Boipolelo bo Lebisang ho Hlaphoheloeng
“HA KE ne ke khutsitse masapo a ka a ile a khathala ka lebaka la ho bobola ha ka letsatsi lohle. Etsoe bosiu le motšehare letsoho la hao le ne le le boima holim’a ka. Mongobo oa bophelo ba ka o fetotsoe joaloka mochesong o bataolang oa lehlabula.” (Pesaleme ea 32:3, 4) E ka ’na eaba mantsoe ao a amang maikutlo a bontša bohloko bo tebileng ba maikutlo ba Morena Davida oa Iseraele ea boholo-holo, bohloko boo a neng a ipaketse bona ka ho pata sebe se tebileng ho e-na le ho se bolela.
Davida e ne e le motho ea nang le bokhoni bo ikhethang. E ne e le mohlabani ea sebete, setsebi se hloahloa litabeng tsa ’muso, seroki le sebini. Leha ho le joalo, o ne a sa tšepa bokhoni ba hae, empa o ne a tšepile Molimo oa hae. (1 Samuele 17:45, 46) O ile a hlalosoa e le monna eo pelo ea hae ‘e neng e feletse ho Jehova.’ (1 Marena 11:4) Empa o ile a etsa sebe se seng se neng se lokeloa ke kahlolo ka ho khetheha, ’me mohlomong o ne a bua ka sona ka mokhoa o sa tobang ho Pesaleme ea 32. Re ka ithuta lintho tse ngata ka ho hlahloba maemo a ileng a lebisa sebeng sa hae. Re tla lemoha maraba ao re lokelang ho a qoba esita le ho bona tlhokahalo ea ho bolela libe tsa rōna e le hore re tsosolose kamano ea rōna le Molimo.
Morena ea Tšepahalang o Ile a Oela Sebeng
Sechaba sa Iseraele se ne sa loana le Baamone, empa Davida o ne a lutse Jerusalema. Mantsiboeeng a mang ha a ntse a otlolla maoto marulelong a ntlo ea hae e khōlō e ntle, o ile a bona mosali e motle a itlhatsoa ntlong e haufinyane. O ile a hlōleha ho ithiba empa a qala ho mo lakatsa ka matla. Ha Davida a fumana hore ke Bathe-sheba, mosali oa Uria, e mong oa masole lebothong la hae, o ile a laela hore a tlisoe ho eena, eaba o feba le eena. Hamorao Bathe-sheba o ile a romeletsa lentsoe ho tsebisa Davida hore o imme.—2 Samuele 11:1-5.
Davida o ne a tantetsoe ke leraba. Haeba sebe sa bona se ne se ka senoloa, ka bobeli ba ne ba tla fuoa kotlo ea lefu. (Levitike 20:10) Kahoo o ile a loha leqheka. O ile a lata Uria, monna oa Bathe-sheba, ntoeng. Ka mor’a ho mo botsa lipotso ka nako e telele mabapi le ntoa, Davida o ile a laela Uria hore a khutlele hae. Davida o ne a tšepile hore sena se ne se tla etsa hore ho bonahale eka Uria ke ntat’a ngoana oa Bathe-sheba.—2 Samuele 11:6-9.
Davida o ile a tsieleha ha Uria a sa etele mosali oa hae. Uria o ile a re ha ho utloahale hore a khutlele lapeng ha lebotho lona le ntse le hlanaka e mahlo-mafubelu. Ha lebotho la Iseraele le le ntoeng, banna ba ne ba sa kopanele liphate, esita le ho kopanela liphate le basali ba bona. Ba ne ba lokela ho hloeka ho ea ka moetlo. (1 Samuele 21:5) Joale Davida o ile a memela Uria lijong ’me a mo tahisa, empa o ile a ’na a hana ho ea lapeng ho mosali oa hae. Boitšoaro ba Uria bo tšepahalang bo ile ba tsoa sebe se tebileng sa Davida.—2 Samuele 11:10-13.
