Kabo ea Mangolo ea Bo131 ea Gileade
“Thabisang Pelo ea Jehova”
LITHO tsa malapa, metsoalle le ba bang bohle, ba ne ba le teng kabong ea mangolo ea sehlopha sa bo131 sa Sekolo sa Bibele sa Gileade sa Watchtower, ka la 10 September, 2011. Ha le chaba tsatsing leo, libui le liithuti li ne li ntse li sehoa ke mala a masesaane ka lebaka la letsoalo. Leha ho le joalo, qetellong ea lenaneo, ba 9 063 ba neng ba le teng, ba ne ba se ba phutholohile ba bososela, ba thabetse lipuo, lipontšo le lipuisano tse neng li fanoa moo.
Setho sa Sehlopha se Busang sa Lipaki Tsa Jehova, Stephen Lett, ebile e le molula-setulo oa lenaneo leo, o ile a hleka sebae ka puo e qalang. O ile a tšohla litemana tsa Bibele tse buang ka Jehova Molimo eka o na le ’mele oa tšoantšetso ’me a tšohla boholo ba likarolo tse buang kamoo Jehova a sebelisang mahlo a hae a tšoantšetso, litsebe le matsoho.
Sebui se ile sa qala ka ho tšohla 2 Likronike 16:9, e bontšang hore ‘mahlo a Jehova a qamaka ho pholletsa le lefatše lohle hore a bontše matla a hae molemong oa bao lipelo tsa bona li feletseng ho eena.’ Liithuti li ile tsa khothalletsoa hore li be le lipelo tse inehetseng ka ho feletseng ho Jehova. Li ile tsa bolelloa hore li ka khona ho etsisa Molimo haeba li sheba lintho tse molemo ho batho. Ka mor’a moo, Mor’abo rōna Lett o ile a tšohla 1 Petrose 3:12, e bontšang hore ka litsebe tsa hae, Jehova o sekehela thapeli ea ba lokileng tsebe. O ile a kōpa liithuti ka matla hore li lule li rapela, li se ke tsa lebala hore ruri Jehova o batla ho utloa lithapelo tsa tsona.
Mor’abo rōna Lett o ile a ba a tšohla le Esaia 41:13, moo Jehova a tšepisang: “’Na, Jehova Molimo oa hao, ke u tšoara ka letsoho la hao le letona, ke ’na Ea reng ho uena, ‘U se ke ua tšoha. Ke tla u thusa.’” A le bonolo empa a tiile, Mor’abo rōna Lett o ile a re: “Hlokomelang polelo ena ea Jehova e amang maikutlo. O otlolla letsoho la hae hore a re tšoare ka letsoho.” Eaba o bolella liithuti hore kamehla li lumelle Jehova hore a li thuse, le ka mohla li se ke tsa hana thuso ea hae. O ile a boela a bolella liithuti hore li ka etsisa Jehova ka hore le tsona li otlolle matsoho a tsona hore li thuse ba bang.
Ha a lihela likhala, o ile a bala Esaia 40:11. A khothalletsa bamameli bohle hore ka likelellong tsa bona ba bone lerato le mofuthu le hlalosoang lengolong leo. Mor’abo rōna Lett o ile a re: “Jehova o re bokella ka matsoho a hae. O re beha sefubeng sa hae.” Rōna re lokela ho etsa joang? Liithuti li ile tsa eletsoa hore li lule li le bonolo ’me li ipotlile joaloka likonyana e le hore Jehova a tle a li behe sefubeng sa hae.
“Re na le Letlotlo Lena Lijaneng Tsa Letsopa”
David Splane, e leng setho sa Sehlopha se Busang, o ile a tšohla sehlooho sena se tsoang Mangolong. (2 Bakorinthe 4:7) Letlotlo ke’ng? Na ke tsebo kapa bohlale? O ile a araba a re: “Che, letlotlo leo moapostola Pauluse a buang ka lona ke ‘bosebeletsi bona’ ba ‘ho bonahatsa ’nete.’” (2 Bakorinthe 4:1, 2, 5) Mor’abo rōna Splane, o ile a hopotsa liithuti hore likhoeli tsena tse hlano tseo ba li qetileng ba ithuta e ne e le tsa ho ba lokisetsa mosebetsi o khethehileng oa boboleli. Ba lokela ho nka mosebetsi oo e le oa bohlokoa ka ho fetisisa.
