Thuto e Thabisang ea Lelapa

Bibele e re: “Ka tsebo likamore tse ka hare li tla tlatsoa lintho tsohle tsa bohlokoa le tse ntle tsa theko e boima.” (Liproverbia 24:4, NW) Lintho tsena tsa theko e boima hase feela matlotlo a bonahalang empa li akarelletsa lerato la ’nete, tšabo ea bomolimo le tumelo e matla. Litšoaneleho tse joalo ka sebele li atlehisa bophelo ba lelapa. (Liproverbia 15:16, 17; 1 Petrose 1:7) Leha ho le joalo, re lokela ho kenya tsebo ea Molimo malapeng a rōna e le hore re be le litšoaneleho tseo.

HLOOHO ea lelapa e na le boikarabelo ba ho ruta litho tsa lelapa la eona tsebo ena ka botebo. (Deuteronoma 6:6, 7; Baefese 5:25, 26; 6:4) Tsela e ’ngoe e molemo ka ho fetisisa ea ho etsa sena ke ho ba le thuto ea lelapa ea kamehla. Thuto e ka ba e thabisang ba kopanelang ho eona hakaakang ha e qhojoa ka tsela e rutang le e monate! Ka hona, a re hlahlobeng tse ling tsa lintlha tsa bohlokoa tsa ho qhoba thuto ea lelapa e atlehang.a

Thuto ea lelapa e atleha haholoanyane ha e etsoa kamehla. Haeba ho emeloa hore monyetla o hlahe kapa e sobokelloa feela e sa ka ea reroa, e ke ke ea etsoa kamehla. Kahoo, u tlameha ho ‘reka nako’ bakeng sa thuto. (Baefese 5:15-17) Ho khetha nako ea kamehla e loketseng bohle e ka ba phephetso. Hlooho e ’ngoe ea lelapa ea lumela: “Re ne re e-na le bothata ba ho ba le thuto ea rōna ea lelapa kamehla. Re ile ra leka linako tse fapaneng ho fihlela ha re qetella re fumane nako e re tšoanetseng ea mantsiboea. Hona joale thuto ea rōna ea lelapa ke ea kamehla.”

Hang ha u fumane nako e loketseng, hlokomela hore u se ke ua lumella litšitiso ho pupetsa thuto. Maria,b ea lilemo li 33 hona joale, oa hopola: “Haeba baeti ba ne ba fihla nakong eo re tšoereng thuto ka eona, Ntate o ne a ba khothalletsa hore ba emele hore thuto e fele. ’Me haeba founu e ne e kena, o ne a bolella motho eo feela hore o tla mo founela hamorao.”

Leha ho le joalo, sena ha se bolele hore ho ke ke ha e-ba le monyetla oa ho tenyetseha. Ho ka ’na ha hlaha maemo a tšohanyetso kapa a neng a sa lebelloa, ’me ho ka ’na ha hlokahala hore thuto e se etsoe kapa e chechisetsoe morao ka linako tse ling. (Moeklesia 9:11) Empa, hlokomela hore u se ke ua lumella leha e le efe ea litšitiso tsena hore e senye kemiso ea lōna.—Bafilippi 3:16.

Thuto e lokela ho nka nako e kae? Robert ea hōlisitseng mora le morali ka katleho, o re: “Hangata thuto ea rōna e ne e nka hora. Ha bana ba sa le banyenyane, re ne re leka ho hapa thahasello ea bona ka ho tšohla lintho tse sa tšoaneng nakong eo ea hora, tse kang lirapa tse ’maloa sehloohong se ithutoang sa Molula-Qhooa, litemana tse khethiloeng Bibeleng le likarolo tsa litokollo tse ling.” Maria oa hopola: “Ha ’na le bo-ausi ba ka ba babeli re ne re sa le banyenyane haholo, thuto ea rōna e ne e nka metsotso e ka bang 20 habeli kapa hararo ka beke. Ha re ntse re hōla, thuto ea rōna ea lelapa ea beke le beke e ne e nka hora kapa ho isa moo.”

Re Lokela ho Ithuta Eng?

