Khaolo ea 6
Thusa Mocha oa Hao ho Atleha
1, 2. Lilemo tsa bocha li ka tlisa liphephetso life le thabo efe?
HO BA le mocha ka lapeng ho fapane haholo le ho ba le ngoana ea lilemo li hlano kapa esita le ea lilemo li leshome. Lilemo tsa bocha li tlisa liphephetso tsa tsona le mathata, empa li ka boetse tsa tlisa thabo le meputso. Mehlala e kang Josefa, Davida, Josiase le Timothea e bontša hore bacha ba ka itšoara ka tsela e nang le boikarabelo ’me ba e-ba le kamano e ntle le Jehova. (Genese 37:2-11; 1 Samuele 16:11-13; 2 Marena 22:3-7; Liketso 16:1, 2) Bacha ba bangata kajeno ba paka eona ntlha eo. Mohlomong u tseba ba bang ba bona.
2 Leha ho le joalo, ho ba bang lilemo tsa bocha li mofere-fere. Bacha ba ba le boikutlo bo botle le bo bobe. Bashanyana le banana ba lilemong tsa bocha ba ka ’na ba batla ho ba ba lokolohileng haholoanyane, ’me ba ka ’na ba hlonamela meeli eo ba e behetsoeng ke batsoali ba bona. Empa, bacha ba joalo ba ntse ba hloka phihlelo ’me ba hloka thuso e lerato le e nang le mamello ho batsoali ba bona. E, lilemo tsa bocha e ka ba tse thabisang, empa e ka boetse ea e-ba tse ferekanyang—ho batsoali le ho bacha. Bacha ba ka thusoa joang lilemong tsee?
3. Batsoali ba ka neha bana ba bona ba lilemong tsa bocha monyetla o motle bophelong ka tsela efe?
3 Batsoali ba latelang keletso ea Bibele ba neha bana ba bona ba lilemong tsa bocha monyetla o motlehali oa hore ba fete liteko tseo ka katleho ho fihlela e e-ba batho ba baholo ba nang le boikarabelo. Linaheng tsohle le ka linako tsohle, batsoali le bacha ba ileng ba sebelisa melao-motheo ea Bibele hammoho ba ’nile ba hlohonolofatsoa ka katleho.—Pesaleme ea 119:1.
PUISANO E ETSOANG KA BOTŠEPEHI LE KA BOLOKOLOHI
4. Ke hobane’ng ha puo ea lekunutu e le ea bohlokoa ka ho khethehileng nakong ea lilemo tsa bocha?
4 Bibele e re: “Merero ea ferekana moo ho se nang puo ea lekunutung.” (Liproverbia 15:22, NW) Haeba puo ea lekunutung e ne e hlokahala ha bana ba sa le banyenyane, ke ea bohlokoa haholo-holo nakong ea lilemo tsa bocha—ha bacha ba qeta nako e nyenyane ba le hae ’me e ngata ba le sekolong le metsoalle kapa le ba bang bao ba ba tloaetseng. Haeba ha ho na puo ea lekunutung—puisano e etsoang ka botšepehi le ka bolokolohi pakeng tsa bana le batsoali e ke ke ea e-ba teng—bacha ba ka fetoha basele ka lapeng. Joale mecha ea puisano e ka lula e bulehile joang?
5. Bacha ba khothalletsoa hore ba talime taba ea ho buisana le batsoali ba bona joang?
5 Bacha le batsoali ba tlameha ho phetha likarolo tsa bona ho sena. Ke ’nete, bacha ba ka ’na ba ho fumana ho le thata haholoanyane ho buisana le batsoali ba bona ho feta ha ba ne ba sa le banyenyane. Leha ho le joalo, hopola hore “sechaba se lihuoa ke ho hloka likeletso; poloko e teng ha baeletsi ba le bangata.” (Liproverbia 11:14) Mantsoe ana a sebetsa ho bohle, ba banyenyane le ba baholo ka ho tšoana. Bacha ba hlokomelang sena ba tla utloisisa hore ba ntse ba hloka tataiso e bohlale, kaha ba tobane le liqeto tse rarahaneng le ho feta pele. Ba lokela ho hlokomela hore batsoali ba bona ba lumelang ba tšoaneleha hantle e le baeletsi hobane ba na le phihlelo e khōloanyane bophelong ’me ba pakile kameho ea bona e lerato ka lilemo tse ngata. Kahoo, mothating ona bophelong ba bona, bacha ba bohlale ba ke ke ba furalla batsoali ba bona.
