Tlotlisa Jehova ka Maruo a Hao
‘HA KE na leruo; ke mocha feela ’me ke na le lintho tse fokolang haholo.’ ‘Ha kea ruteha; ke eng eo nka e fang Jehova?’ ‘Ke holofetse hampe; Jehova o tla lokela ho mpota ka thōko.’ ‘Ke se ke hōlile; e se e le morao haholo hore nka fumana maruo.’
Na mehopolo e kang ee e ba teng kelellong ea hao ha u nahana ka sehlooho sa taba ee? Leha ho le joalo, e ka ’na eaba u ruile ho feta kamoo u nahanang ka teng. Hopola mantsoe a Morena Jesu phuthehong ea Smyrna: “Ke tseba mesebetsi ea hao, le matšoenyeho a hao, le bofutsana ba hao, leha u mpa u le morui.” (Tšenolo 2:9) Pejana Thutong ea Thabeng Jesu o ne a ile a re: “Le se ke la ipokellela matlotlo lefatšeng . . . Le mpe le ipokellele matlotlo leholimong . . . Hobane moo letlotlo la hao le leng teng, ke moo le pelo ea hao e tla ba teng.” (Mattheu 6:19-21) Na mantsoe aa a Mong’a rōna a u tsosa molota? E, e ka ’na eaba ho na le ho hong ho uena hoo Ntate oa rōna oa leholimo, Jehova, le Mora oa hae ba ho talimang e le ha bohlokoa haholo. A re ke re hlahlobisiseng.
Bokhabane ba Bocha—Matla le Cheseho
Mocha a ka nehelana ka tšebeletso ea bohlokoa ho Jehova joang? Liproverbia 20:29 e re tiisetsa hore bacha ba na le letlotlo le babatsehang—mahlaha-hlaha ’meleng. Ho khatholla hakaakang ho bona mocha a nehelana ka matla a hae le sehlahlo tšebeletsong ea Molimo oa rōna!
A re ke re phetleng maqephe a histori re khutlele mathoasong a bo-1930 ha bacha ba ’maloa ba utloa ’nete e teng ka Bibeleng. Mocha e mong ea lilemo li 16 o ile a alima motsoalle oa hae thuso ea ho ithuta Bibele Creation, e hatisitsoeng ke Mokhatlo oa Watch Tower. Ha a fihla khaolong “Pōpo e Ncha” ’me a bala ka ho ikhethela tšebeletso e halalelang, o ne a tseba seo a batlang ho se etsa ka bophelo ba hae. Hang-hang, o ile a inehela ho ’Mōpi ea matla ’ohle. Selemong se latelang o ile a bala khatiso e ’ngoe, Vindication (Buka ea Pele), ’me a ithuta ka tebello ea ho kopanela ho phahamiseng lebitso la Molimo le bobusi ba oona. Boitsebiso bona bo ile ba tsosa ka ho eena takatso e matla ea tšebeletso ea nako e tletseng. Selemong sona seo o ile a etsa kōpo bakeng sa litokelo tsa bopula-maliboho, ’me ho tla fihlela kajeno o ntse a tsoela pele tšebeletsong ea nako e tletseng. Le hoja hona joale ba ’maloa ba lithaka tsa hae ba se ba qetile tsela ea bona ea lefatšeng, ba bangata ba ntseng ba setse ba sa ntsane ba bontša moea oa boinehelo ba moea oohle ho Ntate oa rōna oa leholimo.
Na bacha ba Bakreste kajeno ba bontša tšobotsi ee e tšoanang ea bohlokoahali? Ka sebele ho joalo! Litlaleho tsa Yearbook li bontša hore hona joale letšoele le leholo joaloka marotholi a phoka le kena har’a bo-pula-maliboho. (Pesaleme ea 110:3) Philippines e tlalehile hore karolo ea 13 lekholong ea bo-pula-maliboho bohle ba ka mehla ke ba ka tlaase ho lilemo tse 20. Na hoo ke ’nete libakeng tse ling? E, ke ’nete. Ka mohlala, phuputso e entsoeng lihleke-hlekeng tse nyenyane tsa Trinidad le Tobago e senola hore bo-pula-maliboho ba bacha ba 282 ba ile ba ngolisa pakeng tsa la 1 Loetse, 1986, le la 30 Loetse, 1988. Lenaneng leo, ba 48 e ne e le ba ka tlas’a lilemo tse 20. Na u ka thabela ho utloa ho e mong oa baa?
