Lumella Lentsoe la Molimo ho Khantša Tsela ea Hao
“Lentsoe la hao ke . . . leseli tseleng ea ka.”—PESALEME EA 119:105.
1, 2. Lentsoe la Jehova le tla khantša tsela ea rōna maemong afe?
LENTSOE la Jehova le tla khantša tsela ea rōna haeba re le lumella ho etsa joalo. Hore re thabele leseli le joalo la moea, re lokela ho khothalla ho ithuta Lentsoe la Molimo le ngotsoeng ’me re sebelise keletso ea lona. Ke ka mor’a ho etsa joalo feela re ka ikutloang joaloka mopesaleme ha a ne a re: “Lentsoe la hao ke lebone la leoto la ka, ke leseli tseleng ea ka.”—Pesaleme ea 119:105.
2 Joale a re hlahlobeng Pesaleme ea 119:89-176. Litemana tsee tse hlophisitsoeng ka likarolo tse 11 li fupere boitsebiso bo bongata hakaakang! Li ka re thusa ho lula tseleng e isang bophelong bo sa feleng.—Matheu 7:13, 14.
Ke Hobane’ng ha re Lokela ho Rata Lentsoe la Molimo?
3. Pesaleme ea 119:89, 90 e bontša joang hore re ka tšepa lentsoe la Molimo?
3 Ho rata lentsoe la Jehova ho etsa hore motho a tsitse moeeng. (Pesaleme ea 119:89-96) Mopesaleme o ile a bina a re: “Jehova, lentsoe la hao le eme maholimong, ho isa nakong e sa lekanyetsoang. . . . U tiisitse lefatše, e le hore le ka lula le eme.” (Pesaleme ea 119:89, 90) Tumellanong le lentsoe la Molimo—e leng ‘litaelo tsa hae tse hlomamisitsoeng tsa maholimo’—letsatsi, khoeli le linaleli li potoloha li sa etse phoso ’me lefatše le tiisitsoe ka thata ka ho sa feleng. (Jobo 38:31-33; Pesaleme ea 104:5) Re ka tšepa lentsoe le leng le le leng le tsoang molomong oa Jehova; seo Molimo a se buang ‘ka sebele se tla atleha’ hore morero oa hae o phethahale.—Esaia 55:8-11.
4. Ho rata lentsoe la Molimo ho thusa bahlanka ba hae ba mahlorehong joang?
4 Mopesaleme a ka be a ‘timetse mahlorehong a hae haeba a ne a sa rate molao oa Molimo.’ (Pesaleme ea 119:92) O ne a sa hlorisoe ke basele; o ne a hloiloe ke batlōli ba molao ba Baiseraele. (Levitike 19:17) Empa sena ha sea ka sa mo sithabetsa, kaha o ne a rata molao oa Molimo o matlafatsang. Ha a le Korinthe, moapostola Pauluse o ne a le ‘likotsing har’a barab’abo ba bohata,’ bao mohlomong ba neng ba akarelletsa ‘baapostola ba lokileng ho tlōla’ ba neng ba batla ho mo qosa. (2 Bakorinthe 11:5, 12-14, 26) Leha ho le joalo, Pauluse o ile a tsoela pele a phela moeeng hobane o ne a rata lentsoe la Molimo. Kaha re rata Lentsoe la Jehova le ngotsoeng ebile re sebelisa seo le se bolelang, re rata barab’abo rōna. (1 Johanne 3:15) Esita le ha lefatše le ka re hloea, seo ha se re lebatse litaelo leha e le life tsa Molimo. Re tsoela pele ho etsa thato ea hae re le bonngoeng bo lerato le barab’abo rōna ha re ntse re lebeletse ho sebeletsa Jehova ka ho sa feleng re nyakaletse.—Pesaleme ea 119:93.
