Letsatsi la Jehova le Haufi
“Utloang taba ena, lōna maqheku; le sekehe litsebe, lōna bohle baahi ba lefatše.”—JOELE 1:2.
1, 2. Ke ka lebaka la boemo bofe bo neng bo le Juda Jehova a ileng a bululela Joele ho bolela boprofeta ba hae bo matla?
“JO! LETSATSI! hobane le haufi letsatsi la Jehova, le tla joalo ka tšenyeho e tsoang ho Ea matla ’ohle.” Ke tsebiso e tšosang hakaakang eo! E ne e le molaetsa oa Molimo o eang ho batho ba hae o fetisoang ka moprofeta oa hae Joele.
2 Mantsoe ao a Joele 1:15 a ile a ngolloa Juda, mohlomong hoo e ka bang selemong sa 820 B.C.E. Nakong eo maralla a matalana a ne a khabisitse naha. Litholoana le lijo-thollo e ne e le matletsetletse. Makhulo a ne a sabaletse ebile a le matala. Leha ho le joalo, ho ne ho e-na le ntho e ’ngoe e phoso. Borapeli ba Baale bo ne bo jele setsi Jerusalema le naheng ea Juda. Batho ba ne ba kopanela meketjaneng e lerata ea botahoa ka pel’a molimo ona oa bohata. (Bapisa le 2 Likronike 21:4-6, 11.) Na Jehova o ne a tla lumella see sohle hore se tsoele pele?
3. Jehova o ile a lemosa ka eng, ’me lichaba li lokela ho lokisetsa eng?
3 Buka ea Bibele ea Joele e na le karabo e hlakileng. Jehova Molimo o ne a tla tlosa qoso bobusing ba hae ’me a hloekise lebitso la hae le halalelang. Letsatsi la Jehova le leholo le ne le le haufi. Molimo o ne a tla liha kahlolo holim’a lichaba tsohle tse neng li le “khohlong ea Josafate.” (Joele 3:12) A li ke li itokisetse ntoa khahlanong le Ea Matla ’Ohle, Jehova. Le rōna re talimane le letsatsi la Jehova le leholo. Ka hona, a re ke re hlahlobeng mantsoe ana a Joele a boprofeta bakeng sa mehla ea rōna esita le bakeng sa nako e fetileng.
Tlhaselo ea Likokoanyana
4. Ketsahalo eo Joele a neng a lemosa ka eona e ne e tla ba khōlō hakae?
4 Ka moprofeta oa hae, Jehova o re: “Utloang taba ena, lōna maqheku; le sekehe litsebe, lōna bohle baahi ba lefatše. Na taba e joalo e se e kile ea e-ba teng mehleng ea lōna le mehleng ea bo-ntat’a lōna? Le e bolelle bara ba lōna, bara ba lōna ba e bolelle bara ba bona, le bara ba bona ba e bolelle moloko o tlang.” (Joele 1:2, 3) Maqheku le batho bohle ba ne ba ka lebella ntho eo ho seng mohla ho kileng ha etsahala e tšoanang le eona bophelong ba bona kapa mehleng ea bo-ntat’a bona. E ne e tla tsoteha hoo e neng e tla hopoloa ho isa molokong oa boraro! Ketsahalo ee e tsotehang e ne e le eng? Bakeng sa ho fumana karabo, a re inahaneng re le mehleng ea Joele.
5, 6. (a) Hlalosa kotlo eo Joele a e profetang. (b) Mohloli oa kotlo eo e ne e le mang?
5 Mamelang! Joele o utloa molumo o hōle. Leholimo lea fifala, ’me molumo oo o tšosang oa eketseha ha lefifi le koahela. Joale leru leo le kang mosi lea theoha. Ke lebotho la likokoanyana tse limilione. ’Me li baka tšenyo e kaakang! Joale nahana ka Joele 1:4. Likokoanyana tsena tse hlaselang hase feela litsie tse fallang tse nang le mapheo. Che bo! Ho boetse ho tla boieane ba litsie tse lapileng tse hahabang, tse se nang mapheo. Kaha li tlisoa ke moea, litsie tsena li fihla ka tšohanyetso, ’me molumo oa tsona o tšoana le oa likoloi tsa lipere. (Joele 2:5) Ka lebaka la ho khala ha tsona, ka ho panya ha leihlo tse limilione tsa tsona li ka fetola paradeise ea sebele lehoatata.
