Kamoo ho ka Hlōloang Phephetso ea Boitšoaro ea ho ba Mofutsana
NGAKA e ’ngoe ea Afrika e ile ea bolela hore: “Batho ba futsanehile kahobane ba botsoa. Motse ona o tletse likhoba. Haeba kannete ba ne ba batla mosebetsi, ba ne ba ka o fumana. Ha ho hlokahale hore mang kapa mang a futsanehe kajeno.”
Ha ho pelaelo hore batho ba bang ba botsoa le hore botsoa boo bo ka lebisa bofumeng. Bibele e re: “Borokonyana hape, le ho otsela ho honyenyane, le ho iphutha matsoho ho phomola ’me bofuma bo tla u fihlela joale ka senokoane, tlala e u hlahele joale ka motho ea u hlomeletseng.” (Liproverbia 24:33, 34) Leha ho le joalo, batho ba bangata ba futsanehileng ho hang ha ba botsoa. Ka mohlala, nahana ka monna ea ileng a ngola: “Ho fihlela nako ena, rea lapa, rea nyoroa, re hlobotse, rea jabeloa, ’me re hloka setša.” (1 Ba-Korinthe 4:11) Na e ne e le sekhoba se ke keng sa phekoloa? Le hanyenyane. Mantsoe ao a ile a ngoloa ke moapostola Pauluse. O ile a khetha ho phela bophelo ba ho ba le se fokolang moruong e le hore a ka phehella hamolemonyana tšebeletso ea Bokreste. Ho hloka litlhoko tse ling tsa bophelo ho ile ha boela ha bakoa ke maemo ao a neng a ke ke a a laola, a kang tlhoriso ea bolumeli.
Kajeno, bafutsana ba bangata ba lefatše ba hlaseloa ke maemo ao ba ke keng ba a laola—mohlomong khaello ea thuto, ho hlōleha ha maemo a moruo oa sebaka, kapa morusu oa lipolotiki. Ba bangata ba sebetsa ka thata ho tloha hoseng haholo ho fihlela ka phirimana ’me ba fumana ho honyenyane feela hoo ba phelang ka hona. Kahoo menyetla ea ho fumana chelete ka bolotsana e ka ’na ea bonahala e le e ipiletsang, esita le e hlokahalang. Ba bang ba ka ’na ba beha lebaka la hore Bibele e lokafatsa ho kheloha boitšoarong ka linako tse ling! Etsoe, e re: “Sholu ha le utsoa hoba le lapile, batho ha ba ke ba le nyelisa.” ’Me monna ea bohlale o ile a rapela: ‘Ke se ke ka oela bofumeng ’me ka utsoa.’—Liproverbia 6:30, BPN; 30:8, 9, NW.
Botšepehi—Boemo ba Bibele
Na ka sebele litemana tsena tsa Bibele li amohela bolotsana ka mokhoa o potelletseng? Koana, a re ke re hlahlobeng taba e li potolohileng. Ka mor’a ho bolela hore batho ha ba nyelise lesholu le utsoang hore le khorise mpa ea lona, Liproverbia 6:31 (BPN) e tsoela pele: “Ha le tšoaroa le tla lefa hasupa, le lefe ka tsohle tsa lapa la lona.” Ka mantsoe a mang, ha lesholu leo le tšoaroa, le tobana le kahlolo e phethahetseng ea molao. Le lefella tlōlo ea lona ea molao! Ka hona, ho e-na le ho khothalletsa bosholu, mantsoe ana a lemosa bafutsana hore bosholu bo ka fella ka tahlehelo e eketsehileng ea moruo, ho itlotlolla bona ka bobona le malapa a bona, le ho lahleheloa ke tlhompho.
Empa ho thoe’ng ka thapelo ea monna ea bohlale? O ile a kōpa hore a se ke a futsaneha ’me ‘a utsoa, ’me a tlaela ka lebitso la Molimo oa hae.’ (Liproverbia 30:9) E, bolotsana bo etsoang ke motho ea ipolelang hore o sebeletsa Jehova bo ka tlisa thohako lebitsong la Molimo le phuthehong ea batho ba Oona. Moapostola Pauluse o ngotse: “Uena ea bolelang hore ho se ke ha utsuoa, ua utsoa!” Haeba ba bang ba ipolelang hore ke Bakreste ba ne ba ka utsoa, sena se ne se ka etsa hore ‘lebitso la Molimo le nyefoloe har’a bahedene.’—Ba-Roma 2:21, 24.
