Khaolo ea Leshome le Metso e Mene

Ho Tšolleloa “Tlhohonolofatso ho Fihlela ho se ho se Letho le Hlokoang”

1, 2. (a) Lintho tse molemo tseo e mong le e mong oa rōna a ka ikhethelang tsona ke life? (b) Ke ho phethahala ha boprofeta bofe ho amang litlhohonolofatso tseo re ka li thabelang?

RE PHELA nakong ea kahlolo le ea tlhohonolofatso. Ke nako eo ka eona bolumeli bo ntseng bo felloa ke matla le eo ka eona borapeli ba ’nete bo ntseng bo tsosolosoa. Ha ho pelaelo hore u labalabela ho fumana tlhohonolofatso hammoho le melemo e teng hona joale le e tla ba teng nakong e tlang e tlisoang ke ho tsosolosoa ha borapeli ba ’nete! Empa u ka kholiseha joang hore u tla fumana melemo ee? Karabo ea potso ena e ama boprofeta boo karolo ea bona e khōlō e ileng ea phethahala hang ka mor’a hore ‘matsatsi a ho qetela’ a qale ka 1914. (2 Timothea 3:1) Malakia o ile a bolela sena esale pele: “‘Ho tla tla Morena oa ’nete [Jehova] tempeleng ea Hae, eo le mo batlang, le lenģosa la selekane leo le le thabelang. Bonang! Ka sebele o tla tla,’ ho boletse Jehova oa mabotho.”—Malakia 3:1.

² Boprofeta bona boo e leng ba bohlokoa bophelong ba hao, bo hlaha bukeng ea ho qetela libukeng tse 12 tsa boprofeta. Ha re lihela likhala bukeng ena, re lokela ho ela molaetsa oa Malakia hloko. Buka ea hae e tšoere thuto ea bohlokoa e ka etsang hore uena hammoho le bahlanka ba bang ba Jehova le fumane “tlhohonolofatso ho fihlela ho se ho se letho le hlokoang.” (Malakia 3:10) A re ke re hlahlobeng ka hloko khaolo ea 3 ea buka ea Malakia.

NAKO EA HO HLOEKISOA MOEENG

 3. Ho ile ha etsahala eng sechabeng sa Molimo sa boholo-holo e ileng ea etsa hore ho khethoe “Iseraele ea Molimo”?

³ Lilemo tse ka bang makholo a mahlano ka mor’a mehla ea Malakia, Jehova, ea neng a emetsoe ke Kreste (“lenģosa [la Molimo] la selekane [sa Abrahama]”), o ile a tla tempeleng ea sebele e Jerusalema ho ea ahlola sechaba sa hae se keneng selekaneng le Eena. Ka kakaretso, sechaba seo se ne se bontšitse hore se ne se sa tšoanelehe hore Jehova a tsoele pele ho se hauhela, kahoo o ile a se lahla. (Matheu 23:37, 38) Se ileng sa etsahala ka 70 C.E. ke bopaki ba sena. Hape ha ho potang hore Molimo o khethile hore se nkeloe sebaka ke “Iseraele ea Molimo,” e leng sechaba sa moea sa ba 144 000 ba nkiloeng lichabeng tsohle. (Bagalata 6:16; Baroma 3:25, 26) Leha ho le joalo, ho phethahala ha boprofeta ba Malakia ha hoa ka ha fella ka nako eo. Ho e-na le hoo, bo ne bo tla boela bo phethahala mehleng ea kajeno ebile bo amana ka ho toba le tšepo ea hao ea ho fumana “tlhohonolofatso ho fihlela ho se ho se letho le hlokoang” nakong e tlang.

 4. Ke potso efe e neng e lokela ho arajoa ka mor’a hore Jesu a behoe boreneng ka 1914?

⁴ Ho phethahala ha boprofeta ba Bibele ho tiisa hore ka 1914 Jesu Kreste o ile a hlomamisoa e le Morena oa ’Muso oa Jehova o leholimong. Joale ho ile ha fihla nako ea hore Jesu a tsebahatse sehlopha sa Bakreste ba tšoanelehang hore Molimo a ba amohele. Ke bo-mang ba neng ba tla fumanoa ba hloekile moeeng ha ba lekoa? U ka fumana karabo mantsoeng a Malakia a reng: “Ke mang ea tla mamella letsatsi la ho tla ha hae, ’me ke mang ea tla ema ha a hlaha? Etsoe o tla ba joaloka mollo oa mohloekisi.” (Malakia 3:2) Jehova o ile a tla neng ‘tempeleng’ ea hae ho tla ahlola, hona o ile a tla joang?