5. Morena Asa o ile a batla Jehova joang?
5 E le ho bontša boinehelo ba rōna ho Jehova, re ka rapela joaloka Mopesaleme ra re: “’Na ke oa hao. Ak’u mpholose, hobane ke batlile litaelo tsa hao.” (Pesaleme ea 119:94) Morena Asa o ile a batla Molimo ’me a ntša bokoenehi ka metso Juda. Sebokeng se seholo se neng se tšoeroe ka selemo sa bo15 sa puso ea Asa (963 B.C.E.), baahi ba Juda ba ile “ba kena selekaneng sa ho batla Jehova.” Molimo o ile a ‘etsa hore ba mo fumane’ ’me “a tsoela pele ho ba fa phomolo ka hohle.” (2 Likronike 15:10-15) Mohlala ona o lokela ho khothatsa leha e le bafe ba suthetseng hōle le phutheho ea Bokreste hore ba boele ba batle Molimo. O tla hlohonolofatsa ba boelang ba qalisa ho kopanela le batho ba hae ka mafolofolo a be a ba sireletse.
6. Re tla sireletsoa kotsing ea moea ha re etsa eng?
6 Lentsoe la Jehova le fana ka bohlale bo ka re sireletsang kotsing ea moea. (Pesaleme ea 119:97-104) Litaelo tsa Molimo li re hlalefisa ho feta lira tsa rōna. Ho ela likhopotso tsa hae hloko ho re fa temohisiso, ’me ‘ho boloka litaelo tsa hae ho etsa hore re itšoare ka kutloisiso ho feta banna ba baholo.’ (Pesaleme ea 119:98-100) Haeba lipolelo tsa Jehova li ‘thella mahalapeng a rōna ho feta mahe a linotši melomong ea rōna,’ re tla hloea “tsela e ’ngoe le e ’ngoe ea bohata” re be re e qobe. (Pesaleme ea 119:103, 104) Sena se tla re sireletsa kotsing ea moea ha re kopana le batho ba ikhohomosang, ba bohale bo tšosang le ba sa tšabeng Molimo matsatsing ana a ho qetela.—2 Timothea 3:1-5.
Lebone la Maoto a Rōna
7, 8. Tumellanong le Pesaleme ea 119:105, re lokela ho etsa’ng?
7 Lentsoe la Molimo ke mohloli o tšepahalang oa leseli la moea kamehla. (Pesaleme ea 119:105-112) Ebang re Bakreste ba tlotsitsoeng kapa re metsoalle ea bona ea “linku tse ling,” re phatlalatsa hore: “Lentsoe la hao ke lebone la leoto la ka, ke leseli tseleng ea ka.” (Johanne 10:16; Pesaleme ea 119:105) Lentsoe la Molimo le tšoana le lebone le khantšang tsela ea rōna, e le hore re se ke ra khoptjoa ’me ra oa moeeng. (Liproverbia 6:23) Leha ho le joalo, re le batho ka bomong re lokela ho lumella lentsoe la Jehova ho ba lebone la maoto a rōna.
8 Re lokela ho ba le boikemisetso joaloka moqapi oa Pesaleme ea 119. O ne a ikemiselitse hore a se ke a kheloha litaelo tsa Molimo. O ile a re: “Ke hlapantse, ’me ke tla phetha, hore ke boloke liqeto [tsa Jehova] tsa boahloli tse lokileng.” (Pesaleme ea 119:106) Le ka mohla ha rea lokela ho khella fatše bohlokoa ba ho ithuta Bibele kamehla le ho ba le karolo libokeng tsa Bokreste.
9, 10. Re tseba joang hore batho ba inehetseng ho Jehova ba ka ‘hlahlathela litaelong tsa hae,’ hona re ka qoba see joang?
9 Mopesaleme ha aa ka a ‘hlahlathela litaelong tsa Molimo,’ empa seo se ka etsahalla motho ea inehetseng ho Jehova. (Pesaleme ea 119:110) Le hoja Morena Solomone e ne e le setho sa sechaba se inehetseng ho Jehova ebile qalong a ile a etsa lintho tumellanong le bohlale boo a bo filoeng ke Molimo, o ile a hlahlathela. “Esita le eena basali basele ba ile ba etsa hore a etse sebe” ka ho mo susumetsa hore a rapele melimo ea bohata.—Nehemia 13:26; 1 Marena 11:1-6.
