Thabela Thuto ea Botho ea Lentsoe la Molimo

“Ka sebele ke tla thuisa ka mosebetsi oohle oa hao, ke tla nahanisisa ka mesebetsi ea hao.”—PESALEME EA 77:12.

1, 2. (a) Ke hobane’ng ha re lokela ho ipha nako ea ho thuisa? (b) “Ho thuisa” le “ho nahanisisa” ke ho etsa’ng?

KAHA re barutuoa ba Jesu Kreste, re nahana ka ho teba ka kamano ea rōna le Molimo le mabaka a ho Mo sebeletsa. Leha ho le joalo, kajeno batho ba bangata ba phathahane hoo ba se nang nako ea ho thuisa. Ba ikakhetse ka setotsoana ho ipokelleleng lintho tse bonahalang le ho ithabiseng ho se nang kelello. Re ka qoba joang mesebetsi ee ea lefeela? Joalokaha re ipha nako letsatsi le leng le le leng ea lintho tse hlokahalang tse kang ho ja le ho robala, ka tsela e tšoanang, letsatsi le leng le le leng re lokela ho ipha nako ea ho thuisa ka mesebetsi ea Jehova le liketso tsa hae.—Deuteronoma 8:3; Matheu 4:4.

² Na u ke u iphe nako ea ho thuisa? Ho thuisa ke ho etsa’ng? Libuka tse ling tsa Sesotho li re ke ho “ho tebisa maikutlo: ho lōsa kapa ho nahanisisa.” ’Me “ho nahanisisa” ho bolela “ho nahana ntho ka botebo, ho lōsa, ho nahana kapa ho hlahloba ka khutso, ka hloko le ka botebo.” See se re ama joang?

 3. Ho tsoela pele moeeng ho amana ka ho toba le eng?

³ Har’a tse ling, sena se lokela ho re hopotsa seo moapostola Pauluse a ileng a se ngolla mohlanka-’moho le eena, Timothea, a re: “Ha ke ntse ke tla, u tsoele pele ho ikitlaetsa ho baleng phatlalatsa, ho eletseng, ho ruteng. . . . Nahanisisa ka lintho tsena; u ikakhele ka setotsoana ho tsona, e le hore tsoelo-pele ea hao e ka bonahala ho batho bohle.” Ha ho pelaelo hore ho ne ho lebeletsoe tsoelo-pele le khatelo-pele, ’me mantsoe a Pauluse a bontša hore ho ne ho e-na le kamano e tobileng pakeng tsa tsoelo-pele le ho nahanisisa ka lintho tsa moea. Ho joalo le kajeno. E le hore re thabele ho tsoela pele moeeng, re sa ntsane re tlameha ho “nahanisisa” le ho ‘ikakhela ka setotsoana’ linthong tse amanang le Lentsoe la Molimo.—1 Timothea 4:13-15.

 4. Ke lintho life tseo u ka li sebelisang hore u nahanisise ka Lentsoe la Jehova kamehla?

⁴ Nako e molemo ka ho fetisisa ea hore u thuise e itšetlehile ka uena le mesebetsi ea hao ea lelapa. Ba bangata ba nahanisisa ka temana ea Bibele hoseng ha ba bala bukana ea Ho Hlahlobisisa Mangolo Kamehla. Ha e le hantle, ntho ea pele eo baithaopi ba ka bang 20 000 ba mahaeng a Bethele lefatšeng lohle ba e etsang letsatsi le leng le le leng, ke ho hlahloba temana ea Bibele ea letsatsi leo ka metsotso e 15. Ke ’nete hore ke litho tse ka bang ’nè tsa lelapa la Bethele tse tšohlang seo temana ea hoseng ho hong le ho hong e buang ka sona, empa lelapa lohle le nahanisisa ka seo li se buang le ho se bala. Lipaki tse ling li nahanisisa ka Lentsoe la Jehova ha li le tseleng li ea mosebetsing. Li mamela lik’hasete tsa Bibele le tsa limakasine tsa Molula-Qhooa le Tsoha! tse teng ka lipuo tse ling. Bo-’mamalapa ba bangata ba etsa sena ha ba ntse ba sebetsa lapeng. Ha e le hantle, ba etsisa mopesaleme Asafe, ea ileng a ngola a re: “Ke tla hopola liketso tsa Jah; etsoe ke tla hopola ketso ea hao e hlollang ea khale. Ka sebele ke tla thuisa ka mosebetsi oohle oa hao, ke tla nahanisisa ka mesebetsi ea hao.”—Pesaleme ea 77:11, 12.

