Ba Limillione ba Shoeleng Hona Joale ba Tla Phela Hape

BA LIMILLIONE ba shoeleng hona joale ba tla phela hape—eo ke tšepo e hlasimollang pelo hakaakang! Empa na ke ea sebele? Ho ne ho tla hlokahala eng ho u kholisa? Hore u lumele tšepiso, ho ne ho tla hlokahala hore u kholoe hore ea etsang tšepiso eo o ikemiselitse ebile a ka khona ho e phethahatsa. Joale, ke mang ea tšepisang hore ba limillione ba shoeleng hona joale ba tla phela hape?

Nakong ea selemo ka 31 C.E., ka sebete Jesu Kreste o ile a bolela hore Jehova Molimo o mo file matla a ho tsosa bafu. Jesu o ile a tšepisa: “Hobane, joale ka ha Ntate a tsosa bafu, le ho ba pholosa, le eena Mora o pholosa bao a ratang ho ba pholosa. Se makaleng ke hoo; hobane nako ea tla, eo bohle ba mabitleng ba tla utloa lentsoe la hae [Jesu]; ’me ba tla tsoa ho ’ona.” (Johanne 5:21, 28, 29) E, Jesu Kreste o tšepisitse hore ba limillione ba shoeleng hona joale ba tla phela hape lefatšeng lena ’me ba tla ba le tebello ea ho lula ho lona ka ho sa feleng. (Johanne 3:16; 17:3; bapisa Pesaleme ea 37:29 le Mattheu 5:5.)a Kaha Jesu o entse tšepiso eo, ke ho utloahalang ho lumela hore o ikemiselitse ho e phethahatsa. Empa na a ka khona ho etsa joalo?

Ho latela tlaleho ea Bibele, ho fihlela nakong ea ha Jesu a etsa tšepiso eo, o ne a e-s’o tsose motho ofe kapa ofe. Empa nako e ka tlaase ho lilemo tse peli hamorao, o ile a bontša ka tsela e matla hore o rata ho tsosa bafu e bile a ka etsa joalo.

“Lazaro, Tsoa Moo!”

Pono e ne e ama maikutlo. Lazaro o ne a kulela lefu. Likhaitseli tsa hae tse peli, Maria le Maretha, li ile tsa romela molaetsa ho Jesu, ea neng a le ka mose ho Nōka ea Jordane: “Bona, Morena, eo u mo ratang oa kula.” (Johanne 11:3) E, Jesu o ne a rata lelapa lena haholo. E ne e ile ea e-ba moeti lapeng la bona Bethania, mohlomong ka makhetlo-khetlo. (Luka 10:38-42; bapisa le Luka 9:58.) Empa joale motsoalle oa Jesu ea ratehang o ne a kula haholo.

Maria le Maretha ba ne ba lebelletse hore Jesu a etse’ng? Ha baa ka ba mo kōpa hore a tle Bethania. Empa ba ne ba tseba hore Jesu o rata Lazaro. Na Jesu o ne a ke ke a batla ho bona motsoalle oa hae ea kulang? Ha ho pelaelo hore ba ne ba tšepile hore ka mohlolo Jesu o ne a tla mo folisa. Ha e le hantle, ho tla fihlela nakong ena tšebeletsong ea hae, Jesu o ne a entse mehlolo e mengata ea ho folisa, esita le bohōle ba sebaka e ne e se tšitiso ho eena. (Bapisa le Mattheu 8:5-13.) Na o ne a ke ke a etsa ho tšoanang bakeng sa motsoalle oa hae ea ratehang joalo? Ho makatsang ke hore ho e-na le hore a ee Bethania hang-hang, Jesu o ile a hlola moo a neng a ntse a le hona teng matsatsi a mabeli a latelang.—Johanne 11:5, 6.