10 Satane, “ea tšoasang linonyana,” o cheha maraba a mangata. (Pesaleme ea 91:3) Ka mohlala, motho e mong eo pele e neng e le morapeli-’moho le rōna a ka ’na a leka ho re susumelletsa hore re hlahlathele tseleng ea leseli la moea re ee lefifing la bokoenehi. Har’a Bakreste ba neng ba le Thyatire, ho ne ho e-na le “mosali eane Jezebele,” mohlomong e le sehlopha sa basali ba neng ba ruta ba bang borapeli ba litšoantšo le ho etsa bohlola. Jesu ha aa ka a mamella bobe bo joalo, le rōna ha rea lokela ho bo mamella. (Tšenolo 2:18-22; Juda 3, 4) Ka hona, a re rapelleng thuso ea Jehova hore re se ke ra hlahlathela litaelong tsa Molimo empa re lule leseling la lentsoe la hae.—Pesaleme ea 119:111, 112.
Ho Tšehetsoa ke Lentsoe la Molimo
11. Ho ea ka Pesaleme ea 119:119, Molimo o talima ba khopo joang?
11 Molimo o tla re tšehetsa haeba ho se mohla re khelohang melao ea hae ea tsamaiso. (Pesaleme ea 119:113-120) Ha re amohele “ba lipelo li sa fellang,” feela joalokaha kajeno Jesu a sa amohele ba ipolelang hore ke Bakreste empa ba le foofo. (Pesaleme ea 119:113; Tšenolo 3:16) Kaha re sebeletsa Jehova ka lipelo tsohle tsa rōna, ke eena ‘sebaka seo re ipatang ho sona’ ’me o tla re tšehetsa. O tla ‘hasanya bohle ba khelohang melao ea hae ea tsamaiso’ ka ho qhekella le ho bua leshano. (Pesaleme ea 119:114, 117, 118; Liproverbia 3:32) O talima ba khopo joalo e le “manya a okolehang”—e leng litšila tse tlosoang litšepeng tsa bohlokoa tse kang silevera le khauta. (Pesaleme ea 119:119; Liproverbia 17:3) E se eka kamehla re ka bontša hore re rata likhopotso tsa Molimo, hobane ruri ha re batle ho kopanyelletsoa le ba khopo qubung ea manya a timetso!
12. Ke hobane’ng ha ho le bohlokoa ho tšaba Jehova?
12 Mopesaleme o ile a re: “Nama ea ka e bile le boikutlo bo sisimosang ka lebaka la ho u tšaba [Jehova].” (Pesaleme ea 119:120) E le hore Molimo a re tšehetse joaloka bahlanka ba hae, ke habohlokoa ho bontša hore re mo tšaba ka tsela e loketseng, ka ho qoba lintho tseo a sa li amoheleng. Ho tšaba Jehova ka tsela e nang le tlhompho ho ile ha etsa hore Jobo a phele ka ho loka. (Jobo 1:1; 23:15) Ho tšaba Molimo ho ka re nolofalletsa ho tiisetsa tseleng eo a e amohelang ho sa tsotellehe hore na re tlameha ho mamella eng. Leha ho le joalo, hore re be le mamello ho hlokahala hore ka tumelo re etse lithapelo tse tiileng.—Jakobo 5:15.
Rapela ka Tumelo
13-15. (a) Ke hobane’ng ha re ka ba le tumelo ea hore lithapelo tsa rōna li tla arajoa? (b) Ho ka etsahala’ng haeba re sa tsebe hore na re re’ng ha re rapela? (c) Bolela mohlala oa kamoo Pesaleme ea 119:121-128 e ka amanang le ‘lipōbōli tsa rōna tse sa buuoeng’ ha re rapela.
13 Re ka rapela re kholisehile hore Molimo o tla nka bohato molemong oa rōna. (Pesaleme ea 119:121-128) Joaloka mopesaleme, re kholisehile hore lithapelo tsa rōna li tla arajoa. Hobane’ng? Hobane re rata litaelo tsa Molimo “ho feta khauta, esita le khauta e hloekisitsoeng.” Ho feta moo, ‘re nka litaelo tsohle tsa Molimo mabapi le lintho tsohle e le tse nepahetseng.’—Pesaleme ea 119:127, 128.
14 Jehova o utloa likōpo tsa rōna tse matla hobane re rapela ka tumelo ebile re boloka litaelo tsa hae ka hloko. (Pesaleme ea 65:2) Empa ho thoe’ng haeba ka linako tse ling re e-ba le mathata a re tsietsang hoo re sa tsebeng hore na re re’ng ha re rapela? Joale “moea o re kōpela ka tieo ka lipōbōli tse sa buuoeng.” (Baroma 8:26, 27) Linakong tse joalo, Molimo o amohela lipolelo tse ka Lentsoeng la hae e le lithapelo tse emetseng litlhoko tsa rōna.
