Re ka Phela ka ho sa Feleng

 1. Ho nahanisisa ka tšepiso ea Jehova ea hore re tla phela ka ho sa feleng ho etsa hore re ikutloe joang?

JEHOVA o tšepisa batho ba mo mamelang hore ba tla fumana “bophelo bo sa feleng.” (Bar. 6:23) Ha re nahanisisa ka tšepiso ena re rata Jehova le ho feta. Ak’u nahane feela: Ntate oa rona ea leholimong o re rata haholo hoo ho se nang letho le ka re arohanyang le eena.

 2. Tšepiso ea hore re tla phela ka ho sa feleng e re thusa joang?

² Tšepiso eo Molimo a re etselitseng eona ea bophelo bo sa feleng e re thusa hore re mamelle mathata ao re nang le ’ona hona joale. Re ke ke ra tlohela ho sebeletsa Jehova esita le haeba lira tsa rona li re tšosa ka hore li tla re bolaea. Hobane’ng? Lebaka le leng ke hobane rea tseba hore haeba re shoa re ntse re tšepahalla Jehova, o tla re tsosa ’me re tla ba le tšepo ea hore re tla phela ho se mohla re tla shoa. (Joh. 5:28, 29; 1 Bakor. 15:55-58; Baheb. 2:15) Ke hobane’ng ha re ka kholiseha hore re ka phela ka ho sa feleng? Nahana ka mabaka a latelang.

 3. Ke hobane’ng ha re ka kholiseha hore Jehova a ka khona ho etsa hore re phele ka ho sa feleng? (Pesaleme ea 102:12, 24, 27)

³ Rea tseba hore Jehova a ka khona ho etsa hore re phele ka ho sa feleng hobane ke Mohloli oa bophelo ’me o phela ka ho sa feleng. (Pes. 36:9) Litemana tse latelang tsa Bibele lia tiisa hore haesale Jehova a le teng ebile o tla lula a le teng. Pesaleme ea 90:2 e re Jehova ‘ha a na qalo ebile ha a na qetello.’ Pesaleme ea 102 e bua taba e tšoanang. (Bala Pesaleme ea 102:12, 24, 27.) Le moprofeta Habakuke o ile a re ka Ntate oa rona ea leholimong: “Jehova, esale u le teng. Molimo oa ka, Mohalaleli oa ka, ha u shoe.”—Hab. 1:12.

 4. Na re lokela ho tšoenyeha haeba re sa utloisise taba ea hore haesale Jehova a le teng? Hlalosa.

⁴ Na u thatafalloa ho utloisisa taba ea hore haesale Jehova a le teng? (Esa. 40:28) Batho ba bangata ha ba e utloisise. Elihu o ile a re ka Molimo: “Ha ho na motho ea ka khonang ho bala lilemo tsa hae.” (Jobo 36:26) Empa taba feela ea hore ha re utloisise ntho e itseng ha e bolele hore ntho eo ha se ’nete. Mohlala, taba ea hore ha re utloisise hantle hore na motlakase o sebetsa joang, ha e bolele hore motlakase ha se ntho e teng. Ka tsela e tšoanang, le rona re ka ’na ra se ke ra utloisisa ka ho feletseng hore na ho tla joang hore ebe Jehova haesale a le teng le hore o tla lula a le teng. Empa taba ena ha e bolele hore Molimo ha a phele ka ho sa feleng. Hore Molimo o phela ka ho sa feleng ha hoa itšetleha ka hore na rea utloisisa kapa ha re utloisise. (Bar. 11:33-36) O bile teng pele ho lintho tsohle ho akareletsa letsatsi le linaleli. Jehova o re kholisa hore “ke eena ea entseng lefatše ka matla a hae.” Hape o bile teng pele a ‘otlolla maholimo.’ (Jer. 51:15; Lik. 17:24) Lebaka le leng le re kholisang hore re ka phela ka ho sa feleng ke lefe?

