“E Mong le e Mong o Tla Jara Mojaro oa Hae”
“E mong le e mong oa rōna o tla ikarabella ho Molimo.”—BAROMA 14:12.
1. Baheberu ba banyenyane ba bararo ba ile ba tobana le boikarabelo bofe?
BACHA ba bararo ba Baheberu ba neng ba lula Babylona ba ile ba tobana le qeto e amang lefu le bophelo. Na ba ne ba lokela ho khumamela setšoantšo se seholo, joalokaha e ne e le molao oa naha? Kapa ba ne ba tla hana ho se rapela ebe ba akheloa ka sebōping se chesang sa mollo? Shadrake, Meshake le Abednego ha baa ka ba e-ba le nako ea ho botsa mang kapa mang, ebile ho ne ho sa hlokahale hore ba botse. Ntle ho tikatiko ba ile ba re: “U tsebe, morena, hore melimo ea hao hase eona eo re e sebeletsang, ’me setšoantšo sa khauta seo u se emisitseng re ke ke ra se rapela.” (Daniele 3:18) Baheberu bana ba bararo ba ile ba jara boikarabelo ba bona.
2. Ha e le hantle, ke bo-mang ba ileng ba susumetsa qeto ea Pilato mabapi le Jesu Kreste, ’me na seo se ile sa lokolla ’musisi eo oa Moroma hore a se ke a ikarabella?
2 Lilemo tse ka bang makholo a tšeletseng hamorao, ’musisi ea itseng o ne a se a ile a mamela seo monna e mong a neng a qosoa ka sona. Ha a hlahloba nyeoe, o ile a kholiseha hore moqosuoa ha a na molato. Leha ho le joalo, letšoele le ne le batla hore monna eo a bolaoe. Ka mor’a hore ’musisi eo a leke ho hanyetsa letšoele, o ile a bonahala a le leqe ho jara boikarabelo ba hae ’me a inehela ho seo a neng a hatelloa hore a se etse. O ile a hlatsoa matsoho ’me a re: “Ke hloka molato maling a motho enoa.” Ka mor’a moo o ile a nehelana ka monna eo hore a khokhotheloe thupeng. Ha ho pelaelo hore ho e-na le hore Ponse Pilato a jare boikarabelo ba hae ba ho etsa qeto mabapi le Jesu Kreste, o ile a lumella ba bang hore ba mo etsetse eona. Ho sa tsotellehe hore na o ile a hlatsoa matsoho hakae, o ne a ntse a ikarabella ka ho ahlola Jesu ka leeme.—Matheu 27:11-26; Luka 23:13-25.
3. Ke hobane’ng ha re sa lokela ho lumella ba bang hore ba re etsetse liqeto?
3 Uena u tla etsa joang? Ha u lokela ho etsa liqeto, na u tšoana le Baheberu bao ba bararo, kapa na u lumella ba bang hore ba u etsetse liqeto? Ha ho bonolo ho etsa liqeto. Ho hlokahala hore motho a hōle kelellong e le hore a etse liqeto tse nepahetseng. Ka mohlala, batsoali ba lokela ho etsetsa bana ba bona ba tlaase lilemong liqeto tse ntle. Ha e le hantle, ho etsa qeto ho thata haholo ha boemo bo rarahane ’me ho e-na le lintho tse ngata tse hlokang ho nahanoa ka hloko. Leha ho le joalo, boikarabelo ba ho etsa liqeto ha bo boima hoo bo ka akarelletsoang har’a “meroalo,” kapa lintho tse tšoenyang tseo “ba nang le litšoaneleho tsa moea” ba ka re jarelang tsona. (Bagalata 6:1, 2) Ho e-na le hoo, ke mojaro oo “e mong le e mong oa rōna [a] tla ikarabella ho Molimo” ka oona. (Baroma 14:12) Bibele e re: “E mong le e mong o tla jara mojaro oa hae.” (Bagalata 6:5) Ebe joale re ka etsa liqeto tse bohlale joang bophelong? Sa pele, re lokela ho elelloa hore na ke hokae moo re fokolang teng ebe re ithuta kamoo re ka loantšang bofokoli boo kateng.
