Hlaolela Kamano e Haufi-ufi le Jehova
MORUTUOA JAKOBO o ile a ngola: “Atamelang ho Molimo, ’me o tla atamela ho lōna.” (Jakobo 4:8) ’Me mopesaleme Davida o ile a bina: “Kamano e haufi-ufi le Jehova ke ea ba mo tšabang.” (Pesaleme ea 25:14, NW) Ka ho hlakileng, Jehova Molimo o batla hore re be le kamano e haufi-ufi le eena. Leha ho le joalo, hase motho e mong le e mong ea rapelang Molimo le ho mamela melao ea hae ea ikutloang a le haufi le eena.
Ho thoe’ng ka uena? Na u na le kamano e haufi-ufi le Molimo? Ha ho pelaelo hore u batla ho ba haufi le eena. Re ka hlaolela kamano e haufi-ufi le Molimo joang? See se ka bolela eng ho rōna? Khaolo ea boraro ea buka ea Bibele ea Liproverbia e fana ka likarabo.
Bonahatsa Mosa o Lerato le ’Nete
Morena Solomone oa Iseraele ea boholo-holo o qala khaolo ea boraro ea Liproverbia ka mantsoe ana: “Mora oa ka, u se ke ua lebala molao oa ka, ’me e se eka pelo ea hao e ka boloka litaelo tsa ka, hobane u tla ekelletsoa bolelele ba matsatsi le lilemo tsa bophelo le khotso.” (Liproverbia 3:1, 2, NW) Kaha Solomone o ne a ngola tlas’a tšusumetso ea Molimo, keletso ena ea botsoali ka sebele e tsoa ho Jehova Molimo ’me e lebisitsoe ho rōna. Mona re khothalletsoa hore re mamele likhopotso tsa Molimo—molao oa hae kapa thuto le litaelo tsa hae—tse tlalehiloeng ka Bibeleng. Haeba re etsa sena, re tla “ekelletsoa bolelele ba matsatsi le lilemo tsa bophelo le khotso.” E, le hona joale re ka thabela bophelo bo tletseng khotso ’me re ka qoba liketso tse re pepesetsang kotsing ea ho shoa kapele eo hangata e hlahelang ba etsang bokhopo. Ho feta moo, re ka ba le tšepo ea bophelo bo sa feleng lefatšeng le lecha la khotso.—Liproverbia 1:24-31; 2:21, 22.
Ha a tsoela pele, Solomone o re: “E se eka mosa o lerato le ’nete li ke ke tsa u tlohela. Li tlame molaleng oa hao. Li ngole letlapeng la pelo ea hao, ’me kahoo u fumane kamohelo le temohisiso e molemo mahlong a Molimo le a motho oa lefatše.”—Liproverbia 3:3, 4, NW.
Puong eo litemana tsena li neng li ngotsoe ka eona pele, poleloana ena “mosa o lerato,” e fetoletsoe ka tsela e ’ngoe e le “lerato le tšepahalang ka ho sa sekisetseng” ’me le tsamaisana le botšepehi, bonngoe le botšepehi bo sa sekisetseng. Na re ikemiselitse ho lula re khomaretse Jehova ho sa tsotellehe hore na re hlaheloa ke eng? Na re bonahatsa mosa o lerato kamanong ea rōna le balumeli-’moho le rōna? Na re sebeletsa ho lula re le haufi le bona? Litšebelisanong tsa rōna le bona tsa letsatsi le letsatsi na re boloka ‘molao oa mosa o lerato malemeng a rōna’ esita le ha re le maemong a lekang?—Liproverbia 31:26, NW.
Jehova o ‘lula a loketse ho tšoarela’ hobane o mosa, o lerato haholo. (Pesaleme ea 86:5, NW) Haeba re baketse libe tsa rōna tsa nakong e fetileng ’me hona joale re hloekisa metsamao ea rōna, re ka tiiseha hore “linako tse khathollang” li tla tla li tsoa ho Jehova. (Liketso 3:19) Na ha rea lokela ho etsisa Molimo ka ho tšoarela ba bang litšito tsa bona?—Matheu 6:14, 15.
