‘Litlhohonolofatso ke Tsa ea Lokileng’

BOTSOFALING ba hae, Davida o ile a re: “Nkile ka ba mohlankana, ke se ke tsofetse, leha ho le joalo ha ke e-s’o bone mang kapa mang ea lokileng a tloheloa ka ho feletseng, kapa bana ba hae ba batla bohobe.” (Pesaleme ea 37:25) Jehova Molimo o rata ba lokileng ’me o ba hlokomela ka lerato. Lentsoeng la hae, Bibele, o khothalletsa barapeli ba ’nete ho batla ho loka.—Sofonia 2:3.

Ho loka ke ho ba boemong bo lokileng ho Molimo ka ho boloka litekanyetso tsa hae tsa botle le bobe. Ha e re khothalletsa hore re iphaphathe le thato ea Molimo, khaolo ea leshome ea buka ea Bibele ea Liproverbia e lebisa tlhokomelo litlhohonolofatsong tsa moea tse enneng tse thabeloang ke ba etsang joalo. Har’a tse ling, ke phepelo e ngata ea lijo tse hahang moeeng, mosebetsi o khotsofatsang le o putsang le kamano e ntle le Molimo le batho. Kahoo, a re ke re hlahlobisiseng Liproverbia 10:1-14.

Khothatso e Molemo

Mantsoe a qalang a khaolo ena a tsebahatsa ka ho hlaka hore na mongoli oa karolo e latelang ea buka ena ea Liproverbia ke mang. A baleha ka mokhoa ona: “Maele a Solomone.” A fana ka khothatso e molemo ea ho etsa se nepahetseng, Morena Solomone oa Iseraele ea boholo-holo o re: “Mora ea bohlale o thabisa ntat’ae, ’me mora ea hlokang kelello ke mesarelo ea ’m’ae.”—Liproverbia 10:1.

Batsoali ba sareloa hakaakang ha e mong oa bana ba bona a furalla borapeli ba Molimo oa ’nete le ea phelang! Morena ea bohlale o khetha ho bua ka mesarelo ea ’mè, mohlomong e le ho fana ka maikutlo a hore ’mè o sareloa ka ho tebileng haholoanyane. Ka sebele ho ile ha e-ba joalo ka Doris.a Oa pheta: “Ha mor’a rōna ea lilemo li 21 a tlohela ’nete, ’na le monna oa ka Frank, re ile ra sareloa haholo. Ke ile ka ameha habohloko maikutlong ho feta Frank. Bohloko ha bo e-s’o fole leha ho se ho fetile lilemo tse 12.”

Bana ba ka ama thabo ea bo-ntat’a bona ’me ba bakela bo-’m’a bona masisa-pelo. E se eka re ka ba bohlale ’me ra thabisa batsoali ba rōna. Ntho ea bohlokoa ka ho fetisisa, e se eka re ka thabisa pelo ea Ntat’a rōna oa leholimo, Jehova.

‘Moea oa ea Lokileng o Khotsofetse’

Morena o re: “Matlotlo a ea khopo e tla ba a se nang molemo, empa ho loka ke hona ho tla lopolla lefung.” (Liproverbia 10:2) Bakeng sa Bakreste ba ’nete ba phelang hare-hare mehleng ea bofelo, kannete mantsoe ana ke a bohlokoa. (Daniele 12:4) Ho timetsoa ha lefatše lena le sa tšabeng Molimo ho haufi. Ha ho mokhoa leha e le ofe oa tšireletso o entsoeng ke batho—ebang ke lintho tse bonahalang, chelete kapa mabotho a sesole—o tla ba sireletsa ‘matšoenyehong a maholo’ a tlang. (Tšenolo 7:9, 10, 13, 14) “Ba lokileng ke bona ba tla lula lefatšeng, ’me ba sa tšoauoeng phoso ke bona ba tla sala ho lona.” (Liproverbia 2:21, The New English Bible) E se eka re ka tsoela pele ka hore re “batle ’muso [oa Molimo] pele le ho loka ha hae.”—Matheu 6:33.

Bahlanka ba Jehova ha baa tlameha ho emela lefatše le lecha le tšepisitsoeng pele ba ka fumana lintho tse molemo ho Molimo. “Jehova a ke ke a etsa hore moea oa ea lokileng o lape, empa o tla sutumelletsa takatso ea ba khopo hōle.” (Liproverbia 10:3) Jehova o fane ka lijo tse ngata tsa moea ka “lekhoba le tšepahalang le le masene.” (Matheu 24:45) Ka sebele ea lokileng o na le mabaka a ho “hoeletsa ka thabo ka lebaka la boemo bo botle ba pelo.” (Esaia 65:14) Tsebo e nyakallisa moea oa hae. O thabela ho batla matlotlo a moea. Ea khopo ha a tsebe thabo e joalo.

