Pono ea Bibele

Sebe sa Tšimolohong e ne e le Eng?

KARABO ea potso ena ke ea bohlokoa ho rōna. Hobane’ng? Hobane ho se mamele Molimo ha Adama le Eva ho ile ha ama meloko eohle e latelang ho fihlela mehleng ena ea rōna. Bibele e re: “Sebe se ile sa kena lefatšeng ka motho a le mong le lefu la kena ka sebe, ’me kahoo lefu la namela ho batho bohle hobane kaofela ba ne ba entse sebe.” (Baroma 5:12) Empa ho tla joang hore ketso feela e sa reng letho ea ho khola tholoana sefateng le ho e-ja e tlise liphello tse bohloko hakaale?

Ha Molimo a bōpa Adama le Eva, o ile a ba beha serapeng se setle se neng se tletse ka limela tse jeoang le lifate tse behang litholoana. E ne e le sefate se le seng feela seo ba neng ba sa lokela ho se ja—“sefate sa tsebo ea botle le bobe.” Kaha ba ne ba e-na le bolokolohi ba ho iketsetsa khetho, Adama le Eva ba ne ba ka khetha ho mamela Molimo kapa ho se mo mamele. Leha ho le joalo, Adama o ne a lemositsoe: “Ka letsatsi leo ka lona u jang tsa [sefate sa tsebo] ka sebele u tla shoa.”—Genese 1:29; 2:17.

Thibelo e Utloahalang

Thibelo ena e le ’ngoe e ne e sa bake mathata a letho; Adama le Eva ba ne ba ka ja litholoana tsa lifate tse ling tsohle tse serapeng. (Genese 2:16) Ho feta moo, thibelo eo e ne e sa bolele hore ho na le ho hong ho phoso ka banyalani bao, leha e le hona hore e ne e ba theola seriti. Haeba Molimo a ne a thibetse lintho tse mpe tse kang ho robala le phoofolo kapa ho bolaea, ba bang ba ne ba ka ’na ba re e tlameha ebe batho bao ba phethahetseng ba ne ba e-na le tšekamelo e fosahetseng e neng e tlameha ho thibeloa. Leha ho le joalo, ho ja e ne e le ntho ea tlhaho le e loketseng.

Na tholoana e hanetsoeng e ne e le ho kopanela liphate, joalokaha ba bang ba nahana joalo? Maikutlo ana ha a tšehetsoe ke Mangolo. Taba ea pele ke hore ha Molimo a ne a behathibelo ena, Adama o ne a le mong ’me ho hlakile hore o ile a lula e le lesoha nako e telele. (Genese 2:23) Ea bobeli, Molimo o ile a bolella Adama le Eva hore ba ‘ate ba ngatafale ba tlale lefatše.’ (Genese 1:28) Ho hlakile hore o ne a ke ke a ba laela hore ba tlōle molao oa hae ebe joale ha ba o tlōla o ba ahlolela lefu! (1 Johanne 4:8) Ea boraro, Eva o ile a ja tholoana pele ho Adama ’me hamorao a e fa monna oa hae. (Genese 3:6) Ha ho potang hore tholoana eo e ne e se ho kopanela liphate.

Ba Leka ho Ipusa

Sefate sa tsebo e ne e le sefate sa sebele. Leha ho le joalo, se ne se emela tokelo ea Molimo e le ’Musi ea ho etsetsa batho bao a ba bōpileng qeto ka se setle le se sebe. Ka hona, ho ja tholoana ea sefate seo e ne e se feela hore ke bosholu—ho nka seo e leng sa Molimo—empa hape e ne e le ho leka ho inkela boipuso ka boikhohomoso kapa ho iketsetsa borata. Hlokomela hore ka mor’a hore Satane a thetse Eva ka hore ha eena le monna oa hae ba ja tholoana eo, ‘ka sebele ba ke ke ba shoa,’ o ile a tiisa seo ka ho re: “Etsoe Molimo oa tseba hore letsatsing leo ka lona le jang tsa sona mahlo a lōna a tla tutuboloha ’me le tla ba joaloka Molimo, le tsebe botle le bobe.”—Genese 3:4, 5.