Jehova ke “Molimo oa ’nete” ’me o batla “’nete” ho ba batlang ho ba haufi-ufi le eena. (Pesaleme ea 31:5) Na ka sebele re ka lebella hore Jehova e be Motsoalle oa rōna haeba re phela bophelo bo habeli—re itšoara ka tsela e itseng ha re le har’a metsoalle ea rōna ea Bakreste ’me ha re siretse ho bona re itšoara ka tsela e ’ngoe—joaloka “batho ba leshano” ba patang hore na hantle ke batho ba mofuta ofe? (Pesaleme ea 26:4, NW) Hoo e tla ba booatla bo bokaakang kaha “lintho tsohle li hlobotse ’me li pepesitsoe phatlalatsa mahlong” a Jehova!—Baheberu 4:13.
Re lokela ho nka mosa o lerato le ’nete e le sefaha sa bohlokoa se ‘tlanngoeng melaleng ea rōna,’ kaha li re thusa ho ‘fumana kamohelo mahlong a Molimo le a motho oa lefatše.’ Ha rea lokela ho bonahatsa litšoaneleho tsena ka ntle feela, empa re boetse re lokela ho li ngola ka ho teba ‘letlapeng la lipelo tsa rōna,’ re li fetole karolo ea bohlokoa ea botho ba rōna.
Hlaolela Tšepo e Feletseng ho Jehova
Morena ea bohlale o tsoela pele: “Tšepa Jehova ka pelo ea hao eohle ’me u se ke ua itšetleha ka kutloisiso ea hao. Litseleng tsohle tsa hao u mo ele hloko, ’me eena o tla otlolla litsela tsa hao.”—Liproverbia 3:5, 6, NW
Ka sebele Jehova o tšoaneloa ke hore re mo tšepe ka ho feletseng. Kaha ke ’Mōpi, o na le ‘matla a sa sitoeng ke letho’ ’me ke Mohloli oa ‘matla a maholo.’ (Esaia 40:26, 29) O khona ho phethahatsa tsohle tseo a li rerileng. Lebitso la hae ha e le hantle le bolela “O Etsa Hore ho be Teng,” ’me sena se matlafatsa tšepo ea rōna matleng a hae a ho phethahatsa lintho tseo a li tšepisitseng! Taba ea hore ‘ho ke ke ha khoneha hore Molimo a bue leshano’ e mo etsa mohlala oa sebele oa ’nete. (Baheberu 6:18) Tšobotsi ea hae e hlahelletseng ke lerato. (1 Johanne 4:8) O “lokile litseleng tsa hae tsohle, o mohau liketsong tsa hae tsohle.” (Pesaleme ea 145:17) Haeba re sitoa ho tšepa Molimo, ke mang eo re ka mo tšepang? Ka sebele, hore re tsebe ho hlaolela ho mo tšepa, re tlameha ho ‘latsoa le ho bona hoba Jehova o molemo’ ka ho sebelisa bophelong ba rōna seo re ithutang sona Bibeleng le ka ho nahana ka molemo o hlahisoang ke ho etsa sena.—Pesaleme ea 34:8.
Ke joang re ka ‘elang Jehova hloko litseleng tsohle tsa rōna’? Mopesaleme ea bululetsoeng o re: “Ka sebele ke tla thuisa ka mosebetsi oohle oa hao, ’me ke tla nahanisisa ka mesebetsi ea hao.” (Pesaleme ea 77:12, NW) Kaha Molimo ha a bonahale, ho nahana ka liketso tsa hae tse khōlō le ka litšebelisano tsa hae le batho ba hae ke habohlokoa bakeng sa ho hlaolela kamano e haufi-ufi le eena.
