Ho Bala Bibele—Ho Molemo Ebile ho Monate

“U e bale . . . bosiu le motšehare.”—JOSHUA 1:8, NW.

 1.Ka kakaretso ho bala, haholo-holo ho bala Bibele, ho na le melemo efe?

HO BALA boitsebiso ba bohlokoa ke ntho e molemo. Rafilosofi oa lipolotiki oa Mofora Montesquieu (Charles-Louis de Secondat) o ile a ngola: “Kamehla ho ithuta ho ’nile ha loantša ho tepella bophelong ba ka. Ha ho tsieleho e kileng ea ntlela eo ho bala ka nako e itseng ho sa kang ha e leleka.” Sena ke ’nete e pepenene ka ho bala Bibele. Mopesaleme ea bululetsoeng o itse: “Molao oa Jehova o phethahetse, o hlasimolla moea. Khopotso ea Jehova ea tšepahala, e hlalefisa ea se nang phihlelo. Litaelo tse tsoang ho Jehova li lokile, li thabisa pelo.”—Pesaleme ea 19:7, 8, NW.

 2. Ke hobane’ng ha Jehova a sirelelitse Bibele ho theosa le lilemo, ’me o lebeletse hore batho ba hae ba etse eng ka eona?

² Kaha Jehova Molimo ke Mongoli oa Bibele, o e sirelelitse ho theosa le makholo a lilemo a khanyetso e mabifi ea lira tsa eona, tsa bolumeli le tseo e seng tsa bolumeli. Kaha thato ea hae ke hore “mefuta eohle ea batho e pholohe ’me e fihle tsebong e nepahetseng ea ’nete,” o entse ka hohle hore batho bohle ba fumane Lentsoe la hae. (1 Timothea 2:4) Ho hakanngoa hore hoo e ka bang karolo ea 80 lekholong ea baahi ba lefatše e ka finyelloa ka ho sebelisa lipuo tse 100. Boitsebiso bohle ba Bibele bo fumaneha ka lipuo tse 370, ’me likarolo tse itseng tsa Mangolo li ka baloa ka lipuo tse ling le maleme tse 1 860. Jehova o batla hore batho ba hae ba bale Lentsoe la hae. O hlohonolofatsa bahlanka ba hae ba elang hloko Lentsoe la hae, e, ba le balang letsatsi le letsatsi.—Pesaleme ea 1:1, 2.

Ho Hlokahala Hore Balebeli ba Bale Bibele

3, 4. Jehova o ne a batla hore marena a Iseraele a etse eng, ’me ke mabaka afe ao ka ’ona see se hlokahalang le ho baholo ba Bakreste kajeno?

³ Ha a bua a nahanne ka nako eo ka eona sechaba sa Iseraele se neng se tla ba le morena oa motho, Jehova o ile a re: “Etlare hobane a lule setulong sa borena ba hae, a ingolle buka ea molao oo, a nke litaba bukeng e leng ho baprista ba ba-Levi. Buka eo e lule ho eena, a e bale ka matsatsi ’ohle a ho phela ha hae, a tle a ithute ho tšaba Jehova, Molimo oa hae, le ho boloka litaba tsohle tsa molao ona, le tsa taelo tsena, ’me a etse ka tsona. Pelo ea hae e tle e se ke ea ikhohomosetsa banab’abo, ’me a se ke a kheloha molao ona ho ea ka letsohong le letona, kapa ho le letšehali.”—Deuteronoma 17:18-20.

⁴ Hlokomela mabaka ao ka ’ona Jehova a neng a batla hore marena ’ohle a Iseraele a nakong e tlang a bale buka ea molao oa Molimo letsatsi le letsatsi: (1) “a tle a ithute ho tšaba Jehova, Molimo oa hae, le ho boloka litaba tsohle tsa molao ona, le tsa taelo tsena, ’me a etse ka tsona”; (2) “pelo ea hae e tle e se ke ea ikhohomosetsa banab’abo”; (3) “a se ke a kheloha molao ona ho ea ka letsohong le letona, kapa ho le letšehali.” Na balebeli ba Bakreste kajeno ha ho hlokahale hore ba tšabe Jehova, ba mamele melao ea hae, ba lese ho iphahamisetsa banab’abo bona ba be ba qobe ho kheloha melao ea Jehova? Ka sebele ho bala Bibele letsatsi le letsatsi ho ntse ho le bohlokoa ka tsela e tšoanang ho bona joalokaha ho ne ho le bohlokoa ho marena a Iseraele.

