Tsamaiso e Phethahatsang Morero oa Molimo

‘Molimo o sebetsa lintho tsohle ho ea ka tsela eo thato ea hae e rerang ka eona.’—BAEFESE 1:11.

 1. Liphutheho tsohle tsa Lipaki Tsa Jehova li tla be li bokane ka morero ofe ka la 12 April, 2006?

KA Laboraro mantsiboeeng a la 12 April, 2006, batho ba ka bang limilione tse 16 ba tla bokana bakeng sa ho keteka Lijo Tsa Shoalane Tsa Morena. Sebakeng se seng le se seng seo ba tla beng ba kopane ho sona, ho tla be ho e-na le tafole eo ho eona ho behiloeng bohobe bo sa lomosoang, bo emelang ’mele oa Kreste, le veine e khubelu, e tšoantšetsang mali a hae a tšolotsoeng. Ho elella bofelong ba puo e hlalosang morero oa Sehopotso sa lefu la Jesu, ho tla fetisoa litšoantšetso tsena ho bohle ba leng teng—’me ho tla qaloa ka bohobe, ho ntan’o latela veine. Liphuthehong tse seng kae tsa Lipaki Tsa Jehova, motho a le mong kapa ba eketsehileng ho ba leng teng o tla ja litšoantšetso tsena. Empa hangata, ha ho be le ea jang. Ke hobane’ng ha ho ja Bakreste ba seng ba kae feela, ba nang le tšepo ea ho ea phela leholimong, empa bongata bo nang le tšepo ea ho phela ka ho sa feleng lefatšeng bona bo sa je?

2, 3. (a) Jehova o ile a qala ho bōpa lintho ho ea ka morero oa hae joang? (b) Jehova o ile a bōpa lefatše le batho ka morero ofe?

² Jehova ke Molimo ea rerang lintho. E le hore a phethahatse morero oa hae, o ‘sebetsa lintho tsohle ho ea ka tsela eo thato ea hae e rerang ka eona.’ (Baefese 1:11) O qalile ka ho bōpa Mora oa hae ea tsoetsoeng a ’notši. (Johanne 1:1, 14; Tšenolo 3:14) Joale, a sebelisa Mora oa hae, Jehova o ile a bōpa lelapa la bara ba moea ’me qetellong a bōpa bokahohle, ho akarelletsa lefatše le batho ba ho lona.—Jobo 38:4, 7; Pesaleme ea 103:19-21; Johanne 1:2, 3; Bakolose 1:15, 16.

³ Jehova ha aa ka a bōpa lefatše hore e be sebaka seo a lekang batho ho sona ho bona hore na ebe ba tla tšoanelehela ho akarelletsoa sehlopheng sa bara ba hae ba leholimo kapa che, joalokaha likereke tse ngata tsa Bokreste-’mōtoana li ruta joalo. O le bōpile a e-na le morero o tobileng, e leng oa hore “le be le baahi.” (Esaia 45:18) Molimo o bōpile lefatše a le bōpela motho, ’me a bōpa motho a mo bōpela lefatše. (Pesaleme ea 115:16) Lefatše lohle e ne e tla ba paradeise, e tletseng batho ba lokileng, ba neng ba tla e lema le ho e hlokomela. Ha ho mohla batho ba babeli ba pele ba kileng ba tšepisoa hore ba tla qetella ba ile leholimong.—Genese 1:26-28; 2:7, 8, 15.

Morero oa Jehova oa Phephetsoa

 4. Tsela ea Jehova ea ho busa e ile ea phephetsoa joang qalong ea histori ea batho?

⁴ Mora oa Molimo oa moea o ile a rabela eaba o ikemisetsa ho senya morero oa Jehova le ho sebelisa hampe mpho ea bolokolohi ba ho ikhethela lintho eo Molimo a neng a mo file eona. O ile a luka khotso ea bohle ba ratang ho ikokobeletsa bobusi ba Jehova. Satane o ile a etsa hore batho ba pele ba babeli ba qale ho batla ho itokolla ho Molimo. (Genese 3:1-6) O ne a sa halale matla a Jehova, empa o ne a belaella tsela eo a sebelisang bobusi ba Hae ka eona, e leng tokelo ea Hae ea ho busa. Kahoo, tseko e khōlō ea bobusi ba Jehova mona lefatšeng e ile ea hlahisoa qalong ea histori ea batho.

