‘Ho Kalla ka Baka la ’Nete’
“Khanyeng ea hao e-ea u atlehe; kalla ka baka la ’nete le boikokobetso le ho loka, ’me letsoho la hao le letona le tla u ruta lintho tse tšabehang.”—PESALEME EA 45:4, NW.
1, 2. (a) Ke molaetsa ofe o neng o thabisa mopesaleme? (b) Ke hobane’ng ha molaetsa oo o lokela ho re belisa?
SEBINI sa lithothokiso se ne se chesehela ho qapa pina ea sona. Tšepo ea ho tla ha ’muso o lokileng matsohong a ’musi ea sa boleng, ea lokileng e ne e le matla. Se ne se sa khone ho thola. Mopesaleme a sa khone ho itšoara, a re: “Taba tse monate li bela pelong ea ka; ke re, ke qapela morena; leleme la ka a le ke le be joale ka lesiba la mongoli ea masene!” (Pesaleme 45:1) Sebini sa pele sa lithothokiso se ne se shoe khale. Empa pina ea sona ea boprofeta e ntse e phela, ’me matla a eona a maholo hona joale ho feta leha e le neng pele.—Bapisa Ba-Kolosse 3:16.
2 “Taba tse monate” tse neng li bela pelong ea mopesaleme e ne e le life? Li amana le litaba tse molemo tsa ’Muso oa Molimo! Molaetsa oa ’Muso o “monate” hoo o lokelang ho “boleloa lefatšeng lohle le ahiloeng e be bopaki ho lichaba tsohle” pele “bofelo” ba lichaba tsena bo fihla. (Mattheu 24:14, NW) Kajeno, na sehlooho se “monate” sa ’Muso oa Molimo oa Messia se bela pelong ea hao? Ho lokela ho ba joalo. Hobane’ng? Hobane leetsi la Seheberu le fetoletsoeng e le “ho bela” (ra·chashʹ) le bolela motsamao o hlasimolohileng, joaloka metsi a belang, a ikentse lipululana. Leetsi lena hape le bolela ho fella. ’Me hopola, Moetapele oa rōna, Jesu Kreste, o itse: “Hobane molomo oa motho o bolela seo pelo e tletseng sona.” (Luka 6:45) Kahoo, na le uena joaloka mopesaleme o na le pelo e tšolohang ka “taba tse monate”? Ha ho le joalo, joale ha ho letho le ka u thibelang ho bina ’nete ena e fetisang: Jesu Kreste o busa ’Musong oa Molimo!
Ho Tsebahatsa Pina ea ’Nete Hohle
3. Ke mekhoa efe e ’meli e meholo e sebelisoang ho hasa litaba tse molemo tsa ’Muso kajeno?
3 Pina ena ea borena e ka tsebahatsoa hohle joang? Ka thuso ea moea o halalelang, leleme la mopesaleme le ile la fetoha “lesiba” matsohong a Jehova. (Bapisa 2 Samuele 23:2.) Mantsoe a ngotsoeng a pina ea hae a bineloa barapeli bohle ba Jehova ba boholo-holo hore ba a utloe. Le rōna kajeno re ka loanela ’nete ea ’Muso oa Molimo ka litsela tse peli tse tšoanang. Ea pele, ka mantsoe a rōna a utloahalang boboleling ba phatlalatsa le ka mantsoe a rōna a balang lingoliloeng tsa rōna. Ka hona, ha re tsamaisa lingoliloeng tse theiloeng Bibeleng, re bolela seo maleme a banna ba bululetsoeng ka moea o halalelang ba se buileng. (2 Timothea 3:16; 2 Petrose 1:20, 21) ’Me kajeno molaetsa o hatisitsoeng oa ’Muso o tsamaisoa ka palo e khōlō le ka lipuo tse ngata le ka lebelo le leholo ho feta kamoo mopesaleme a neng a nahanne kateng. Na u kopanela kamehla khasong ea ’ona, haholo ka ho tsamaisa likoranta tsa Molula-Qhooa le Tsoha!
4. (a) Ke joang Kreste Jesu a bileng ‘motle ho fetisa bana ba batho’? (b) Ke joang sehlopha se tlotsitsoeng sa seboholi se etsisang ‘mosa o molomong oa Kreste’?