 5. Sehlopha se Busang se sa tsoa ngolla litho tsa Likomiti tsa Makala litaba life mabapi le ho bala Bibele, hona ke hobane’ng ha e ne e tla ba hantle hore baholo bohle ba Bakreste ba sebelise keletso eo?

⁵ Baholo ba Bakreste kajeno ba maphathaphathe hoo ho leng thata hore ba bale Bibele letsatsi le letsatsi. Ka mohlala, litho tsa Sehlopha se Busang sa Lipaki tsa Jehova le litho tsa Likomiti tsa Makala lefatšeng lohle kaofela li phathahane haholo. Empa, lengolo leo Sehlopha se Busang se sa tsoa le ngolla Likomiti tsohle tsa Makala le totobalitse tlhokahalo ea ho bala Bibele letsatsi le letsatsi le ho ba le mekhoa e metle ea ho ithuta. Lengolo lena le bontšitse hore sena se tla etsa hore re rate Jehova le ’nete haholoanyane, ’me se “tla re thusa ho boloka tumelo ea rōna, thabo le mamello ho fihlela qetellong e thabisang.” Baholo bohle ba liphutheho tsa Lipaki tsa Jehova ba na le maikutlo a hore ke sona seo ba se hlokang. Ho bala Mangolo kamehla ho tla ba thusa ho “etsa ka bohlale.” (Joshua 1:7, 8, NW) Ho bona, ka ho khetheha, ho bala Bibele ho “molemo bakeng sa ho ruta, bakeng sa ho khalemela, bakeng sa ho lokisa le bakeng sa ho koetlisa ka ho loka.”—2 Timothea 3:16, Revised Standard Version.

Ke se Hlokahalang ho ba Bacha le ho ba Hōlileng

 6. Ke hobane’ng ha Joshua a ne a bala mantsoe ’ohle a molao oa Jehova ka lentsoe le phahameng ka pel’a meloko ea Iseraele e bokaneng le bajaki?

⁶ Linakong tsa boholo-holo, libuka tsa Mangolo li ne li sa ngolloa hore motho e mong le e mong a be le tsona, ka hona, Bibele e ne e balloa letšoele le bokaneng. Ka mor’a hore Jehova a mo thuse ho hlōla Ai, Joshua o ile a bokella meloko ea Iseraele ka pel’a Thaba ea Ebale le Thaba ea Gerizime. Joale, tlaleho ena ea re bolella: “A balla holimo mantsoe ’ohle a molao, tlhohonolofatso le bomalimabe, ho ea ka sohle se ngoliloeng bukeng ea molao. Ha hoa ka ha e-ba le lentsoe leha le le leng ho sohle seo Moshe a neng a se laetse leo Joshua a sa kang a le balla holimo ka pel’a phutheho eohle ea Iseraele, hammoho le basali le bana ba banyenyane le bajaki ba neng ba tsamaea har’a bona.” (Joshua 8:34, 35, NW) Ho ne ho hlokahala hore ba bacha le ba hōlileng, matsoalloa le bajaki, ba hatise ka ho teba ka lipelong le likelellong tsa bona hore na ke boitšoaro bofe bo neng bo tla tlisa tlhohonolofatso ea Jehova le bo neng bo tla etsa hore a ba nyatse. Ho bala Bibele kamehla ka sebele ho tla re thusa tabeng ena.

7, 8. (a) Kajeno ke bo-mang ba tšoanang le “bajaki,” hona ke hobane’ng ha ho hlokahala hore ba bale Bibele letsatsi le letsatsi? (b) “Bana ba banyenyane” ba ka har’a batho ba Jehova ba latela mohlala oa Jesu ka litsela life?