 5. Banyalani ba pele ba ne ba e-na le tšepo efe?

⁵ Har’a lintho tsohle tseo Jehova a li bopileng lefatšeng, ke batho feela ba neng ba bopetsoe hore ba se ke ba shoa. O ile a ba fa tšepo e ikhethang ea hore ba ke ke ba shoa. Leha ho le joalo, Jehova o ile a re ho Adama: “Empa ha e le sefate sa tsebo ea botle le bobe, u se ke oa ja litholoana tsa sona hobane letsatsing leo ka lona u li jang, kannete u tla shoa.” (Gen. 2:17) Hoja ebe Adama le Eva ba ile ba mamela Jehova, ba ka be ba sa shoa. Hoa utloahala ho nahana hore ho na le nako eo Jehova a neng a tla ba lumella hore ba je litholoana tsa ‘sefate sa bophelo.’ Ka ho etsa joalo o ne a tla be a ba kholisa hore kannete ba tla “phela ka ho sa feleng.”b—Gen. 3:22.

6, 7. (a) Ke eng hape e bontšang hore batho ba ne ba sa bopeloa ho shoa? (b) U batla ho etsa lintho life ha u se u phela ka ho sa feleng? (Sheba litšoantšo.)

⁶ Bo-rasaense ba bang ba fumane hore boko ba rona bo ka boloka boitsebiso bo bongata ho feta boo re ithutang bona ha re ntse re phela. Ena ke taba e thahasellisang. Ka 2010, makasine ea Scientific American Mind e ile ea re ho hakanngoa hore boko ba motho bo ka boloka boitsebiso bo bongata haholo. Boitsebiso boo bo ka lekana le mananeo a thelevishene a rekotiloeng ao motho a ka nkang lilemo tse 300 a a shebeletse a sa khaotse. Ho ka etsahala hore boko ba rona bo khona ho boloka boitsebiso bo bongata haholo ho feta boo. Sena se bontša hore Jehova o entse boko ba rona ka tsela eo bo ka khonang ho boloka boitsebiso bo bongata ho feta boo re ithutang bona ka lilemo tse 70 kapa tse 80.—Pes. 90:10.

⁷ Jehova o boetse o re file tabatabelo e matla ea ho phela. Bibele e re Molimo “o kentse ka lipelong tsa [batho] takatso ea ho phela ka ho sa feleng.” (Moek. 3:11) Leo ke lebaka le leng le etsang hore re nke lefu e le sera. (1 Bakor. 15:26) Haeba re kula haholo, na rea tela ebe re se re emela ho shoa? Che. Hangata re ea ngakeng kapa re noa meriana e le hore re tle re fole. Re etsa sohle seo re ka se khonang hore re se ke ra shoa. Hape ha motho eo re mo ratang a hlokahala, ho sa tsotellehe hore na o moholo kapa o monyenyane re utloa bohloko haholo, le hona ka nako e telele. (Joh. 11:32, 33) Ho hlakile hore ’Mopi oa rona ea lerato o ne a ke ke a re fa takatso ea ho batla ho phela ka ho sa feleng le bokhoni ba ho tsoela pele re ithuta haeba morero oa hae e ne e se hore batho ba phele ka ho sa feleng. Empa ho na le mabaka a mang a mangata a etsang hore re lumele hore re ka khona ho phela ka ho sa feleng. Hona joale re tl’o buisana ka hore na Jehova o entse eng nakong e fetileng le hore na o etsa eng hona joale ho bontša hore morero oa hae oa qalong ha oa fetoha.

 8. Esaia 55:11 e re ruta eng ka morero oa Jehova bakeng sa rona?

⁸ Le hoja Adama le Eva ba ile ba etsa sebe se ileng sa fella ka hore bana ba bona ba shoe, Jehova ha aa ka a fetola morero oa hae. (Bala Esaia 55:11.) O ntse a rerile hore batho ba tšepahalang ba phele ka ho sa feleng. Re tseba seo ka lebaka la lintho tseo Jehova a ileng a li bua le ho li etsa ho phethahatsa morero oa hae.