 5. Ke tseko efe ea bobeli e ileng ea hlahisoa, hona e ne e ama le bo-mang?

⁵ Tseko ena e khōlō ea bobusi ba bokahohleng e amana haufi-ufi le tseko ea bobeli eo Satane a ileng a e hlahisa mehleng ea Jobo. Satane o ile a belaella sepheo sa libōpuoa tsa Jehova sa ho ikokobelletsa Eena le ho Mo sebeletsa. Satane o ile a fana ka maikutlo a hore li ne li ikokobelletsa Molimo ka mabaka a boithati le hore, haeba li ne li ka lekoa, li ne li tla mo fetohela. (Jobo 1:7-11; 2:4, 5) Le hoja phephetso ena e ne e ama mohlanka oa Jehova ea lefatšeng, e ne e ama le bara ba Molimo ba moea, esita le Mora oa Jehova ea tsoetsoeng a ’notši.

 6. Jehova o ile a tšepahalla morero oa hae le lebitso la hae joang?

⁶ Ka lebaka la ho tšepahalla morero oa hae le se boleloang ke lebitso la hae, Jehova e ile ea e-ba Moprofeta le Mopholosi.a O ile a re ho Satane: “Ke tla beha bora pakeng tsa hao le mosali le pakeng tsa peō ea hao le peō ea hae. E tla u khoba hlooho ’me uena u tla e loma serethe.” (Genese 3:15) Ka Peō ea “mosali” oa hae, kapa karolo ea leholimo ea mokhatlo oa hae o hlophisitsoeng, Jehova o ne a tla arabela phephetso ea Satane ’me a fe litloholo tsa Adama tšepo ea topollo le bophelo.—Baroma 5:21; Bagalata 4:26, 31.

“Sephiri se Halalelang sa Thato ea Hae”

 7. Jehova o ile a senola morero ofe ka moapostola Pauluse?

⁷ Ha moapostola Pauluse a ne a ngolla Bakreste ba Efese, o ile a hlalosa ka bokhabane kamoo Jehova a tsamaisang lintho kateng e le hore a phethahatse morero oa hae. Pauluse o ile a ngola: “O ile a re tsebisa sephiri se halalelang sa thato ea hae. Ke ho ea ka ho khahloa ha hae hoo a ileng a ho rera ka ho eena bakeng sa tsamaiso tekanyong e feletseng ea linako tse behiloeng, e leng, ho bokella lintho tsohle hape ho Kreste, lintho tse maholimong le lintho tse lefatšeng.” (Baefese 1:9, 10) Morero oa Jehova o hlollang ke hore bokahohleng ho be le libōpuoa tse momahaneng tse ikokobeletsang bobusi ba hae ka ho rata. (Tšenolo 4:11) Kahoo lebitso la hae le tla halaletsoa, Satane a pakoe a le leshano ’me thato ea Molimo “e etsahale lefatšeng, joalokaha e etsahala leholimong.”—Matheu 6:10.

 8. Lentsoe le fetoletsoeng e le “tsamaiso” le bolela’ng?

⁸ “Ho khahloa” ha Jehova, kapa morero oa hae, ho ne ho tla phethahatsoa ka “tsamaiso.” Pauluse o ile a sebelisa lentsoe leo ka ho toba le bolelang “tsamaiso ea lelapa.” Le bolela tsela ea ho tsamaisa lintho, eseng puso, e kang ’Muso oa Bomesia.b Tsela e babatsehang eo Jehova a neng a tla tsamaisa lintho ka eona bakeng sa ho phethahatsa morero oa hae e ne e akarelletsa “sephiri se halalelang” se neng se tla senoloa butle-butle ha nako e ntse e feta.—Baefese 1:10; 3:9, mongolo o botlaaseng ba leqephe ho NW.