Lazaro o ile a shoa nakoana e itseng ka mor’a hore ho romeloe molaetsa oo, mohlomong ka eona nako eo Jesu a ileng a fumana litaba tseo ka eona. (Bapisa le Johanne 11:3, 6, 17.) Empa ho ne ho se ho sa hlokahale molaetsa o mong hape. Jesu o ne a tseba hore Lazaro o shoele, ’me o ne a ikemiselitse ho etsa ho hong ka hona. Ha a bua ka lefu la Lazaro, o ile a bolella barutuoa ba hae: “Lazaro, motsoalle oa rōna, o robetse; empa ke ea mo tsosa borokong.” (Johanne 11:11) Pejana Jesu o ne a ile a tsosa batho ba babeli bafung, ’me maemong ao ka bobeli o ile a ho etsa nakoana feela ka mor’a hore motho a shoe.b Leha ho le joalo, lekhetlong lena boemo bo ne bo tla fapana. Ha Jesu a qetella a fihlile Bethania, motsoalle oa hae ea ratehang o ne a se a shoele matsatsi a mane. (Johanne 11:17, 39) Na Jesu o ne a ka khutlisetsa bophelong motho ea neng a se a shoele nako e telele hakaalo eo ’mele oa hae o neng o se o qalile ho bola?

Ha Maretha, mosali ea neng a potlakela ho nka khato, a utloa hore Jesu oa tla, o ile a mathela ka ntle ho mo khahlanyetsa. (Bapisa le Luka 10:38-42.) Hang ha a kopana le Jesu, pelo ea hae e ile ea mo susumelletsa ho re: “Morena, hojane ua ba teng, khaitseli ea ka a ka be a sa ka a shoa.” Ho ntse ho le joalo, o ile a bontša tumelo ea hae: “Empa le joale kea tseba, hobane tsohle tseo u tla li kōpa ho Molimo, Molimo o tla u fa tsona.” A anngoe maikutlo ke mesarelo ea mosali eo, Jesu o ile a mo tiisetsa: “Khaitseli ea hao o tla tsoha.” Ha a bontša tumelo ea hae tsohong e tlang, Jesu o ile a ’molella ka ho hlaka: “Ke ’na tsoho le bophelo; ea lumelang ho ’na, leha a shoele, o tla phela.”—Johanne 11:20-25.

Ha Jesu a fihla lebitleng, o ile a laela hore lejoe le koetseng monyako oa lona le tlosoe. Pele Maretha o ile a pheha khang: “Morena, o se a nkha; hobane e se e le la bone a le mona.” Empa Jesu o ile a mo tiisetsa: “Na ha kea ka ka u bolella hore, ekare ha u lumela, u tla bona khanya ea Molimo na?” Joale, ka mor’a hore a rapele ka lentsoe le phahameng, o ile a laela: “Lazaro, tsoa moo!” Ha Jesu a fana ka taelo eo Lazaro o ile a tsoa, esita le hoja a ne a shoele matsatsi a mane!—Johanne 11:38-44.

Na Kannete ho Etsahetse?

Tlaleho ea ho tsoha ha Lazaro e hlahisoa ka hare ho Molaetsa o Molemo oa Johanne e le ’nete ea histori. Makolopetso a totobetse hoo e ke keng ea e-ba setšoantšo feela. Ho belaella hore kannete hoo ho etsahetse ke ho belaella mehlolo eohle ea Bibele, ho akarelletsa tsoho ea Jesu Kreste ka boeena.c ’Me ho latola tsoho ea Jesu ke ho latola tumelo ea Bokreste ka kakaretso.—1 Ba-Korinthe 15:13-15.