 9. Molimo o tšepisitse eng? (Daniele 12:2, 13)

⁹ Jehova o tšepisitse ho tsosa bafu le ho ba fa monyetla oa ho phela ka ho sa feleng. (Lik. 24:15; Tite 1:1, 2) Jobo ea tšepahalang o ne a kholisehile hore Jehova o labalabela ho tsosa bafu. (Jobo 14:14, 15) Moprofeta Daniele o ne a tseba hore batho ba tla tsosoa le ho fuoa monyetla oa ho phela ka ho sa feleng. (Pes. 37:29; bala Daniele 12:2, 13.) Bajuda ba mehleng ea Jesu le bona ba ne ba tseba hore Jehova a ka fa bahlanka ba hae ba tšepahalang “bophelo bo sa feleng.” (Luka 10:25; 18:18) Jesu o ile a bua ka tšepiso ena ka makhetlo a mangata ’me eena ka boeena o ile a tsosoa ke Ntate oa hae.—Mat. 19:29; 22:31, 32; Luka 18:30; Joh. 11:25.

10. Mehlala ea batho ba ileng ba tsosoa nakong e fetileng e bontša eng? (Sheba setšoantšo.)

¹⁰ Jehova ke Mofani oa bophelo ’me o na le matla a ho tsosa bafu. O ile a fa moprofeta Elia matla a ho tsosa mora oa mohlolohali oa Sarepta. (1 Mar. 17:21-23) Hamorao Molimo o ile a thusa moprofeta Elisha ho tsosa mora oa mosali oa Moshuneme. (2 Mar. 4:18-20, 34-37) Mehlala eo le e meng e bontša hore Jehova o na le matla a ho tsosa bafu. Ha Jesu a ne a le lefatšeng, o ile a bontša hore Ntate oa hae o mo file matla ao a ho tsosa bafu. (Joh. 11:23-25, 43, 44) Hona joale Jesu o leholimong ’me o “filoe matla holim’a ntho e ’ngoe le e ’ngoe e leholimong le lefatšeng.” Kahoo, a ka khona ho phethahatsa tšepiso ea hore “bohle ba mabitleng” ba tla tsosoa ba e-na le monyetla oa ho phela ka ho sa feleng.—Mat. 28:18; Joh. 5:25-29.

11. Ke joang lefu la Jesu le re fang monyetla oa ho phela ka ho sa feleng?

¹¹ Ke hobane’ng ha Jehova a ile a lumella hore Mora oa hae eo a mo ratang a shoe lefu le bohloko? Jesu o ile a araba potso eo ha a re: “Molimo o ratile lefatše haholo hoo a ileng a fana ka Mora oa hae ea mong e le hore e mong le e mong ea bontšang hore o lumela ho eena a se ke a timetsoa empa a fumane bophelo bo sa feleng.” (Joh. 3:16) Molimo o ile a etsa hore re be le monyetla oa ho phela ka ho sa feleng ka hore a fane ka Mora oa hae ho re lopolla sebeng. (Mat. 20:28) Moapostola Pauluse o ile a hlalosa karolo ena ea bohlokoa ea morero oa Molimo ka ho re: “Kaha lefu le bile teng ka motho, tsoho ea bafu le eona e teng ka motho. Feela joalokaha bohle ba shoa ka lebaka la Adama, bohle ba tla phelisoa ka lebaka la Kreste.”—1 Bakor. 15:21, 22.  

12. Jehova o tla sebelisa ’Muso oa hae joang hore o phethahatse morero oa hae ka batho?

¹² Jesu o ile a ruta balateli ba hae ho rapella hore ’Muso oa Molimo o tle le hore thato ea Molimo e etsoe lefatšeng. (Mat. 6:9, 10) Morero o mong oa Molimo ke hore batho ba phele ka ho sa feleng lefatšeng. E le ho finyella morero oo, Jehova o khethile Mora oa hae hore e be Morena oa ’Muso oa Bomesia. Molimo o ntse a bokella batho ba 144 000 ba tla sebetsa le Jesu ho phetha thato ea hae.—Tšen. 5:9, 10.