Kopana le Charmaine Francis. O re: “Ho tloha ha ke sa le lesea, batsoali ba ka ba ne ba bua le ’na ka ho sebeletsa Jehova le ho lula ke tšepahala ho eena. Ha batsoali ba ka ba mpotsa hore na ke ne ke tla etsa’ng haeba ba ne ba ka kenngoa teronkong ka baka la ho bolela litaba tse molemo, ke ne ke ee ke re, ‘Ke tla sebeletsa Jehova.’ Ke ile ka inehela ha ke le lilemo li 13, ’me ka kolobetsoa ha ke le lilemo li 14. Hang ka mor’a moo, ka mehla nakong ea phomolo ea likolo, ke ne ke kenella bopula-malibohong bo thusang. Ka 1983 ke ile ka kenela tšebeletso ea bopula-maliboho ba ka mehla. Selemong sa ka sa ho qala sa ho bula maliboho, ke ile ka thabela ho thusa mosali e mong ea neng a sa sebetse ho fetoha mohlanka oa Jehova. Hona joale ke tsamaisa lithuto tsa Bibele tse robong. E ’ngoe e itokisetsa kolobetso, ’me tse ling tse tharo li ba teng libokeng.”
Joale, bacha, na ha le lumele hore le lōna le na le ho hong ha bohlokoa hoo le ka tlotlisang Jehova ka hona? Ka sebele le na le hona! Esita le hoja e ka ’na eaba hona joale ha le tšebeletsong ea nako e tletseng, le ka tlotlisa Jehova ho latela maemo a lōna. E ka ’na eaba le sa ntsane le saletsoe ke lilemo tse ngata sekolong. Leha ho le joalo, le na le monyetla oa bohlokoahali oa ho rorisa Jehova ho matichere a lōna le bao le leng sehlopheng se le seng le bona. Christian Kalloo, ea lilemo li leshome, o ile a tla sekolong ka kopi ea hae ea buka Life—How Did It Get Here—By Evolution or by Creation? Phello? O ile a tsamaisa likopi tse supileng ho ba thahasellang taba eo. O ile a boela a tsamaisa e ’ngoe tšebeletsong ea ntlo le ntlo. U ka etsa ho tšoanang.—Bapisa le Mattheu 21:15, 16.
Morupeli oa Rōna e Moholo oa re Ruta
Moprofeta Esaia o itse: “Morena Jehova o ’neile leleme la ba rutehileng.” O ile a fa Jehova tlotla bakeng sa matla a hae a ho bua. O ile a boela a tlaleha tšepiso ea Jehova: “Moea oa ka o lutseng ho uena, le litaba tsa ka tseo ke li beileng molomong oa hao, ha li sa tla tloha molomong oa hao le melomong ea bana ba hao, le melomong ea bana ba bana ba hao.” (Esaia 50:4; 59:21) Feela joalokaha batho ba sa rutehang le ba tloaelehileng ba ile ba fetoha baapostola ba Jesu ’me Molimo oa ba hlalefisa litabeng tsa moea, kahoo Jehova o hlalefisitse batho ba tloaelehileng kajeno.
Yearbook ea 1986 e tšoere boitsebiso bo khothatsang bakeng sa ba nang le thuto ea sekolo e fokolang kapa ba se nang eona ho hang. Linaheng tse ngata Lipaki tsa Jehova li lokisetsa hore lihlopha tsa ho ithuta ho bala le ho ngola li tšoaroe bakeng sa ho ruta batho ba baholo ho bala. Jehova o hlohonolofalitse ba joalo hakaakang! Pakeng tsa 1962 le 1984 Nigeria, ba ka bang 19 238 ba ile ba etsa tsoelo-pele e babatsehang ea ho ithuta ho bala le ho ngola ’me hona joale ba hlile ba khona ho ipalla Bibele le ho e balla bao ba ba pakelang. Ba fumane tlhohonolofatso e enneng hakaakang! Moena e mong o ile a etsa tsoelo-pele e ntle hoo a ileng a fetoha morupeli oa sehlopha sa ho ithuta ho bala phuthehong ea habo.