Maikutlo a Nepahetseng a Hlahisa Litholoana Tse Molemo

 5. Ke hobane’ng ha thuto ea botho e lokela ho ba ea bohlokoa ho rōna?

⁵ Mehleng ea rōna ea TV, livideo le lik’homphieutha, batho ha ba sa tsotella ho bala. Ka sebele Lipaki Tsa Jehova tsona ha lia tšoanela ho etsa joalo. Ha e le hantle, ho bala Bibele ho tšoana le ropo eo re itšoarellang ka eona hore re ’ne re be tlas’a tšireletso ea Jehova. Lilemong tse likete tse fetileng, Joshua o ile a hlahlama Moshe boeta-peleng ba Iseraele. E le hore Jehova a mo hlohonolofatse, Joshua o ne a lokela ho ipalla Lentsoe la Molimo. (Joshua 1:8; Pesaleme ea 1:1, 2) Taelo ena e ntse e sebetsa le kajeno. Leha ho le joalo, ba bang ka lebaka la thuto e fokolang ba ka ’na ba thatafalloa ke ho bala kapa ba ho fumana ho khathatsa. Ebe ke’ng se ka re thusang ho rata ho bala le ho ithuta Lentsoe la Molimo? Mantsoe a Morena Solomone a ngotsoeng ho Liproverbia 2:1-6 a fana ka karabo. Re kōpa hore u phetle Bibele ea hao ’me u bale litemana tsena, ’me re buisaneng ka tsona.

 6. Re lokela ho bontša maikutlo afe mabapi le tsebo ea Molimo?

⁶ Ha re qala ho bala re fumana khothatso ena e reng: “Mora oa ka, haeba u tla amohela lipolelo tsa ka ’me u ipolokele litaelo tsa ka, e le hore u ele hloko bohlale ka tsebe ea hao, hore u sekamisetse pelo ea hao temohong; . . . ” (Liproverbia 2:1, 2) Mantsoe aa a re ruta’ng? A re ruta hore e mong le e mong o na le boikarabelo ba ho ithuta Lentsoe la Molimo. Hlokomela hore ho thoe “haeba u tla amohela lipolelo tsa ka.” Ho sebelisitsoe “haeba,” hobane batho ba bangata ha ba ele hloko Lentsoe la Molimo. E le hore re thabele ho ithuta Lentsoe la Molimo, re tlameha ho ikemisetsa ho amohela seo Jehova a se buang ’me re se nke e le letlotlo leo re ke keng ra le lahla. Ha rea lokela ho lumella mesebetsi ea rōna ea letsatsi le letsatsi hore e re phathahanye hoo re qalang ho iphapanyetsa Lentsoe la Molimo, esita le ho se le tšepe.—Baroma 3:3, 4.

 7. Neng le neng ha ho khoneha, ke hobane’ng ha re lokela ho ba teng le ho ela hloko libokeng tsa Bokreste?

⁷ Na ka sebele re ‘ela hloko’ le ho mamelisisa ha Lentsoe la Molimo le ntse le qaqisoa libokeng tsa rōna tsa Bokreste? (Baefese 4:20, 21) Na re ‘sekamisetsa lipelo’ tsa rōna temohong? Mohlomong sebui ha se hloahloa, empa haeba se bua ka Lentsoe la Molimo, re lokela ho se mamela ka hloko. Ho hlakile hore, e le hore re ele hloko bohlale ba Jehova, neng le neng ha ho khoneha re lokela ho ba teng libokeng tsa Bokreste. (Liproverbia 18:1) Nahana hore na bao ebang ba ne ba le sieo sebokeng se neng se tšoaretsoe phaposing e ka holimo Jerusalema ka Pentekonta ea 33 C.E. ba ile ba soaba hakaakang! Le hoja libokeng tsa rōna ho sa etsahale lintho tse hlollang joaloka sebokeng seo, ho buuoa ka Bibele, e leng buka ea rōna e ka sehloohong ea ho ithuta. Kahoo, seboka se seng le se seng se ka ba molemo ho rōna haeba re ela hloko ’me re phetla litemana ha li baloa.—Liketso 2:1-4; Baheberu 10:24, 25.