6 Ho hong hape ho tseleng ka linako tsohle ke pōpane—e leng boemo boo tšoèlè le lirurubele li bang ho bona ha li sa tsoa hlaha. Mabotho a maholo a pōpane e lapileng a ka ja makhasi a lijalo semela ka semela, lekhasi ka lekhasi, ho fihlela ha limela li batla li feletsoe ke botala ba tsona. Boholo ba seo li se sieang, bo jeoa ke litsie. ’Me seo litsie li se sieang, maphele a tsamaeang ka potlako ka sebele aa se qetela. Empa hlokomela sena: Ho Joele khaolo ea 2, temaneng ea 11, Molimo o tsebahatsa lebotho la litsie e le “makhotla a hae.” E, e ne e le Mohloli oa kotlo ea litsie e neng e tla senya lefatše le ho baka tlala e khōlō. Neng? Pejana feela ho “letsatsi la Jehova.”
“Tsohang, Matahoa”!
7. (a) Boemo ba baeta-pele ba bolumeli ba Juda e ne e le bofe? (b) Baeta-pele ba Bokreste-’mōtoana kajeno ba boemong bo tšoanang le ba baeta-pele ba bolumeli ba Juda joang?
7 Ho khetholloa letšoele le tummeng hampe la baeta-pele ba bolumeli ba Juda ha ho ntšoa taelo ena: “Tsohang, matahoa, le lle; le bokolle, lōna bohle ba noang veine, ka baka la veine e ncha, hobane e tlositsoe melomong ea lōna.” (Joele 1:5) E, matahoa a moea a Juda a ile a bolelloa hore a ‘tsohe,’ a hlaphoheloe. Empa u se ke ua nahana hore sena e mpa e le histori feela tjee ea boholo-holo. Hona joale, pele ho letsatsi le leholo la Jehova, baruti ba Bokreste-’mōtoana ka tšoantšetso ba tahiloe ke veine e monate hoo ho hang ba sa hlokomeleng taelo ena e tsoang ho Ea Holimo-limo. Ba tla makala hakaakang ha letsatsi le leholo le le susumetsang tšabo la Jehova le ba tsosa borokong ba bona ba botahoa ba moea!
8, 9. (a) Joele o hlalosa litsie le phello ea kotlo ea tsona joang? (b) Kajeno, litsie li emela bo-mang?
8 Bona lebotho leo le leholo la litsie! “Sechaba se futuhetse lefatše la ka, ke sechaba se matla, se sa baloeng, meno a sona ke meno a tau, se na le mehlahare e joalo ka ea tau e tšehali. Se sentse merara ea ka le lifate tsa ka tsa lifeie, se li entse patsi feela; se li ebotse makhapetla a tsona, se li lahletse fatše, makala a tsona a bile a soeufetse. Lla, uena lefatše, joalo ka moroetsana ea itlamileng ka lesela [la mokotla, NW], ka baka la ea neng a tla mo nyala bocheng ba hae.”—Joele 1:6-8.
9 Na bona e mpa e le feela boprofeta bo mabapi le “sechaba” sa litsie, boieane ba litsie tse hlaselang Juda? Che, boprofeta bona bo bohlokoa ho feta moo. Ho Joele 1:6 le ho Tšenolo 9:7, batho ba Molimo ba emeloa ke litsie. Lebotho la kajeno la litsie ha ho potang hore ke lebotho la bahlanka ba Jehova ba litsie tse tlotsitsoeng, tseo hona joale li kopaneng le “linku tse ling” tsa Jesu tse ka bang 5600 000. (Johanne 10:16) Na ha u thabele ho ba karolo ea letšoele lee le leholohali la barapeli ba Jehova?