5, 6. (a) Ha Jehova a tlil’o hlahloba tempele ea hae ea moea, o ile a fumana boemo bo le joang har’a batho ba ipolelang hore ke barapeli ba hae? (b) Bahlanka ba Molimo ba tlotsitsoeng ka moea ba ne ba lokela hore ba etsoe’ng?

⁵ Ho totobetse hore Molimo ha aa ka a tla tempeleng e entsoeng ka majoe le seretse. Tempele ea sebele ea ho qetela e joalo ea borapeli ba ’nete e ile ea felisoa ka 70 C.E. Ho e-na le ho tla tempeleng ea sebele, Jehova o ile a tla tempeleng ea moea, e leng tokisetso eo batho ba ka mo atamelang ka eona le eo ba ka mo rapelang ka eona, e thehiloeng sehlabelong sa Jesu sa thekollo. (Baheberu 9:2-10, 23-28) Ka sebele likereke tsa Bokreste-’mōtoana e ne e se tempele eo ea moea, kaha e ne e le karolo ea tsamaiso ea bolumeli e molato oa mali le bofebe ba moea, e neng e khothalletsa lithuto tsa bohata ho e-na le borapeli bo hloekileng. Jehova e ile ea e-ba “paki e potlakang khahlanong le” batho ba joalo, ’me le uena ua tseba hore kahlolo ea hae e boima e ne e loketse. (Malakia 3:5) Leha ho le joalo, ha ’Muso oa Molimo o qeta ho hlongoa, ho ile ha e-ba le sehlopha sa Bakreste ba ’nete ba neng ba sebeletsa mabaleng a tempele ea Molimo ea moea ba ileng ba bontša hore baa tšepahala ho Molimo le har’a liteko tse boima. Leha ho le joalo, esita le batlotsuoa bao ba ne ba lokela ho hloekisoa. Libuka tsa baprofeta ba 12 li ile tsa bua ka tlhoekiso e joalo, kaha li na le litšepiso tse thabisang tsa ho tsosolosoa nameng le moeeng har’a bahlanka ba Molimo. Malakia o ile a bolela esale pele hore ho ne ho tla ba le batho bao Jehova a neng a tla ba “tšeka joaloka khauta le joaloka silevera.” “Ka sebele ho Jehova [e ne] e tla ba batho ba hlahisang nyehelo ea mpho ka ho loka.”—Malakia 3:3.

⁶ Ho latela bopaki bo bongata bo teng, ho tloha ka 1918 ho ea pele Jehova o ile a hloekisa Bakreste ba tlotsitsoeng moo ho neng ho hlokahala hore ba hloekisoe teng, a tlosa litšila tsohle borapeling ba bona, mekhoeng ea bona le lithutong tsa bona.a Bona hammoho le “bongata bo boholo” boo hamorao bo ileng ba ikopanya le bona, ba ruile molemo o moholo. (Tšenolo 7:9) E le sehlopha se kopaneng, ba tsoela pele ho fana ka “nyehelo ea mpho ka ho loka” e leng nyehelo “e khahlisang ho Jehova.”—Malakia 3:3, 4.