Ho nahana ka potso ena nakong eo e mong le e mong a potolohileng tafole bakeng sa thuto, ho ka fella ka pherekano le ho lahleheloa ke nako ea bohlokoa ea thuto. Haeba ho ne ho ka ba joalo, ha ho na ntho e khethehileng eo bana ba neng ba tla e lebella ’me ba ne ba tla felloa ke thahasello kapele. Ka hona, khetha esale pele sengoliloeng se seng sa Mokhatlo seo le tla ithuta sona.

“Lekhoba le tšepahalang le le masene” le fane ka lingoliloeng tse ngata tseo re ka khethang ho tsona. (Matheu 24:45-47) Mohlomong le ka sebelisa buka eo lelapa le e-song ho ka le e bala. ’Me ho thabisa hakaakang ho hlahloba likarolo tseo le li khethileng ho Insight on the Scriptures haeba meqolo ee e fumaneha ka puo ea lōna! Ka mohlala, le ka ’na la hlahloba sehlooho se buang ka Lijo tsa Shoalane tsa Morena libekeng tsa pele ho Sehopotso. Malapa a mangata a thabela ho lokisetsa Thuto ea Molula-Qhooa ea beke le beke. Empa, lihlooho tse ling tse hlahang ho Molula-Qhooa li boetse li fana ka boitsebiso bo babatsehang bo ka ithutoang. Hlooho ea lelapa e tsebang litlhoko tsa moea tsa lelapa, ke eona e boemong bo botle ba ho etsa qeto ea hore na ke lingoliloeng life tse ka ithutoang.

Maria oa hopola: “Kamehla re ne re ithuta sengoliloeng se ileng sa khethoa esale pele. Empa haeba ho ne ho hlaha potso e itseng kapa boemo bo itseng sekolong, joale re ne re fetohela boitsebisong bo tšoanelang taba.” Lintho tseo ho hlileng ho amehiloeng ka tsona, tse kang mathata ao bacha ba tobanang le ’ona sekolong, ho laetsana, mesebetsi e etsoang ka mor’a nako ea sekolo le tse joalo, li ba teng. Ha li hlahella, khetha lihlooho kapa lingoliloeng tse sebetsanang le taba eo ho talimanoeng le eona. Haeba u bona boitsebiso bo itseng tokollong ea morao-rao ea Molula-Qhooa le Tsoha!, boo u ka ratang ho bo tšohla hang-hang le lelapa, u se ke ua tsilatsila ho etsa hoo. Ke ’nete hore u tla lakatsa ho tsebisa litho tsa lelapa ka phetoho eo nako e sa le teng. Empa etsa bonnete ba hore u khutlela kemisong ea seo le ithutang sona hang ha le qetile.

Etsa Hore Tikoloho e Khatholle

Ha maemo e le a khutsitseng, ho ithuta ho tsoela pele hantle. (Jakobo 3:18) Kahoo, etsa hore bohle ba ikutloe ba phutholohile, empa ka tsela e nang le tlhompho. Hlooho ea lelapa le leng United States e re: “Ebang re ithutela ka kamoreng ea ho phomola kapa foranteng, re leka ka hohle hore re lule re atamelane ho e-na le hore re qhalakane ka kamoreng e khōlō. Sena se etsa hore re be le boikutlo bo mofuthu.” Ka lerato, Maria le eena oa hopola: “’Na le bo-ausi ba ka re ne re fuoa monyetla oa ho khetha hore na re batla ha ho tšoareloa thuto hokae ka tlung bekeng eo. Sena se ne se etsa hore re phutholohe.” Hopola hore khanya e lekaneng, ho lula ka tsela e hlophisehileng hammoho le sebaka se hlasimollang le se sa petetsanang kaofela li tlatsetsa khatholohong. Ho ba le lijonyana tse hlapholang ka mor’a thuto ea lelapa le hona ho etsa hore mantsiboea ao e be a thabisang.