Ntho ea Bohlokoa e Hlokahalang
4. Ho se mamele ha batho ba babeli ba pele ho lokela ho re ruta ntho efe ea bohlokoa?
4 Qalong ea histori ea batho, batho ba babeli ba pele ba ile ba etsa qeto e ileng ea baka mathata. Ba ile ba khetha ho ja litholoana tsa sefate sa tsebo ea botle le bobe. (Genese 2:16, 17) Ba ne ba thehile qeto ea bona holim’a eng? Bibele e re: “Mosali a bona hore sefate se loketse ho jeoa le hore sea lakatseha mahlong, e, sefate se ne se lakatseha ha se talingoa. Kahoo a qala ho kha tholoana ea sona ’me a e ja. Ka mor’a moo a fa le monna oa hae ha a se a e-na le eena ’me a qala ho e ja.” (Genese 3:6) Qeto ea Eva e ne e thehiloe takatsong ea boithati. Ketso ea hae e ile ea etsa hore Adama a mo etsise. Ka lebaka leo, sebe le lefu li ile tsa “namela ho batho bohle.” (Baroma 5:12) Ho se utloe ha Adama le Eva ho lokela ho re ruta ntho ea bohlokoa mabapi le bofokoli ba batho: Ha batho ba sa khomarele tataiso ea Molimo, hangata ba etsa liqeto tse fosahetseng.
5. Jehova o re tataisa ka eng, ’me re lokela ho etsa’ng hore e re tsoele molemo?
5 Re thaba hakaakang hore ebe Jehova Molimo ha aa re tlohela ntle ho tataiso! Mangolo a re bolella se latelang: “Litsebe tsa lōna li tla utloa lentsoe ka mor’a lōna le reng: ‘Tsela ke eona ena. Tsamaeang ho eona,’ esere la ea ka ho le letona kapa la ea ka ho le letšehali.” (Esaia 30:21) Jehova o bua le rōna ka Lentsoe le bululetsoeng la hae, e leng Bibele. Re lokela ho ithuta Mangolo ’me re rue tsebo e nepahetseng ea ’ona. E le hore re etse liqeto tse nepahetseng, re lokela ho ja “lijo tse tiileng . . . tsa batho ba hōlileng ka ho feletseng.” Hape, re tlameha hore ‘ka tšebeliso, matla a rōna a ho lemoha a koetlisoe ho khetholla se nepahetseng le se fosahetseng.’ (Baheberu 5:14) Re ka koetlisa matla a rōna a ho lemoha ka ho sebelisa seo re ithutang sona Lentsoeng la Molimo.
6. Ho hlokahala’ng hore matsoalo a rōna a sebetse hantle?
6 Ntho ea bohlokoa ha re etsa liqeto ke letsoalo leo re tsoaloang le lona. Letsoalo lena le na le matla a ho ahlola, ’me le ka re ‘qosa kapa la re emela.’ (Baroma 2:14, 15) Leha ho le joalo, e le hore matsoalo a rōna a sebetse hantle, a tlameha ho rutoa tsebo e nepahetseng ea Lentsoe la Molimo ’me a tsosoe ka ho sebelisa Lentsoe leo. Letsoalo le sa rutoang le susumetsoa habonolo ke meetlo le mekhoa e itseng. Libaka tseo re lulang ho tsona le maikutlo a batho ba bang le tsona li ka re lahla. Ho etsahala’ng ha nako le nako re hlokomoloha seo matsoalo a rōna a re susumetsang hore re se etse ’me re tlōla melao ea Molimo? Ka mor’a nako le ka cha joalokaha eka le chesitsoe “ka tšepe e chesang e tšoaeang,” la tšoana le nama e nang le khoo—e shoeleng le e sa utloeng letho. (1 Timothea 4:2) Ka lehlakoreng le leng, letsoalo le koetlisitsoeng ka Lentsoe la Molimo ke motataisi ea tšepahalang.
7. Ke ntho efe ea bohlokoa e hlokahalang ha ho etsoa liqeto?
7 Kahoo, ntho ea bohlokoa e hlokahalang bakeng sa ho jara boikarabelo ba ho etsa liqeto tse bohlale, ke tsebo e nepahetseng ea Mangolo le bokhoni ba ho e sebelisa. Ho e-na le ho etsa liqeto ka potlako, re lokela ho ipha nako ea ho batla melao-motheo ea Bibele ebe re sebelisa matla a rōna a ho nahana. Esita le ha ho hlokahala hore re etse qeto hona hoo—joaloka Shadrake Meshake le Abednego—re ba malala-a-laotsoe haeba re e-na le tsebo e nepahetseng ea Lentsoe la Molimo ’me le matsoalo a rōna a koetlisitsoe hantle ka lona. E le hore re utloisise hore na ho hatela pele ka matla khōlong e feletseng ho ka ntlafatsa bokhoni ba rōna ba ho etsa liqeto joang, a re hlahlobeng likarolo tse peli bophelong.