 7. Ke eng seo ka nepo re ka ipotsang sona mabapi le boemo ba rōna ka pel’a Molimo?

⁷ Batho ba Molimo kaofela e le sehlopha baa hloekisoa, empa ho thoe’ng ka rōna re le batho ka bomong? U ka ’na ua ipotsa: ‘Na ebe ke sa na le maikutlo le mekhoanyana e ntseng e lokela ho hloekisoa? Na ho sa ntsane ho hlokahala hore ke hloekise boitšoaro ba ka feela joalokaha Jehova a ile a hloekisa batlotsuoa ba hae?’ Pejana re bone hore baprofeta ba 12 ba ile ba totobatsa maikutlo a fosahetseng le boitšoaro bo fosahetseng ba ba ba totobatsa litšobotsi le liketso tse ntle. Sena se u thusitse hore u tsebe seo Jehova ‘a se batlang ho uena.’ (Mikea 6:8) Hlokomela mantsoe a reng “ho uena.” Sena se totobatsa hore na ke hobane’ng ha ho hlokahala hore e mong le e mong oa rōna a itekole e le hore a bone hore na ho sa ntsane ho hlokahala hore a itlhoekise haholoanyane.

“KA KŌPO, NTEKENG”

 8. Jehova o memetse batho ba hae hore ba etse’ng?

⁸ Nahana ka seo Jehova a tsoelang pele ho se bolela ha a sebelisa Malakia, khaolong ea 3, temaneng ea 10. Moo u tla fumana memo ena e mofuthu: “‘Tlisang likarolo tsohle tsa leshome ka tlung ea polokelo, hore ho be le lijo ka tlung ea ka; ka kōpo, ntekeng tabeng ena,’ ho boletse Jehova oa mabotho, ‘hore na ebe nke ke ka le bulela likhoro tsa moroallo tsa maholimo ’me ke le tšollele tlhohonolofatso ho fihlela ho se ho se letho le hlokoang.’” Batho ba Molimo ka kakaretso ba memeloa hore ba etse sena. Na ua hlokomela hore le uena ua mengoa?

 9. Linyehelo le likarolo tsa leshome tseo u ka nehelanang ka tsona ho Jehova ke life?

⁹ U ka fa Jehova ‘likarolo tsa leshome’ joang? Ho hlakile hore ha ua tlameha ho fana ka linyehelo tsa sebele le likarolo tsa leshome, joalokaha ho ne ho boletsoe Molaong. Hona joale seo Molimo a se lebeletseng ke mahlabelo a moea. Joalokaha ho tšohliloe khaolong e fetileng, Pauluse o ile a hlalosa mosebetsi oa hao oa ho fana ka bopaki e le nyehelo. (Hosea 14:2) Ka mor’a moo, moapostola enoa o ile a bua ka mofuta o mong oa sehlabelo, ha a ngola a re: “Le se ke la lebala ho etsa se molemo le ho arolelana lintho [tse bonahalang] le ba bang, kaha Molimo o khahlisoa ke mahlabelo a joalo.” (Baheberu 13:15, 16) Kahoo, ho hlakile hore ‘likarolo tsa leshome’ tse boletsoeng ho Malakia 3:10 li emela linyehelo tsa moea le tsa lintho tse bonahalang. Joaloka Mokreste ea kolobelitsoeng, u inehetse ka ho feletseng ho Jehova, empa karolo ea hao ea leshome e emela tse ling tsa lintho tsa hao tseo u ka li tlisang ho Jehova, kapa tseo u li sebelisang ha u mo sebeletsa. Li akarelletsa nako, matla, matlotlo le menehelo ea lintho tse bonahalang tseo u nehelanang ka tsona ha u sebeletsa Jehova.

10. U ka ‘leka’ Jehova ka tsela e loketseng joang?

¹⁰ Ke ho babatsehang hakaakang ha u nehelana ka likarolo tse joalo tsa leshome ho Jehova ka boinehelo le lerato! Ho boetse ho hlokahala hore u etse sena ka potlako. Ua hlokomela hore letsatsi le leholo la Jehova le atamela ka potlako le hore le “tšosa haholo.” (Joele 2:1, 2, 11) Bophelo bo kotsing. Seo Molimo a u memelang ho se etsa ke seo u ka se khonang. Jehova o re u mo ‘leke.’ Ke ’nete hore ha ho na motho le ea mong ea tlaase ea ka itetang sefuba ho leka Jehova joalokaha eka ha A tšepahale. (Baheberu 3:8-10) Empa ka boikokobetso u ka mo leka ka tsela e loketseng. Joang? O tšepisitse hore o tla u hlohonolofatsa. Ha u mo mamela, u leka Molimo; ho joalokaha eka ua botsa, ‘Na o tla ntlhohonolofatsa?’ ’Me eena o itlama hore o tla etsa joalo, o tla boloka tšepiso ea hae. Kahoo, taba ea hore ebe Molimo o u lumella hore u mo ‘leke,’ e tla u kholisa haholoanyane hore o tla u hlohonolofatsa ka ho enneng.

