Ba Ile ba Arabela ka Tsela e se Nang Boithati Leratong la Molimo
“Batho a ba ke ba lebohe Jehova bakeng sa mosa oa hae o lerato le bakeng sa mesebetsi ea hae e hlollang ho bara ba batho.”—PESALEME EA 107:8, “NW.”
1. Moapostola Johanne o hatisa tšoaneleho ea lerato lengolong la hae la pele joang?
“MOLIMO ke lerato.” Mantsoe ao a bolela ho hongata hakaakang! Ha ho makatse hore e be moapostola Johanne o ile a utloa ho hlokahala hore a a phete lengolong la hae la pele. (1 Johanne 4:8, 16, NW) Hase feela hore Jehova Molimo ke lerato empa hape ke boleng bo tletseng lerato, kapa mothofatso oa lerato.
2. Molimo o bontšitse lerato ka litsela life ha o bōpa monna le mosali ’me o ba fa seo ba se hlokang?
2 Nahana ka lerato leo Molimo o le bonahalitseng ka tsela eo o re bōpileng ka eona. Mantsoe a Davida a tletseng kananelo ke a loketseng haholo. Joaloka mopesaleme ea bululetsoeng, o ile a re: “Ke tla u roka hobane ka tsela e susumetsang tšabo ke entsoe ka mokhoa o hlollang.” (Pesaleme ea 139:14, NW) E le hore re ka phela bophelo bo botle ’me ra phela ka thabo, Molimo o entse lintho tse sa feleng tse thabisang tseo re ka li thabelang ka thuso ea mecha ea rōna e mehlano ea kutlo—ho bona, ho utloa, ho latsoa, ho fofonela, le ho ama. Ke botle bo bokaakang boo re bo bonang pōpong e re potolohileng! Limela le liphoofolo tse ngata tse fapa-fapaneng ke tse hlollang hakaakang, re se re sa re letho ka botle ba libōpeho le litšobotsi tsa batho! Molimo o boetse o entse hore re khone ho fumana mefuta e mengata e fapa-fapaneng le e thabisang ka ho fetisisa ea litholoana, meroho, le lijo tse ling. (Pesaleme ea 104:13-16) Ka lebaka le letle, moapostola Pauluse o ile a hopotsa baahi ba Lystra ea boholo-holo hore Molimo ‘o entse batho hantle, oa le sitsa ka lipula tsa leholimo le ka lilemo tsa nala, ’me oa tlatsa lipelo tsa lōna ka lijo le ka thabo.’—Liketso 14:17.
3. Molimo o re file matla afe a hlollang?
3 Nahana hape ka mahlohonolo ’ohle a tsamaeang le bophelo bo thabileng ba lelapa. Ho feta moo, nahana ka menyaka eohle eo re ka khonang ho e thabela ka lebaka la matla a rōna a kelello le a maikutlo: ho nahana, ho beha mabaka, ho hopola, letsoalo, ’me haholo-holo ho khona ho rapela—tseo kaofela ha tsona li re behang boemong bo phahametseng ba liphoofolo hōle; hape re ke ke ra hlokomoloha menyaka eo ’mino o ka re fang eona. Limpho tsena le tse ling tse ngata ke lipontšo tsa lerato la Molimo ho rōna.
4. Ke lipontšo life tsa lerato la Molimo tseo batho ba li latsoitseng ho tloha ha batsoali ba bona ba pele ba sitoa?
4 Ha ho pelaelo hore Adama le Eva ba ne ba thabela menyaka e mengata e fapa-fapaneng boemong ba bona bo phethahetseng serapeng sa Edene. (Genese 2:7-9, 22, 23) Empa ha ba hlōleha ho arabela ka tsela e se nang boithati bopaking bohle ba lerato la Molimo leo ba neng ba le thabela, na Molimo o ile oa lahla moloko oa batho? Le hanyenyane! Ka potlako o ile oa etsa tokisetso ea ho lokisa liphoso tsohle tse bakiloeng ke tšito ea batsoali ba rōna ba pele. (Genese 3:15) Jehova o boetse o bonahalitse lerato ka hore ka tiisetso o mamelletse bana ba sa phethahalang ba Adama. (Ba-Roma 5:12) O ba mamelletse halelele hakae? Ka lilemo tse ka bang 6 000 ho fihlela joale! Ka ho khethehileng Molimo o bonahalitse lerato ha o sebelisana le bahlanka ba oona. Mantsoe ana ke ’nete: “Jehova, Jehova, Molimo o mohau le o lereko, o liehang ho halefa le o tletseng mosa o lerato le ’nete, o bolokelang ba likete mosa o lerato, o tšoarelang phoso le tšito le sebe.”—Exoda 34:6, 7, NW.