‘Bokhothali bo Ruisa Motho’

Ea bohlale o boetse o hlohonolofatsoa ka tsela e ’ngoe hape. “Ea sebetsang ka letsoho le monyebe o tla ba le ho honyenyane, empa letsoho la ea khothetseng ke lona le tla ruisa motho. Mora ea etsang ka temohisiso o bokella nakong ea lehlabula; mora ea itšoarang ka mokhoa o hlabisang lihlong o khalehile nakong ea kotulo.”—Liproverbia 10:4, 5.

Mantsoe a morena a hlokomelehang ka ho khetheha ke a mabapi le basebetsi nakong ea kotulo. Nako ea kotulo hase nako ea boroko. Ke nako ea ho khothala le ea ho sebetsa lihora tse telele. Ka sebele, ke nako ea tšohanyetso.

A nahanne ka kotulo ea batho, ho fapana le ea lijo-thollo, Jesu o ile a bolella barutuoa ba hae a re: “Kotulo e khōlō, empa basebetsi ha ba bakae. Ka hona, le kōpe Mong’a kotulo [Jehova Molimo] hore a romele basebetsi kotulong ea hae.” (Matheu 9:35-38) Selemong sa 2000, batho ba fetang limilione tse 14 ba ile ba e-ba teng Sehopotsong sa lefu la Jesu—e leng palo e fetang ea Lipaki tsa Jehova habeli. Ha ho le joalo, ke mang ea ka latolang hore masimo a ‘soeufetse bakeng sa kotulo’? (Johanne 4:35) Barapeli ba ’nete ba kōpa Monghali hore a romele basebetsi ba eketsehileng ha ka nako e tšoanang ba ikitlaetsa ka matla mosebetsing oa ho etsa barutuoa tumellanong le lithapelo tsa bona. (Matheu 28:19, 20) ’Me Jehova o hlohonolofalitse boiteko ba bona hakaakang! Selemong sa tšebeletso sa 2000, ho ile ha kolobetsoa ba bacha ba fetang 280 000. Bana ka ho tšoanang ba leka ka matla ho ba mesuoe ea Lentsoe la Molimo. E se eka re ka thaba le ho khotsofala nakong ena ea kotulo ka ho kopanela ka ho feletseng mosebetsing ona oa ho etsa barutuoa.

‘Litlhohonolofatso ke Tsa Hlooho ea Hae’

Solomone o tsoela pele: “Litlhohonolofatso ke tsa hlooho ea ea lokileng, empa ha e le melomo ea ba khopo, e koahela pefo.”—Liproverbia 10:6.

Ea pelo e hloekileng le ea lokileng o fana ka bopaki bo bongata ba ho loka ha hae. Lipolelo tsa hae li lokile ebile lia haha, liketso tsa hae tsona li ntle ’me o fana ka seatla se bulehileng. Ba bang ba thabela ho ba hammoho le eena. Motho ea joalo o hapa kananelo ea bona—litlhohonolofatso tsa bona—hobane ba mo bua hantle.

Ka lehlakoreng le leng, motho ea khopo o na le lehloeo kapa o lonya ebile ha e le hantle o leka ho ntša ba bang kotsi. Lipolelo tsa hae e ka ba tse monate ’me tsa ‘koahela pefo’ e patiloeng pelong ea hae, empa qetellong o hlasela ka puo le liketso. (Matheu 12:34, 35) Kapa ho fapana le moo, “pefo e tla koahela [kapa e khutsise] melomo ea batho ba khopo.” (Liproverbia 10:6, NW, mongolo o botlaaseng ba leqephe) Sena se supa hore hangata batho ba tšoara motho ea khopo ka tsela eo a ba tšoarang ka eona, e leng ea lehloeo. Kamoo ho ka boleloang kateng, sena se koala molomo oa hae kapa sea o khutsisa. Motho ea joalo a ka lebella lintho life tse molemo ho ba bang?