Ha e le hantle, haeba u amohela boteng ba Molimo, ha ua lokela ho ba le bothata ba letho ba ho lumela tsoho. Ho etsa mohlala: Motho a ka hatisa theipi ea video bakeng sa thato le tlhaloso ea hae ea ho qetela ea hore na lefa la hae le ajoe joang, ’me ka mor’a hore a shoe beng ka eena le metsoalle ea hae ba ka ’mona le ho mo utloa ha a ntse a hlalosa hore na ho etsoe joang ka lefa la hae. Lilemong tse lekholo tse fetileng, ntho e joalo e ne e ke ke ea nahanoa ho hang. ’Me ho batho ba bang bao hona joale ba phelang likarolong tse hōle tsa lefatše, “mohlolo” oa ho hatisa ha video ke oo ba ke keng ba o utloisisa. Haeba batho ba ka sebelisa melao-motheo ea saense e entsoeng ke ’Mōpi bakeng sa ho hlahisa bocha ketsahalo e ka bonoang le e ka utluoang joalo, na ’Mōpi a ke ke a khona ho etsa ho fetang hoo hōle? Ka hona, na hase ho utloahalang hore Ea bōpileng bophelo a ka khona ho tsosa motho ka ho hlahisa botho ba hae hape ’meleng o bōpiloeng bocha?

Mohlolo oa ho khutlisetsoa ha Lazaro bophelong o ile oa sebeletsa ho hōlisa tumelo ho Jesu le tsohong. (Johanne 11:41, 42; 12:9-11, 17-19) Ka tsela e amang maikutlo o boetse o senola boikemisetso le takatso ea Jehova le Mora oa hae ea ho tsosa bafu.

‘Molimo o Tla ba le Tlholohelo’

Boitšoaro ba Jesu lefung la Lazaro bo senola kameho e mofuthu ea Mora oa Molimo. Maikutlo a hae a tebileng ketsahalong ena a bontša ka ho hlaka takatso ea hae e matla ea ho tsosa bafu. Rea bala: “Maria, ha a fihla moo Jesu a neng a le teng ’me a ’mona, a oela maotong a hae, a re ho eena: ‘Morena, hoja u ne u le teng mona, khaitseli ea ka e ka be e sa shoa.’ Ka hona, Jesu ha a ’mona a lla le Bajode ba tlileng le eena ba lla, a feheloa moeeng ’me a khathatseha; ’me o ile a re: ‘Le ’mehile hokae?’ Ba re ho eena: ‘Morena, tloho u tl’o bona.’ Jesu o ile a itšela ka likhapha. Ka hona Bajode ba ile ba qala ho re: ‘Bonang, ke kameho e mofuthu hakaakang eo a neng a e-na le eona ho eena!’”—Johanne 11:32-36, NW.

Qenehelo ea Jesu e tlohang botebong ba pelo mona e bontšoa ke lipolelo tse tharo: “feheloa,” “khathatseha,” le ho “itšela ka likhapha.” Mantsoe a puo ea pele-pele a sebelisitsoeng ke moapostola Johanne ha a tlaleha ketsahalo ena e amang maikutlo a bontša tekanyo eo Jesu a neng a thetsehile maikutlo ho fihlela ho eona.

Lentsoe la Segerike le fetoletsoeng e le “feheloa” le tsoa ho ketso (em·bri·maʹo·mai) e bontšang ho thetseha habohloko kapa ho tebileng. Mohlalosi oa Bibele William Barclay o re: “Segerikeng se amoheloang se tloaelehileng tšebeliso ea ka mehla ea [em·bri·maʹo·mai] ke ea ha pere e ntša moea ka linko ka matla. Mona e ka bolela feela hore Jesu o ile a nkoa ke boikutlo ka ho tebileng hoo a ileng a feheloa ho tsoa pelong ea Hae e se ka morero.”

Polelo e fetoletsoeng e le “khathatseha” e tsoa lentsoeng la Segerike (ta·rasʹso) le bontšang ho ferekana. Ho latela The New Thayer’s Greek-English Lexicon of the New Testament, le bolela “ho tlisetsa motho pherekano ka pelong, . . . ho ama ka bohloko bo boholo kapa mesarelo.” Polelo “itšela ka likhapha” e tsoa ketsong ea Segerike (da·kryʹo) e bolelang “ho tšolla likhapha, ho lla motho a khutsitse.” Sena se fapane le ho “lla” ha Maria le Bajode ba neng ba e-na le eena, ho boletsoeng ho Johanne 11:33. Mono lentsoe la Segerike (le nkiloeng ho klaiʹo) le sebelisitsoeng le bolela ho lla ka mokhoa o utloahalang kapa ka lentsoe le phahameng.d

