U ka Ntlafatsa ho Hopola ha Hao

JEHOVA MOLIMO o bōpile boko ba motho bo e-na le matla a hlollang a ho hopola. O entse hore e be mohloli o ka rafshoang empa o sa felloe ke lintho tsa bohlokoa tse kentsoeng ho oona. Tsela eo boko bo entsoeng ka eona e lumellana le morero oa Molimo oa hore batho ba lokela ho phela ka ho sa feleng.—Pes. 139:14; Joh. 17:3.

Empa u ka ’na ua nahana hore boholo ba seo u se kenyang ka kelellong ea hao boa lahleha. Bo bonahala bo le sieo ha u bo batla. U ka etsa’ng hore u ntlafatse ho hopola ha hao?

E-ba le Thahasello

Thahasello ke ntho ea bohlokoa bakeng sa ho ntlafatsa ho hopola. Haeba re itloaetsa ho ba seli, re thahasella batho le ho thahasella ho tseba se etsahalang haufi le rōna, likelello tsa rōna li tla susumetseha. Ho tla ba bonolo hore re be le thahasello e tšoanang ha re bala kapa re utloa ntho e ’ngoe eo e leng ea bohlokoa bo tšoarellang.

Ho tloaelehile hore motho a be le bothata ba ho hopola mabitso a batho. Leha ho le joalo, joaloka Bakreste, rea tseba hore batho ke ba bohlokoa—Bakreste-’moho, bao re ba pakelang le ba bang bao re sebelisanang le bona ha re ntse re hlokomela lintho tsa bohlokoa bophelong. Ke eng se ka re thusang ho hopola mabitso ao re hlileng re lokelang ho a hopola? Moapostola Pauluse o ile a bolela mabitso a batho ba 26 ba phutheho eo a neng a e ngoletse. Se bontšang hore o ne a ba thahasella ke hore o ne a sa tsebe mabitso a bona feela empa o ile a bolela lintho tse itseng tse tobileng ka ba bangata ba bona. (Bar. 16:3-16) Balebeli ba bang ba tsamaeang ba Lipaki tsa Jehova ba kajeno ba etsa hantle haholo tabeng ea ho hopola mabitso, le hoja ba etela liphutheho tse sa tšoaneng beke le beke. Ba thusoa ke eng? Ba itloaetsa ho sebelisa lebitso la motho ka makhetlo a ’maloa ha ba qala ho buisana le eena. Ba etsa boiteko ba ho amahanya lebitso la motho eo le sefahleho sa hae. Ho feta moo, ba qeta nako le batho ba sa tšoaneng tšebeletsong ea tšimo le ha ba le lijong hammoho. Ha u kopana le motho ea itseng, na u tla hopola lebitso la hae? Qala ka ho ba le lebaka le utloahalang la ho hopola lebitso leo; ebe u leka tse ling tsa litlhahiso tse boletsoeng ka holimo.

Ho hopola seo u se balang le hona ke habohlokoa. Ke eng se ka u thusang ho ntlafatsa ntlheng ee? Thahasello le kutloisiso lia ameha. U lokela ho thahasella haholo seo u se balang hore u lebise tlhokomelo eohle ea hao ho sona. U ke ke ua khona ho boloka boitsebiso haeba kelello ea hao e lelera ha u ntse u leka ho bala. Kutloisiso ea ntlafala ha u amahanya boitsebiso le lintho tseo u li tloaetseng kapa u bo amahanya le seo u seng u se tseba. Ipotse: ‘Nka sebelisa boitsebiso boo joang hona neng bophelong ba ka? Nka bo sebelisa joang ho thusa motho e mong?’ Kutloisiso e boetse ea ntlafala ha u bala lipolelo ho e-na le ho bala lentsoe ka leng. U tla utloisisa mehopolo kapele le ho khetholla lintlha tsa sehlooho, ’me ho tla ba bonolo ho li hopola.

Iphe Nako ea ho Pheta Lintlha

Litsebi tsa thuto li hatisa molemo oa ho pheta lintlha. Phuputsong e ’ngoe, moprofesa oa univesithi o ile a bontša hore ho sebelisa motsotso o le mong bakeng sa ho pheta lintlha kapele ho tla eketsa habeli tekanyo ea boitsebiso bo ka hopoloang. Kahoo hang ha u qeta ho bala ntho e itseng—kapa karolo e khōlō ea eona—pheta lintlha tsa sehlooho e le hore li tsebe ho lula ka kelellong ea hao. Nahana ka hore na u ne u ka hlalosa joang ka mantsoe a hao lintlha leha e le life tse ncha tseo u ithutileng tsona. Ka ho ikhopotsa seo u se balileng hang ha u qeta ho bala ntlha e itseng, u tla hopola ntlha eo ka nako e telele.