11, 12. Ke lintho life tseo u iponetseng tsona tse bontšang hore Jehova o hlohonolofatsa batho ba hae?

¹¹ U ka bona hore batho ba Jehova ba entse linyehelo tse ngata tsa lintho tse bonahalang le mahlabelo a moea. ’Me Jehova o tšolotse “tlhohonolofatso ho fihlela ho se ho se letho le hlokoang.” Mohlomong u bone ha batho ba Molimo ba fumana tlhohonolofatso eo, joalokaha seo se bontšoa ke kamoo lenane la Lipaki Tsa Jehova le eketsehileng kateng ho tloha mathoasong a lilemo tsa bo-1900 ho tla fihlela kajeno. Hape u bone hore kutloisiso ea “lintho tse tebileng tsa Molimo” e eketsehile haholo. (1 Bakorinthe 2:10; Liproverbia 4:18) Leha ho le joalo, ak’u talime sena ka leihlo le leng: Ebe uena see se u amme joang?

¹² E ka ’na eaba u kile ua tsamaea kereke, kapa mohlomong u ne u sa tsoa qala ho ba teng libokeng tsa Lipaki Tsa Jehova. Ka nako eo, u ne u utloisisa linnete tsa motheo tse boletsoeng ka Bibeleng hakae? Joale, bapisa seo le seo u ithutileng sona ho tloha ka nako eo le seo u seng u ka khona ho se paka ka Mangolo. Kapa nahana ka lintho tse tebileng tseo u seng u li utloisisa, tse akarelletsang boprofeta bo ntseng bo phethahala hona joale. Hape nahana hore na u se u hatetse pele hakae ntlheng ea ho sebelisa litemana tse itseng tsa Bibele bophelong ba hao. U se u tsoetse pele hakaakang! Ha u nahana ka boemo ba hao, u ka bua joaloka moapostola Petrose, ua re: “Re na le lentsoe la boprofeta le tiisitsoeng haholoanyane.” (2 Petrose 1:19) Ntlha ea bohlokoa ke hore: Uena ka bouena u ‘rutiloe ke Jehova’ ’me u har’a batho ba phelang bophelo ba Bokreste ba ’nete le ba batlang ho sebeletsa Jehova ka ho sa feleng. (Esaia 54:13) Le hona joale u se u ntse u e-na le mabaka a utloahalang ao ka ’ona u ka bolelang hore o u hlohonolofalitse haholo.

LEBITSO LA HAO BUKENG EA BOPHELO

13. Motho a ka etsa joang hore lebitso la hae le ngoloe bukeng ea Molimo ea khopotso?

¹³ U fumana litlhohonolofatso tse eketsehileng tse tsoang ho Jehova tse boletsoeng ho Malakia 3:16 e reng: “Ka nako eo ba tšabang Jehova ba buisana, e mong le e mong le motsoalle oa hae, ’me Jehova a ’na a ela hloko le ho mamela. Buka ea khopotso ea qala ho ngoloa ka pel’a hae bakeng sa ba tšabang Jehova le bakeng sa ba nahanang ka lebitso la hae.” Batlotsuoa le ba bongata bo boholo ba ‘tšaba Jehova’ ka tsela ena e nang le tlhompho. Na ha u ikutloe u le motlotlo ho ba e mong oa Lipaki Tsa Jehova, ho ba karolo ea batho ba thabileng ba nahanang ka lebitso la Jehova le ba le tlotlisang lefatšeng lohle? U lokela ho khotsofala hakaakang ha e le moo u kholisehile hore Jehova o hopola botšepehi ba hao!—Baheberu 6:10.

