A re Phahamiseng Lebitso la Jehova Hammoho

“Tlotlisang Jehova hammoho le ’na, a re phahamiseng lebitso la hae hammoho.”—PESALEME EA 34:3.

 1. Jesu o ile a beha mohlala ofe o babatsehang nakong ea tšebeletso ea hae ea lefatšeng?

BOSIUNG ba la 14 Nisane, 33 C.E., Jesu le baapostola ba hae ba ile ba binela Jehova lithoriso hammoho ba le kamoreng e ka holimo ea ntlo e itseng Jerusalema. (Matheu 26:30) E ne e le lekhetlo la ho qetela leo ka lona Jesu a neng a tla etsa seo a e-na le baapostola ba hae. Leha ho le joalo, ho ne ho loketse hore a phethe seboka seo a neng a ba tšoaretse sona ka tsela eo. Ho tloha qalong ea tšebeletso ea hae ea lefatšeng ho ea qetellong, Jesu o ile a rorisa Ntate oa hae ’me a tsebahatsa lebitso la Hae ka cheseho. (Matheu 4:10; 6:9; 22:37, 38; Johanne 12:28; 17:6) Bonneteng, o ile a lumellana le memo ena e mofuthu ea mopesaleme, e reng: “Tlotlisang Jehova hammoho le ’na, a re phahamiseng lebitso la hae hammoho.” (Pesaleme ea 34:3) Oo ke mohlala o babatsehang hakaakang oo re lokelang ho o latela!

2, 3. (a) Re tseba joang hore Pesaleme ea 34 e na le boprofeta ba bohlokoa? (b) Sehloohong see le se latelang re tla tšohla eng?

² Lihora tse ’maloa ka mor’a ho bina lithoriso le Jesu, moapostola Johanne o ile a bona ketsahalo e ’ngoe e fapaneng le eo haholo. O ile a bona Morena oa hae le linokoane tse peli ba bolaeloa lithupeng tsa tlhokofatso. Masole a Baroma a ile a roba meomo ea linokoane tseo tse peli e le hore li shoe ka potlako. Leha ho le joalo, Johanne o tlaleha hore masole ao ha aa ka a roba meomo ea Jesu. Ha masole ao a tla ho Jesu, o ne a se a ntse a shoele. Kosepeleng ea hae, Johanne o ile a bontša hore ketsahalo eo e ne e phethahatsa karolo e ’ngoe ea Pesaleme ea 34, e reng: “Ha ho lesapo la hae le tla silakanngoa.”—Johanne 19:32-36; Pesaleme ea 34:20, Septuagint.

³ Pesaleme ea 34 e na le lintlha tse ling tse ngata tseo Bakreste ba li thahasellang. Kahoo, sehloohong sena le se latelang, re tla sekaseka maemo ao Davida a ileng a ngola pesaleme ena a le ho ’ona ebe re tšohla mantsoe a eona a khothatsang.

Davida o Baleha Saule

 4. (a) Ke hobane’ng ha Davida a ile a tlotsoa hore e be morena oa ka moso oa Iseraele? (b) Ke hobane’ng ha Saule a ile a ‘rata Davida haholo’?

⁴ Ha Davida a sa le monyenyane, Saule e ne e le morena oa Iseraele. Leha ho le joalo, Saule ha aa ka a mamela eaba Jehova oa mo lahla. Ke ka lebaka leo moprofeta Samuele a ileng a re ho eena: “Jehova o hahotse bobusi ba Iseraele ho uena kajeno, ’me ka sebele o tla bo fa oa heno ea molemo ho u feta.” (1 Samuele 15:28) Hamorao Jehova o ile a laela Samuele hore a tlotse Davida, e leng mora oa ho fela oa Jese, hore e be morena oa Iseraele ea tla latela. Khabareng, kaha Morena Saule o ne a amohiloe moea oa Molimo, o ne a tetebela maikutlo habohloko. Davida, e le sebini se hloahloa, o ile a isoa Gibea ho ea sebeletsa morena, ’me ’mino oa Davida o ne o thoba Saule maikutlo, hoo Saule a ileng “a mo rata haholo.”—1 Samuele 16:11, 13, 21, 23.

 5. Ke hobane’ng ha tsela eo Saule a neng a ikutloa ka eona ka Davida e ile ea fetoha, hona seo se ile sa qobella Davida ho etsa’ng?

