Hopola Letsatsi la Jehova ka Mehla

“Le haufi letsatsi la Jehova, le tla ba teng khohlong ea kahlolo.”—JOELE 3:14.

 1. Ke hobane’ng ha ntoa e halalelang e tlang e boletsoeng ke Jehova e tla fapana le lintoa tse “halalelang” tsa batho?

“LŌNA batho, phatlalatsang sena har’a lichaba, ‘Halaletsang ntoa!’” (Joele 3:9, NW) Na see se bolela ntoa e halalelang? Ha re hetla morao nakong ea Lintoa tsa Bokreste, lintoa tsa bolumeli, le lintoa tse peli tsa lefatše—tseo Bokreste-’mōtoana bo phethileng karolo e ka sehloohong ho tsona—re ka ’na ra tšoha ha ho buuoa ka seo ho thoeng ke ntoa e “halalelang.” Leha ho le joalo, ntoa e halalelang ea boprofeta ba Joele hase ntoa ea lichaba. Hase ntoa e tletseng lehloeo bakeng sa naha kapa maruo, eo ho eona ho sebelisoang kofuto ea bolumeli. Ke ntoa ea ho loka. Ke ntoa ea Molimo ea ho tlosa meharo, likhohlano, tšilafalo, le khatello lefatšeng. E tla tlosa qoso bobusing bo loketseng ba Jehova holim’a libōpuoa tsa hae tsohle. Ntoa eo e tla betla tsela bakeng sa hore ’Muso oa Kreste o kenye batho Lilemong tse Sekete tsa khotso, nala, le thabo bokahohleng tseo baprofeta ba Molimo ba li boletseng esale pele.—Pesaleme ea 37:9-11; Esaia 65:17, 18; Tšenolo 20:6.

2, 3. (a) “Letsatsi la Jehova” le profetiloeng ho Joele 3:14 ke eng? (b) Ke hobane’ng ha lichaba li tšoaneloa ke seo li tla tobana le sona letsatsing leo?

² Ka hona, “letsatsi la Jehova” le boletsoeng esale pele ho Joele 3:14 ke eng? Jehova ka boeena o re: “Jo! letsatsi! hobane le haufi letsatsi la Jehova, le tla joale ka tšenyeho e tsoang ho Ea matla ’ohle.” Ke joang le tlang joaloka tšenyeho? Hamorao moprofeta oa hlalosa: “Matšoele, matšoele a teng a lehlana-hlana khohlong ea kahlolo! hobane le haufi letsatsi la Jehova, le tla ba teng khohlong ea kahlolo.” (Joele 1:15; 3:14) Lena ke letsatsi leo ka lona Jehova a tlang ho phethahatsa qeto ea hae ea boahloli holim’a matšoele a batho ba sa tšabeng Molimo ba hanang bobusi ba hae bo loketseng holim’a leholimo le lefatše. Ke qeto ea Jehova ea ho senya tsamaiso ea lintho ea bosatane e ’nileng ea tšoasa batho ka nako e telele hakana.—Jeremia 17:5-7; 25:31-33.

³ Tsamaiso e silafetseng e leng lefatšeng e tlameha ho tobana le qeto eo. Empa na tsamaiso ea lefatše e hlile e mpe hakaalo? Ho talima tlaleho e le ’ngoe ea eona ho tla be ho lekane! Jesu o boletse molao-motheo ona ho Mattheu 7:16: “Le tla ba tseba ka ho bea ha bona.” Na metse e meholo ea lefatše ha ea fetoha lilao tsa lithethefatsi, tlōlo ea molao, botšosi, boitšoaro bo bobe, le tšilafalo? Linaheng tse ngata tokoloho e sa tsoa fumaneha e rusolloa ke pherekano ea lipolotiki, khaello ea lijo, bofuma. Batho ba fetang billione ba phela ka tlala. Ho phaella moo, seoa sa AIDS, se ntšetsoang pele ke lithethefatsi le mekhoa e hlephileng ea bophelo, se soketse karolo e khōlō ea lefatše. Haholo-holo ho tloha ha Ntoa ea I ea Lefatše e qhoma ka 1914, litšobotsi tsohle tsa bophelo lefatšeng ka bophara li ’nile tsa hlepha.—Bapisa le 2 Timothea 3:1-5.