8, 9. (a) Thuto ea botho e re hloka’ng? (b) U ka bapisa boleng ba khauta le ho utloisisa tsebo ea Molimo joang?

⁸ Mantsoe a latelang a morena ea bohlale a re: “Ho feta moo, haeba u hoeletsa kutloisiso ’me u bitsa temoho, . . . ” (Liproverbia 2:3) Mantsoe aa a re fa maikutlo kapa boikutlo bofe? A re fa boikutlo ba hore re lakatse ka tieo ho utloisisa Lentsoe la Jehova! A fana ka maikutlo a ho ikemisetsa ho ithuta ka morero oa ho ba le temoho le ho hlokomela hore na thato ea Jehova ke eng. Leha ho le joalo, sena se hloka boiteko, ’me sena se re lebisa mantsoeng a latelang a Solomone le papiso ea hae.—Baefese 5:15-17.

⁹ Ha a tsoela pele o re: ‘Haeba u ntse u batla [kutloisiso] joaloka silevera, ’me u ntse u e batlisisa joaloka matlotlo a patiloeng, . . . ’ (Liproverbia 2:4) Sena se etsa hore re nahane ka lintho tse etsoang ke banna ba merafo bao ka makholo a lilemo ba ’nileng ba batla seo ho thoeng ke majoe a bohlokoa, e leng silevera le khauta. Batho ba ’nile ba bolaeana ba batla khauta. Ba bang ba qetile bophelo bohle ba bona ba ntse ba leka ho e batla. Leha ho le joalo, khauta ke ea bohlokoa ka eng? Haeba u ne u lahlehile lehoatateng ’me u shoele ke lenyora, u ne u tla khetha’ng: setene sa khauta kapa lebekere la metsi? Ho sa tsotellehe sena, batho ba ’nile ba batla khauta ka cheseho e kaakang le hoja boleng ba eona bo lekanngoa ke batho bo bile bo feto-fetoha!a Rōna re lokela ho batla bohlale, temoho le kutloisiso ea Molimo le thato ea hae ka cheseho e khōloanyane. Ebe melemo ea ho batla lintho tsee ke efe?—Pesaleme ea 19:7-10; Liproverbia 3:13-18.

10. Re ka fumana’ng ha re ithuta Lentsoe la Molimo?

¹⁰ Puo ea Solomone e tsoela pele, o re: “Tabeng eo u tla utloisisa ho tšaba Jehova, ’me u tla fumana tsebo ea Molimo.” (Liproverbia 2:5) Ke khopolo e hlollang hakaakang hore rōna baetsalibe re ka fumana “tsebo ea Molimo,” Jehova, ’Musi Morena oa bokahohle! (Pesaleme ea 73:28; Liketso 4:24) Bo-rafilosofi le batho ba nkoang ba le bohlale lefatšeng, ka makholo a lilemo ba ’nile ba leka ho utloisisa meeka ea bophelo le bokahohle. Leha ho le joalo, ba hlōtsoe ho fumana “tsebo ea Molimo.” Hobane’ng? Hobane le hoja e bile teng ka lilemo tse likete ka Lentsoeng la Molimo, Bibele, ba e hlokomoloha ka hore e bonolo haholo ’me kahoo ba hlōloa ho e amohela le ho e utloisisa.—1 Bakorinthe 1:18-21.

11. Melemo e meng ea thuto ea botho ke efe?

¹¹ Ntho e ’ngoe e khothatsang eo Solomone a e totobatsang ke ena: “Jehova o fana ka bohlale; molomong oa hae ho tsoa tsebo le temoho.” (Liproverbia 2:6) Jehova o ithaopela ho fana ka bohlale, tsebo le temoho, ’me o etsa joalo ka seatla se bulehileng ho bohle ba ikemiselitseng ho li batla. Ka sebele hoa utloahala hore re ananele thuto ea botho ea Lentsoe la Molimo, le haeba e hloka boiteko, ho itaea le boitelo. Bonyane rōna re na le Libibele tse seng li hatisitsoe ’me ha ho hlokahale hore re ingolle tsona ka letsoho joaloka ba bang ba mehleng ea boholo-holo!—Deuteronoma 17:18, 19.