⁵ Ha nako e ntse e feta, Jehova o ile a tšehetsa Davida. Jehova o ile a mo thusa ho hlōla seqhenqha sa Mofilista se bitsoang Goliathe ’me a tšehetsa Davida hoo a ileng a rorisoa Iseraeleng ka lebaka la ho ba mohlabani ea hloahloa. Leha ho le joalo, Saule o ile a ba mōna ha a bona Jehova a hlohonolofatsa Davida, eaba o qala ho hloea Davida. Ka makhetlo a mabeli ha Davida a ntse a letsetsa Saule harepa, morena eo o ile a mo betsa ka lerumo. Ka makhetlo ao a mabeli, Davida o ile a khona ho le qoba. Lekhetlong la boraro ha Saule a leka ho mo bolaea, Davida, e leng morena oa ka moso oa Iseraele, o ile a elelloa hore o lokela ho baleha e le hore a pholose bophelo ba hae. Kaha Saule o ne a sa phetse ho leka ho mo tšoara le ho mo bolaea, qetellong Davida o ile a etsa qeto ea ho balehela ka ntle ho naha ea Iseraele.—1 Samuele 18:11; 19:9, 10.

 6. Ke hobane’ng ha Saule a ile a laela hore baahi ba Nobe ba bolaoe?

⁶ Ha a lebile moeling oa Iseraele, Davida o ile a fapohela motseng oa Nobe, moo tabernakele ea Jehova e neng e le teng. Ho hlakile hore ha Davida a ntse a baleha o ne a felehelitsoe ke bahlankana ba bang, ’me o ne a batla lijo bakeng sa hae le bona. Saule o ile a utloa hore moprista ea phahameng o ne a file Davida le banna ba hae lijo le sabole eo Davida a neng a e nkile ho Goliathe ha a qeta ho shoa. A halefile, Saule o ile a re ho bolaoe baahi bohle ba motse oo hammoho le baprista ba 85.—1 Samuele 21:1, 2; 22:12, 13, 18, 19; Matheu 12:3, 4.

O Phonyoha Lefu Hape

 7. Ke hobane’ng ha Gathe e ne e se sebaka se sireletsehileng seo Davida a neng ka ipata ho sona?

⁷ Ha Davida a tloha Nobe, o ile a balehela naheng ea Bafilista e ka bophirimela e bohōle ba lik’hilomithara tse ka bang 40 ’me a batla tšireletso ho Morena Akishe, motseng oa Gathe, e leng hahabo Goliathe. Mohlomong Davida o ne a nka hore Gathe hase moo Saule a ka mo batlang teng. Leha ho le joalo, ka mor’a nako e seng kae, bahlanka ba morena oa Gathe ba ile ba tseba Davida. Ha Davida a utloela hore ba mo tsebile, o ile “a tšoha haholo ka lebaka la Akishe morena oa Gathe.”—1 Samuele 21:10-12.

 8. (a) Pesaleme ea 56 e re bolella eng ka se ileng sa etsahalla Davida ha a le Gathe? (b) Davida o ile a phonyoha lefu joang ka lesoba la nale?

⁸ Joale Bafilista ba ile ba tšoara Davida. E ka ’na eaba ke nakong ena moo Davida a ileng a qapa pesaleme e tsoang pelong eo ho eona a ileng a ipiletsa ho Jehova, a re: “U tšele meokho ea ka ka lekukeng la hao.” (Pesaleme ea 56:8 le sehloohoana) Kahoo o ile a bontša hore o kholisehile hore Jehova a ke ke a lebala mesarelo ea hae empa o tla mo hlokomela ka lerato le ho mo sireletsa. Davida o ile a boela a loha leano la ho qhekella morena oa Bafilista. O ile a ikhakanya hore eke ha aa hlaphoheloa kelellong. Ha Morena Akishe a mo bona, o ile a khalemela bahlanka ba hae ka ho mo tlisetsa motho ea ‘hlanyang.’ Ho hlakile hore Jehova o ile a hlohonolofatsa leano la Davida. Davida o ile a lelekoa motseng oo, eaba o phonyoha lefu hape ka lesoba la nale.—1 Samuele 21:13-15.

9, 10. Davida o ile a ngola Pesaleme ea 34 ka lebaka lefe, hona e ka ’na eaba o ne a nahanne ka bo-mang ha a qapa pesaleme ee?

⁹ Bibele ha e bolele hore na balateli ba Davida ba ile ba balehela Gathe le eena kapa ba ile ba lula ba lebetse metseng ea Iseraele e haufi le moo e le hore ba ka mo sireletsa. Ho sa tsotellehe seo, e tlameha ebe ba ile ba thabela ho boela ba kopana ha Davida a ba phetela kamoo Jehova a ileng a boela a mo lopolla kateng. Ketsahalo eo e bile motheo oa Pesaleme ea 34, joalokaha ho bontšitsoe sehloohoaneng sa eona. Litemaneng tsa pele tse supileng tsa pesaleme ena, Davida o rorisa Molimo hobane a mo lopolotse ebile o mema balateli ba hae hore ba ikopanye le eena e le hore ba phahamise Jehova e le Molopolli e Moholo oa batho ba Hae.—Pesaleme ea 34:3, 4, 7.