4 Tšobotsi ea Morena oa Jehova ea susumeletsa mopesaleme ho ngola: “Ka botle u fetisa bana ba batho, mosa o tšoloha melomong ea hao; ka baka leo Molimo o u hlohonolofalitse ka ho sa feleng.” (Pesaleme ea 45:2) Ho tloha tsatsing leo Jesu a tlotsitsoeng ka moea oa Molimo ka lona, molomo oa hae o ile oa phehella ho bua ka ’Muso, ho fihlela baemeli ba batho ba Satane ba o thōlisa ka nakoana. Ka lebaka la ho tšepahala ha Jesu, Jehova a mo hlohonolofatsa ka ho sa feleng ka ho mo tsosa bafung le ho mo phahamisa holim’a libopuoa tsohle. (Ba-Filippi 2:8-11) Ho tloha nakong eo Jesu a tlotlisitsoeng ka eona leholimong, ha a fetoha ‘setšoantšo sa boleng ba Molimo,’ o motle ho fetisa ’musi ea phahameng, oa motho kapa lengeloi. (Ba-Heberu 1:3, 4) Joale, Jesu e le Morena ea beiloeng teroneng, o matlafalitse melomo ea sehlopha sa molula-qhooa le metsoalle ea sona ho bina litaba tse molemo tsa ’Muso ka sebete. Leha ho le joalo, pina ena hape ke ea ntoa.
5, 6. (a) ‘Ho kalla’ ha Kreste ‘bakeng sa ’nete’ ho bolela eng? (b) Ke joang sehlopha sa molulaqhooa se sebelisang Molula-Qhooa le Tsoha!?
5 Mopesaleme o bitsa Morena ea busang: “Tlamella sabole ea hao seropeng sa hao, Oho Mohale, hammoho le seriti le khanya ea hao. ’Me khanyeng ea hao e-ea u atlehe; kalla ka baka la ’nete le boikokobetso le ho lōka, ’me letsoho la hao le letona le tla u ruta lintho tse tšabehang.” (Pesaleme ea 45:3, 4, NW) Ho tloha ka 1914 Kreste o ’nile a palama pere ea ntoa, a loketse ho loana. (Tšenolo 6:1, 2) O itlameletse ka sabole—pontšo ea ntoa le taolo le matla tse tsoang ho Molimo ho bolaea lichaba tse hanyetsang. Kreste o se a loanne le Satane le bademona ba hae, a ba liha maholimong le ho ba koalla sebakeng sa lefatše.—Tšenolo 12:1-13.
6 Leha ho le joalo, pele khotso e khutlisoa, lintho tse mpe ho feta tsena li tla etsoa ke letsoho le letona la Morena ha a ‘kalla ka baka la ’nete’ lebaleng la Armageddone ho felisa lira tsohle tsa Molimo lefatšeng. (Pesaleme ea 45:4; Tšenolo 16:14, 16; 19:17, 18) Kreste o file sehlopha sa molula-qhooa sebete sa ho bina temoso ena. “Molulaqhooa” o sebelisa eng ho hōlisa lentsoe la hae? Ka ho khethehileng makasine oa Molula-Qhooa—koranta e ikhethileng ho tsebahetseng ’Muso oa Jehova o hlonngoeng. Sehlopha sa molula-qhooa, joaloka lebotho la liphepeng tse lomang habohloko, se fuoe moea o tšoanang o susumelelitseng Kreste ho “kalla ka baka la ’nete.” (Tšenolo 9:7-11) Ka mafolo-folo, se sebelisa limakasine tse lokiselitsoeng ka tlas’a tsamaiso ea “molula-qhooa”—Molula-Qhooa le Tsoha!—“bakeng sa ’nete.”—Mattheu 24:45; bapisa Tšenolo 9:16-19.
‘Ho Kallela ’Nete’
7. Ke ka tsela efe e matla Molula-Qhooa le Tsoha! li hōlisang ’nete ea Bibele?
7 Ka lilemo tse fetang lekholo, Molula-Qhooa o ile oa loanela ‘’nete ea ’Muso.’ Ka tsebo o sebelisa Lentsoe la Molimo e le sabole ho seha masira a liphoso a phuthetseng lithuto tsa bolumeli ba bohata. (Bapisa Ba-Efese 6:17; Ba-Heberu 4:12.) Tsoha! ke makasine o buellang ’nete. Ha ho fihloa liketsahalong tsa joale Tsoha! e seha ho phunyelletsa lesira le koahetseng lithuto tsa mahlale tse nyenyefatsang Bibele le mekhoa e kotsi ea batho le boitšoaro. Ke eng seo re ka se etsang ho nehelana ka limakasine tsena matsohong a batho ba bangata e le hore ba ka utloa molaetsa o bolokang bophelo oa ’Muso?