Ka hona, Jesu o ne a thetsehile maikutlo ka ho tebileng ka baka la lefu la motsoalle oa hae ea ratehang Lazaro esita le ho bona khaitseli’a Lazaro e lla. Pelo ea Jesu e ne e ferekane ke boikutlo hoo mahlo a hae a ileng a tšoloha likhapha. Ho tsotehang ka ho fetisisa ke hore pejana Jesu o ne a ile a khutlisetsa ba bang ba babeli bophelong. ’Me ketsahalong ena o ne a ikemiselitse ka ho felletseng ho etsa ho tšoanang ka Lazaro. (Johanne 11:11, 23, 25) Empa, o ile “a itšela ka likhapha.” Ka hona, ho khutlisetsa batho bophelong hase tloaelo feela ho Jesu. Maikutlo a hae a mofuthu le a tebileng joalokaha a bonahalitsoe ketsahalong ena a bontša ka ho hlakileng takatso ea hae e matla ea ho etsolla tšenyo e bakiloeng ke lefu.

Kaha Jesu ke ‘setšoantšo sa boleng ba Jehova Molimo,’ ka nepo re ka lebella ho tšoanang ho Ntate oa rōna oa leholimo. (Ba-Heberu 1:3) Mabapi le boikemisetso ba Jehova ka boeena ba ho tsosa bafu, monna ea tšepahalang Jobo o ile a re: “Hoja motho ea shoang a ka boela a phela, . . . u no u tla bitsa, ’me ke ne ke tla araba, ’me u no u tla hloloheloa mosebetsi oa matsoho a hao.” (Jobo 14:14, 15) Lentsoe la puo ea pele-pele le fetoletsoeng e le “u tla hloloheloa” le bolela taba-tabelo le takatso e matla. (Genese 31:30; Pesaleme ea 84:3, TLP) Ka ho hlakileng, e tlameha e be Jehova o lebelletse tsoho ka cheseho.

Na kannete re ka lumela tšepiso ea tsoho? Ha ho pelaelo hore Jehova le Mora oa hae ba ikemiselitse ho e phethahatsa e bile ba ka ho khona. See se bolela eng ho uena? U na le tebello ea ho kopanngoa hape le baratuoa ba hao hona mona lefatšeng tlas’a maemo a khotso!

Eo ke eona tšepo ea Roberta hona joale (ea boletsoeng sehloohong se ka pele). Lilemo tse ’maloa ka mor’a lefu la ’mè oa hae, Lipaki tsa Jehova li ile tsa mo thusa hore a ithute Bibele ka hloko. Oa hopola: “Ka mor’a hore ke ithute ka tšepo ea tsoho, ke ile ka lla. E ne e le ho babatsehang ho tseba hore ke tla bona ’mè hape.” Haeba pelo ea hao e laba-labela ka ho tšoanang ho bona moratuoa oa hao hape, ha ho pelaelo hore u tla batla ho ithuta ho eketsehileng ka tebello ena e tsotehang. Bonnete ba tšepo ena bo hlalositsoe ka makolopetso a eketsehileng maqepheng 18-28 a makasine ena.

[Mongolo o botlaaseng ba leqephe]

[Setšoantšo se leqepheng la 5]

Ho tsosa ha Jesu morali oa Jairuse ho fana ka motheo oa ho lumela tsohong e tlang ea bafu

[Setšoantšo se leqepheng la 6]

Jesu o ne a thetsitsoe maikutlo ka ho tebileng ke lefu la Lazaro

[Setšoantšo se leqepheng la 7]

Thabo ea bao e tla ba lipaki tsa tsoho e tla tšoana le thabo ea mohlolohali oa Naine ha Jesu a tsosa mora oa hae ea shoeleng