-
“Babylona e Oele!”Boprofeta ba Esaia—Leseli Molokong oa Batho I
-
-
5. Ho tla joang hore Babylona e tume ka ho “sebetsa ka bolotsana” le ka ho ba “motlatlapi”?
5 Mehleng ea Esaia Babylona ha e e-s’o be ’muso oa lefatše, empa Jehova o se a ntse a bona esale pele hore ha nako ea eona e fihla, e tla sebelisa matla a eona hampe. Esaia o tsoela pele: “Ke boleletsoe pono e thata: Ea sebetsang ka bolotsana o sebetsa ka bolotsana, le motlatlapi oa tlatlapa.” (Esaia 21:2a) Ka sebele Babylona e tla tlatlapa e be e sebetsane ka bolotsana le lichaba tseo e li hlōlang, ho akarelletsa le Juda. Bababylona ba tla tlatlapa Jerusalema, ba senye tempele ea eona, ’me ba ise baahi ba eona botlamuoeng Babylona. Moo, batlamuoa bana ba tsielehileng ba tla sebetsoa ka bolotsana, ba songoe ka lebaka la tumelo ea bona ’me ba ke ke ba fuoa tšepo ea hore ba tla ke ba khutlele naheng ea habo bona.—2 Likronike 36:17-21; Pesaleme ea 137:1-4.
6. (a) Jehova o tla felisa ho feheloa hofe? (b) Ke lichaba life tseo ho boletsoeng esale pele hore li tla hlasela Babylona, hona see se phethahala joang?
6 E, Babylona e hlile e loketsoe ke “pono [ena] e thata,” e leng ho bolelang linako tse thata tse tla e tlela. Esaia o tsoela pele: “Nyoloha, Uena Elame! Thibella, Uena Media! Ke felisitse ho feheloa hohle ho bakoang ke eena.” (Esaia 21:2b) Ba hateletsoeng ke ’muso ona o sebetsang ka bolotsana ba tla lokoloha. Qetellong, ho feheloa ha bona ho tla fela! (Pesaleme ea 79:11, 12) Tokoloho ee e tla tlisoa ke eng? Esaia o bolela lichaba tse peli tse tla hlasela Babylona: Elame le Media. Lilemo tse makholo a mabeli hamorao, ka 539 B.C.E., Cyruse oa Mopersia o tla etella pele lebotho le kopaneng la Bapersia le Bamede ho futuhela Babylona. Ha e le Elame eona, babusi ba Persia ba tla rua bonyane karolo e ’ngoe ea naha eo pele ho 539 B.C.E.a Ka hona mabotho a Persia a tla akarelletsa Baelame.
-
-
“Babylona e Oele!”Boprofeta ba Esaia—Leseli Molokong oa Batho I
-
-
a Ka linako tse ling Morena Cyruse oa Persia o bitsoa “Morena oa Anshane”—kaha Anshane ke sebaka kapa motse o Elame. Baiseraele ba mehleng ea Esaia—lekholong la borobeli la lilemo B.C.E.—mohlomong ba ne ba sa tloaela Persia, empa ba ne ba tla tseba ha ho thoe Elame. E ka ’na eaba sena se hlalosa lebaka leo ka lona mona Esaia a e bitsang Elame ho e-na le Persia.
-