Joale matsatsing a seng makae a latelang, batla menyetla ea ho pheta seo u se balileng ka ho phetela motho e mong boitsebiso boo. U ka bo phetela setho sa lelapa, e mong ka phuthehong, mosebetsi-’moho, eo u kenang sekolo le eena, moahelani kapa motho eo u kopanang le eena tšebeletsong ea tšimo. Leka hore u se ke ua pheta lintlha tsa sehlooho feela empa hape u phete le mabaka a Mangolo a tsamaisanang le tsona. Ho etsa joalo ho tla u ruisa molemo; ho u thuse ho tsitsisa lintho tsa bohlokoa mohopolong oa hao; ’me ho tla ruisa le ba bang molemo.

Thuisa ka Lintho Tsa Bohlokoa

Ho phaella tabeng ea ho pheta seo u se balileng le ho se bolella ba bang, u tla hlokomela hore ho thuisa ka lintho tsa bohlokoa tseo u ithutileng tsona ho molemo. Bangoli ba Bibele Asafe le Davida ba ile ba etsa joalo. Asafe o ile a re: “Ke tla hopola liketso tsa Jah; etsoe ke tla hopola ketso ea hao e hlollang ea khale. Ka sebele ke tla thuisa ka mosebetsi oohle oa hao, ke tla nahanisisa ka mesebetsi ea hao.” (Pes. 77:11, 12) Ka ho tšoanang Davida o ile a ngola: “Ke thuisa ka uena nakong ea litebelo tsa bosiu,” ’me “ke hopotse matsatsi a khale; ke thuisitse ka mosebetsi oohle oa hao.” (Pes. 63:6; 143:5) Na ke sona seo u se etsang?

Ho tsepamisa mohopolo ka botebo joalo ha u thuisa ka mesebetsi ea Jehova, litšoaneleho tsa hae le ka lipontšo tsa thato ea hae ha ho u thuse feela ho hopola lintlha. Ho itloaetsa ho nahana joalo ho tla u thusa ho tebisa lintho tseo ehlileng e leng tsa bohlokoa haholo ka pelong ea hao. Ho tla fetola seo u leng sona ka hare. Mehopolo e tla sala ho uena e tla ba mehopolo ea hao e tebileng.—Pes. 119:16.

Karolo ea Moea oa Molimo

Ha re batla ho hopola linnete mabapi le mesebetsi ea Jehova le lintho tse boletsoeng ke Jesu Kreste, ha rea siuoa feela. Bosiung ba pele ho lefu la hae, Jesu o ile a re ho balateli ba hae: “Ha ke ntse ke lutse le lōna ke le boleletse lintho tsena. Empa mothusi, moea o halalelang, oo Ntate a tla o romela ka lebitso la ka, o tla le ruta lintho tsohle ’me a le hopotse lintho tsohle tseo ke le boleletseng tsona.” (Joh. 14:25, 26) Matheu le Johanne ba ne ba le teng moo. Na moea o halalelang o ile oa fetoha mothusi ea joalo ho bona? E, ka sebele! Hoo e ka ba bang lilemo tse robeli hamorao, Matheu o ile a qeta ho ngola tlaleho ea pele e qaqileng ea bophelo ba Kreste, e akarelletsang mehopolo ea bohlokoahali e kang Thuto ea Thabeng le pontšo e qaqileng ea boteng ba Kreste le ea bofelo ba tsamaiso ea lintho. Lilemo tse 65 ka mor’a lefu la Jesu, moapostola Johanne o ile a ngola Kosepele ea hae, e akarelletsang makolopetso a seo Jesu a se boletseng bosiung ba ho qetela boo baapostola ba bo qetileng le Morena pele a nehelana ka bophelo ba hae. Ha ho pelaelo hore Matheu le Johanne ba ne ba hopola hantle lintho tseo Jesu a li boletseng le tseo a li entseng ha ba ntse ba e-na le eena, empa moea o halalelang o ile oa phetha karolo ea bohlokoa ho tiisa hore ha ba lebale boitsebiso ba bohlokoa boo Jehova a neng a batla hore bo be teng ka Lentsoeng la hae le ngotsoeng.