10. Phello ea kotlo ea litsie ke efe ho Juda?
10 Ho Joele 1:9-12, re bala ka liphello tsa kotlo ea litsie. Boieane bo bong ka mor’a bo bong bo etsa naha lesupi. Ka lebaka la ho haella ha lijo-thollo, veine le oli, baprista ba sa tšepahaleng ba sitoa ho tsoela pele ka mesebetsi ea bona. Esita le lefatše le ne le soabile hobane litsie li le amohile lijo-thollo ka likhoka, ’me lifate tsa litholoana li ne li setse li hloka litholoana. Ka lebaka la ho senngoa ha lifate tsa morara, veine ha e sa le eo bakeng sa matahoa ao a Baale ao hape e neng e le matahoa a moea.
“Ikotleng Lifuba, Lōna Baprista”
11, 12. (a) Ke bo-mang ba ipolelang hore ke baprista ba Molimo kajeno? (b) Kotlo ea kajeno ea litsie e ama baeta-pele ba bolumeli ba Bokreste-’mōtoana joang?
11 Mamela molaetsa oa Molimo ho baprista bao ba tsoileng tseleng: “Itlameng, ’me le ikotle lifuba, lōna baprista. Bokollang, lōna basebeletsi ba aletare.” (Joele 1:13, NW) Phethahatsong ea pele ea boprofeta ba Joele, baprista ba Balevi ba ne ba sebeletsa aletareng. Empa ho thoe’ng ka phethahatso ea ho qetela? Kajeno, baruti ba Bokreste-’mōtoana ba inketse matla a ho sebeletsa aletareng ea Molimo, ba ipolela hore ke basebeletsi ba hae, “baprista” ba hae. Leha ho le joalo, ke’ng se etsahalang hona joale ha litsie tsa Molimo tsa kajeno li ntse li tsoela pele?
12 Ha “baprista” ba Bokreste-’mōtoana ba bona batho ba Jehova ba sebetsa ’me ba utloa ba lemosa ka kahlolo ea bomolimo, baa ferekana. Ba ikotla lifuba ka lebaka la ho tšoenngoa le ho halefisoa ke phello e senyang ea molaetsa oa ’Muso. ’Me baa bokolla ha mehlape ea bona e ba phonyoha. Ka lebaka la makhulo a bona a senngoang, a ba ke ba qete bosiu ba apere masela a mokotla, ba bokolla hobane chelete e ke ke ea hlola e kena. Haufinyane, ba tla felloa le ke mosebetsi! Ha e le hantle, Molimo o ba bolella hore ba bokolle bosiu bohle hobane timetso ea bona e haufi.
13. Na Bokreste-’mōtoana ka kakaretso bo tla arabela hamolemo temosong ea Jehova?
13 Ho latela Joele 1:14 (NW), tšepo ea bona feela e itšetlehile ka ho baka le ho hooeletsa “ho Jehova bakeng sa thuso.” Na re ka lebella hore sehlopha sohle sa baruti ba Bokreste-’mōtoana se retelehele ho Jehova? Le hanyenyane! Batho ka bomong har’a bona ba ka ’na ba arabela temosong ea Jehova. Empa boemo ba ho lapa moeeng ba baeta-pele bana le mehlape ea bona e le sehlopha bo tla tsoela pele. Moprofeta Amose o boletse esale pele: “Bonang, matsatsi a tla, ho itsalo Morena Jehova, ao ke tla romela ho lapa lefatšeng, e seng ho lapela bohobe, leha e le ho nyoreloa metsi; empa e leng ho lapela mantsoe a Jehova.” (Amose 8:11) Ka lehlakoreng le leng, re leboha hakaakang ka mokete oa lijo tsa moea tse enneng tseo Molimo ka lerato a fanang ka tsona ka “lekhoba le tšepahalang le le masene”!—Matheu 24:45-47.
