Kamehla Jehova o Etsa se Nepahetseng

“Jehova o lokile litseleng tsohle tsa hae.”—PESALEME EA 145:17.

 1. U ikutloa joang ha motho e mong a fihlela qeto e fosahetseng ka uena, hona re ka ithuta thuto efe phihlelong e joalo?

NA HO na le motho ea kileng a fihlela qeto e fosahetseng ka uena, mohlomong a belaella seo u se etsang kapa sepheo sa hao, empa a sa tsebe lintlha tsohle tse amehang? Haeba ho joalo, mohlomong u ile ua utloa bohloko—’me hoo hoa utloahala. Re ka ithuta thuto ea bohlokoa tabeng ena: Ho bohlale ho qoba ho potlakela ho etsa liqeto ha re sa tsebe lintlha ka botlalo.

 2, 3. Ba bang ba ikutloa joang ka litlaleho tsa Bibele tse se nang lintlha tse lekaneng ho araba potso e ’ngoe le e ’ngoe, empa Bibele e re bolella’ng ka Jehova?

² Re lokela ho hopola thuto ena ha re etsa liqeto ka Jehova Molimo. Hobane’ng? Hobane ho na le litlaleho tse itseng tsa Bibele tseo ka lekhetlo la pele li ka bonahalang eka lia ferekanya. Litlaleho tsena—tseo mohlomong li buang ka liketso tsa barapeli ba bang ba Molimo kapa ka likahlolo tsa Molimo tsa nakong e fetileng—e ka ’na eaba ha li na lintlha tse lekaneng hore li arabe lipotso tsohle tsa rōna. Ka bomalimabe, ba bang ba nyatsa-nyatsa litlaleho tse joalo, esita le ho belaella hore na Molimo o lokile le hore na ha a leeme. Leha ho le joalo, Bibele e re bolella hore “Jehova o lokile litseleng tsohle tsa hae.” (Pesaleme ea 145:17) Lentsoe la hae le boetse le re tiisetsa hore “ha a sebetse bokhopo.” (Jobo 34:12; Pesaleme ea 37:28) Joale, ak’u inahanele feela hore na e tlameha ebe o ikutloa joang ha ba bang ba fihlela liqeto tse fosahetseng ka eena!

³ A re hlahlobeng mabaka a mahlano ao ka ’ona re lokelang ho amohela likahlolo tsa Jehova. Joale, re ntse re hopotse mabaka ao, re tla hlahloba litlaleho tse peli tsa Bibele tseo ba bang ba ka ’nang ba thatafalloa ho li utloisisa.

Ke Hobane’ng ha re Lokela ho Amohela Likahlolo Tsa Jehova?

 4. Ke hobane’ng ha re lokela ho ikokobetsa ha re hlahloba liketso tsa Molimo? Etsa mohlala.

⁴ Lebaka la pele ke hore kaha Jehova o tseba lintlha tsohle tse amehang ’me rōna ha re li tsebe, re lokela ho ikokobetsa ha re hlahloba liketso tsa Molimo. Ho etsa mohlala: Ha re re moahloli ea tummeng hantle ka ho ahlola ntle ho leeme o lihile kahlolo ka lekhotleng. U ne u tla nahana joang ka motho e mong ea sa tsebeng lintlha tsohle tse amehang kapa ea sa utloisiseng melao e amehang hantle, empa a nyatsa-nyatsa qeto ea moahloli eo? E ne e tla be e le booatla hore motho a nyatsa-nyatse taba eo a sa e tsebeng ka botlalo. (Liproverbia 18:13) E ne e tla be e le booatla bo boholo le ho feta hakaakang hore batho feela tjee ba nyatsa-nyatse “Moahloli oa lefatše lohle”!—Genese 18:25.

 5. Ke’ng eo re sa lokelang ho e lebala ha re bala litlaleho tsa Bibele tse buang ka ha Molimo a ahlola batho ba itseng?

⁵ Lebaka la bobeli la hore re amohele likahlolo tsa Molimo ke hore ho fapana le batho, Molimo a ka lemoha se ka pelong. (1 Samuele 16:7) Lentsoe la hae le re: “’Na, Jehova, ke hlahloba pelo, ke phenya liphio, esita le ho fa e mong le e mong ho ea ka litsela tsa hae, ho ea ka litholoana tsa mesebetsi ea hae.” (Jeremia 17:10) Kahoo, ha re bala litlaleho tsa Bibele tse buang ka ha Molimo a ahlola batho ba itseng, a re se keng ra lebala hore mahlo a hae a bonang tsohle a ile a elelloa le menahano, sepheo le merero e patehileng e sa tlalehoang ka Lentsoeng la hae.—1 Likronike 28:9.

