Re ka Etsa Joang Hore Matsatsi a Rōna a Amohelehe ho Jehova?
“Maobane, ho lahlehile lihora tse peli tsa bohlokoa kae-kae pakeng tsa ha letsatsi le chaba le ha le likela, hora e ’ngoe le e ’ngoe e e-na le metsotso ea bohlokoa e mashome a tšeletseng. Ha lia lefuoa ka letho, hobane li ile li etse moela-ruri!”—Lydia H. Sigourney, sengoli sa Leamerika (sa 1791-1865).
HO BONAHALA re phela matsatsi a seng makae feela ’me a feta ka potlako. Mopesaleme Davida o ile a nahana kamoo bophelo bo leng bokhutšoanyane kateng ’me a susumelletseha hore a rapele a re: “Jehova, u etse hore ke tsebe bofelo ba ka, le tekanyo ea matsatsi a ka—hore na ke eng, e le hore nka tseba kamoo ke phelang nako e khutšoanyane kateng. Bona! U entse hore matsatsi a ka e be a seng makae feela; nako ea bophelo ba ka e joaloka lefeela ka pel’a hao.” Davida o ne a rata ho phela ka tsela e khahlisang Molimo, ka lipolelo tsa hae le ka liketso tsa hae. Ha a bolela hore o tšepile Molimo, o ile a re: “Tebello ea ka e ho uena.” (Pesaleme ea 39:4, 5, 7) Jehova o ile a mo mamela. O ile a fela a sekaseka liketso tsa Davida ’me a mo putsa ka tšoanelo.
Ho bonolo hore motho a tšoarehe letšehare lohle le hore a phathahane bophelong bo potlakileng le bo linthoana-nthoana. Sena se ka ’na sa re tšoenya, haholo hobane re e-na le lintho tse ngata tseo re tlamehang ho li etsa empa re e-na le nako e fokolang. Na joaloka Davida re tšoenyehile ka hore re phele ka sepheo sa ho amoheleha ho Molimo? Ha ho pelaelo hore Jehova o bona e mong le e mong oa rōna ’me o hlahloba e mong le e mong oa rōna ka hloko. Lilemong tse fetileng tse ka bang 3 600, monna ea bitsoang Jobo ea neng a tšaba Molimo, o ile a lumela hore Jehova o bona litsela tsa hae le hore o hlahloba liketso tsa hae kaofela. Jobo o ile a ipotsa a re: “Ha a batla boikarabello, ke tla mo araba ke re’ng?” (Jobo 31:4-6, 14) Re ka etsa hore matsatsi a rōna e be a bohlokoa ho Molimo ka ho etelletsa pele lintho tsa moea, ka ho mamela litaelo tsa hae le ka ho sebelisa nako ka bohlale. A re ke re hlahlobeng lintho tsena ka hloko.
A re Ameheng Haholo ka Lintho Tsa Moea
Mangolo a bululetsoeng a nepile ha a re khothalletsa ho etelletsa lintho tsa moea pele ha a re: “Nepisisa lintho tsa bohlokoa haholo.” Lintho tsee tsa bohlokoa ke life? Li akarelletsa “tsebo e nepahetseng le temoho e feletseng.” (Bafilipi 1:9, 10) Re lokela ho sebelisa nako ka bohlale ha re batla ho tseba merero ea Jehova. Leha ho le joalo, ha re etelletsa lintho tsa moea pele, re tla fumana bophelo bo molemo le bo khotsofatsang.