14. Baprofeta ba 12 ba u thusitse joang hore u bone maikutlo le mekhoa eo Jehova a e hloileng?

¹⁴ Empa, u le motho ka mong, u ka etsa joang hore u tšoanelehe hore lebitso la hao le ngoloe ‘bukeng ea khopotso,’ eo le hona joale e ntseng e ngoloa ka pel’a Jehova? Hopola tse ling tsa likeletso tse bohlale tseo re li fumaneng libukeng tsa baprofeta ba 12. Re ithutile ka boitšoaro, litšobotsi le maikutlo a sa khahliseng Jehova. Ka mohlala, baprofeta ba ile ba re lemosa ka mekhoa eo Molimo a reng e khahlanong le melao ea hae e lokileng le e ka senyang bophelo ba rōna, e kang “boitšoaro bo hlephileng” le “moea oa bohlola.” (Hosea 4:12; 6:9) Molimo o hloile ba sebetsanang ka bolotsana le balekane ba bona kapa ba sebetsanang ka bolotsana le litho tse ling tsa lelapa, ha re atolosa molao-motheo oo. (Malakia 2:15, 16) Jehova o ile a bululela baprofeta hore ba hatise hore ha a thabele pefo ea mofuta ofe kapa ofe. (Amose 3:10) Hape o ile a re ba totobatse hore ho hlokahala hore ba qobe ho hloka toka kapa ho se tšepahale khoebong le litabeng tsa lichelete. (Amose 5:24; Malakia 3:5) Hape libuka tse 12 li ile tsa hatisa kamoo ho leng bohlokoa kateng hore banna ba filoeng boikarabelo ba se ke ba lumella kahlolo ea bona hore e susumetsoe ke leeme kapa boithati.—Mikea 7:3, 4.

15. E meng ea melemo eo u tla e fumana ka ho latela likeletso tsa baprofeta ba 12 ke efe?

¹⁵ Leha ho le joalo, baprofeta ha baa ka ba bua feela ka lintho tseo re lokelang ho li qoba. Ba ile ba totobatsa melemo eo re ka e fumanang ha re boloka melao ea Molimo. Re tla ba le kamano e haufi haholoanyane le Jehova. (Mikea 4:5) Ha ho rena ho loka, phutheho ea habo rōna e tla ba le botsitso ’me e be mafolofolo haholoanyane. Manyalo a rōna a tla tiea haholoanyane le malapa a rōna a momahane haholoanyane, a tšoarehe ka lintho tsa moea. (Hosea 2:19; 11:4) Ha re etsa lintho ka ho loka le ka botšepehi, ba bang ba tla re hlompha. Ha re etsisa mohau oa Jehova, re tla bontša kutloelo-bohloko le mosa o lerato ’me bara le barali babo rōna ba tla re bontša tsona ka ho tšoanang. (Mikea 7:18, 19) E, re tla be re pota-potiloe ke batho ba moea, bara le barali babo rōna ba ratang ’nete le khotso, ’me ka holim’a tsohle, re tla be re le metsoalle ea Jehova. (Zakaria 8:16, 19) Na ha u lumele hore tsee ke litlhohonolofatso tseo u seng u ntse u li thabela?

16. Ke phapang efe e totobetseng kajeno, hona e tla fella ka eng ha letsatsi la Jehova la kahlolo le fihla?

¹⁶ Ka lebaka la seo re sa tsoa se tšohla, ruri ke ’nete hore “phapang pakeng tsa ea lokileng le ea khopo”—pakeng tsa Bakreste ba ’nete le ba bohata—e hlakile haholo ho feta leha e le neng pele. (Malakia 3:18) Re leka ho boloka melao ea Jehova ha lefatše lona le ntse le tetebela haholoanyane qhefeqhefeng ea ho se tšabe Molimo. Ua tseba hore phapang ena e tla bolela lefu kapa bophelo ha “letsatsi le leholo la Jehova” le fihla.—Sofonia 1:14; Matheu 25:46.