6. Batsoali ba bohlale le ba lerato ba tla ba le boikutlo bofe mabapi le ho buisana le bacha ba bona?
6 Mecha e bulehileng ea puisano e bolela hore motsoali o tla leka ka thata hore e be ea fumanehang ha mocha a utloa a batla ho bua. Haeba u motsoali, etsa bonnete ba hore mecha ea puisano e bulehile bonyane ka lehlakoreng la hao. Sena se ka ’na sa se ke sa e-ba bonolo. Bibele e bolela hore “nako e teng ea ho khutsa, e teng nako le ea ho bua.” (Moeklesia 3:7) Ha mocha oa hao a utloa hore ke nako ea ho bua, mohlomong ke nako ea hao ea hore u khutse. Mohlomong u behetse nako eo ka thōko bakeng sa thuto ea botho, ho phomola, kapa ho sebetsa hona lapeng. Ho ntse ho le joalo, haeba mocha oa hao a batla ho bua le uena, leka ho lokisa merero ea hao ’me u mamele. Ho seng joalo, a ka ’na a se ke a hlola a leka. Hopola mohlala oa Jesu. Ketsahalong e ’ngoe, o ne a lokiselitse nako ea ho phomola. Empa ha batho ba mo bokanela ba e-tla ho tla mo mamela, o ile a tlohela ho phomola ’me a qala ho ba ruta. (Mareka 6:30-34) Bacha ba bangata baa hlokomela hore batsoali ba bona ba phela bophelo bo phathahaneng, empa ba hloka ho tiisetsoa hore batsoali ba bona ba teng ho ba thusa haeba ba ba hloka. Kahoo, e-ba ea fumanehang le ea utloisisang.
7. Ho hlokahala hore batsoali ba qobe eng?
7 Leka ho hopola hore na ho ne ho le joang ha u sa le mocha, ’me u se ke ua lahleheloa ke mokhoa oa hao oa ho qabola! Ho hlokahala hore batsoali ba thabele ho ba le bana ba bona. Ha ba e-na le nako eo ba lokolohileng ka eona, batsoali ba e sebelisa joang? Haeba kamehla ba sebelisa nako eo ba lokolohileng ka eona ho etsa lintho tse sa akarelletseng lelapa la bona, bacha ba bona ba tla phakisa ba hlokomele. Haeba bacha ba fihlela qeto ea hore metsoalle ea sekolo e ba tsotella ho feta batsoali ba bona, ba tlameha ho ba le mathata.
SEO BA LOKELANG HO BUISANA KA SONA
8. Ho ananela botšepehi, mosebetsi o thata le boitšoaro bo loketseng li ka hatisoa joang ho bana?
8 Haeba batsoali ba e-s’o kenye kananelo ho bana ba bona bakeng sa botšepehi le ho sebetsa ka thata, ba lokela hore ba etse joalo kahohle-hohle nakong ea lilemo tsa bocha. (1 Bathesalonika 4:11; 2 Bathesalonika 3:10) Hape ke habohlokoa hore ba etse bonnete ba hore bana ba bona ba lumela ka pelo eohle hore ho phela bophelo ba boitšoaro bo botle le bo hloekileng ke habohlokoa. (Liproverbia 20:11) Mohlala oa motsoali ke oona o buang ho hoholo lintlheng tsena. Feela joalokaha banna ba sa lumelang ba ka “haptjoa ka ntle ho lentsoe ka boitšoaro ba basali ba bona,” ho joalo le bacha ba ka ithuta melao-motheo e nepahetseng ka boitšoaro bo botle ba batsoali ba bona. (1 Petrose 3:1) Ho ntse ho le joalo, mohlala ka booona feela ha oa lekana, kaha bana ba boetse ba pepesehetse mehlala e mebe le moroallo oa leshano le hohelang kantle ho lelapa. Leha ho le joalo, batsoali ba tsotellang ho hlokahala ba tsebe maikutlo a bacha ba bona ka seo ba se bonang le ho se utloa, ’me sena se hloka moqoqo o molemo.—Liproverbia 20:5.
9, 10. Ke hobane’ng ha batsoali ba lokela ho etsa bonnete ba hore ba ruta bana ba bona ka litaba tsa botona le botšehali, hona ba ka etsa see joang?