Thapelo ke tsela e ’ngoe hape eo ka eona re ka elang Jehova hloko. Morena Davida o ile a lula a ipiletsa ho Jehova “tsatsi lohle.” (Pesaleme ea 86:3) Davida o ne a atisa ho rapela bosiu bohle, joaloka nakong ea ha e ne e le ’malehi lefeelleng. (Pesaleme ea 63:6, 7) Moapostola Pauluse o khothatsa ka matla: ‘Le tsoele pele ho rapela ka nako e ’ngoe le e ’ngoe ka moea.’ (Baefese 6:18) Re rapela hangata hakae? Na re thabela ho ba le puisano e tlohang pelong le Molimo? Ha re tobane le maemo a lekang, na re kōpa thuso ho eena ka tieo? Na pele re etsa liqeto tsa bohlokoa rea mo rapela hore a re tataise? Lithapelo tsa rōna tse tiileng ho Jehova li etsa hore a re rate. ’Me re na le kholiseho ea hore o tla mamela lithapelo tsa rōna ’me ‘a otlolle litsela tsa rōna.’
Ke booatla bo bokaakang ho ‘itšetleha ka kutloisiso ea rōna’ kapa ka ea batho ba hlahelletseng ba lefatše, empa re ntse re ka beha tšepo ea rōna e feletseng ho Jehova! Solomone o re: “U se ke ua ipona bohlale.” Ho e-na le hoo, oa eletsa: “Tšaba Jehova ’me u furalle bobe. E se eka e ka ba pholiso mokhubung oa hao le khatholoho masapong a hao.” (Liproverbia 3:7, 8, NW) Tšabo e nepahetseng ea ho se halefise Molimo e lokela ho laola liketso tsohle tsa rōna, menahano le maikutlo. Tšabo e joalo e nang le tlhompho e re thibela ho etsa se sebe ’me ea re folisa le ho re khatholla moeeng.
Neha Jehova se Molemohali Seo U Nang le Sona
Ke tsela efe e ’ngoe eo ka eona re ka atamelang haufi le Molimo? Morena oa laela: “Hlompha Jehova ka lintho tsa hao tsa bohlokoa le ka litholoana tsa pele tsa lihlahisoa tsohle tsa hao.” (Liproverbia 3:9, NW) Ho hlompha Jehova ho bolela ho mo talima e le motho ea phahameng le ho mo phahamisa phatlalatsa ka ho kopanela le ho tšehetsa ho tsebahatsa lebitso la hae phatlalatsa. Lintho tsa bohlokoa tseo re hlomphang Jehova ka tsona ke nako ea rōna, tsebo ea rōna, matla le lintho tsa rōna tse bonahalang. Tsena e lokela e be tsona litholoana tsa pele—se molemohali seo re nang le sona. Na tsela eo re sebelisang matlotlo a rōna ka eona ha ea lokela ho bonahatsa qeto eo re e nkileng ea ‘ho tsoela pele re batla ’muso pele le ho loka ha Molimo’?—Matheu 6:33.
Ho hlompha Jehova ka lintho tsa rōna tsa bohlokoa ho na le meputso. Solomone oa re tiisetsa: “’Me meliko ea hao e tla tlala, e phanya-phanye, mafiso a hao a tlale veine e monate.” (Liproverbia 3:10) Le hoja ho atleha moeeng ka bohona ho sa etse hore motho a atlehe linthong tse bonahalang, ho sebelisa matlotlo a rōna ka seatla se bulehileng bakeng sa ho hlompha Jehova ho tlisa litlhoholofatso tse enneng. Ho etsa thato ea Molimo e ne e le “lijo” tse matlafatsang ho Jesu. (Johanne 4:34) Ka tsela e tšoanang, ho kopanela mosebetsing o tlotlisang Jehova oa ho bolela le oa ho etsa barutuoa hoa re matlafatsa. Haeba re tsoela pele re etsa mosebetsi oo, meliko ea rōna ea moea e tla tlala tsoete! Thabo ea rōna—e tšoantšetsoang ka veine e ncha—e tla khaphatseha.