¹⁰ Davida le banna ba hae ba ile ba fumana setšabelo lehaheng la Adulame lithabeng tsa Iseraele, hoo e ka bang lik’hilomithara tse 15 ka bochabela ho Gathe. Ha a le moo, Baiseraele ba neng ba sa khotsofalla maemo pusong ea Morena Saule ba ile ba qala ho tla ho eena le ho ikopanya le eena. (1 Samuele 22:1, 2) E ka ’na eaba Davida o ne a nahanne ka batho bao ha a ne a qapa mantsoe a Pesaleme ea 34:8-22. Likhopotso tse fumanoang litemaneng tseo ke tsa bohlokoa le ho rōna kajeno, ’me ka sebele re tla rua molemo ha pesaleme ena e monate e tšohloa ka ho qaqileng.

Na Takatso ea Hao e ka Sehloohong e Tšoana le ea Davida?

11, 12. Re na le mabaka afe a ho rorisa Jehova kamehla?

¹¹ “Ke tla boka Jehova ka linako tsohle; thoriso ea hae e tla ba molomong oa ka kamehla.” (Pesaleme ea 34:1) Kaha Davida e ne e le mophaphathehi, e tlameha ebe o ne a amehile ka litlhoko tse ngata tsa nama empa joalokaha mantsoe ana a bontša, ha aa ka a lumella lintho tsa letsatsi le letsatsi tseo a neng a amehile ka tsona hore li tapise boikemisetso ba hae ba ho rorisa Jehova. Oo ke mohlala o motle hakaakang haeba re hlaheloa ke mathata! Ebang re sekolong, mosebetsing, re na le Bakreste-’moho le rōna kapa re tšebeletsong ea phatlalatsa, takatso ea rōna e ka sehloohong e lokela ho ba ho rorisa Jehova. Ak’u nahane ka mabaka a mangata ao re nang le ’ona a ho etsa joalo! Ka mohlala, ho na le letoto le sa feleng la lintho tseo re ka ithutang tsona ra ba ra li thabela mesebetsing e hlollang ea pōpo ea Jehova. ’Me nahana ka seo a se finyeletseng ka karolo e lefatšeng ea mokhatlo oa hae o hlophisitsoeng! Mehleng ea kajeno, Jehova o sebelisitse batho ba tšepahalang, le hoja ba sa phethahala, e le hore ba finyelle lintho tse khōlō. Na mesebetsi ea Molimo e ka bapisoa le ea batho bao lefatše le ba entseng melimo? Na ha u lumellane le Davida, ea ileng a boela a ngola tjee: “Ha ho le ea mong ea tšoanang le uena har’a melimo, Jehova, hape ha ho mesebetsi leha e le efe e tšoanang le ea hao”?—Pesaleme ea 86:8.

¹² Joaloka Davida, re ikutloa re tlamehile ho rorisa Jehova kamehla ka lebaka la mesebetsi ea hae e ke keng ea lekanngoa. Ho feta moo, re thabisoa ke ho tseba hore hona joale ’Muso oa Molimo o matsohong a Mojalefa oa ka ho sa feleng oa Davida, Jesu Kreste. (Tšenolo 11:15) Sena se bolela hore tsamaiso ena ea lintho e haufi le ho fela. Bokamoso ba ka ho sa feleng ba batho ba fetang limilione tse likete tse tšeletseng bo kotsing. Ha ho mohla ho kileng ha hlokahala hakana hore batho ba bolelloe ka ’Muso oa Molimo le seo o tla se etsetsa moloko oa batho haufinyane le ho ba thusa hore ba ikopanye le rōna e le hore re rorise Jehova hammoho. Ka sebele boikarabelo ba rōna bo boholo bophelong e lokela ho ba ho sebelisa monyetla o mong le o mong hore re khothalletse batho ba bang hore ba amohele “litaba tsena tse molemo” esere ba haha serobe phiri e se e jele.—Matheu 24:14.

13. (a) Davida o ile a ithorisa ka mang, hona ke batho ba mofuta ofe ba ileng ba nka bohato? (b) Kajeno ba bonolo ba huleloa ka phuthehong ea Bokreste joang?