14. Kotlo ea litsie ke selelekela sa eng?
14 Kotlo ea litsie e ne e le selelekela sa ntho e ’ngoe ’me e ntse e le sona. Sa eng? Ka ho hlakileng Joele oa re bolella, ha a re: “Jo! letsatsi! hobane le haufi letsatsi la Jehova, le tla joalo ka tšenyeho e tsoang ho Ea matla ’ohle.” (Joele 1:15) Litlhaselo tsa lefatše ka bophara tsa lebotho la Molimo la litsie kajeno li bontša hore letsatsi la Jehova le leholo le susumetsang tšabo le haufi. Ka sebele bohle ba lipelo li lokileng ba labalabela letsatsi leo le khethehileng la ho ikarabella la ha kahlolo ea bomolimo e lihuoa khahlanong le ba khopo ’me Jehova a hlōla e le Morena oa Bokahohle.
15. Ka lebaka la boemo bo bohloko ba naha, ba elang hloko temoso ea bomolimo ba itšoara joang?
15 Joalokaha Joele 1:16-20 e bontša, lijo li ile tsa fela Juda ea boholo-holo. Nyakallo le eona e ile ea fela. Meliko e ile ea sala e se na letho, ’me matlo a polokelo a ile a tlameha ho heletsoa. Kaha ho ne ho se na lekhulo, hobane litsie li jele limela tsa naha, makhomo a ne a solla ke ho ferekana ’me mehlape ea linku e e-shoa. Ke tlokotsi e kaakang! Har’a maemo a joalo, ke’ng se ileng sa etsahalla Joele? Ho latela temana ea 19, o ile a re: “Jehova, ke bitsa ho uena.” Le kajeno, ba bangata ba ela hloko temoso ena ea bomolimo ’me ba hoeletsa ho Jehova Molimo ka tumelo.
“Letsatsi la Jehova Lea Tla”
16. Ke hobane’ng ha ‘baahi ba naha’ ba lokela ho thothomela?
16 Mamela taelo ena e tsoang ho Molimo: “Letsang terompeta Sione; le hlabe mokhosi thabeng ea ka e khethehileng! Baahi bohle ba naha ba thothomele.” (Joele 2:1) Ke hobane’ng ha ba lokela ho etsa joalo? Boprofeta bona boa araba: “Hobane letsatsi la Jehova lea tla, le haufi. Ke letsatsi la botšo le la lefifi, ke letsatsi la maru, la maru a matšo. Joalo ka mafube a meso ha a aparela lithaba.” (Joele 2:1, 2) Ho na le boikutlo ba sebele ba ho potlaka bo amahanngoang le letsatsi lena le leholo la Jehova.
17. Kotlo ea litsie e ile ea ama naha ea Juda le batho ba eona joang?
17 Ak’u nahane ka phello ea pono ea moprofeta enoa ha litsie tse phehellang li fetola tšimo ea sebele ea Edene lehoatata. Mamela tlhaloso ea lebotho lena la litsie: ‘Sebōpeho sa tsona se joalo ka sebōpeho sa lipere, bahlabani ba tsona ba matha joalo ka ba palameng. Ba thala ka molumo o kang oa makoloi a mathang holim’a lithaba; ke molumo o kang oa lelakabe la mollo le chesang matlakala; ba joalo ka sechaba se matla se itokiselitseng ntoa. Pel’a sona lichaba lia tlakasela, lifahleho tsohle li fetoha ’mala.’ (Joele 2:4-6) Nakong ea kotlo ea litsie ea mehleng ea Joele, tsieleho ea barapeli ba Baale e ile ea eketseha, ’me boikutlo ba ho tšoenyeha bo ne bo bonoa lifahlehong tsa bona.
18, 19. Kajeno mosebetsi oa batho ba Molimo o ’nile oa tšoana le kotlo ea litsie joang?