Ka linako tse ling, malapa a mang a bile a khetha ho kopanela thuto ea ’ona le malapa a mang e le ho etsa hore thuto e thahasellise haholoanyane ’me litlhaloso li be ngata. Ha ba bacha ’neteng ba memeloa ho ba teng tokisetsong ena, ba ka rua molemo ha ba bona hlooho ea lelapa e nang le phihlelo e khanna thuto ea lelapa.

Phelisa Bibele

Etsa hore linako tsa ho ithuta e be tse hlasimollang bakeng sa bana, ’me ba tla lula ba li labalabela. U ka etsa sena ka ho khothalletsa bana ba sa leng banyenyane hore ba etse litšoantšo tsa liketsahalo tse ka Bibeleng. Ha ho loketse, e-re bana ba tšoantšetse liketsahalo le litšoantšiso tse ka Bibeleng. Mabapi le bana ba banyenyane, ha ho hlokahale hore u khomarele mokhoa oa lipotso le likarabo. Ho bala kapa ho pheta lipale tsa batho ba hlahang ka Bibeleng ke tsela e thabisang ea ho ruta melao-motheo ea bomolimo. Robert ea boletsoeng pejana, oa hopola: “Ka linako tse ling re ne re abelana ho bala litemana tsa Bibele ka ho fapanyetsana, re bala likarolo tsa ‘mantsoe’ a batho ba fapaneng.” Bana ba ka ’na ba khothalletsoa hore ba ikhethele hore na ba batla ho etsisa mantsoe a bo-mang ha ba bala.

Ho sebelisa limmapa le lichate ho tla thusa bana ba seng ba le baholoanyane hore ba bone ka leihlo la moea libaka le litšobotsi tsa naha moo liketsahalo tseo ba ithutang ka tsona li etsahetseng hona teng. Ka ho hlakileng, thuto ea lelapa e ka phelisoa le ho etsoa e fapaneng ka ho nahana ho seng hokae feela. ’Me bana ba tla ba le tabatabelo ea Lentsoe la Molimo.—1 Petrose 2:2, 3.

Thusa Bohle Hore ba Nke Karolo

Bana ba lokela ho utloa hore baa kopanyelletsoa e le hore ba thabele thuto. Leha ho le joalo, e ka ’na ea e-ba phephetso ho etsa hore bana ba lilemo tse fapaneng ba nke karolo. Empa molao-motheo oa Bibele o re: “Ea okamelang, a a ho etse ka tieo eohle.” (Baroma 12:8) Ho ba mafolofolo hoa thusa kaha mafolofolo ke ntho e tšoaetsanoang.

Ronald o kenyelletsa morali oa hae ea lilemo li hlano, Dina, ka hore a bale lihloohoana tsa boitsebiso bo ithutoang le hore a hlalose litšoantšo tse hlahileng. Selemong se fetileng ha Sehopotso sa lefu la Kreste se ne se atamela, o ile a lebisa tlhokomelo litšoantšong tse loketseng tse hlahileng ho buka ea Motho e Moholo ka ho Fetisisa ea Kileng a Phela.c Oa bolela: “Sena se ile sa mo thusa hore a utloisise bohlokoa ba ketsahalo ena.”

Ka morali oa hae ea lilemo li leshome, Misha, Ronald o nka mohato o pejana. Ronald o re: “Misha o hōla-hōlile hoo a khonang ho utloisisa, eseng litšoantšo feela empa le hore na li bolela eng. Kahoo, ha re ithuta buka ea Tšenolo—Tlhōrō ea Eona e Hlollang ka Botle e Haufi!,d re tsepamisa mehopolo ho se boleloang ke litšoantšo, ’me sena se mo thusitse.”

Ha bana ba kena bocheng, ba khothalletse hore ba sebelise boitsebiso boo ba ithutang bona. Haeba ho hlaha potso nakong ea thuto, ba abele ho etsa lipatlisiso. Robert o ile a etsa joalo ha mora oa hae ea lilemo li 12, Paul, a ne a botsa ka mokhatlo o neng o sa tsoa thehoa sekolong sa bona o neng o kopanyelletsa papali ea Dungeons and Dragons. Paul le ba bang ka lapeng ba ile ba sebelisa Watchtower Publications Index bakeng sa ho hlahloba boitsebiso, ’me ba ile ba bo tšohla thutong ea bona ea lelapa. Robert o re: “Ka lebaka leo, Paul o ile a utloisisa ka potlako hore papali eo e ne e sa lokela Bakreste.”