Re Tla Tloaelana le Bo-mang?
8, 9. (a) Ke melao-motheo efe e bontšang bohlokoa ba ho qoba litloaelano tse mpe? (b) Na ho tloaelana le batho ba babe ho bolela feela ho tloaelana ka ho toba le batho ba se nang boitšoaro? Hlalosa.
8 Moapostola Pauluse o ile a ngola a re: “Le se ke la thetsoa. Litloaelano tse mpe li senya mekhoa e metle.” (1 Bakorinthe 15:33) Jesu Kreste o ile a re ho barutuoa ba hae: “Ha le karolo ea lefatše.” (Johanne 15:19) Ka mor’a ho ithuta melao-motheo ena, ka potlako rea bona hore hoa hlokahala hore re qobe ho tloaelana le lihlola, bafebi, masholu, matahoa le batho ba mofuta oo. (1 Bakorinthe 6:9, 10) Leha ho le joalo, ha re ntse re tsoela pele tsebong ea Bibele, rea hlokomela hore ho qeta nako le batho bana ka ho ba shebella libaesekopong, thelevisheneng, kapa lik’homphieutheng kapa ka ho bala ka bona libukeng, le hona ho kotsi ka tsela e tšoanang. Ho hong ho oelang sehlopheng sena ke ho tloaelana ka meqoqo ea Inthanete le batho “ba patang seo ba leng sona.”—Pesaleme ea 26:4.
9 Ho thoe’ng ka ho tloaelana le batho ba boitšoaro bo botle empa ba sa lumele ho Molimo oa ’nete? Mangolo a re bolella se latelang: “Lefatše lohle le rapaletse matleng a ea khopo.” (1 Johanne 5:19) Rea lemoha hore litloaelano tse mpe ha li felle feela ka ho tloaelana le batho ba boitšoaro bo hlephileng. Kahoo, re lokela ho etsa setsoalle se haufi feela le ba ratang Jehova.
10. Ke eng se re thusang ho etsa liqeto tse bontšang khōlo mabapi le ho tsoakana le lefatše?
10 Ho qoba ka ho feletseng ho tloaelana le batho ba sa rapeleng Jehova ho ke ke ha khoneha ebile ha ho hlokahale. (Johanne 17:15) Ho ea tšebeletsong ea Bokreste, sekolong le mosebetsing, kaofela ho akarelletsa ho tsoakana le batho bao. Mokreste ea nyalaneng le motho ea sa lumelang a ka tsoakana le lefatše ho feta ba bang. Leha ho le joalo, haeba re sebelisa matla a rōna a ho lemoha, re tla utloisisa hore ho tsoakana le lefatše ha ho hlokahala, ho fapane hōle le ho batla ho ba le maqhama le lona. (Jakobo 4:4) Kahoo, re khona ho etsa liqeto tse bontšang khōlo mabapi le hore na re tla kenella mesebetsing ea ka mor’a sekolo, e kang lipapali, litantši, le ho ba teng liphathing le lijong tse khethehileng tse lokiselitsoeng basebetsi.
Ho Khetha Mosebetsi
11. Ntho ea pele eo re lokelang ho e nahana ha re etsa liqeto ka mosebetsi ke efe?
11 Ho sebelisa melao-motheo ea Bibele joaloka batho ba hōlileng ka ho feletseng, ho re thusa ho etsa liqeto mabapi le hore na re phethahatsa boikarabelo ba rōna joang ba ho ‘lokisetsa hore ho be le lintho tse hlokahalang bakeng sa bao e leng ba rōna.’ (1 Timothea 5:8) Ntho ea pele eo re lokelang ho e nahana ke hore na ke mosebetsi oa mofuta ofe le hore na o hloka hore re etse’ng. Ho khetha mosebetsi o tšehetsang ka ho toba seo Bibele e se nyatsang, ho fosahetse ka ho feletseng. Kahoo, Bakreste ba ’nete ha ba amohele mesebetsi e ka ’nang ea akarelletsa borapeli ba litšoantšo, ho utsoa, tšebeliso e mpe ea mali, kapa mekhoa e meng eo e seng ea Mangolo. Hape ha rea lokela ho qala leshano kapa ho qhekella, le haeba mohiri a batla hore re etse joalo.—Liketso 15:29; Tšenolo 21:8.
12, 13. Ntle ho mosebetsi ka booona, ke lintho life hape tseo e leng tsa bohlokoa ha ho etsoa liqeto mabapi le mosebetsi?