17. U ka sebelisa boitsebiso bo bukeng ee joang nakong e tlang?

¹⁷ Kahoo, ho hlakile hore keletso ea baprofeta ba 12 ha e felloe ke nako. Ha u ntse u thulana le mathata kapa u lokela ho etsa liqeto tse itseng, re u khothalletsa hore u hlahlobe boitsebiso bo sebetsang bo boletsoeng likhaolong tsa buka ena. Ka tsela ena u ka bontša hore u lakatsa ho tsoela pele ho rutoa litsela tsa Jehova le ho “tsamaea litseleng tsa hae.” (Mikea 4:2) Leha ho le joalo, ho tsamaea tseleng ena ha ho felle mona feela. U labalabela hore lebitso la hao le ngoloe ka ho sa feleng bukeng ea Jehova ea khopotso, na ha ho joalo? Libuka tsa baprofeta ba 12 li ka u thusa hore u finyelle seo.

TUMELO E ISA POLOKONG

18. Taba ea bohlokoa eo ho hlokahalang hore re e etse e hlahang ho Joele 2:32 ke efe, hona moapostola Pauluse o ile a phaella tabeng eo ka mantsoe afe?

¹⁸ Ha Joele a hatisa ntlha e ka sehloohong e ka etsang hore u lule u amoheloa ke Molimo, o ile a re: “E mong le e mong ea ipiletsang lebitsong la Jehova o tla pholoha.” (Joele 2:32) Baapostola ba babeli, e leng Petrose le Pauluse, ba ile ba qotsa taba ena ea bohlokoa eo ho hlokahalang hore re e etse. (Liketso 2:21; Baroma 10:13) Pauluse o ile a phaella ka tšobotsi e ’ngoe khothatsong eo ha a botsa: “Ba tla ipiletsa joang ho eo ba sa behang tumelo ho eena?” (Baroma 10:14) Ha e le uena, ha ho pelaelo hore u batla ho ipiletsa lebitsong la Jehova le ho bontša tumelo ho eena hona joale le ka ho sa feleng!

19. Ho ipiletsa lebitsong la Jehova ho akarelletsa’ng?

¹⁹ Ho ipiletsa lebitsong la Jehova hase feela ho tseba lebitso la Molimo le ho le sebelisa. (Esaia 1:15) Mantsoe a hlahang ho Joele 2:32 a ile a buuoa ha ho ne ho tšohloa taba e hatisang bohlokoa ba ho baka le ho kholiseha hore Jehova oa tšoarela. (Joele 2:12, 13) Ho ipiletsa lebitsong la Molimo ho bolela hore ka sebele re lokela ho mo tseba, re mo tšepe, re mo mamele ’me re etse hore e be eena ea ka pele-pele bophelong ba rōna. E, ho sebeletsa Jehova e tla ba ntho e ka sehloohong bophelong ba rōna. Ka lebaka leo, re tla phela bophelo bo khotsofatsang bo ke keng ba fela, boo e leng tlhohonolofatso e tsoang ho Molimo.—Matheu 6:33.

20. Ha u ntse u bontša tumelo, u ka fumana moputso ofe o babatsehang?

²⁰ Ha Jehova a sebelisa Habakuke o ile a bua mantsoe a reng: “Ha e le ea lokileng, o tla ’ne a phele ka botšepehi ba hae.” (Habakuke 2:4) Leka ka hohle ho tebisa sena kelellong ea hao le pelong ea hao. Ke e ’ngoe ea linnete tse ka sehloohong tse boletsoeng ka Bibeleng. Pauluse o ile a bua ka lengolo lena hararo mangolong a hae a bululetsoeng.b (Baroma 1:16, 17; Bagalata 3:11, 14; Baheberu 10:38) Ka lebaka la ’nete ena, ho hlokahala hore u bontše tumelo sehlabelong seo Jesu Kreste a ileng a se etsa bakeng sa libe tsa rōna. Jesu o ile a re: “Molimo o ratile lefatše haholo hoo a ileng a fana ka Mora oa hae ea tsoetsoeng a ’notši, e le hore e mong le e mong ea bontšang tumelo ho eena . . . a be le bophelo bo sa feleng.” Hape rea bala: “Ea bontšang tumelo ho Mora o na le bophelo bo sa feleng.” (Johanne 3:16, 36) Sehlabelo sena se etsa hore batho ba khone ho folisoa, ’me Morekolli oa rōna ke eena feela ea ka ba folisang. Ka mor’a hore Malakia a tlalehe mantsoe a Jehova a bolelang seo letsatsi la Hae le leholo le tla se etsa lefatšeng le khopo la Satane, o ile a tsoela pele a re: “Ho lōna ba tšabang lebitso la ka letsatsi la ho loka le tla khanya, le e-na le pholiso mapheong a lona.” E, Jesu o tla khanya ha a folisa batho. Sena se akarelletsa ho folisoa moeeng hoo re ho thabelang hona joale. Leha ho le joalo, ho thabisa hakaakang ho nahana hore sena se tla fella ka hore re folisoe nameng ka ho feletseng lefatšeng le lecha!—Malakia 4:2.