Moapostola Pauluse o re hopotsa hore ‘re ’ne re nepisise hore na ke sefe se amohelehang ho Morena.’ Ha re ntse re nepisisa hore na ke sefe se amohelehang, re lokela ho hlahloba lipakane tsa rōna le litakatso tsa lipelo tsa rōna. Moapostola Pauluse o tsoela pele o re: “Le tsoele pele ho lemoha seo thato ea Jehova e leng sona.” (Baefese 5:10, 17) Kahoo, ke’ng se amohelehang ho Jehova? Maele a Bibele a re: “Bohlale ke ntho ea bohlokoa ka ho fetisisa. Fumana bohlale; ’me hammoho le sohle seo u se fumanang, fumana kutloisiso. Bo nke e le ba bohlokoa haholo, ’me bo tla u phahamisa.” (Liproverbia 4:7, 8) Jehova o thabisoa ke motho ea fumanang bohlale ba bomolimo ’me a bo sebelisa. (Liproverbia 23:15) Bohlale bona bo molemo hobane ha ho motho ea ka u amohang bona kapa a bo senya. Ha e le hantle, ke tšireletso le thuso ‘tseleng e mpe, le ho batho ba buang lintho tse khelohileng.’—Liproverbia 2:10-15.
Kahoo, ho molemo hakaakang hore re se ke ra itloaetsa ho tella lintho tsa moea! Re lokela ho ithuta ho ananela lipolelo tsa Jehova le ho mo tšaba ka tsela e nepahetseng. (Liproverbia 23:17, 18) Ke ’nete hore re ka ’na ra ithuta lintho tsena neng kapa neng bophelong, empa ho molemo ka ho fetisisa hore re sa le banyenyane, re qale mokhoa ona o nepahetseng re be re tebise ka ho rōna melao-motheo ea Bibele. Morena Solomone ea bohlale o re: “U hopole ’Mōpi oa hao e Moholo, hona joale, matsatsing a bohlankana ba hao.”—Moeklesia 12:1.
Tsela ea bohlokoa ka ho fetisisa ea ho bontša hore re leboha Jehova ke hore re mo rapele letsatsi le leng le le leng. Davida o ile a lemoha hore ke habohlokoa ho bolella Jehova makunutu, hobane o ile a kōpa ka tieo a re: “U utloe thapelo ea ka, Jehova, u mamele mohoo oa ka o kōpang thuso. U se ke ua khutsetsa meokho ea ka.” (Pesaleme ea 39:12) Na re atamelane le Molimo haholo hoo ka linako tse ling re beng re tšolle meokho? Ka sebele, haeba kamehla re bolella Jehova makunutu a lipelo tsa rōna ’me re thuisa ka Lentsoe la hae, o atamela haufi le rōna haholo.—Jakobo 4:8.
Ithute ho Mamela
Moshe le eena ke monna oa tumelo ea neng a hlokomela hore o behile tšepo ho Molimo. Joaloka Davida, Moshe o ne a bona hore bophelo bo likhathatso. Kahoo, o ile a kōpa Molimo ka tieo hore a mo rute ho ‘bala matsatsi a hae ka tsela eo ka eona a ka fumanang pelo e bohlale.’ (Pesaleme ea 90:10-12) O ne a tla fumana pelo e bohlale hafeela a ne a ithuta melao le melao-motheo ea Jehova a bile a phela tumellanong le eona. Moshe o ne a tseba taba ena ’me hamorao o ile a leka ho hatisa ’nete ena ea bohlokoa sechabeng sa Iseraele ka hore a boele a se bolelle melao le litaelo tsa Molimo pele se hapa Naha e Tšepisitsoeng. Morena e mong le e mong eo hamorao Jehova a neng a tla mo khetha hore a buse Baiseraele, o ne a lokela ho ingolla Molao le ho o bala ka matsatsi ’ohle ha a sa phela. Ka lebaka lefe? E le hore a ka ithuta ho tšaba Molimo. Sena se ne se tla bontša hore na ebe kannete morena oa mamela. Se ne se tla mo thibela hore a se ke a iphahamisetsa barab’abo ’me hape se ne se tla lelefatsa puso ea hae. (Deuteronoma 17:18-20) Jehova o ile a pheta tšepiso ena ha a ne a re ho Solomone, mora oa Davida: “Haeba u tla tsamaea litseleng tsa ka ka ho boloka melao ea ka ea tsamaiso le litaelo tsa ka, feela joalokaha ntat’ao Davida a tsamaile, ke tla boela ke lelefatse matsatsi a hao.”—1 Marena 3:10-14.