O ile a hlalosa hore “lijana tsa letsopa” ke ’mele ea rōna ea nama. O ile a bontša phapang pakeng tsa sejana sa letsopa le sa khauta. Lijana tsa khauta li sebelisoa ka seoelo. Athe lijana tsa letsopa tsona li etselitsoe ho sebetsa. Haeba re boloka letlotlo ka sejaneng sa khauta, re ka nka sejana seo e le sa bohlokoa joaloka letlotlo le tšetsoeng ka har’a sona. Mor’abo rōna Splane o ile a re: “Ka hona, lōna liithuti, sepheo sa lōna hase hore ho shejoe lōna. Joalokaha le le baromuoa, le batla ho lebisa batho ho Jehova. Le lijana tsa letsopa tse ikokobelitseng.”
Ha a ntse a tsoela pele ka puo ea hae, o ile a re mehleng ea ha ho ne ho ngoloa Bibele, lijana tse ling tsa letsopa li ne li sa tšabe mollo ’me tse ling li ne li tlotsoa ka mokelikeli o benyang o thibelang hore li se ke tsa khephoha. See se ruta’ng? Ha ho potang hore likhoeling tsa pele kabelong ea bona, baromuoa ba tla feta har’a mathata a tla ba tiisa le ho feta joaloka lijana tse tlotsitsoeng ka mokelikeli. E tla ba batho ba sa khopeheng habonolo ha ba bontšoa liphoso tsa bona, ba sa halefeng le feela. Mor’abo rōna Splane o ile a re: “U tla hlokomela hore u tiile ho feta kamoo u neng u nahana kateng.” Jehova ha aa beha letlotlo lena la bosebeletsi ho mangeloi, empa o le behile lijaneng tsa letsopa. Ha a phethela puo ea hae, o ile a re: “Seo se bontša hore Jehova oa le tšepa.”
‘U Mathile le Batho ba Tsamaeang ka Maoto . . . na U ka Matha Peisong le Lipere?’
Mor’abo rōna Samuel Herd, setho sa Sehlopha se Busang, o ile a botsa: “U ka matha ho fihlela kae le hona ka lebelo le lekae?” Ke hobane’ng a ne a botsa liithuti potso ee? O ile a bapisa se etsahetseng bophelong ba liithuti le se etsahetseng bophelong ba moprofeta Jeremia. Monna eo ea tšepahalang o ne a hula haboima ha a ntse a sebetsana le mathata ao a thulanang le ’ona bophelong. Empa e ne e le hona a neng a tla tobana le liteko tse khōlō. Ka hona Jehova o ile a mo botsa: “Hobane u mathile le batho ba tsamaeang ka maoto, ’me ba ne ba etsa hore u khathale, joale, ke joang u ka mathang peisong le lipere?”—Jeremia 12:5.
Ha a lebisa ntlha ena ho liithuti, Mor’abo rōna Herd, o ile a re: “Le ka ’na la nahana hore le ne le ntse le matha le lipere ka lebaka la litlhahlobo tsohle tseo le li ngotseng. Empa, ha e le hantle, le ne le matha le batho ba tsamaeang ka maoto, eseng le lipere. Moo le abetsoeng ho ea teng, le il’o matha le lipere, kapa re ka re le il’o tobana le liteko tse fetang tseo hona joale le ka li nahanang. Le tla etsa joang hore le atlehe? Koetliso eo le e fumaneng sekolong sa Gileade e le hlahlelletse hore le khone ho matha le lipere le sa khathale.” O ile a khothalletsa liithuti hore li ’ne li ikoetlise tumelong, li itloaetse ho bala Bibele le ho rapela kamehla.
Mor’abo rōna Herd o ile a bolella baromuoa hore ha nako e ntse e e-ea ba bang ba bona ba tla tobana le lintho tse ba nyahamisang kapa batho ba sa thahaselleng molaetsa. Ba bang ba tla tšoenngoa ke ho kula kapa ho ikhalala. Empa o ile a ba tiisetsa hore ba na le mohloli oo ba khang matla ho oona, o tla ba thusa ho hlōla maemo a thata e le hore ba se ke ba khathala. Mor’abo rōna Herd o ile a re: “Ebang le matha le ba tsamaeang ka maoto kapa le lipere, le tšepe hore letsoho le matla la Molimo le ka etsa hore le fete habonolo feela moleng oa tlhōlo. Joale le tla ba baromuoa ba Jehova ba atlehileng ba mo fang tlotla le thoriso.”
