Baholo, Ahlolang ka ho Loka

“Mamelang litaba tsa banab’abo lōna, ’me le ahlolele ka ho loka motho le ngoan’abo.”—DEUTERONOMA 1:16.

 1. Tabeng ea kahlolo, ho bile le kabo efe ea matla a bolaoli, ’me see se bolela eng ho baahloli ba batho?

JOALOKA Moahloli ea phahameng, Jehova o abetse Mora oa hae matla a boahloli. (Johanne 5:27) Joaloka Hlooho ea phutheho ea Bokreste, Kreste eena o sebelisa sehlopha sa mohlanka ea khabane le ea bohlale le Sehlopha sa hae se Busang bakeng sa ho khetha baholo, bao ka linako tse ling ho hlokahalang hore ba sebeletse joaloka baahloli. (Mattheu 24:45-47; 1 Ba-Korinthe 5:12, 13; Tite 1:5, 9) Joaloka baahloli ba tšoereng molepo, ba tlamehile ho latela haufi-ufi mohlala oa Baahloli ba leholimo, Jehova le Kreste Jesu.

Kreste—Moahloli ea Behang Mohlala o Motle

2, 3. (a) Ke boprofeta bofe ba Bomessia bo senolang litšoaneleho tsa Kreste joaloka Moahloli? (b) Ke lintlha life tse lokelang ho hlokomeloa ka ho khetheha?

² Mabapi le Kreste joaloka Moahloli, ho ngotsoe tjena ka boprofeta: “Moea oa Jehova o tla lula holim’a hae, moea oa bohlale le oa kelello, moea oa keletso le oa matla, moea oa ho tseba le oa ho tšaba Jehova. O tla thabela ho tšaba Jehova, a ke se ke a ahlola ka chalimo ea mahlo, leha e le ho tsoa ka ho utloa taba ea ba re. Empa o tla ahlola mafutsana ka ho loka, a bue taba tsa ba banyenyane [“ba ikokobelitseng,” BPN] ba lefatše ka ’nete.”—Esaia 11:2-4.

³ Hlokomela litšoaneleho tse nolofalletsang Kreste ho ‘ahlola lefatše ka ho loka’ boprofeteng boo. (Liketso 17:31) O ahlola tumellanong le moea oa Jehova, bohlale ba bomolimo, kutloisiso, keletso, le tsebo. Hape, hlokomela hore o ahlola a ipapisitse le tšabo ea Jehova. Ka hona, ka tsela ea tšoantšetso “setulo sa kahlolo sa Kreste” ke “setulo sa kahlolo sa Molimo.” (2 Ba-Korinthe 5:10; Ba-Roma 14:10) O hlokolosi hore a ahlole litaba ka tsela eo Molimo o li ahlolang ka eona. (Johanne 8:16) Ha a ahlole feela ka tšobotsi kapa ho latela lipuo tsa bo-bare. O ahlola ka ’nete molemong oa ba ikokobelitseng le ba futsanehileng. Ke Moahloli ea tsotehang hakaakang! ’Me ke mohlala o tsotehang hakaakang bakeng sa batho ba sa phethahalang ba khetheloang ho sebeletsa litabeng tsa boahloli kajeno!

Baahloli Lefatšeng

 4. (a) O mong oa mesebetsi ea ba 144 000 nakong ea Puso ea Kreste ea Lilemo tse Sekete e tla ba ofe? (b) Ke boprofeta bofe bo bontšang hore Bakreste ba bang ba tlotsitsoeng ba ne ba tla khetheloa ho ba baahloli ha ba ntse ba le lefatšeng?