¹³ “Moea oa ka o tla ithorisa ka Jehova; ba bonolo ba tla utloa ’me ba tla thaba.” (Pesaleme ea 34:2) Mona Davida ha aa ka a ithorisa ka ntho leha e le efe eo a e finyeletseng. Ka mohlala, ha aa ka a ithorisa ka tsela eo a ileng a qhekella morena oa Gathe ka eona. O ile a elelloa hore Jehova o mo sirelelitse ha a le Gathe le hore ke Jehova ea mo thusitseng ho pholoha. (Liproverbia 21:1) Kahoo, Davida ha aa ka a ithorisa, empa o ile a ithorisa ka Jehova. Ka lebaka lena, ba bonolo ba ile ba huleloa ho Jehova. Ka ho tšoanang, Jesu o ile a phahamisa lebitso la Jehova, ’me sena se ile sa etsa hore batho ba bonolo le ba ratang ho ithuta ba huleloe ho Eena. Kajeno, ba bonolo lichabeng tsohle ba huleloa ka phuthehong ea Bakreste ba tlotsitsoeng e teng lichabeng tsohle, eo Jesu e leng Hlooho ea eona. (Bakolose 1:18) Lipelo tsa batho bao ba bonolo lia ameha ha ba utloa bahlanka ba ikokobelitseng ba Molimo ba tlotlisa lebitso la hae le ha ba utloa molaetsa oa Bibele, oo moea o halalelang oa Molimo o ba thusang ho o utloisisa.—Johanne 6:44; Liketso 16:14.

Liboka li Matlafatsa Tumelo ea Rōna

14. (a) Na Davida o ne a khotsofaletse ho rorisa Jehova boinotšing feela? (b) Jesu o behile mohlala ofe mabapi le liboka tsa borapeli?

¹⁴ “Tlotlisang Jehova hammoho le ’na, a re phahamiseng lebitso la hae hammoho.” (Pesaleme ea 34:3) Davida o ne a sa khotsofalla ho rorisa Jehova boinotšing feela. Ka lerato o ile a mema metsoalle ea hae hore e phahamise lebitso la Molimo le eena. Ka ho tšoanang, Jesu Kreste, e leng Davida e Moholoanyane, o ne a thabela ho rorisa Jehova phatlalatsa—synagogeng ea motse, meketeng e neng e ba tempeleng ea Molimo Jerusalema le ha a ne a e-na le balateli ba hae. (Luka 2:49; 4:16-19; 10:21; Johanne 18:20) Re na le monyetla o babatsehang hakaakang oa ho latela mohlala oa Jesu oa hore neng kapa neng ha ho khoneha re rorise Jehova re e-na le balumeli-’moho le rōna, haholo-holo hona joale kaha re “bona letsatsi le ntse le atamela”!—Baheberu 10:24, 25.

15. (a) Se hlahetseng Davida se ile sa ama banna ba hae joang? (b) Re rua molemo joang ka ho ba teng libokeng tsa rōna?

¹⁵ “Ke ile ka botsa Jehova, eaba oa nkaraba, a ntopolla linthong tsohle tseo ke li tšabang.” (Pesaleme ea 34:4) Phihlelo ena e ne e le ea bohlokoa ho Davida. Kahoo, o ile a tsoela pele a re: “Enoa ea hlorileng o ile a hooa, ’me Jehova a utloa. A mo pholosa mahlomoleng ’ohle a hae.” (Pesaleme ea 34:6) Ha re e-na le balumeli-’moho le rōna, re ba le menyetla e mengata ea ho ba phetela liphihlelo tse khothatsang tsa kamoo Jehova a re thusitseng kateng ho mamella maemo a thata. Ho etsa joalo ho matlafatsa tumelo ea balumeli-’moho le rōna, feela joalokaha mantsoe a Davida a ile a matlafatsa tumelo ea balateli ba hae. Boemong boo Davida a neng a le ho bona, balateli ba hae “ba ile ba talima [Jehova] ’me ba tlala thabo, lifahleho tsa bona li ne li ke ke tsa hlajoa ke lihlong.” (Pesaleme ea 34:5) Le hoja ba ne ba ntse ba baleha Morena Saule, ha baa ka ba hlajoa ke lihlong. Ba ne ba kholisehile hore Molimo o ne a tšehetsa Davida, ’me lifahleho tsa bona li ne li tletse thabo. Ka tsela e tšoanang, batho ba sa tsoa thahasella hammoho le bao e seng e bile Bakreste ba ’nete ka nako e telele ba itšetlehile ka Jehova hore a ba tšehetse. Kaha ka bomong ba bone kamoo a ba thusitseng kateng, lifahleho tsa bona tse tletseng thabo li bontša hore ba ikemiselitse ho lula ba tšepahala.