Hape nahana ka phihlelo ea Ezekiel Ovbiagele. O ne a sa khone ho bala ha a kolobetsoa ka 1940. Ka mor’a ho ithuta ho bala, o ile a etsa tsoelo-pele ho isa ntlheng ea hore a ngolise e le pula-maliboho, ’me hamorao, ka 1953, o ile a khetheloa ho ba molebeli ea tsamaeang.
Ha ho na mekoallo ea lilemo mosebetsing oa ho ithuta. Ba bang ba ka ’na ba qotsa maele a boholo-holo: “U ke ke ua ruta ntja e tsofetseng maqiti a macha!” Hoo e ka ’na ea e-ba ’nete ka lintja, empa batho hase liphoofolo. Esita le ba hōlileng ba ka ithuta ’me baa fela ba ithuta haeba ba hlile ba lakatsa ho tseba le ho sebeletsa Jehova. E ka ’na eaba u tseba ba bang ba entseng joalo. Ka mohlala, Alice Okon oa Nigeria o ile a khothalletsoa ho bala Bibele le ho ithuta ka tšepo eo e fanang ka eona; o ile a arabela ’me a thabela tšepo e tlang. Ha a le lilemo li 80, o ne a e-s’o tsofale haholo hore a ka ithuta. Na ha u nahane hore o ile a thabisa pelo ea Jehova? Ke morui tumelong. Liproverbia 3:14 e re tiisetsa hore ho ba le bohlale ho “fetisa silevera, ho ata ha jona ho fetisa ha gauda.” Ha motho a ka bua ’nete ka nepo, mantsoe a hae a ba joaloka “liapole tsa gauda pitsaneng ea silevera.”—Liproverbia 25:11; Ba-Kolosse 3:16.
Ke Barui Tumelong le Mesebetsing e Metle le Hoja ba Holofetse
Motho ea tsoetsoeng a holofetse ’meleng a ka ’na a ikutloa a nyahame haholo ha a ntse a hōla ’me a elelloa boemo ba hae. ’Me ke ho sithabetsang ha motho a holofala ha a se a le moholo. Na boemo ba batho ba joalo ke bo hlokang tšepo? Che, bo ka ba ba bula tsela ea ho ea bophelong bo sa feleng.
Nakong ea Ntoa ea I ea Lefatše, Edward Stead o ne a e-na le khoebo ea setala sa tlhokomelo ea lipere motsaneng oa Arvada, Wyoming, U.S.A., ’me mosali oa hae o ne a okametse hotele e nyenyane. Ho hahlameloa ke mokakallane oa Spain ho ile ha mo fokolisa, ’me o ile a hlaseloa ke ramatiki, e ileng ea mo khina manonyeletso hoo ’mele oa hae o ileng oa fetohela sebōpehong sa setulo sa hae se mabili. Le hoja a sa khone ho ithusa ka litsela tse ling, o ne a ntse a khona ho bua, ’me o ne a khona ho tsamaisa matsoho a hae hanyenyane. Ka nakoana o ile a nahana ho ipolaea. Eaba o fumana ’nete, ’me o ile a e amohela ka cheseho.
Qalong o ne a lula monyakong oa hotele ’me a buisana le baeti ka tumelo ea hae eo a sa tsoa e fumana. O ne a khona ho tsamaisa matsoho a hae ka ho lekaneng ho phetla khatiso ea Bibele ho e bontša ba emang ho mamela. Ba bang ba neng ba ananela boiteko ba hae ba ne ba ’mitsa mokhanni oa sefofane ea holofetseng. Ka mor’a moo, o ile a etsa qeto ea hore a ka paka metseng e meng haeba a ka haheloa sekhurumetso se khethehileng ka holim’a teraka e bulehileng ka ho felletseng ka morao. Sena se ile sa etsoa, ’me ka lilemo tse ngata o ’nile a bula maliboho ka tsela ena e sa tloaelehang, a tsamaea likete-kete tsa limaele pakeng tsa Wyoming le Texas, a e-na le bo-pula-maliboho ba babeli kapa ba bararo ba sa ntsaneng ba le bacha ba neng ba mo hlokomela. Nakong eohle ea ha a sa ntsane a phela, e ne e le khothatso e khōlō ho bohle ba neng ba mo tseba.