⁴ Mangolo a bontša hore palo e nyenyane ea Bakreste ba tlotsitsoeng, ho qala ka baapostola ba 12, e tla ba baahloli-’moho le Kreste Jesu nakong ea Lilemo tse Sekete. (Luka 22:28-30; 1 Ba-Korinthe 6:2; Tšenolo 20:4) Masala a litho tse tlotsitsoeng tsa Iseraele oa moea a leng lefatšeng a ile a ahloloa ’me a tsosolosoa ka 1918-19. (Malakia 3:2-4) Ho profetiloe tjena mabapi le tsosoloso ena ea Iseraele oa moea: “Ke tla boela ke u tlisetse baahloli ba kang ba pele, le baeletsi ba joale ka ba ho qala.” (Esaia 1:26) Ka hona, feela joalokaha Jehova a entse ‘qalong’ ea Iseraele oa nama, o file masala a tlotsitsoeng a tsosolositsoeng baahloli le baeletsi ba lokileng.

 5. (a) Ke bo-mang ba ileng ‘ba behoa baahloli’ ka mor’a ho tsosolosoa ha Iseraele oa moea, ’me ba bontšitsoe joang bukeng ea Tšenolo? (b) Hona joale balebeli ba tlotsitsoeng ba thusoa ke bo-mang mosebetsing oa boahloli, ’me ba koetlisoa joang hore ba fetohe baahloli ba molemonyana?

⁵ Qalong, ‘banna ba bohlale’ ba neng ba ‘behoa baahloli’ kaofela e ne e le banna ba hōlileng, kapa baholo, ba tlotsitsoeng. (1 Ba-Korinthe 6:4, 5) Balebeli ba tlotsitsoeng ba tšepahalang le ba hlomphehang ba boletsoe bukeng ea Tšenolo e le ba tšoeroeng ka letsohong le letona la Jesu, ke hore, ba tlas’a taolo le tataiso ea hae. (Tšenolo 1:16, 20; 2:1) Ho tloha ka 1935 batlotsuoa ba ’nile ba fumana tšehetso e tšepahalang ea “bongata bo boholo ba batho” bo ntseng bo eketseha ka mehla, boo tšepo ea bona e leng ho pholoha ‘mahlomola a maholo’ ’me bo phele ka ho sa feleng lefatšeng la paradeise. (Tšenolo 7:9, 10, 14-17) Ha “lenyalo la Konyana” le ntse le atamela, batho ba bangata ka ho eketsehileng ho bona ba ntse ba khethoa ke Sehlopha se Busang se tlotsitsoeng hore ba sebeletse e le baholo le baahloli liphuthehong tse fetang 66 000 tsa Lipaki tsa Jehova lefatšeng lohle.a (Tšenolo 19:7-9) Ka likolo tse khethehileng, ba koetlisetsoa ho jara boikarabelo mokhatlong oa “lefatše le lecha.” (2 Petrose 3:13) Sekolo sa Tšebeletso sa ’Muso, se tšoeroeng ho ea bofelong ba 1991 linaheng tse ngata, se ile sa hatisa haholo taba ea hore ho sebetsanoe le linyeoe tsa boahloli ka nepo. Baholo ba sebeletsang joaloka baahloli ba tlamehile ho etsisa Jehova le Kreste Jesu, bao likahlolo tsa bona e leng tsa ’nete le tse lokileng.—Johanne 5:30; 8:16; Tšenolo 19:1, 2.

Baahloli ba ‘Itšoarang ka Tšabo’