5. Jehova o ile a bontša tiisetso e lerato joang ha a sebelisana le sechaba sa Iseraele?
5 E, ka sebele Jehova Molimo o ile a bontša tiisetso e khōlō litšebelisanong tsa hae le Baiseraele ho tloha ha a ba bōpa hore e be sechaba mosikong oa Thaba ea Sinai ho fihlela ha bofetoheli ba bona bo mo tlama hore a ba lahle ka ho felletseng. Joalokaha re bala ho 2 Likronike 36:15, 16: “Jehova, Molimo oa bo-ntat’a bona, a ’na a romela ho bona ka manģosa a hae, a ’na a a roma e sa le hosasa, hobane a na a utloela sechaba sa hae le bolulo ba hae bohloko. Empa ba ’na ba soma ka manģosa a Molimo, ba nyelisa lipolelo tsa oona, ba tšeha baprofeta ba oona, ho fihlela khalefo ea Jehova e ba e phahamela sechaba sa oona, ho se ho se kamoo ho ka thusoang kateng.” Empa ho na le ba ileng ba arabela ka tsela e se nang boithati leratong la Jehova Molimo. E le hore re bone hore na ba ile ba etsa hoo joang, joale a re ke re hlahlobeng bophelo ba ba bang ba batho bana. Sena se tla rala motheo oa ho bontša kamoo rōna ka borōna re ka arabelang ka teng leratong la Jehova ka litsela tse hlileng li sebetsang.
Kamoo Moshe a Ileng a Arabela ka Tsela e se Nang Boithati
6. Mohlala oa Moshe e bile o hlahelletseng ka litsela life, ’me o ile a latsoa lerato la Molimo maemong afe?
6 Moshe e bile mohlala o hlahelletseng oa motho ea ileng a arabela ka tsela e se nang boithati leratong la Molimo. Ke menyetla e meholo hakaakang e neng e larile ka pel’a Moshe joaloka mora ea thotsoeng oa morali oa Faro! Empa o ile a khetha “ho tšoenngoa le sechaba sa Molimo, e seng ho thabela menate ea libe e felang kapele; a kholoa hoba sekhobo sa Kreste ke monono o fetisang matlotlo a Egepeta.” (Ba-Heberu 11:25, 26) Ka lekhetlo le leng, Moshe o ne a batla ho lokolla banab’abo, Baiseraele, botlamuoeng ba Egepeta. Empa ha baa ka ba ananela boiteko ba hae, ebile e ne e-s’o be nako e loketseng ea Molimo bakeng sa ho ba lokolla. (Liketso 7:23-29) Leha ho le joalo, ka lebaka la tumelo ea Moshe le takatso ea hae e se nang boithati ea ho thusa banab’abo, mashome a lilemo hamorao Jehova o ile a mo fa matla a ho etsa mehlolo e mengata le ho sebeletsa Baiseraele ka lilemo tse 40 e le moprofeta, moahloli, monehi-molao, le mokena-lipakeng oa Hae. Maemong ana, Moshe o ile a feta har’a liketsahalo tse ngata tseo ho tsona Jehova a ileng a bontša lerato ho eena le ho Baiseraele ba habo.
