Ke Mafutsana Empa ba Ruile—Ho ka ba Joalo Joang?

Makholo a lilemo a fetileng, monna e mong ea bohlale o ile a rapela hore a se ke a mpa a futsaneha. Ke hobane’ng ha a ile a etsa kōpo e joalo? Hobane o ne a tšaba hore bofutsana bo ka ’na ba baka maikutlo le liketso tse neng li ka beha kamano ea hae le Molimo kotsing. Sena se hlakisoa ke mantsoe a hae: “Mphepe ka bohobe bo ntekanang; e se re mohlomong . . . ha ke fumanehile, ka utsoa, ’me ka tlaela ka lebitso la Molimo oa ka.”—LIPROVERBIA 30:8, 9.

NA SEE se bolela hore ho ke ke ha etsahala hore mofutsana a sebeletse Molimo ka botšepehi? Le hanyenyane! Ho theosa le lilemo, bahlanka ba bangata ba Jehova Molimo ba ’nile ba tšepahala ho eena ho sa tsotellehe maima a tlisoang ke bofutsana. Ka lehlakoreng le leng, Jehova o rata ba mo tšepang ’me o ba fa seo ba se hlokang.

Batho ba Tšepahalang ba Boholo-holo

Moapostola Pauluse ka boeena o ile a ba bohloking ka linako tse ling. (2 Bakorinthe 6:3, 4) O ile a boela a hlalosa “leru le leholo” la Bakreste ba pele ba tšepahalang ba lipaki, bao ba bang ba bona ba ileng “ba phaila ka matlalo a linku, ka matlalo a lipōli, ha ba ntse ba le bohloking . . . Ba ile ba lelera mahoatateng le lithabeng le mahaheng le maphaong a lefatše.”—Baheberu 11:37, 38; 12:1.

E mong oa bana ba tšepahalang e ne e le moprofeta Elia. Nakong ea komello ea lilemo tse tharo le halofo, Jehova o ile a mo fa lijo kamehla. Pele, Molimo o ile a etsa hore makhoaba a tlisetse moprofeta eo bohobe le nama. (1 Marena 17:2-6) Hamorao, ka mohlolo Jehova o ile a etsa hore phofo le oli tseo mohlolohali e mong a neng a fepa Elia ka tsona li se ke tsa fela. (1 Marena 17:8-16) Lijo tseo e ne e le tse tloaelehileng feela, empa li ile tsa phelisa moprofeta, mosali eo hammoho le mora oa hae.

Ka ho tšoanang, Jehova o ile a hlokomela moprofeta ea neng a tšepahala, Jeremia, nakong ea ha mathata a ne a hloele manolo holimo. Jeremia o ile a pholoha ho thibelloa ha Jerusalema ke Babylona, nakong eo ka eona batho ba neng ba tlameha ho “ja bohobe bo lekantsoeng, ba bo je ka mahlomola.” (Ezekiele 4:16) Qetellong, tlala e ile ea ipha matla hoo basali ba bang ba ileng ba ja bana ba bona. (Lillo tsa Jeremia 2:20) Le hoja Jeremia a ne a le litlamong ka lebaka la ho bolela ha hae ka sebete, Jehova o ile a etsa bonnete ba hore o ne a fuoa “polokoe ea bohobe” letsatsi le leng le le leng “ho fihlela bohobe bo fela motseng.”—Jeremia 37:21.

Joaloka Elia, Jeremia o ne a e-na le lijo tse fokolang. Mangolo ha a re bolelle hore na Jeremia o ne a e-ja eng kapa hore na o ne a e-ja hangata hakae ka mor’a hore Jerusalema e felloe ke bohobe. Leha ho le joalo, rea tseba hore Jehova o ile a mo hlokomela ’me o ile a pholoha nako eo e thata ea tlala.

Kajeno, bofutsana bo fumaneha karolong e ’ngoe le e ’ngoe ea lefatše. Ho latela Machaba a Kopaneng, bofutsana bo totile haholo Afrika. Phatlalatso ea litaba ea Machaba a Kopaneng ka 1996 e ile ea bolela: “Bonyane halofo ea Maafrika ’ohle e futsanehile.” Ho sa tsotellehe maemo a nyolosetsang a moruo, Maafrika a ntseng a eketseha a sebelisa melao-motheo ea Bibele bophelong ba ’ona ’me a sebeletsa Molimo ka botšepehi, a kholisehile hore o tla a tšehetsa. Nahana ka mehlala e meng e hlahang karolong e ’ngoe ea lefatše la rōna le likhathatso.

