Na Lenyalo ke Sona Feela Senotlolo sa Thabo?
“O lokolohile ho nyaloa ke mang kapa mang eo a mo ratang, Moreneng feela. Empa o thabile haholoanyane haeba a lula a le joalo.”—1 BA-KORINTHE 7:39, 40, NW.
1. Mangolo a hlalosa Jehova joang, ’me o etselitse libōpuoa tsa hae eng?
JEHOVA ke “Molimo o thabileng.” (1 Timothea 1:11, NW) Joaloka Mofani ea Seatla se Bulehileng oa “mpho e ’ngoe le e ’ngoe e ntle, leha e le neo e ’ngoe le e ’ngoe e phethehileng,” o fa libōpuoa tsohle tsa hae tse bohlale—tse batho le tsa moea—hantle feela seo li se hlokang hore li lule li thabile tšebeletsong ea hae. (Jakobo 1:17) Mabapi le seo, nonyana e binang hamonate, lelinyane la ntja le bapalang ka nyakallo, kapa dolphin e bapalang, kaofela li paka hore Jehova o ne a bōpetse liphoofolo hore li thabele bophelo lilaong tsa tsona ka ho fapana. Mopesaleme o bile o tsoela pele ho bolela ka mokhoa oa thothokiso hore “lifate tsa Jehova li khotše, e leng likedare tsa Lebanone tseo a li hlomileng.”—Pesaleme ea 104:16.
2. (a) Ke eng se bontšang hore Jesu o thabisoa ke ho etsa thato ea Ntate oa hae? (b) Barutuoa ba Jesu ba ne ba na le mabaka afe a ba tlisetsang thabo?
2 Jesu Kreste ke ‘setšoantšo se phethahetseng sa boleng ba Jehova.’ (Ba-Heberu 1:3, NW) Ka hona, ha ho makatse hore e be Jesu o bitsoa “’Musi a le mong ea Matla le ea thabileng.” (1 Timothea 6:15, NW) O re fa mohlala o babatsehang oa kamoo ho etsa thato ea Jehova e ka bang ho khotsofatsang ho feta lijo, ho tlisang thabo e felletseng. Jesu o boetse o re bontša hore re ka fumana thabo ha re etsa lintho ka tšabo ea Molimo, ke hore, tlhompho e tebileng le tšabo e loketseng ea ho O halefisa. (Pesaleme ea 40:8; Esaia 11:3; Johanne 4:34) Ha barutuoa ba 70 ba mo tlalehela “ka thabo” ka mor’a leeto la ho bolela ka ’Muso, Jesu ka boeena o ile a “nyakalla haholo ka moea o halalelang.” Ka mor’a hore a bolelle Ntat’ae ka thabo ea hae thapelong, o ile a retelehela ho barutuoa ’me a re: “Ho thabile mahlo a bonang lintho tseo le li bonang. Hobane ke re ho lōna, Baprofeta le marena a mangata a ne a lakatsa ho bona lintho tseo le li bonang empa ha aa ka a li bona, le ho utloa lintho tseo le li utloang empa ha aa ka a li utloa.”—Luka 10:17-24, NW.
Mabaka a ho Thaba
3. Mabaka a mang a tlisang thabo ke afe?
3 Na mahlo a rōna ha aa lokela ho thabela ho bona lintho tseo re li bonang tse phethahatsang Lentsoe la Jehova le merero ea hae nakong ee ea bofelo? Na ha rea lokela ho nyakallela ho utloisisa boprofeta boo baprofeta ba tšepahalang le marena a kang Esaia, Daniele, le Davida, a neng a sa bo utloisise? Na ha re thabele ho sebeletsa Molimo o thabileng, Jehova, tlas’a ketello-pele ea ’Musi ea Matla ea thabileng, Morena oa rōna Jesu Kreste? Ka sebele rea ho thabela!
4, 5. (a) E le hore re ka lula re thabile tšebeletsong ea Jehova, re tlameha ho qoba eng? (b) Lintho tse ling tse tlatsetsang thabong ke life, ’me see se phahamisa potso efe?