 6. Ke hobane’ng ha baholo ba sebeletsang likomiting tsa boahloli ba lokela ho ‘itšoara ka tšabo’?

⁶ Haeba Kreste ka boeena a ahlola ka tšabo ea Jehova le ka thuso ea moea oa Hae, baholo ba sa phethahalang bona ba lokela ho etsa joalo haholoanyane hakaakang! Ha ba abetsoe ho sebeletsa komiting ea boahloli, ho hlokahala hore ba ‘itšoare ka tšabo,’ ba kōpe ‘Ntate ea sa ahloleng ka tšobotsi’ ho ba thusa ho ahlola ka ho loka. (1 Petrose 1:17) Ba lokela ho hopola hore ba sebetsana le bophelo ba batho, “liphefumolohi” tsa bona, joaloka “ba tla ikarabella.” (Ba-Heberu 13:17, NW) Ka baka la sena, ruri ba tla boela ba ikarabella ho Jehova ka liphoso leha e le life tseo ba li etsang empa ba ka be ba li qobile. Ha J. H. A. Ebrard a hlalosa Ba-Heberu 13:17, o ngotse: “Ke mosebetsi oa molisa ho hlokomela liphefumolohi tse behiloeng tlhokomelong ea hae, ’me . . . o tlameha ho ikarabella lebitsong la tsona kaofela, le lebitsong la tse lahlehileng ka baka la phoso ea hae. Ena ke taba e tebileng. Mosebeletsi e mong le e mong oa lentsoe a ke a hopole hore o amohetse mosebetsi ona o [moholo] ka boithaopo.”—Bapisa le Johanne 17:12; Jakobo 3:1.

 7. (a) Baahloli ba kajeno ba lokela ho hopola eng, ’me sepheo sa bona e lokela ho ba sefe? (b) Baholo ba lokela ho ithuta lithuto life ho Mattheu 18:18-20?

⁷ Baholo ba sebeletsang litabeng tsa boahloli ba lokela ho hopola hore Baahloli ba sebele nyeoeng e ’ngoe le e ’ngoe ke Jehova le Kreste Jesu. Hopola se ileng sa bolelloa baahloli Iseraeleng: “Ha le na ho ahlolela motho, empa e le Jehova; o tla ba le lōna tabeng tsohle tsee le tla li ahlola. Le ke le tšabe Jehova ho qala joale . . . Le etse joalo, le tle le hloke molato.” (2 Likronike 19:6-10) Ka tšabo e nang le tlhompho, baholo ba ahlolang nyeoe e itseng ba lokela ho ikitlaetsa ho kholiseha hore ka sebele Jehova ‘o na le bona tabeng ea kahlolo.’ Qeto ea bona e lokela ho bonahatsa ka nepo tsela eo Jehova le Kreste ba talimang taba ka eona. Seo ka tsela ea tšoantšetso ba se ‘tlamang’ (ba se fumanang se le molato) kapa ba se ‘lokollang’ (ba fumanang se se na molato) lefatšeng e lokela ho ba se seng se ntse se tlanngoe kapa se lokollotsoe leholimong—joalokaha se senoloa ke se ngotsoeng ka Lentsoeng le bululetsoeng la Molimo. Haeba ba rapela Jehova ka lebitso la Jesu, Jesu o tla ba “har’a bona” bakeng sa ho ba thusa. (Mattheu 18:18-20, NW, mongolo o botlaaseng ba leqephe; Molula-Qhooa, February 15, 1988, leqephe 9) Boikutlo bo bang teng ha ba mametse nyeoe e itseng bo lokela ho bontša hore kannete Kreste o teng har’a bona.

Balisa ba Nako e Tletseng

 8. Boikarabelo ba baholo bo boholo ho mohlape ke bofe, joalokaha Jehova le Jesu Kreste ba behile mohlala? (Esaia 40:10, 11; Johanne 10:11, 27-29)

⁸ Baholo ha ba ahlole motheong oa nako e tletseng. Ke balisa ba nako e tletseng. Ke bafolisi, hase bona ba fanang ka kotlo. (Jakobo 5:13-16) Khopolo ea motheo ea se boleloang ke lentsoe la Segerike bakeng sa molebeli (e·piʹsko·pos) ke ea tlhokomelo e sireletsang. Theological Dictionary of the New Testament e re: “Ha le tšehetsa bolisa [ho 1 Petrose 2:25], lentsoe [e·piʹsko·pos] le fetisa maikutlo a mosebetsi oa bolisa oa ho hlokomela kapa ho lebela.” E, boikarabelo ba bona bo boholo ke ho hlokomela linku le ho li lebela, ho li boloka ka har’a mohlape.

9, 10. (a) Pauluse o ile a hatisa mosebetsi oa pele oa baholo joang, kahoo ka nepo ho ka botsoa potso efe? (b) Mantsoe a Pauluse ho Liketso 20:29 a bolela eng, kahoo baholo ba ka leka ho fokotsa lenane la linyeoe tsa boahloli joang?