8, 9. Ho sebelisa molao-motheo o ho Ba-Efese 5:16 ha u bala Molula-Qhooa le Tsoha! ho ka u thusa joang hore u ‘bele’ bakeng sa ho kopanela bopaking ba limakasine? Fana ka mehlala.
8 Bohle ba ratang ’nete ba lokela ho ‘belisoa’ ke molaetsa o fuperoeng ke likoranta tsa Molula-Qhooa le Tsoha! (Pesaleme ea 45:1) Joang? Hobane’ng ha u sa li bale kapelenyana hang feela ha u li amohela? ‘Ha ke bale makasine kapa buka ea lefatše pele ke bala limakasine tsa rōna,’ ho boletse Lillian lilemong tse leshome tse fetileng. Le joale o ntse a tšepahala qetong eo. (Mattheu 6:33) U ka etsa eng ha u qeta ho li bala? Buisana le ba bang ka litaba tse ka hare ho tsona—lelapa le litho tsa phutheho. Sena se lokela ho u tlatsa ka cheseho ea ho paka ka limakasine e le hore u ka bolella baahelani ba hao ka lintho tse molemo tseo u li balileng. Ha ho pelaelo hore u tla batla ho kopanela bopaking ba limakasine beke e ’ngoe le e ’ngoe, le ho li isa matlung a baahelani. Sena se ka bapisoa le tsela eo ka eona moapostola Pauluse a ‘beileng bopaki ka botlalo.’—Liketso 20:20, 21, NW.
9 Peter le mosali oa hae Petra ba ile ba sebeletsa e le baromuoa naheng ea Afrika ka lilemo tse ’nè tse fetileng. Limakasine tsa Molula-Qhooa le Tsoha! ke mohloli o mong oa matla a bona a moea. “Molula-Qhooa o re thusa ho lula re falimehile moeeng tšimong ea rōna,” ho boletse Petra. “Re fumana khothatso le matla tokollong e ’ngoe le e ’ngoe ea Molula-Qhooa le Tsoha!,” Peter o’a phaella, “’me kamehla ha limakasine li fihla, ho rōna e ka re fumana lengolo le tsoang hae.” (Bapisa Pesaleme ea 46:1.) Na le uena u na le kananelo e tebileng joalo ka limakasine tsa rōna le cheseho ea ho li bala joaloka Peter le Petra? Moea oo u tla u susumeletsa hore u nehelane ka limakasine kamehla ho ba bang.
10. Ke boikutlo ba mofuta ofe bo hlokahalang bakeng sa bopaki bo atlehang ba limakasine, ’me bo ka hlahisa melemo efe?
10 Baboleli ba ’Muso ba lokela ho ba le boikutlo bo nepahetseng ka ho paka ka limakasine. Batho ba ratang bolumeli ka ’nete ba ntse ba amohela boitsebiso bo theiloeng ka Bibeleng bo ka har’a likoranta tsa rōna. (Bapisa le Liketso 10:15, 30-33.) Hobane’ng? Hobane ha ho mohloli o mong oo ba ka bo fumanang ho ’ona. Lilemo tse fetang tse 45 Sweden, Lars o ile a fuoa qubu ea limakasine tsa Molula-Qhooa ke mohiruoa oa hae. “Taba ea tsona e-ea utloahala,” a bolella mofumahali oa hae kamor’a hore a li bale. “Seo Bibele e se bolelang, se boleloa le ke Molula-Qhooa.” Seo Lars a se balileng se ile sa mo etsa hore a kolobetsoe—Tlhakubele 1940. Bala ka mohlala o mong. Basebeletsi ba babeli ba bo-pula-maliboho boroa ho United States ba itse:
“Re kopane le mosali e mong mosebetsing oa limakasine. Ke motšoara-matlotlo oa kereke e khōlō ea Baptist ’me ke seithuti se matla sa Bibele. Ha a bala letoto la lihlooho tsa Armageddone litokollong tsa Molula-Qhooa tsa la 1 Pherekhong ho ea ho la 15 Tlhakola, 1985, a thaba. Nakong e fetileng, o ile a nka lihora a batlisisa ka taba ena empa a se ke a fumana letho ha e se feela lengolo la Tšenolo 16:16. A botsa moruti oa hae: ‘Armageddone ke eng? Na u ka e hlalosa?’ A mo sheba ’me a re, ‘Eo ke taba e tebileng,’ ’me a tsamaea. A hlokomela hore Molula-Qhooa, ka lehlakoreng le leng, o arabile potso e ’ngoe le e ’ngoe eo a nang le eona le hore ke mohloli feela oo a fumaneng hore o na le mangolo ao a a hlokang tabeng ea Armageddone.”