Ka hona, ka lebaka le letle Bibele e re: “Ho molemo ho ba mofutsana ea phelang ka botšepehi, ho e-na le ho ba morui ea phelang ka bolotsana.” (Liproverbia 28:6, BPN) Le hoja ka linako tse ling moapostola Pauluse ka boeena a ne a haelloa ke lintho tse hlokahalang, ha ho mohla a ileng a emela kapa a retelehela bolotsaneng. Ho fapana le hoo, o ile a ngola: “Ea neng a utsoa, a se ke a hlola a utsoa, a mpe a ineele ho sebetsa lintho tse molemo ka matsoho a hae, a tle a tsebe ho nea ea hlokang.”—Ba-Efese 4:28.
Tharollo: Ho Tšepa Molimo
Ho thoe’ng ka ba sebetsang ka thata empa ba sa fumane moputso o lekaneng ho hlokomela malapa a bona? Na bolotsana kapa esita le bosholu bo ka lokafatsoa boemong ba bona, haholo-holo haeba ho kula ho hlasela setho sa lelapa kapa ho hlaha boemo ba tšohanyetso? Batho ba bang ba nahana joalo. Moahi oa naha e ’ngoe ea Afrika o itse: “Naheng ea rōna, haeba u tšepahala, u ke ke ua phela. Haeba u batla hore u ’ne u phele, u tlameha hore u be le matšoephelele a ’maloa tseleng ea hao ea bophelo.”
Empa, ho pholletsa le Afrika motho o atisa ho bona mantsoe “Tšepa Molimo” a ngotsoe ka mebala-bala literakeng, a bontšitsoe mamatjaneng a manehiloeng maboteng, a ngotsoe lijaneng le mekhabisong le lipampiring tse khomaretsoang makoloing. Bibele ka boeona e re: “U tšepe Jehova ka pelo ea hao eohle.” (Liproverbia 3:5) Le ka mohla bolotsana bo ke ke ba lumellana le khothatso eo ea Bibele. Empa na ka sebele ho tšepa Molimo ke karabelo e sebetsang phephetsong ea boitšoaro ea ho ba mofutsana?
Joaloka mosebeletsi oa Molimo, moapostola Pauluse o ile a feta har’a mathata a kang ‘tlala le lenyora, ho itima lijo, ho hatsela, le ho hlobola.’ (2 Ba-Korinthe 11:27, NW) Ka sebele, e tlameha e be Pauluse o ne a ile a ipotsa hore na o ne a tla phela joang! Empa ka mor’a lilemo tse 25 tsa phihlelo ea Bokreste, o ne a ka ngola: “Ke tseba ho kokobetsoa, ke tseba le ho ateloa ke lintho; kahohle le nthong tsohle, ke ithutile ho khora le ho lapa, ho ba naleng le ho ba bofumeng. Nka etsa tsohle ka . . . ea mphang matla.” (Ba-Filippi 4:12, 13) E, Pauluse o ne a tšepile Molimo.
Pauluse o ile a hlokomela hore melao-motheo ea Mangolo hase mantsoe a lefeela, a ke keng a phethahala. Ke litaelo tse tsoang ho Molimo o phelang o laba-labelang ho thusa le ho tšehetsa ba batlang ho li sebelisa. Moprofeta e mong oa boholo-holo o ile a re: “Ruri, mahlo a Jehova a qamaka lefatšeng lohle hore a emele bao pelo tsa bona e leng tsa hae kaofela.”—2 Likronike 16:9.
Li Hlohonolofalitsoe ka Lebaka la ho Tšepa Molimo
Ke hobane’ng ha ho tšepa Molimo ho le thata hakaale ho batho ba bangata? Ntle le pelaelo ke hobane bolumeli ba bona bo hlōlehile ho ba fa mabaka a lekaneng a ho etsa hoo. Likereke li entse hore Molimo o hlahe e le o hlokang lebitso, oo ho leng thata ho o utloisisa, e se motho oa sebele, e le o phahametseng kutloisiso ea motho. Empa ka thuto ea Bibele, Lipaki tsa Jehova li tsebile Molimo, eseng e le matla a mang ao li ke keng tsa a utloisisa, empa e le Motho ea nang le lebitso. (Pesaleme ea 83:18; Ba-Heberu 9:24) Li ithutile hore o na le litšoaneleho tse o etsang o lokeloang ke hore re o tšepe. Ka mohlala, ho ea ka Exoda 34:6, Jehova ke “Molimo o mohau, o lereko, o liehang ho halefa, o tletseng mohau le ’nete.” Lipaki li tšepa Molimo ’me li hlokomela hore o ‘tletse ’nete.’ Kahoo, li na le tšepo e felletseng tšepisong ea oona ea ho tlisa lefatše le lecha le se nang bofuma bo bakang khatello boo hona joale bo hlokofatsang moloko oa batho haholo hakana.—2 Petrose 3:13.