Na hape re ntse re sa tšepa Jehova le ho mo rapela bakeng sa ho ba le lijo tsa nama tse lekaneng letsatsi ka leng? (Matheu 6:11) Ha e le hantle, ntho e ’ngoe le e ’ngoe eo re nang le eona e tsoa ho Ntate oa rōna ea lerato oa leholimo. Jehova o tla tšolla litlhohonolofatso tse eketsehileng ho latela tsela eo ka eona re sebelisang lintho tsa rōna tsa bohlokoa ho mo rorisa.—1 Bakorinthe 4:7.
Amohela Taeo ea Jehova
Ha a lemoha bohlokoa ba taeo bakeng sa ho fumana botsoalle bo haufi-ufi le Jehova, morena oa Iseraele oa eletsa: “Uena mora oa ka, u se ke ua lahla taeo ea Jehova; ’me u se ke ua nyonya khalemelo ea hae, hobane Jehova o khalemela eo a mo ratang, feela joalokaha ntate a khalemela mora ea mo khahlisang.”—Liproverbia 3:11, 12, NW.
Leha ho le joalo, ho ka ’na ha se ke ha e-ba bonolo hore re amohele taeo. Moapostola Pauluse o ngotse: “Ha ho taeo eo hona joale e bonahalang e thabisa, empa e baka mesarelo; empa leha ho le joalo ka mor’a moo ho ba koetlisitsoeng ke eona e beha litholoana tsa khotso, e leng, ho loka.” (Baheberu 12:11) Khalemelo le taeo ke karolo e hlokahalang ea koetliso e re atametsang haufi le Molimo. Khalemelo e tsoang ho Jehova—ebang e tla ka batsoali ba rōna, ka phutheho ea Bokreste kapa ka ho nahana ka Mangolo nakong eo re ithutang ’ona—ke pontšo ea lerato la hae ho rōna. Re bohlale haeba re e amohela.
Tšoara Bohlale le Temoho ka Tieo
Ka mor’a moo, Solomone o hatella bohlokoa ba bohlale le temoho ho hlaoleleng kamano e haufi le Molimo. O re: “Ho thaba motho ea fumaneng bohlale, le motho ea fumanang temoho, etsoe ho ba le bona e le leruo ho molemo ho feta ho ba le silevera e le leruo ’me ho ba le bona e le lihlahisoa ho molemo ho feta khauta. . . . Ke sefate sa bophelo ho ba bo tšoarang, ’me ba lulang ba bo tšoere ka tieo ba tla bitsoa ba thabileng.”—Liproverbia 3:13-18, NW.
Ha a re hopotsa ka pontšo ea bohlale le temoho pōpong ea Jehova e hlollang, morena eo o re: “Jehova o ile a theha lefatše ka bohlale. A tiisa maholimo ka temoho. . . . Mora oa ka, e se eka li ke ke tsa tloha mahlong a hao. Sireletsa bohlale bo sebetsang le matla a ho nahana, ’me e tla ba bophelo moeeng oa hao le mokhabiso molaleng oa hao.”—Liproverbia 3:19-22, NW.
Bohlale le temoho ke litšoaneleho tsa Molimo. Ha rea lokela ho li hlaolela feela, empa re boetse re lokela ho li tšoara ka tieo ka hore re se ke ra nyehlisa ho ithuteng ha rōna Mangolo ka khothalo le ho sebeliseng seo re ithutang sona. Solomone o tsoela pele: “Tabeng eo u tla tsamaea u sireletsehile tseleng ea hao, esita le leoto la hao le ke ke la khoptjoa ke ntho leha e le efe.” Oa phaella: “Neng kapa neng ha u robala ha u na ho ikutloa u tšohile; ka sebele u tla robala, ’me boroko ba hao bo tla ba monate.”—Liproverbia 3:23, 24, NW.