Davida o ne a ntse a tantelloa ka ho eketsehileng ke sebe sa hae. A tsielehile, o ile a bona tharollo e le ’ngoe feela. O ile a khutlisetsa Uria ntoeng a mo nehelelitse lengolo le eang ho molaoli oa lebotho, Joabe. Morero oa lengolo leo le lekhutšoanyane o ne o hlakile: “Behang Uria ka pele moo ntoa e leng boima ka ho fetisisa, ’me le ikhule ka mor’a hae, ’me o tla hlajoa a shoe.” Ka lengolo feela, ho ne ho bonahala eka morena ea matla o timme mohlala ’me a etsa hore Uria a bolaoe.—2 Samuele 11:14-17.
Hang ha nako ea hore Bathe-sheba a siamele monna oa hae e fela, Davida o ile a mo nyala. Nako e ile ea feta, eaba ngoana oa bona oa hlaha. Ka nako ena eohle, Davida o ne a khutsitse ka libe tsa hae. Mohlomong o ne a leka ho ikholisa hore liketso tsa hae li lokile. Na Uria o ne a sa shoela ntoeng ka tlhompho joaloka ba bang? Ho feta moo, na o ne a sa nyelisa morena ka ho hana ho ea ho mosali oa hae? ‘Pelo e bolotsana’ e tla sebelisa mabaka a mefuta eohle ho leka ho lokafatsa sebe.—Jeremia 17:9; 2 Samuele 11:25.
Mehato e Fosahetseng e Ileng ea Lebisa Sebeng
Ke joang Davida, ea ratang ho loka, a neng a ka itheola seriti ka bofebe le polao? Ho hlakile hore peō ea sebe sa hae e ile ea jaloa ka nako e telele. Re ka ipotsa hore na ke hobane’ng ha Davida a ne a se ’moho le banna ba hae, a ba tšehetsa ntoeng ea bona khahlanong le lira tsa Jehova. Ho e-na le hoo, Davida o ne a iketlile ntlong ea hae e ntle e khōlō moo takatso ea hae e fosahetseng ka mosali oa lesole le tšepahalang e neng e sa angoe ke se etsahalang ntoeng. Kajeno, ke tširelo hore Bakreste ba ’nete ba tšoarehe ka mafolofolo lipakaneng tsa moea tsa liphutheho tsa bona le hore ba kopanele kamehla mosebetsing oa boevangeli.—1 Timothea 6:12.
Morena oa Iseraele o ne a laetsoe hore a etse kopi ea Molao ’me a o bale letsatsi le letsatsi. Bibele e fana ka lebaka la sena: “E le hore a ka ithuta ho tšaba Jehova Molimo oa hae hore a tle a boloke mantsoe ’ohle a molao ona le melao ena ea tsamaiso ka ho e phetha; e le hore pelo ea hae e se ke ea iphahamisetsa barab’abo le hore a se ke a kheloha taelo ho ea ka ho le letona kapa ho ea ka ho le letšehali.” (Deuteronoma 17:18-20) Ho ka etsahala hore ebe Davida o ne a sa latele taelo ena ka nako ea ha a etsa libe tsena tse tebileng. Ka sebele, ho ithuta Lentsoe la Molimo kamehla le ho thuisa ka lona ho tla re lebela hore re se ke ra etsa liphoso linakong tsena tse mahlonoko.—Liproverbia 2:10-12.
Ho feta moo, molao oa ho qetela ho Melao e Leshome, ka ho khetheha o ne o itse: “U se ke ua lakatsa mosali oa oa heno.” (Exoda 20:17) Ka nako ena Davida o ne a e-na le basali ba bangata le lirethe. (2 Samuele 3:2-5) Empa sena ha sea ka sa mo sireletsa hore a se ke a lakatsa mosali e mong e motle. Tlaleho ena e re hopotsa botebo ba mantsoe a Jesu: “E mong le e mong ea ntseng a tsoela pele ho sheba mosali e le hore a be le takatso e matla bakeng sa hae o se a febile le eena ka pelong ea hae.” (Matheu 5:28) Ho e-na le ho nahana ka litakatso tse joalo tse sa lokelang, a re potlakeleng ho li tlosa likelellong tsa rōna le lipelong tsa rōna.