4 Leha ho le joalo, haeba re batla ho lula re thabile tšebeletsong ea Molimo, ha rea lokela ho theha ho thaba ha rōna likhopolong tsa lefatše. Likhopolo tsena li ka fifatsa monahano oa rōna hobane li akarelletsa leruo la lintho tse bonahalang, mokhoa oa bophelo oa ho etsa lintho hore u bonoe ke batho, joalo-joalo. “Thabo” leha e le efe e thehiloeng linthong tse joalo e tla ba ea nakoana, hobane lefatše lena lea feta.—1 Johanne 2:15-17.
5 Bahlanka ba bangata ba Jehova ba inehetseng baa hlokomela hore ho finyella lipakane tsa lefatše ho ke ke ha tlisa thabo ea ’nete. Ke Ntate oa rōna oa leholimo feela ea fanang ka lintho tsa moea le tsa nama tse tlatsetsang thabong ea sebele ea bahlanka ba hae. Re leboha hakaakang ka lijo tsa moea tseo a re fang tsona ka “mohlanka ea khabane, ea bohlale”! (Mattheu 24:45-47) Re boetse re leboha lijo tsa nama le lintho tse ling tse bonahalang tseo re li fumanang letsohong le lerato la Molimo. Joale, ho boetse ho na le mpho e tsotehang ea lenyalo le thabo e tsamaeang le eona ea bophelo ba lelapa. Ha ho makatse ha Naomi a ile a hlalosa takatso ea hae e tiileng ka ngoetsi ea hae ea mohlolohali ka mantsoe ana: “Jehova a nee e mong le e mong oa lōna khatholoho tlung ea monna oa hae.” (Ruthe 1:9) Kahoo lenyalo ke senotlolo se ka notlollang monyako o lebisang thabong e khōlō. Empa na lenyalo ke sona feela senotlolo sa ho notlolla tsela e lebisang bophelong bo thabileng? Ho hlokahala hore haholo-holo bacha ba hlahlobisise hore na ho hlile ho joalo.
6. Ho latela se boletsoeng ke Genese, morero o moholo oa tokisetso ea lenyalo ke ofe?
6 Ha Bibele e tlaleha ka tšimoloho ea lenyalo, e re: “Eaba Molimo o etsa motho ka setšoantšo sa oona; oa mo etsa ka setšoantšo sa Molimo. Oa ba etsa e le e motona le e motšehali. Molimo oa ba hlohonolofatsa, ’me Molimo oa re ho bona: Ngatafalang, le ate, le tlale lefatšeng, le rene holim’a lona.” (Genese 1:27, 28) Ka ho qalisa ha Jehova lenyalo, Adama o ile a sebelisoa hore a hlahise libōpuoa tse eketsehileng tse batho, ka ho etsa joalo a atise moloko oa motho. Empa ho na le ho hongata haholo lenyalong ho feta hoo.
“Moreneng Feela”
7. Ke tlhokahalo efe ea lenyalo eo mopatriareka e mong ea tšepahalang a ileng a etsa boiteko bo matla ba ho e phethahatsa?
7 Kaha Jehova Molimo ke eena Moqapi oa lenyalo, re ka lebella hore a behe litekanyetso tsa lenyalo tse tla tlisetsa bahlanka ba hae thabo. Mehleng ea bapatriareka, ho nyalana le batho bao e seng barapeli ba Jehova ho ne ho sa khothalletsoe ho hang. Abrahama o ile a re mohlanka oa hae Eliezere a ikane ka Jehova hore o ne a ke ke a nkela mora oa mopatriareka, Isaaka, mosali har’a Bakanana. Eliezere o ile a nka leeto le lelelele ’me a latela litaelo tsa Abrahama ka botšepehi e le hore a ka fumana ‘mosali eo Jehova a mo laoletseng mora oa mong a hae.’ (Genese 24:3, 44) Kahoo Isaaka o ile a nyala Rebeka. Ha mora oa bona Esau a ikhethela basali har’a Bahethe ba bahedene, basali bana e ile ea ba “bohloko pelong tsa Isaaka le Rebeka.”—Genese 26:34, 35; 27:46; 28:1, 8.