7. Moshe o ile a arabela joang lipontšong tsa lerato la Molimo?
7 Moshe o ile a arabela joang leratong la Molimo le moseng oa oona o sa tšoanelang? Na o ile a ‘amohela mosa o sa tšoanelang oa Jehova eaba ha a hlokomele morero oa oona’? (2 Ba-Korinthe 6:1, NW) Le hanyenyane! Moshe o ile a arabela ka tsela e se nang boithati lipontšong tsa lerato la Jehova ho eena ka hore a tsamaisoe ke Molimo ka ho felletseng. O ne a talimile ho Jehova ka linako tsohle a bile a e-na le kamano e haufi-ufi le Moetsi oa hae. Molimo o ile oa rorisa Moshe hakaakang ha o ne o khalemela Aarone le Miriame bakeng sa ho nyatsa-nyatsa ngoan’abo bona! E, Jehova o ile a bua le Moshe ‘ka molomo o bapileng le molomo’ a ba a mo lumella hore a bone ‘ponahalo ea Jehova.’ (Numere 12:6-8, NW) Ho sa tsotellehe litokelo tse ngata tseo Moshe a neng a e-na le tsona, o ile a tsoela pele ho ba motho ea ikokobelitseng ho feta bohle ’me a phetha litaelo tsa Jehova ‘kamoo a mo laetseng kateng.’—Exoda 40:16; Numere 12:3, NW.
8. Moshe o ile a bontša joang hore ruri o ne a tsamaisoa ke Molimo?
8 Moshe o ile a boela a bontša hore o ne a tsamaisoa ke Molimo ka tsela e se nang boithati ka kameho eo a ileng a e bontša bakeng sa lebitso la Jehova, botumo ba hae, le borapeli ba hae bo hloekileng. Ka hona, liketsahalong tse peli ka katleho Moshe o ile a kōpa Jehova ho atolosetsa mohau oa hae ho Iseraele hobane lebitso la Molimo le ne le ameha. (Exoda 32:11-14; Numere 14:13-19) Ha Baiseraele ba ameha borapeling ba litšoantšo ba melimo ea manamane, Moshe o ile a bontša cheseho ea hae bakeng sa borapeli bo hloekileng ha a hoeletsa: “Mang le mang ea reng ka Jehova a tle ho ’na!” Ka mor’a moo, Moshe le ba nang le eena ba ile ba bolaea barapeli ba melimo ea litšoantšo ba 3 000. ’Me ka lilemo tse 40 o ile a mamella sechaba se tletseng lipelaelo le bofetoheli. Ka sebele ha ho pelaelo hore Moshe o ile a arabela ka tsela e se nang boithati lipontšong tsa lerato la Molimo, a beha mohlala o motle bakeng sa rōna kajeno.—Exoda 32:26-28; Deuteronoma 34:7, 10-12.
Karabelo e Ntle ea Davida
9. (a) Davida o ile a arabela joang leratong la Jehova Molimo? (b) Joaloka Davida, re ka tlotlisa Jehova ka lintho tsa bohlokoa joang?
9 Motho e mong ea hlahelletseng ka Bibeleng ea behileng mohlala o motle oa ho arabela ka tsela e se nang boithati leratong la Molimo e bile mopesaleme Davida, morena oa bobeli oa Iseraele. Cheseho ea hae bakeng sa lebitso la Jehova e ile ea mo susumelletsa hore a loantše senatla sa Mofilista se somang, Goliathe, seo Molimo o ileng oa etsa hore Davida a se hlōle. (1 Samuele 17:45-51) Cheseho eona eo e ile ea susumelletsa Davida ho tlisa areka ea selekane Jerusalema. (2 Samuele 6:12-19) Hape na takatso ea Davida ea ho hahela Jehova tempele e ne e se pontšo e ’ngoe ea cheseho le kananelo ea hae bakeng sa lerato la Molimo le molemo oa oona? Ka sebele e ne e le eona. Ho haneloa ka tokelo eo ha hoa ka ha nyahamisa Davida ho lokisetseng morero oo le ho tlotliseng Jehova ka hore eena ka boeena a nehelane ka gauda, silevera, le mahakoe a bohlokoa a theko e boima. (2 Samuele 7:1-13; 1 Likronike 29:2-5) Karabelo e tšoanang e se nang boithati leratong la Molimo e lokela ho re susumelletsa ho ‘tlotlisa Jehova ka lintho tsa rōna tsa bohlokoa’ ka ho sebelisa matlotlo a rōna a bonahalang ho ntšetsa pele lithahasello tsa ’Muso.—Liproverbia 3:9, 10, NW; Mattheu 6:33.