Ananela Thuso ea Mangeloi

16. Jehova o sebelisitse mangeloi a hae joang ho re pholosa?

¹⁶ “Lengeloi la Jehova le hlomme liahelo ho pota-pota ba mo tšabang, lea ba pholosa.” (Pesaleme ea 34:7) Davida o ne a sa nke hore ke eena feela eo Jehova a ka mo pholosang. Ke ’nete hore Davida e ne e le motlotsuoa oa Jehova, e le morena oa ka moso oa Iseraele; empa o ne a tseba hore Jehova o sebelisa mangeloi a hae ho lebela barapeli bohle ba hae ba tšepahalang, ho sa tsotellehe hore na ke ba phahameng kapa ba tlaase. Le mehleng ea rōna, Jehova o ’nile a sireletsa barapeli ba ’nete. Mebuso e ’nile ea leka makhobonthithi a ho felisa Lipaki Tsa Jehova Jeremane ea Bonazi—hammoho le Angola, Malawi, Mozambique le linaheng tse ling tse ngata. Empa ha ea ka ea o besa oa tuka. Ho fapana le moo, batho ba Jehova linaheng tseo ba tsoela pele ho ata ha ba ntse ba phahamisa lebitso la Molimo hammoho. Hobane’ng? Hobane Jehova o sebelisa mangeloi a hae a halalelang ho sireletsa batho ba hae le ho ba tataisa.—Baheberu 1:14.

17. Mangeloi a Molimo a re thusa ka litsela life?

¹⁷ Ho feta moo, mangeloi a Jehova a ka tsamaisa litaba e le hore batho leha e le bafe ba etsang hore ba bang ba khoptjoe ba tlosoe har’a batho ba Jehova. (Matheu 13:41; 18:6, 10) Esita le haeba ka nako eo re sa hlokomele, mangeloi a tlosa lintho tse neng li ka re sitisa ho sebeletsa Molimo, ebile a re sireletsa linthong tse neng li ka senya kamano ea rōna le Jehova. Ntlha ea bohlokoa ka ho fetisisa, a re tataisa mosebetsing oa ho bolela “litaba tse molemo tse sa feleng” molokong oohle oa batho, ho akarelletsa le libakeng tseo mosebetsi oa boboleli o etsoang tlas’a maemo a kotsi. (Tšenolo 14:6) Khafetsa lingoliloeng tsa Bibele tse hatisitsoeng ke Lipaki Tsa Jehova li ’nile tsa paka kamoo mangeloi a re thusang kateng.a Liphihlelo tse joalo li ngata haholo hoo ho ke keng ha thoe li etsahetse ka mohlolo feela.

18. (a) Ho hlokahala’ng e le hore re rue molemo thusong ea mangeloi? (b) Sehloohong se latelang ho tla tšohloa eng?

¹⁸ E le hore re ’ne re rue molemo tataisong le tšireletsong ea mangeloi, re tlameha ho tsoela pele re phahamisa lebitso la Jehova ho sa tsotellehe khanyetso. Hopola hore lengeloi la Molimo le hloma liahelo ‘ho pota-pota ba tšabang Jehova’ feela. See se bolela’ng? Ho tšaba Molimo ke eng, hona re ka etsa’ng e le hore re mo tšabe? Ke hobane’ng ha Molimo ea lerato a ka batla hore re mo tšabe? Lipotso tsena li tla tšohloa sehloohong se latelang.

[Mongolo o botlaaseng ba leqephe]

U ka Araba Joang?

• Ha Davida esale mohlankana, o ile a mamella liteko life?

• Joaloka Davida, ke eng e khōlō eo re amehileng ka eona?

• Re talima liboka tsa Bokreste joang?

• Jehova o sebelisa mangeloi a hae joang ho re thusa?

[’Mapa o leqepheng la 21]

(Ha u batla ho bona boitsebiso bo hlophisitsoeng hantle, sheba sengoliloeng)

Rama

Gathe

Ziklage

Gibea

Jerusalema

Adulame

Keila

Hebrone

Zife

Horeshe

Maone

Nobe

Bethlehema

Ene-gedi

Karmele

Leoatle la Letsoai

[Tlhaloso ea Moo Setšoantšo se Nkiloeng Teng]

Map: Based on maps copyrighted by Pictorial Archive (Near Eastern History) Est. and Survey of Israel

[Setšoantšo se leqepheng la 21]

Esita leha Davida e ne e le mophaphathehi, o ile a phahamisa lebitso la Jehova

[Setšoantšo se leqepheng la 23]

Tumelo ea rōna e matlafatsoa ke ho utloa liphihlelo tse khothatsang tse phetoang libokeng tsa rōna tsa Bokreste