 6, 7. (a) Jehova o bontšitse joang hore o tšoarella melaong ea hae ea ho hloka leeme le ho loka esita le haeba seo se mo bakela tahlehelo e khōlō? (b) Re lokela ho hopola eng ha re bala taba e itseng ka Bibeleng e etsang hore re ipotse hore na Molimo o entse lintho ka tsela e hlokang leeme le e nepahetseng?

⁶ Hlokomela lebaka la boraro la hore re amohele likahlolo tsa Jehova: O tšoarella melaong ea hae e lokileng esita le haeba seo se mo bakela tahlehelo e khōlō. Nahana ka mohlala ona. Ka ho fana ka Mora oa hae e le thekollo hore a lopolle batho ba mamelang sebeng le lefung, Jehova o ile a phethahatsa melao ea hae e hlokang leeme le e lokileng. (Baroma 5:18, 19) Leha ho le joalo, e tlameha ebe Jehova o ile a utloa bohloko bo boholo ka ho fetisisa ha a bona Mor’a hae ea ratoang a hlokofatsoa ebile a shoela thupeng ea tlhokofatso. See se re bolella eng ka Molimo? Ha e bua ka “thekollo e lefiloeng ke Kreste Jesu,” Bibele e re: “Hona e ne e le hore a bonahatse ho loka ha [Molimo].” (Baroma 3:24-26) Ka phetolelo e ’ngoe, Baroma 3:25 e baleha tjena: “Sena se ne se bontša hore kamehla Molimo o etsa se nepahetseng le se hlokang leeme.” (New Century Version) Ruri tekanyo eo ka eona Jehova a neng a ikemiselitse ho lokisetsa thekollo e bontša hore o talima se “nepahetseng le se hlokang leeme” e le sa bohlokoa ka ho fetisisa.

⁷ Kahoo, haeba re bala taba e itseng ka Bibeleng e etsang hore ba bang ba ipotse hore na Molimo o entse lintho ka tsela e hlokang leeme kapa e nepahetseng, re lokela ho hopola sena: Kahobane o tšepahalla melao ea hae ea ho loka le ho hloka toka, Jehova ha aa ka a sireletsa Mor’a hae hore a se ke a shoa lefu le bohloko. Na o ne a tla sekisetsa melao eo litabeng tse ling? ’Nete ke hore, ha ho mohla Jehova a tlōlang melao ea hae e lokileng le e hlokang leeme. Ka hona, re na le mabaka a lekaneng a ho kholiseha hore kamehla o etsa se nepahetseng le se hlokang leeme.—Jobo 37:23.

 8. Ke hobane’ng ha e ne e ke ke ea e-ba ho utloahalang hore batho ba nahane hore Jehova o haelloa ke toka le ho loka ka tsela e itseng?

⁸ Nahana ka lebaka la bone leo ka lona re lokelang ho amohela likahlolo tsa Jehova: Jehova o entse motho ka setšoantšo sa Hae. (Genese 1:27) Kahoo batho ba filoe litšobotsi tse tšoanang le tsa Molimo tse akarelletsang matla a ho lemoha toka le ho loka. E ne e tla ba ho sa utloahaleng haeba matla a rōna a ho lemoha toka le ho loka a ne a ka etsa hore re nahane hore Jehova o haelloa ke litšobotsi tseo ka tsela e itseng. Haeba tlaleho e itseng ea Bibele e re tšoenya, re lokela ho hopola hore ka lebaka la sebe seo re se futsitseng, ha re na matla a phethahetseng a ho lemoha se hlokang leeme le se nepahetseng. Jehova Molimo, eo re entsoeng ka setšoantšo sa hae, o na le litšobotsi tse phethahetseng tsa toka le ho loka. (Deuteronoma 32:4) E ne e tla ba ntho e sa utloahaleng esita le ho nahana feela hore batho ba ka bontša ho hloka leeme le ho loka ho feta Molimo!—Baroma 3:4, 5; 9:14.

 9, 10. Ke hobane’ng ha Jehova a sa tlameha ho hlalosa kapa ho lokafatsa liketso tsa hae ho batho?

