Khaolo ea Boraro
“Mokhethoa oa ka, eo Moea oa ka o mo Amohetseng!”
1, 2. Ke hobane’ng ha Bakreste kajeno ba thahasella Esaia khaolo ea 42?
“‘LE LIPAKI tsa ka,’ ho bolela Jehova, ‘eena mohlanka oa ka eo ke mo khethileng.’” (Esaia 43:10) Phatlalatso ena ea Jehova, e tlalehiloeng ke moprofeta Esaia lekholong la borobeli la lilemo B.C.E., e bontša hore batho ba Jehova ba boholo-holo ba selekane e ne e le sechaba sa lipaki. E ne e le mohlanka oa Molimo ea khethiloeng. Lilemo tse ka bang 2 600 hamorao, ka 1931, Bakreste ba tlotsitsoeng ba ile ba bolela phatlalatsa hore mantsoe ana a sebetsa ho bona. Ba ile ba ipitsa Lipaki tsa Jehova ’me ba amohela ka pelo eohle boikarabelo bo tsamaisanang le ho ba mohlanka oa Molimo lefatšeng.
2 Lipaki tsa Jehova li labalabela ka tieo ho khahlisa Molimo. Ka hona, e mong le e mong oa tsona o thahasella ka matla khaolo ea 42 ea buka ea Esaia, kaha e hlalosa ka ho hlaka mohlanka eo Jehova a mo amohelang le mohlanka eo a sa mo amoheleng. Ho hlahloba boprofeta bona le phethahatso ea bona ho fana ka leseli mabapi le se lebisang ho amoheloeng ke Molimo le se lebisang ho se amoheloeng ke eena.
“Ke Behile Moea oa ka ho Eena”
3. A sebelisa Esaia, Jehova o profeta eng ka “mohlanka oa ka”?
3 A sebelisa Esaia, Jehova o profeta ka ho tla ha mohlanka eo eena ka boeena a tlang ho mo khetha: “Bonang! Mohlanka oa ka, eo ke lulang ke mo tšoere ka tieo! Mokhethoa oa ka, eo moea oa ka o mo amohetseng! Ke behile moea oa ka ho eena. O tla tlisetsa lichaba toka. A ke ke a hoeletsa kapa a phahamisa lentsoe, ’me a ke ke a etsa hore lentsoe la hae le utluoe seterateng. Ha ho lehlaka le tletleraneng leo a tla le roba; ha e le khoele ea lebone e lerootho ea folakse, a ke ke a e tima. O tla hlahisa toka ka ’nete. A ke ke a hlōleha kapa a hatelloa ho fihlela a behile toka lefatšeng; lihlekehleke li tla ’ne li letele molao oa hae.”—Esaia 42:1-4.
4. “Mokhethoa” ea boletsoeng esale pele ke mang, hona re tseba see joang?
4 Mohlanka eo ho buuoang ka eena moo ke mang? Ha rea siuoa lefifing. Re fumana mantsoe ana a qotsitsoe Kosepeleng ea Matheu ’me a sebelisitsoe ho Jesu Kreste. (Matheu 12:15-21) Jesu ke eena Mohlanka ea ratoang, “mokhethoa.” Jehova o ile a beha moea oa hae ho Jesu neng? Ka 29 C.E., nakong ea ha Jesu a kolobetsoa. Tlaleho e bululetsoeng e hlalosa kolobetso eo ’me e bolela hore ka mor’a hore Jesu a tsoe metsing, “leholimo [le ile] la buleha ’me moea o halalelang oa theohela holim’a hae o le sebōpehong sa ’mele se joaloka leeba, ’me lentsoe la tsoa leholimong: ‘U Mora oa ka, ea ratoang; ke u amohetse.’” Ka tsela ena Jehova ka boeena o ile a tsebahatsa Mohlanka oa hae ea ratoang. Tšebeletso ea Jesu e ileng ea latela hammoho le mehlolo eo a ileng a e etsa e ile ea paka hore moea oa Jehova o ne o hlile o le holim’a hae.—Luka 3:21, 22; 4:14-21; Matheu 3:16, 17.
