Bacha Baa Botsa . . .

Livideo Tsa ’Mino—Nka li Khetha Joang?

“Ha ke bona ho hlaha lebitso la sehlopha kapa pina e belaetsang, ke chencha seteishene.”—Casey.

LIVIDEO TSA ’MINO—bacha ba bangata ba li fumana li thabisa haholo. Empa joalokaha sehlooho se fetileng letotong lena se bontšitse, livideo tse ngata tsa ’mino li bontša boitšoaro bo bobe ba ho kopanela liphate le pefo ka tsela e tšosang.a Ho hlakile hore ha mofuta leha e le ofe oa boithabiso o khothalletsa ntho eo Molimo a e nyatsang, Mokreste o lokela ho qoba ho o shebella. Empa hase livideo tsohle tsa ’mino tseo ka ho totobetseng e leng tsa boitšoaro bo bobe. Tse ling li batla li hloekile. Tse ling li ka ’na tsa bonahala li se na bobe ka ho feletseng. Leha ho le joalo, livideo tse joalo li ka fetisa molaetsa o poteletseng o hananang le Lentsoe la Molimo.

Haeba batsoali ba hao ba u lumella hore u shebelle livideo tsa ’mino, u tla tlameha ho khetha le ho sebelisa ‘matla a hao a ho lemoha’ a koetlisitsoeng ke Bibele e le hore u tsebe ho khetholla se nepahetseng ho se fosahetseng ho tseo u li shebellang. (Baheberu 5:14) Ke melao-motheo efe ea Bibele e ka u thusang ntlheng ee? Ka tlaase mona ho thathamisitsoe litemana tsa Bibele le litlhaloso tse ka ’nang tsa u tsoela molemo.

Liproverbia 4:23: “Ho feta tse ling tsohle tse lokelang ho lebeloa, u sireletse pelo ea hao, kaha mehloli ea bophelo e tsoa ho eona.” Na u na le thepa e itseng ea lipapali kapa liletsa tsa ’mino tseo u li nkang e le tsa bohlokoa? Ha ho pelaelo hore u etsa ka matla ho li boloka li le boemong bo botle le ho li beha sebakeng se sireletsehileng. Joang kapa joang u ne u ke ke ua li siea seterateng, esita le ka motsotsoana feela, moo u tšabang hore li ka senngoa kapa tsa utsuoa. E, ua li sireletsa. Ka tsela e tšoanang, u tlameha ho etsa qeto ea ho sireletsa pelo ea hao, u se ke ua e pepesetsa kotsi le e nyenyane ka boithabiso bo sa hloekang.

Baefese 2:1, 2: “Ke lōna bao Molimo a ileng a ba phelisa le hoja le ne le shoele litšitong le libeng tsa lōna, tseo ka nako e ’ngoe le neng le tsamaea ho tsona ho ea ka tsamaiso ea lintho ea lefatše lena, ho ea ka ’musi oa matla a moea, moea oo hona joale o sebetsang ho bara ba ho se mamele.” Moea ona ke oa lefatše, tsela ea ho nahana le boikutlo bo khothalletsang boitšoaro ba boetsalibe. Moea ona o bonahatsoa livideong tse ngata tsa ’mino ’me o khahlanong ka ho feletseng le moea oa Molimo, o hlahisang litšobotsi tse kang thabo, khotso le boitšoaro.—Bagalata 5:22, 23.

2 Timothea 2:22: “U balehele litakatso tsa tlhaho tsa bocha.” Ho shebella liketso tsa ho kopanela liphate—leha e ka ba hakhutšoanyane feela—ho ka totisa litakatso le ho feta. Bacha ba bangata baa lumela hore ho thata ho lebala lintho tse joalo tseo ba li boneng; ba ka ba ba lula ba ntse ba li bapala hape mohopolong oa bona. Mohlankana ea bitsoang Dave, ea ileng a shebella video e tsosang takatso ea boitšoaro bo bobe oa lumela: “Ka mor’a moo, neng le neng ha ke utloa pina eo ke nahana ka video ena.” Ka hona, ho shebella livideo tse joalo ho ka hōlisa takatso ea ho kopanela boitšoarong bo bobe ba ho kopanela liphate.—1 Bakorinthe 6:18; Bakolose 3:5.

Liproverbia 13:20: “Ea bang le litšebelisano le ba hlokang kelello lintho li tla mo tsamaela hampe.” Ipotse, ‘Na nka memela batho ba etsang liketso tse mabifi, ba sebelisanang le meea, matahoa kapa ba itšoereng hampe lapeng heso?’ Ho etsa botsoalle le batho ba joalo ka ho ba shebella thelevisheneng ho tšoana le ho ba memela heno. Na ho etsa joalo ho tla etsa hore ‘lintho li u tsamaele hampe?’ Kimberly o re: “Ke bone ’mokeng e meng ea botsoalle banana ba apara kapa ba tantša ka tsela e tsosang takatso ho latela seo ba se boneng videong ea morao-rao eo ba neng ba e shebeletse.” E ka ’na eaba u bone se tšoanang. Ka ho etsisa ba sa hlompheng litekanyetso tsa Molimo, bacha bana ba se ba ntse ba bontša hore ‘lintho li ba tsamaela hampe.’ Ka hona, qoba ka hohle mokhoa leha e le ofe oa “litloaelano tse mpe.”—1 Bakorinthe 15:33.

Pesaleme ea 11:5: “Jehova o hlahloba ea lokileng hammoho le ea khopo, ka sebele moea oa Hae o hloile mang kapa mang ea ratang pefo.” Haeba re shebella livideo tse khothalletsang pefo e se nang kelello le e bolileng, na ebe mohlomong ha re fane ka maikutlo a hore re ba ‘ratang pefo?’