⁹ Ha moapostola Pauluse a bua le baholo ba phutheho ea Efese, o ile a bolela taba e neng e lokela ho hatisoa: “Itlhokomeleng ’me le hlokomele le mohlape kaofela, oo moea o halalelang o le khethileng ho ba balebeli har’a oona, ho alosa phutheho ea Molimo, eo o e rekileng ka mali a Mor’a oona.” (Liketso 20:28, NW) Pauluse o totobatsa bolisa, eseng ho fana ka kotlo. E ka ba hantle hore baholo ba bang ba nahanisise ka potso e latelang: ‘Na re ka be re bolokile nako e ngata e hlokahalang ea ho etsa lipatlisiso le ho sebetsana le linyeoe tsa boahloli hoja re ne re sebelisitse nako e eketsehileng le boiteko boliseng?’

¹⁰ Ke ’nete hore Pauluse o lemositse khahlanong le “liphiri tse bohale.” Empa na ha a ka a li nyatsa ka ho ‘se qenehele mohlape’? (Liketso 20:29) ’Me le hoja a boletse hore balebeli ba tšepahalang ba lokela ho leleka “liphiri” tsena, na mantsoe a hae ha a bontše hore baholo ba lokela ho tšoara litho tse ling tsa mohlape ka ho li “qenehela”? Ha nku e fokola moeeng ’me e oela ka thōko ho tsela, e hloka eng—na e hloka ho shaptjoa kapa ho folisoa, ho fuoa kotlo kapa ho alosoa? (Jakobo 5:14, 15) Ka hona, ka mehla baholo ba lokela ho hlophisa nako bakeng sa mosebetsi oa bolisa. Sena se ka tlisa phello e molemo ea ho fokotsa nako e sebelisoang linyeoeng tsa boahloli tse senyang nako tse amang Bakreste ba oetseng sebeng. Ka sebele, kameho ea pele ea baholo e lokela ho ba ho fana ka phomolo le khatholoho, ka hona ba hōlise khotso, khutso, le tšireletseho har’a batho ba Jehova.—Esaia 32:1, 2.

Ho Sebeletsa Joaloka Balisa le Baahloli ba Lereko

11. Ke hobane’ng ha ho hlokahala hore baholo ba sebeletsang likomiting tsa boahloli ba se ee ka tšobotsi ’me ba hloka “bohlale bo tsoang holimo”?

¹¹ Bolisa bo matla haholoanyane pele Mokreste a kheloha bo ka ’na ba fokotsa linyeoe tsa boahloli har’a batho ba Jehova. (Bapisa le Ba-Galata 6:1.) Leha ho le joalo, ka baka la sebe le ho se phethahale ha batho, nako le nako balebeli ba Bakreste ba ka ’na ba lokela ho sebetsana le litaba tse amang phoso e itseng. Ba lokela ho tataisoa ke melao-metheo efe? Melao-metheo ena ha e e-s’o fetohe ho tloha mehleng ea Moshe kapa ho tloha mehleng ea Bakreste ba pele. Mantsoe a Moshe a lebisitsoeng ho baahloli ba Iseraele a ntse a sebetsa: “Mamelang litaba tsa banab’abo lōna, ’me le ahlolele ka ho loka motho le ngoan’abo . . . Le se ke la ea ka tšobotsi ea motho likahlolong tsa lōna.” (Deuteronoma 1:16, 17) Ho se ee ka tšobotsi ke ntho e khethollang “bohlale bo tsoang holimo,” e leng bohlale boo e leng ba bohlokoa haholo ho baholo ba sebeletsang likomiting tsa boahloli. (Jakobo 3:17; Liproverbia 24:23) Bohlale bo joalo bo tla ba thusa ho hlokomela phapang pakeng tsa bofokoli le bokhopo.