15 Mangolo a na le lithapelo tse ngata le mehopolo e amanang le ‘lipōbōli tsa rōna tse sa buuoeng.’ Ka mohlala, nahana ka Pesaleme ea 119:121-128. Tsela eo litaba li hlalositsoeng ka eona mona e ka ’na ea tšoanela maemo ao re leng ho ’ona. Ka mohlala, haeba re tšaba ho etsetsoa bolotsana, re ka kōpa hore Molimo a re thuse ka tsela eo mopesaleme a ileng a mo kōpa ka eona. (Temana ea 121-123) Ha re re mohlomong re lokela ho etsa qeto e boima haholo. Joale re ka rapella hore moea oa Jehova o re thuse ho hopola likhopotso tsa hae le ho li sebelisa. (Temana ea 124 le ea 125) Le hoja re ‘hloile tsela e ’ngoe le e ’ngoe ea bohata,’ ho ka ’na ha hlokahala ho kōpa Molimo hore a nke bohato molemong oa rōna e le hore re se ke ra inehella teko e itseng ea ho tlōla molao oa hae. (Temana ea 126-128) Haeba re bala Bibele letsatsi le letsatsi, re ka ’na ra hopola litemana tse molemo tjena ha re kōpa Jehova ka tieo.
Re Thusoa ke Likhopotso Tsa Jehova
16, 17. (a) Ke hobane’ng ha re hloka likhopotso tsa Molimo, hona re lokela ho li talima joang? (b) Ba bang ba ka ’na ba re talima joang, empa ke’ng hoo e hlileng e leng habohlokoa?
16 Hore Molimo a mamele lithapelo tsa rōna le hore a re amohele, re lokela ho ela likhopotso tsa hae hloko. (Pesaleme ea 119:129-136) Kaha rea lebala, re hloka likhopotso tse babatsehang tsa Jehova tse re hopotsang taeo ea hae le litaelo tsa hae. Ho hlakile hore re ananela leseli la moea le khantšoang ke kutloisiso e ’ngoe le e ’ngoe e ncha ea mantsoe a Molimo. (Pesaleme ea 119:129, 130) Hape re motlotlo hore ebe Jehova o re ‘khantšelitse sefahleho sa hae’ ka ho re amohela, le hoja ‘melapo ea metsi e theoha mahlong a rōna’ hobane ba bang ba tlōla molao oa hae.—Pesaleme ea 119:135, 136; Numere 6:25.
17 Re kholisehile hore Molimo o tla tsoela pele ho re amohela haeba re iphaphatha ka likhopotso tsa hae tse lokileng. (Pesaleme ea 119:137-144) Joaloka bahlanka ba Jehova, rea lumela hore o na le tokelo ea ho re hlokomelisa likhopotso tsa hae tse lokileng le ho re fa tsona e le litaelo tseo a lebeletseng hore re li mamele. (Pesaleme ea 119:138) Kaha mopesaleme o ne a mamela litaelo tsa Molimo, ke hobane’ng ha ile a re: “Ha ke oa bohlokoa ’me kea eiseha”? (Pesaleme ea 119:141) Kamoo ho bonahalang kateng, o ne a bua ka tsela eo lira tsa hae li mo talimang ka eona. Ba bang ba ka ’na ba re khesa haeba re sa sekisetse ha re emela se lokileng. Leha ho le joalo, hoo e hlileng e leng habohlokoa ke hore Jehova oa re amohela hobane re phela tumellanong le likhopotso tsa hae tse lokileng.
Re Sireletsehile Ebile re Khotsong
18, 19. Ho ba le phello efe ha re boloka likhopotso tsa Molimo?
