Lipotso Tse Tsoang ho Babali
Na ho ne ho sa fosahala hore Jakobo a iketse eka ke Esau, joalokaha ho tlalehiloe ho Genese 27:18, 19?
E ka ’na eaba u tseba tlaleho ena. Botsofaling ba hae, Isaka o ile a bolella Esau hore a e’o tsoma phoofolo, a re: “Ke je, e le hore moea oa ka o ka u hlohonolofatsa pele ke shoa.” Ka mor’a ho utloa seo monna oa hae a neng a se buile, Rebeka o ile a pheha lijo tse hlabosang eaba o re ho Jakobo: ‘U ise lijo ho ntat’ao ’me o tla li ja, e le hore a ka u hlohonolofatsa pele ho lefu la hae.’ Joale Jakobo o ile a ea ho ntat’ae a nkile lijo tse hlabosang, a apere liaparo tsa Esau ’me molaleng oa hae le matsohong ho ne ho behiloe letlalo la pōli. Ha Isaka a mo botsa a re, “U mang, mora oa ka?” Jakobo o ile a araba a re: “Ke ’na Esau letsibolo la hao.” Isaka o ile a mo kholoa eaba oa mo hlohonolofatsa.—Genese 27:1-29.
Bibele ha e re bolelle ka botlalo hore na ke hobane’ng ha Rebeka le Jakobo ba ile ba etsa sena, leha ho le joalo, ea re bolella hore taba ena e etsahetse ka tšohanyetso. Re lokela ho hlokomela hore Lentsoe la Molimo ha le re seo Rebeka le Jakobo ba se entseng se nepahetse le teng ha le re se fosahetse, kahoo ketsahalo ena ha e behe mohlala oa ho bua leshano kapa oa ho qhekella. Leha ho le joalo, Bibele e re beha leseling ka taba ena.
Taba ea pele, tlaleho eo ea hlakisa hore Jakobo o ne a e-na le tokelo ea ho hlohonolofatsoa ke ntate oa hae, Esau eena o ne a se na eona. Pejana, Jakobo o ne a ile a reka ka molao tokelo ea tsoalo ho lefahla labo le se nang kananelo, le ileng la mo rekisetsa eona ka lijo hore le loantše lephako. Esau o ile “a nyelisa tokelo ea tsoalo.” (Genese 25:29-34) Ka lebaka leo, ha a ne a e-ea ho ntate oa hae, Jakobo o ne a batla tlhohonolofatso eo e neng e le ea hae ka molao.
Taba ea bobeli, ha Isaka a hlokomela hore o hlohonolofalitse Jakobo, ha aa ka a batla ho fetola seo a neng a se entse. Mohlomong o ile a hopola seo Jehova a neng a se boleletse Rebeka pele mafahla a hlaha ha a ne a re: “E moholo o tla sebeletsa e monyenyane.” (Genese 25:23) Hlokomela hape hore ha Jakobo a ne a le lekhatheng la ho ea Harane, Isaka o ile a boela a eketsa tlhohonolofatso eo a neng a mo file eona pejana.—Genese 28:1-4.
Taba ea ho qetela, re lokela ho hopola hore Jehova o ne a hlokomela a bile a thahasella se neng se etsahala. Tlhohonolofatso eo Isaka a ileng a fana ka eona e ne e tsamaisana le tšepiso eo Molimo a neng a e etselitse Abrahama. (Genese 12:2, 3) Haeba Molimo a ne a sa batle ha Jakobo a hlohonolofatsoa, a ka be a ile a kenella ka tsela e itseng. Ho e-na le hoo, Jehova o ile a tiisa taba ena ho Jakobo, a re: “Malapa ’ohle a lefatše a tla itlhohonolofatsa ka . . . peō ea hao.”—Genese 28:10-15.