Ho mamela ke ntho ea bohlokoa ho Molimo. Haeba re ne re ka halala lintho tseo Jehova a li hlokang ho rōna le litaelo tsa hae, ha ho pelaelo hore o ne a tla bona boikutlo bo joalo. (Liproverbia 15:3) Ha re tseba sena re tla susumetseha ho hlompha ka botebo litaelo tsohle tsa Jehova, leha ho etsa joalo ho ke ke ha e-ba bonolo kamehla. Satane o etsa sohle se matleng a hae ho “thiba tsela ea rōna” ha re ntse re loanela ho mamela melao ea Molimo le litaelo tsa Hae.—1 Bathesalonika 2:18.
Ke habohlokoa haholo ho lumellana le keletso ea Mangolo ea ho kopana hammoho bakeng sa borapeli le botsoalle. (Deuteronoma 31:12, 13; Baheberu 10:24, 25) Re lokela ho ipotsa: ‘Na ke ikemiselitse ebile ke mokoka kamoo ho hlokahalang ho etsa se tšoanelehang?’ Ha re hlokomoloha botsoalle le taeo tse fanoang libokeng tsa Bokreste ka lebaka la ho leka ho bokella chelete, re tla fokolisa kamano ea rōna le Jehova. Moapostola Pauluse o ile a ngola a re: “Mokhoa oa lōna oa bophelo e ke e be o se nang lerato la chelete, ha le ntse le khotsofaletse lintho tse teng. Etsoe [Jehova] o itse: ‘Ho hang nke ke ka u tlohela kapa ka u furalla.’” (Baheberu 13:5) Ha re ithaopela ho mamela litaelo tsa Jehova, re bontša hore re na le tšepo e feletseng ea hore o tla re hlokomela.
Jesu o ile a ithuta ho mamela ’me hoo ha mo ruisa molemo. Le rōna re ka mo etsisa. (Baheberu 5:8) Ha re mamela haholoanyane, re tla nolofalloa ho mamela le linthong tse nyenyane. Ke ’nete hore ka lebaka la botšepehi re ka ’na ra tlameha ho mamella hore batho ba bang ba re tšoare hampe ba be ba re khahlapetse. Sena se ka ’na sa etsahala haholo mosebetsing, sekolong, kapa lelapeng le arohaneng bolumeling. Empa re tšelisoa ke se ileng sa bolelloa Baiseraele hore haeba ba ne ba ka ‘rata Jehova ka ho mamela lentsoe la hae le ka ho mo khomarela, [Jehova] e ne e tla ba bophelo ba bona le bolelele ba matsatsi a bona.’ (Deuteronoma 30:20) Ke sona seo re se tšepisoang le rōna.
Sebelisa Nako ka Bohlale
Ha re sebelisa nako ka bohlale, sena se tla re thusa ho etsa hore matsatsi a rōna e be a bohlokoa ho Jehova. Ho fapana le chelete eo motho a ka e bolokang, nako e lokela ho sebelisoa, ho seng joalo ea senyeha. Hora ka ’ngoe e fetang e ile e etse mo-ela-ruri. Kaha kamehla re na le mosebetsi o fetang liatla, na re sebelisa nako ka tsela e tla re thusa ho finyella lipakane tsa rōna? Pakane e ka sehloohong ea Bakreste bohle e lokela ho ba ho kopanela kamehla mosebetsing oa ho bolela ka ’Muso le oa ho etsa barutuoa.—Matheu 24:14; 28:19, 20.
Re tla sebelisa nako ka bohlale ha re se re lemohile hore ke ea bohlokoa. Baefese 5:16 e nepile ha e re phehella hore re “ithekele nako e loketseng” ka ho tela lintho tseo e seng tsa bohlokoa haholo. Sena se bolela ho fokotsa lintho tse senyang nako. Ha re shebella thelevishene, re fuputsa Internet, re bala lingoliloeng tse seng molemo tsa lefatše, re ithabisa kapa re ikhatholla ho tlōla tekanyo, re tla khathala haholo. Ho phaella moo, ho ipokella ka lintho tse bonahalang ho ka ja nako e hlokahalang bakeng sa ho fumana pelo e bohlale.