11. (a) Ke hobane’ng ha re lokisetsa bopaki ba limakasine, ’me hangata hakae? (b) Na mosebetsi oa limakasine e ka ba thuso mosebetsing oa lithuto tsa Bibele? Hlalosa. (c) U ka tseba joang ho tsamaisa Molula-Qhooa le Tsoha! Bona lebokoso.
11 Na u ka lokisetsa letsatsi le le leng bonyane la ho paka ka limakasine beke e ’ngoe le e ’ngoe, u etsa sena karolo ea hao ea kemiso ea moea? (Bapisa Ba-Filippi 3:16.) “Baboleli, le bo-pula-maliboho, ha ba sebelise nako e lekaneng mosebetsing oa limakasine,” ho hlokomela lekala la Mokhatlo oa Watch Tower la Nigeria. Empa na bopaki ba limakasine bo lokela ho phahamela mosebetsi oa ho etsa barutuoa? Ka ho fapaneng, litlaleho ho tsoa makaleng a Mokhatlo a Australia le Brazil li bontša hore ho nehelana ka limakasine e ka ba bohato ba pele ba ho qalisa tsela ea lithuto tsa Bibele. “Ho tloha ka limakasine tsa ka tsa pele tseo ke nehelaneng ka tsona, ke ile ka qalisa lithuto tse tharo,” ho boletse khaitseli ea Australia. Ke joang u ka tsebang ho nehelana ka limakasine tse ka lebisang thutong ea Bibele? Sheba litlhahiso lebokosong le nang le sehlooho “Ho Nehelana ka Limakasine.”
Na U se U Lekile Litlhahiso Tsena?
12. Ke litlhahiso life tse ipakileng li thusa ho ’moleli e mong?
12 Tšebeletso ea Rona ea ’Muso ea Motšeanong 1984, e ne e na le kenyeletso e maqephe a mane ka ho paka ka limakasine. Na u ile ua leka litlhahiso tseo e faneng ka tsona? Baboleli ba ’Muso ba tla be ba etsa hantle ha ba bala kenyeletso eo hape ’me ba sebelisa keletso ea eona mosebetsing oa tšimo. Khaitseli e mong United States o entse joalo, a hlolloa ke liphello. O’a ngola:
“Ke ’nile ka sebelisa lintlha tse thathamisitsoeng kenyeletsong ea Tšebeletso ea Rona ea ’Muso ea Tlhakubele 1984 [Motšeanong bakeng sa Afrika Boroa] e buang ka ho nehelana ka limakasine, ’me e’a sebetsa! Mafelong a 1983 ke ne ke nehelane feela ka limakasine tse 36 selemo kaofela! Ke ne ke sa thaba, e seng haholo ka lebaka la lipalo tse leng pehong, empa hobane ke hlōtsoe ho nehelana ka boitsebiso bona bo fanang ka bophelo matsohong a batho ba bo hlokang. Ka rapella taba ena ho Jehova le ho ikemisetsa ho etsa boiteko bo eketsehileng ba ho nehelana ka Molula-Qhooa le Tsoha! Ka sebelisa litlhahiso tsa ho bea lipakane tsa botho tsa ho tsamaisa limakasine, ho sebelisa nehelano e khutšoane e phahamisang makasine o le mong feela, ho tsoela kamehla tšebeletsong ea tšimo ka letsatsi la limakasine, le ho ba le boikutlo bo nepahetseng. Joale ha mong a ntlo a hana mpho e fanoang khoeling eo ke re: ‘Leha ho le joalo, tabeng ena ke tla u siela feela litokollo tsa morao-rao tsa Molula-Qhooa le Tsoha! ka lisente tse 40.’ Lintlha tsena li sebetsa e le ka ’nete. Likhoeling tse ’nè tse fetileng, ke tsebile ho ba le karolelano ea limakasine tse 14 ka khoeli!”