⁹ Lebaka la bohlano la ho amohela likahlolo tsa Jehova ke hore ke eena “Ea Phahameng ka ho Fetisisa holim’a lefatše lohle.” (Pesaleme ea 83:18) Ka lebaka leo, ha aa tlameha hore a hlalose kapa a lokafatse liketso tsa hae ho batho. Ke eena Sebōpi se Seholo, ’me rōna re joaloka letsopa leo ho bōpiloeng linkho ka lona, leo a ka etsang seo a se ratang ka lona. (Baroma 9:19-21) Rōna re bo-mang—mosebetsi o bōpiloeng ke liatla tsa hae—hore re belaelle liqeto tsa hae kapa liketso tsa hae? Ha mopatriareka Jobo a ne a sa utloisise tsela eo Molimo a sebetsanang le moloko oa batho ka eona, Jehova o ile a mo khalemela, a mo botsa tjena: “Na ka sebele u tla etsa toka ea ka lefeela? Na u tla phatlalatsa hore ke khopo e le hore u ka ba ea nepileng?” Hamorao ha Jobo a hlokomela hore o ne a buile ka ho hloka kutloisiso, o ile a baka. (Jobo 40:8; 42:6) E se eka le ka mohla re ke ke ra etsa phoso ea ho beha Molimo molato!

¹⁰ Ka ho hlakileng, re na le mabaka a utloahalang a ho lumela hore kamehla Jehova o etsa se nepahetseng. Re e-na le motheo ona o re thusang ho utloisisa litsela tsa Jehova, a re hlahlobeng litlaleho tse peli tsa Bibele tseo ba bang ba ka ’nang ba utloa li ferekanya. Ea pele e bua ka liketso tsa e mong oa barapeli ba Molimo, ’me e ’ngoe e bua ka kahlolo eo Molimo ka boeena a ileng a e liha.

Ke Hobane’ng ha Lota a Ile a Tšepisa Letšoele le Halefileng Barali ba Hae?

11, 12. (a) Hlalosa se ileng sa etsahala ha Molimo a ne a romela mangeloi a mabeli a nkileng ’mele ea batho hore a ee Sodoma. (b) Tlaleho ee e hlahisitse lipotso life likelellong tsa ba bang?

¹¹ Ho Genese khaolo ea 19, re fumana tlaleho ea se ileng sa etsahala ha Molimo a romela mangeloi a mabeli a neng a nkile ’mele ea batho hore a ee Sodoma. Lota o ile a tsitlella hore baeti bao ba hlole ha hae. Leha ho le joalo, bosiung boo, letšoele la banna ba motse oo le ile la lika-liketsa ntlo ’me la batla hore baeti bao ba ntšetsoe ka ntle ka morero oa ho etsa boitšoaro bo bobe. Lota o ile a leka ho behelana mabaka le letšoele leo, empa ha aa ka a atleha. E le ha a leka ho sireletsa baeti ba hae, Lota o ile a re: “Ka kōpo, barab’eso, le se ke la etsa hampe. Ka kōpo, bonang! ke na le barali ba babeli bao ho seng mohla ba kileng ba kopanela liphate le monna. Ka kōpo, e-reng ke le ntšetse bona. Joale le ba etse kamoo ho leng molemo kateng mahlong a lōna. Feela banna bana le se ke la ba etsa letho, hobane ke ka lebaka leo ba tlileng tlas’a moriti oa marulelo a ka.” Letšoele leo ha lea ka la mamela ’me la batla le thuha monyako. Qetellong, mangeloi ana a baeti a otla letšoele leo le hlanyang ka bofofu.—Genese 19:1-11.

¹² Ka ho utloahalang, tlaleho ena e hlahisitse lipotso likelellong tsa ba bang. Baa ipotsa: ‘Ke joang Lota a neng a ka batla ho sireletsa baeti ba hae ka hore a tšepise letšoele leo le tletseng takatso ea boitšoaro bo bobe barali ba hae? Na ha aa ka a etsa se fosahetseng, esita le ho bontša bokoala?’ Ka lebaka la tlaleho ena, ke hobane’ng ha Molimo a ile a bululela Petrose hore a bitse Lota “monna eo ea lokileng”? Na Lota o ile a etsa se khahlisang Molimo? (2 Petrose 2:7, 8) A re ke re hlahlobeng taba ena e le hore re se ke ra fihlela qeto e fosahetseng.