 9. Jehova o ile a senola sephiri se halalelang sa thato ea hae mohato ka mohato joang?

⁹ A sebelisa letoto la lilekane, Jehova o ile a senola mohato ka mohato kamoo morero oa hae mabapi le Peō e tšepisitsoeng Edene o neng o tla phethahatsoa kateng. Selekane seo Jehova a neng a se entse le Abrahama se ile sa senola hore Peō e tšepisitsoeng e ne e tla tla lefatšeng ka lesika la Abrahama le hore “lichaba tsohle tsa lefatše” li ne li tla itlhohonolofatsa ka eona. Selekane seo se ile sa bontša hape hore ho na le ba bang ba neng ba tla amahanngoa le karolo e ka sehloohong ea peō ena. (Genese 22:17, 18) Selekane sa Molao seo Jehova a neng a se entse le Iseraele ea nama se ile sa senola morero oa hae oa hore a be le “’muso oa baprista.” (Exoda 19:5, 6) Selekane seo a neng a se entse le Davida se ile sa bontša hore Peō eo e ne e tla ba Hlooho ea ’Muso ho isa nakong e sa lekanyetsoang. (2 Samuele 7:12, 13; Pesaleme ea 89:3, 4) Ha selekane sa Molao se se se lebisitse Bajuda ho Mesia, Jehova o ile a senola likarolo tse eketsehileng tsa ho phethahala ha morero oa hae. (Bagalata 3:19, 24) Batho ba neng ba tla amahanngoa le karolo e ka sehloohong ea peō ena e ne e tla ba “’muso oa baprista” o boletsoeng esale pele ’me ba ne ba tla kenngoa ‘selekaneng se secha’ e le “Iseraele” e ncha, ea moea.—Jeremia 31:31-34; Baheberu 8:7-9.c

10, 11. (a) Jehova o ile a senola Peō e boletsoeng esale pele joang? (b) Ke hobane’ng ha Mora ea tsoetsoeng a ’notši oa Molimo a ile a tla lefatšeng?

¹⁰ E le hore ho phethahatsoe tsamaiso ea morero oa Molimo, ho ile ha fihla nako ea hore Peō e boletsoeng esale pele e hlahe lefatšeng. Jehova o ile a romela lengeloi Gabriele hore le bolelle Maria hore o tla beleha mora ea neng a tla bitsoa Jesu. Lengeloi le ile la re ho eena: “O tla ba moholo ’me o tla bitsoa Mora oa Ea Phahameng ka ho Fetisisa; Jehova Molimo o tla mo fa terone ea ntat’ae Davida, ’me o tla busa e le morena oa ntlo ea Jakobo ka ho sa feleng, ’me ’muso oa hae o ke ke oa e-ba le bofelo.” (Luka 1:32, 33) Kahoo ho ile ha hlaka hore na Peō eo e tšepisitsoeng ke mang.—Bagalata 3:16; 4:4.

¹¹ Mora ea tsoetsoeng a ’notši oa Jehova o ile a tla lefatšeng e le hore a lekoe ka ho feletseng. Ke Jesu ea neng a ka arabela hantle phephetso ea Satane. Na o ne a tla lula a tšepahetse ho Ntat’ae? Sena se ile sa ama sephiri se halalelang. Hamorao moapostola Pauluse o ile a hlalosa karolo ea Jesu tjena: “Sephiri se halalelang sa boinehelo bona ba bomolimo hoa lumeloa hore se seholo: ‘O ile a bonahatsoa nameng, ha boleloa hore o lokile moeeng, a bonahala ho mangeloi, a boleloa har’a lichaba, a lumeloa lefatšeng, a amoheloa holimo khanyeng.’” (1 Timothea 3:16) Ha ho pelaelo hore Jesu, ka ho tšepahala ha hae a sa thekesele ho isa lefung, o ile a arabela phephetso ea Satane ka mokhoa o khotsofatsang. Empa makolopetso a mang a sephiri se halalelang e ne e le hona a tla senoloa.

“Sephiri se Halalelang sa ’Muso oa Molimo”

12, 13. (a) Karolo e ’ngoe ea “sephiri se halalelang sa ’muso oa Molimo” ke efe? (b) Ho khetha ha Jehova palo e lekanyelitsoeng ea batho ba tla ea leholimong ho ne ho akarelletsa eng?

