Lentsoe la Jehova Lea Phela
Lintlha-khōlō Tsa Buka ea Boraro le ea Bone ea Lipesaleme
HA MOPESALEME a ne a rapela Molimo, o ile a botsa: “Na mosa oa hao o lerato o tla boleloa sebakeng sa lepato, botšepehi ba hao bo boleloe sebakeng sa timetso?” (Pesaleme ea 88:11) Ho hlakile hore karabo ke che. Re ke ke ra rorisa Jehova haeba re sa phele. Ho rorisa Jehova ke lona lebaka leo re tsoelang pele re phela ka lona, ’me ha re phela re lokela ho mo rorisa.
Buka ea Boraro le ea Bone ea Lipesaleme, e leng Pesaleme ea ,73 ho ea ho 106, li re fa mabaka a mangata a ho rorisa Mōpi le ho boka lebitso la hae. Ho nahanisisa ka lipesaleme tsena ho lokela ho tebisa kananelo eo re nang le eona ka “lentsoe la Molimo” ’me ho re susumetse ho atolosa le ho ntlafatsa tsela eo re mo rorisang ka eona. (Baheberu 4:12) Ka thahasello e khōlō, a re qaleng ka ho tšohla Buka ea Boraro ea Lipesaleme.
“HO ATAMELA HO MOLIMO HO MOLEMO HO ’NA”
Lipesaleme tse 11 tse qalang tsa karolo ea boraro li qapiloe ke Asafe kapa ke litho tsa lelapa la Asafe. Pina e bulang e hlalosa hore na ke eng e ileng ea sireletsa Asafe hore a se ke a khelosoa ke monahano o fosahetseng. O ile a etsa qeto e nepahetseng. O ile a bina a re: “Ha e le ’na, ho atamela ho Molimo ho molemo ho ’na.” (Pesaleme ea 73:28) Joale ho latela Pesaleme ea 74 e buang ka ho llela timetso ea Jerusalema. Pesaleme ea 75, ea 76 le ea 77 li bontša hore Jehova ke Moahloli ea lokileng, Mopholosi oa ba ikokobelitseng ebile ke Ea Utloang thapelo. Pesaleme ea 78 e hlahloba liketso tsa Baiseraele ho tloha nakong ea Moshe ho fihlela nakong ea Davida. Pesaleme ea 79 e bua ka ho llela timetso ea tempele. Ebe joale ho latela thapelo ea hore sechaba sa Molimo se tsosolosoe. Pesaleme ea 81 e re khothatsa hore re mamele Jehova. Pesaleme ea 82 le ea 83 li bua ka thapelo ea hore Molimo a ahlole baahloli ba khopo le lira tsa hae.
Pina ea bara ba Kora e re: “Moea oa ka o labalabetse ’me o hloretse mabala a Jehova.” (Pesaleme ea 84:2) Pesaleme ea 85 ke kōpo ea hore Molimo a hlohonolofatse batho ba khutlileng botlamuoeng. Pesaleme ena e hatisa hore litlhohonolofatso tsa moea ke tsa bohlokoa ho feta litlhohonolofatso tsa nama. Pesalemeng ea 86, Davida o kōpa Molimo hore a mo lebele ’me a mo rupele. Athe Pesaleme ea 87 eona ke pina e buang ka Sione hammoho le ba hlahetseng teng ’me e lateloa ke Pesaleme ea 88 eo e leng thapelo e lebisoang ho Jehova. Pesaleme ea 89, eo mohlomong e qapiloeng ke e mong oa banna ba bane ba bohlale ba mehleng ea Solomone ea bitsoang Ethane, e totobatsa mosa o lerato oa Jehova joalokaha o bontšoa ka selekane sa Davida.—1 Marena 4:31.
Lipotso Tsa Mangolo Lia Arajoa:
73:9—Ke ka tsela efe ba khopo ‘ba behileng melomo ea bona maholimong, ’me maleme a bona a tsamaeang lefatšeng’? Kaha ba khopo ha ba hlomphe motho leha e le ofe leholimong kapa lefatšeng, ha ba tsilatsile hore ba nyefole Molimo ka melomo ea bona. Ba boetse ba etselletsa batho ka maleme a bona.
74:13, 14—Ke neng Jehova a ileng a ‘roba lihlooho tsa liphoofolo tsa litonanahali tsa leoatle ka metsing ’me a silakanya lihlooho tsa Leviathane’? “Faro, morena oa Egepeta,” o bitsoa “phoofolo ea tonanahali ea leoatle e thakhaletseng bohareng ba melatsoana ea Nile.” (Ezekiele 29:3) E ka ’na eaba Leviathane e emela “ba matla ba Faro.” (Pesaleme ea 74:14, mongolo o botlaaseng ba leqephe ho NW) Mohlomong ho silakanngoa ha lihlooho tsa bona ho bolela ha Faro le lebotho la hae ba ne ba hlōloa habohloko nakong eo Jehova a neng a lopolla Baiseraele botlamuoeng ba Egepeta.
