Batho ba Holileng ba Bohlokoa Haholo ka Phuthehong

Mohlomong le uena matla a se a thefulehile ka lebaka la botsofali. Le hoja u sebelelitse Jehova ka botšepehi ka lilemo tse ngata, u ka ’na oa nahana hore ha u sa na thuso ka lebaka la lintho tseo u seng u sa khone ho li etsa. Ka mohlala, u ka nyahama ha u bapisa lintho tseo u khonang ho li etsetsa Jehova hona joale le tseo u neng u khona ho mo etsetsa tsona nakong e fetileng. Haeba u boemong boo, u ka thusoa ke eng hore u lule u thabile?

JEHOVA O BATLA HORE U ETSE’NG?

Ipotse hore na Jehova o batla hore u etse’ng. U ka khothatsoa ke mantsoe a Deuteronoma 6:​5, a reng: “U rate Jehova Molimo oa hao ka pelo ea hao eohle le ka moea oa hao oohle le ka matla a hao ’ohle.”

Ho latela temana ena, Jehova o batla hore u mo sebeletse ka pelo, moea le matla a hao ’ohle. Taba eo e tla u thusa hore u qobe ho ipapisa le batho ba bang kapa ho bapisa seo u khonang ho se etsa hona joale le seo u neng u khona ho se etsa nakong e fetileng.

Nahana ka sena: Ha u sa le mocha, u ne u fa Jehova eng? Bahlanka ba Jehova ba bangata ba ka re ba ne ba mo fa sohle seo ba ka se khonang. Ka nako eo, u ne u fa Jehova sohle seo u ka se khonang ho latela maemo a hao. Ke’ng seo u khonang ho se fa Jehova hona joale? U ntse u fa Jehova sohle seo u ka se khonang ho latela maemo a hao kajeno. Haeba u sheba litaba ka tsela ena, u tla hlokomela hore u ntse u fa Jehova se tšoanang le seo u neng u mo fa sona nakong e fetileng. U ne u mo fa sohle seo u ka se khonang ka nako eo, ’me le hona joale u ntse u mo fa sohle seo u ka se khonang.

U KA THUSA BATHO BA BANG KA BOIPHIHLELO BA HAO

Ho e-na le ho nahana feela ka lintho tseo u seng u sa khone ho li etsa, nahana ka menyetla e mengata eo u nang le eona ea ho thusa batho ba bang. Joaloka Mokreste ea seng a holile, ho na le lintho tseo u khonang ho li etsa hona joale tseo u neng u sa khone ho li etsa ha u sa le mocha. Ka mohlala, u ka:

Phetela ba bang lintho tseo u ithutileng tsona bophelong. Nahana ka seo Bibele e se buang litemaneng tsena:

Morena Davida: “Nkile ka ba mocha ’me hona joale ke tsofetse empa ha ke e-s’o bone ea lokileng a lahliloe kapa bana ba hae ba hloka lijo.”—Pes. 37:25.

Joshua: “Ke makhatheng a lefu ’me le tseba hantle ka lipelo tsa lona tsohle le ka moea oa lona oohle hore ha ho na lentsoe leha le le leng le hlolehileng ho phethahala litšepisong tsohle tse molemo tseo Jehova Molimo oa lona a le boleletseng tsona. A phethahetse kaofela bakeng sa lona. Ha ho lentsoe leha le le leng la tsona le hlolehileng ho phethahala.”—Josh. 23:14.

Mohlomong le uena u kile oa bua mantsoe a tšoanang. Davida le Joshua ba buile ka lintho tse ba etsahalletseng bophelong ba bona. Kaha bahlanka bana ba tšepahalang ba Jehova ba ne ba bua lintho tseo ba ileng ba li bona le ho li utloa ka lilemo tse ngata bophelong, mantsoe a bona a ne a e-na le matla.

Haeba u se u qetile lilemo tse ngata u sebeletsa Jehova, le uena u ka bua ho tsoa phihlelong ka melemo ea ho sebeletsa Jehova. Na u sa hopola nakong eo u neng u bona Jehova a thusa batho ba hae ka tsela e khethehileng? Haeba ho joalo, phetela ba bang phihlelo eo. Feela joalokaha e ile ea u thabisa, e ka ba thabisa le bona. U ka khothatsa bara le barali ba bo rona haholo ka ho ba phetela liphihlelo tsa hao.—Bar. 1:​11, 12.