Pako le Mohau
Ka sebele tlaleho e hlakileng ea Bibele ka sebe sa Davida ha ea rereloa ho khotsofatsa litakatso tsa motho tsa ho kopanela liphate. Tlaleho ena e re fa monyetla oa hore re be lipaki tsa pontšo e matla le e amang maikutlo ea mohau oa Jehova oo e leng e ’ngoe ea litšoaneleho tsa hae tse hlaheletseng.—Exoda 34:6, 7.
Ha Bathe-sheba a qeta ho beleha mora, Jehova o ile a romela moprofeta Nathane hore a tobe Davida. Ena e ne e le ketso e bontšang mohau. Haeba Davida a ne a sa ka a tojoa ’me a lula a khutsitse, mohlomong a ka be a ile a thatafala tseleng ea sebe. (Baheberu 3:13) Ho thabisang ke hore Davida o ile a arabela mohaung oa Molimo. Mantsoe a Nathane a buuoeng ka bohlale empa e le ka ho hlaka a ile a tšetšetha letsoalo la Davida, ’me ka boikokobetso o ile a lumela hore o ne a sitetsoe Molimo. Ha e le hantle, Pesaleme ea 51, e buang ka sebe sa Davida le Bathe-sheba, e ile ea qaptjoa ha a qeta ho baka ’me a bolela sebe sa hae se tebileng. E se eka re ke ke ra lumella lipelo tsa rōna hore li thatafale haeba re entse sebe se tebileng.—2 Samuele 12:1-13.
Davida o ile a tšoareloa, empa ha aa ka a qobisoa kotlo kapa liphello tsa sebe sa hae. (Liproverbia 6:27) Ke joang a neng a ka li qobisoa? Haeba Molimo a ne a ka hlokomoloha ntho e ’ngoe le e ’ngoe, o ne a tla be a sekiselitse litekanyetso tsa hae. E ne e tla ba o hlōlehile ho phetha boikarabelo ba hae joaloka Moprista ea Phahameng Eli, ea ileng a khalemela bara ba hae ba khopo ka monyebe eaba o ba tlohella hore ba tsoele pele ka liketso tsa bona tse fosahetseng. (1 Samuele 2:22-25) Leha ho le joalo, Jehova ha a thibele ea bakileng hore a fumane mosa oa Hae o lerato. Mohau oa hae, joaloka metsi a khathollang, a pholileng, o tla thusa ea entseng phoso hore a mamelle liphello tsa sebe. Mofuthu oa tšoarelo ea Molimo le botsoalle bo hahang le barapeli-’moho li ka tsosolosa bomoea ba ea entseng phoso. E, motheong oa thekollo ea Kreste, ea bakileng a ka latsoa “maruo a mosa oa [Molimo] o sa tšoanelang.”—Baefese 1:7.