10. Tsela ea Davida ke e tšoanelehang hore re ka e etsisa ntlheng efe?
10 Le hoja Davida a ile a etsa liphoso tse tebileng, bophelong bohle ba hae o ile a ipaka e le ‘monna ea lumellanang le pelo ea Jehova.’ (1 Samuele 13:14, NW; Liketso 13:22, NW) Lipesaleme tsa hae li tletse lipolelo tsa kananelo bakeng sa lerato la Molimo. The International Standard Bible Encyclopœdia e bolela hore Davida “o ile a ’na a tlala teboho e eketsehileng ho feta leha e le mang e mong ea boletsoeng Lengolong le Halalelang.” Mopesaleme Asafe o boletse hore Molimo o ile “a khetha Davida, mohlanka oa hae, a mo nka merakeng ea linku; . . . e tle e be molisa oa Jakobo, sechaba sa hae, le oa Iseraele, lefa la hae. ’Me Davida a ba moalosi oa bona ka pelo e hloekileng.” (Pesaleme ea 78:70-72) Ruri, tsela ea Davida ke eo re lokelang ho e etsisa.
Jesu Kreste, Mohlala oa Rōna o Phethahetseng
11, 12. Jesu o ile a bontša joang hore ka sebele o ne a tsamaisoa ke Molimo?
11 Ka ho hlakileng, Jesu Kreste ke mohlala o motle ka ho fetisisa oa Mangolo oa motho ea arabetseng ka tsela e se nang boithati leratong la Molimo. See se ile sa susumelletsa Jesu hore a etse eng? Pele ho tsohle, o ile a susumelletseha ho fa Jehova boinehelo bo khethehileng. Ha ho pelaelo hore Jesu o ne a tsamaisoa ke Molimo ka ho felletseng. Kananelo bakeng sa lerato la Ntate oa hae oa leholimo le molemo oa hae e ile ea mo susumelletsa hore ruri e be motho oa moea. O ne a e-na le kamano e haufi-ufi haholo le Molimo. Jesu e ne e le motho oa thapelo, ’me o ne a rata ho buisana le Ntate oa hae oa leholimo. Ka makhetlo a mangata re bala hore Kreste o ile a rapela. Ka lekhetlo le leng o ile a qeta bosiu bohle a ntse a rapela. (Luka 3:21, 22; 6:12; 11:1; Johanne 17:1-26) Ha Jesu a arabela leratong la Molimo, o ile a phelela ’nete ea hore ‘motho a ke ke a phela ke bohobe feela, empa o tla phela le ke polelo tsohle tse tsoang molomong oa Molimo.’ Ha e le hantle, lijo tsa hae e ne e le ho etsa thato ea Ntate oa hae. (Mattheu 4:4; Johanne 4:34) Na ha rea lokela ho arabela ka ho tšoanang leratong la Molimo, re o fe boinehelo bo khethehileng?
12 Jesu Kreste, a arabela ka tsela e se nang boithati leratong la Molimo, ka mehla o ne a lebisa tlhokomelo ho Molimo oa hae le Ntate oa hae. Ha motho e mong a bitsa Jesu “Moruti ea molemo,” o ile a hana ’me a re: “Ha ho ea molemo, ha e se a le mong, e leng Molimo.” (Luka 18:18, 19) Khafetsa Jesu o ile a hatisa hore o ne a ke ke a etsa letho leo a iqapelang lona. Le ka mohla ha aa ka a tlohela ho sebelisa monyetla o hlahang ho phahamisa lebitso la Ntate oa hae, ’me ka ho loketseng o ile a qala thapelo ea hae ea mohlala ka kōpo ena: “Lebitso la hao a le ke le khethehe.” O ile a rapela: “Ntate, tlotlisa lebitso la hao.” ’Me nakoana pele Kreste a e-shoa, o ile a re ho Ntate oa hae: “Ke u tlotlisitse lefatšeng, ke phethile mosebetsi oo u nong u ’neile oona hore ke o etse.” (Mattheu 6:9; Johanne 12:28; 17:4) Ka sebele, ha re arabela leratong la Molimo, re lokela ho batla ho tlotlisa Jehova, re rapelle ho khethoa ha lebitso la hae le halalelang.
