Bacha Baa Botsa. . .

Ke Hobane’ng ha Ntate a Ile a Tlameha ho Shoa?

MOTHO e mong le e mong o ne a maketse ha ntat’a Al, monna ea tsebahalang e le motho ea matla le ea phetseng hantle a kena sepetlele. Leha ho le joalo, Al o ne a kholisehile hore ntat’ae o tla khutlela lapeng kapele-pele. Empa boemo ba hae bo ile ba mpefala ka tšohanyetso ’me o ile a shoa. Al o ile a tletleba: “Ke ne ke sa lumele hore motho ea matla hakaalo a ka shoa.”

Ntat’a Kim e ne e le monna oa Mokreste ea lerato. O kile a ba sepetlele pele ka lebaka la bothata ba lefu le sa foleng, empa ho ne ho bonahala a hlaphoheloa hantle. Ka letsatsi le leng o ile a oa ka tlung ea ho hlapela. Kim oa hopola: “Nakong eo ke mo shebang ke ile ka tseba hore o shoele. ’Mè le moholoane ba ile ba leka ka matla ho mo thusa ka mokhoa oa CPR oo ba neng ba sa o tsebe hantle. Ke ile ka mathela ka kamoreng ea ka ’me ka rapela: ‘Jehova, se lumelle sena ho etsahala hle. A ke a phele hle!’ Empa le ka mohla ha aa ka a hlaphoheloa.”

Lefu ke ’nete e utloisang bohloko lefatšeng lena. Bibele e re: “Hobane bakeng sa ntho e ’ngoe le e ’ngoe ho na le nako e khethiloeng . . . nako ea ho tsoaloa le nako ea ho shoa.” (Moeklesia 3:1, 2, NW) Haeba u hōlisitsoe joaloka Mokreste, u tseba lebaka leo Bibele e bolelang hore batho ba shoa ka lona, boemo ba bafu le tšepo ea tsoho.a

Leha ho le joalo, mohlomong u ka ferekanngoa ke ho lahleheloa ke motsoali oa hao. Ke e ’ngoe ea liphihlelo tse bohloko ka ho fetisisa tsa bophelo bohle. E ka etsa hore u ikutloe u lahliloe ebile u sa sireletseha. U sa ntse u hōla, ’meleng le maikutlong, ’me le hoja mohlomong u finyelletse tekanyo e itseng ea tokoloho, ka litsela tse ngata u sa ntse u hloka batsoali ba hao.b

Ha ho makatse ha phuputso e ’ngoe e senotse hore tšabo e khōlō ka ho fetisisa ea mocha ke ho lahleheloa ke batsoali ba hae. Mocha e mong o ile a lumela: “Boholo ba nako batsoali ba ka ke khathatso, empa ke ne nke ke ka rata ha ba hlaheloa ke ho hong. Seo sea ntšoenya.”—The Private Life of the American Teenager.

Ha ho makatse hore, haeba e mong oa batsoali ba hao a shoele, u utloa bohloko haholo maikutlong. Mohlomong pele bonyane u ka utloa bohloko hoo u sa tsebeng le ho lla feela. Sena se tloaelehile. Ha mopesaleme a ne a le tlas’a khatello e matla haholo o ile a re: “Ke feletsoe ke matla, ke robehile hampe.” (Pesaleme ea 38:8) Buka Death and Grief in the Family e re: “Motho ea tsoang leqeba le tebileng kapa ea robehang lesapo o tšoha haholo. Ho tšoha hona ke mofuta oa tšireletso o thibelang bohloko hore bo utloahale [hang-hang]. Bohloko ba ho shoeloa bo sebetsa ka tsela e tšoanang.” Joale, ke’ng se ka etsahalang ha ho tšoha hoo ha pele ho fela?

‘Ke Ikutloa ke Halefile Haholo’

Ho Luka 8:52 (BPN) re bala hore ka mor’a lefu la ngoanana e monyenyane, batho “bohle ba ne ba lla, ba hlomohetse mofu.” E, ha lefu le nka eo u mo ratang, ke ha tlhaho ho ba le letoto la maikutlo a matla, ho akarelletsa masoabi, ho ikutloa molato, tšabo—esita le ho halefa.