Ho Boloka Botšepehi

Michaela oa Nigeria ke sehoai se nang le bana ba tšeletseng bao se tlamehang ho ba phelisa. O re: “Ho thata ho tšepahala haeba u se na chelete ea ho hlokomela lelapa la hao. Leha ho le joalo, ha ke e-ba tekong ea ho se tšepahale, ke ikhopotsa lengolo la Baefese 4:28, le reng: ‘Ea utsoang a a se ke a hlola a utsoa, empa ho e-na le hoo, a a etse mosebetsi o thata, a etsa ka matsoho seo e leng mosebetsi o molemo.’ Ka hona, haeba ke hlaheloa ke teko, kea ipotsa, ‘Na ke sebelelitse chelete ee?’”

Michael oa phaella: “Ka mohlala, ka letsatsi le leng ha ke ntse ke tsamaea, ke ile ka bona mokotlana o monyenyane o oela ka morao sethuthuthung. Ha kea ka ka khona ho emisa mong’a sona, kahoo ke ile ka thonaka mokotlana oo ’me ka fumana hore o tletse chelete! Ke sebelisa boitsebahatso bo ka hare ho mokotlana oo, ke ile ka fumana mong’a oona ’me ka o khutlisetsa ho eena.”

Ho Loantša ho Tepella Maikutlo

Monna e mong oa Afrika Leboea o ile a re: “Bofutsana [bo tšoana] le ho oela ka mohohlong oo ha u le ka ho oona, u khonang ho bona khanya le batho ba itsamaelang ka bolokolohi, empa lentsoe la hao le chele ’me u sa khone ho hoeletsa ho kōpa thuso kapa lere bakeng sa ho tsoa ka moo.” Ha ho makatse hore ebe hangata, bofutsana bo etsa hore motho a ikutloe a tepeletse maikutlo ’me a ferekane! Esita le bahlanka ba Molimo, ba ka ’na ba bona maruo a ba bang ’me ba qala ho nahana hore ho phela ka botšepehi ha ho putse ka letho. (Bapisa le Pesaleme ea 73:2-13.) Maikutlo a joalo a ka hlōloa joang?

Motho e mong oa Afrika Bophirimela, Peter, o ile a tlohela mosebetsi ka mor’a lilemo tse 19 a sebetsa ’musong. Hona joale o itšetlehile haholo ka penshene e fokolang eo a e fumanang bakeng sa hore a phele. Peter oa bolela: “Ha ke nyahame, ke ikhopotsa seo ke se balileng Bibeleng le likhatisong tsa Mokhatlo oa Watch Tower. Tsamaiso ena ea khale e se e le haufi le ho fela, ’me re letetse tsamaiso e molemo.

“Ke boetse ke nahana ka 1 Petrose 5:9, e reng: ‘Emang khahlanong le [Satane], le tiile tumelong, le tseba hore lintho tse tšoanang mabapi le litlhokofatso li ntse li phethahala mokhatlong oohle oa barab’abo lōna lefatšeng.’ Kahoo, hase ’na ke le mong ea hlokofatsoang ke mathata. Likhopotso tsena li nthusa hore ke leleke menahano e etsang hore ke nyahame le ho tepella maikutlo.”

Peter oa phaella: “Ho feta moo, Jesu o ile a etsa mehlolo e mengata ha a le lefatšeng, le hoja a sa ka a ruisa motho le ea mong. Joale ke hobane’ng ha ’na nka lebella hore a nketse morui?”

Matla a Thapelo

Ho atamela haufi le Jehova Molimo ka thapelo ke tsela e ’ngoe ea ho loantša monahano o fosahetseng. Ka 1960 ha Mary e ne e e-ba Paki ea Jehova, lelapa labo le ile la mo lahla. Hona joale o lilemong tsa bo-50 ’me ha aa nyaloa, o se a fokola ’me oa hloka. Leha ho le joalo, oa cheseha tšebeletsong ea Bokreste.