Na moea o halalelang o thusa bahlanka ba Molimo kajeno? Ka sebele ho joalo! Ho hlakile hore moea o halalelang ha o kenye lintho tseo ho seng mohla re kileng ra ithuta tsona ka likelellong tsa rōna, empa ka sebele o re thusa ho hopola lintho tsa bohlokoa tseo re ithutileng tsona nakong e fetileng. (Luka 11:13; 1 Joh. 5:14) Joale, haeba ho hlokahala, matla a rōna a kelello aa tsosolosoa hore ‘re hopole lipolelo tse ileng tsa buuoa pele ke baprofeta ba halalelang le taelo ea Morena le Mopholosi.’—2 Pet. 3:1, 2.

‘Le se ke la Lebala’

Ka makhetlo Jehova o ile a lemosa Baiseraele a re: ‘Le se ke la lebala.’ Hase hore o ne a lebeletse hore ba hopole ntho e ’ngoe le e ’ngoe ka ho phethahetseng. Empa ba ne ba sa lokela ho tšoareha haholo mesebetsing ea bona hoo ba neng ba ka lebala mesebetsi ea Jehova. Ba ne ba lokela ho lula ba ntse ba hopola hantle nako ea ha Jehova a ba lopolla ha lengeloi la hae le ne le bolaea matsibolo ’ohle a Egepeta le ha Jehova a ne a bula Leoatle le Lefubelu le ha a le koala, a etsa hore Faro le lebotho la hae ba khangoe ke metsi. Baiseraele ba ne ba lokela ho hopola hore Molimo o ba file Molao Thabeng ea Sinai le hore o ile a ba tataisa lefeelleng le ho ba kenya Naheng e Tšepisitsoeng. Ba ne ba sa lokela ho lebala ka kutloisiso ea hore mehopolo ea bona ea lintho tsena e ne e lokela ho tsoela pele e e-ba le phello e matla bophelong ba bona ba letsatsi le letsatsi.—Deut. 4:9, 10; 8:10-18; Ex. 12:24-27; Pes. 136:15.

Le rōna re lokela ho hlokomela hore re se ke ra lebala. Ha re ntse re thulana le likhatello tsa bophelo, re lokela ho hopola Jehova, re hopole hore na ke Molimo oa mofuta ofe hammoho le lerato leo a le bontšitseng ka ho nehelana ka mpho ea Mora oa hae, ea faneng ka thekollo bakeng sa libe tsa rōna e le hore re ka ba le bophelo bo phethahetseng ka ho sa feleng. (Pes. 103:2, 8; 106:7, 13; Joh. 3:16; Bar. 6:23) Ho bala Bibele kamehla le ho kopanela ka mafolofolo libokeng tsa phutheho le tšebeletsong ea tšimo ho tla etsa hore linnete tsena tsa bohlokoa li lule li ntse li phela ka ho rōna.

Ha u talimane le liqeto tse khōlō kapa tse nyenyane, u hopole linnete tseo tsa bohlokoa ’me u li lumelle hore li susumetse monahano oa hao. U se ke ua lebala. Itšetlehe ka Jehova bakeng sa tataiso. Ho e-na le ho talima litaba ka leihlo la nama kapa ho tšepa tšusumetso ea pelo e sa phethahalang, ipotse, ‘Ke keletso kapa molao-motheo ofe o tsoang Lentsoeng la Molimo o lokelang ho susumetsa qeto ea ka?’ (Liprov. 3:5-7; 28:26) U ke ke ua hopola lintho tseo u sa kang ua li bala kapa ua li utloa. Empa ha u ntse u hōla tsebong le leratong la Jehova, pokello ea tsebo eo moea oa Molimo o ka u thusang ho e hopola e tla eketseha ’me lerato la hao le ntseng le hōla bakeng sa Jehova le tla u susumelletsa ho nka khato tumellanong le eona.

[Lebokose le leqepheng la 17]

KAMOO U KA NTLAFATSANG KATENG TABENG EA HO HOPOLA SEO U SE BALANG

• Ha u qeta ho bala karolo e itseng ea taba e ngotsoeng, ipotse, ‘Ntlha e ka sehloohong ea seo ke qetang ho se bala ke efe?’ Haeba u sa khone ho hopola ntlha e ka sehloohong, joale e shebe hape boitsebisong boo u be u e fumane

• Ha u qeta ho bala khaolo kaofela kapa sehlooho, itlhahlobe hape. Ngola lintlha tsohle tse ka sehloohong. Haeba u sa li hopole kapele, li shebe hape ’me u phete seo u se balileng