Ho Phethahatsa Kano ea Rōna ka Matsatsi ’ohle
1 Mopesaleme Davida o ile a susumelletseha ho bolela tjena ho Jehova: “Ebe moo ke rorisang lebitso la hao ka mehla, ke ntse ke phetha likano tsa ka ka matsatsi ’ohle.” (Pes. 61:8) Davida o ne a tseba hore ho etsa kano ke taba ea boithaopo ka ho feletseng. Leha ho le joalo, o ne a boetse a tseba hore haeba a ile a etsa kano, o ne a tlamehile ho e phethahatsa. Leha ho le joalo, o ile a rorisa Jehova ka monyetla oa ho phethahatsa likano tsa hae ka matsatsi ’ohle.
2 Ha re ne re inehela ho Jehova, ka boithaopo re ile ra ikana ho etsa thato ea hae. Re ile ra itatola ’me ra etsa ho sebeletsa Jehova pakane ea rōna e ka sehloohong bophelong. (Luka 9:23) Kahoo, le rōna re tlameha ho phetha likano tsa rōna ka matsatsi ’ohle. (Moek. 5:4-6) Polelo ea rōna e entsoeng phatlalatsa nakong ea kolobetso ea metsing e tlameha ho bonahatsoa mokhoeng oohle oa rōna oa bophelo, kaha rea tseba hore “ka molomo motho o etsa polelo ea phatlalatsa hore a bolokehe.” (Baroma 10:10) Sena se akarelletsa ho bolela litaba tse molemo. (Baheb. 13:15) Maemo a botho a fapana haholo, empa ka matsatsi ’ohle kaofela ha rōna re ka lula re tsepamisitse mehopolo tabeng ea bohlokoa ea ho arolelana litaba tse molemo le ba bang.
3 Bula Menyetla ea ho Bolela Letsatsi le Letsatsi: Ho arolelana litaba tse molemo le motho e mong ke phihlelo e thabisang. E le hore ho ka etsoa sena letsatsi le letsatsi, re lokela ho bula menyetla ea ho bolela neng le neng ha maemo a rōna a re lumella. Ho ’nile ha thabeloa liphihlelo tse ngata tse thabisang ke ba ileng ba nka bohato ba pele ba ho pakela batho ka bomong ka mokhoa o sa reroang mosebetsing kapa sekolong le baahelani kapa ba bang bao ba kopanang le bona letsatsi le leng le le leng. Esita le ho ngola mangolo kapa ho sebelisa thelefono e ka ba mokhoa oa ho pakela ba bang. Ho sebelisa mekhoa ena kaofela hammoho le ho behella nako ka thōko kamehla bakeng sa ho paka ka ntlo le ntlo le ho etsa maeto a ho boela ho ka lebisa thabong e khethehileng e tsoaloang ke ho khanna thuto ea lehae ea Bibele. E, letsatsi le leng le le leng re ka ’na ra khona ho hlahisa menyetla ea ho bolela.
4 Morali’abo rōna e mong o ile a qala ho bala Ho Hlahlobisisa Mangolo Kamehla nakong ea ho khefutsa ha hae mosebetsing. O ile a mema mosebetsi-’moho le eena hore ba bale temana ea letsatsi, ’me hoo kapele ho ile ha lebisa thutong ea Bibele le mosali eo. Ba ile ba ithuta halofo ea hora letsatsi le leng le le leng, matsatsi a mahlano ka beke. Mosebetsi-’moho e mong o ile a hlokomela thuto ea bona ea letsatsi le letsatsi. Qetellong o ile a itsebahatsa e le mor’abo rōna ea seng a sa tsoe. A susumelitsoe ke cheseho ea morali’abo rōna, o ile a iteanya le moholo e le hore a ka tsosolosoa. Morali enoa oabo rōna o ile a ama bophelo ba ba bang ba babeli ka tsela e ntle ka lebaka la ho latella ho phethahatsa kano ea hae ka matsatsi ’ohle.
5 Ha re susumetsoa ke pelo e tletseng kananelo bakeng sa lintho tsohle tse molemo tseo Jehova a re etselitseng tsona, re phethahatsa boinehelo ba rōna kahohle kamoo re ka khonang letsatsi le letsatsi, ho tla re tlisetsa thabo le khotsofalo. Joaloka mopesaleme, re ka bolela: “Ke tla u rorisa, Morena, Molimo oa ka, ka pelo ea ka eohle, ke tlotlise lebitso la hao ka ho sa eeng kae.”—Pes. 86:12.