⁷ Kajeno, bahlanka ba Jehova ba limilione ba tšoana le “bajaki” bao ka kutloisiso ea moea. Nakong e fetileng, ba ne ba phela ka litekanyetso tsa lefatše, empa ba fetotse bophelo ba bona. (Baefese 4:22-24; Bakolose 3:7, 8) Ba lokela ho ikhopotsa litekanyetso tsa Jehova tsa se setle le se sebe ba sa khaotse. (Amose 5:14, 15) Ho bala Lentsoe la Molimo letsatsi le letsatsi ho ba thusa ho etsa sena.—Baheberu 4:12; Jakobo 1:25.

⁸ Ho boetse ho na le “bana ba banyenyane” ba bangata har’a batho ba Jehova ba rutiloeng litekanyetso tsa Jehova ke batsoali ba bona empa bao ho hlokahalang hore ba ikholise hore thato ea hae e lokile. (Baroma 12:1, 2) Ba ka etsa seo joang? Iseraeleng baprista le banna ba baholo ba ile ba laeloa: “U tla bala molao ona pel’a ba-Iseraele kaofela, ba tle ba o utloe. U tla phutha sechaba, banna, le basali, le bana, le molichaba ea metseng ea hao, ba tle ba utloe, ’me ba ithute ho tšaba Jehova, Molimo oa lōna, ’me ba hlokomele ho etsa litaba tsohle tsa molao ona. Bana ba bona ba sa kang ba tseba litaba tseo, ba tla utloa, ’me ba tla ithuta ho tšaba Jehova, Molimo oa lōna.” (Deuteronoma 31:11-13) Kaha Jesu o ne a le pusong ea Molao, o ile a bontša hore o na le thahasello e matla ea ho utloisisa melao ea Ntat’ae a sa le monyenyane a le lilemo li 12. (Luka 2:41-49) Hamorao o ile a tloaela ho mamela le ho nka karolo ha ho baloa Mangolo ka synagogeng. (Luka 4:16; Liketso 15:21) Kajeno e ka ba hantle ha bacha ba ka latela mohlala oa Jesu ka ho bala Lentsoe la Molimo letsatsi le letsatsi le ka ho ba teng libokeng kamehla moo ho baloang ho bileng ho ithutoang Bibele.

Ho Bala Bibele—Ho Tla Pele

 9. (a) Ke hobane’ng ha ho hlokahala hore re hloaee seo re se balang? (b) Mohlophisi oa pele oa makasine ee o ile a re’ng mabapi le libuka tse re thusang ho ithuta Bibele?

⁹ Morena Solomone ea bohlale o ile a ngola: “U lemohe: Ho etsoa ha libuka tse ngata ha ho na bofelo, ’me ho inehela haholo ho tsona ho tepelletsa ’mele.” (Moeklesia 12:12, NW) Motho a ka ’na a eketsa ka hore ho bala libuka tse ngata tse hatisoang kajeno ha ho tepeletse ’mele feela empa ho totobetse hore ho kotsi kelellong. Ka hona, ho hloaea ke habohlokoa. Ntle le ho bala lingoliloeng tsa rōna tsa ho ithuta Bibele, ho hlokahala hore re bale Bibele ka boeona. Mohlophisi oa pele oa makasine ena o ile a ngolla babali ba eona a re: “Le ka mohla le se lebale hore Bibele ke buka ea rōna ea Motheo le hore ho sa tsotellehe hore na libuka tse re thusang li fanoe ke Molimo hakae ke ‘libuka tse thusang’ feela eseng tse ka nkelang Bibele sebaka.”a Kahoo, le hoja re sa hlokomolohe lingoliloeng tse thehiloeng Bibeleng, ho hlokahala hore re bale Bibele ka boeona.

10. “Lekhoba le tšepahalang le le masene” le ile la totobatsa bohlokoa ba ho bala Bibele joang?