Morena oa Iseraele o ile a ngola a re: “Sehopotso sa ea lokileng se tla hlohonolofatsoa, empa lebitso la ba khopo le tla bola.” (Liproverbia 10:7) Ea lokileng o hopoloa ka thabo ke ba bang, habohlokoa le ho feta ke Jehova Molimo. Ka lebaka la botšepehi ba hae ho fihlela lefung, Jesu o ile ‘a rua lebitso le khabane ho feta’ a mangeloi. (Baheberu 1:3, 4) Banna le basali ba tšepahalang ba mehleng ea pele ho Bokreste kajeno ba hopoloa ke Bakreste ba ’nete e le mehlala e tšoanelang ho etsisoa. (Baheberu 12:1, 2) See se fapana hakaakang le mabitso a ba khopo, a fetohang ntho e nyonyehang le e bolileng! E, “lebitso le lokela ho khethoa ho e-na le maruo a mangata; kamohelo e molemo le ho feta silevera le khauta.” (Liproverbia 22:1) E se eka re ka iketsetsa botumo ho Jehova hammoho le batho.

‘Ea Tšepahalang o Tla Tsamaea a Sireletsehile’

Ha a bapisa motho ea bohlale le leoatla, Solomone o re: “Ea pelo e bohlale o tla amohela litaelo, empa ea molomo o booatla o tla hatakeloa.” (Liproverbia 10:8) Motho ea bohlale o tseba hantle hore “ha ho matleng a motho ea tsamaeang hore a tsamaise mehato ea hae.” (Jeremia 10:23) O lemoha tlhokahalo ea ho batla tataiso ea Jehova ’me o amohela litaelo tsa Molimo ntle le tikatiko. Ka lehlakoreng le leng, ea molomo o booatla, o sitoa ho utloisisa ’nete ena ea motheo. Ho bebera ha hae ho se nang kelello ho mo isa tšenyehong.

Motho ea lokileng o boetse o thabela khotso e ke keng ea thabeloa ke batho ba khopo. “Ea tsamaeang ka botšepehi o tla tsamaea a sireletsehile, empa ea khopamisang litsela tsa hae o tla itsebahatsa. Ea robang leihlo o tla utloisa bohloko, ’me ea molomo o booatla o tla hatakeloa.”—Liproverbia 10:9, 10.

Monna ea tšepahalang o sebetsana le ba bang ka tsela ea ’nete. O rua tlhompho le ho tšeptjoa ke ba bang. Motho ea tšepahalang ke mosebetsi oa bohlokoa ’me hangata o fuoa boikarabelo bo eketsehileng. Ka lebaka la botumo ba hae bo botle, a ka fumana mosebetsi esita leha mesebetsi e sa fumanehe. Ho feta moo, botšepehi ba hae bo tlatsetsa tikolohong e mofuthu le eo ho eona ho renang khotso lapeng. (Pesaleme ea 34:13, 14) O ikutloa a sireletsehile kamanong ea hae le lelapa la hae. Ka sebele tšireletseho ke tholoana ea botšepehi.

Boemo bo fapane ho motho ea sa tšepahaleng ka lebaka la boithati. Mothetsi a ka leka ho pata ho se tšepahale ha hae ka puo e khopameng kapa ka liketso. (Liproverbia 6:12-14) Ho roba ha hae leihlo ka morero oa bolotsana kapa oa leshano ho ka bakela mahlatsipa a liketso tsa hae pherekano e khōlō kelellong. Empa qetellong, ho khopama ha motho ea joalo hoa pepeseha. Moapostola Pauluse o ile a ngola: “Libe tsa batho ba bang li bonahala phatlalatsa, li lebisa ka ho toba kahlolong, empa ha e le batho ba bang libe tsa bona le tsona li bonahala hamorao. Ka tsela e tšoanang le mesebetsi e metle e bonahala phatlalatsa ’me e seng joalo e ke ke ea lula e patehile.” (1 Timothea 5:24, 25) Ho sa tsotellehe hore na ke mang ea amehang—ebang ke motsoali, motsoalle, molekane oa lenyalo kapa eo u mo tsebang—qetellong bomenemene boa hlahella. Ke mang ea ka tšepang motho ea tsebahalang ka ho se tšepahale?

‘Molomo oa Hae ke Mohloli oa Bophelo’

Solomone o re: “Molomo oa ea lokileng ke mohloli oa bophelo; empa ha e le melomo ea ba khopo, e koahela pefo.” (Liproverbia 10:11) Mantsoe a tsoang molomong a ka folisa kapa a utloisa bohloko. A ka khatholla le ho kenya motho bophelo, kapa a ka mo tepelletsa.