Hore re Tsamaee ka Mokhoa o Tšoanelang Jehova

12. Sepheo sa rōna e lokela ho ba sefe ha re batla tsebo ea Molimo?

¹² Re lokela ho etsa thuto ea botho ka sepheo sefe? Na ke ka sepheo sa hore re hlahe re le molemo ho feta ba bang? Hore re bontše hore re phahametse ba bang ka tsebo? Hore re be bo-tsebanyane ba Bibele? Che. Sepheo ke hore re be Bakreste ba ’makhonthe, ba lulang e le malala-a-laotsoe ho thusa batho ba bang ka moea o khathollang o kang oa Kreste. (Matheu 11:28-30) Moapostola Pauluse o ile a lemosa a re: “Tsebo e baka boikhohomoso, empa lerato lea haha.” (1 Bakorinthe 8:1) Kahoo, re lokela ho bontša boikokobetso bo tšoanang le ba Moshe ha a ne a re ho Jehova: “Ka kōpo, ntsebise litsela tsa hao, hore ke u tsebe, e le hore ke fumane kamohelo mahlong a hao.” (Exoda 33:13) Kahoo, re lokela ho batla ho ba le tsebo e le hore re khahlise Molimo, eseng batho. Re batla ho ba bahlanka ba tšoanelehang le ba ikokobelitseng ba Molimo. Re ka finyella pakane ee joang?

13. Ho hlokahala’ng hore motho e be mohlanka ea tšoanelehang oa Molimo?

¹³ Pauluse o ile a eletsa Timothea kamoo a ka khahlisang Molimo kateng, a re: “Etsa sohle se matleng a hao ho itlhahisa u amoheleha ho Molimo, mosebetsi eo ho seng letho leo a ka hlajoang ke lihlong ka lona, ea tšoarang lentsoe la ’nete ka nepo.” (2 Timothea 2:15) Poleloana e reng ‘ho tšoara ka nepo’ e hlaha leetsing la Segerike le bōpiloeng ka mantsoe a kopantsoeng leo qalong le neng le bolela “ho seha ntho e otlolohileng,” kapa ‘ho seha ka ho otloloha.’ (Kingdom Interlinear) Litsebi tse ling li bolela hore sena se fana ka maikutlo a serōki se sehang lesela ka paterone le tsela ea mohoma e etsoang ke molemi masimong, joalo-joalo. Boemong leha e le bofe, se etsoang se lokela ho otloloha. Taba ea bohlokoa ke hore, e le hore Timothea e be mohlanka ea tšoanelehang le ea amohelehang oa Molimo, ho ne ho hlokahala hore a ‘etse sohle se matleng a hae’ ho tiisa hore thuto ea hae le boitšoaro ba hae li lumellana le lentsoe la ’nete.—1 Timothea 4:16.

14. Thuto ea rōna ea botho e lokela ho susumetsa seo re se etsang le ho se bua joang?

¹⁴ Pauluse o ile a hlakisa ntlha e tšoanang ha a ne a khothalletsa Bakreste-’moho le eena ba Kolose hore ba ‘tsamaee ka mokhoa o tšoanelang Jehova e le hore ba mo khahlise ka botlalo’ ka ho “beha litholoana mosebetsing o mong le o mong o molemo le ho hōla tsebong e nepahetseng ea Molimo.” (Bakolose 1:10) Mona Pauluse o bapisa ho tšoanela Jehova le ho “beha litholoana mosebetsing o mong le o mong o molemo” esita le “ho hōla tsebong e nepahetseng ea Molimo.” Ka mantsoe a mang, ntho ea bohlokoa ho Jehova hase feela hore na re nka tsebo e le ea bohlokoa hakae empa hape ke hore na re khomarela Lentsoe la Molimo hakae ho seo re se etsang le ho se bua. (Baroma 2:21, 22) Sena se bolela hore thuto ea rōna ea botho e lokela ho susumetsa monahano oa rōna le boitšoaro ba rōna e le hore re khahlise Molimo.