Tsela e ’ngoe eo u ka khothatsang ba bang ka eona, ke ka ho ba teng libokeng ka seqo haeba maemo a hao a u lumella. Ha u le libokeng, u tla khothala u be u khothatse le ba bang. Morali oa bo rona Connie, eo ho builoeng ka eena pejana, o re: “Ho ea libokeng ka seqo ho etsa hore ke se ke ka nyahama. Nka nyahama joang ke e-na le batho ba nthatang Holong ea ’Muso? Ke leka ho bontša ba bang hore kea ba ananela ka hore ke ba fe limphonyana. Ke etsa bonnete ba hore ke tsoela pele ho etsa lintho tsa moea le bara le barali ba bo rona.”

TŠEBELETSO EA HAO E BOHLOKOA HAHOLO HO JEHOVA

Ka Bibeleng ho na le mehlala ea batho ba bangata bao Jehova a neng a ba rata le hoja maemo a bona a ne a sa ba lumelle ho etsa lintho tse itseng. Ka mohlala, nahana ka Simeone, Moiseraele ea neng a se a holile ea neng a ntse a phela ha Jesu a tsoaloa. Ha Simeone a le tempeleng, ho ka etsahala hore o ne a bona banna ba bacha ba etsa mesebetsi ea bohlokoa moo. Empa ho thoe’ng ka Simeone? E ka ’na eaba o ne a nahana hore Jehova ha a sa mo nka e le motho oa bohlokoa hobane a tsofetse. Empa Jehova o ne a sa mo nke joalo. O ne a bona Simeone e le monna ea ‘lokileng le ea hlomphang Molimo’ ’me a mo hlohonolofatsa ka tokelo ea ho bona Jesu ha e sa le lesea. Jehova o ile a boela a sebelisa Simeone hore a profete hore Jesu ke eena Mesia ea tlang. (Luka 2:​25-35) Ho hlakile hore ha Jehova a sheba Simeone, o ne a sa bone monna ea tsofetseng empa o ne a bona monna ea nang le tumelo e matla le ea ‘nang le moea o halalelang.’

Le uena u ka kholiseha hore Jehova o nka tšebeletso ea hao e le ea bohlokoa haholo, le hoja ho se ho e-na le lintho tseo u sa khoneng ho li etsa. Jehova o amohela sehlabelo sa hao “hobane o lebelletse hore motho a mo fe seo a nang le sona eseng seo a se nang sona.”—2 Bakor. 8:12.

Kahoo, tsepamisa mohopolo oa hao linthong tseo u khonang ho li etsa. Ka mohlala, nahana ka litsela tse fapaneng tseo u ka etsang mosebetsi oa boboleli ka tsona, le haeba e ka ba ka nako e khutšoanyane. U ka boela oa khothatsa Bakreste-’moho le uena ka ho ba founela kapa ho ba ngolla melaetsa e monate likareteng. Liketso tseo tse nyenyane tse bontšang hore oa ba rata, li ka ba khothatsa haholo ha li tsoa ho mohlanka oa Jehova ea mo sebelelitseng ka nako e telele.

Ba bang baa kula ebile ho na le lintho tseo ba sitoang ho li etsa. Nahana ka phihlelo ea morali oa bo rona oa Afrika Bochabela lebokoseng le reng, “O Sebelisitse Bibele ho Pholosa Bophelo ba Hae.”

Hopola hore mohlala oa hao oa tumelo le botšepehi o ka khothatsa ba bang haholo. U mohlala o phelang oa mamello ’me u ka kholiseha hore ‘Molimo o lokile, ka lebaka leo a ke ke a lebala mosebetsi oa hao le kamoo u bontšitseng kateng hore u rata lebitso la hae ka hore ebe u sebelelitse balumeli-’moho le uena ’me le hona joale u ntse u ba sebeletsa.’—Baheb. 6:10.

ETSA SOHLE SEO U KA SE KHONANG

Litsebi li bontša hore batho ba bangata ba holileng ba phathahaneng ka ho thusa batho ba bang, ba phela hantle ’meleng, ba ntlafatsa bokhoni ba bona ba ho nahana ebile ba phela nako e telele.

Ke ’nete hore ho etsetsa batho lintho tse ntle ho ke ke ha tlosa liphello tsa botsofali. Ke ’Muso oa Molimo feela o tla felisa sebe seo re se futsitseng ho Adama, e leng sona se etsang hore re tsofale le ho shoa.—Bar. 5:12.

Leha ho le joalo, tšebeletso eo u e etsetsang Jehova, e akarelletsang ho thusa batho ba bang hore ba mo tsebe, e tla etsa hore tumelo ea hao e lule e le matla le hore u lule u phetse hantle. Batho ba holileng, ka kopo tsebang hore Jehova o nka tšebeletso ea lona e le ea bohlokoa haholo ebile le matlotlo liphuthehong tsa habo lona ka lebaka la mohlala oa tumelo ea lona.