Ke Mang ea Tla “Bolokeha”?
“E mong le e mong ea ipiletsang lebitsong la Jehova o tla pholoha.”—LIKETSO 2:21.
1. Ke hobane’ng ha Pentekonta ea 33 C.E. e ne e le letsatsi la bohlokoa ka ho fetisisa historing ea lefatše?
PENTEKONTA ea 33 C.E. e ne e le letsatsi la bohlokoa ka ho fetisisa historing ea lefatše. Hobane’ng? Hobane letsatsing leo ho ile ha tsoaloa sechaba se secha. Qalong, e ne e se sechaba se seholo hakaalo—e ne e le feela barutuoa ba Jesu ba 120 ba neng ba bokane kamoreng e ka holimo Jerusalema. Empa kajeno, ha boholo ba lichaba tse neng li le teng nakong eo bo se bo lebetsoe, sechaba sena se ileng sa tsoaloa kamoreng eo e ka holimo se sa ntse se e-na le rōna. Ntlha ena ke ea bohlokoa ka ho fetisisa ho rōna bohle hobane sena ke sechaba se khethiloeng ke Molimo hore e be lipaki tsa hae ka pel’a moloko oa batho.
2. Ke mehlolo efe e ileng ea tšoaea ho tsoaloa ha sechaba se secha?
2 Ha sechaba seo se secha se qala ho ba teng, ho bile le liketsahalo tsa bohlokoa tse ileng tsa phethahatsa mantsoe a Joele a boprofeta. Re bala ka liketsahalo tsena ho Liketso 2:2-4: “Eaba ka tšohanyetso ho ba teng ho tsoa leholimong lerata le joalo feela ka la moea o fokang ka sekhahla, ’me la tlala ntlo eohle eo ba neng ba lutse ka hare ho eona. Eaba maleme joalokaha eka ke a mollo a bonahala ho bona ’me a ajoa, ’me ka leng la ’ona la lula holim’a e mong le e mong oa bona, eaba kaofela ba tlala moea o halalelang ’me ba qala ho bua ka maleme a fapaneng, feela joalokaha moea o ne o ba neha ho bua.” Ka tsela ena banna le basali bao ba tšepahalang ba 120 e bile sechaba sa moea, seo litho tsa sona tsa pele hamorao moapostola Pauluse a li bitsitseng “Iseraele ea Molimo.”—Bagalata 6:16.
3. Ke boprofeta bofe ba Joele bo ileng ba phethahala ka Pentekonta ea 33 C.E.?
3 Matšoele a ile a bokana ho tla etsa lipatlisiso ka “moea o fokang ka sekhahla,” ’me moapostola Petrose o ile a a hlalosetsa hore bo bong ba boprofeta ba Joele bo ne bo phethahala. Boprofeta bofe? Mamela seo a se buileng: “Molimo o re: ‘’Me matsatsing a ho qetela, ke tla tšollela o mong oa moea oa ka holim’a mofuta o mong le o mong oa nama, ’me bara ba lōna le barali ba lōna ba tla profeta ’me bahlankana ba lōna ba tla bona lipono le banna-baholo ba lōna ba tla lora litoro; ’me esita le holim’a makhoba a ka a banna le holim’a makhoba a ka a basali ka sebele ke tla tšollela o mong oa moea oa ka matsatsing ao, ’me ba tla profeta. ’Me ka sebele holimo leholimong ke tla fana ka limakatso tse bontšang se tlang le lipontšo tlaase lefatšeng, mali le mollo le moholi oa mosi; letsatsi le tla fetoha lefifi le khoeli e fetohe mali pele letsatsi le leholo le le khanyang haholo la Jehova le fihla. ’Me e mong le e mong ea ipiletsang lebitsong la Jehova o tla pholoha.’” (Liketso 2:17-21) Mantsoe ana ao Petrose a a qotsitseng a fumanoa ho Joele 2:28-32, ’me ho phethahala ha ’ona ho ne ho bolela hore sechaba sa Bajuda se ne se felloa ke nako. “Letsatsi le leholo le le khanyang haholo la Jehova,” e leng nako ea ho ahlola Iseraele e sa tšepahaleng, le ne le le haufi. Empa ke bo-mang ba neng ba tla pholoha kapa ba bolokehe? ’Me see se ne se tšoantšetsa eng?