¹⁰ Ka lebaka la ho falimehela ntlha ena ea bohlokoa, ke lilemo tse ngata joale “lekhoba le tšepahalang le le masene” le entse hore kemiso ea ho bala Bibele e be karolo ea Sekolo sa Tšebeletso sa Puso ea Molimo phuthehong ka ’ngoe. (Matheu 24:45) Kemiso ea hona joale ea ho bala Bibele e etsa hore ho baloe Bibele kaofela ka nako e ka etsang lilemo tse supileng. Kemiso ena e tsoela bohle molemo empa haholo-holo ba bacha bao ho seng mohla ba kileng ba bala Bibele kaofela. Ba kenang Sekolo sa Bibele sa Gileade sa Watchtower sa baromuoa le Sekolo sa ho Koetlisetsoa Bosebeletsi hammoho le litho tse ncha tsa lelapa la Bethele ho hlokahala hore ba bale Bibele kaofela ka selemo se le seng. Ho sa tsotellehe hore na u sebelisa kemiso efe, u le mong kapa le le lelapa, ho e khomarela ho hloka hore ho bala Bibele ho tle pele.

Mekhoa ea Hao ea ho Bala e Senola Eng?

11. Re lokela ho iphepa ka lipolelo tsa Jehova joang letsatsi le letsatsi hona hobane’ng?

¹¹ Haeba u na le bothata ba ho khomarela kemiso ea hao ea ho bala Bibele, e ka ’na ea e-ba ho loketseng ho ipotsa: ‘E ka ’na eaba mekhoa ea ka ea ho bala kapa ea ho shebella TV e na le phello efe tabeng ea hore ke khone ho bala Lentsoe la Jehova?’ Hopola seo Moshe a ileng a se ngola—e leng seo Jesu a ileng a se pheta—hore “motho o lokela ho phela, eseng ka bohobe feela, empa ka polelo e ’ngoe le e ’ngoe e tsoang molomong oa Jehova.” (Matheu 4:4; Deuteronoma 8:3) Feela joalokaha ho hlokahala hore re je bohobe kapa ho hong ho kang bona letsatsi le letsatsi bophelong ba rōna e le hore re lule re phela nameng, ka ho tšoanang ho hlokahala hore re iphepe ka menahano ea Jehova letsatsi le letsatsi hore re lule re phela moeeng. Re ka tseba menahano ea Molimo letsatsi le letsatsi ka ho bala Mangolo.

12, 13. (a) Moapostola Petrose o tšoantša tabatabelo eo re lokelang ho ba le eona bakeng sa Lentsoe la Molimo joang? (b) Pauluse o sebelisa papiso ea lebese ka tsela e fapaneng le ea Petrose joang?

¹² Haeba re ananela Bibele, “eseng e le lentsoe la batho, empa, feela joalokaha kannete [e] le joalo, e le lentsoe la Molimo,” e tla re hohela feela joalokaha lesea le lakatsa lebese la ’m’a lona. (1 Bathesalonika 2:13) Moapostola Petrose o ile a sebelisa papiso eo, ’me a ngola: “Joaloka masea a sa tsoa tsoaloa, le hlaolele taba-tabelo ea lebese le sa tsoakoang la lentsoe, e le hore ka lona le ka hōlela polokong, hafeela le latsoitse hore Morena o mosa.” (1 Petrose 2:2, 3) Haeba kannete re latsoitse, ka borōna, hore “Morena o mosa,” re tla hlaolela takatso ea ho bala Bibele.