9 Sena ke ’nete haholo-holo litabeng tsa botona le botšehali. Batsoali, na le hlajoa ke lihlong ho buisana le bana ba lōna ka litaba tsa botona le botšehali? Esita le haeba ho joalo, etsa boiteko ba ho etsa joalo, hobane bana ba hao ba tla ithuta tsona ho motho e mong. Haeba ba sa ithute ho uena, ke mang ea tsebang hore na ba tla fumana boitsebiso bofe bo sothehileng? Ka Bibeleng, Jehova ha a qobe litaba tse buang ka botona kapa botšehali, ’me le batsoali ha baa lokela ho etsa joalo.—Liproverbia 4:1-4; 5:1-21.
10 Re ka leboha hore ebe Bibele e na le tataiso e hlakileng tabeng ea boitšoaro ba botona le botšehali, le hore Mokhatlo oa Watchtower o hatisitse boitsebiso bo bongata bo molemo bo bontšang hore tataiso ena e ntse e sebetsa le lefatšeng la kajeno. Ke hobane’ng ha u sa sebelise thuso ee? Ka mohlala, ke hobane’ng ha u sa hlahlobe likhaolo tse loketseng le mora kapa morali oa hao Bukeng ea 1 le ea 2 ea Lipotso Bacha Baa Botsa—Likarabo tse Sebetsang? Mohlomong ka thabo u tla makatsoa ke liphello.
11. Tsela e molemohali ke efe ea hore batsoali ba rute bana ba bona mokhoa oa ho sebeletsa Jehova?
11 Batsoali ba lokela ho buisana le bana ka taba efe ea bohlokoahali? Moapostola Pauluse o ile a bua ka eona ha a ne a ngola: “Le tsoele pele ho ba hōlisa [bana ba lōna] ka taeo le kelello e laoloang ke Jehova.” (Baefese 6:4) Ho hlokahala hore bana ba ’ne ba ithute ka Jehova. Ka ho khetheha, ho hlokahala ba ithute ho mo rata, ’me ba lokela ho batla ho mo sebeletsa. Mona le teng, ho ka rutoa ho hongata ka mohlala. Haeba bacha ba bona batsoali ba bona ba rata Molimo ‘ka lipelo tsa bona tsohle le ka lisoule tsa bona tsohle le ka likelello tsa bona tsohle’ le hore sena se hlahisa litholoana tse molemo bophelong ba batsoali ba bona, le bona ba ka ’na ba susumelletseha ho etsa se tšoanang. (Matheu 22:37) Ka ho tšoanang, haeba bacha ba bona hore batsoali ba bona ba na le pono e leka-lekaneng ka lintho tse bonahalang, ba etelletsa ’Muso oa Molimo pele, ba tla thusoa hore ba hlaolele boikutlo bo tšoanang ba kelello.—Moeklesia 7:12; Matheu 6:31-33.
12, 13. Ho lokela ho hopoloa lintlha life hore thuto ea lelapa e tle e atlehe?
12 Thuto ea Bibele ea lelapa ea beke le beke ke thuso e ikhethang mabapi le ho fetisetsa litekanyetso tsa moea ho batho ba bacha. (Pesaleme ea 119:33, 34; Liproverbia 4:20-23) Ho ba le thuto e joalo kamehla ke habohlokoa. (Pesaleme ea 1:1-3) Batsoali le bana ba bona ba lokela ho hlokomela hore thuto ea lelapa e lokela ho tla pele ho mesebetsi e meng, e seng ka tsela e ’ngoe. Ho feta moo, boikutlo bo nepahetseng ke ba bohlokoa hore thuto ea lelapa e tle e be e atlehang. Ntate e mong o ile a re: “Lekunutu ke hore mokhanni a khothalletse moea oa ho khatholoha empa e le o nang le tlhompho nakong ea thuto ea lelapa—o nang le bolokolohi empa ho sa nkoe lintho habobebe. Kamehla ho ka ’na ha se ke ha e-ba bonolo ho ba le botsitso bo loketseng, ’me khafetsa bacha ba tla hloka hore boikutlo ba bona bo lokisoe. Haeba lintho li sa tsamaee hantle ka lekhetlo la pele kapa la bobeli, tiisetsa ’me u lebelle nakong e tlang.” Eena ntate enoa o bolela hore thapelong ea hae pele ho thuto e ’ngoe le e ’ngoe, ka ho toba o ile a kōpa thuso ho Jehova hore bohle ba amehang ba be le pono e nepahetseng.—Pesaleme ea 119:66.