Mary o re: “Ha ke ikutloa ke nyahame, ke rapela Jehova. Kea tseba hore ha ho motho ea ka nthusang ho mo feta. Ke ithutile hore ha u tšepa Jehova, oa u thusa. Kamehla ke hopola mantsoe ana a Morena Davida a fumanehang ho Pesaleme ea 37:25: ‘Nkile ka ba mocha, ’me joale ke tsofetse; empa ha ke e-so ho bone ea lokileng a tloheloa, leha e le litloholo tsa hae li sikila bohobe.’

“Ke boetse ke khothatsoa ke liphihlelo tsa bara le barali babo rōna ba hōlileng ba moea tse boleloang ho Molula-Qhooa. Jehova Molimo o ba thusitse, kahoo kea tseba hore le ’na o tla tsoela pele ho nthusa. O hlohonolofatsa khoebonyana ea ka ea ho rekisa fufu [phofo ea cassava], ’me ke khona ho fumana lintho tseo ke li hlokang letsatsi le leng le le leng. Ka linako tse ling ha ke se na chelete ’me ke ipotsa hore na ke tla nka eng ke e kopanye le eng, Jehova o romela motho e mong ea mphang chelete ’me a re, ‘Morali’eso, ak’u tšoare mona.’ Ha ho mohla Jehova a kileng a ntšoetsa.”

Bohlokoa ba ho Ithuta Bibele

Lipaki tsa Jehova li nka ho ithuta Lentsoe la Molimo, Bibele, e le habohlokoa, ’me ho joalo le ka ba futsanehileng ka har’a tsona. John ea lilemo li 60 o sebetsa e le pula-maliboho (’moleli oa nako e tletseng oa ’Muso) hape e le mohlanka ea sebeletsang ka phuthehong. O lula mohahong oa serutha o mekato e ’meli o lulang malapa a 13. Kamore ea hae e phasejeng, mokatong oa pele ’me e arotsoe ka mapolanka. Ka har’a eona ke litulo tse peli tse tsofetseng le tafole e phakhellaneng lingoliloeng tsa ho ithuta Bibele. O robala holim’a moseme.

John o ne a tloaetse ho fumana hoo e ka bang ranta e le ’ngoe ka letsatsi ka ho rekisa bohobe, empa ha naha ea habo e thibela ho reka koro naheng e ’ngoe, o ile a lahleheloa ke tsela eo ea ho iphelisa. O re: “Ka linako tse ling kea thatafalloa, empa ke tsoela pele ke bula maliboho. Ke Jehova ea ntlhokomelang. Ke etsa mosebetsi leha e le ofe oo ke o fumanang ’me ha ke itšetlehe ka motho e mong hore a ntlhokomele kapa a mphepe, le hoja barab’eso ka phuthehong ba nthusa haholo. Ba nthusa ho batla mosebetsi ’me ka linako tse ling ba mpha chelete.

“Ke ipha nako ea ho bala Bibele le lingoliloeng tsa Mokhatlo oa Watch Tower. Ke bala lihoreng tsa hoseng ha ho se lerata mohahong, ’me ke bale hape bosiu hafeela re e-na le motlakase. Kea tseba hore ha kea lokela ho salla morao thutong ea ka.”

Ho Koetlisetsa Bana Bophelo

Daniel ke monna oa mohlolohali ea nang le bana ba tšeletseng. Ka 1985 o ile a lahleheloa ke mosebetsi oo a neng a sebelitse ho oona ka lilemo tse 25, empa o ile a fumana mosebetsi lebenkeleng. O re: “Lelapa lea thatafalloa licheleteng. Hona joale re khona ho ja hang feela ka letsatsi. Ka nako e ’ngoe, re kile ra qeta matsatsi a mararo re sa je. Re ne re noa metsi feela hore re ’ne re phele.”

Daniel ke moholo ka phuthehong. O re: “Ho hang ha ke fosoe ke liboka tsa Bokreste, ’me ke lula ke tšoarehile ka likabelo tsa puso ea Molimo. Neng le neng ha ho e-na le mosebetsi leha e le ofe o lokelang ho etsoa Holong ea ’Muso, ke etsa bonnete ba hore ke ba teng. ’Me ha lintho li nyolosetsa, ke ikhopotsa mantsoe a Petrose ho Jesu, a tlalehiloeng ho Johanne 6:68: ‘Morena, re tla tloha re ee ho mang?’ Haeba ke khaotsa ho sebeletsa Jehova, ke ea hokae? Mantsoe a Pauluse ao re a fumanang ho Baroma 8:35-39 le ’ona a ntlatsa boikemisetso hobane a bontša hore ha ho letho le ka re arohanyang le lerato la Molimo le Kreste. Ke bona boikutlo bona boo ke bo kenyang ka botebo baneng ba ka. Kamehla ke ba bolella hore ha rea lokela ho tlohela Jehova le ka mohla.” Cheseho ea Daniel hammoho le thuto ea kamehla ea Bibele ea lelapa, li bile le tšusumetso e ntle baneng ba hae.