 4. Jehova o qholotsa lichaba ka phephetso efe?

⁴ Leha ho le joalo, har’a lichaba tsohle Jehova o ’nile a bokella batho bao ka thabo ba amohelang taeo e amanang le litsela tsa hae ’me ba tsamaea litseleng tsa hae. Batho bana ba leng lefatšeng ka bophara ba tehile mehoma ka lisabole tsa bona, ba lahlile litsela tse mabifi tsa lefatše. (Esaia 2:2-4) E, ba tehile mehoma ka lisabole! Empa na hoo ha ho khahlanong le mohoo oo Jehova a etsang hore o phatlalatsoe ho Joele 3:9, 10? (NW) E baleha tjena: “Lōna batho, phatlalatsang sena har’a lichaba, ‘Halaletsang ntoa! Tsosang banna ba matla! A ba ke ba atamele! Bahlabani bohle a ba ke ba nyolohe! Tehang lisabole ka mehoma ea lōna ’me le tehe marumo ka lisekele tsa lōna.’” Jo, joale Jehova o phephetsa babusi ba lefatše hore ba tlise mabotho a bona a hlometseng a ikopantseng hore a tl’o mo loantša ka Harmagedone. Empa ba ke ke ba atleha! Ba tla rapalatsoa ka tlhōlo e felletseng!—Tšenolo 16:16.

 5. Phello e tla ba efe ha “merara ea lefatše” e kotuloa?

⁵ Ka ho nyefola ’Musi Morena Jehova, babusi ba matla ba entse pokello ea libetsa tse tšosang—empa e tla ba tsa lefeela! Jehova o fana ka taelo ho Joele 3:13: “Akhelang sekele, hobane mabele a butsoitse. Tlong, le hate, hobane sehatelo se tletse, linkho li bile lia khaphatseha; hobane bolotsana ba bona bo boholo.” Mantsoe ao a tšoana le se boletsoeng ho Tšenolo 14:18-20, moo lengeloi le nang le sekele e bohale le laeloang hore le “khe merara ea lefatše, hobane litholoana tsa eona li butsoitse.” Lengeloi le akhela sekele e bohale ’me le lahlela lichaba tseo tse nyefolang “sehatelong se seholo sa bohale ba Molimo.” Ka tšoantšetso, mali a tsoa sehatelong ’me a phahama ho fihla litomong tsa lipere, sebaka se lekanang le listadia tse 1 600—hoo e ka bang lik’hilomithara tse 300! Eo ke tebello e tšosang hakaakang ho lichaba tse hlomphollang Jehova!

Baahi ba Utloang Molao

 6. Lipaki tsa Jehova li talima lichaba le babusi ba tsona joang?

⁶ Na see se bolela hore Lipaki tsa Jehova ha li hlomphe lichaba le babusi ba tsona? Le hanyenyane! Li mpa feela li nyatsa tšilafalo eo bohle ba e bonang ka ho hlaka, ’me li lemosa ka letsatsi la Jehova le atamelang ka potlako la ho phethahatsa qeto ea hae. Ka nako e tšoanang, ka boikokobetso li utloa taelo ea moapostola Pauluse e ho Ba-Roma 13:1, (NW): “Sephefumolohi se seng le se seng a se ke se ikokobeletse balaoli ba phahameng.” Li fana ka tlhompho e loketseng ho babusi bana, empa e seng borapeli. Joaloka baahi ba utloang molao, li latela litekanyetso tsa Bibele tsa botšepehi, ho bua ’nete, le bohloeki ’me li haha boitšoaro bo botle malapeng a tsona. Li thusa ba bang ho ithuta kamoo le bona ba ka finyellang sena ka teng. Li phela ka khotso le batho bohle, ha li kenelle lipontšong tsa ho nyatsa kapa liphetohelong tsa lipolotiki. Lipaki tsa Jehova li batla ho beha mohlala o motle ka ho utloa melao ea balaoli ba phahameng ba batho, ha li ntse li emetse hore Molaoli ea Phahameng ka ho Fetisisa, ’Musi Morena Jehova, a khutlisetse khotso e phethahetseng le puso e lokileng lefatšeng lena.