Ke hobane’ng ha u halefa? Hobane batsoali ba rōna ba etsa hore re ikutloe re bolokehile, re sireletsehile. Ha e mong oa bona a e-shoa, ke ha tlhaho ho ikutloa u tšohile le ho ikutloa u lahliloe. Hase hore motsoali oa hao o u siile ka morero. Lefu ke sera sa rōna. (1 Ba-Korinthe 15:26) Ha lefu le nka eo re mo ratang, tahlehelo eo ke ea sebele ’me e bohloko ka ho ke keng ha latoloa. Hlokomela kamoo Wendy ea lilemo li 18 a hlalosang kateng: “Ke ile ka ikutloa ke le motoai-toai lefatšeng ’me ke ikutloa ke tšaba ka mor’a lefu la ntate. Ka linako tse ngata ke ne ke lakatsa eka ntate a ka be a na le ’na hore a nthuse.” Ha u nahana ka se u lahlehetseng—lerato, tšehetso le taeo—u ka halefa ka ho loketseng.

Ka mohlala, Debbie e mocha o ne a le haufi le malom’ae. Ka mor’a lefu la hae o ile a ngola: “Ho ne ho bonahala e le leeme hore motho ea molemo joalo, ea ratoang haholo, le ea neng a rata Jehova hakaalo a utloe bohloko le ho shoa habohloko joalo. Le hoja ke hōlisitsoe joaloka Mokreste le ho tseba lebaka leo batho ba tsofalang le ho shoa ka lona esita le lebaka leo batho ba molemo ba utloang bohloko ka lona, ke ne ke sa itokisetsa maikutlo a ho halefa a ileng a ntlela.”

Ba bang ba bile ba halefela motsoali ea shoeleng. Victoria e mocha oa lumela: “Ntate-moholo o shoele selemong se fetileng. Ke ne ke halefetse ho shoa ha hae, ’me ha bohale bo kokobela, ke ile ka utloa bohloko haholo.” Ka sebele, ba bang ba ile ba lekeha hore ba lebise khalefo ea bona ho Molimo. Terri ea lilemo li 14 eo ntat’ae a ileng a bolaoa ke lefu la tšohanyetso la pelo o re: “Ke halefetse Molimo haholo. Ke hobane’ng ha Ntate a ile a tlameha ho shoa, ha ke ne ke mo rata le ho mo hloka hakaale?”

‘Ke Ikutloa ke le Molato Haholo Hona Joale’

Ho ikutloa u le molato ke karabelo e ’ngoe e tloaelehileng ka lefu la motsoali. Bibele e re: “Hobane bohle ba sitiloe, ’me ha ba tšoaneloe ke khanya ea Molimo.” (Ba-Roma 3:23) Ka lebaka leo, bacha ba bangata ba qoaketsana le batsoali ba bona nako le nako. Empa ha motsoali a e-shoa, mehopolo ea likhohlano tsa khale le liqoaketsano e ka ba mohloli oa ho tepella ho matla.

Ho ka thusa ho hopola hore esita le batho ba ratanang ka linako tse ling ba qoaketsana ka matla. Elisa e mocha oa ipolela: “Ke ne ke rata ’mè, ’me ke ne ke tseba hore le eena oa nthata, empa likhoeli tse ’maloa pele a kula, re bile le mathata. Ke ne ke mo halefela—ka lintho tseo hona joale li bonahalang li sa re letho—empa tseo e neng e le tsa bohlokoa ho ’na ka nako eo. Ke hopola ka nako e ’ngoe ka lebaka la ho halefa ke itahlela ka kamoreng ea ka ’me ka lenyele ke lakatsa eka a ka shoa. Ha ’Mè a kula ’me a e-shoa ka tšohanyetso, ho bile le maikutlo ana kaofela a sa rarolloang ao re bileng le ’ona e mong ho e mong. Ke ikutloa ke le molato haholo hona joale.” Ho sa tsotellehe seo u se buileng kapa kamoo u ileng ua ikutloa kateng, hase uena ea bakileng lefu la motsoali oa hao. Hase phoso ea hao.

Bohloko ba ho Shoeloa

Leha ho le joalo, mohlomong u ka ba le masoabi le bohloko ba ho shoeloa tse matla haholo. Tšeliseha ho tseba hore banna le basali ba tumelo ba mehleng ea Bibele le bona ba bontšitse maikutlo a joalo. Ha Josefa a shoeloa ke ntat’ae eo a neng a mo rata, o ile a “itihela holim’a sefahleho sa ntat’ae, a lla holim’a hae, a mo aka.” (Genese 50:1) Hape, Jesu Kreste o ile a “lla” ha motsoalle oa hae Lazaro a shoele.—Johanne 11:35.