“O Tla Tlisetsa Lichaba Toka”
5. Ke hobane’ng ha ho ne ho hlokahala hore toka e hlakisoe lekholong la pele la lilemo C.E.?
5 Mokhethoa oa Jehova o ne a lokela ho ‘tlisa,’ kapa ho bonahatsa toka ea ’nete. “O tla hlakisetsa lichaba toka.” (Matheu 12:18) See se ne se hlokahala hakaakang lekholong la pele la lilemo C.E.! Baeta-pele ba bolumeli ba Bajuda ba ne ba ruta thuto e sothehileng ka toka le ho loka. Ba ne ba batla ho finyella ho loka ka ho latela letoto la melao e sa tenyetseheng—eo e mengata ea eona ba iqapetseng eona. Toka ea bona e khomaretseng molao e ne e se na mohau le kutloelo-bohloko.
6. Jesu o ile a tsebahatsa toka ea ’nete ka litsela life?
6 Ka lehlakoreng le leng, Jesu o ile a senola pono ea Molimo ka toka. Ka seo a neng a se ruta le ka tsela eo a neng a phela ka eona, Jesu o ile a bonahatsa hore toka ea ’nete e na le kutloelo-bohloko le mohau. Nahana feela ka Thuto ea hae ea Thabeng e tsebahalang. (Matheu, khaolo ea 5-7) Ke tlhaloso e tsotehang hakaakang ea kamoo toka le ho loka li lokelang ho sebelisoa kateng! Ha re bala litlaleho tsa Kosepele, na ha re angoe maikutlo ke kutloelo-bohloko ea Jesu ho mafutsana le batho ba mahlomoleng? (Matheu 20:34; Mareka 1:41; 6:34; Luka 7:13) O ile a fetisetsa molaetsa oa matšeliso ho ba bangata ba neng ba tšoana le lehlaka le tletleraneng, le kobehileng le le hataketsoeng. Ba ne ba tšoana le khoele ea lebone ea folakse e kunkelang, tlhase ea bona ea ho qetela ea bophelo e se e le haufi le ho tima. Jesu ha aa ka a roba “lehlaka le tletleraneng” leha e le ho tima “khoele ea lebone e lerootho ea folakse.” Ho e-na le hoo, mantsoe a hae le liketso tsa hae tse lerato le tse nang le kutloelo-bohloko li ile tsa khothatsa ba bonolo.—Matheu 11:28-30.
7. Ke hobane’ng ha boprofeta bo ne bo re Jesu o ne ‘a ke ke a hoeletsa kapa a phahamisa lentsoe seterateng’?
7 Leha ho le joalo, ke hobane’ng ha boprofeta bo re Jesu o ne a ke ke a ‘hoeletsa kapa a phahamisa lentsoe, ’me o ne a ke ke a etsa hore lentsoe la hae le utluoe seterateng’? Hobane o ne a sa iphahamise, joalokaha ba bangata ba ne ba etsa mehleng ea hae. (Matheu 6:5) Ha a folisa molepera, o ile a bolella monna ea folisitsoeng: “Tiisa hore u se ke ua bolella le ea mong letho.” (Mareka 1:40-44) Ho e-na le ho ipatlela botumo le ho etsa hore batho ba etse liqeto ba itšetlehile ka litlaleho tsa ba bang, Jesu o ne a batla hore ba itemohele ba itšetlehile ka bopaki bo tiileng ba hore e ne e le eena Kreste, Mohlanka ea tlotsitsoeng oa Jehova.
8. (a) Jesu o ile a tlisetsa “lichaba toka” joang? (b) Papiso ea Jesu ea Mosamaria ea nang le moea oa boahelani e re ruta eng ka toka?
8 Mohlanka eo ea Khethiloeng o ne a lokela ho tlisetsa “lichaba toka.” Ke sona seo Jesu a ileng a se etsa. Ntle le ho totobatsa kamoo toka ea bomolimo e nang le kutloelo-bohloko kateng, Jesu o ile a ruta hore e lokela ho akaretsa batho bohle. Ketsahalong e ’ngoe Jesu o ile a hopotsa monna ea rutehileng Molaong hore o lokela ho rata Molimo le moahelani oa hae. Monna eo o ile a botsa Jesu: “Ha e le hantle moahelani oa ka ke mang?” Mohlomong o ne a lebeletse hore Jesu o tla araba ka ho re: “Ke Mojuda oa heno.” Empa Jesu o ile a pheta papiso ea Mosamaria ea nang le moea oa boahelani. Papisong eo, Mosamaria e mong o ile a thusa monna ea neng a khaolelitsoe ke masholu, ha Molevi le moprista bona ba ne ba hanne ho mo thusa. Mong’a potso o ile a tlameha ho lumela hore ketsahalong ena Mosamaria ea nyatsehang e bile eena moahelani, eseng Molevi kapa moprista. Jesu o ile a qetella papiso ea hae ka keletso ena: “U ’ne u etse ho tšoanang.”—Luka 10:25-37; Levitike 19:18.