Leha ho le joalo, ha Adama le Eva ba ja tholoana, ha baa ka ba tšoana le Molimo ba tseba botle le bobe. Ha e le hantle, Eva o ile a re ho Molimo: “Noha—e nthetsitse.” (Genese 3:13) Leha ho le joalo, o ne a tseba taelo ea Molimo, etsoe o ile a e bolella noha, eo Satane a ileng a e sebelisa ho bua ka eona. (Tšenolo 12:9) Ka hona, ketso ea hae e ne e bile ho se mamele ha ka boomo. (Genese 3:1-3) Leha ho le joalo, Adama eena o ne a sa ka a thetsoa. (1 Timothea 2:14) Ho e-na le hore a mamele ’Mōpi oa hae, o ile a mamela mosali oa hae ’me a mo latela tseleng ea ho ipusa.—Genese 3:6, 17.

Ka ho bontša hore baa ipusa, Adama le Eva ba ile ba senya ka tsela e ke keng ea lokisoa kamano ea bona le Jehova ’me ha sebe se kena ’meleng ea bona, sa thophothela ho ea fihla liphatseng tsa bona tsa lefutso. Ke ’nete hore ba ile ba phela lilemo tse makholo, empa ba ile ba qala ho shoa “ka letsatsi leo” ba entseng sebe ka lona, ka tsela e tšoanang le eo lekala le khaohileng sefateng le shoang ka eona. (Genese 5:5) Ho feta moo, ka lekhetlo la pele ba ile ba ikutloa ba hloka khotso ea kelello. Ba ile ba ikutloa ba le feela ’me ba leka ho ipatela Molimo. (Genese 3:7, 8) Ba ile ba boela ba ikutloa ba le molato, ba sa sireletseha ba bile ba le lihlong. Sebe sa bona se ile sa ba hlokisa khutso ea kelello, ba khebethoa ke letsoalo ka lebaka la phoso eo ba e entseng.

E le hore a phethahatse mantsoe a hae le ho latela litekanyetso tsa hae tse halalelang, ka nepo Molimo o ile a ahlolela Adama le Eva lefu ’me a ba leleka serapeng sa Edene. (Genese 3:19, 23, 24) Ka hona, Paradeise, thabo le bophelo bo sa feleng li ile tsa lahleha, phello ea e-ba sebe, ho hlopheha le lefu. Moloko oa batho o ile oa hlaheloa ke taba e mpe hakaakang! Leha ho le joalo, hang ka mor’a hore Molimo a ahlole banyalani bao, o ile a tšepisa ho etsolla tšenyo eo e bakiloeng ke sebe sa bona empa a sa sekisetse litekanyetso tsa hae tse lokileng.

Jehova o ile a rera ho etsa hore ho be le monyetla oa hore litloholo tsa Adama le Eva li lokolohe litlamong tsa sebe se bolaeang. O ile a phethahatsa seo ka Jesu Kreste. (Genese 3:15; Matheu 20:28; Bagalata 3:16) Ka eena, Molimo o tla felisa sebe le liphello tsohle tsa sona ’me o tla etsa lefatše lohle paradeise, joalokaha a ne a rerile tšimolohong.—Luka 23:43; Johanne 3:16.

NA U KILE UA IPOTSA?

◼ Re tseba joang hore tholoana e hanetsoeng e ne e se ho kopanela liphate?—Genese 1:28.

◼ Ho ja tholoana e hanetsoeng ho ne ho bontša eng?—Genese 3:4, 5.

◼ Ke tokisetso efe eo Molimo a e entseng ho felisa liphello tsa sebe?—Matheu 20:28.

[Ntlha e Qolotsoeng e leqepheng la 29]

Tholoana e hanetsoeng e ne e se ho kopanela liphate

[Setšoantšo se leqepheng la 28, 29]

Eva o ne a batla ho tšoana le Molimo, a iketsetse qeto ea hore na se setle le se sebe ke sefe