13, 14. (a) Ke’ng e lokelang ho hlokomeloa ka tlaleho ea Bibele mabapi le liketso tsa Lota? (b) Ke’ng se bontšang hore Lota e ne e se lekoala?

¹³ Taba ea pele, re lokela ho hlokomela hore Bibele ha e lumelle liketso tsa Lota ebile ha e li nyatse, e mpa feela e tlaleha se ileng sa etsahala. Hape Bibele ha e re bolelle hore na Lota o ne a nahanne eng kapa o ne a susumetsoa ke eng hore a etse lintho ka tsela eo a ileng a li etsa ka eona. Mohlomong o tla bolela lintlha tse eketsehileng ha a tsosoa ka “tsoho ea ba lokileng.”—Liketso 24:15.

¹⁴ Ho hang Lota e ne e se lekoala. O ne a le bothateng. Ka hore a re baeti ba hae ba ne ba ‘tlile tlas’a moriti’ oa marulelo a hae, Lota o ile a bontša hore o ne a ikutloa a tlamehile ho ba sireletsa le ho ba fa setšabelo. Empa hoo ho ne ho ke ke ha e-ba bobebe. Rahistori oa Mojuda Josephus o tlaleha hore Basodoma ba ne “ba tšoara banna ka mokhoa o se nang toka, ebile ba nyefola Molimo . . . Ba ne ba hloile basele, ’me ba itšilafatsa ka mekhoa ea Bosodoma.” Leha ho le joalo, Lota ha aa ka a tšaba letšoele leo le tletseng lehloeo. Ho fapana le hoo, o ile a tsoela ka ntle eaba o behelana mabaka le banna bao ba halefileng. O bile “a koala lemati ka mor’a hae.”—Genese 19:6.

15. Ke hobane’ng ha ho ka boleloa hore mohlomong Lota o ne a entse seo kahobane a ne a e-na le tumelo?

¹⁵ Ba bang ba ka ’na ba botsa, ‘Feela ke hobane’ng ha Lota a ile a tšepisa letšoele leo barali ba hae?’ Ho e-na le ho nahana hore o ne a e-na le sepheo se sebe, ke hobane’ng ha u sa nahane hore e ka ’na eaba ho ne ho e-na le mabaka a itseng? Taba ea pele, e ka ’na eaba Lota o entse seo hobane a ne a e-na le tumelo. Joang? Ha ho pelaelo hore Lota o ne a tseba kamoo Jehova a neng a sirelelitse Sara, mosali oa Abrahama, mor’abo ntat’a Lota. Hopola hore kaha Sara o ne a le motle haholo, Abrahama o ne a mo kōpile hore a re ke khaitseli ea hae, esere mohlomong ba bang ba mo bolaea e le hore ba inkele Sara.a Ka mor’a moo, Sara o ile a nkeloa ntlong ea Faro. Leha ho le joalo, Jehova o ile a kenella, a thibela Faro hore a se ke a silafatsa Sara. (Genese 12:11-20) Mohlomong Lota o ne a e-na le tumelo ea hore barali ba hae ba ne ba ka sireletsoa ka tsela e tšoanang. Habohlokoa ke hore, a sebelisa mangeloi a hae Jehova o ile a fela a kenella, ’me baroetsana bao ba ile ba sireletsoa.

16, 17. (a) E ka ’na eaba Lota o ne a ntse a leka ho tšosa kapa ho ferekanya banna ba Sodoma ka tsela efe? (b) Ho sa tsotellehe hore na lebaka la Lota e ne e le lefe, ke’ng eo re ka kholisehang ka eona?

¹⁶ Nahana ka taba e ’ngoe eo e ka ’nang eaba ke lona lebaka la sena. Mohlomong Lota o ne a boetse a leka ho tšosa banna bao kapa ho ba ferekanya. E ka ’na eaba o ne a lumela hore letšoele leo le ne le ke ke la lakatsa barali ba hae kaha Basodoma ba ne ba lakatsa batho ba bong bo tšoanang le ba bona. (Juda 7) Ho phaella moo, baroetsana bao ba ne ba lebelelitsoe ke banna ba motse oo bao e neng e tla ba bakhoenyana ba Lota, kahoo mohlomong beng ka bona, metsoalle kapa bo-mphato ba bona khoebong ba ne ba le teng har’a letšoele leo. (Genese 19:14) E ka ’na eaba Lota o ne a tšepile hore ka lebaka la likamano tse joalo, banna ba bang letšoeleng leo ba ne ba tla buella hore barali ba hae ba sireletsoe. Kahoo letšoele le arohaneng ka maikutlo le ne le ke ke la e-ba kotsi hakaalo.b