“A ke ke a Hlōleha Kapa a Hatelloa”
9. Ho utloisisa seo toka ea ’nete e leng sona ho tla re ama joang?
9 Kaha Jesu o ile a hlakisa seo toka ea ’nete e leng sona, barutuoa ba hae ba ile ba ithuta ho bonahatsa tšobotsi ena. Le rōna re lokela ho etsa se tšoanang. Pele ho tsohle, re lokela ho amohela litekanyetso tsa Molimo tsa se setle le se sebe, kaha o na le tokelo ea ho lekanyetsa se nepahetseng le se lokileng. Ha re ntse re ikitlaelletsa ho etsa lintho ka tsela ea Jehova, boitšoaro ba rōna bo lokileng bo tla senola ka ho hlaka seo toka ea ’nete e leng sona.—1 Petrose 2:12.
10. Ke hobane’ng ha ho bonahatsa toka ho kenyelletsa ho kopanela mosebetsing oa boboleli le oa ho ruta?
10 Re boetse re bonahatsa toka ea ’nete ha re kopanela ka mafolofolo mosebetsing oa boboleli le oa ho ruta. Jehova o butse seatla sa hae ho fana ka tsebo e pholosang bophelo ka eena, Mora oa hae le merero ea hae. (Johanne 17:3) E ke ke ea e-ba ho lokileng kapa ho nepahetseng ho ipolokela tsebo eo. Solomone o re: “U se ke ua hana ka se molemo ho bao se ba lokelang, ha ho le matleng a letsoho la hao ho se etsa.” (Liproverbia 3:27) Ka lipelo tsohle tsa rōna a re abeleng batho bohle seo re se tsebang ka Molimo, ho sa tsotellehe morabe oa bona, setso kapa bochaba ba bona.—Liketso 10:34, 35.
11. Ha re etsisa Jesu, re lokela ho tšoara ba bang joang?
11 Ho feta moo, Mokreste oa ’nete o tšoara ba bang ka tsela eo Jesu a neng a ba tšoara ka eona. Ba bangata kajeno ba tobana le mathata a nyahamisang ’me ba hloka kutloelo-bohloko le khothatso. Esita le Bakreste ba bang ba inehetseng ba ka ’na ba hlaseloa ke maemo a itseng hoo ba ka tšoanang le lehlaka le tletleraneng kapa likhoele tsa mabone tse kunkelang. Na ha ba hloke tšehetso ea rōna? (Luka 22:32; Liketso 11:23) Ke ho khathollang hakaakang ho ba karolo ea mokhatlo oa Bakreste ba ’nete, ba lekang ho etsisa Jesu tabeng ea ho sebelisa toka!
12. Ke hobane’ng ha re ka kholiseha hore haufinyane toka ho bohle e tla ba ntho ea sebele?
12 Na ho tla ke ho be le toka bakeng sa bohle? E, ka sebele e tla ba teng. Mokhethoa oa Jehova “a ke ke a hlōleha kapa a hatelloa ho fihlela a behile toka lefatšeng.” Haufinyane Morena ea lutseng teroneng, Kreste Jesu ea tsositsoeng, o tla “tlisa phetetso holim’a ba sa tsebeng Molimo.” (2 Bathesalonika 1:6-9; Tšenolo 16:14-16) Puso ea batho e tla nkeloa sebaka ke ’Muso oa Molimo. Toka le ho loka li tla tlala hohle. (Liproverbia 2:21, 22; Esaia 11:3-5; Daniele 2:44; 2 Petrose 3:13) Ka tabatabelo e khōlō, bahlanka ba Jehova hohle moo ba leng teng—esita le ba libakeng tse hōle, tsa “lihlekehleke”—ba letetse letsatsi leo.