O Phethahatsa Qeto ea Hae

7, 8. (a) Lichaba li tla sisinngoa ’me li apareloe ke lefifi ka tsela efe? (b) Joele o tšoantšetsa bo-mang kajeno, ’me ba hlohonolofalitsoe joang ho fapana le lefatše ka bophara?

⁷ Ka puo e matla ea tšoantšetso, Jehova o fana ka tlhaloso ena e eketsehileng ea ho phethahatsoa ha qeto ea hae: “Letsatsi le khoeli lia fifala, le linaleli li honyetsa phatsimo ea tsona. Jehova o tla rora Sione, a utloahatse lentsoe la hae a le Jerusalema, ho be ho thothomele leholimo le lefatše. Empa Jehova ke setšabelo ho sechaba sa hae, ke qhobosheane ho bara ba Iseraele.” (Joele 3:15, 16) Boemo ba batho boo ho bonahalang eka boa khanya ebile bo atlehile bo tla fifala, bo bontše tsietsi, ’me tsamaiso ena ea lefatše e ntseng e e-ba litsekana e tla sisinngoa hore e se hlole e e-ba teng, e tla timetsoa joalokaha eka ke ka tšisinyeho e khōlō ea lefatše!—Haggai 2:20-22.

⁸ Hlokomela tiiso e thabisang ea hore Jehova e tla ba setšabelo le qhobosheane ho batho ba hae! Hobane’ng? Hobane ke bona feela batho—batho ba lichaba tsohle—ba arabetseng mantsoeng a Jehova: “Le tla tseba hobane ke ’na Jehova ke leng Molimo oa lōna.” (Joele 3:17) Kaha lebitso la Joele le bolela hore “Jehova ke Molimo,” ka nepo o tšoantšetsa Lipaki tsa Jehova tse tlotsitsoeng mehleng ea kajeno, tse sebeletsang ka sebete ho phatlalatsa bobusi ba Jehova. (Bapisa le Malakia 1:11.) Ha re phetla mantsoe a qalang a boprofeta ba Joele, re tla fumana kamoo a bolelang ka matla ka teng esale pele mosebetsi oa batho ba Molimo kajeno.

Lekhotla la Litsie

9, 10. (a) Ke kotlo efe eo Joele a e boletseng esale pele? (b) Tšenolo e thoholetsa boprofeta ba Joele ba kotlo joang, ’me kotlo ee e ba le phello efe ho Bokreste-’mōtoana?

⁹ Joale mamela “lentsoe la Jehova le neng le tlele Joele”: “Utloang taba ena, lōna maqheku; le sekehe litsebe, lōna bohle baahi ba lefatše. Na taba e joalo e se e kile ea e-ba teng mehleng ea lōna le mehleng ea bo-ntat’a lōna? Le e bolelle bara ba lōna, bara ba lōna ba e bolelle bara ba bona, le bara ba bona ba e bolelle moloko o tlang. Se siiloeng ke bookholane, se jeloe ke tsie; se siiloeng ke tsie se jeloe ke marutle; se siiloeng ke marutle, seongoane se se jele.”—Joele 1:1-4.