13. Lerato la Molimo le ile la susumelletsa Jesu hore a etse joang?
13 Joale, ka kōpo hlokomela tsela ea bobeli eo ka eona karabelo e se nang boithati leratong la Molimo e ileng ea susumetsa Jesu. E ile ea etsa hore a rate ho loka ’me a hloee bokhopo, joalokaha ho ne ho boletsoe esale pele Pesalemeng ea 45:7. (Ba-Heberu 1:9) O ne ‘a tšepahala, a hloka mano, a sa silafala, a arohile ho baetsalibe.’ (Ba-Heberu 7:26, NW) Jesu o ile a phephetsa bahanyetsi ba hae ba lonya hore ba mo kholise hore o entse sebe, empa ba ile ba hloleha ho etsa joalo. (Johanne 8:46) Liketsahalong tse peli, ho hloea bokhopo ha hae ho ile ha etsa hore a hloekise tempele ka ho leleka balumeli ba meharo. (Mattheu 21:12, 13; Johanne 2:13-17) ’Me Jesu o ile a tsoa baeta-pele ba bolumeli ba baikaketsi habohloko hakaakang, a ba a ba bolella hore e ne e le ba Diabolose!—Mattheu 6:2, 5, 16; 15:7-9; 23:13-32; Johanne 8:44.
14. Ha Jesu a arabela leratong la Jehova, o ile a sebelisana le barutuoa ba hae joang?
14 Tsela e ’ngoe hape eo lerato la Jehova le ileng la susumetsa Jesu ka eona e ka bonoa litšebelisanong tsa hae le baapostola ba hae le barutuoa ba bang. O ne a e-na le lerato, tiisetso, le mamello tse kaakang ho bona! E tlameha e be ba ile ba ’meha tekong e khōlō ka ho tsekisana ha bona, ho pheha khang ea hore na e moholo e ne e le ofe esita le bosiung boo a ekiloeng ka bona. (Luka 22:24-27) Leha ho le joalo, ka mehla Jesu o ile a iponahatsa e le ea bonolo le ea ikokobelitseng pelong. (Mattheu 11:28-30, NW) Ke ’nete hore Judase o ile a eka Jesu, Petrose o ile a mo latola hararo, le hore baapostola ba bang ba ile ba baleha ha sehlopha sa mahoo-hoo se tlil’o mo tšoara. Empa le ka mohla ha aa ka a hlonama kapa a ba le moea oa boiphetetso. Re tseba joang? Ha Jesu a boela a kopana le baapostola ba hae ka mor’a tsoho ea hae, ha aa ka a ba khalemela ka tsela e hlabang kahobane ba ile ba inehela tšabong. Ho e-na le hoo, o ile a ba tšelisa le ho ba matlafatsa bakeng sa tšebeletso ea ’Muso e tsoelang pele.—Johanne 20:19-23.
15. Jesu o ile a sebeletsa litlhoko tsa batho tsa nama ka tsela e se nang boithati joang?
15 A re ke re nahaneng ka tsela e ’ngoe hape eo ka eona Jesu Kreste a ileng a arabela ka tsela e se nang boithati leratong la Molimo. O ile a etsa sena ka ho iketsa sehlabelo molemong oa ba bang, ho isa lefung le lihlong le le bohloko thupeng ea tlhokofatso. (Ba-Filippi 2:5-8, NW) Jesu o ile a sebeletsa litlhoko tsa nama tsa batho ka ho fepa matšoele ka mohlolo le ka ho folisa ba bangata. (Mattheu 14:14-22; 15:32-39) Ka mehla o ne a beha lithahasello tsa ba bang ka pele ho tsa hae. Ke ka lebaka leo a neng a ka re: “Liphokojoe li na le mesima, le linonyana tsa leholimo li na le matlo; empa Mor’a motho ha a na moo a ka samelang hlooho ea hae teng.” (Mattheu 8:20) Jesu o ile a ela hloko tšebetso ea moea oa Molimo o neng o e-tsoa ho eena ha a etsa lipholiso tsa mohlolo. Empa le ka mohla ha aa ka a leka ho fumana phaello ea lintho tse bonahalang ka lebaka la ho sebelisa matla a phahametseng a tlhaho, joaloka nakong ea ha mosali ea neng a tšoeroe ke ho phalla ha mali ka lilemo tse 12 a ama seaparo sa hae sa ka ntle ka tumelo ’me a fola. (Mareka 5:25-34) Ho feta moo, le ka mohla Jesu ha aa ka a sebelisa matla a phahametseng a tlhaho molemong oa hae.—Bapisa le Mattheu 4:2-4.