Liphethahatso Tse Peli Tsa Boprofeta
4, 5. Ka lebaka la liketsahalo tse tlang, Petrose o ile a fana ka keletso efe, ’me ke hobane’ng ha keletso eo e ne e sebetsa ho fihlela ka morao ho mehla ea hae?
4 Lilemong tse ileng tsa latela 33 C.E., Iseraele ea Molimo ea moea e ile ea atleha haholo, empa sechaba sa Iseraele ea nama ha sea ka sa atleha. Ka 66 C.E., Iseraele ea nama e ne e loana le Roma. Ka 70 C.E., Iseraele e ne e batla e felile, ’me Jerusalema le tempele ea eona li ile tsa chesoa ka ho feletseng. Ka Pentekonta ea 33 C.E., Petrose o ile a fana ka keletso e molemo haholo ka lebaka la tlokotsi e neng e atamela. Ha a qotsa Joele hape, o ile a re: “E mong le e mong ea ipiletsang lebitsong la Jehova o tla pholoha.” Mojuda ka mong o ne a lokela ho iketsetsa qeto ea ho ipiletsa lebitsong la Jehova. Sena se ne se akarelletsa ho ela hloko litaelo tse tsoelang pele tsa Petrose: “Bakang, ’me e mong le e mong oa lōna a a kolobetsoe ka lebitso la Jesu Kreste bakeng sa tšoarelo ea libe tsa lōna.” (Liketso 2:38) Bamameli ba Petrose ba ne ba tlameha ho amohela Jesu e le Mesia eo Iseraele joaloka sechaba, e neng e mo hanne.
5 Mantsoe ao a Joele a boprofeta a bile le phello e khōlō ho batho ba bonolo lekholong la pele la lilemo. Leha ho le joalo, a na le phello e khōloanyane kajeno hobane, joalokaha liketsahalo tsa lekholo la bo20 la lilemo li bontša, ho bile le phethahatso ea bobeli ea boprofeta ba Joele. A re boneng hore na joang.
6. Ho tsebahatsoa ha Iseraele ea Molimo ho ile ha qala ho hlakisoa joang ha 1914 e atamela?
6 Ka mor’a lefu la baapostola, Iseraele ea Molimo e ile ea pupetsoa ke mofoka oa Bokreste ba bohata. Leha ho le joalo, nakong ea bofelo, e qalileng ka 1914, ho tsebahala ha sechaba sena sa moea ho ile ha boela ha hlaka. Sena sohle e ne e le phethahatso ea papiso ea Jesu ea koro le mofoka. (Matheu 13:24-30, 36-43) Ha 1914 e atamela, Bakreste ba tlotsitsoeng ba ile ba qala ho ikarola ho Bokreste-’mōtoana bo sa tšepahaleng, ka sebete ba hana lithuto tsa bona tsa bohata le ho bolela bofelo bo tlang ba “linako tse behiloeng tsa lichaba.” (Luka 21:24) Empa ntoa ea pele ea lefatše, e ileng ea qhoma ka 1914, e ile ea hlahisa mathata ao ba neng ba sa itokisetsa ’ona. Tlas’a khatello e matla haholo, ba bangata ba ile ba khoehlisa, ’me ba bang ba ile ba sekisetsa. Ka 1918 mosebetsi oa bona oa boboleli ha e le hantle o ne o khaolitse.
7. (a) Ke ketsahalo efe e tšoanang le ea Pentekonta ea 33 C.E. e ileng ea etsahala ka 1919? (b) Ho tloha ka 1919, ho tšolloa ha moea oa Molimo ho bile le phello efe ho bahlanka ba Jehova?