¹² Leetong le leng la hae la boboleli Galilea, Jesu o ile a bontša hore sephiri seo se halalelang se ne se amana haufi le puso ea ’Muso oa hae oa Bomesia. O ile a re ho barutuoa ba hae: “Le nehiloe ho utloisisa liphiri tse halalelang tsa ’muso oa maholimo [“’muso oa Molimo,” Mareka 4:11].” (Matheu 13:11) Karolo e ’ngoe ea sephiri sena e ne e akarelletsa hore Jehova a khethe “mohlatsoana” oa batho ba 144 000 ba neng ba tla ba le Mora oa hae e le karolo ea peō, ’me ba buse le eena leholimong.—Luka 12:32; Tšenolo 14:1, 4.

¹³ Kaha batho ba ne ba bōpetsoe ho phela lefatšeng, Jehova o ne a lokela ho etsa “pōpo e ncha” e le hore batho ba bang ba ee leholimong. (2 Bakorinthe 5:17) Petrose, e leng e mong oa ba neng ba khethetsoe ho ba le tšepo ena e ikhethang ea ho ea phela leholimong, o ile a ngola a re: “Ho bokoe Molimo le Ntate oa Morena oa rōna Jesu Kreste, kaha ho ea ka mohau oa hae o moholo o ile a re fa tsoalo e ncha ho tla tšepong e phelang ka tsoho ea Jesu Kreste bafung, ho tla lefeng le ke keng la bola le le sa silafalang le le sa senyeheng. Le bolokiloe maholimong bakeng sa lōna.”—1 Petrose 1:3, 4.

14. (a) Ho tlile joang hore batho bao e seng Bajuda ba akarelletsoe ‘sephiring se halalelang sa ’muso oa Molimo’? (b) Ke hobane’ng ha re khona ho utloisisa ‘lintho tsena tse tebileng tsa Molimo’?

¹⁴ Karolo e ’ngoe ea sephiri se halalelang se mabapi le puso ea ’Muso ea nakong e tlang ke hore Molimo o ratile hore ho akarelletsoe batho bao e seng Bajuda palong e nyenyane ea batho ba neng ba tla bitsetsoa ho ea busa le Kreste leholimong. Pauluse o ile a hlalosa tšobotsi ena ea “tsamaiso” ea Jehova, kapa tsela eo a laolang ho phethahala ha morero oa hae ka eona, a re: “Melokong e meng sephiri sena ha sea ka sa tsebahatsoa ho bara ba batho joalokaha hona joale se senotsoe ho baapostola ba hae ba halalelang le baprofeta ka moea, e leng, hore batho ba lichaba e ne e tla ba majalefa hammoho ’me e be litho hammoho tsa ’mele le ba nang le kabelo le rōna tšepisong bonngoeng le Kreste Jesu ka litaba tse molemo.” (Baefese 3:5, 6) ‘Baapostola ba halalelang’ ke bona ba ileng ba senoleloa kutloisiso ea karolo ena ea sephiri se halalelang. Ho joalo le kajeno, ha e ne e se ka thuso ea moea o halalelang, re ne re ke ke ra utloisisa ‘lintho tsena tse tebileng tsa Molimo.’—1 Bakorinthe 2:10; 4:1; Bakolose 1:26, 27.

15, 16. Ke hobane’ng ha Jehova a khethile ba tla busa le Kreste har’a moloko oa batho?

¹⁵ Batho “ba likete tse lekholo le mashome a mane a metso e mene” ba bonoeng ba eme le “Konyana” Thabeng ea Sione ea leholimo ho thoe ‘ba rekiloe lefatšeng,’ “ba rekiloe har’a moloko oa batho joaloka litholoana tsa pele ho Molimo le ho Konyana,” e leng Kreste Jesu. (Tšenolo 14:1-4) Jehova o ile a khetha letsibolo har’a bara ba hae ba leholimo hore e be karolo e ka sehloohong ea peō e ileng ea tšepisoa Edene, empa ke hobane’ng ha a ile a khetha ba tla sebetsa le Kreste har’a moloko oa batho? Moapostola Pauluse o hlalosa hore palo ena e lekanyelitsoeng e ile ea ‘bitsoa ho ea ka morero oa [Jehova],’ “ho ea ka ho khahloa ha thato ea hae.”—Baroma 8:17, 28-30; Baefese 1:5, 11; 2 Timothea 1:9.