Lintlha Tse Ling Tse Ileng Tsa Tšohloa
“U se ke Ua Inkela Tse ’Maloa Feela.” John Ekrann, setho sa Komiti ea Lekala la United States, o ile a tšohla tlaleho e buang ka moprofeta Elisha le mosali oa mohlolohali ea neng a le mothating oa ho nkeloa bara ba hae ’me ba rekisoe e le makhoba. (2 Marena 4:1-7) Mohlolohali enoa o ne a e-na le nkho e le ’ngoe feela e nyenyane e tšelang oli. Elisha o ile a mo laela hore a bokelle linkho tse ling ho baahelani ba hae, eaba o re: “U se ke ua inkela tse ’maloa feela.” A sebelisa Elisha, ka mohlolo, Jehova o ile a tlatsa oli ka linkhong tsohle tseo mohlolohali a neng a li bokeletse. Joale mohlolohali o ile a rekisa oli eo ’me a fumana chelete e lekaneng hore a ka lefa likoloto tsa hae, a ba a salloa ke e ’ngoe ea ho hlokomela lelapa ka nakoana.
Tlalehong ee, ke thuto efe eo baromuoa bana ba ka moso ba ithutang eona? Ha mohlolohali a ne a ntse bokella lijana, ho bonahala a ne a sa khethe. Mor’abo rōna Ekrann, o ile a re: “O tlameha a ile a nka sejana leha e le sefe se ka tšelang oli ’me mohlomong ho ne ho e-ba molemo ha a fumane se seholo.” Eaba o khothalletsa liithuti hore li nke kabelo leha e le efe, ebang e nyenyane kapa e khōlō. O ile a re: “Le se ke la khetha.” A boela a hopotsa liithuti hore litlhohonolofatso tseo mohlolohali a ileng a li fumana li ne li itšetlehile ka ho toba ka taba ea hore na o ile a mamela litaelo tsa Elisha hakae. Ba ile ba ithuta’ng tabeng ee? Litlhohonolofatso tseo re li fumanang li itšetlehile ka ho toba ka hore na re bontša cheseho le tumelo hakae. Joale o ile a re: “Le se ke la iqenehela.”
“Ke Bohobe ho Rōna.” William Samuelson, mookameli oa Lefapha la Likolo Tsa Puso ea Molimo, o ile a tšohla sehlooho sena se thehiloeng ho Numere 14:9. A totobatsa mohlala oa Joshua le Kalebe. Lentsoe “bohobe” ka tsela eo le sebelisitsoeng ka eona temaneng ena, le bolela hore baahi ba Kanana ba ne ba ka hlōloa habonolo le hore seo se ne se tla etsa hore Baiseraele ba tsoele pele ba matlafetse. Liithuti li ithuta’ng ho see? Mor’abo rōna Samuelson o ile a re: “Ha le ntse le etsa mosebetsi oa lōna oa boboleli, litšitiso tseo le tobanang le tsona li nkeng e le lintho tse le matlafatsang le tse etsang hore le tsoele pele.”
“Na Sekepe sa Bona sa Tumelo se Tla Tlangoa ka ho Tsitsitseng Hore se Tobane le Lifefo?” Sam Roberson, e mong oa barupeli, o ile a tšohla temoso ea moapostola Pauluse ea hore ba bang “ba senyeheloa ke tumelo joaloka sekepe se soahlamaneng.” (1 Timothea 1:19) O ile a khothalletsa liithuti hore li thuse ba bang hore ba be le tumelo e tsitsitseng e tlameletsoeng ho Jehova Molimo. Eaba o re: “Mosebetsi oa lōna o ka tšoantšoa le o etsoang ke setei sa tšepe.” Ka tsela efe? Setei sa tšepe se cheselletsa likarolo tsa ketane e tla tlama sekepe hore se tsitse. Ka tsela e tšoanang, baromuoa ba thusa liithuti tsa Bibele hore li be le litšobotsi tse ratoang ke Jehova e le hore li ka pholoha.
Mor’abo rōna Roberson o ile a bapisa likarolo tsa ketane le litšobotsi tse robeli tse leng ho 2 Petrose 1:5-8. Eaba o bontša hore haeba baromuoa ba thusa liithuti tsa Bibele hore li bone kamoo Jehova a bonahatsang litšobotsi tseo kateng, liithuti tseo li ka ba le kamano e ke keng ea khaoha le Jehova. Li tla hlōla mathata leha e le afe a kang sefefo a ka lekang ho sisinya tumelo ea tsona.
Liphihlelo le Lipuisano
Michael Burnett, e leng e mong oa barupeli, o ile a kōpa liithuti tsa Gileade hore li ke li phete li be li bontše se ileng sa etsahala morao tjena ha li ntse li le mosebetsing oa boboleli. Bamameli ba ne ba natefetsoe ke ho utloa kamoo liithuti li ileng tsa atleha kateng ha li ntse li paka setsing sa mabenkele, boema-fofane, ka ntlo le ntlo esita le ho pakela motho e mong ea letselitseng nomorong esele.