¹⁷ Ho sa tsotellehe hore na lebaka la Lota le sepheo sa hae e ne e le life, re ka kholiseha ka taba ena: Kaha kamehla Jehova o etsa se nepahetseng, e tlameha ebe o ne a e-na le lebaka le letle la hore a talime Lota e le ‘monna ea lokileng.’ Joale, ha re nahana ka liketso tsa letšoele leo le hlanyang la Basodoma, na ho ka ba le pelaelo ea letho hore Jehova o ne a e-na le mabaka a utloahalang ka ho feletseng a hore a lihe kahlolo ho baahi ba motse oo o khopo?—Genese 19:23-25.

Ke Hobane’ng ha Jehova a Ile a Bolaea Uza?

18. (a) Ho ile ha etsahala’ng ha Davida a leka ho tlisa Areka Jerusalema? (b) Tlaleho ee e hlahisa potso efe?

¹⁸ Tlaleho e ’ngoe e ka ’nang ea bonahala e ferekanya ba bang ke e buang ka ha Davida a leka ho tlisa areka ea selekane Jerusalema. Areka e ne e laetsoe koloing, e neng e eteletsoe pele ke Uza le mor’abo. Bibele e re: “Qetellong ba fihla seotlong sa Nakone, joale Uza a otlollela letsoho arekeng ea Molimo oa ’nete ’me a e tšoara, etsoe likhomo li ile tsa batla li e phethola. Eaba bohale ba Jehova bo tukela Uza ’me Molimo oa ’nete a mo bolaela moo ka lebaka la ketso eo e hlokang tlhompho, hoo a ileng a shoela moo haufi le areka ea Molimo oa ’nete.” Likhoeli hamorao, boiteko boo bo ile ba atleha lekhetlong la bobeli ha Areka e ne e nkiloe ka tsela eo Molimo a e laetseng, e jeroe mahetleng ke Balevi ba Bakohathe. (2 Samuele 6:6, 7; Numere 4:15; 7:9; 1 Likronike 15:1-14) Ba bang ba ka ’na ba botsa ba re: ‘Ke hobane’ng ha Jehova a ile a nka bohato bo matla hakaalo? Uza o ne a mpa a leka ho sireletsa Areka feela.’ Hore re se fihlele qeto e fosahetseng, re lokela ho hlokomela lintlha tse itseng tse ka re thusang.

19. Ke hobane’ng ha ho ke ke ha etsahala hore Jehova a sebetse ka tsela e se nang toka?

¹⁹ Re lokela ho hopola hore ho ke ke ha etsahala hore Jehova a sebetse ka mokhoa o hlokang toka. (Jobo 34:10) Haeba a ne a ka etsa joalo o ne a tla be a sa bontše lerato, ’me ho latela thuto ea rōna ea Bibele ka kakaretso rea tseba hore “Molimo ke lerato.” (1 Johanne 4:8) Ho phaella moo, Mangolo a re bolella hore “ho loka le kahlolo ke sebaka se tiisitsoeng sa terone ea [Molimo].” (Pesaleme ea 89:14) Joale, ke joang Jehova a neng a ka sebetsa ka tsela e se nang toka? Haeba a ne a ka etsa joalo, o ne a tla be a fokolisa motheo oa bobusi ba hae ka booona.

20. Ke hobane’ng ha e tlameha ebe Uza o ne a tseba melao e amanang le Areka?

²⁰ Hopola hore e tlameha ebe Uza o ne a tseba Molao hantle. Areka e ne e emela boteng ba Jehova. Molao o ne o boletse ka ho hlaka hore e se ke ea angoa ke batho ba sa lumelloang, o lemosa ka ho totobetseng hore ba tlōlang taelo eo ba ne ba tla bolaoa. (Numere 4:18-20; 7:89) Ka hona, ho tsamaisoa ha lebokose leo le halalelang e ne e se mosebetsi o lokelang ho nkoa habobebe. Kamoo ho bonahalang kateng, Uza e ne e le Molevi (le hoja e ne e se moprista), kahoo e tlameha ebe o ne a tseba Molao. Hape, lilemo pejana ho moo Areka e ne e isitsoe habo hore e bolokoe teng. (1 Samuele 6:20–7:1) E ne e lutse moo ka lilemo tse ka bang 70, ho fihlela Davida a khetha ho e fallisa. Kahoo ho ka etsahala hore ebe Uza o ne a tseba melao e amanang le Areka ho tloha bongoaneng.