‘Ke Tla Nehelana ka Eena Joaloka Leseli la Lichaba’
13. Jehova o profeta eng ka Mohlanka oa hae ea Khethiloeng?
13 Esaia o tsoela pele: “Sena ke seo Molimo oa ’nete, Jehova, a se boletseng, ’Mōpi oa maholimo le E Moholo ea a otlollang; Ea alang lefatše le lihlahisoa tsa lona, Ea fanang ka phefumoloho ho batho ba ho lona, le moea ho ba tsamaeang ho lona.” (Esaia 42:5) Ke tlhaloso e matla hakaakang e hlalosang Jehova, ’Mōpi! Khopotso ena ea hore Jehova o matla e etsa hore seo a se buang se be le matla a eketsehileng. Jehova o re: “’Na, Jehova, ke u bitsitse ka ho loka, eaba ke u tšoara ka letsoho. Ke tla u sireletsa ’me ke nehelane ka uena joaloka selekane sa batho, joaloka leseli la lichaba, hore u tutubolle mahlo a foufetseng, u ntše motšoaruoa chankaneng e ka tlas’a mohaho, le hore ba lutseng lefifing u ba ntše ka tlung ea botlamuoa.”—Esaia 42:6, 7.
14. (a) Ho bolela’ng hore Jehova o tšoara Mohlanka oa hae eo a mo amohelang ka letsoho? (b) Mohlanka ea Khethiloeng o phetha karolo efe?
14 ’Mōpi e Moholo oa bokahohle, Mofani le ’Moloki oa bophelo, o tšoara Mohlanka oa hae ea Khethiloeng ka letsoho ’me o tšepisa ho mo tšehetsa ka ho feletseng le kamehla. Seo ke se khothatsang hakaakang! Ho feta moo, Jehova o mo boloka a sireletsehile e le hore a nehelane ka eena e le “selekane sa batho.” Selekane ke tumellano, tšepiso e tiileng. Ke taelo e tšepahalang. E, Jehova o entse Mohlanka oa hae “tebeletso ho batho.”—An American Translation.
15, 16. Jesu o ile a sebeletsa e le “leseli la lichaba” joang?
15 Joaloka “leseli la lichaba,” Mohlanka ea tšepisitsoeng o tla tutubolla “mahlo a foufetseng” ’me a lokolle “ba lutseng lefifing.” Ke sona seo Jesu a ileng a se etsa. Ka ho paka ’nete, Jesu o ile a tlotlisa lebitso la Ntate oa hae oa leholimo. (Johanne 17:4, 6) O ile a pepesa mashano a bolumeli, a bolela litaba tse molemo tsa ’Muso, ’me a bulela ba botlamuoeng ba bolumeli monyako o isang tokolohong ea moea. (Matheu 15:3-9; Luka 4:43; Johanne 18:37) O ile a lemosa hore ho se ke ha etsoa mesebetsi ea lefifi ’me a pepesa Satane e le “ntate oa leshano” le “’musi oa lefatše lena.”—Johanne 3:19-21; 8:44; 16:11.
16 Jesu o ile a re: “Ke ’na leseli la lefatše.” (Johanne 8:12) O ile a ipaka e le leseli ka tsela e tsotehang ha a nehelana ka bophelo ba hae bo phethahetseng ba botho e le thekollo. Kahoo, o ile a bulela ba bontšang tumelo tsela ea ho tšoareloa libe, ho ba le kamano e amohelehang le Molimo le tebello ea ho phela ka ho sa feleng. (Matheu 20:28; Johanne 3:16) Ka ho boloka boinehelo bo phethahetseng ba bomolimo bophelong bohle ba hae, Jesu o ile a tšehetsa bobusi ba Jehova ’me a paka Diabolose e le ea leshano. Ka sebele Jesu o ile a etsa hore ba foufetseng ba bone a ba a lokolla ba teronkong ea lefifi la moea.
17. Re sebeletsa re le bajari ba leseli ka litsela life?
17 Thutong ea Thabeng, Jesu o ile a bolella barutuoa ba hae: “Le leseli la lefatše.” (Matheu 5:14) Na le rōna ha re bajari ba leseli? Re na le tokelo ea ho lebisa ba bang ho Jehova, e leng eena Mohloli oa leseli la ’nete, ka tsela ea rōna ea bophelo le ka mosebetsi oa rōna oa boboleli. Ka ho etsisa Jesu, re tsebahatsa lebitso la Jehova, re tšehetsa bobusi ba Hae le ho phatlalatsa ’Muso oa Hae e le eona tšepo feela bakeng sa moloko oa batho. Ho feta moo, joaloka bajari ba leseli re pepesa mashano a bolumeli, re lemosa ka mesebetsi e litšila ea lefifi le ho senola Satane, e leng ea khopo.—Liketso 1:8; 1 Johanne 5:19.