8. Selekane sa Molao se ne se fane ka thibelo efe mabapi le lenyalo, hona hobane’ng?
8 Tlas’a selekane sa Molao, ho nyalana le banna kapa basali ba lichaba tsa Bakanana tse neng li boletsoe ka ho hlakileng ho ne ho thibetsoe. Jehova o ile a laela batho ba hae: “U se ke ua nyallana le bona; u se ke ua nea bara ba bona barali ba hao, ’me u se ke ua nkela bara ba hao barali ba bona; hobane bara ba hao ba ka khelosoa ke bona, hore ba ntlohele, ’me ba sebeletse melimo esele, ’me khalefo ea Jehova e ka le tukela, a u felisa hang.”—Deuteronoma 7:3, 4.
9. Bibele e fa Bakreste keletso efe ka lenyalo?
9 Ha ho makatse hore e be lithibelo tse tšoanang tsa ho nyalana le batho bao e seng barapeli ba Jehova lia sebetsa ka har’a phutheho ea Bokreste. Moapostola Pauluse o ile a eletsa balumeli-’moho: “Se sikareng joko e le ’ngoe le ba sa lumelang; hobane kopano ke efe ea ho loka le bokhopo? Kapa leseli le na le kopano efe le lefifi? Kreste o na le selekane sefe le Beliale? Kapa ea lumetseng o na le kabelo efe le ea sa lumelang?” (2 Ba-Korinthe 6:14, 15) Keletso eo e sebetsa ka litsela tse sa tšoaneng ’me ha e le hantle ea sebetsa lenyalong. Taelo ea Pauluse e tobileng e eang ho bahlanka bohle ba Jehova ba inehetseng ke hore ba lokela ho nahana ka ho nyala motho “haeba feela a le bonngoeng le Morena.”—1 Ba-Korinthe 7:39, (NW) mongolo o botlaaseng ba leqephe.
Ba sa Khoneng ho Nyala “Moreneng”
10. Bakreste ba bangata ba seng lenyalong ba etsa eng, ’me ho phahama potso efe?
10 Bakreste ba bangata ba masoha ba khethile ho latela mohlala oa Jesu Kreste ka ho hlaolela mpho ea bosoha. Hape, ka baka la ho se khone ho fumana molekane ea tšabang Molimo hona joale e le hore ba ka nyala “Moreneng,” Bakreste ba bangata ba tšepahalang ba behile tšepo ea bona ho Jehova ’me ba lutse e le masoha ho e-na le ho nyalana le bao e seng balumeli. Moea oa Molimo o hlahisa ka ho bona litholoana tse kang thabo, khotso, tumelo, le boitšoaro, tse ba nolofalletsang ho boloka bosoha bo hloekileng. (Ba-Galata 5:22, 23) Har’a ba bang ba hlōlang teko ena ea boinehelo ho Molimo ka katleho ke bo-khaitseli ba rōna ba Bakreste ba bangata, bao re ba hlomphang ka ho teba. Linaheng tse ngata, palo ea bona e feta ea baena ka hona ba phetha karolo e khōlō mosebetsing oa ho bolela. Ka sebele, “Jehova ka boeena oa bua; basali ba bolelang litaba tse molemo ke lebotho le leholo.” (Pesaleme ea 68:11, NW) Ha e le hantle, bahlanka ba bangata ba Molimo ba seng lenyalong ba boloka botšepehi hobane ba ‘tšepa Jehova ka lipelo tsa bona tsohle, ’me o otlolla litsela tsa bona.’ (Liproverbia 3:5, 6) Empa na hona joale ba sa khoneng ho nyala kapa ho nyaloa “Moreneng” joang kapa joang ba tla hloka thabo?