Michael Hansen, e leng setho sa Lelapa la Bethele la United States, o ile a buisana le barab’abo rōna ba bararo bao e bileng baromuoa ka lilemo tse ngata—Stephen McDowell oa Panama, Mark Noumair oa Kenya le William Yasovsky oa Paraguay. Litaba tsa bona li ne li itšetlehile ka sehlooho sa puo e reng, “Ho Thabela ho Etsa Thato ea Jehova.” (Pesaleme ea 40:8) Ka mohlala, Mark Noumair o ile a bolela ka ho toba lintho tse neng li etsa hore eena le mosali oa hae ba thabe ha ba ntse ba sebeletsa kabelong ea bona. Botsoalle boo ba ileng ba bo theha le Lipaki tsa moo bo ne bo etsa hore ba khotsofale haholo. Lintho tse ling tse neng li ba thabisa li ne li akaretsa ho bona barab’abo bona ba latela keletso e fanoang, ho ba bona ba etsa liphetoho tse khōlō bophelong, le ho bona kamoo Jehova a neng a hlohonolofatsa boiteko ba bona. O ile a tiisetsa liithuti hore li letetsoe ke thabo e khōlō.
Ka mor’a hore e mong oa liithuti tsa sehlopha sa bo131 a bale lengolo le neng le hlalosa ka bokhabane kananelo eo liithuti li nang le eona, Mor’abo rōna Lett o ile a phethela lenaneo ka hore a khothalletse baromuoa ba abeloang mangolo hore ba sebetse ka bohlale. O ile a re ha ba etsa joalo, ba tla “thabisa pelo ea Jehova.” Joang kapa joang baromuoa bana ba tla thabisa Jehova ha ba mo sebeletsa ka botšepehi likabelong tsa bona.—Esaia 65:19.
[Chate/’Mapa o leqepheng la 31]
LIPALO-PALO TSA SEHLOPHA
Palo ea linaha tse emetsoeng 10
Karolelano ea lilemo 34,7
Karolelano ea lilemo ba kolobelitsoe 19,0
Karolelano ea lilemo ba le tšebeletsong ea nako e tletseng 13,5
[’Mapa]
(Ha u batla ho bona boitsebiso bo hlophisitsoeng hantle, sheba sengoliloeng)
Sehlopha se abetsoe ho ea linaheng tse bontšitsoeng tlaase mona
LINAHA TSEO BA ABETSOENG HO TSONA
BENIN
BRAZIL
BULGARIA
BURUNDI
CAMEROON
CANADA
CENTRAL AFRICAN REPUBLIC
GERMANY
GHANA
HONG KONG
INDONESIA
KENYA
LIBERIA
LITHUANIA
MALAYSIA
MOZAMBIQUE
NEPAL
PANAMA
PARAGUAY
SIERRA LEONE
SLOVAKIA
SOUTH AFRICA
UNITED STATES OF AMERICA
VENEZUELA
[Setšoantšo se leqepheng la 30]
Liithuti tsa Gileade li bontša se ileng sa etsahala ha li le mosebetsi oa boboleli
[Setšoantšo se leqepheng la 31]
Sehlopha sa Bo131 sa Sekolo sa Bibele sa Gileade sa Watchtower se Abetsoeng Mangolo
Lethathamong le tlaase mona, mela e baloa ho tloha ka pele ho ea ka morao ’me mabitso a thathamisitsoe ho tloha ka letsohong le letšehali ho ea ho le letona moleng ka mong.
(1) Lesch, C.; Lesch, N.; Shakarjian, P.; Shakarjian, T.; Budden, R.; Budden, K.; Nash, T.; Nash, L.
(2) Tremblay, E.; Tremblay, C.; Garvey, D.; Garvey, G.; Gaunt, R.; Gaunt, P.; Lau, J.; Lau, J.
(3) Davis, S.; Davis, S.; Sargeant, J.; Sargeant, J.; Fonseca, C.; Fonseca, S.; Thenard, E.; Thenard, A.
(4) Petratyotin, A.; Petratyotin, R.; Reyes, N.; Reyes, N.; Eisiminger, B.; Eisiminger, S.; Hacker, J.; Hacker, C.
(5) Hartman, E.; Hartman, T.; Goolia, W.; Goolia, K.; Thomas, J.; Thomas, E.; Okazaki, N.; Okazaki, M.
(6) Mills, C.; Mills, A.; Benning, L.; Benning, T.; Sobiecki, S.; Sobiecki, T.; Gagnon, L.; Gagnon, E.
(7) Hansen, B.; Hansen, M.; Fahie, A.; Fahie, M.; Dalgaard, J.; Dalgaard, J.; Andersson, M.; Andersson, R.