13. Ke keletso efe e hatisitsoeng ka 1888 e ntseng e le ea bohlokoa le kajeno?
13 Tokollong ea Zion’s Watch Tower ea Tšitoe 1888, ka tlas’a sehlooho “Tlhahiso ho Bakotuli,” ho fanoe ka keletso ena: “Ho bonahala bothata bo boholo ho batho ba bangata ke hore lipelo tsa bona li tletse ka litaba tse molemo, hoo ba iphumanang ba bua lolololo ka Morero oa Molimo.” Na keletso ena e ntse e sebetsa 1e kajeno? Ha molebeli e mong oa potoloho Fora a botsoa hore na ke eng seo baboleli ba ka se etsang ho eketsa nehelano ea limakasine, a araba: “Bua hakhutšoanyane. Toba taba.”
14, 15. Ke joang litšoantšo tsa Molula-Qhooa le Tsoha! li ka sebelisoang bopaking? Fana ka mehlala.
14 Lipuong tse ngata tseo makasine ona o hatisoang ka tsona, litšoantšo tse ntle tsa mebala e mene li ekelitse matla a hapang a molaetsa oa ’Muso ’me o fihla bathong ba fapaneng. Ho tloha ka tokollo ea la 8 Pherekhong, 1987, Tsoha! le eona e kopanetse le Molula-Qhooa bohatong ba ho hatisa ka mebala e mene ka lipuo tse ngata tse khōlō. Na u kile ua sebelisa litšoantšo tse leng limakasineng e le lintlha tsa puisano? Ba bangata ba ho entse, ka liphello tse ntle. Theresa, moromuoa Bochabela bo Hōle ho tloha ka 1976, o ho entse. O tsamaisa limakasine tse 260 ka khoeli. O re: “Ke sebelisa litšoantšo ho phahamisa lintlha tse khōlō tsa nehelano ea ka, ka linako tse ngata ke bontša mong a ntlo sekoahelo e be ke bolela sehlooho, ’me makasine o’a itsamaisa.”
15 Kay, moromuoa naheng ea Suriname, o bile le phihlelo e tšoanang. Eena le monna oa hae ba bile moo ka lilemo tse leshome, ’me ba fumane hore litšoantšo li atleha haholo ha ba paka, haholo ho ba tumelo ea Bohindu. Hobane’ng? Kay o’a hlalosa:
“Bolumeli ba Bohindu ke ba litšoantšo. Monyakong o mong, ka botsa mosali eo: ‘Ke kōpa u mpolelle mabitso a melimo ea hao e litšoantšong tsa hao.’
“‘Enoa ke Shiva,’ a arabela.
“‘Joale, ke molimo ofe o moholo?’ ka boela ka botsa. A se ke a araba. ‘Na re ka bala Jeremia 10:10-12? Ke Molimo ofe o ka ipitsang ’Mōpi? Ke Jehova feela. Rea tseba hore u rata litšoantšo. Na litšoantšo tsena tse ho Molula-Qhooa le Tsoha! ha li ntle le ho khahlisa? Na ha u thabele ho ithuta hore na li bolela eng?’”
Hobane’ng u sa leke ho kopanyeletsa litšoantšo puisanong ea hao lekhetlo le latelang ha u le tšebeletsong ea limakasine?
16. Ke litlhahiso life tsa ’moleli oa Hong Kong tseo u ka fumanang li thusa?
16 Ha Gene a ne a sebeletsa Hong Kong, o ne a nehelana ka karolelano ea limakasine tse 300 ka khoeli. O ne a ho etsa joang? O’a hlalosa:
“Pele, rapella tlhohonolofatso ea Jehova bopaking ba hao ba limakasine. Sa bobeli, kholiseha, bososela, le ho bontša botsoalle. Sa boraro, tenyetseha le maemo, u se be manganga, sheba lintlha tseo u ka lumellanang le mong a ntlo ho tsona. Sa bone, odora limakasine tse lekaneng bakeng sa khoeli kaofela. Ke na le odoro e khōlō, e mpha tšusumetso e eketsehileng. Sa bohlano, behela ka thoko mantsiboea a mang ka beke bakeng sa tšebeletso ea limakasine, kahobane ka nako eo batho ba bangata ba teng mahaeng ’me ba khatholohile likelellong. Sa botšelela, qalisa tselana ea limakasine, leha e le nyenyane.”
Ho Qalisa Tselana ea Limakasine
17. (a) Molao-motheo o ho Liketso 15:36 o ka sebelisoa tšobotsing efe ea ho paka ha rōna ka limakasine? (b) Linaheng tse nang le tšebeletso e fokolang ea poso, ke ka tsela efe e ’ngoe eo baboleli ba ka tsamaisang limakasine?