15. Re ka sireletsa le ho laola likelello le mehopolo ea rōna joang?

¹⁵ Kajeno, Satane o ikemiselitse ho senya bomoea ba rōna ka ho silafatsa likelello tsa rōna. (Baroma 7:14-25) Ka hona, re lokela ho sireletsa likelello le mehopolo ea rōna e le hore re tšoanele Jehova, Molimo oa rōna. Sehlomo sa rōna ke “tsebo ea Molimo,” e nang le matla a ho “tlisa monahano o mong le o mong kholehong ho o etsa hore o mamele Kreste.” Lena ke lona lebaka le ka sehloohong la hore re ele hloko ho ithuta Bibele letsatsi le letsatsi, kaha re batla ho ntša mehopolo ea boithati le ea nama likelellong tsa rōna.—2 Bakorinthe 10:5.

Lintho Tse re Thusang ho Utloisisa

16. Re ka itsoela molemo joang ha Jehova a ntse a re ruta?

¹⁶ Thuto ea Jehova e re thusa moeeng le nameng. Hase thuto e sa thabiseng le e se nang molemo. Ka lebaka leo, rea bala: “’Na, Jehova, ke Molimo oa hao, ke ’na Ea u rutang hore u itsoele molemo, Ea etsang hore u tsamaee tseleng eo u lokelang ho tsamaea ka eona.” (Esaia 48:17) Ke joang Jehova a re tsamaisang tseleng ea hae e molemo? Pele ho tsohle, re na le Lentsoe la hae le bululetsoeng, Bibele e Halalelang. Ena ke buka ea rōna e ka sehloohong ea ho ithuta, eo nako le nako re batlang tataiso ho eona. Ke ka lebaka leo ho leng molemo ho phetla litemana ha li baloa libokeng tsa Bokreste. Melemo ea ho etsa sena e ka bonoa tlalehong e buang ka leqhalaha la Moethiopia, e ho Liketso khaolo ea 8.

17. Ho ile ha etsahala’ng ka leqhalaha la Moethiopia, ’me see se bolela’ng?

¹⁷ Leqhalaha la Moethiopia le ne le sokolohetse Bojudeng. E ne e le molumeli ea tšepahalang oa Molimo ’me o ne a ithuta Mangolo. Ha a ntse a tsamaea ka koloi ea hae, o ne a ntse a bala buka ea Esaia ha Filipi a mathela haufi le eena ’me a botsa a re: “Na u tseba seo u se balang?” Leqhalaha le ile la re’ng? Le ile la re: “‘Ka sebele, nka tseba joang ntle leha e mong a ka ntataisa?’ Eaba [le] kōpa Filipi ka tieo hore a hloe ’me a lule fatše le [lona].” Joale, moea o halalelang o ile oa tataisa Filipi ea ileng a thusa leqhalaha hore le utloisise boprofeta ba Esaia. (Liketso 8:27-35) See se bolela’ng? Se bolela hore ha hoa lekana hore re bale Bibele re le bang. Jehova, ka moea oa hae o sebelisa sehlopha sa lekhoba le tšepahalang le le masene ho re thusa ho utloisisa Lentsoe la hae ka nako e nepahetseng. O etsa see joang?—Matheu 24:45-47; Luka 12:42.