¹⁶ Morero oa Jehova ke ho hloekisa lebitso la hae le phahameng le le halalelang le ho tlosa qoso bobusing ba hae ba bokahohleng. Ka “tsamaiso” ea hae e bohlale ka ho fetisisa, kapa tsela eo a laolang lintho ka eona, Jehova o ile a romela Mora oa hae ea tsoetsoeng a ’notši lefatšeng, moo a ileng a lekoa ka ho feletseng. Ho phaella moo, Jehova o ile a rera hore puso ea ’Muso oa Bomesia ea Mora oa hae e tla akarelletsa batho bao le bona ba ileng ba tšehetsa bobusi ba Hae ho isa lefung.—Baefese 1:8-12; Tšenolo 2:10, 11.

17. Ke hobane’ng ha re lokela ho thaba hore ebe Kreste le babusi-’moho le eena ba kile ba phela lefatšeng?

¹⁷ Jehova o ile a bontša lerato la hae le leholo bakeng sa litloholo tsa Adama ka ho etsa hore Mora oa hae a tle lefatšeng le ka ho khetha har’a moloko oa batho bao e neng e tla ba majalefa-’moho le Mora oa hae pusong ea ’Muso. Batho ba ileng ba tšepahala ho Jehova ho qala ka Abele, ba ne ba ka rua molemo joang ho see? Kaha ba tsoetsoe e le makhoba a sebe le lefu, batho ba sa phethahalang ba ne ba lokela ho phekoloa moeeng le ’meleng ’me ba etsoe ba phethahetseng, tumellanong le morero oa Jehova oa tšimolohong ka moloko oa batho. (Baroma 5:12) Ba nang le tšepo ea ho phela ka ho sa feleng lefatšeng ba khothala hakaakang ha ba hlokomela hore Morena oa bona o tla ba bontša lerato le kutloisiso e mosa joalokaha a ile a li bontša barutuoa ba hae nakong ea tšebeletso ea hae lefatšeng! (Matheu 11:28, 29; Baheberu 2:17, 18; 4:15; 7:25, 26) ’Me ba khothala hakaakang ha ba hlokomela hore marena a baprista a tlang ho sebetsa le Kreste leholimong e ne e le banna le basali ba tumelo bao joaloka rōna, ba kileng ba loantša mefokolo ea botho ba ba ba hlaheloa ke mathata bophelong!—Baroma 7:21-25.

Morero oa Jehova o ke Keng oa Hlōleha

18, 19. Ke hobane’ng ha re utloisisa hamolemo mantsoe a Pauluse a fumanoang ho Baefese 1:8-11, hona re tla tšohla eng sehloohong se latelang?

¹⁸ Joale re utloisisa hamolemo moelelo oa mantsoe a fumanoang ho Baefese 1:8-11, ao Pauluse a ileng a a ngolla Bakreste ba tlotsitsoeng. O boletse hore Jehova o ile a ba tsebisa “sephiri se halalelang sa thato ea hae,” le hore ba ne ba ‘abetsoe ho ba majalefa’ le Kreste, ebile ba ‘khethiloe esale pele ho ea ka morero oa ea sebetsang lintho tsohle ho ea ka tsela eo thato ea hae e rerang ka eona.’ Rea utloisisa hore sena se lumellana hantle le “tsamaiso” e babatsehang eo Jehova a etsang lintho ka eona e le hore a phethahatse morero oa hae. Sena se boetse se re thusa ho utloisisa hore na ke hobane’ng ha e le Bakreste ba ’maloa feela ba jang litšoantšetso har’a ba bang teng Lijong Tsa Shoalane Tsa Morena.

¹⁹ Sehloohong se latelang, re tla bona hore na Sehopotso sa lefu la Kreste se bolela eng ho Bakreste ba nang le tšepo ea ho ea phela leholimong. Hape re tla ithuta le hore na ke hobane’ng ha batho ba limilione ba nang le tšepo ea ho phela ka ho sa feleng lefatšeng ba lokela ho thahasella ka matla ho tseba hore na Sehopotso se tšoantšetsa eng.

[Mongolo o botlaaseng ba leqephe]

Tlhahlobo

• Ke hobane’ng ha Jehova a ile a bōpa lefatše le ho beha motho ho lona?

• Ke hobane’ng ha ho ne ho hlokahala hore Mora oa Jehova ea tsoetsoeng a ’notši a lekoe lefatšeng?

• Ke hobane’ng ha Jehova a ile a khetha babusi-’moho le Kreste har’a moloko oa batho?