18 Ho boloka likhopotso tsa Molimo ho etsa hore re lule re le haufi le eena. (Pesaleme ea 119:145-152) Kahobane re ela likhopotso tsa Jehova hloko, re ikutloa re lokolohile ho ipiletsa ho eena ka lipelo tsohle tsa rōna, ’me re ka lebella hore a re utloe. Re ka ’na ra tsoha “esale hoseng ka meso” ’me ra hoeletsa ho kōpa thuso. Ke nako e ntle hakaakang ea ho rapela! (Pesaleme ea 119:145-147) Molimo o haufi le rōna ka ho tšoanang hobane re qoba boitšoaro bo hlephileng ’me re talima lentsoe la hae e le ’nete, feela joalokaha Jesu a ne a etsa joalo. (Pesaleme ea 119:150, 151; Johanne 17:17) Kamano ea rōna le Jehova ea re tšehetsa lefatšeng lena la matšoenyeho ’me e tla re thusa ho pholoha ntoa ea hae e khōlō ea Armagedone.—Tšenolo 7:9, 14; 16:13-16.
19 Kahobane re hlompha lentsoe la Molimo ka ho tebileng, re thabela tšireletseho ea ’nete. (Pesaleme ea 119:153-160) Ho fapana le ba khopo, ha ‘rea kheloha likhopotso tsa Jehova.’ Kaha re rata litaelo tsa Molimo, re sireletsehile moseng oa hae o lerato. (Pesaleme ea 119:157-159) Likhopotso tsa Jehova li tsosa matla a rōna a ho hopola e le hore re hopole seo a se hlokang ho rōna maemong a itseng ka ho toba. Ka lehlakoreng le leng, litaelo tsa Molimo ke tataiso, ’me re lumela ntle ho tikatiko hore ’Mōpi oa rōna o na le tokelo ea ho re tataisa. Kaha rea hlokomela hore ‘boleng ba lentsoe la Molimo ke ’nete,’ le hore re ke ke ra tataisa mehato ea rōna ka ntle ho thuso ea hae, ka thabo re amohela tataiso ea Molimo.—Pesaleme ea 119:160; Jeremia 10:23.
20. Ke hobane’ng ha re e-na le “khotso e ngata”?
20 Ho rata molao oa Jehova ho re tlisetsa khotso e ngata. (Pesaleme ea 119:161-168) Mahloriso ha a re amohe “khotso ea Molimo” eo ho seng letho le ka bapisoang le eona. (Bafilipi 4:6, 7) Re ananela liqeto tsa boahloli tsa Jehova hoo re mo rorisang khafetsa ka lebaka la tsona—“ka makhetlo a supileng ka letsatsi.” (Pesaleme ea 119:161-164) Mopesaleme o ile a bina a re: “Ba ratang molao oa hao ba na le khotso e ngata, ha ho khopiso ho bona.” (Pesaleme ea 119:165) Haeba re rata molao oa Jehova re le batho ka bomong ebile re o boloka, re ke ke ra khopeha moeeng ka lebaka la seo motho e mong a se etsang kapa ra khopisoa ke ntho leha e le efe e ’ngoe.
21. Ke mehlala efe ea Mangolo e bontšang hore ha rea lokela ho khopeha ha ho hlaha mathata ka phuthehong?
21 Batho ba bangata ba boletsoeng ka Bibeleng ha baa ka ba lumella ntho leha e le efe hore e be khopiso ho bona ho ea ho ile. Ka mohlala, Gaiase, monna oa Mokreste, ha aa ka a khopeha empa o ile a “tsoela pele ho tsamaea ’neteng” ho sa tsotellehe boitšoaro ba Diotrefe ea sa tšabeng Molimo. (3 Johanne 1-3, 9, 10) Pauluse o ile a eletsa basali ba Bakreste, Evodia le Syntike “hore ba be le kelello e tšoanang Moreneng,” kaha mohlomong ho ne ho hlahile mathata pakeng tsa bona. Kamoo ho bonahalang kateng, ba ile ba thusoa ho rarolla bothata ba bona ’me ba tsoela pele ho sebeletsa Jehova ka botšepehi. (Bafilipi 4:2, 3) Kahoo ha rea lokela ho khopeha ha ho hlaha mathata a itseng ka phuthehong. A re tsepamiseng likelello tsa rōna ho bolokeng litaelo tsa Jehova, re ntse re hopola hore ‘litsela tsohle tsa rōna li ka pel’a hae.’ (Pesaleme ea 119:168; Liproverbia 15:3) Kahoo ha ho letho le tla re amoha “khotso e ngata” le sa khaotse.
22. (a) Haeba re mamela Molimo, re ka thabela tokelo efe? (b) Re lokela ho talima ba bang ba hlahlathetseng phuthehong ea Bokreste joang?