13 Ho khanna thuto ea lelapa ke boikarabelo ba batsoali ba lumelang. Ke ’nete hore batsoali ba bang ha ba na neo ea botichere, ’me ba ka ’na ba thatafalloa ke ho fumana litsela tsa ho etsa hore thuto ea lelapa e be e thahasellisang. Leha ho le joalo, haeba u rata bacha ba hao “ka ketso le ’nete,” u tla lakatsa ho ba thusa ka boikokobetso le ka botšepehi hore ba tsoele pele moeeng. (1 Johanne 3:18) Ba ka ’na ba belaela nako le nako, empa ho ka etsahala hore ba elelloe hore le thahasella boiketlo ba bona ka ho teba.
14. Deuteronoma 11:18, 19 e ka sebelisoa joang ha ho fetisetsoa lintho tsa moea ho bacha?
14 Thuto ea lelapa hase eona feela ketsahalo ea ho buisana ka litaba tsa bohlokoa tsa moea. Na u hopola taelo ea Jehova ho batsoali? O ile a re: “Kenyang ke hona mantsoe ana ao ke le bolellang ’ona ka lipelong tsa lōna, le meeeng ea lōna, ’me le a tlame ho ba pontšo matsohong a lōna, ’me a be joalo ka meqhaka pakeng tsa mahlo a lōna. Le a rute bana ba lōna, u bue ka ’ona ha u lutse tlung ea hao, leha u tsamaea tseleng, leha u robala, leha u tsoha borokong.” (Deuteronoma 11:18, 19; bona le Deuteronoma 6:6, 7.) Hona ha ho bolele hore batsoali e be esale ba emeletse bana ba bona. Empa hlooho ea lelapa e lerato e lokela hore kamehla e shebe menyetla ea ho haha pono ea moea ea lelapa la eona.
TAEO LE TLHOMPHO
15, 16. (a) Taeo ke eng? (b) Ke mang ea ikarabellang bakeng sa ho laea, hona ke mang ea nang le boikarabelo ba ho tiisa hore e tla mameloa?
15 Taeo ke koetliso e khalemelang, ’me e akarelletsa puisano. Taeo e na le maikutlo a ho lokisa ho feta ho fana ka kotlo—le hoja kotlo e ka ’na ea hlokahala. Bana ba hao ba ne ba hloka taeo ha ba sa le banyenyane, ’me hona joale kaha ke bacha, ba ntse ba hloka sebōpeho se seng sa eona, mohlomong le ho feta bonyenyaneng. Bacha ba bohlale baa tseba hore sena ke ’nete.
16 Bibele e re: “Lehlanya le nyelisa thuto ea ntat’a lona, empa ea mamelang taeo oa hlalefa.” (Liproverbia 15:5) Re ithuta ho hongata lengolong lena. Le fana ka maikutlo a hore taeo e tla hle e fanoe. Mocha a ke ke a ‘mamela taeo’ ha e sa fanoe. Jehova o fa batsoali boikarabelo ba ho laea, haholo-holo ntate. Leha ho le joalo, boikarabelo ba ho mamela taeo eo ke ba mocha. O tla ithuta ho eketsehileng ’me a etse liphoso tse fokolang haeba a mamela taeo e bohlale ea ntate oa hae le ’mè oa hae. (Liproverbia 1:8) Bibele e re: “Bofuma le lihlong ke tsa ea hanang ho lauoa; empa ea amohelang khalemelo o tla hlomphuoa.”—Liproverbia 13:18.
17. Ke ho leka-lekana hofe hoo batsoali ba hlokang ho ho haba ha ba laea?
17 Ha ba laea bacha, ho hlokahala hore batsoali e be ba leka-lekaneng. Ba lokela ho qoba ho ba ba thata haholo hoo ba halefisang bana ba bona, mohlomong ba bile ba senya ho itšepa ha bana ba bona. (Bakolose 3:21) ’Me leha ho le joalo batsoali ha ba batle hore ba lumelle ntho e ’ngoe le e ’ngoe hoo bacha ba bona ba lahleheloang ke koetliso ea bohlokoa. Ho lumella ntho e ’ngoe le e ’ngoe ho joalo ho ka ba kotsi. Liproverbia 29:17 e re: “Laea mora oa hao, o tla u fa phomolo, a nyakalatse moea oa hao.” Leha ho le joalo, temana ea 21 (ho BPN) e re: “Ea bokotsang khoba la hae ha a le hōlisa, le tla qetella le mo hlokela teboho.” Le hoja temana ena e bua ka lekhoba, e sebetsa ka tekanyo e lekanang ho mocha ofe kapa ofe ea ka lapeng.