7 Leha ho le joalo, seo ha sea ka sa nka nako e telele. Ho tloha ka 1919, Jehova o ile a qala ho tšollela moea oa hae ho batho ba hae ka tsela e ileng ea hopotsa ka Pentekonta ea 33 C.E. Ha e le hantle, ka 1919 ho bua maleme le moea o fokang ka sekhahla li ne li le sieo. Mantsoeng a Pauluse a ho 1 Bakorinthe 13:8 re utloisisa hore nako ea mehlolo e ne e le khale e fetile. Empa, moea oa Molimo o ile oa bonoa ka ho hlakileng ka 1919, kopanong ea Cedar Point, Ohio, U.S.A., ha Bakreste ba tšepahalang ba ne ba boela ba matlafatsoa ’me ba qalisa mosebetsi oa ho bolela litaba tse molemo tsa ’Muso. Ka 1922 ba ile ba khutlela Cedar Point ’me ba hlasimolloa ke boipiletso bo neng bo re, “Phatlalatsang, phatlalatsang, phatlalatsang, Morena le ’muso oa hae.” Joalokaha ho ne ho ile ha etsahala lekholong la pele la lilemo, lefatše le ile la qobelloa ho hlokomela liphello tsa ho tšolloa ha moea oa Molimo. Mokreste e mong le e mong ea inehetseng—monna le mosali, ea hōlileng le e mocha—ba ile ba qala ho “profeta,” ke hore, ba bolela “lintho tse hlollang tsa Molimo.” (Liketso 2:11) Joaloka Petrose, ba ile ba phehella batho ba bonolo: “Pholohang molokong ona o khopameng.” (Liketso 2:40) Ba arabelang ba ne ba ka etsa seo joang? Ka ho ela hloko mantsoe a Joele a fumanoang ho Joele 2:32 (NW): “E mong le e mong ea ipiletsang lebitsong la Jehova o tla bolokeha.”
8. Lintho li tsoetse pele joang bakeng sa Iseraele ea Molimo ho tloha ka 1919?
8 Ho tloha lilemong tseo tsa pele, mosebetsi oa Iseraele ea Molimo o tsoetse pele. Ho tiisoa ha batlotsuoa ho bonahala ho se ho tsoetse pele haholo, ’me ho tloha ka bo-1930 ho ’nile ha bonoa bongata bo boholo ba batho ba bonolo ba nang le tšepo ea ho phela lefatšeng. (Tšenolo 7:3, 9) Bohle ba na le boikutlo ba ho potlaka, hobane phethahatso ea bobeli ea Joele 2:28, 29 e bontša hore re haufi haholo le letsatsi le leholoanyane le susumetsang tšabo la Jehova, leo ka lona tsamaiso ea lefatše lohle ea lintho ea bolumeli, ea lipolotiki le ea khoebo e tla timetsoa. Re na le mabaka a matla a ho ‘ipiletsa lebitsong la Jehova’ ka tumelo e feletseng ea hore o tla re lopolla!
Re Ipiletsa Lebitsong la Jehova Joang?
9. Ho ipiletsa lebitsong la Jehova ho akarelletsa lintho life tse ling?
9 Ke eng se akarelletsoang tabeng ea ho ipiletsa lebitsong la Jehova? Taba e potolohileng Joele 2:28, 29 e re thusa ho arabela potso eo. Ka mohlala, Jehova ha a mamele e mong le e mong ea ipiletsang ho eena. Ka moprofeta e mong, e leng Esaia, Jehova o itse ho Iseraele: “Leha le ka otlollela matsoho ho ’na, ke tla lebisa mahlo a ka hosele; leha le ka atisa lithapelo tsa lōna, nke ke ka li mamela.” Ke hobane’ng ha Jehova a ile a hana ho mamela sechaba sa hae? Eena ka seqo oa hlalosa: “Matsoho a lōna a tletse mali.” (Esaia 1:15) Jehova a ke ke a mamela leha e le mang ea leng molato oa mali kapa ea itloaetsang ho etsa sebe. Ke ka lebaka leo Petrose a ileng a bolella Bajuda ka Pentekonta hore ba bake. Tabeng e potolohileng Joele 2:28, 29, re fumana hore Joele le eena o hatella pako. Ka mohlala, ho Joele 2:12, 13, rea bala: “Joale, ho bolela Jehova, . . . khutlelang ho ’na ka pelo tsohle tsa lōna, ka ho itima lijo, le ka lillo, le ka maikoahlaeo. Haholang lipelo tsa lōna, e seng liaparo tsa lōna, le khutlele ho Jehova, Molimo oa lona; hobane o mosa, o lereko, o pelo e telele, o atisa ho hauhela.” Ho tloha ka 1919, Bakreste ba tlotsitsoeng ba ile ba sebetsa tumellanong le mantsoe ana. Ba ile ba bakela liphoso tsa bona ’me ba ikemisetsa hore le ka mohla ba ke ke ba hlola ba sekisetsa kapa hona ho khoehlisa. Sena se ile sa bula tsela ea hore moea oa Molimo o tšolloe. Motho e mong le e mong ea batlang ho ipiletsa lebitsong la Jehova le hore a mo utloe o tlameha ho latela tsela eona eo.