12. Ke ka kutloisiso efe ho sa hlokahaleng feela hore baahloli e be banna ba lokileng empa e be banna ba molemo?

¹² Baholo ba tlameha ‘ho ahlola ka ho loka,’ tumellanong le litekanyetso tsa Jehova tsa se nepahetseng le se fosahetseng. (Pesaleme ea 19:9) Empa, le hoja ba leka ho ba banna ba lokileng, ba boetse ba lokela ho leka ho ba banna ba molemo, ho latela kutloisiso ea phapang eo Pauluse a e bontšang ho Ba-Roma 5:7, 8. Ha buka ea Insight on the Scriptures e hlalosa litemana tsena sehloohong se buang ka “Ho loka,” e re: “Tšebeliso ea lentsoe la Segerike e bontša hore motho ea hlokomelehang, kapa ea khetholloang, ka molemo ke ea mosa (ea nang le tšekamelo ea ho etsa se molemo kapa ho tsoela ba bang molemo) le ea lereko (ea bontšang molemo o joalo ka ho o sebelisa). Ha a ameha feela ka ho etsa se hlokoang ke toka empa o etsa ho fetang hoo, o susumetsoa ke ho nahanela ba bang ka ho loketseng le takatso ea ho ba tsoela molemo le ho ba thusa.” (Moqolo 2, leqephe 809) Baholo ba molemo eseng feela ba lokileng ba tla tšoara bafosi ka tsela e mofuthu le ho ba nahanela ka mosa. (Ba-Roma 2:4) Ba lokela ho bontša mohau le kutloelo-bohloko. Ba lokela ho etsa seo ba ka se khonang ho thusa mofosi ho bona tlhokahalo ea ho baka, le hoja mohlomong qalong ho ka ’na ha bonahala a sa arabele hamolemo boitekong ba bona.

Boikutlo bo Loketseng ha ho Mametsoe Nyeoe

13. (a) Ha moholo a sebeletsa e le moahloli, ha a khaotse ho ba eng? (b) Ke keletso efe ea Pauluse e sebetsang leha ho mametsoe linyeoe tsa boahloli?

¹³ Ha ho hlokahala hore ho mameloe nyeoe ea boahloli, balebeli ha baa lokela ho lebala hore e ntse e le balisa, ba sebelisanang le linku tsa Jehova, tlas’a “molisa ea molemo.” (Johanne 10:11) Keletso eo Pauluse a faneng ka eona mabapi le thuso ea ka mehla e lokelang ho fuoa linku tse leng bothateng e sebetsa ka matla a tšoanang ha ho mametsoe linyeoe tsa boahloli. O ngotse: “Banab’eso, ekare ha motho a oela molatong o mong, lōna bao le leng ba moea, le ke le mo tsose ka moea o mosa; ’me u iponele, e se re ua lekoa le uena. Jarelanang liphahlo, ’me le phethe joalo molao oa Kreste.”—Ba-Galata 6:1, 2.b

14. Balebeli ba lokela ho talima liketsahalo tsa ho mamela linyeoe tsa boahloli joang, ’me ba lokela ho ba le boikutlo bofe ka mofosi?

¹⁴ Ho fapana le ho inka joaloka baahloli ba phahameng ba kopaneng ka morero oa ho fana ka kotlo, baholo ba sebeletsang komiting ea boahloli ba lokela ho talima nyeoe eo ba e mametseng e le tšobotsi e ’ngoe ea mosebetsi oa bona oa bolisa. E ’ngoe ea linku tsa Jehova e kene khathatsong. Ba ka etsa’ng ho e thusa? Na e se e le morao haholo hore ba ka thusa nku ee e ikarotseng? Re ne re ke ke ra lebella hore ba etse joalo. Baholo ba lokela ho ba le pono e kholisehileng mabapi le ho bontša mohau moo ho loketseng. Hase hore ba lokela ho fokolisa litekanyetso tsa Jehova haeba ho entsoe sebe se tebileng. Empa ho hlokomela maemo leha e le afe a hlokang mohau ho tla ba thusa ho bontša mohau ha ho hlokahala. (Pesaleme ea 103:8-10; 130:3) Ka masoabi, bafosi ba bang ba na le boikutlo bo manganga hoo baholo ba tlamehang ho lomahanya meno, empa ho se be mohla ba khahlapetsang.—1 Ba-Korinthe 5:13.