Moea oa ho Fana

Motho e mong a ka ’na a nahana hore batho ba futsanehileng haholo ba ke ke ba khona ho ntša menehelo ea lichelete bakeng sa ho tlatsetsa lithahasellong tsa ’Muso. Empa ha ho joalo. (Bapisa le Luka 21:1-4.) Lipaki tse ling tsa Ghana tse phelang ka temo li sehile karolo e itseng ea masimo a tsona bakeng sa hore e sebelisetsoe ho tlatsetsa lithahasellong tsa ’Muso oa Molimo. Ha lijo tse behiloeng ke karolo eo ea tšimo li rekisitsoe, chelete ea teng e sebelisetsoa feela morero oo o akarelletsang ho ntša menehelo Holong ea ’Muso ea Lipaki tsa Jehova ea sebakeng seo.

Joan oa Afrika Bohareng ke pula-maliboho. O rekisa bohobe e le hore a khone ho hlokomela monna oa hae ea shoeleng litho le batho ba bang ba bane ba phelisoang ke eena. Ha phutheho eo a kopanelang ho eona e ne e hloka libenche bakeng sa Holo ea ’Muso, lelapa la Joan le ile la etsa qeto ea ho nehela ka chelete eohle eo le neng le e-na le eona ka tlung. Seo se ile sa le siea le se na letho. Leha ho le joalo, letsatsing le hlahlamang motho ea neng a ba kolota ka nako e telele o ile a ba lefa ba sa lebella, a ba fa chelete eo ba neng ba se ba e tetse!

Joan ke motho ea thabileng ’me ha a ngongorehe ka ho sa hlokahaleng ka chelete. “Ke hlalosetsa Jehova bothata ba ka ka thapelo ebe ke ea tšebeletsong ea tšimo. Rea tseba hore tsamaisong ena ea lintho, tšepo ea ho ba le mehla e molemo ea fokola. Leha ho le joalo, rea hlokomela hore Jehova o tla re fa seo re se hlokang.”

Ho Khothalla Mosebetsi

Lipaki tsa Jehova li tsebahala ka ho ratana ha tsona. (Johanne 13:35) Tse nang le chelete li thusa Bakreste-’moho ba hlokang. Hangata sena se etsoa e le mpho ’me ka linako tse ling ka ho thusa ho fumana mosebetsi.

Mark oa Congo o na le lepera. Le holofalitse menoana ea hae ea maoto le ea matsoho. Ka hona, o sebelisa liikokotlelo bakeng sa ho tsamaea. Ha Mark a etsa qeto ea ho sebeletsa Jehova, o ile a qala ho etsa liphetoho tse khōlō bophelong ba hae. Ho e-na le ho qela lijo joalokaha a ne a etsa pele, o ile a qala ho itemela lijo. O ile a boela a etsa litene tsa seretse le setoroi tseo a ileng a li rekisa.

Ho sa tsotellehe ho holofala ha hae, Mark o ile a ’na a sebetsa ka khothalo. Qetellong o ile a reka setša ’me a haha ntlo e itekanetseng ho sona. Kajeno, Mark ke moholo phuthehong ’me o hlomphuoa haholo motseng oo a lulang ho oona. Hona joale o thusa ba bang ba hlokang.

Ke ’nete hore libakeng tse ngata mosebetsi o batla o tsoa pakeng tsa majoe. Moholo e mong oa Mokreste ea sebeletsang ho e ’ngoe ea liofisi tsa makala tsa Mokhatlo oa Watch Tower tse Afrika Bohareng o ngotse: “Boholo ba barab’abo rōna ba mona ha bo sebetse. Ba bang ba leka ho iketsetsa mesebetsi e itseng empa sena se boima. Ba bangata ba ipoleletse hore kaha ba ntse ba tla sotleha ho sa tsotellehe hore na ba etsa eng, ba tla tela lintho tse bonahalang ’me ba bule maliboho. Ka ho etsa joalo, ba bangata ba fumana hore ba hlohonolofatsoa haholoanyane ho feta haeba ba ne ba sebeletsa moputso o fokolang kapa ho hang o le sieo.”