16. Kreste o ile a sebeletsa litlhoko tsa batho tsa moea ka litsela life?
16 Le hoja ka tsela e se nang boithati Jesu a ile a hlokomela litlhoko tsa batho tsa nama ka ho phekola maloetse a bona le ho ba fepa ka mohlolo, lebaka la sehlooho la tšebeletso ea hae ea lefatšeng e ne e le ho bolela litaba tse molemo tsa ’Muso oa Molimo, ho ruta, le ho etsa barutuoa. Ho sa tsotellehe lipholiso tsohle tse tsotehang tseo a ileng a li etsa, o ne a sa tsejoe e le Ngaka e Khōlō kapa Moetsi oa Mehlolo empa o ne a tsejoa e le Moruti ea Molemo. (Mattheu 4:23, 24; Mareka 10:17) Jesu o ne a ipitsa Moruti, joalokaha barutuoa ba hae esita le lira tsa hae ba ne ba ’mitsa joalo. (Mattheu 22:16; 26:18; Mareka 9:38) ’Me o ile a ruta linnete tse babatsehang hakaakang, joaloka tseo a li rutileng Thutong ea hae ea Thabeng! (Mattheu 5:1–7:29) Litšoantšo tsa hae e ne e le tse loketseng hakaakang, ’me lipapiso tsa hae tsa boprofeta le boprofeta bo bong e ne e le tse hlakileng hakaakang! Ha ho makatse hore e be ka lekhetlo le leng masole a neng a rometsoe ho ea tšoara Jesu a ile a sitoa ho mo tšoara!—Johanne 7:45, 46.
17. (a) Jesu o re file mohlala o phethahetseng oa lerato joang? (b) Ho tla buisanoa ka eng sehloohong se latelang?
17 Ka ntle ho pelaelo, Jesu Kreste o behile mohlala o phethahetseng oa ho arabela ka tsela e se nang boithati lipontšong tsa Molimo tsa lerato ho rōna. Jesu o ile a fa Ntate oa hae oa leholimo sebaka sa pele bophelong ba hae le linthong tseo a neng a li rata. Ka sebele o ne a rata ho loka, a sebelisana ka lerato le baapostola ba hae le barutuoa ba bang, ’me o ile a sebelisa bophelo ba hae ho sebeletseng litlhoko tsa batho tsa moea le tsa lintho tse bonahalang. Qetellong, Jesu o ile a fihla sehlohlolong sa tšebeletso ea hae ka ho fana ka bophelo ba hae e le topollo. (Mattheu 20:28) Empa ho thoe’ng ka rōna? Ke ’nete hore joaloka Moshe le Davida, ha rea phethahala. Leha ho le joalo, joalokaha sehlooho se latelang se bontša, ho na le litsela tse sebetsang tseo ka tsona re ka etsisang Ea re Behetseng Mohlala ho arabeleng ka tsela e se nang boithati lipontšong tsa lerato la Molimo.
U ne U Tla Arabela Joang?
◻ Ke hobane’ng ha ho ka thoe “Molimo ke lerato”?
◻ Moshe o ile a arabela lipontšong tsa lerato la Molimo joang?
◻ Davida o ile a arabela leratong la Jehova Molimo ka litsela life?
◻ Jesu Kreste o behile mohlala ofe ho arabeleng leratong la Molimo?
[Setšoantšo se leqepheng la 10]
Na ua tseba hore na Moshe o ile a arabela joang leratong la Molimo?
[Litšoantšo tse leqepheng la 12, 13]
Jesu o ile a arabela leratong la Molimo ka ho thusa ba bang moeeng le nameng le ka ho fana ka bophelo ba hae e le topollo