¹⁰ Ena ke phutuho e sa tloaelehang, e tlang ho hopoloa ka linako tsohle. Likokoanyana tse ngata-ngata, haholo-holo litsie, li senya naha. See se bolela eng? Tšenolo 9:1-12 le eona e bua ka kotlo ea litsie, e rometsoeng ke Jehova a sebelisa ‘morena, lengeloi la sekoti,’ e leng Kreste Jesu. Mabitso a hae Abaddone (Seheberu) le Apollyone (Segerike) a bolela “Tšenyo” le “Mosenyi.” Litsie tsena li tšoantšetsa masala a tlotsitsoeng a Bakreste ao joale a seng a le letsatsing la Morena, a eang ho ea senya makhulo a Bokreste-’mōtoana ka ho pepesa bolumeli ba bohata ka ho felletseng le ho bolela phetetso ea Jehova holim’a bona.

11. Litsie tsa kajeno li tšehelitsoe joang, ’me ke bo-mang ka ho khetheha ba hlaseloang ke tsona?

¹¹ Joalokaha ho bontšitsoe ho Tšenolo 9:13-21, kotlo ea litsie e lateloa ke kotlo e khōlō ea mabotho a hlometseng. Sena ke ’nete hakaakang kajeno, ha Bakreste ba tlotsitsoeng ba likete tse seng kae ba setseng ba tšehelitsoe ke “linku tse ling” tse fetang limillione tse ’nè ’me hammoho ba bōpa lebotho le ke keng la thijoa la ba kalletseng! (Johanne 10:16) Ba kopane ho boleleng likahlolo tsa Jehova tse hlabang holim’a ba etsang Bokreste-’mōtoana molingoana le holim’a ba ‘sa bakeleng lipolao tsa bona kapa mekhoa ea bona ea ho sebelisana le meea kapa bohlola ba bona kapa bosholu ba bona.’ Baruti—ba K’hatholike le ba Prostanta—ba ’nileng ba tšehetsa ka mafolo-folo lintoa tse tšollang mali tsa lekholo lena la lilemo, hammoho le baruti ba hleka-hlekang bana ka likamano tsa botona le botšehali le baboleli ba hlephileng boitšoarong ba TV, ba har’a bao melaetsa ena ea kahlolo e lebisitsoeng ho bona.

12. Ke hobane’ng ha baeta-pele ba Bokreste-’mōtoana ba tšoanela ho amohela melaetsa ea kahlolo, ’me haufinyane ho tla etsahala eng ka bona hammoho le litho tsohle tsa Babylona e Moholo?

¹² Jehova o hoeletsa “bahlomphehi” ba joalo ba baruti ba hlephileng boitšoarong: “Tsohang, matahoa, le lle; le bokolle, lōna bohle ba noang veine, ka baka la veine e ncha, hobane e tlositsoe melomong ea lōna.” (Joele 1:5) Lekholong lena la bo20 la lilemo, bolumeli ba Bokreste-’mōtoana bo lahlile melao-motheo e hloekileng ea boitšoaro ea Lentsoe la Molimo ’me ba amohela boitšoaro ba lefatše ba ho iketsetsa bōrata. Ho amohela litsela tsa lefatše ho ’nile ha bonahala ho le monate ho bolumeli ba bohata le litho tsa bona tsa likereke, empa bo kotutse maloetse a makaakang a moea le a sebele! Haufinyane, joalokaha ho hlalositsoe ho Tšenolo 17:16, 17, e tla ba “morero” oa Molimo hore mebuso ea lipolotiki e hlasele ’muso ’ohle oa lefatše oa bolumeli ba bohata, Babylona e Moholo, ’me e o felise. Nakong eo, ha o bona qeto ea Jehova e phethahatsoa holim’a oona, ke hona o tla ‘hlaphoheloa’ botahoeng ba oona.