Jehova o Hlokomela Batho ba Hae

Jesu Kreste o ile a re ka eena ka boeena: “Liphokojoe li na le maphao le linonyana tsa leholimo li na le lihlaha, empa Mora oa motho ha a na moo a ka behang hlooho ea hae teng.” (Luka 9:58) Ka tsela e tšoanang, moapostola Pauluse o ile a ngola: “Ho fihlela ka hora eona ena re tsoela pele ho lapa hape le ho nyoroa le ho apara ka mokhoa o fokolang le ho hlekefetsoa le ho hloka mahae.”—1 Bakorinthe 4:11.

Jesu le Pauluse ka bobeli ba ile ba khetha ho phela bophelo bo itekanetseng maemong a moruo e le hore ba ka phehella tšebeletso ea bona ka ho feletseng. Bakreste ba bangata kajeno ba futsanehile hobane ha ho seo ba ka se etsang. Leha ho le joalo, ba sebelisa melao-motheo ea Bibele bophelong ’me ba chesehela ho sebeletsa Molimo. Baa tseba hore Jehova o ba rata haholo ha ba latsoa bonnete ba tšepiso ea Jesu: “Joale, le ’ne le tsoele pele le batla ’muso pele le ho loka ha hae, ’me lintho tsena tse ling tsohle [tse bonahalang] le tla li ekeletsoa.” (Matheu 6:25-33) Ho feta moo, bahlanka bana ba futsanehileng ba Molimo ba na le bopaki ba hore “tlhohonolofatso ea Jehova—ke eona e ruisang.”—Liproverbia 10:22, NW.

[Mongolo o botlaaseng ba leqephe]

[Setšoantšo se leqepheng la 7]

Ho pota lefatše, batho ba nka thuto ea Bibele e le ea bohlokoa

[Lebokose le leqepheng la 6]

“Baphethi Ba Lentsoe” Ke Bo-mang?

HO LATELA phuputso ea mokhoa oa Gallup e entsoeng ka 1994, karolo ea 96 lekholong ea Maamerika e “lumela ho Molimo kapa ho moea oa bokahohle.” U.S.News & World Report e boletse hore ho boetse ho na le “likereke tsa batho ka bomong United States tse ngata ho feta tse teng sechabeng leha e le sefe Lefatšeng.” Ho sa tsotellehe sebōpeho seo sa borapeli, motho ea nang le phihlelo ho bokelleng litaba tsa liphuputso, George Gallup e monyenyane, o re: “’Nete ea ’makoma ke hore Maamerika a mangata ha a tsebe hore na a lumela eng kapa hore na ke hobane’ng ha a lumela.”

Lipalo-palo li boetse li bontša hore ho na le lekhalo le leholo le teng lipakeng tsa seo batho ba bangata ba se lumelang le seo ba se etsang. Ka mohlala, mongoli Jeffery Sheler o re: “Litsebi litabeng tsa kahisano li hlokometse hore tse ling tsa libaka tseo ho tsona tlōlo ea molao e hloeleng mekoalaba naheng eo, e boetse ke tsona libaka tseo ho tsona bolumeli le litšebeletso tsa bona li leng matla ka ho fetisisa.”

Sena ha sea lokela ho makatsa. Hobane’ng? Hobane morao koo lekholong la pele la lilemo, moapostola Pauluse o ile a lemosa Bakreste-’moho le eena hore ba hlokomele ba ‘bolelang phatlalatsa hore ba tseba Molimo, empa ba mo latola ka mesebetsi ea bona.’ (Tite 1:16) Ho phaella moo, Pauluse o ile a bolella mohlankana Timothea hore ‘matsatsi a ho qetela’ a ne a tla tšoauoa ka batho “ba nang le ponahalo ea boinehelo ba bomolimo empa ba ipaka ba se na ’nete matleng a bona.”—2 Timothea 3:1, 5.

Leha ho le joalo, Bakreste ba ’nete ba etsa sohle se matleng a bona ho latela taelo ea Jesu Kreste ea ho ‘ea le ho etsa batho ba lichaba tsohle barutuoa.’ (Matheu 28:19) Ka tsela ena, e ba “baphethi ba lentsoe, eseng bautloi feela.”—Jakobo 1:22.