18. Sehlopha sa lekhoba le tšepahalang le le masene se re thusa joang?

¹⁸ Le hoja ho hlalosoa hore sehlopha sa lekhoba sea ‘tšepahala ebile se masene,’ Jesu ha aa ka a re se ke ke sa etsa liphoso. Sehlopha sena sa barab’abo rōna ba tlotsitsoeng ba tšepahalang se sa ntsane se entsoe ka Bakreste ba sa phethahalang. Ho sa tsotellehe boikemisetso ba bona bo botle, ba ka ’na ba fosa, feela joalokaha banna ba tšoanang le bona ba lekholong la pele la lilemo ka linako tse ling ba ne ba fosa. (Liketso 10:9-15; Bagalata 2:8, 11-14) Leha ho le joalo, ba etsa lintho ka sepheo se hloekileng ’me ke bona bao Jehova a ba sebelisang hore ba re lokisetse lintho tsa ho ithuta Bibele e le hore re hahe tumelo ea rōna Lentsoeng la Molimo le litšepisong tsa hae. Ntho e ka sehloohong eo re e filoeng ke lekhoba lena hore re e sebelise thutong ea botho ke Phetolelo ea Lefatše le Lecha ea Mangolo a Halalelang. Hona joale e fumaneha e feletse kapa e sa fella ka lipuo tse 42, ’me ho se ho hatisitsoe tse limilione tse 114 ka mefuta e sa tšoaneng. Re ka e sebelisa joang ka katleho thutong ea rōna ea botho?—2 Timothea 3:14-17.

19. Tse ling tsa likarolo tsa New World Translation—With References tse ka re thusang thutong ea botho ke life?

¹⁹ Ka mohlala, nahana ka New World Translation of the Holy Scriptures—With References. E na le litšupiso tse bontšang litemana tse tšoanang, mantsoe a botlaaseng ba leqephe, tlhahlamano ea mantsoe a sehlooho e khutsufalitsoeng e bitsoang “Tlhahlamano ea Mantsoe a Bibele” le “Tlhahlamano ea Mantsoe a Botlaaseng ba Leqephe” le Sehlomathiso se akaretsang lihlooho tse 43, tse nang le limmapa le lichate. Ho boetse ho na le “Selelekela,” se hlalosang hore na boitsebiso bo bongata bo nkiloe hokae ha ho ne ho etsoa phetolelo ena e ikhethang ea Bibele. Haeba e le teng ka puo eo u e utloisisang, ka hohle-hohle ithute likarolo tsena tsa eona ’me u li sebelise. Ho feta moo, ha re ithuta re lokela ho qala ka Bibele, ’me Phetolelo ea Lefatše le Lecha e totobatsa lebitso la Molimo ka ho loketseng kaha tšebeliso ea lona e hatisa puso ea ’Muso oa Molimo.—Pesaleme ea 149:1-9; Daniele 2:44; Matheu 6:9, 10.

20. Joale ke lipotso life mabapi le thuto ea botho tse hlokang karabo?

²⁰ Joale, re ka ’na ra ipotsa ra re: ‘Ke thuso efe e ’ngoe eo re e hlokang hore re utloisise Bibele? Re ka etsa joang hore re fumane nako ea thuto ea botho? Re ka etsa joang hore re ithute ka tsela e atlehang? Thuto ea rōna ea botho e ka tsoela ba bang molemo joang?’ Sehloohong se latelang re tla tšohla lintlha tsena tsa bohlokoa tsoelo-peleng ea rōna ea Bokreste.

[Mongolo o botlaaseng ba leqephe]

Na Ua Hopola?

• “Ho thuisa” le “ho nahanisisa” ke ho etsa’ng?

• Re lokela ho bontša maikutlo afe mabapi le ho ithuta Lentsoe la Molimo?

• Re lokela ho etsa thuto ea botho ka sepheo sefe?

• Re filoe lintho life ho re thusa ho utloisisa Bibele?

[Setšoantšo se leqepheng la 15]

Litho tsa lelapa la Bethele li fumana hore li matlafala moeeng ha ntho ea pele eo li e etsang letsatsi le leng le le leng e le ho hlahloba temana ea Bibele

[Setšoantšo se leqepheng la 15]

Nako e ka sebelisoa hamolemo ka ho mamela lik’hasete tsa Bibele ha re le leetong

[Setšoantšo se leqepheng la 16]

Batho ba ’nile ba sebetsa ka thata le ka nako e telele hore ba fumane khauta. Uena u etsa boiteko bo bokae hore u ithute Lentsoe la Molimo?

[Tlhaloso ea Moo Setšoantšo se Nkiloeng Teng]

Courtesy of California State Parks, 2002

[Setšoantšo se leqepheng la 17]

Bibele ke letlotlo le ka isang bophelong bo sa feleng