75:4, 5, 10—Ho boleloa eng ka lentsoe lee “lenaka”? Manaka a phoofolo ke sebetsa se matla. Kahoo, lentsoe lena “lenaka” le tšoantšetsa matla kapa bonatla. Jehova o phahamisa manaka a batho ba hae, o etsa hore ba phahamisoe, empa o ‘poma manaka a ba khopo.’ Re lemosoa hore re se ke ‘ra phahamisetsa manaka a rōna holimo,’ ke hore re se ke ra ikhohomosa kapa ra ikakasa. Kaha Jehova ke eena ea phahamisang batho, mesebetsi ea boikarabelo e fumanoang ka phuthehong e lokela ho nkoa e tsoa ho eena.—Pesaleme ea 75:7.
76:10—“Khalefo ea motho” e ka roka Jehova joang? Ha Molimo a lumella batho hore ba re halefele kahobane re le bahlanka ba hae, ho ka ba le liphello tse molemo. Bothata leha e le bofe boo re ka thulanang le bona bo ka re koetlisa ka tsela e itseng. Jehova o lumella bohloko hore feela bo re koetlise. (1 Petrose 5:10) ‘Molimo o itlama ka khalefo e setseng ea motho.’ Ho thoe’ng haeba re mamella ho fihlela re e-shoa? Ho mamella hoo le hona ho ka roka Jehova hobane ba re bonang re tiisetsa ka botšepehi ba ka ’na ba qala ho tlotlisa Molimo.
78:24, 25—Ke hobane’ng ha manna a bitsoa “lijo-thollo tsa leholimo” le “bohobe ba mangeloi” ho ea ka Bibele—Phetolelo e Ncha? Lipolelo tseo ka bobeli ha li bontše hore manna e ne e le lijo tsa mangeloi. E ne e le “lijo-thollo tsa leholimo” kaha li ne li hlaha leholimong. (Pesaleme ea 105:40) Kaha mangeloi kapa “ba matla,” a lula leholimong, polelo ena e reng “bohobe ba mangeloi” e ka ’na ea bolela feela hore bo ne bo fanoe ke Molimo, ea lulang leholimong. (Pesaleme ea 11:4) Hape e ka ’na eaba Jehova o ile a sebelisa mangeloi hore a fe Baiseraele manna.
82:1, 6—Ke bo-mang ba bitsoang “melimo” le “bara ba Ea Phahameng ka ho Fetisisa”? Lipolelo tseo ka bobeli li bua ka baahloli ba batho ba Iseraele. Sena se loketse, kaha ba ne ba lokela ho sebeletsa e le babuelli le baemeli ba Molimo.—Johanne 10:33-36.
83:2—‘Ho phahamisa hlooho’ ho bontša’ng? Ketso eo e bontša boikemisetso ba ho sebelisa matla kapa ho nka bohato, seo ka tloaelo e leng ho hanyetsa, ho loantša, kapa ho hatella.
Seo re Ithutang Sona:
73:2-5, 18-20, 25, 28. Ha rea lokela ho honohela katleho ea batho ba khopo ebe re amohela litsela tsa bona tsa ho se tšabe Molimo. Ba khopo ba sebakeng se thellang. Ka sebele ba tla ‘oela tšenyehong.’ Ho feta moo, kaha bokhopo bo ke ke ba tlosoa pusong ea batho ba sa phethahalang, boiteko boo re bo etsang ba ho bo felisa e ne e tla ba ba lefeela. Joaloka Asafe, re bontša bohlale ha re hlōla bokhopo ka “ho ba haufi le Molimo” le ka ho thabela ho ba le kamano e haufi le Eena.
73:3, 6, 8, 27. Re lokela ho itebela hore re se ke ra ithorisa, ra ikhohomosa, ra soma ba bang le ho ba qhekella. Le hoja ho ka ’na ha bonahala eka ho molemo ho ba le litšobotsi tseo, re lokela ho li qoba.
73:15-17. Ha likelello tsa rōna li ferekane, ha rea lokela ho bolella ba bang lintho tseo tse tsietsang tseo re li nahanang. Ho bolela “pale e joaloka eo” ho ka nyahamisa ba bang. Re lokela hore ka khutso re thuise ka lintho tseo re amehileng ka tsona ’me re li rarolle ka ho kopana le balumeli-’moho le rōna.—Liproverbia 18:1.