E, re ka tsamaea re sireletsehile ra ba ra robala re e-na le khotso ea kelello ha re ntse re letetse letsatsi le tlang joaloka lesholu la “timetso ea tšohanyetso” ea lefatše le khopo la Satane. (1 Bathesalonika 5:2, 3; 1 Johanne 5:19) Esita le nakong ena eo matšoenyeho a maholo a leng haufi, re ka kholiseha ka sena: “Ho ke ke ha hlokahala hore u tšohe ntho leha e le efe e tšabehang ea tšohanyetso, kapa sefefo holim’a ba khopo, hobane sea tla. Etsoe, ka sebele, Jehova e tla ba kholiseho ea hao, ’me ka sebele o tla boloka leoto la hao hore le se ke la tšoasoa.”—Liproverbia 3:25, 26, NW; Matheu 24:21.
Etsa se Molemo
Solomone oa eletsa: “U se ke ua hana ka se molemo ho bao se ba lokelang, ha ho le matleng a letsoho la hao ho se etsa.” (Liproverbia 3:27, NW) Ho etsetsa ba bang molemo ho akarelletsa ho sebelisa matlotlo a rōna ka seatla se bulehileng molemong oa bona, ’me sena se na le litšobotsi tse ngata. Empa na ho thusa ba bang hore ba be le kamano e haufi le Molimo oa ’nete hase eona ntho ea bohlokoa ka ho fetisisa eo re ka ba etsetsang eona “nakong [ee] ea bofelo”? (Daniele 12:4) Ka hona, mehla ena ke ea ho bontša cheseho mosebetsing oa ho bolela ka ’Muso le oa ho etsa barutuoa.—Matheu 28:19, 20.
Morena eo ea bohlale o boetse o thathamisa e meng ea mekhoa e lokelang ho qojoa, ha a re: “U se ke ua re ho oa heno: ‘Tsamaea, u boele u khutle ’me hosasane ke tla fana,’ ha ho e-na le ho hong ho uena. U se ke ua rerela oa heno ntho leha e le efe e mpe, ha a lutse le uena ka boikutlo ba tšireletseho. U se ke ua qabana le motho ntle ho lebaka, haeba a sa u etsetsa bobe. U se ke ua honohela motho ea mabifi, kapa ua khetha leha e le efe ea litsela tsa hae.”—Liproverbia 3:28-31, NW.
Ha a akaretsa lebaka la hore a fane ka keletso, Solomone o re: “Etsoe motho ea mano ke ntho e manyala ho Jehova, empa O na le kamano e haufi-ufi le ba lokileng. Thohako ea Jehova e holim’a ntlo ea ea khopo, empa sebaka sa bolulo sa ba lokileng oa se hlohonolofatsa. Ha e le basomi, o tla ba fetola litšeho; empa ho ba bonolo o tla bontša kamohelo. Ba bohlale ba tla rua tlhompho, empa ba hlokang kelello ba phahamisa ho se hlomphehe.”—Liproverbia 3:32-35, NW.
Hore re thabele kamano e haufi-ufi le Jehova, ha rea lokela ho rera bolotsana kapa ho ntša ba bang kotsi. (Liproverbia 6:16-19) Re tla fumana kamohelo ea Molimo le tlhohonolofatso ea hae hafeela re etsa se nepahetseng mahlong a hae. Re ka ’na ra boela ra bona ba bang ba re hlompha re sa lebella hobane ba lemohile hore re etsa lintho tumellanong le bohlale ba bomolimo. Ka hona, a re haneng liketso tse mano tsa lefatše lena le khopo le le mabifi. Ka sebele, a re hahamalleng tsela ea ho loka re be re hlaolele kamano e haufi-ufi le Jehova!
[Litšoantšo tse leqepheng la 25]
“Hlompha Jehova ka lintho tsa hao tsa bohlokoa”