11. Bakreste ba lulang e le masoha ka baka la ho hlompha melao-motheo ea Bibele ba ka kholiseha ka eng?
11 A re hopoleng hore re Lipaki tsa Molimo o thabileng, Jehova, tse sebeletsang tlas’a ’Musi ea Matla ea thabileng, Jesu Kreste. Kahoo haeba ho hlompha ha rōna lithibelo tse boletsoeng ka ho hlaka ka Bibeleng ho re susumelletsa ho lula re le masoha hobane re sa khone ho fumana molekane oa lenyalo “Moreneng,” na hoa utloahala ho nahana hore Molimo le Kreste ba tla re tlohela re sa thaba? Le hanyenyane. Ka hona, re tlameha ho fihlela qeto ea hore ho ka etsahala hore Bakreste ba thabe ba ntse ba se lenyalong. Jehova a ka re etsa hore re thabe kannete ebang re kene lenyalong kapa che.
Senotlolo sa Thabo ea ’Nete
12. Boemo ba mangeloi a sa utloeng bo bontša eng mabapi le lenyalo?
12 Lenyalo hase sona feela senotlolo sa thabo ho bahlanka bohle ba Molimo. Ka mohlala, nahana ka mangeloi. Pele ho Moroallo, mangeloi a mang a ile a hlaolela litakatso tseo e seng tsa tlhaho ho libōpuoa tsa moea, ha aa ka a khotsofalla ho se nyale, eaba a apara ’mele ea nama e le hore a ka inkela basali. Kaha mangeloi ana “a tlohile tulong tseo e neng e le tsa ’ona,” Molimo o a “bolokile litlamong tse sa feleng le lefifing, ho lebella kahlolo ea letsatsi le leholo teng.” (Juda 6; Genese 6:1, 2) Ka ho hlakileng, ho ne ho se mohla Molimo o rerileng hore mangeloi a nyale. Kahoo ho hang lenyalo e ne e ke ke ea e-ba senotlolo sa thabo ho ’ona.
13. Ke hobane’ng ha mangeloi a halalelang a thabile, ’me see se bontša eng bakeng sa bahlanka bohle ba Molimo?
13 Empa, mangeloi a tšepahalang a thabile. Jehova o ile a rala metheo ea lefatše ’me ha ba le “’mino oa thabo oa linaleli tsa meso le thoriso e momahaneng ea bara ba Molimo [ba mangeloi].” (Jobo 38:7, The New Jerusalem Bible) Ke hobane’ng ha mangeloi a halalelang a thabile? Hobane a hlokomela lintho tsa Jehova Molimo ka mehla, ‘a mamela seo a se bolelang’ e le hore a se phethahatse. A thabela ho ‘phetha thato ea hae.’ (Pesaleme ea 103:20, 21, (NW) mongolo o botlaaseng ba leqephe) E, thabo ea mangeloi a halalelang e tlisoa ke ho sebeletsa Jehova ka botšepehi. Seo ke sona senotlolo sa thabo ea ’nete le ho batho. Ka baka leo, Bakreste ba tlotsitsoeng ba leng lenyalong ba sebeletsang Molimo ka thabo hona joale ba ke ke ba kena lenyalong ha ba tsosetsoa bophelong ba leholimo, empa ba tla thaba joaloka libōpuoa tsa moea tse etsang thato ea Molimo. Ka hona, ebang bahlanka bohle ba tšepahalang ba Jehova ba kene lenyalong kapa ke masoha, ba ka thaba hobane motheo oa ’nete oa thabo ke ho sebeletsa ’Mōpi ka botšepehi.
“Ho Hong ho Molemo ho Feta Bara le Barali”
14. Maqhalaha a tšabang Molimo Iseraeleng ea boholo-holo a ile a fuoa tšepiso efe ea boprofeta, ’me ke hobane’ng ha ho ka bonahala see se makatsa?