“Binelang Jehova Pina e Ncha”
18. Jehova o tsebisa batho ba hae eng?
18 Joale Jehova o retelehela ho batho ba hae, o re: “Ke ’na Jehova. Ke lona lebitso la ka; ’me nke ke ka fa e mong khanya ea ka, kapa ka fa litšoantšo tse betliloeng thoriso ea ka. Lintho tsa pele—bonang! li fihlile, empa ke bolela lintho tse ncha. Pele li hlaha, ke etsa hore le li utloe.” (Esaia 42:8, 9) Hase o mong oa melimo e se nang thuso o boletseng boprofeta bo buang ka “mohlanka oa ka,” empa bo boletsoe ke Molimo a le mong feela oa ’nete ea phelang. Bo ne bo tla phethahala joang kapa joang, ’me bo ile ba fela ba phethahala. Ka sebele Jehova Molimo ke eena Moqapi oa lintho tse ncha, ’me o li tsebisa batho ba hae pele li etsahala. Re lokela ho itšoara joang?
19, 20. (a) Ke pina efe e tlamehang ho binoa? (b) Ke bo-mang ba binelang Jehova pina ea thoriso kajeno?
19 Esaia oa ngola: “Binelang Jehova pina e ncha, thoriso ea hae ho tloha pheletsong ea lefatše, lōna ba theohelang leoatleng le ho se tletseng ho lona, lōna lihlekehleke le lōna ba ahileng ho tsona. Lefeella le metse ea lona li ke li phahamise mantsoe a tsona, metsana eo Kedare e lulang ho eona. Baahi ba lefika ba ke ba hooe ka thabo. Batho ba hoeletse haholo litlhōrōng tsa lithaba. Ba ke ba ise khanya ho Jehova, ’me ba bolele thoriso ea hae lihlekehlekeng.”—Esaia 42:10-12.
20 Baahi ba metse, ba metsana e lefeelleng, ba lihlekehleke, esita le ba “Kedare,” kapa ba liahelo tse lehoatateng—batho ba libakeng tsohle—ba phehelloa ho binela Jehova pina ea thoriso. Ke ho thabisang hakaakang hore ebe mehleng ena ea rōna ba limilione ba arabetse hamolemo boipiletsong boo ba boprofeta! Ba amohetse ’nete ea Lentsoe la Molimo ’me ba entse Jehova, Molimo oa bona. Batho ba Jehova ba bina pina ena e ncha—ba tlotlisa Jehova—linaheng tse fetang 230. Ke ho thabisang hakaakang ho bina sehlopheng see sa libini tse tsoang litsong, lipuong le merabeng e fapa-fapaneng!
21. Ke hobane’ng ha lira tsa batho ba Molimo li ke ke tsa atleha ho khutsisa pina ea thoriso e eang ho Jehova?
21 Na bahanyetsi ba ka ema khahlanong le Molimo ’me ba khutsisa pina ee ea thoriso? Ba ke ke! “Jehova o tla tloha joaloka monna ea matla. O tla tsosa cheseho joaloka mohlabani. O tla hooa, e, o tla ntša mohoo oa ntoa; o tla iponahatsa a le matla ho feta lira tsa hae.” (Esaia 42:13) Ke ’muso ofe o ka emang khahlanong le Jehova? Lilemong tse ka bang 3 500 tse fetileng, moprofeta Moshe le bara ba Iseraele ba ile ba bina: “Jehova ke mohale oa ntoa. Jehova ke lebitso la hae. O lahletse likoloi tsa Faro le mabotho a hae a sesole leoatleng, ’me bahlabani ba hae ba khethehileng ba tebiselitsoe ka Leoatleng le Lefubelu.” (Exoda 15:3, 4) Jehova o ile a hlōla lebotho la sesole le neng le le matla ka ho fetisisa nakong eo. Ha ho sera sa batho ba Molimo se ka atlehang ha Jehova a futuha joaloka mohlabani ea matla.
“Ke Khutsitse ka Nako e Telele”
22, 23. Ke hobane’ng ha Jehova a ‘khutsa ka nako e telele’?