Ha motho a llisoa ke lefu la motsoali, ke ha tlhaho hore ka linako tse ling u ikutloe u sithabelitsoe ke masoabi. Mopesaleme ha a leka ho hlalosa masoabi a hae o ile a ipapisa le motho ‘ea kobotelang fatše a llela ’m’ae.’ (Pesaleme ea 35:14) U sithabelitsoe ke masoabi, mohlomong u ka boela oa “llisoa ke ho hlomoha!” (Pesaleme ea 119:28) Mohlomong u ka khaotsa ho ja kapa ka tšohanyetso ua thatafalloa ho tsitsisa mohopolo sekolong. Mohlomong u ka ba ua tepella maikutlong.

Ho ka mpefatsang litaba le ho feta, motsoali oa hao ea setseng le banab’eno ba ka hatelloa ke masoabi a bona ho e-na le hore ba u thuse kapa ho u tšehetsa. Kim oa hopola: “Ka mor’a hore ntate a patoe, re ile ra leka ho phela ka tsela e tloaelehileng. Joale ’Mè e bile hlooho ea lelapa. Empa ho ne ho e-na le linako tseo ka tsona a neng a hlōleha ho laola maikutlo a hae le ho lla re ntse re tšoere thuto ea lelapa ea Bibele. Ke ne ke mo utloa a lla bosiu, a bitsa lebitso la ntate.”

Ho Fumana Matšeliso

Ka nako e ’ngoe moprofeta Jeremia o kile a re: “Masoabi a ka nka a mamella joang? Pelo ea ka e nyahame, e tepeletse.” (Jeremia 8:18, BPN) Mohlomong u ikutloa hore ha ho mohla bohloko bo tla fela. Empa hlokomela mantsoe a moapostola Pauluse: “Ho bokoe Molimo . . . oa matšeliso ’ohle, o re tšelisang mahlomoleng ’ohle a rōna.” (2 Ba-Korinthe 1:3, 4) Molimo o fana ka matšeliso ana haholo-holo ka maqephe a Lentsoe la hae le ngotsoeng, Bibele. Ho feta moo, moea oa hae o ka susumetsa metsoalle le litho tsa lelapa ho fana ka thuso e hlokahalang le tšehetso.

U se lumelle khalefo e fosahetseng ho u sitisa ho batla matšeliso a Molimo. Jobo ea lokileng o ile a etsa phoso ea ho beha Molimo molato ka tahlehelo ea hae e utloisang bohloko. Ka pelo e bohloko o ile a re: “Ke ne ke itulela ka khotso, empa Molimo oa ntšoara ka qoqotho le ho nkotla le ho ntlhokofatsa.” (Jobo 16:12, 13, Today’s English Version) Empa Jobo o ne a fositse. Satane, eseng Molimo, ke eena eo e neng e le mohloli oa litlokotsi tsa Jobo. Elihu e monyenyane o ile a tlameha ho hopotsa Jobo hore “Molimo o ke ke oa etsa ho sa lokang; Ea matla ’ohle a ke ke a khopamisa ho loka.” Hamorao Jobo o ile a hula mantsoe a hae bakeng sa lipolelo tsa hae tse sa lokang.—Jobo 34:12; 42:6.

Ka tsela e tšoanang, mohlomong u hloka motho e mong ea tla u thusa ho talima litaba ka pono e leka-lekaneng haholoanyane. Kim oa hopola: “Moholo ea seng a hōlile oa Mokreste o ile a re hopotsa ka tšepo ea tsoho, a arolelana mangolo a kang Johanne 5:28, 29 le 1 Ba-Korinthe 15:20 le rōna. O ile a re: ‘Ntat’a lōna o tla khutla, empa le tlameha ho lula le tšepahala haeba le tla ’mona Paradeiseng.’ Nke ke ka lebala seo le ka mohla! Hape o ile a bolela hore lefu e ne e se thato ea Molimo bakeng sa batho. Ke ile ka hlokomela hore Molimo ha a amane ka letho le lefu la ntate.”

Ho beha mabaka ka Mangolo ha hoa ka ha tlosa bohloko ba Kim hang-hang, empa e ne e le qalo feela. Le uena u ka qala ho lokisa tsela ea hao ea ho sebetsana le bohloko ba ho shoeloa. Kamoo u ka etsang sena ka ho khethehileng ho tla tšohloa sehloohong se latelang.

[Mongolo o botlaaseng ba leqephe]

[Setšoantšo se leqepheng la 26]

Lefu la motsoali e ka ba e ’ngoe ea liphihlelo tse bohloko ka ho fetisisa bophelong