73:21-24. Ho ‘halefela’ se bonahalang eka ke katleho ea ba khopo ho tšoantšoa le ho itšoara joaloka liphoofolo tse sa nahaneng. Ho etsa joalo ke ho nkeha maikutlo, ho bakoang feela ke boikutlo boo motho a nang le bona. Ho e-na le hoo, re lokela ho tataisoa ke keletso ea Jehova, re kholisehile ka botlalo hore o tla ‘re tšoara ka letsoho le letona’ ’me a re tšehetse. Ho phaella moo, Jehova o ‘tla re isa khanyeng,’ ke hore, re tla ba le kamano e haufi le eena.
77:6. Re hloka nako ea ho ithuta le ho thuisa hore re bontše ho ameha ka ho teba ka linnete tsa moea ’me re li batlisise ka hloko. Ho bohlokoa hakaakang hore re iphe nako ea ho ba boinotšing bophelong ba rōna!
79:9. Jehova o mamela lithapelo tsa rōna, haholo-holo ha li amana le ho halaletsoa ha lebitso la hae.
81:13, 16. Ho mamela Jehova le ho tsamaea litseleng tsa hae ho lebisa litlhohonolofatsong tse ngata haholo.—Liproverbia 10:22.
82:2, 5. Ho hloka toka ho sisinya ‘metheo ea lefatše.’ Liketso tse bontšang leeme li ferekanya botsitso ba sechaba.
84:1-4, 10-12. Bangoli ba lipesaleme ba re behela mohlala ka kananelo eo ba neng ba e-na le eona ka sebaka sa borapeli ba Jehova le kamoo ba neng ba khotsofaletse litokelo tsa bona tsa tšebeletso kateng.
86:5. Re leboha hakaakang hore ebe Jehova o “itokiselitse ho tšoarela”! O batla bopaki leha e le bofe bo tla fana ka lebaka la ho bontša mohau ho mofosi ea bakileng.
87:5, 6. Na ba fumanang bophelo Paradeiseng lefatšeng ba sa tla ke ba tsebe mabitso a ba tsoselitsoeng bophelong ba leholimo? Litemana tsena li bontša hore seo se ka ’na sa etsahala.
88:13, 14. Ha Jehova a lieha ho araba lithapelo tsa rōna mabapi le bothata bo itseng, e ka ’na eaba seo se bolela hore Jehova o batla hore re bontše hore na re inehetse ho eena e le kannete hakae.
“MO LEBOHENG, LE BOKE LEBITSO LA HAE”
Nahana mabaka a sa tšoaneng ao ka ’ona re lokelang ho rorisa Jehova, a boletsoeng karolong ea bone ea lipesaleme. Pesalemeng ea 90, Moshe o bontša phapang e teng pakeng tsa ho ba teng ha “Morena oa bosafeleng” le bophelo ba motho bo fetang ka potlako. (1 Timothea 1:17) Ho ea ka Pesaleme ea 91:2, Moshe o bolela hore Jehova ke ‘setšabelo sa hae le qhobosheane ea hae’—e leng Mohloli oa hae oa tšireletso. Lipesaleme tse ’maloa tse latelang li bua ka litšobotsi tse ntle tsa Molimo, mehopolo ea hae e phahameng, le mesebetsi ea hae e hlollang. Lipesaleme tse tharo li qala ka mantsoe a reng “Jehova ke morena.” (Pesaleme ea 93:1; 97:1; 99:1) Ha mopesaleme a bua ka hore Jehova ke Moetsi oa rōna, o re memela hore re ‘mo lebohe, re boke lebitso la hae.’—Pesaleme ea 100:4.
’Musi ea tšabang Jehova o lokela ho tsamaisa litaba tsa hae joang? Pesaleme ea 101, e qapiloeng ke Morena Davida, e fana ka karabo. Pesaleme e latelang e re bolella hore Jehova “ka sebele o tla retelehela thapelong ea ba nketsoeng ntho e ’ngoe le e ’ngoe, a se ke a nyelisa thapelo ea bona.” (Pesaleme ea 102:17) Pesaleme ea 103 e bua ka mosa o lerato oa Jehova le mohau oa hae. Ha mopesaleme a bua ka mesebetsi e mengata ea Molimo lefatšeng, o re: “Jehova, mesebetsi ea hao e mengata hakaakang! Kaofela ha eona u e entse ka bohlale.” (Pesaleme ea 104:24) Lipina tsa ho qetela tse peli tsa Buka ea Bone li rorisa Jehova ka lebaka la mesebetsi ea hae e babatsehang.—Pesaleme ea 105:2, 5; 106:7, 22.
Lipotso Tsa Mangolo Lia Arajoa:
91:1, 2—‘Sebaka se sephiring sa Ea Phahameng ka ho Fetisisa’ ke’ng, hona re ka ‘lula’ ho sona joang? Sena ke sebaka sa tšoantšetso sa polokeho le tšireletseho—e leng boemo ba ho sireletsoa kotsing ea moea. Sebaka sena se sephiring hobane ba sa tšepeng Molimo ha ba se tsebe. Re etsa hore Jehova e be sebaka sa rōna sa bolulo ka ho mo talima e le setšabelo le qhobosheane ea rōna, ka ho mo rorisa e le eena Morena ’Musi oa bokahohle le ka ho bolela litaba tse molemo tsa ’Muso. Re ikutloa re sireletsehile moeeng hobane rea tseba hore kamehla Jehova o itokiselitse ho re thusa.—Pesaleme ea 90:1.