10. (a) Pako ea ’nete ke eng? (b) Jehova o arabela joang pakong ea ’nete?
10 Hopola, pako ea ’nete e bolela ho fetang feela ho re, “Ke masoabi.” Baiseraele ba ne ba atisa ho hahola liaparo tsa bona tsa ka ntle bakeng sa ho bontša botebo ba maikutlo a bona. Empa Jehova o re: “Haholang lipelo tsa lōna, e seng liaparo tsa lōna.” Pako ea ’nete e tsoa pelong, botebong ba botho ba rōna. E akarelletsa ho furalla liphoso joalokaha re bala ho Esaia 55:7: “Molotsana a furalle tsela ea hae, ea khopo a tlohele mehopolo ea hae, a sokolohele ho Jehova.” E akarelletsa ho hloea sebe feela joalokaha Jesu a ne a se hloile. (Baheberu 1:9) Joale, re tšepa hore Jehova o tla re tšoarela motheong oa sehlabelo sa thekollo, hobane Jehova o “mosa, o lereko, o pelo e telele, o atisa ho hauhela.” O tla amohela borapeli ba rōna, nyehelo ea rōna ea lijo-thollo tsa moea le seno sa moea. O tla re mamela ha re ipiletsa lebitsong la hae.—Joele 2:14.
11. Borapeli ba ’nete bo lokela ho ba le sebaka sefe bophelong ba rōna?
11 Thutong ea Thabeng, Jesu o ile a re bolella ntho e ’ngoe eo re lokelang ho e hopola ha a re: “Joale, le ’ne le tsoele pele le batla ’muso pele le ho loka ha hae.” (Matheu 6:33) Borapeli ba rōna ha boa lokela ho nkoa habobebe, joaloka ntho eo re e etsang ka tloaelo feela tjee molemong oa ho kokobetsa matsoalo a rōna. Ho sebeletsa Molimo ho lokela ho behoa sebakeng sa pele bophelong ba rōna. Kahoo, ka Joele, Jehova o tsoela pele ho re: “Letsang terompeta Sione . . . Le bokelle sechaba, le etse phutheho e mahlonoko! Phuthang maqheku, le bokelle bana le ba anyang letsoele; monyali a tsoe tlung ea hae, le monyaluoa phaposing ea hae!” (Joele 2:15, 16) Ke ha tlhaho hore banyalani ba sa tsoa nyalana ba be le litšitiso hobane ba lebisa tlhokomelo e mong ho e mong feela. Empa esita le bakeng sa bona, ho sebeletsa Jehova ho tlameha ho tla pele. Ha ho letho le lokelang ho tla pele ho ho kopanela borapeling ba Molimo oa rōna, ho ipiletsa lebitsong la hae.