“Sechaba se Seholo, se Matla”

13. Lekhotla la litsie le bonahala ‘le le leholo le bile le le matla’ joang ho Bokreste-’mōtoana?

¹³ Moprofeta oa Jehova o tsoela pele ho hlalosa lekhotla la litsie e le “sechaba se seholo, se matla,” ’me le ho Babylona e Moholo le bonahala joalo. (Joele 2:2) Ka mohlala, baruti ba eona ba llisoa ke hore ebe malumeli a Bokreste-’mōtoana a hlōlehile ho sokolla Mabudda Japane. Leha ho le joalo, kajeno, Lipaki tsa Jehova tsa Majapane tse fetang 160 000 li ngata haholo naheng eo ’me li khanna lithuto tsa Bibele malapeng a batho ba fetang 200 000. Italy Lipaki tsa Jehova tse 180 000 joale li nkoa e le tsona tse latelang Mak’hatholike ka bongata. Moruti e mong oa Roma e K’hatholike e Italy o ile a llisoa ke hore ebe Lipaki tsa Jehova li ntša ‘bonyane Mak’hatholike a tšepahalang a 10-000’ kerekeng selemo le selemo empa hoo ha hoa thusa letho.a Lipaki li thabela ho amohela batho ba joalo.—Esaia 60:8, 22.

14, 15. Joele o hlalosa lekhotla la litsie joang, ’me see se phethahetse ka tsela efe kajeno?

¹⁴ Ha e hlalosa lekhotla la litsie tsa Lipaki tse tlotsitsoeng, Joele 2:7-9 e re: “Ba matha joale ka linatla, ba hloella lerako joale ka banna ba ntoa; e mong le e mong o ea ka tsela ea hae, ha ba fapanyetsane litsela. Ha ba sututsane, e mong le e mong o ea ka tsela ea hae, ba itihela har’a libetsa, ’me ha ba hlajoe. Ba matha le motse, ba titima holim’a lerako, ba hloella matlung, ba kena ka lifenstere joale ka lesholu.”

¹⁵ Ka sebele, ke setšoantšo se hlakileng sa lebotho la “litsie” tse tlotsitsoeng, leo joale le kopaneng le metsoalle e fetang limillione tse ’nè, ea linku tse ling! Ha ho “lerako” la lehloeo la bolumeli le ka le sitisang. Ka sebete, le ‘tsoela pele le tsamaea ka tlhophiso ka mokhoa ona o tšoanang’ oa ho paka phatlalatsa le mesebetsi e meng ea Bokreste. (Bapisa le Ba-Filippi 3:16.) Ho fapana le ho sekisetsa, le ’nile la ikemisetsa ho tobana le lefu, joaloka Lipaki tse likete tse ileng tsa ‘bolaoa ka libetsa’ hobane li hana ho thoholetsa Hitler oa Mok’hatholike oa Jeremane ea Bonazi. Lekhotla la litsie le fane ka bopaki bo phethahetseng ‘motseng’ oa Bokreste-’mōtoana, le hlōtse litšitiso tsohle, la nyenyelepa joaloka lesholu ha le kena ka matlung ha le ntse le aba lingoliloeng tsa Bibele tse libillione mosebetsing oa lona oa ntlo le ntlo. Ke thato ea Jehova hore bopaki bona bo fanoe, ’me ha ho matla a leng leholimong kapa lefatšeng a ka bo thibelang.—Esaia 55:11.

“Ba Tlala Moea o Halalelang”

16, 17. (a) Mantsoe a Joele 2:28, 29 a phethahetse neng ka ho ikhethang? (b) Ke mantsoe afe a Joele a boprofeta a sa kang a phethahala ka ho felletseng lekholong la pele la lilemo?

¹⁶ Jehova o bolella Lipaki tsa hae: “Le tla tseba hobane ke har’a Iseraele [oa moea], le hoba ’na, Jehova, ke Molimo oa lōna, ’me ha ho e mong.” (Joele 2:27) Batho ba hae ba ile ba latsoa phethahatso ena e hlollang ha Jehova a qala ho phethahatsa mantsoe a hae a ho Joele 2:28, 29: “Ke tla tšollela moea oa ka holim’a nama eohle, ho be ho profete bara ba lōna le barali ba lōna.” Sena se etsahetse ka Pentekonta ea 33 C.E., ha barutuoa ba Jesu ba phuthehileng ba tlotsoa ’me “bohle ba tlala Moea o Halalelang.” Ka matla a moea o halalelang, ba ile ba bolela, ’me letsatsing le le leng feela, ‘ho ile ha eketsoa ba ka bang likete tse tharo.’—Liketso 2:4, 16, 17, 41.