18 Ha ho letho le ileng la thiba litsie tsena tse hlophisehileng, tse sa khathaleng. Li ne li matha “joalo ka linatla” li bile li hloa marako. Haeba ‘tse ling tsa tsona li ne li oela har’a libetsa, tse ling li ne li sa khelohe tseleng.’ (Joele 2:7, 8, bapisa le NW.) Ke tšoantšetso e hlakileng hakaakang ea boprofeta ea lebotho la kajeno la Molimo la litsie tsa tšoantšetso! Le kajeno, lebotho la Jehova la litsie le ntse le tsoela pele. Ha ho “lerako” la khanyetso le ka li sitisang. Ha li sekisetse botšepehing ba tsona ho Molimo empa li ikemiselitse ho talimana le lefu, joalokaha ho entse Lipaki tse likete tse ileng tsa “oela har’a libetsa” ka lebaka la ho hana ho thoholetsa Hitler oa puso ea Jeremane ea Bonazi.
19 Lebotho la Molimo la litsie tsa kajeno le fane ka bopaki bo feletseng ‘motseng’ oa Bokreste-’mōtoana. (Joele 2:9) Li entse joalo lefatšeng lohle. Li sa ntse li hlōla litšitiso tsohle, li kena malapeng a limilione, li atamela batho seterateng, li buisana le bona ka thelefono le ho kopana le bona ka tsela leha e le efe e khonehang ha li ntse li bolela molaetsa oa Jehova. Ka sebele, li abile lingoliloeng tsa Bibele tse limilione tse likete ’me li sa ntse li tla aba tse ling tse eketsehileng tšebeletsong ea tsona e sa khaotseng—ea phatlalatsa le ea ntlo le ntlo.—Liketso 20:20, 21.
20. Ke mang ea tšehetsang litsie tsa kajeno, ’me e le ka liphello life?
20 Joele 2:10 e bontša hore boieane bo boholo ba litsie bo tšoana le leru le ka thibang letsatsi, khoeli le linaleli. (Bapisa le Esaia 60:8.) Na ho na le pelaelo ea hore na ke mang ea susumetsang lebotho lee? Ntle le molumo oa likokoanyana tsena, re utloa mantsoe ana a Joele 2:11: “Jehova o phahamisa lentsoe la hae pel’a makhotla a hae, hobane makhotla a hae a maholo haholo, ’me mophethi oa lentsoe la hae o matla, hobane le leholo letsatsi la Jehova, le tšabeha haholo-holo; ea ka le mamellang ke mang?” E, Jehova Molimo o romela lebotho la hae la litsie hona joale—pele ho letsatsi la hae le leholo.
“Jehova ha a Liehe”
21. Phello e tla ba efe ha “letsatsi la Jehova le tla joaloka lesholu”?
21 Joaloka Joele, moapostola Petrose o buile ka letsatsi leo le leholo la Jehova. O ile a ngola: “Letsatsi la Jehova le tla tla joaloka lesholu, leo ka lona maholimo a tla feta ka lerata le sheshang le hlabang, empa thepa ea motheo e le e chesang ka matla haholo e tla qhibiliha, ’me lefatše le mesebetsi e ho lona li tla pepesoa.” (2 Petrose 3:10) Tlas’a tšusumetso ea Satane Diabolose, “maholimo,” a mebuso e khopo, a busa “lefatše,” ke hore, moloko oa batho o ikarotseng ho Molimo. (Baefese 6:12; 1 Johanne 5:19) Maholimo ana a tšoantšetso le lefatše li ke ke tsa pholoha mocheso oa khalefo ea Molimo letsatsing le leholo la Jehova. Ho e-na le hoo, a tla nkeloa sebaka ke “maholimo a macha le lefatše le lecha tseo re li letetseng ho ea ka tšepiso ea hae, ’me ho tsena ho loka ho tla aha.”—2 Petrose 3:13.
22, 23. (a) Re lokela ho itšoara joang ha Jehova ka mosa a sa ntse a sa re felle pelo? (b) Re lokela ho itšoara joang mabapi le bohaufi ba letsatsi la Jehova?