12. Ke monyetla ofe oa khōlo o bonoang tlalehong ea Sehopotso ea selemo se fetileng?
12 Re ntse re hopotse sena, a re nahaneng ka lipalo-palo tse senoloang ke Tlaleho ea Lipaki tsa Jehova ea Selemo sa Tšebeletso sa 1997. Selemong se fetileng re bile le tlhōrō ea bahoeletsi ba ’Muso ba 5599 931—kannete ke bongata bo boholo ba barorisi! Palo ea ba bileng teng Sehopotsong e bile 14 322 226—e leng limilione tse ka bang robeli le halofo ka holimo ho palo ea bahoeletsi. Palo eo e bontša keketseho e babatsehang e ka ’nang ea e-ba teng. Ba bangata ho bao ba limilione tse robeli le halofo ba ne ba se ba ntse ba ithuta Bibele le Lipaki tsa Jehova e le batho ba thahasellang kapa e le bana ba batsoali ba kolobelitsoeng. Boholo ba bona bo ne bo qala ho tla sebokeng. Ho ba teng ha bona ho file Lipaki tsa Jehova monyetla o motle oa ho ba tseba hamolemo le ho ba thusa hore ba hatele pele. Joale, ho ne ho e-na le ba tlang Sehopotsong selemo le selemo mohlomong ba e-ba teng libokeng tse ling tse seng kae, empa ba sa hatele pele ho feta moo. Ha e le hantle, batho ba joalo ba amoheloa ka thabo hore ba kopanele libokeng. Empa re ba phehella hore ba nahanisise ka hloko mantsoe a Joele a boprofeta le ho nahana ka mehato e tsoelang pele eo ba lokelang ho e nka hore ba tiisehe hore Jehova o tla utloa ha ba ipiletsa lebitsong la hae.
13. Haeba re se re ntse re ipiletsa lebitsong la Jehova, re na le boikarabelo bofe mabapi le ba bang?
13 Moapostola Pauluse o ile a hatella tšobotsi e ’ngoe ea ho ipiletsa lebitsong la Molimo. Lengolong la hae le eang ho Baroma, o ile a qotsa mantsoe a Joele a boprofeta: “E mong le e mong ea ipiletsang lebitsong la Jehova o tla pholoha.” Joale o ile a beha mabaka: “Ba tla ipiletsa joang ho eo ba sa behang tumelo ho eena? Hape, ba tla beha tumelo joang ho eo ba e-s’o utloele ka eena? Hape, ba tla utloa joang ha ho se ea bolelang?” (Baroma 10:13, 14) E, batho ba bang ba bangata bao ho fihlela hona joale ba e-s’o tsebe Jehova, ho hlokahala hore ba ipiletse lebitsong la hae. Ba seng ba ntse ba tseba Jehova ha ba na boikarabelo ba ho bolela feela empa ba boetse ba na le ba ho ikitlaetsa le ba ho ba thusa.
Paradeise ea Moea
14, 15. Batho ba Jehova ba thabela litlhohonolofatso life tsa paradeise hobane ba ipiletsa lebitsong la hae ka tsela e mo thabisang?
14 Ena ke tsela eo ka bobeli batlotsuoa le linku tse ling ba talimang lintho ka eona, ka lebaka leo, Jehova oa ba hlohonolofatsa. ‘Jehova o tla boulela lefatše la hae, ’me o tla hauhela sechaba sa hae.’ (Joele 2:18) Ka 1919, Jehova o ile a bontša cheseho le mohau ho batho ba hae ha a ne a ba tsosolosa ’me a ba khutlisetsa mosebetsing oa hae oa moea. Ka sebele ena ke paradeise ea moea, eo Joele a e hlalositseng hantle ka mantsoe ana: ‘Se tšabe uena lefatše! u thabe, u nyakalle, hobane Jehova o etsa tse kholo! Se tšabeng, lōna liphoofolo tsa naha, hobane makhulo a nahathothe a se a tla ba matala; sefate se tla beha litholoana tsa sona, feie le morara li hlahise monono oa tsona. Le lōna bana ba Sione, thabang, le be le nyakallele ho Jehova, Molimo oa lōna, hobane o tla le nea ea le rutang ho loka, o ea le nesetsa lipula tse kholo, lipula tsa hoetla le tsa selemo; ke eona qalo. Liotlo li tla tlala koro, ho khaphatsehe linkho tse tletseng veine le oli.’—Joele 2:21-24.
15 Ke tlhaloso e hlakileng hakaakang! Matletsetletse a mefuta e meraro ea lijo tsa motheo Iseraeleng—lijo-thollo, oli ea mohloaare le veine—hammoho le mehlape e mengata. Mehleng ea rōna mantsoe ao a boprofeta ka sebele a phethahatsoa ka tsela ea moea. Jehova o re fa lijo tsohle tsa moea tseo re li hlokang. Na kaofela ha rōna ha re thabele matletsetletse a joalo a lijo tseo Molimo a fanang ka tsona? Ka sebele, joalokaha Malakia a boletse esale pele, Molimo oa rōna o ‘thibolotse liphororo tsa leholimo ’me o re tšolletse tlhohonolofatso ka tekanyo e fetisisang.’—Malakia 3:10.