92:12—Ke ka tsela efe ba lokileng ‘ba hlahisang lithunthung joaloka sefate sa lipalema’? Sefate sa palema se tsejoa ka ho beha ha sona. Motho ea lokileng o joaloka sefate sa palema ka hore o lokile mahlong a Jehova ebile o lula a “hlahisa litholoana tse ntle,” tse kopanyeletsang mesebetsi e metle.—Matheu 7:17-20.
Seo re Ithutang Sona:
90:7, 8, 13, 14. Kamehla ha re etsa phoso, re senya kamano ea rōna le Molimo oa ’nete. ’Me re ke ke ra mo patela libe tseo re li etsang lekunutung. Leha ho le joalo, ha re baka e le kannete ’me re tlohela tsela ea rōna e fosahetseng, Jehova o tla boela a re hauhele, ‘a re khotsofatse ka mosa oa hae o lerato.’
90:10, 12. Kaha bophelo bo bokhutšoanyane, re lokela “ho bala matsatsi a rōna.” Joang? “Ka tsela eo ka eona re ka fumanang pelo e bohlale,” kapa ka ho sebelisa bohlale e le hore re se ke ra senya matsatsi a re saletseng, empa re a sebelise ka tsela e khahlang Jehova. Sena se bolela hore re eteletse lintho tsa moea pele ’me re sebelise nako ea rōna ka bohlale.—Baefese 5:15, 16; Bafilipi 1:10.
90:17. Ho loketse ho rapella hore Jehova a “tiise mosebetsi oa matsoho a rōna ka thata” ’me a hlohonolofatse boiteko ba rōna tšebeletsong.
92:14, 15. Ka hore ba hōlileng e be liithuti tse khothetseng tsa Lentsoe la Molimo le ka hore ba kopanele kamehla le batho ba Jehova, ba tsoela pele “ba nonne ’me ba le bacha”—ba le matla moeeng—’me ke ba bohlokoa haholo phuthehong.
94:19. Ho sa tsotellehe hore na ke’ng e ‘hlokisang menahano ea rōna botsitso,’ ha re bala “matšeliso” a fumanoang ka Bibeleng ebile re thuisa ka ’ona, re tla tšeliseha.
95:7, 8. Ho mamela keletso ea Mangolo, ho e ela hloko, le ho e latela ntle ho tikatiko ho tla etsa hore re se ke ra thatafatsa lipelo.—Baheberu 3:7, 8.
106:36, 37. Litemana tsena li amahanya borapeli ba litšoantšo le ho etsetsa bademona mahlabelo. Sena se bontša hore motho ea sebelisang litšoantšo tse rapeloang a ka ’na a susumetsoa ke bademona. Bibele e re khothatsa tjena: “Le itebele litšoantšong tse rapeloang.”—1 Johanne 5:21.
“Rorisang Jah!”
Lipina tsa ho qetela tse tharo tsa Buka ea Bone ea Lipesaleme li phethela ka keletso ena: “Rorisang Jah!” Pesaleme ea ho qetela ea Buka ea Bone le eona e bula ka mantsoe ao. (Pesaleme ea 104:35; 105:45; 106:1, 48) Ha e le hantle, polelo ena e reng “Rorisang Jah!” e hlaha ka makhetlo a mangata Bukeng ea Bone ea lipesaleme.
Ruri re na le mabaka a mangata a ho rorisa Jehova. Re fumane lintho tse ngata tseo re ka nahanisisang ka tsona Pesalemeng ea 73 ho ea fihla ho ea 106, ’me lipelo tsa rōna li tletse kananelo bakeng sa Ntate oa rōna oa leholimo. Ha re nahana ka sohle seo a seng a re etselitse sona, le ka seo a tla re etsetsa sona ka moso, na ha re susumeletsehe hore re ‘rorise Jah’ ka matla ’ohle a rōna?
[Setšoantšo se leqepheng la 10]
Joaloka Asafe, re ka hlōla bokhopo ka ho “atamela ho Molimo”
[Setšoantšo se leqepheng la 11]
Faro oa hlōloa Leoatleng le Lefubelu
[Setšoantšo se leqepheng la 11]
Na u tseba lebaka leo ka lona manna a bitsoang “bohobe ba batho ba matla”?
[Setšoantšo se leqepheng la 13]
Ke’ng e re thusang ho leleka ‘menahano ea rōna e hlokisang botsitso’?