Morero oa ho Mamela Linyeoe tsa Boahloli

15. Ha ho hlaha bothata bo tebileng pakeng tsa batho ba itseng, ho lokela ho hlokomeloe eng pele?

¹⁵ Ha ho hlaha bothata bo tebileng pakeng tsa batho ba itseng, baholo ba bohlale ba tla hlokomela pele hore na batho bao ba amehang ba lekile ho rarolla taba ba le bang, ka moea oa Mattheu 5:23, 24 kapa Mattheu 18:15. Haeba sena se hlōlehile, mohlomong keletso ea moholo a le mong kapa ba babeli e ka ba e lekaneng. Khato ea boahloli e hlokahala feela ha ho entsoe sebe se tebileng se ka lebisang ho khaoloeng. (Mattheu 18:17; 1 Ba-Korinthe 5:11) Ho tlameha ho be le motheo o loketseng oa Mangolo bakeng sa ho etsa komiti ea boahloli. (Bona Molula-Qhooa, September 15, 1989, leqephe 18.) Haeba komiti eo e etsoa, ho lokela ho khethoe baholo ba tšoanelehang hamolemo bakeng sa nyeoe eo.

16. Baholo ba leka ho finyella eng ka ho mamela linyeoe tsa boahloli?

¹⁶ Baholo ba leka ho finyella eng ka ho mamela linyeoe tsa boahloli? Tabeng ea pele, ho thata ho ahlola ka ho loka ntle leha ho tsejoa ’nete ea taba. Joaloka Iseraeleng, litaba tse tebileng li tlameha ho ‘batlisisoa hantle.’ (Deuteronoma 13:14; 17:4) Kahoo sepheo se seng sa ho mamela nyeoe ke ho netefatsa taba. Empa sena se ka etsoa ka lerato ebile se lokela ho etsoa ka lerato. (1 Ba-Korinthe 13:4, 6, 7) Hang ha baholo ba tseba linnete tse amehang, ba tla etsa sohle se hlokahalang ho sireletsa phutheho le ho boloka litekanyetso tsa Jehova tse phahameng ka har’a eona le ho phalla ha moea oa hae ntle ho tšitiso. (1 Ba-Korinthe 5:7, 8) Leha ho le joalo, ha ho khoneha, o mong oa merero ea ho mamela nyeoe ke ho boloka moetsalibe ea leng kotsing.—Bapisa le Luka 15:8-10.

17. (a) Motho ea qositsoeng o lokela ho tšoaroa joang ha ho mametsoe nyeoe, hona e le ka morero ofe? (b) Sena se tla hloka eng ho litho tsa komiti ea boahloli?

¹⁷ Ho hang moqosuoa ha a lokela ho tšoaroa ka tsela esele joalokaha eka hase nku ea Molimo. O lokela ho tšoaroa ka bonolo. Haeba moetsalibe a entse sebe (kapa libe), morero oa baahloli ba lokileng e tla ba ho mo thusa hore a boele tseleng, a utloisise phoso ea tsela ea hae, a bake, kahoo a ntšoe “lerabeng la Diabolose.” Ho tla hloka tsebo ea “ho ruta,” ‘ho ruta ka bonolo.’ (2 Timothea 2:24-26; 4:2) Joale ho thoe’ng haeba moetsalibe a hlokomela hore o entse sebe, a hlabehile kannete pelong, ’me a kōpa hore Jehova a mo tšoarele? (Bapisa le Liketso 2:37.) Haeba komiti e kholisehile hore o batla thuso ka ho hloka boikaketsi, hangata ha ho hlokahale hore a khaoloe.—Bona Molula-Qhooa, November 15, 1983, leqephe 31, serapa 1.

