sa li utloisiseng. Bakeng sa ho khatholla beng ka uena ka metsi a ’nete, u se ke ua ba foqa litaba, ba fe nako ea khefu! Molebeli ea tsamaeang o ile a hlokomela: “Liphello tse molemo li finyelloa ke ba pakelang beng ka bona hanyane ka hanyane hore ba tsose ka ho bona takatso ea ho batla ho tseba.” Ka tsela ena, esita le bahanyetsi ba ka qala ho botsa lipotso ’me qetellong ba hōlisa thahasello bakeng sa ’nete.—1 Pet. 2:2; bapisa le 1 Bakorinthe 3:1, 2.
4 Bakreste ba bangata ba leng lenyalong ba ile ba pakela balekane ba bona ba sa lumelang ka mokhoa o atlehileng ka ho siea sengoliloeng se phetliloe boitsebisong bo ka ’nang ba hapa thahasello ea bona. Morali’abo rōna e mong ea entseng sena o ne a bile a khanna thuto le bana ba hae moo monna oa hae a ntseng a utloa, a fana ka litlhaloso tse neng li ka mo tsoela molemo. Ka linako tse ling o ne a mo botsa: “Ke ithutile ho itseng thutong ea ka kajeno. U nahana joang ka hona?” Qetellong monna oa hae o ile a amohela ’nete.
5 E-ba le Tlhompho, U se Felloe ke Mamello: Mohoeletsi e mong o ile a hlalosa hore “esita le beng ka motho ba na le tokelo ea ho ba le maikutlo le likhopolo tsa bona.” Kahoo re lokela ho bontša tlhompho ha ba ntša maikutlo a bona kapa ha ba re kōpa ka ho tobileng hore re se buisane le bona ka ’nete. (Moek. 3:7; 1 Pet. 3:15) Ka ho ba ba mamellang, ba lerato le ka ho ba bamameli ba molemo, re ka batla menyetla e loketseng ea ho fana ka bopaki ka tsela e bohlale. Mamello e joalo e ka putsa joalokaha ho bonoa phihlelong ea monna oa Mokreste eo ka mamello a ileng a tiisetsa tšoaro e mpe ea mosali oa hae ka lilemo tse 20. Hang ha mosali a qala ho fetoha, monna o ile a re: “Ke leboha Jehova haholo ka ho nthusa ho hlaolela mamello, hobane joale ke bona phello: Mosali oa ka o qalisitse ho tsamaea tseleng ea bophelo!”
6 Ho thoe’ng ka beng ka uena? Mohlomong ka lebaka la boitšoaro ba hao bo botle ba Bokreste le lithapelo tsa hao lebitsong la bona, “u ka ba hulela ka lehlakoreng la Jehova.”—1 Pet. 3:1, 2, mongolo o botlaaseng ba leqephe ho NW.