¹³ Se lokelang ho hlokomeloa ke hore temaneng ena Petrose o sebelisitse papiso ea lebese ka tsela e fapaneng le ea moapostola Pauluse. Lebese le ōtla lesea le sa tsoa tsoaloa ka sohle se hlokahalang. Papiso ea Petrose e bontša hore Lentsoe la Molimo le na le sohle seo re se hlokang bakeng sa ho “hōlela polokong.” Ka lehlakoreng le leng, Pauluse o sebelisa ntlha ea hore lebese lea hlokahala ho tšoantšetsa mekhoa e mebe ea phepo ea ba bolelang hore ke batho ba hōlileng moeeng. Lengolong la hae le eang ho Bakreste ba Baheberu, Pauluse o ile a ngola: “Le hoja le tšoanetse hore ebe le mesuoe ka lebaka la nako, le boetse le hloka e mong hore a le rute ho tloha tšimolohong lintho tsa motheo tsa liphatlalatso tse halalelang tsa Molimo; ’me le fetohile ba tšoanang le ba hlokang lebese, eseng lijo tse tiileng. Etsoe e mong le e mong ea bang le kabelo ho noeng lebese ha aa tloaelana le lentsoe la ho loka, kaha ke ngoana e monyenyane. Empa lijo tse tiileng ke tsa batho ba hōlileng ka ho feletseng, tsa bao ka tšebeliso matla a bona a ho lemoha a koetliselitsoeng ho khetholla ka bobeli se nepahetseng le se fosahetseng.” (Baheberu 5:12-14) Ho bala Bibele ka hloko ho ka etsa ho hongata ho hōlisa matla a rōna a ho lemoha le ho tsosa takatso ea rōna ea lintho tsa moea.

Tsela ea ho Bala Bibele

14, 15. (a) Mongoli oa Bibele o re fa tokelo efe? (b) Re ka rua molemo joang bohlaleng ba bomolimo? (Fana ka mehlala.)

¹⁴ Ho bala Bibele ka tsela e molemo ka ho fetisisa ha ho qale ka ho bala, empa ho qala ka ho rapela. Thapelo ke tokelo e ikhethang. Ho joalokaha eka u ile ua qala ho hlahlobisisa buka e ’ngoe e buang ka taba e thata ka ho ipiletsa ho mongoli oa eona hore a u thuse ho utloisisa seo u neng u tla tloha u se bala. Seo se ka ba molemo hakaakang! Mongoli oa Bibele, Jehova, o u fa tokelo eo. Setho se seng sa sehlopha se busang sa lekholong la pele la lilemo 9se ile sa ngolla barab’abo sona sa re: “Haeba mang kapa mang oa lōna a haelloa ke bohlale, a a ’ne a tsoele pele a kōpa Molimo, hobane o fana ka seatla se bulehileng ho bohle a bile a sa nyelise; ’me o tla bo fuoa. Empa a ’ne a tsoele pele a kōpa ka tumelo, a sa belaele ho hang.” (Jakobo 1:5, 6) Sehlopha se Busang sa kajeno ha se khaotse ho re khothalletsa ho bala Bibele ka khothalo.

¹⁵ Bohlale ke ho sebelisa tsebo ka tsela e molemo. Ka hona, pele u phetla Bibele ea hao, kōpa Jehova hore a u thuse ho hlokomela lintlha tseo u li balang tseo ho hlokahalang hore u li sebelise bophelong ba hao. Amahanya lintlha tse ncha tseo u ithutileng tsona le tseo u seng u ntse u li tseba. Li lumellanye le “mohlala oa mantsoe a phelisang hantle” ao u seng u a hlokometse. (2 Timothea 1:13) Nahanisisa ka liketsahalo tsa bophelo ba bahlanka ba Jehova ba nakong e fetileng, ’me u ipotse hore na u ka be u ile ua etsa eng tlas’a maemo ao.—Genese 39:7-9; Daniele 3:3-6, 16-18; Liketso 4:18-20.

16. Ho etsoa litlhahiso life tse molemo ho re nolofalletsa ho etsa hore ho bala ha rōna Bibele ho re tsoele molemo o moholoanyane?