17 “Ho boloka tlaleho e nepahetseng ea moo u nehelaneng ka limakasine le ho boela kamehla ke tsela e ’ngoe ea ho eketsa ho tsamaisa limakasine,” ho bolela Ollie, ea sebelelitseng naheng ea Afrika ea Burkina Faso. “Ke ne ke na le batho ba 15 tselaneng ea ka ea limakasine. Burkina Faso ha e na lekala le hatisang ’me le thomello ea poso ha e tšepahale, hangata Lipaki li fumana limakasine tse tsamaisoang ka sehlopha sa tse ’nè kapa tse hlano.” Na ho joalo le ka naha ea lōna? Ha ho le joalo, u ka etsa eng ho hlōla bothata bona ba ho nehelana ka limakasine? “U ka tšoara kopi ea tokollo e ’ngoe le e ’ngoe ka letsohong la hao, u li phatlalatse letsohong, ’me u meme motho ea thahasellang ho khetha eo a tla rata ho e bala,” ho hlalosa Ollie. “Hangata, o tla li nka kaofela.”
‘Lula u Bela ka Taba tse Monate’
18. Ke tšobotsi efe ea litlaleho tsa morao tjena tsa tšebeletso ea tšimo e babatsehang ka ho khethehileng, ’me re ka lebisa tlhokomelo e khōlō ho eng?
18 Lōna baboleli ba ’Muso le thusitse hore lenane la lipeeletso tsa limakasine ka bobeli le phahame haholo. Le babaletsoa cheseho ea lōna ea ho bolela litaba tse molemo ka tsela ena. Se babatsoang hape ke ho phahama ha lenane la limakasine tseo ho nehelanoang ka tsona. Leha ho le joalo, mohlomong re ka lebisa tlhokomelo e khōloanyane nehelanong ea rōna ka bomong ea limakasine. Ka baka la ho koaheloa ho matla ha tšimo, nehelano ea limakasine ea ’moleli ka mong e theohile. Erekaha re keneletse mehleng ea qetello, na re ka ‘belisoa’ haholoanyane ke ‘taba tse monate’ tsa ’Muso ka ho paka ka limakasine?—Pesaleme ea 45:1; 1 Petrose 4:7.
19. Ke ka litsela life tse peli re ka buellang ’nete ea ’Muso?
19 Kreste khanyeng ea ’Muso o kalla ka katleho ho tlotlisa lebitso le halalelang la Ntate oa hae le ho fana ka bopaki bo matla boreneng ba Hae ba bokahohleng. (Tšenolo 6:2) A re sebeliseng maleme a rōna le lingoloa ho tsebahatsa ho fihla hoa hae. E se e ka ka botšepehi re ka phahamisa mantsoe a rōna hammoho le sehlopha se tlotsitsoeng sa molula-qhooa ha se kopanela le Kreste ho loaneleng ’nete ea ’Muso oa Molimo o theiloeng oa Messia. E, a re tsamaiseng haholo Molula-Qhooa le Tsoha!—limakasine tse tlatsetsang mosebetsing oa bohlokoa ha Morena oa rōna a ‘kalla bakeng sa ’nete.’—Pesaleme ea 45:4, NW.
Na u sa Hopola?
◻ “Taba tse monate” tse lokelang ho bela pelong ea hao ke life?
◻ ‘Ho kalla’ ha Kreste ‘bakeng sa ’nete’ ho tlisa liphello life?
◻ Ke ka kelello efe Molula-Qhooa le Tsoha! li sebeletsang “’nete”?
◻ Re ka lebisa tlhokomelo e khōloanyane bopaking ba limakasine joang?
[Lebokose/Setšoantšo se leqepheng la 18]
HO NEHELANA KA LIMAKASINE
Na U Kile Ua Leka?—
◆ Bopaki ba ntlo le ntlo
◆ Bopaki ba seterateng
◆ Bopaki libakeng tsa khoebo
◆ Bopaki ka litselana tsa limakasine
◆ Bopaki ba linako tsa mantsiboea
◆ Ha mpho ea buka e hanoa
◆ Ha u etsa maeto a ho boela
◆ Ka ho etela liithuti tsa pele tsa Bibele
◆ Ha u tsamaea kapa u reka
◆ Ha u bua le beng ka uena, basebetsi ’moho le uena, baahelani, bao u kenang sekolo le bona, kapa matichere