12 Ho thoe’ng haeba mosebetsi oo ka booona o se khahlanong ka ho toba le se seng se hlokoang ke Mangolo? Ha re ntse re hōla tsebong ea ’nete le matla a rōna a ho lemoha a ntse a ntlafala, re hlokomela lintho tse ling tseo re lokelang ho nahana ka tsona. Ho thoe’ng haeba mosebetsi oo o tla akarelletsa hore re etse lintho tse khahlanong le Mangolo, tse kang ho arabela lifono moo ho bechoang? Ho lokela hore ho nahanoe le ka mokhoa oo chelete e kenang ka oona le sebaka seo ho sebeletsoang ho sona. Ka mohlala, na Mokreste ea itšebetsang ea nang le konteraka o ne a tla iketela mosebetsi o amang ho penta kereke ea Bokreste-’mōtoana ebe kahoo o kopanela ho ntšetseng pele bolumeli ba bohata?—2 Bakorinthe 6:14-16.
13 Ho thoe’ng haeba ka linako tse ling mohiri oa rōna a fumana konteraka ea ho ntlafatsa sebaka sa borapeli ba bohata? Tabeng ena, ho ne ho tla hlokahala hore re nahanele lintho tse kang hore na re ameha hakae ho laoleng mosebetsi le hore na re ameha hakae ho oona. Hona ho thoe’ng ka ho etsa mesebetsi e amohelehang e kang ho tsamaisa poso hohle motseng, ho akarelletsang le ho e isa libakeng tsa boitšoaro bo bobe? Na molao-motheo o ho Matheu 5:45 o ke ke oa ama qeto eo re e etsang. Ntho e ke keng ea hlokomolohuoa ke hore na ho sebetsa mosebetsi oo kamehla ho ka ama matsoalo a rōna joang. (Baheberu 13:18) Ha ho pelaelo hore ho jara boikarabelo ba rōna ha re etsa liqeto tse bontšang khōlo ha re khetha mosebetsi, ho hloka hore re ntlafatse matla a rōna a ho lemoha le hore re koetlise matsoalo ao Molimo a re fileng ’ona.
“U mo Ele Hloko Litseleng Tsohle Tsa Hao”
14. Ha re etsa liqeto, ke eng eo re lokelang ho nahana ka eona?
14 Ho thoe’ng ka liqeto tse ling tseo re li etsang mabapi le litaba tse ling, tse kang ho tsoela pele ka thuto ea lefatše le ho amohela kapa ho hana mekhoa e itseng ea kalafo? Ha re lokela ho etsa qeto leha e le efe, re tšoanela ho tseba hantle melao-motheo ea Bibele e amang qeto eo ebe re sebelisa matla a rōna a ho nahana ha re sebelisa melao-motheo eo. Morena Solomone ea bohlale oa Iseraele ea boholo-holo o ile a re: “Tšepa Jehova ka pelo ea hao eohle ’me u se ke ua itšetleha ka kutloisiso ea hao. U mo ele hloko litseleng tsohle tsa hao, ’me o tla otlolla litsela tsa hao.”—Liproverbia 3:5, 6.
15. Re ithuta eng ho Bakreste ba lekholong la pele la lilemo mabapi le ho etsa liqeto?
15 Hangata, liqeto tseo re li etsang li ama batho ba bang, ’me ho hlokahala re nahane ka hona. Ka mohlala, Bakreste ba lekholong la pele la lilemo, ba ne ba se ba se taolong ea lithibelo tse ngata tsa Molao oa Moshe tse neng li ama lijo. Ba ne ba ka khetha ho ja lijo tse itseng tseo Molao oa Moshe o neng o re ha lia hloeka ’me li ne li se na phoso ka litsela tse ling. Leha ho le joalo, mabapi le nama ea phoofolo eo mohlomong e neng e amana le tempele ea borapeli ba litšoantšo, moapostola Pauluse o ile a ngola, a re: “Haeba lijo li etsa hore mor’eso a khoptjoe, le ka mohla nke ke ka boela ka ja nama ho hang, e le hore ke se ke ka etsa hore mor’eso a khoptjoe.” (1 Bakorinthe 8:11-13) Pauluse o ile a khothalletsa Bakreste ba pele hore ba nahanele matsoalo a ba bang e le hore ba se ke ba ba khopisa. Liqeto tsa rōna ha lia lokela ho re etsa hore re be “lisosa tsa khopiso.”—1 Bakorinthe 10:29, 32.