¹⁷ Ketsahalong eo e thabisang, Petrose le eena o ile a qotsa Joele 2:30-32: “Ke tla etsa mehlolo leholimong le lefatšeng, mali, le mollo, le mouoane oa mosi. Letsatsi le tla fetoha lefifi, le khoeli e fetohe mali, ho e-so ho tle letsatsi la Jehova le leholo, le tšabehang; ’me ho tla bolokeha e mong le e mong ea rapelang lebitso la Jehova.” Mantsoe ao a ile a phethahala ka karolo e itseng ha Jerusalema e timetsoa ka 70 C.E.

18. Phethahatso e khōloanyane ea Joele 2:28, 29 e qalile ho etsahala neng?

¹⁸ Leha ho le joalo, Joele 2:28-32 e ne e tla sebetsa ka ho eketsehileng. Ha e le hantle, boprofeta bona bo phethahetse ka tsela e hlollang ho tloha ka September 1919. Nakong eo ho ile ha tšoaroa kopano e ikhethang ea batho ba Jehova Cedar Point, Ohio, U.S.A. Moea oa Molimo o ile oa bonahala ka ho hlaka, ’me bahlanka ba oona ba tlotsitsoeng ba ile ba susumelletseha ho qalisa phutuho ea lefatše ka bophara e pholletsang ho tla fihlela kajeno. Ho bile le keketseho e hlollang hakaakang! Batho ba fetang 7 000 ba bileng teng kopanong eo ea Cedar Point ba eketsehile ho fihla ho kakaretso ea ba 10 650 158 ba bileng teng Sehopotsong sa lefu la Jesu ka March 30, 1991. Ho bana, ke ba 8 850 feela ba ipoletseng e le Bakreste ba tlotsitsoeng. Kaofela ha bona ba bile le thabo e khōlō hakaakang ha ba bona litholoana tsa lefatše ka bophara tse tlisitsoeng ke moea oa Jehova o matla!—Esaia 40:29, 31.

19. Ka baka la ho atamela ha letsatsi la Jehova, e mong le e mong oa rōna o lokela ho ba le boikutlo bofe?

¹⁹ Ka pele ho larile “letsatsi la Jehova le leholo, le tšabehang” le tlang ho timetsa tsamaiso ea Satane ea lintho. (Joele 2:31) Ka thabo, “e mong le e mong ea tla rapela lebitso la Morena [“Jehova,” NW] o tla bolokeha.” (Liketso 2:21) Joang? Moapostola Petrose o re bolella hore “letsatsi la Morena [“Jehova,” NW] lona le tla tla ka mokhoa oa lesholu” ’me oa phaella: “Ha e le moo ntho tseo tsohle li abetsoe ho felisoa, e ka khona le be batho ba matla hakakang liketsong tse halalelang tsa borapeli; le ntse le lebeletse ’me le akofisa [“le hopola ka mehla,” NW] ho tla ha letsatsi la Molimo.” Ha re lula re hopotse hore letsatsi la Jehova le haufi, re tla boela re thabela ho bona ho phethahala ha tšepiso ea Jehova ea “maholimo a macha le lefatše le lecha” la ho loka.—2 Petrose 3:10-13.

[Mongolo o botlaaseng ba leqephe]

Na U ka Hlalosa?

◻ “Letsatsi la Jehova” ke eng?

◻ ‘Merara ea lefatše’ e tla kotuloa joang, hona hobane’ng?

◻ Kotlo ea litsie e ’nile ea hlokofatsa Bokreste-’mōtoana joang ho tloha ka 1919?

◻ Moea oa Jehova o ile oa tšolloa joang holim’a batho ba hae ka 33 C.E., hape le ka 1919?