18. (a) Komiti ea boahloli e lokela ho lomahanya meno boemong bofe ha e khaola mofosi? (b) Baholo ba lokela ho ikitlaetsa molemong oa linku tse lahlehileng ka baka la boemo bofe bo utloisang bohloko?

¹⁸ Ka lehlakoreng le leng, ha litho tsa komiti ea boahloli li tobane le nyeoe ea motho ea sa bakeleng bokoenehi, ho fetohela melao ea Jehova ka boomo, kapa bokhopo bo totobetseng, mosebetsi oa tsona ke ho sireletsa litho tse ling tsa phutheho ka ho khaola mofosi ea sa bakeng. Hase tlamo hore komiti ea boahloli e kopane le mofosi ka makhetlo kapa ho mo ntša puo hanong, e leka ho mo qobella ho baka, ha ho totobetse hore o haelloa ke tšoabo ea bomolimo.c Lilemong tsa morao tjena lefatšeng ka bophara ho ’nile ha khaoloa batho ba ka etsang karolo ea 1 lekholong ea bahoeletsi. Sena se bolela hore hoo e ka bang linkung tse lekholo tse salang ka sakeng, ho lahleha e le ’ngoe—bonyane e lahleha ka nakoana. Ha ho nahanoa ka nako le boiteko bo hlokahalang bakeng sa ho kenya motho ka sakeng, na ha ho utloise bohloko ho tseba hore selemo le selemo batho ba mashome a likete ba ‘neheloa Satane’?—1 Ba-Korinthe 5:5.

19. Baholo ba sebeletsang komiting ea boahloli ha baa lokela ho lebala eng, kahoo sepheo sa bona e tla ba sefe?

¹⁹ Baholo ba qalisang nyeoe ea boahloli ba lokela ho hopola hore liketsahalo tse ngata tse amang sebe ka phuthehong li amana le bofokoli, eseng bokhopo. Le ka mohla ha baa lokela ho lebala setšoantšo sa Jesu sa nku e lahlehileng, seo a se phethileng ka mantsoe a reng: “Kea le bolella, ka mokhoa o joalo thabo e tla ba teng leholimong ka baka la moetsalibe a le mong ea bakang, e fetisang e bang teng ka baka la ba lokileng ba mashome a robileng mono o le mong a metso e robileng mono o le mong ba sa hlokeng pako.” (Luka 15:7) Ha e le hantle, “Morena . . . ha a rate ha ba bang ba ka timela, empa o rata hore bohle ba finyelle pakong.” (2 Petrose 3:9) Ka thuso ea Jehova, e se eka likomiti tsa boahloli lefatšeng ka bophara li ka ikitlaetsa ka matla ho etsa hore ho be le thabo leholimong ka ho thusa bafosi ho bona tlhokahalo ea hore ba bake le ho boela ba hata tseleng e tšesaane e lebisang bophelong bo sa feleng.—Mattheu 7:13, 14.

[Mongolo o botlaaseng ba leqephe]

Lipotso tsa Tlhahlobo

◻ Baholo ba lokela ho ameha ka eng haholo-holo ha ba latela mohlala oa Molisa e Moholo le Molisa ea Molemo?

◻ Baholo ba ka leka ho fokotsa lenane la linyeoe tsa boahloli ka tsela efe?

◻ Ke ka kutloisiso efe ho hlokahalang hore baahloli ba be molemo eseng e be ba lokileng feela?

◻ Mofosi o lokela ho tšoaroa joang ha ho mametsoe nyeoe, hona e le ka morero ofe?

◻ Ke hobane’ng ha ho khaola motho e le khato ea ho qetela e lokelang ho nkoa?

[Setšoantšo se leqepheng la 16]

Ha mosebetsi oa bolisa o etsoa esale pele, ho ka qojoa linyeoe tse ngata tsa boahloli

[Setšoantšo se leqepheng la 18]

Esita leha ho mametsoe nyeoe ea boahloli, baholo ba lokela ho leka ho busetsa mofosi tseleng ka moea o mosa