Haeba u ikutloa u nyahame ka baka la ho holofala ’meleng, ka kōpo bala tlaleho e maqepheng a 22-5 ho Molula-Qhooa oa November 15, 1986. Banna ba boletsoeng moo kaofela ke baholo, baeletsi ba moea, ba tšoanelehang bakeng sa ho tšelisa baena ba bona bao e ka ’nang eaba ba phela hantle ’meleng empa ba hloka ho matlafatsoa moeeng. Ba ruile hakaakang mahlong a Molimo!—1 Timothea 6:18, TLP.
Esterleta Dick, ea lilemo li 63, e bile Paki e kolobelitsoeng ka lilemo tse 16. Ka 1978 o ile a foufala, empa o ’nile a sebeletsa e le pula-maliboho oa ka mehla ka lilemo tse peli tse fetileng. See se khoneha joang? E re a arabele.
O re: “Ka letsatsi le leng ngoan’eso oa moea e mocha oa pula-maliboho o ile a mpotsa: ‘Ngoan’eso Dick, ka mehla u finyella lipakane tsa hao u le pula-maliboho ea thusang. Ke hobane’ng ha u sa leke ho ba pula-maliboho oa ka mehla?’”
Esterleta o ne a tšaba hore e tla ba tšitiso ho baena, empa o ile a hopola hore molebeli oa potoloho o ne a khothallelitse tšebeletso ea bopula-maliboho. O re: “Ke ile ka qalella, ’me hona joale ke qetile lilemo tse peli tšebeletsong ea bopula-maliboho. Ke etsa bopaki ba seterateng ’me ke na le maeto a ho boela a mangata haholo. Ho feta moo, ke tsamaisa lithuto tsa mahae tsa Bibele tse tšeletseng. Joang? Pele ke etela mong’a ntlo, ke balloa boitsebiso ba thuto eo lapeng hammoho le mangolo a bontšitsoeng, kahoo ke khona ho hlalosa thutong. Tse tharo ho liithuti tsa ka tsa Bibele li tla le ’na libokeng, ’me se seng se kolobelitsoe.”
Mang Kapa Mang a ka ‘Tlatsa Letsoho la Hae’ Mpho
Na ho fana ho lekanyelitsoe linthong tsa moea? Che. Ha Morena Davida oa boholo-holo a etsa litokisetso bakeng sa ho haha tempele, o ile a botsa: “Ke mang ea teng ea ithaopelang ho tlatsa letsoho la hae kajeno mpho bakeng sa Jehova?” (1 Likronike 29:5, NW) Mang kapa mang o ne a ka etsa joalo. Ka ho tšoanang kajeno, e-bang ba bacha kapa ba hōlile, ba phela hantle kapa che, ba bangata ba lakatsa ho etsa monehelo oa boithaopo oa lintho tse bonahalang ho ntšetsa lithahasello tsa ’Muso pele. O ka ’na oa etsoa ka ofisi ea lekala ea naha eo motho a leng ho eona kapa ka phutheho ea habo. Ka tsela ena mang kapa mang, ho latela matla a hae, a ka thusa ho jara litšenyehelo tsa ho bona hore litaba tse molemo li boleloa lefatšeng lohle leo ho ahiloeng ho lona. Ke tokelo.—2 Ba-Korinthe 9:8-12.
Habohlokoa le ho feta, u na le maruo a moea ao u ka tlotlisang Jehova ka ’ona. Bacha ba na le mahlaha-hlaha le sehlahlo tsa bocha. Ba sa rutehang ba ka ithuta ho nyehela tholoana ea melomo ea bona ho Jehova. Ba holofetseng ba ka etsa tsoelo-pele tsebong, bohlaleng, le kutloisisong, ’me ba se ba ’nile ba e etsa, hoo ba bangata e seng barorisi ba Jehova ka nako e tletseng feela empa hape ke baeletsi le balisa ka hare ho phutheho ea Bokreste. Na ha ua rua ho feta kamoo u neng u nahana ka teng? Kahoo, tlotlisa Jehova ka maruo a hao.—Ba-Heberu 13:15, 16.