Ho Etsa Mahlabelo ka Bana—Ha ho Tsoe ho Molimo
KA NTLE ho marako a Jerusalema, mehleng ea boholo-holo ho ne ho na le sebaka se bitsoang Tofethe. Ho sona, Baiseraele ba bakoenehi, hammoho le Marena Akase le Manasse, ba ne ba tloaetse ho etsa moetlo o sehlōhō oa ho etsa mahlabelo ka bana. Qetellong, Morena Josiase ea tšepahalang a thibela mokhoa ona ka ho etsa Tofethe sebaka se sa lokelang mekete ea bolumeli.—2 Marena 23:10; 2 Likronike 28:1-4; 33:1, 6.
Ke hobane’ng ha sebaka se ne se bitsoa Tofethe? Tšimoloho ea lentsoe e tsosa khang, empa ke ho thahasellisang ho hlokomela seo seithuti sa Mojode David Kimhi (c. 1160-c. 1235) a se bolelang ka sebaka sena. Ha a bua ka 2 Marena 23:10, moo ho boleloang ka Tofethe, o ngotse: “Lena ke lebitso la sebaka seo ho sona ba neng ba fetisa bara ba bona [mollong] ho Moloke. Lebitso la sebaka ebile Tofethe, ’me ba boletse hore se ile sa bitsoa joalo kahobane nakong ea borapeli ba ne ba tjeka ’me ba letsa meropa [Seheberu, tup·pimʹ] hore ntate a se ke a utloa sello sa mora oa hae ha ba mo fetisa mollong, le hore pelo ea hae e se ke ea mo utloela bohloko ’me a mo nka matsohong a bona. ’Me sebaka sena e ne e le khohlo ea monna ea bitsoang Hinnome, ’me e ile ea bitsoa ‘Khohlo ea Hinnome’ le ‘Khohlo ea Mora oa Hinnome’ . . . Josiase o ile a silafatsa sebaka seo, a se etsa sebaka se litšila, moo ho akheloang litopo tsa liphoofolo le litšila tsohle, hore motho a se hlole a fetisa mora kapa morali oa hae mollong bakeng sa Moloke.”
Mehleng ea joale, molimo Moloke e mpa e le feela histori e tsosang thahasello, ’me kantle ho pelaelo ba bangata ba thatafalloa ho utloisisa hore ke hobane’ng ha batho ba ne ba bolaea bana ba bona bakeng sa hae. Leha ho le joalo, kajeno ho bonahala batho ba baholo ba ntse ba ikemiselitse ho bolaea bana ba bona ha ho ba loketse. Lekholong lena la lilemo, bacha ba limillione ba entsoe mahlabelo aletareng ea ntoa. Selemo le selemo, masea a limillione a e-song ho belehoe a bolaoa ka boomo ka ho ntšuoa ha limpa, hobane a mangata a emeroe ka lebaka la ho kopanela liphate ka kotsi kapa hobane tsoalo ea bona e ne e tla sitisa mokhoa oa bophelo oa batsoali ba bona. Kahoo, bana bana e-ba mahlabelo a ho kopanela liphate le maruo.
Jehova o itse ho chesetsa Moloke bana e ne e le e manyala. (Jeremia 7:31) Na o talima ka ho fapaneng mokhoa leha e le ofe o sehlōhō oa ho bolaoa ha bana molokong oa rōna?
[Litšoantšo tse leqepheng la 31]
Ho etsa mahlabelo ka bana bakeng sa molimo oa bohata Moloke, joalokaha ho tšoantšitsoe lilemong tse ka bang 75 tse fetileng ho “Photo-Drama of Creation”
Khohlo ea Hinnome ea kajeno, e shebileng bochabela