Bibele e Re’ng ka ho Phahama ha Theko ea Lintho?

’Nete eo re ke keng ra iphapanyetsa eona ke hore theko ea lijo le matla e ntse e phahama. Hangata sena se bakoa ke meferefere ea lipolotiki, likhohlano kapa lintoa pakeng tsa linaha. Esita le batho ba hole haholo le lintoa tsena baa ameha hobane moruo oa linaha o angoa ke lintho tse etsahalang linaheng tse ling.

Bibele e re thusa ho tseba hore na ke hobane’ng ha re kopana le mathata a moruo, re ka sebetsana le ’ona joang le hore na ho na le tšepo ea hore mathata ana a tla fela ka ho felletseng.

Ho phahama ha theko ea lintho “mehleng ea bofelo”

• Bibele e hlalosa matsatsi ao re phelang ho ’ona e le ‘mehla ea bofelo.’—2 Timothea 3:1.

• Jesu o ile a re “lintho tse tšosang” li ne li tla etsahala mehleng ea bofelo. (Luka 21:11) Batho baa tšoha ha theko ea lintho e phahama ka sekhahla. Ba tšoenyeha ka hore na ho tla etsahala’ng ka bona nakong e tlang le hore na ba tla khona ho hlokomela ba malapa a bona.

• Buka ea Tšenolo e ile ea hla ea bolela esale pele hore theko ea lijo e tla nyoloha nakong ena eo re phelang ho eona. “Ka utloa lentsoe. . . . le re: ‘Lithara ea koro e rekoa ka denari le lilithara tse tharo tsa harese li rekoa ka denari.’”—Tšenolo 6:6.

Ho fumana lintlha tse ling ka ‘mehla ea bofelo’ le ka boprofeta bo hlahang bukeng ea Tšenolo, shebella video ea Ho Tloha ka 1914 Boemo ba Lefatše bo Ile ba Fetoha u be u bale sehlooho se reng, “Bapalami ba Bane ba Lipere—ke Bo-mang?”

Tharollo ea mathata a moruo

• “Batho ba tla haha matlo ’me ba lule ho ’ona, ba tla lema lirapa tsa morara ’me ba je litholoana tsa tsona. Ba ke ke ba haha matlo ebe motho e mong o lula ho ’ona, ba ke ke ba lema ebe ho ja batho ba bang.”—Esaia 65:21, 22.

• “Ho tla ba le lijo tse ngata lefatšeng. Li tla ba ngata le holim’a lithaba.”—Pesaleme ea 72:16.

• “Jehova o re, ‘Ka lebaka la hore ba hlophehileng baa hatelloa, ka lebaka la hore ba futsanehileng baa lla, ke tla etsa ho hong ho ba thusa.’”—Pesaleme ea 12:5.a

Haufinyane Molimo o tl’o felisa mathata a moruo lefatšeng lohle. E le hore u bone hore na see se tla etsahala joang, bala sehlooho se reng, “Na Mathata a Moruo a Tla ke a Fele?”

Le kajeno, Bibele e ka u thusa ho sebetsana le ho phahama ha theko ea lintho. Joang? E na le likeletso tse ka u thusang ho sebelisa chelete hantle. (Liproverbia 23:4, 5; Moeklesia 7:12) Ho fumana lintlha tse ling, bala sehlooho se reng, “Boloka Chelete ea Hao le Lintho Tsohle Tseo u Nang le Tsona” le se reng, “U ka Phela ka Chelete e Nyenyane Joang?”