18. Taeo ke bopaki ba eng, hona ho qojoa eng ha batsoali ba sebelisa taeo e tsitsitseng?
18 Bonneteng, taeo e loketseng ke bopaki ba hore motsoali o rata ngoana oa hae. (Baheberu 12:6, 11) Haeba u motsoali, ua tseba hore ho thata ho boloka taeo e tsitsitseng le e nang le kahlolo e molemo. Molemong oa khotso, ho ka ’na ha bonahala ho le bonolo ho lumella mocha ea manganga hore a etse ntho eo a e batlang. Leha ho le joalo, qetellong, motsoali ea latelang tsela ena ea ho qetela o tla fumana moputso oa lelapa le tsoileng taolong.—Liproverbia 29:15; Bagalata 6:9.
MOSEBETSI LE PAPALI
19, 20. Batsoali ba ka sebetsana ka bohlale le taba ea boikhathollo joang bakeng sa bacha ba bona?
19 Mehleng ea boholo-holo bana hangata ba ne ba lebelletsoe ho thusa ka lapeng kapa polasing. Kajeno bacha ba bangata ba na le nako e ngata eo ba sa etseng letho. E le ho sebelisa nako eo, lefatše la khoebo le fana ka thepa e ngata ho feta tekano ea boithabiso. Ho sena u ka phaella ka ’nete ea hore lefatše le khella fatše bohlokoa ba litekanyetso tsa Bibele tsa boitšoaro, ’me u na le motsoako o ka bakang koluoa.
20 Kahoo, motsoali ea bohlale o boloka tokelo ea ho etsa liqeto tsa ho qetela ka boikhathollo. Leha ho le joalo, u se ke ua lebala hore mocha oa hōla. Selemo se seng le se seng, mohlomong o tla lebella ho tšoaroa joaloka motho e moholo. Kahoo, ke bohlale hore motsoali a lumelle bolokolohi bo boholoanyane mabapi le khetho ea boikhathollo ha mocha a ntse a hōla—hafeela khetho eo e bontša tsoelo-pele khōlong ea moea. Ka linako tse ling, mocha a ka ’na a etsa liqeto tse sa bontšeng bohlale ka ’mino, metsoalle le tse ling. Ha sena se etsahala, ho lokela ho buisanoe le mocha e le hore ho ka etsoa khetho e molemo nakong e tlang.
21. Ho ba le kahlolo e molemo mabapi le nako e qetoang boikhathollong ho tla sireletsa mocha joang?
21 Ho ka lumelloa nako e kae bakeng sa boikhathollo? Linaheng tse ling ho etsoa hore bacha ba lumele hore ba na le tokelo ea ho ithabisa ba sa khaotse. Kahoo, mocha ea lilemong tsa bocha a ka ’na a itherela kemiso e le hore a ka ba le “linako tse monate” tse latellanang. Ho ho batsoali ho fetisa thuto ea hore nako e lokela ho sebelisoa hape le linthong tse ling, tse kang lelapa, thuto ea botho, ho kopana le batho ba hōlileng moeeng, liboka tsa Bokreste le mesebetsi ea lelapa. Hona ho tla thibela hore “menyaka ea bophelo bona” e se ke ea pupetsa Lentsoe la Molimo.—Luka 8:11-15.
22. Boikhathollo bo lokela ho leka-lekanngoa le eng bophelong ba mocha?
22 Morena Solomone o ile a re: “Ka hoo, ke lemohile hobane ha ho letho le ka bang molemo ho bona, ha e se ho itumela le ho iketsetsa boiketlo ka tšiu tsa bophelo ba bona; ke lemohile hape hoba, ere ha motho a e-ja lijo, kapa a e-noa, le ho latsoa boiketlo ka mokhathala oohle oa hae, le teng e sa le neo ea Molimo.” (Moeklesia 3:12, 13) E, ho thaba ke karolo ea bophelo bo leka-lekaneng. Empa ho joalo le ka mosebetsi o thata. Bacha ba bangata kajeno ha ba ithute khotsofalo e tlisoang ke ho sebetsa ka thata kapa boikutlo ba ho itlhompha bo tlisoang ke ho sebetsana le bothata le ho bo rarolla. Ba bang ha ba fuoe monyetla oa ho hōlisa tsebo e itseng eo ba tla khona ho iphelisa ka eona bophelong hamorao. Ena ke phephetso ea sebele ho motsoali. Na u tla etsa bonnete ba hore mocha oa hao o ba le menyetla e joalo? Haeba u ka atleha ho ruta mocha oa hao hore a nke mosebetsi o thata e le oa bohlokoa le ho o thabela, o tla hōlisa pono e ntle e tla tlisa melemo ea nako eohle.