Ka linako tse ling Robert o ne a boetse a abela lelapa hore le etse lipatlisiso. Mosali oa hae, Nancy, oa hopola: “Ha re ne re batlisisa ka baapostola ba Jesu, e mong le e mong oa rōna o ile a abeloa moapostola a le mong ka beke. Ho ne ho thabisa hakaakang ho bona ha bana ba fana ka tlaleho ea bona ka cheseho thutong ea lelapa!” Ha bana ba etsa lipatlisiso ka bobona ’me ba arolelana boitsebiso le lelapa, ba thuseha hore ba ‘hōlele pel’a Jehova.’—1 Samuele 2:20, 21.

Ho botsa lipotso—tse fatang maikutlo hammoho le tse tataisang—ke tsela e ’ngoe e ntle ea ho kopanyelletsa ngoana. Mosuoe e Moholo, Jesu, o ne a botsa lipotso tse fatang maikutlo, tse kang, “U nahana joang?” (Matheu 17:25) Maria oa hopola: “Ha e mong oa rōna a ne a e-na le potso, ho ne ho se mohla batsoali ba rōna ba re arabang ka ho toba. Kamehla ba ne ba re botsa lipotso tse tataisang, tse thusang hore re bone mabaka.”

Buisana le Bona—U se ke Ua ba Tsunya-tsunya!

Thabo ea thuto ea lelapa e eketsoa ke haeba bohle ba teng ba khona ho ntša mehopolo le maikutlo a bona ba sa tšabe hore ba tla phoqoa. Empa ntate e mong o re: “Puisano e ntle nakong ea thuto ea lelapa e ka ba teng feela haeba ka linako tsohle, mecha ea puisano e bulehile. U ke ke ua ikaketsa nakong ea thuto feela.” Qoba ka hohle-hohle mantsoe a sa nahaneleng, a hlabang, a kang, ‘Ke phetho? Ke ne ke re u tla bua ntho e itseng cha!’; ‘Ua pōta’; ‘Hantle ke ne ke lebeletse eng? U qetoa ke bongoana bona.’ (Liproverbia 12:18) Utloela bana ba hao bohloko ’me u be mosa ho bona. (Pesaleme ea 103:13; Malakia 3:17) Ba thabele ’me u ba tšehetse ha ba leka ho sebelisa seo ba ithutang sona.

Mokhoa oo thuto ea lelapa e bang ka oona e lokela ho ba o tla etsa hore kelello ea ngoana e khone ho amohela thuto. Motsoali e mong ea atlehileng ka bana ba bane oa hlalosa: “Ha u qala u khalemela ngoana, tseba hore u mametsoe ke motho ea hlonameng.” Boemong bo joalo, ho ka etsahala hore boitsebiso bo se tebe. Ka hona, qoba ho etsa linako tsa thuto linako tsa ho laea le ho fana ka kotlo. Haeba li hlokahala, fana ka tsona hamorao ’me e be boinotšing.

Boiteko ke ba Bohlokoa

Ho haha lelapa le atlehileng moeeng ho hloka nako le boiteko. Empa mopesaleme oa bolela: “Bonang, bara ke lefa la Jehova, ’me tholoana ea popelo ea mosali ke moputso.” (Pesaleme ea 127:3) ’Me ho behiloe tlhokomelong ea batsoali boikarabelo ba ho “hōlisa [bana] ka taeo le kelello e laoloang ke Jehova.” (Baefese 6:4) Ka hona, ntlafatsa tsebo ea ho tšoara thuto e atlehang le e thabisang ea lelapa. Etsa sohle se matleng a hao ho fana ka “lebese le sa tsoakoang la lentsoe,” e le hore bana ba hao ba ka “hōlela polokong.”—1 Petrose 2:2; Johanne 17:3.

[Mongolo o botlaaseng ba leqephe]