E le ha a bontša matla a mantsoe a builoeng, morena oa Iseraele o re: “Lehloeo ke lona le tsosang ho hloka kutloano, empa lerato le koahela litlōlo tsohle.” (Liproverbia 10:12) Lehloeo le baka ho hloka kutloano har’a batho, le hlohlelletsa qabang. Ba ratang Jehova ba lokela ho ntša lehloeo ka metso bophelong ba bona. Joang? Ka ho kenya lerato sebakeng sa lona. “Lerato le koahela libe tse ngata haholo.” (1 Petrose 4:8) Lerato “le jara lintho tsohle,” ke hore “lintho tsohle tseo le li koahelang.” (1 Bakorinthe 13:7; Kingdom Interlinear) Lerato la bomolimo ha le lebelle phetheho ho batho ba sa phethahalang. Ho e-na le ho phatlalatsa liphoso tsa ba bang, lerato le joalo le re thusa ho hlokomoloha liphoso tsa ba bang ntle leha ho e-na le phoso e tebileng. Lerato lea mamella leha motho a ka tšoaroa hampe tšebeletsong ea tšimo, mosebetsing kapa sekolong.

Morena ea bohlale o tsoela pele ka ho re: “Molomong oa motho ea nang le kutloisiso ho fumanoa bohlale, empa thupa ke ea mokokotlo oa eo pelo ea hae e haelloang.” (Liproverbia 10:13) Bohlale ba motho ea nang le kutloisiso bo tataisa mehato ea hae. Mantsoe a hahang a molomong oa hae a thusa ba bang hore ba tsamaee tseleng ea ho loka. Eena le ba mo mamelang ha ba kenngoe tseleng e nepahetseng ka likhoka—ka khalemelo.

“Bolokang Tsebo”

Ke eng se etsang hore mantsoe a rōna e be ‘seliba se phoroselang sa bohlale’ ho e-na le hore e be molapo o phoroselang oa litaba tsa mafeela? (Liproverbia 18:4) Solomone oa arabela: “Ba bohlale ke bona ba bolokang tsebo, empa molomo oa leoatla o haufi le tšenyeho.”—Liproverbia 10:14.

Tlhokahalo ea pele ke hore likelello tsa rōna li lokela ho tlala tsebo e hahang ea Molimo. Ho na le mohloli o le mong feela oa tsebo eo. Moapostola Pauluse o ile a ngola: “Lengolo lohle le bululetsoe ke Molimo ’me le molemo bakeng sa ho ruta, bakeng sa ho khalemela, bakeng sa ho otlolla lintho, bakeng sa ho laea ka ho loka, e le hore motho oa Molimo a ka tšoaneleha ka botlalo, a hlomelloa ka ho feletseng bakeng sa mosebetsi o mong le o mong o molemo.” (2 Timothea 3:16, 17) Re lokela ho boloka tsebo eo joaloka letlotlo le ho fatisisa Lentsoeng la Molimo joalokaha eka re batla letlotlo le patiloeng. Ho phenyekolla ho joalo hoa thabisa ebile ho putsa hakaakang!

E le hore bohlale bo ka fumanoa melomong ea rōna, tsebo ea Mangolo e lokela ho finyella lipelong tsa rōna ka ho tšoanang. Jesu o ile a bolella bamameli ba hae a re: “Motho ea molemo o hlahisa se molemo letlotlong le molemo la pelo ea hae, empa motho ea khopo o hlahisa se khopo letlotlong la hae le khopo; etsoe molomo oa hae o bua se tletseng ka pelong.” (Luka 6:45) Ka lebaka leo, re lokela ho tloaela ho thuisa ka seo re ithutang sona. Ke ’nete hore ho ithuta le ho thuisa ho hloka boiteko, empa thuto e joalo e ruisa molemo moeeng hakaakang! Ha ho lebaka la hore mang kapa mang a latele tsela e senyang ea mobeberi feela ea buang mantsoe a booatla.

E, motho ea bohlale o etsa se lokileng mahlong a Molimo ebile o na le tšusumetso e molemo ho ba bang. O thabela phepelo e ngata ea lijo tsa moea ’me o na le ho hongata hoo a ka ho etsang mosebetsing o putsang oa Morena. (1 Bakorinthe 15:58) Ka lebaka la hore ke monna ea tšepahalang, o tsamaea a sireletsehile ’me o amoheloa ke Molimo. Ka sebele, ea lokileng o amohela litlhohonolofatso tse ngata. E se eka re ka batla ho loka ka ho etsa hore bophelo ba rōna bo lumellane le litekanyetso tsa Molimo tsa bobe le botle.

[Mongolo o botlaaseng ba leqephe]

[Setšoantšo se leqepheng la 25]

Botšepehi bo tlatsetsa bophelong bo thabileng ba lelapa

[Setšoantšo se leqepheng la 26]

‘Ba bohlale ba boloka tsebo joaloka letlotlo’