Batho ba buellang hore nako e sebelisoe ka hloko ba re: “Ho thata ho sebelisa nako hamolemo haeba u sa ipehela lipakane tse hlakileng le tse tobileng.” Ba khothalletsa lintho tsena tse hlano bakeng sa ho ipehela lipakane, e leng hore: e be tse tobileng, tse nang le kemiso, tse ka finyelloang, tsa sebele le tse behetsoeng nako.
Pakane e ’ngoe ea bohlokoa ke ho bala Bibele ka tsela e re tsoelang molemo. Bohato ba pele ke ho beha sepheo se tobileng sa ho bala Bibele kaofela. Bohato bo latelang ke ho etsa pakane e nang le kemiso. Ha re etsa sena, re ka bona hore na re tsoela pele joang. Lipakane li lokela ho re khothalletsa hore re ikitlaetse le hore re se ke ra ema nģa e le ’ngoe. Hape e be tse ka finyelloang le tsa sebele. Re lokela ho nahanela bokhoni ba rōna, tsebo le nako eo re nang le eona. Ba bang ba ka ’na ba hloka nako e eketsehileng ho finyella pakane ea bona. Ntho ea ho qetela ke hore pakane ea rōna e beheloe nako. Ho beha letsatsi leo re tla finyella ntho ka eona ho ka ’na ha re susumelletsa ho e phetha.
Litho tsohle tsa lelapa la Bethele la lefatše ka bophara, tse sebetsang ntlo-khōlō ea Lipaki Tsa Jehova kapa ho le leng la makala a tsona a lefatšeng lohle, li na le pakane ea ho bala Bibele kaofela selemong sa tsona sa pele li le Bethele. Li hlokomela hore ho bala Bibele ho nang le thuso ho li hōlisa moeeng ’me ho etsa hore li be le kamano e haufi le Jehova, ea li rutang hore li itsoele molemo. (Esaia 48:17) Na le rōna re ka iketsetsa pakane ea ho bala Bibele kamehla?
Melemo ea ho Etsa Hore Matsatsi a Rōna e be a Bohlokoa
Ha re etelletsa pele litaba tsa moea, re tla fumana mahlohonolo a mangata. Ka mohlala, ho re thusa ho thabela hore ho na le seo re se finyeletseng bophelong. Ho buisana kamehla le Jehova ka thapelo e tlohang pelong ho re atametsa ho eena haholoanyane. Ha re rapela re bontša hore rea mo tšepa. Haeba kamehla re bala Bibele le lingoliloeng tse thehiloeng Bibeleng tse lokisetsoang ke “lekhoba le tšepahalang le le masene,” re bontša hore re rata ho mamela ha Molimo a bua la rōna. (Matheu 24:45-47) Sena se re thusa hore bophelong re fumane pelo e bohlale e tla re thusa ho etsa liqeto tse nepahetseng le hore re khethe lintho tse nepahetseng.—Pesaleme ea 1:1-3.
Re thabela ho mamela litaelo tsa Jehova hobane ha ho boima ho etsa joalo. (1 Johanne 5:3) Ha re ntse re etsa hore letsatsi le leng le le leng e be la bohlokoa kamanong le Jehova, re matlafatsa kamano ea rōna le eena. Re boetse re ba litšiea tsa ’nete tsa moea tse tšehetsang Bakreste-’moho le rōna. Liketso tsena li thabisa pelo ea Jehova Molimo. (Liproverbia 27:11) ’Me ha ho na moputso o fetang ho thabela ho amoheloa ke Jehova hona joale le ka ho sa feleng!
[Setšoantšo se leqepheng la 21]
Bakreste ba nka litaba tsa moea ka botebo
[Setšoantšo se leqepheng la 22]
Na u sebelisa nako ea hao ka bohlale?
[Setšoantšo se leqepheng la 23]
Re matlafatsa kamano ea rōna le Jehova ha re etsa hore letsatsi ka leng e be la bohlokoa kamanong le eena