“Pelo e Hloekileng” le “Moea o Mocha”
Ka mor’a hore Davida a ipolele, ha aa ka a inehella boikutlong bo fosahetseng ba hore ha a na thuso. Lipolelo tsa hae lipesalemeng tse buang ka boipolelo tseo a ileng a li ngola li bontša ho imoloha hoo a ileng a ba le hona le boikemisetso ba hae ba ho sebeletsa Molimo ka botšepehi. Ka mohlala, sheba Pesaleme ea 32. Temaneng ea 1, rea bala: “Ho thaba eo bofetoheli ba hae bo tšoaretsoeng, eo sebe sa hae se koahetsoeng.” Ho sa tsotellehe hore na sebe se tebile hakae, ho ka ba le phello e thabisang haeba motho a bakile ka sebele. Tsela e ’ngoe ea ho bontša hore motho o bakile ka sebele ke ha a amohela boikarabelo bo feletseng ba liketso tsa hae, joaloka Davida. (2 Samuele 12:13) Ha aa ka a leka ho itokafatsa ka pel’a Jehova kapa a leka ho beha ba bang molato. Temana ea 5 e re: “Qetellong ka bolela sebe sa ka ho uena, ’me phoso ea ka ha kea ka ka e koahela. Ke ile ka re: ‘Ke tla ipolela ho Jehova ka lebaka la litlōlo tsa ka.’ Ua tšoarela phoso ea libe tsa ka.” Ho ipolela ho se nang boikaketsi ho tlisa khatholoho, hoo ho seng ho sa hlokahale hore motho a ’ne a tšoenngoe ke letsoalo la hae ka liphoso tse fetileng.
Ka mor’a ho kōpa tšoarelo ea Jehova ka tieo, Davida o ile a kōpa: “Molimo, bōpa ka ho ’na pelo e hloekileng, u kenye ka hare ho ’na moea o mocha, o tiileng.” (Pesaleme ea 51:10) Ho kōpa “pelo e hloekileng” le “moea o mocha” ho bontša hore Davida o ne a elelloa tšekamelo ea boetsalibe ka ho eena le hore o ne a hloka thuso ea Molimo hore a hloekise pelo ea hae ’me a qalise bocha. Ho e-na le ho iqenehela, o ne a ikemiselitse ho tsoela pele ka tšebeletso ea hae ho Molimo. O ile a rapela: “Jehova, e se eka u ka bula molomo oa ka, e le hore molomo oa ka o ka bolela thoriso ea hao.”—Pesaleme ea 51:15.
Jehova o ile a arabela joang ka pako e tiileng ea Davida le boiteko ba hae bo tiileng ba ho mo sebeletsa? O ile a tiisetsa Davida ka mantsoe ana a thobang: “Ke tla etsa hore u be le temohisiso ’me ke u rupele ka tsela eo u lokelang ho tsamaea ka eona. Ke tla u fa keletso leihlo la ka le le holim’a hao.” (Pesaleme ea 32:8) Mona Jehova o fana ka tiisetso ea kameho ea hae maikutlong le litlhokong tsa ea bontšitseng pako. Jehova o ile a nka mehato ea ho fa Davida temohisiso e eketsehileng, matla a ho bona botebo ba lintho. Haeba nakong e tlang a ne a ka tobana le teko, o ne a tla khona ho lemoha liphello tsa liketso tsa hae le kamoo li tla ama ba bang kateng, ’me o ne a tla khona ho nka khato ka masene.
Ntho ena e etsahetseng bophelong ba Davida ke khothatso ho bohle ba oetseng sebeng se tebileng. Ka ho bolela libe tsa rōna le ho bontša pako e tiileng, re ka boela ra fumana letlotlo la rōna la bohlokoa ka ho fetisisa, kamano ea rōna le Jehova Molimo. Bohloko ba nakoana le lihlong tseo ho ka ’nang ha hlokahala hore re li mamelle li boea ka koano ha li bapisoa le bohloko bo boholo bo bakoang ke ho khutsa, kapa phello e tebileng ea ho itumella hore re thatafale tseleng ea bofetoheli. (Pesaleme ea 32:9) Ho e-na le hoo, re ka latsoa tšoarelo e mofuthu ea Molimo ea lerato, ea mohau, “Ntate oa mehauhelo e bonolo le Molimo oa matšeliso ’ohle.”—2 Bakorinthe 1:3.
[Setšoantšo se leqepheng la 31]
Davida o ne a tšepile hore o tla qoba liphello tsa sebe sa hae ka ho etsa hore Uria a bolaoe