Batla Bohlale ba Molimo
16. Thapelo e re thusa joang ha re etsa liqeto?
16 Thuso ea bohlokoa haholo ha ho etsoa liqeto ke thapelo. Morutuoa Jakobo o re: “Haeba mang kapa mang oa lōna a haelloa ke bohlale, a ’ne a kōpe Molimo, hobane o fana ka seatla se bulehileng ho bohle a bile a sa nyelise; ’me o tla bo fuoa.” (Jakobo 1:5) Ka tšepo, re ka rapela Jehova ’me ra kōpa bohlale ba hore re etse liqeto tse nepahetseng. Ha re bua le Molimo oa ’nete ka se re tšoentseng ’me re batla tataiso ea hae, moea o halalelang o ka re thusa ho utloisisa hamolemo mangolo ao re nahanang ka ’ona ebe o re hopotsa ao e ka ’nang eaba re a lebetse
17. Ba bang ba ka re thusa joang ha re lokela ho etsa liqeto?
17 Na batho ba bang ba ka re thusa ho etsa liqeto? E, Jehova o lokiselitse hore phutheho e be le batho ba hōlileng ka ho feletseng tsebong. (Baefese 4:11, 12) Ba ka botsoa, haholo ha ho etsoa liqeto tse khōlō. Batho ba nang le temohisiso linthong tsa moea le ba nang le tsebo bophelong ba ka re hlokomelisa melao-motheo e eketsehileng ea Bibele e ka ’nang ea sebetsa liqetong tsa rōna le e ka re thusang ho “nepisisa lintho tsa bohlokoa haholo.” (Bafilipi 1:9, 10) Leha ho le joalo, ho hotle hore re ele sena hloko: Re lokela ho ba hlokolosi hore re se ke ra lumella batho ba bang ho re etsetsa liqeto. Ke rōna ba lokelang ho jara boikarabelo.
Na Phello e ba Molemo Kamehla?
18. Re ka re’ng ka phello ea qeto e ntle?
18 Na liqeto tse thehiloeng ka thata melao-motheong ea Bibele le tse entsoeng ka hloko li tla ba le liphello tse molemo kamehla? E, li tla ba le tsona qetellong. Leha ho le joalo, ka linako tse ling, liphello tsa nakoana li ka ’na tsa tlisa mathata. Shadrake, Meshake le Abednego ba ne ba tseba hore ba ka ’na ba shoa ka lebaka la qeto ea bona ea ho se rapele setšoantšo seo se seholo. (Daniele 3:16-19) Ka ho tšoanang, ka mor’a hore baapostola ba bolelle Lekhotla la Sanhedrine la Bajuda hore ba tla mamela Molimo e le ’musi ho e-na le batho, ba ile ba shapuoa pele ba lokolloa. (Liketso 5:27-29, 40) Ho feta moo, “nako le ketsahalo e sa lebelloang” li ka ’na tsa senya liphello tsa qeto leha e le efe. (Moeklesia 9:11) Haeba re thulana le mathata ka tsela e itseng ka lebaka la ho etsa qeto e nepahetseng, re ka kholiseha hore Jehova o tla re thusa ho mamella le hore o tla re hlohonolofatsa nakong e tlang.—2 Bakorinthe 4:7.
19. Ke joang ka sebete re ka jarang boikarabelo ba rōna ha re etsa liqeto?
19 Kahoo, ha re etsa liqeto, re lokela ho batla melao-motheo ea Mangolo ebe re sebelisa matla a rōna a ho nahana e le hore re e sebelise. Re leboha haholo hore ebe Jehova o re thusa ka moea oa hae o halalelang le ka batho ba hōlileng tsebong ba teng ka phuthehong! A re sebeliseng tataiso ena le litokisetso tsena tse sa tšoaneng, ’me ka sebete re jare boikarabelo ba rōna ha re etsa liqeto tse bohlale.
U Ithutile Eng?
• Ntho e khōlō e hlokahalang e le hore re etse liqeto tse ntle ke efe?
• Ho hatela pele ka matla khōlong ho re ama joang ha re khetha metsoalle?
• Lintlha tse ling tsa bohlokoa tseo re lokelang ho li nahana ha re etsa qeto mabapi le mosebetsi ke life?
• Ke lintho life tse ka re thusang ho etsa liqeto?
[Setšoantšo se leqepheng la 22]
Ho se mamele ha Adama le Eva ho re ruta ntho ea bohlokoa
[Setšoantšo se leqepheng la 24]
Pele u etsa qeto ea bohlokoa, batla melao-motheo ea Bibele