21. Tabeng ea Uza, ke hobane’ng ha e le habohlokoa ho hopola hore Jehova o bona sepheo sa pelo?

²¹ Joalokaha ho boletsoe pejana, Jehova a ka lemoha se ka lipelong. Kaha Lentsoe la hae le re seo Uza a se entseng e ne e le ‘ketso e hlokang tlhompho,’ mohlomong Jehova o ile a bona sepheo se itseng sa boithati se sa senoloeng ka ho hlaka tlalehong eo. Na mohlomong Uza e ne e le motho ea iketelletsang pele, ea tloaetseng ho tlōla meeli e loketseng? (Liproverbia 11:2) Na ho hlahella pontšeng a tsamaisa Areka eo lelapa labo le neng le e hlokometse ho ile ha etsa hore a ikutloe e le motho oa bohlokoa? (Liproverbia 8:13) Na Uza o ne a se na tumelo hoo a neng a nahana hore letsoho la Jehova le lekhutšoanyane haholo hore le tsitsise lebokose leo le halalelang le neng le tšoantšetsa boteng ba Hae? Ho sa tsotellehe hore na lebaka e ne e le lefe, re ka kholiseha hore Jehova o ile a etsa se nepahetseng. Mohlomong o ile a bona ntho e itseng pelong ea Uza e ileng ea etsa hore A lihe kahlolo ka potlako.—Liproverbia 21:2.

Lebaka le Utloahalang la ho ba le Tšepo

22. Bohlale ba Jehova bo bonahala joang ka hore ebe ka linako tse ling Lentsoe la hae le siea lintlha tse itseng ka thōko?

²² Bohlale ba Jehova bo ke keng ba bapisoa bo bonahala ka hore ka linako tse ling Lentsoe la hae le siea lintlha tse itseng ka thōko. Ka tsela eo, Jehova o re fa monyetla oa ho bontša hore rea mo tšepa. Litabeng tsena tseo re li tšohlileng, na ha hoa hlaka hore re na le mabaka a utloahalang a ho amohela likahlolo tsa Jehova? Ka sebele, ha re ithuta Lentsoe la Molimo ka pelo e tšepahalang le kelello e se nang leeme, re ba le tsebo e ngata ka Jehova hoo re ka kholisehang hore kamehla o etsa se hlokang leeme le se nepahetseng. Kahoo, haeba tlaleho e itseng ea Bibele e hlahisa lipotso tseo re sitoang ho fumana likarabo tsa tsona tse totobetseng hang-hang, a re kholiseheng ka ho feletseng hore Jehova o entse se nepahetseng.

23. Re ka ba le kholiseho efe mabapi le liketso tsa Jehova tsa nakong e tlang?

²³ Re ka ba le kholiseho e tšoanang mabapi le liketso tsa Jehova tsa nakong e tlang. Kahoo re ka kholiseha hore ha a liha kahlolo nakong ea matšoenyeho a maholo a ntseng a atamela, ha a na ho “felisa ea lokileng le ea khopo.” (Genese 18:23) Le ka mohla lerato la hae la ho loka le toka le ke ke la mo lumella ho etsa joalo. Hape re ka kholiseha ka ho feletseng hore lefatšeng le lecha le tlang, o tla re khotsofatsa ka sohle seo re se hlokang ka tsela e molemohali.—Pesaleme ea 145:16.

[Mongolo o botlaaseng ba leqephe]

Na U sa Hopola?

• Re lokela ho amohela likahlolo tsa Jehova ka mabaka afe?

• Re ka thusoa ke’ng ho qoba ho fihlela qeto e fosahetseng mabapi le hore ebe Lota o ile a tšepisa letšoele le halefileng barali ba hae?

• Ke mabaka afe a ka re thusang ho utloisisa hore na ke hobane’ng ha Jehova a ile a bolaea Uza?

• Re ka ba le kholiseho efe mabapi le liketso tsa Jehova tsa nakong e tlang?