14 Esita leha Mokreste ea tšepahalang a ke ke a kena lenyalong, Molimo o ka kholiseha hore o fumana thabo. A ka fumana khothatso mantsoeng ana a boprofeta a neng a lebisitsoe ho maqhalaha Iseraeleng ea boholo-holo: “Jehova o itse ho maqhalaha a bolokang lisabbatha tsa ka le a khethileng se nkhahlisang le a khomarelang selekane sa ka: ‘Ke tla a fa khopotso le lebitso, ho hong ho molemo ho feta bara le barali, ka tlung ea ka le ka har’a marako a ka. Ke tla a fa lebitso ho isa nakong e ke keng ea lekanngoa, le ke keng la fela.’” (Esaia 56:4, 5, NW) Motho o ne a ka ’na a lebella hore batho bana ba ne ba tla tšepisoa ho fuoa basali le bana e le hore ba ka ntšetsa lesika la bona pele. Empa ba ile ba tšepisoa “ho hong ho molemo ho feta bara le barali”—e leng ho ba le lebitso le sa feleng ka tlung ea Jehova.
15. Ho ka thoe’ng ka phethahatso ea Esaia 56:4, 5?
15 Haeba maqhalaha ana a talingoa e le a neng a tšoantšetsa “Iseraele oa moea” ho latela boprofeta, a emela Bakreste ba tlotsitsoeng ba fumanang bolulo bo sa feleng ka tlung ea Jehova ea moea, kapa tempele ea hae. (Ba-Galata 6:16) Ntle ho pelaelo, boprofeta bona bo tla sebetsa ka tsela ea sebele ho maqhalaha a tšabang Molimo a Iseraele ea boholo-holo a tlang ho tsosoa. Haeba a amohela sehlabelo sa thekollo sa Kreste ’me a tsoela pele ho khetha se khahlisang Jehova, a tla amohela “lebitso ho isa nakong e ke keng ea lekanngoa” lefatšeng le lecha la Molimo. Sena se ka boela sa sebetsa ho ba “linku tse ling” ba telang lenyalo le botsoali nakong ena ea bofelo e le hore ba inehele ka botlalo tšebeletsong ea Jehova. (Johanne 10:16) Ba bang ba bona ba ka ’na ba shoa ba sa nyala kapa ba se na bana. Empa haeba ba tšepahala, ha ba tsoha ba tla amohela “ho hong ho molemo ho feta bara le barali”—lebitso le “ke keng la fela” tsamaisong e ncha ea lintho.
Lenyalo Hase Sona Feela Senotlolo sa Thabo
16. Ke hobane’ng ha ho ka thoe lenyalo hase ka mehla le tlisang thabo?
16 Ba bang ba nahana hore thabo e ke ke ea ba teng ka ntle ho lenyalo. Leha ho le joalo, re tlameha ho lumela hore esita le har’a bahlanka ba Jehova kajeno, hase ka mehla lenyalo le tlisang thabo. Le rarolla mathata a mang empa hangata le baka a mang ao ho ka bang boima haholoanyane ho sebetsana le ’ona ho feta ao batho ba masoha ba fetang har’a ’ona. Pauluse o itse lenyalo le tlisa ‘matšoenyeho nameng.’ (1 Ba-Korinthe 7:28) Ho na le linako tseo ka tsona motho ea lenyalong a ‘tšoenyehang’ ’me ‘a bang pelo li peli.’ Hangata o fumana ho le thata ho “hlokomela lintho tsa Morena ka mehla ntle ho tšitiso.”—1 Ba-Korinthe 7:33-35, NW.
17, 18. (a) Balebeli ba bang ba tsamaeang ba ’nile ba fana ka tlaleho efe? (b) Pauluse o fane ka keletso efe, ’me ke hobane’ng ha ho le molemo ho e sebelisa?
17 Lenyalo le bosoha ke limpho tse tsoang ho Molimo. (Ruthe 1:9; Mattheu 19:10-12) Leha ho le joalo, hore motho a atlehe maemong ao ka bobeli, ho hlokahala hore a nahanisise litaba ka thapelo. Balebeli ba tsamaeang ba tlaleha hore Lipaki tse ngata li kena lenyalong li sa le nyenyane haholo, hangata li fetoha batsoali pele li e-ba boemong bo loketseng ba ho jara boikarabelo bo tlisoang ke seo. Manyalo a mang a joalo aa qhalana. Banyalani ba bang ba khona ho mamella mathata a bona, empa manyalo a bona ha aa ba tlisetsa thabo. Joalokaha setsebi sa litšoantšiso sa Lenyesemane William Congreve se ngotse, ba nyalang ka lepotla-potla “ba ka ’na ba llela metsotso hamorao.”