Ka hona Lipaki tsa Jehova tse limillione li pakile hore ho tšepa Molimo hoa sebetsa. Ka mohlala, Rosaline, Paki e ’ngoe ea Sierra Leone, o sebetsa ka thata ho tloha ka hora ea bohlano hoseng ho fihlela bosiu e le hore a itlhokomele ka boeena hammoho le bana ba hae ba tšeletseng ka lijo le liaparo. O re: “Batho ba bangata ba bolela hore ho phela bophelo ba botšepehi ha ho khonehe, empa kea tseba hore sena hase ’nete. Ka linako tse ling ke ba le mathata ’me kea tsieleha hore na a tla rarolloa joang. Empa kea tseba hore haeba ke phela bophelo ba botšepehi, ntho e ’ngoe le e ’ngoe ea ka e tla loka. Kahoo ke leka ka thata hore ke se halefise Jehova.”
Mongoli e mong o ile a re: “Monna oa mofutsana ea lapileng o hloka tšepo . . . ho feta bohobe.” E, ho hloka tšepo, ho nyahama, le ho hloka thabo ka mehla ke mahlomola a ka bang bohloko ho feta tlala. Empa ha ho hlokahale hore ea tsebang Molimo le ea o tšepang a inehele ho nyahameng. Rosaline o phaella ka ho re: “Hona joale ke sebetsa ka thata, empa ke thabile hobane kea tseba hore nako e-ea tla eo nke keng ka lokela ho sebetsa ka thata ka tsela ena. Hona joale ke sebetsa ka thata hore ke iphumanele lijo hammoho le lelapa la ka, empa lefatšeng le lecha la Jehova, ho tla ba le lijo tse ngata. Kahoo hona joale ke na le tšepo le thabo eo ho seng mohla nkileng ka ba le eona pele ke tseba Jehova.”—Bapisa le Esaia 25:6; Tšenolo 21:3, 4.
Ke ’nete hore ba tšepang Molimo ba ka ’na ba feta har’a likhatello tsa moruo, joaloka moapostola Pauluse. Empa ha ho hlokahale hore le ka mohla ba retelehele ho tlōleng melao ea Molimo e le hore ba khone ho fumana moruo hore ba ’ne ba phele. Mopesaleme Davida o ile a re: “Nkile ka ba mocha, ’me joale ke tsofetse; empa ha ke e-so ho bone ea lokileng a tloheloa, leha e le litloholo tsa hae li sikila bohobe.” (Pesaleme ea 37:25) E, Molimo o hlokomela le ho hlohonolofatsa ba behang lithahasello tsa oona ka pele bophelong ba bona.—Mattheu 6:25-33.
Kahoo haeba u futsanehile, ‘u se ke ua khathala ho etsa hantle.’ (2 Ba-Thessalonika 3:13) Le ka mohla u se retelehele ho sekisetseng boitšoarong. Haha kamano le Molimo ’me u itšetlehe ka oona hore o u thuse ho sebetsana ka katleho le mathata a boima a bophelo. Ba sebeletsang Jehova le ba mo tšepang baa phehelloa: “Le ke le ikokobetse ka tlas’a letsoho le matla la Molimo, o tle o le phahamise nakong e tšoanelang. Lahlelang lipelaelo tsohle tsa lōna holim’a oona hobane oa le hlokomela.”—1 Petrose 5:6, 7.
[Ntlha e Qolotsoeng e leqepheng la 6]
“Monna oa mofutsana ea lapileng o hloka tšepo . . . ho feta bohobe”
[Setšoantšo se leqepheng la 7]
Lipaki tsa Jehova li thusa batho ho beha tšepo ea bona ho Molimo