22 Jehova ha a leeme hape o lokile, esita le ha a liha kahlolo ho lira tsa hae. O re: “Ke khutsitse ka nako e telele. Ke ile ka tsoela pele ke khutsitse. Ke ’nile ka sebelisa boitšoaro. Joaloka mosali ea belehang ke tla bobola, ke hemesele, ’me ke feheloe ka nako e tšoanang. Ke tla ripitla lithaba le maralla, ’me ke tla etsa hore limela tsohle tsa tsona li omelle. Ke tla etsa hore linōka li fetohe lihlekehleke, ’me ke pshese matamo a nang le lehlaka.”—Esaia 42:14, 15.
23 Pele a nka khato ea boahloli, Jehova o fana ka nako pele e le ho fa bafosi monyetla oa ho furalla litsela tsa bona tse mpe. (Jeremia 18:7-10; 2 Petrose 3:9) Nahana ka boemo ba Bababylona, bao, joaloka ’muso o hlaheletseng oa lefatše, ba etsang Jerusalema lesupi ka selemo sa 607 B.C.E. Jehova o lumella sena e le hore a laee Baiseraele ka lebaka la ho se tšepahale ha bona. Leha ho le joalo, Bababylona ba sitoa ho lemoha karolo eo ba e phethang. Ba tšoara batho ba Molimo ka tsela e sehlōhō haholo ho feta kamoo kahlolo ea Molimo e hlokang kateng. (Esaia 47:6, 7; Zakaria 1:15) E tlameha ebe ho utloisa Molimo bohloko hakaakang ho bona batho ba hae ba sotleha! Empa o ithiba hore a se ke a nka khato ho fihlela ka nako ea hae e loketseng. Ka nako eo, o leka ka matla—joaloka mosali ea belehang—ho lokolla batho ba hae ba selekane ’me o ba ntša e le sechaba se ikemetseng. E le hore a finyelle sena, ka 539 B.C.E., o pshesa metsi le ho ripitla Babylona le tšireletso ea eona.
24. Jehova o bulela batho ba hae ba Iseraele monyetla ofe?
24 E tlameha ebe batho ba Molimo ba ile ba thaba hakaakang ha qetellong, ka mor’a lilemo-lemo tseo ba li qetileng ba le botlamuoeng, ba buleheloa ke tsela e lebang hae! (2 Likronike 36:22, 23) E tlameha ebe ba ile ba thaba ha ba latsoa ho phethahala ha tšepiso ea Jehova: “Ke tla etsa hore lifofu li tsamaee ka tsela eo li sa kang tsa e tseba; ke tla etsa hore li hate tseleng eo li sa kang tsa e tseba. Ke tla etsa hore sebaka se lefifi ka pel’a tsona e be leseli, le sebaka se matsaranka e be sebaka se motsitsa. Tsena ke lintho tseo ke tla li etsetsa tsona, ’me nke ke ka li tlohela.”—Esaia 42:16.
25. (a) Batho ba Jehova ba ka kholiseha ka eng kajeno? (b) Re lokela ho ikemisetsa ho etsa eng?
25 Mantsoe aa a sebetsa joang kajeno? Ha e le hantle, ka nako e telele joale—ka lilemo tse makholo-kholo—Jehova o ’nile a lumella lichaba ho iketsetsa borata. Leha ho le joalo, nako ea hae e behiloeng ea ho lokisa litaba e haufi. Mehleng ea kajeno, o hlahisitse batho ba pakelang lebitso la hae. Ka ho tlosa khanyetso leha e le efe e khahlanong le bona, o ba betletse tsela ea ho mo rapela “ka moea le ka ’nete.” (Johanne 4:24) O ile a tšepisa: “Nke ke ka [ba] tlohela,” ’me o pheletse tšepiso eo ea hae. Ho thoe’ng ka ba phehellang ho rapela melimo ea bohata? Jehova o re: “Ba tla khutlisoa, ba tla hlajoa ke lihlong haholo, ba tšepang litšoantšo tse betliloeng, ba reng ho setšoantšo se entsoeng ka ho qhibilihisoa: ‘Le melimo ea rōna.’” (Esaia 42:17) Ke habohlokoa hakaakang hore re lule re tšepahala ho Jehova, joalokaha Mokhethoa oa hae a ile a lula a tšepahala!
‘Mohlanka ea sa Utloeng Litsebeng le ea Foufetseng’
26, 27. Iseraele e ipaka ho ba ‘mohlanka ea sa utloeng le ea foufetseng’ joang, hona e le ka liphello life?