18 Balebeli ba potoloho le bona ba tlaleha hore baena ba bang ba bacha ha ba etse likōpo tsa tšebeletso ea Bethele kapa ho ithaopela ho ea Sekolong sa Koetliso ea Bosebeletsi ka baka la tlhokahalo ea hore ba lule e le masoha ka nakoana. Empa moapostola Pauluse o eletsa hore motho a se nyale pele ‘a feta palesa ea bocha,’ ke hore, a eme ho fihlela tšusumetso e matla ea botona le botšehali e bang teng qalong e se e kokobetse. (1 Ba-Korinthe 7:36-38) Lilemo tseo motho a li qetang e le lesoha le seng le tiile li fana ka phihlelo ea bohlokoahali le temohisiso, li ’meha boemong bo molemonyana ba ho khetha molekane oa lenyalo kapa ho etsa qeto e nahanisisitsoeng ka hloko ea ho lula e le lesoha.
19. Haeba re se na tlhoko ea sebele ea lenyalo re ka talima litaba joang?
19 Ba bangata ho rōna ba se ba fetile paleseng ea bocha, hammoho le tšusumetsong ea eona e matla ea katamelano ea botona le botšehali. Ka linako tse ling re ka ’na ra nahanisisa ka mahlohonolo a lenyalo empa ha e le hantle re na le mpho ea bosoha. Jehova a ka ’na a bona hore re mo sebeletsa ka katleho boemong ba bosoha le hore ha re na tlhoko ea sebele ea ho kena lenyalong, le hlokang hore re lahle litokelo tse itseng tšebeletsong ea hae. Haeba lenyalo e se tlhoko ea botho ’me re sa hlohonolofatsoa ka molekane, mohlomong Molimo o re boloketse ho hong ho itseng. Ka hona a re bontšeng tumelo ea hore o tla fana ka seo re se hlokang. Thabo e khōlō ka ho fetisisa e tlisoa ke ho amohela ka boikokobetso seo ho bonahalang e le thato ea Molimo, feela joalokaha baena ba Bajode ba ile ‘ba lesa ho belaela ’me ba tlotlisa Molimo’ ha ba hlokomela hore o file Balichaba pako e le hore ba ka fumana bophelo.—Liketso 11:1-18.
20. (a) Bakreste ba bacha ba fuoa keletso efe moo mabapi le bosoha? (b) Ke ntlha efe ea bohlokoa mabapi le thabo e lulang e le ’nete?
20 Ka hona, lenyalo e ka ba senotlolo sa thabo, le hoja hape le ka isa bophelong ba mathata. Re ka kholiseha ka ntho e le ’ngoe: Lenyalo hase eona feela tsela ea ho fumana thabo. Ka holim’a tsohle, e ka ba bohlale hore, haholo-holo Bakreste ba bacha, ba leke ho bula monyetla oa ho qeta lilemo tse ’maloa e ntse e le masoha. Ba ka sebelisa lilemo tseo hamolemo ho sebeletsa Jehova le ho tsoela pele moeeng. Leha ho le joalo, ho sa tsotellehe lilemo kapa tsoelo-pele ea moea, taba ena ea bohlokoa e lutse e le ’nete ho bohle ba inehetseng ho Molimo ba sa itšiele letho: Thabo ea ’nete e fumanoa ka ho sebeletsa Molimo ka botšepehi.
U ne U Tla Arabela Joang?
◻ Ke hobane’ng ha bahlanka ba Jehova ba thabile?
◻ Ke hobane’ng ha lenyalo e se sona senotlolo sa thabo e khōlō ka ho fetisisa?
◻ Ha batho ba Jehova ba khetha balekane ba lenyalo, ho hlokahala eng ho bona?
◻ Ke hobane’ng ha ho utloahala ho lumela hore Bakreste ba lulang e le masoha ba ka thaba?
◻ Re tlameha ho lumela eng ka lenyalo le thabo?