22 Ka lebaka la litšitiso tsohle le liteko tsohle tsa tumelo tsa kajeno, re ka fifalloa ke pono ea ho potlaka ha mehla ea rōna. Empa ha litsie tsa tšoantšetso li tsoela pele ka matla, batho ba bangata ba arabela molaetseng oa ’Muso. Le hoja Molimo a fane ka nako bakeng sa sena, ha rea lokela ho nka mamello ea hae e le tieho. “Jehova ha a liehe mabapi le tšepiso ea hae, joalokaha batho ba bang ba ho nka e le tieho, empa ha a le felle pelo hobane ha a lakatse hore leha e le mang a timetsoe empa o lakatsa hore bohle ba fihle pakong.”—2 Petrose 3:9.
23 Ha re ntse re emetse letsatsi leo le leholo la Jehova, a re nkeng ka botebo mantsoe a Petrose a tlalehiloeng ho 2 Petrose 3:11, 12: “Kaha lintho tsena tsohle li tla qhibiliha ka tsela eo, le tšoanela ho ba batho ba mofuta ofe liketsong tse halalelang tsa boitšoaro le liketsong tsa boinehelo ba bomolimo, le letile ’me le lutse le hopolela haufi ho ba teng ha letsatsi la Jehova, leo ka lona maholimo ha a cha a tlang ho qhibiliha le thepa ea motheo ha e chesa ka matla haholo e tlang ho qhibiliha!” Ka sebele liketso tsena li akarelletsa hore re tsamaisane le lebotho la Jehova la litsie ka ho kopanela kamehla le ka mokhoa o nang le morero ho boleleng litaba tse molemo tsa ’Muso pele bofelo bo fihla.—Mareka 13:10.
24, 25. (a) U arabela joang tokelong ea ho kopanela mosebetsing oa lebotho la Jehova la litsie? (b) Joele o phahamisa potso efe e utloahalang?
24 Lebotho la Molimo la litsie le ke ke la khaotsa ho sebetsa ho fihlela letsatsi le leholo le le tšabehang la Jehova le fihla. Ho ba teng ha lebotho lena la litsie le sa thijoeng, ke bopaki bo tsotehang ba hore letsatsi la Jehova le haufi. Na ha u thabe hore ebe u sebeletsa har’a litsie tsa Molimo tse tlotsitsoeng le metsoalle ea tsona tlhaselong ea ho qetela pele ho letsatsi la Jehova le leholo le tšabehang?
25 Letsatsi la Jehova e tla ba le leholo hakaakang! Ha ho makatse hore ebe ho phahamisoa potso ena: “Ea ka le mamellang ke mang?” (Joele 2:11) Potso ena le tse ling tse ngata li tla hlahlojoa lihloohong tse peli tse latelang.
Na U ka Hlalosa?
◻ Ke hobane’ng ha Jehova a ile a lemosa ka kotlo ea likokoanyana holim’a Juda?
◻ Phethahatsong ea kajeno ea boprofeta ba Joele, litsie tsa Jehova ke bo-mang?
◻ Baeta-pele ba Bokreste-’mōtoana ba itšoara joang kotlong ea litsie, ’me ba bang ba bona ba ka phonyoha liphello tsa eona joang?
◻ Kotlo ea litsie e bile e pharaletseng hakae lekholong la bo20 la lilemo, ’me e tla tsoela pele ho fihlela neng?
[Setšoantšo se leqepheng la 9]
Kotlo ea litsie e ne e le selelekela sa ntho e ’ngoe e mpe le ho feta
[Tlhaloso ea Moo Setšoantšo se Nkiloeng Teng]
Barren tree: FAO photo/G. Singh
[Setšoantšo se leqepheng la 10]
Jehova Molimo o tšehetsa kotlo ea litsie ea kajeno
[Tlhaloso ea Moo Setšoantšo se Nkiloeng Teng e leqepheng la 8]
Locust: FAO photo/G. Tortoli; locust swarm: FAO photo/Desert Locust Survey