26 Mohlanka oa Molimo ea Khethiloeng, Jesu Kreste, o ile a lula a tšepahala ho isa lefung. Leha ho le joalo, batho ba Jehova, Baiseraele, ba ipaka e le mohlanka ea sa tšepahaleng, ea sa utloeng le ea foufetseng ka kutloisiso ea moea. Ha a bua le bona, Jehova o re: “Utloang, lōna ba sa utloeng litsebeng; ’me le talime, lōna lifofu. Ea foufetseng ke mang, haese mohlanka oa ka, ’me ke mang ea sa utloeng litsebeng joaloka lenģosa la ka leo ke le romelang? Ke mang ea foufetseng joaloka ea putsitsoeng, kapa ea foufetseng joaloka mohlanka oa Jehova? U bone lintho tse ngata, empa ha ua ka ua lula u talimile. U butse litsebe, empa ha ua ka ua lula u mametse. Jehova molemong oa ho loka ha hae o thabetse hore a hōlise molao le ho o etsa o hlomphehang.”—Esaia 42:18-21.
27 Iseraele e boemong bo soabisang hakaakang! Batho ba eona ba lula ba khelohela borapeling ba melimo ea lichaba ea bademona. Khafetsa-khafetsa, Jehova o lula a romela manģosa a hae, empa batho ba hae ha ba ele hloko. (2 Likronike 36:14-16) Esaia o bolela liphello esale pele: “Ke batho ba tlatlapuoeng le ba nketsoeng thepa ka mahahapa, kaofela ha bona ba tšoasitsoe ka mekoting, ’me ba bolokiloe ba patiloe matlong a botlamuoa. Ba tlatlapuoe ho se molopolli, ba nketsoe thepa ka mahahapa ho se ea reng: ‘Khutlisang!’ Ke mang har’a lōna ea tla mamela see? Ke mang ea tla ela hloko ’me a mamele bakeng sa linako tsa morao? Ke mang ea nehetseng Jakobo hore e nkeloe thepa ka mahahapa, le Iseraele ho ba tlatlapang? Na hase Jehova, Eo re mo sitetsoeng, le eo ba sa kang ba batla ho tsamaea litseleng tsa hae le eo ba sa kang ba mamela molao oa hae? Kahoo O ’nile a tšollela khalefo ea hae ho eona, bohale ba hae, le matla a ntoa. Ea ’na ea e timetsa ka hohle, empa ha ea ka ea ela hloko; ea ’na ea e tukela, empa ha ho letho leo e neng e le beha pelong.”—Esaia 42:22-25.
28. (a) Re ka ithuta eng mohlaleng oa baahi ba Juda? (b) Re ka batla kamohelo ea Jehova joang?
28 Ka lebaka la ho se tšepahale ha baahi ba eona, Jehova o lumella naha ea Juda hore e tlatlapuoe le hore e nkeloe thepa ka mahahapa ka 607 B.C.E. Bababylona ba chesa tempele ea Jehova, ba etsa Jerusalema lesupi, ’me ba isa Bajuda botlamuoeng. (2 Likronike 36:17-21) E se eka re ka nka ka ho teba mohlala ona o lemosang ’me le ka mohla re se ke ra ithiba litsebe ho utloa litaelo tsa Jehova kapa ra iphoufaletsa Lentsoe la hae le ngotsoeng. Ho e-na le hoo, e se eka re ka batla kamohelo ea Jehova ka ho etsisa Kreste Jesu, Mohlanka eo Jehova a mo amohetseng. Joaloka Jesu, e se eka re ka tsebahatsa toka ea ’nete ka seo re se buang le seo re se etsang. Ka tsela ena, re tla lula re le har’a batho ba Jehova, re sebeletsa re le bajari ba leseli ba rorisang Molimo oa ’nete le ba mo tlotlisang.
[Litšoantšo tse leqepheng la 33]
Toka ea ’nete e na le kutloelo-bohloko le mohau
[Setšoantšo se leqepheng la 34]
Papisong ea Mosamaria ea nang le moea oa boahelani, Jesu o ile a bontša hore toka ea ’nete e akaretsa batho bohle
[Litšoantšo tse leqepheng la 36]
Ka ho ba ba khothatsang le ba mosa, re sebelisa toka ea bomolimo
[Litšoantšo tse leqepheng la 39]
Ka mosebetsi oa rōna oa boboleli, re bonahatsa toka ea bomolimo
[Setšoantšo se leqepheng la 40]
Mohlanka ea amohetsoeng o ile a nehelanoa “joaloka leseli la lichaba”