Thusa ba Bang Hore ba ‘Mamele ho Tloha Pelong’
1. Jehova o batla hore barapeli ba hae ba etse’ng?
1 Ho mamela ke motheo oa ho rapela Jehova ka tsela eo a e amohelang. (Deut. 12:28; 1 Pet. 1:14-16) Haufinyane, Molimo o tla ahlola “ba sa tsebeng Molimo le ba sa mameleng litaba tse molemo.” (2 Bathes. 1:8) Re ka thusa ba bang joang hore ‘ba mamele lithuto tsa Lentsoe la Molimo ho tloha pelong’?—Bar. 6:17.
2. Ke hobane’ng ha e le habohlokoa ho thusa ba bang ho haha tumelo e matla?
2 Ka ho ba Thusa ho Haha Tumelo le Lerato: Ka Mangolong, ho mamela le tumelo li amana haufi. Moapostola Pauluse o ile a bua ka “taelo ea Molimo ea sa feleng ea ho ntšetsa pele ho mamela ka tumelo.” (Bar. 16:26) Baheberu khaolo ea 11 e bua ka mehlala e mengata ea tumelo, eo boholo ba eona e neng e akarelletsa ho sebetsa tumellanong le thato ea Jehova. (Baheb. 11:7, 8, 17) Ka lehlakoreng le leng, ho se mamele ho amahanngoa le ho hloka tumelo. (Joh. 3:36; Baheb. 3:18, 19) Ho hlokahala hore re be le tsebo ea ho sebelisa Lentsoe la Molimo e le hore re ka thusa ba bang ho ba le tumelo e ba susumelletsang ho mamela.—2 Tim. 2:15; Jak. 2:14, 17.
3. (a) Ho mamela ho amana le lerato joang? (b) Re ka thusa liithuti tsa Bibele joang hore li rate Jehova?
3 Ho mamela ho boetse ho amahanngoa le ho rata Molimo. (Deut. 5:10; 11:1, 22; 30:16) Johanne oa Pele 5:3 e re: “Se boleloang ke lerato la Molimo ke sena, hore re boloke litaelo tsa hae; leha ho le joalo litaelo tsa hae ha li boima.” Re ka thusa liithuti tsa Bibele joang hore li rate Jehova? Batla menyetla ea ho haha kananelo bakeng sa litšoaneleho tsa Jehova nakong ea thuto. Ntša maikutlo a hao a tebileng ka Molimo. Thusa seithuti ho hlaolela kamano e haufi-ufi le Jehova. Ka holim’a tsohle, haeba re rata Jehova, rōna hammoho le ba bang re tla susumelletseha ho mo mamela ho tloha pelong—Mat. 22:37.
4. (a) Ke hobane’ng ha mohlala oa rōna e le oa bohlokoa? (b) Re lokela ho etsa’ng hore re hlaolele “pelo e mamelang”?
4 Ka Mohlala oa Rōna: Tsela e ka sehloohong eo re ka khothatsang ba bang hore ba mamele litaba tse molemo ke ka mohlala oa rōna. Leha ho le joalo, ho hlokahala hore re etse boiteko bo sa khaotseng ba ho hlaolela “pelo e mamelang.” (1 Mar. 3:9; Liprov. 4:23) See se akarelletsa eng? Matlafatsa pelo ea hao ka ho ithuta Bibele kamehla le ho kopanela libokeng. (Pes. 1:1, 2; Baheb. 10:24, 25) Tloaelana le bao lipelo tsa bona li momahaneng borapeling ba ’nete. (Liprov. 13:20) Kopanela kamehla tšebeletsong ea tšimo, u e-na le takatso ea sebele ea ho thusa batho ba tšimong ea heno. Rapela Jehova hore a u thuse ho hlaolela pelo e ntle. (Pes. 86:11) Qoba lintho tse ka senyang pelo ea hao, tse kang boithabiso bo tletseng boitšoaro bo bobe le pefo. Phehella lintho tse u atametsang haufi le Molimo le tse matlafatsang kamano ea hao le eena.—Jak. 4:7, 8.
5. Ba mamelang ba hlohonolofatsoa joang?
5 Jehova o ile a kholisa batho ba hae ba boholo-holo hore litlhohonolofatso li tla ba fihlela haeba ba mamela lentsoe la hae. (Deut. 28:1, 2) Ka ho tšoanang, kajeno Jehova o hlohonolofatsa ka ho enneng “ba mo mamelang e le ’musi.” (Lik. 5:32) Ka lebaka leo, ka thuto ea rōna le ka mohlala, e se eka re ka thusa ba bang hore ba mamele ho tloha pelong.