22 Haeba re mamela Jehova kamehla, re tla ba le tokelo ea ho tsoela pele re mo rorisa. (Pesaleme ea 119:169-176) Ha re phela tumellanong le melao ea Molimo ea tsamaiso, ha re thabele tšireletseho ea moea feela empa ‘melomo ea rōna e bua ka thoriso ea Jehova e sa khaotse.’ (Pesaleme ea 119:169-171, 174) Ena ke tokelo e khōlō ka ho fetisisa eo re ka bang le eona matsatsing ana a ho qetela. Mopesaleme o ne a batla ho lula a phela le ho rorisa Jehova, empa ka tsela e itseng e sa boleloang, o ne a ‘hlahlathetse joaloka nku e lahlehileng.’ (Pesaleme ea 119:175, 176) E ka ’na eaba ba bang ba hlahlathetseng phuthehong ea Bokreste ba ntse ba rata Molimo ’me ba ka rata ho mo rorisa. Ka hona, a re etseng sohle seo re ka se khonang ho ba thusa e le hore ba ka boela ba fumana tšireletseho ea moea ’me ba latsoa thabo ea ho rorisa Jehova le batho ba hae.—Baheberu 13:15; 1 Petrose 5:6, 7.
Leseli le Tsoelang Pele Tseleng ea Rōna
23, 24. U fumane melemo efe Pesalemeng ea 119?
23 Pesaleme ea 119 e ka re tsoela molemo ka litsela tse sa tšoaneng. Ka mohlala, e ka etsa hore re itšetlehe ka Molimo haholoanyane, kaha e bontša hore ho ‘tsamaea molaong oa Jehova’ ho hlahisa thabo ea ’nete. (Pesaleme ea 119:1) Mopesaleme o re hopotsa hore ‘boleng ba lentsoe la Molimo ke ’nete.’ (Pesaleme ea 119:160) Ka sebele sena se lokela ho eketsa kananelo ea rōna ka Lentsoe lohle la Molimo le ngotsoeng. Ho thuisa ka Pesaleme ea 119 ho lokela ho re susumelletsa hore re khothalle ho ithuta Mangolo. Khafetsa, mopesaleme o ile a kōpa Molimo ka matla a re: “Nthute melao ea hao ea tsamaiso.” (Pesaleme ea 119:12, 68, 135) O ile a boela a kōpa ka tieo a re: “Nthute molemo, ho ba le kelello le tsebo, etsoe ke bontšitse tumelo litaelong tsa hao.” (Pesaleme ea 119:66) Re lokela ho rapela ka tsela e tšoanang.
24 Thuto ea Molimo e etsa hore re be le kamano e haufi le Jehova. Khafetsa mopesaleme o ipitsa mohlanka oa Molimo. Ha e le hantle, o bitsa Jehova ka mantsoe a amang maikutlo o re: “’Na ke oa hao.” (Pesaleme ea 119:17, 65, 94, 122, 125; Baroma 14:8) Ke tokelo e kaakang ho sebeletsa Jehova le ho mo rorisa u le e mong oa Lipaki tsa hae! (Pesaleme ea 119:7) Na u sebeletsa Molimo ka thabo u le ’moleli oa ’Muso? Haeba ho joalo, kholiseha hore Jehova o tla tsoela pele ho u tšehetsa le ho u hlohonolofatsa mosebetsing ona o tlotlehang haeba kamehla u tšepa lentsoe la hae ’me u le lumella ho khantša tsela ea hao.
U ka Araba Joang?
• Ke hobane’ng ha re lokela ho rata lentsoe la Molimo?
• Lentsoe la Molimo le re tšehetsa joang?
• Likhopotso tsa Jehova li re thusa ka litsela life?
• Ke hobane’ng ha batho ba Jehova ba sireletsehile ebile ba le khotsong?
[Setšoantšo se leqepheng la 16]
Lentsoe la Molimo ke mohloli oa leseli la moea
[Setšoantšo se leqepheng la 17]
Haeba re rata likhopotso tsa Jehova, ha ho mohla a tla re talima re le “manya a okolehang”
[Litšoantšo tse leqepheng la 18]
Haeba re bala Bibele letsatsi le letsatsi, re ka hopola litemana tse molemo habonolo ha re rapela