13. Jehova o etsa eng hona joale, hona rona re lokela ho etsa eng?

¹³ Hona joale Jehova o ntse a bokella “bongata bo boholo” ba batho. O ba ruta ho phela tlas’a ’Muso oa hae. (Tšen. 7:9, 10; Jak. 2:8) Le hoja batho ba bangata lefatšeng kajeno ba arotsoe ke lintoa le lehloeo, batho bao e leng karolo ea “bongata bo boholo” ba sebetsa ka thata hore ho se ke ha e-ba le lehloeo har’a bona. Ka tsela ea tšoantšetso ba etsa lisabole tsa bona mehoma. (Mik. 4:3) Ho e-na le ho kenella lintoeng tse bolaeang batho ba bangata, ba thusa batho ho fumana “bophelo ba sebele” ka ho ba ruta ka Molimo oa ’nete le merero ea hae. (1 Tim. 6:19) Le haeba ba ka ba le mathata a lichelete kapa ba hanyetsoa ke ba lelapa hobane ba tšehetsa ’Muso oa Molimo, Jehova o tla etsa bonnete ba hore ba na le lintho tseo ba li hlokang. (Mat. 6:25, 30-33; Luka 18:29, 30) Lintlha tsena kaofela lia re tiisetsa hore ’Muso oa Molimo ke ntho ea sebele le hore o tla tsoela pele o phethahatsa morero oa Jehova.

14, 15. Tšepiso ea Jehova ea ho felisa lefu ka ho sa feleng e tla phethahala joang?

¹⁴ Hona joale Jesu ke Morena oa ’Muso oa Molimo ’me o tla phethahatsa litšepiso tsohle tsa Jehova. (2 Bakor. 1:20) Ho tloha ka 1914, haesale Jesu a hlola lira tsa hae. (Pes. 110:1, 2) Haufinyane, Jesu le babusi-’moho le eena ba tla qetela tlholo eo ’me ba felise batho bohle ba khopo.—Tšen. 6:2.

¹⁵ Nakong ea Puso ea Jesu ea Lilemo Tse Sekete, bafu ba tla tsosoa ’me batho bohle ba mamelang Jehova ba tla etsoa hore ba phethahale. Ka mor’a teko ea ho qetela, batho bao Jehova a tla nka ba lokile ba tla fuoa ‘lefatše e le lefa la bona, ba tla phela ho lona ka ho sa feleng.’ (Pes. 37:10, 11, 29) Ho thabisang ke hore “sera sa ho qetela e leng lefu se tla felisoa.”—1 Bakor. 15:26.

16. Lebaka la rona le ka sehloohong la ho sebeletsa Jehova e lokela ho ba lefe?

¹⁶ Sehloohong sena re se re ithutile hore tšepo ea rona ea bophelo bo sa feleng e thehiloe Lentsoeng la Molimo. Tšepo eo e ka re thusa hore re lule re tšepahala matsatsing ana a ho qetela a boima. Empa ha re thabise Jehova hobane feela re batla ho phela ka ho sa feleng. Lebaka le ka sehloohong le etsang hore re tšepahalle Jehova le Jesu ke hobane re ba rata haholo. (2 Bakor. 5:14, 15) Lerato leo ke lona le etsang hore re ba etsise re be re bolelle batho ba bang ka tšepo eo re nang le eona. (Bar. 10:13-15) Ha re ithuta ho ba batho ba fanang le ba sa ichebeng bobona, Jehova o tla batla ho ba motsoalle oa rona ka ho sa feleng.—Baheb. 13:16.

17. Re na le boikarabelo bofe? (Matheu 7:13, 14)

¹⁷ Na re tla ba har’a batho ba tla fumana bophelo bo sa feleng? Jehova o re file monyetla oo. Ho ho rona hore re lule tseleng e isang bophelong. (Bala Matheu 7:13, 14.) Bophelo bo tla ba joang ha re se re phela ka ho sa feleng? Re tla araba potso eo sehloohong se latelang.