HO TLOHA BOCHENG HO EA HO BENG MOTHO E MOHOLO
23. Batsoali ba ka khothatsa bacha ba bona joang?
23 Esita leha u e-na le mathata ka mocha oa hao, lengolo lena le lula e le ’nete: “Lerato ha le fele le ka mohla.” (1 Bakorinthe 13:8) Le ka mohla u se ke ua khaotsa ho bontša lerato leo ho seng pelaelo hore ua le utloa. Ipotse, ‘Na ke babatsa ngoana e mong le e mong ka katleho ea hae mabapi le ho sebetsana le mathata kapa ho hlōla litšitiso? Na ke sebelisa menyetla ho bonahatsa lerato la ka le kananelo ho bana ba ka, pele menyetla eo e feta?’ Le hoja ka linako tse ling ho ka ’na ha e-ba le ho se utloisisane, haeba bacha ba ikutloa ba kholisehile hore ua ba rata, ha ho pelaelo hore ba tla u buseletsa lerato leo.
24. Ke molao-motheo ofe oa Mangolo o salang e le ’nete joaloka molao o akaretsang mabapi le ho hōlisa bana, empa ho lokela ho hopoloa eng?
24 Ka ho hlakileng, ha bana ba hōla ’me e e-ba batho ba baholo, ba tla qetella ba iketsetsa liqeto tse boima. Mabakeng a mang batsoali ba ka ’na ba se ke ba rata liqeto tseo. Ho thoe’ng haeba ngoana oa bona a etsa qeto ea ho khaotsa ho sebeletsa Jehova Molimo? Sena se ka etsahala. Esita le ba bang ba bara ba moea ba Jehova ba ile ba qhela keletso ea hae ’me ba ipaka e le marabele. (Genese 6:2; Jude 6) Bana hase lik’homputha, tse ka bolelloang hore li etse ka tsela eo re batlang ka eona. Ke libōpuoa tse nang le boikhethelo, tse nang le boikarabelo ka pel’a Jehova bakeng sa liqeto tseo li li etsang. Ho ntse ho le joalo, Liproverbia 22:6 e sala e ntse e le ’nete joaloka molao o akaretsang: “Ruta mohlankana tsela eo a tšoanetseng ho e tsamaea; le mohla a tsofalang, a ke ke a e kheloha.”
25. Tsela e molemohali ea hore batsoali ba bontše teboho ho Jehova bakeng sa tokelo ea botsoali ke efe?
25 Kahoo he, bontša bana ba hao lerato le leholo. Etsa sohle seo u ka se khonang ho latela melao-motheo ea Bibele ha u ba hōlisa. Beha mohlala o motle oa boitšoaro ba bomolimo. Kahoo u tla neha bana ba hao monyetla o molemohali oa hore ba hōle e be batho ba baholo ba nang le boikarabelo le ba tšabang Molimo. Ena ke tsela e molemohali ho batsoali ea hore ba bontše teboho ho Jehova bakeng sa tokelo ea botsoali.
MELAO-MOTHEO EE EA BIBELE E KA THUSA . . . BATSOALI HORE BA HŌLISE BANA BA BONA JOANG?
Puisano ea hlokahala.—Liproverbia 15:22.
Re lokela ho hlahloba Lentsoe la Molimo kamehla.—Pesaleme ea 1:1, 2.
Motho ea bohlale o mamela taeo.—Liproverbia 15:5.
Mosebetsi le papali li na le sebaka sa tsona.—Moeklesia 3:12, 13.
[Setšoantšo se leqepheng la 67]
E-ba teng ha mocha oa hao a hloka ho bua
[Setšoantšo se leqepheng la 69]
Thuto ea kamehla ea Bibele ke ea bohlokoa bakeng sa lelapa
[Setšoantšo se leqepheng la 70]
Bontša lerato le kananelo ho bana ba hao