Phephetso ea ho Khetha

Kaha “lefatše lohle le rapaletse matleng a ea khopo,” ho batla ho le thata haholo ho fumana boithabiso bo sa silafatsoang ke monahano le boikutlo ba lefatše lena. (1 Johanne 5:19) Liteishene tse ling tse bapalang livideo tsa ’mino li ka bontša liketso tse ngata tse sa nepahalang. Esita le haeba lenaneo le sa bontše boitšoaro bo bobe kapa pefo pepenene, hangata le ntse le khothalletsa moea oa lefatše. Sebini se seng sa boemo se hlokometse hore seteishene se seng se tsebahalang se bapalang livideo tsa ’mino “ha e sa le seteishene sa ’mino, empa se fetohile ‘seteishene se khothalletsang mokhoa o itseng oa bophelo.’”

Tharollo e ka bonahala e le bonolo: Haeba video e fosahetse, chencha seteishene. Bothata ke hore u ntse u lokela ho ba seli ha u shebella liteishene tse ling tsa TV. Tse ngata li bontša mananeo ao ka ho hlakileng e leng a pefo kapa a litšila, kapa a bontšang batho ba maemong a belaetsang a boitšoaro. Ha ho pelaelo hore hoa tena—mohlomong ho bile hoa ferekanya—ho leka ho thabela boithabiso bo itseng ha ka nako e tšoanang u lebelletse hore neng kapa neng u ka ’na ua tlameha ho chencha seteishene. Hape, ka linako tse ling seteishene se chenchoa tšenyo e se e bakiloe. Litšoantšo tsa boitšoaro bo bobe li se li hatisehile kelellong. Leha ho le joalo, u ka kholiseha hore Jehova Molimo o tla hlohonolofatsa boiteko leha e le bofe ba sebele boo u bo etsang ho sireletsa pelo ea hao.—2 Samuele 22:21.

Ho na le mehato e meng e thusang e ka u tsoelang molemo. Casey ea boletsoeng pejana, o hlalositse seo a fumaneng se mo thusa: “Lebitso la sehlopha le la pina li atisa ho bontšoa qalong ea video. Lihlopha tsa libini lia tsebahala, ka hona, hangata ua tseba hore na ke lihlopha life le lipina life tseo ho ka etsahalang hore ebe li fosahetse. Ka hona, ha ke bona ho hlaha lebitso la sehlopha kapa pina e belaetsang, ke chencha seteishene ka eona nako eo. Sethathong.”

‘Ho Bua ’Nete Pelong ea Hao’

Esita le haeba u hlometse ka tsebo ea melao-motheo ea Bibele, hoa etsahala hore u qale ho mamella se fosahetseng. Joang? Ka ho qala ho ipehela mabaka a sa utloahaleng. (Jakobo 1:22) Bibele e re bolella hore motsoalle oa Jehova ke ea ‘buang ’nete ka pelong ea hae.’ (Pesaleme ea 15:2) Kahoo, toba ’nete. Qoba ho ithetsa. Haeba u iphumana u lokafatsa ho shebella ha hao ntho e itseng e belaetsang, ipotse, ‘Na ka sebele Jehova o rata ha ke shebella see?’ Hopola hore hangata bothata hase feela taba ea ho tseba se nepahetseng kapa se fosahetseng, empa ke ho etsa qeto ea ho etsa se nepahetseng! U lokela ho nka kamano ea hao le Jehova e le ea bohlokoa haholo ho feta boithabiso ba mefuta e itseng.—2 Bakorinthe 6:17, 18.

Hangata ha hoa lekana ho etsa qeto ka pelo e sa fellang le hore ka kakaretso u ikemisetse hore u tla leka ho khetha. Qeto ea hao e ka fela ka potlako haeba e sa tiea. Bibele e re bolella kamoo monna oa Molimo ea bitsoang Jobo a ileng a etsa qeto ea ho tšepahala ho mosali oa hae kateng. O itse: “Ke hlabile selekane le mahlo a ka. Kahoo nka ela moroetsana hloko joang?” (Jobo 31:1) Nahana feela! Jobo o ile a iketsetsa selekane, tumellano e tšepahalang ea ho ipehela meeli ho seo mahlo a hae a ka se bonang. Le uena u ka etsa se tšoanang. Etsa qeto e tiileng—iketsetse tšepiso e tšepahalang—ea hore u ke ke ua shebella lintho tse mpe. Ipehele meeli e tobileng. Rapella taba ena. Joale u tšepahalle qeto eo u e entseng, esita le ho e ngola fatše haeba hoo ho ka u thusa. Haeba u hloka hore motho e mong a u thuse, ke hobane’ng ha u sa bue le motho e mong e moholo eo u mo tšepang—mohlomong motsoali oa hao?

Ka lebaka la likotsi tsa eona, bacha ba bang ba Bakreste ba entse qeto ea hore ho hang ba se shebelle livideo tsa ’mino. Ho sa tsotellehe hore na qeto ea hao ke efe tabeng ena, sebelisa matla a hao a ho lemoha. Boloka letsoalo la hao le hloekile. Ka ho thabela feela boithabiso bo hloekileng le bo khathollang, u ka qoba ho intša kotsi, ua ba ua boloka botsoalle ba hao le Jehova.

[Mongolo o botlaaseng ba leqephe]

[Setšoantšo se leqepheng la 21]

Livideo tse ling ha li na boitšoaro bo bobe ka ho feletseng empa li ntse li khothalletsa likhopolo tse kotsi

[Setšoantšo se leqepheng la 22]

Etsa qeto ea hore u ke ke ua shebella lintho tseo Molimo a li nyatsang