Bofelo ba Tsamaiso ea Lintho
16. (a) Ho tšolloa ha moea oa Jehova ho bontša’ng bakeng sa mehla ea rōna? (b) Bokamoso bo tšoere eng?
16 Ke ka mor’a ho bolela esale pele ka maemo a paradeise a batho ba Molimo moo Joele a profetang ka ho tšolloa ha moea oa Jehova. Ha Petrose a ne a qotsa boprofeta bona ka Pentekonta, o boletse hore bo ne bo phethahatsoa “matsatsing a ho qetela.” (Liketso 2:17) Ho tšolloa ha moea oa Molimo morao koo ho ne ho bolela hore matsatsi a ho qetela a tsamaiso ea lintho ea Sejuda a ne a qalile. Ho tšolleloa ha moea oa Molimo ho Iseraele ea Molimo lekholong la bo20 la lilemo ho bolela hore re phela matsatsing a ho qetela a tsamaiso ea lintho ea lefatše lohle. Ka lebaka leo, bokamoso bo re tšoaretse’ng? Boprofeta ba Joele bo tsoela pele ho re bolella: “Ke tla etsa mehlolo le leholimong le lefatšeng, mali, le mollo, le mouoane oa mosi. Letsatsi le tla fetoha lefifi, le khoeli e fetohe mali, ho e-so ho tle letsatsi la Jehova le leholo, le tšabehang.”—Joele 2:30, 31.
17, 18. (a) Ke letsatsi lefe la Jehova le tšabehang le ileng la tlela Jerusalema? (b) Bonnete ba ho tla ha letsatsi la Jehova le tšabehang bo re susumelletsa ho etsa eng?
17 Ka 66 C.E., mantsoe ana a boprofeta a ile a qala ho phethahala Judea ha liketsahalo li leba ka phehello tlhōrōng ea letsatsi le tšabehang la Jehova ka 70 C.E. Ho ne ho tšosa hakaakang nakong eo ho ba har’a ba neng ba sa phahamise lebitso la Jehova! Kajeno, liketsahalo tse tšosang ka ho tšoanang li larile ka pele, ha Jehova a tla senya tsamaiso ena eohle ea lintho ea lefatše. Leha ho le joalo, ho phonyoha ho ka khoneha. Boprofeta bona bo tsoela pele ho re: “Ho tla etsahala hore e mong le e mong ea ipiletsang lebitsong la Jehova o tla bolokeha; hobane Thabeng ea Sione le Jerusalema ho tla ba le baphonyohi, feela joalokaha Jehova a boletse, har’a baphonyohi, bao Jehova a ba bitsang.” (Joele 2:32) Ka sebele Lipaki tsa Jehova lia leboha hore ebe li tseba lebitso la Jehova, ’me li na le tšepo e feletseng ea hore o tla li boloka ha li ipiletsa ho eena.
18 Leha ho le joalo, ho tla etsahala eng ha letsatsi la Jehova le leholo le khanyang haholo le fihla lefatšeng lee ka bohale bohle ba lona? Sena se tla tšohloa sehloohong sa ho qetela.
Na U sa Hopola?
◻ Ke neng ha Jehova a tšollela moea oa hae bathong ba hae ka lekhetlo la pele?
◻ Lintho tse ling tse amehang tabeng ea ho ipiletsa lebitsong la Jehova ke life?
◻ Letsatsi la Jehova le leholo le le khanyang haholo le ile la tlela Iseraele ea nama neng?
◻ Kajeno Jehova o hlohonolofatsa ba ipiletsang lebitsong la hae joang?
[Setšoantšo se leqepheng la 15]
Sechaba se secha se ile sa tsoaloa ka Pentekonta ea 33 C.E.
[Setšoantšo se leqepheng la 16, 17]
Pejana lekholong lena la lilemo, Jehova o ile a boela a tšollela moea oa hae bathong ba hae phethahatsong ea Joele 2:28, 29
[Setšoantšo se leqepheng la 18]
Batho ba lokela ho thusoa ho ipiletsa lebitsong la Jehova