¹⁶ U se ke ua balla ho akaretsa maqephe feela. Iketle. Tebisa maikutlo ho seo u se balang. Ha u khahloa ke ntlha e itseng, sheba litšupiso tse lebisang likarolong tse ling tsa Bibele tse nang le boitsebiso bo tšoanang le boo u bo balang haeba Bibele ea hao e e-na le tsona. Haeba ntlha eo e ntse e sa hlaka, e tšoaee e le hore u tle u etse lipatlisiso tse eketsehileng hamorao. Ha u ntse u bala, tšoaea litemana tseo u batlang ho li hopola ka ho khetheha kapa u li ngole leqepheng le ka thōko. U ka ba ua ingolla lintlha le mangolo a buang ka taba e tšoanang lehlakoreng la leqephe. Tabeng ea litemana tseo u ikutloang hore u tla li hloka ka letsatsi le leng ha u bolela le ha u ruta, ngola lentsoe la sehlooho ’me u le tšoaee tlhahlamanong ea mantsoe a Bibele qetellong ea Bibele ea hao.b

Etsa Hore ho Bala Bibele e be ho Thabisang

17. Ke hobane’ng ha re lokela ho thabela ho bala Bibele?

¹⁷ Mopesaleme o buile ka motho ea thabileng ea ‘thabelang molao oa Jehova, Molao oa hae a o bala ka lentsoe le tlaase bosiu le motšehare.’ (Pesaleme ea 1:2, NW) Ha re bala Bibele letsatsi le letsatsi ha rea lokela ho etsa hore e be mosebetsi, re lokela ho etsa hore e be ho thabisang e le kannete. Tsela e ’ngoe ea ho etsa hore ho be monate ke ea hore ka linako tsohle re ele hloko molemo oa lintho tseo re ithutang tsona. Morena Solomone ea bohlale o ile a ngola: “Ho thaba motho ea fumaneng bohlale . . . Litsela tsa bona ke litsela tsa thabo, ’me litsela tsohle tsa bona ke khotso. Ke sefate sa bophelo ho ba bo tšoarang, ’me ba lulang ba bo tšoere ka tieo ba tla bitsoa ba thabileng.” (Liproverbia 3:13, 17, 18, NW) Boiteko bo hlokahalang bakeng sa ho fumana bohlale ke ba bohlokoa e le kannete, hobane litsela tsa bona ke litsela tsa thabo, khotso le boiketlo, ’me qetellong li fana ka bophelo.

18. Ke eng e hlokahalang ntle le ho bala Bibele, ’me re tla hlahloba eng sehloohong se latelang?

¹⁸ E, ho bala Bibele ho molemo ebile ho monate. Empa na ho lekane? Litho tsa likereke tsa Bokreste-’mōtoana li ’nile tsa bala Bibele ka makholo a lilemo, ‘li ithuta kamehla leha ho le joalo ho se mohla li khonang ho fihla tsebong e nepahetseng ea ’nete.’ (2 Timothea 3:7) Hore ho bala Bibele ho behe litholoana, re lokela ho ho etsa ka morero oa hore tsebo eo re e fumaneng ha re ho etsa re e sebelise bophelong ba rōna le mosebetsing oa rōna oa ho bolela le ho ruta. (Matheu 24:14; 28:19, 20) Sena se hloka boiteko le mekhoa e metle ea ho ithuta, tseo le tsona e ka bang tse thabisang le tse putsang, joalokaha re tla bona sehloohong se latelang.

[Mongolo o botlaaseng ba leqephe]

Lipotso Tsa Tlhahlobo

• Ke keletso efe e fuoeng marena a Iseraele e sebetsang ho balebeli kajeno, hona hobane’ng?

• Ke bo-mang ba tšoanang le “bajaki” le “bana ba banyenyane” kajeno, hona ke hobane’ng ha ho hlokahala hore ba bale Bibele letsatsi le letsatsi?

• Ke litsela life tse molemo tseo ka tsona “lekhoba le tšepahalang le le masene” le re thusitseng ho bala Bibele kamehla?

• Re ka rua molemo oa sebele le thabo joang ha re bala Bibele?

[Setšoantšo se leqepheng la 9]

Baholo ka ho khetheha, ho hlokahala hore ba bale Bibele letsatsi le letsatsi

[Setšoantšo se leqepheng la 10]

Jesu o ne a tloaetse ho kopanela ho baloeng ha Mangolo ka synagogeng