21. Ke hobane’ng ha u ka kholiseha hore Jehova o na le matla a ho phetha thato ea hae?

²¹ Hape ke habohlokoa ho kholiseha hore Molimo o na le matla a ho phethahatsa thato ea hae. Mehleng ea Mikea, ho ne ho le thata ho tšepa batho ba bang. Moprofeta enoa o ile a re: “Le se ke la beha tumelo ea lōna ho bo-mphato ba lōna. Le se ke la tšepa metsoalle e tšepeloang makunutu.” Leha ho le joalo, Mikea o ne a se na bothata ba ho tšepa Jehova; le uena u lokela ho etsa joalo. Mikea o ile a re: “Ha e le ’na, ke tla ’ne ke lebelle Jehova.” (Mikea 7:5, 7) Ho fapana le batho bao e leng bo-nkhate-ke-hlaname, Jehova o ikemiselitse ho phetha morero oa hae ebile o na le matla a ho etsa joalo e le hore ho tlosoe qoso bobusing ba hae le hore batho ba nang le tumelo ba rue molemo ka ho sa feleng.

22. Ba ipiletsang lebitsong la Jehova ka tumelo ba ka thabela moputso ofe?

²² Ka kholiseho u ka pheta mantsoe ana a Habakuke: “Ke tla ithabela ho Jehova; ke tla inyakallela ho Molimo oa poloko ea ka.” (Habakuke 3:18) Moprofeta Joele o hlakisa lebaka le etsang hore ba ipiletsang lebitsong la Jehova ka tumelo ba thabe, o re: Ba “tla pholoha,” e leng mantsoe ao Pauluse a ileng a a qotsa hamorao. (Joele 2:32; Baroma 10:13) Ba tla pholoha ka tsela efe? Ho bontša tumelo ha hao ho se ho u qobisitse liketso tsa Satane tse bolotsana le lintho tse ngata tse bohloko tseo ba khopo ba lokelang ho tobana le tsona. (1 Petrose 1:18) Ho phaella moo, ka sebete u ka lebella ho pholoha koluoa e tla ba teng ha tsamaiso ena e khopo ea lintho e fela. Seo se tla u bulela monyetla oa ho thabela litlhohonolofatso tse ngata tseo baprofeta ba 12 ba li boletseng esale pele.

TLHASE E BONTŠANG HORE NA HO TLA BA JOANG PARADEISENG

23, 24. (a) Tse ling tsa lintho tse boletsoeng ke baprofeta ba 12 tseo e leng tlhase e bontšang hore na ho tla ba joang Paradeiseng ke life? (b) Se ngotsoeng ke baprofeta ba 12 se amme tsela eo u talimang bokamoso ka eona joang?

²³ “Ba tšabang Jehova” ba tla fumana litlhohonolofatso tse sa feleng. (Malakia 3:16) Ba bang ba baprofeta ba 12 ba ile ba bontša ka ho hlaka hore na ho tla ba joang lefatšeng la Paradeise le seng le le haufi, ’me ba hlalositse lintho tseo u ka li thabelang le tseo ka tjantjello u lebeletseng ho bona ha li phethahala. Ka mohlala, ha Mikea a ngola o ile a re: “E mong le e mong o tla lula tlas’a sefate sa hae sa morara le tlas’a sefate sa hae sa feiga, ho ke ke ha e-ba le ea etsang hore ba thothomele.” (Mikea 4:4) Ka sebele, u tla ikutloa u sireletsehile ’Musong oa Molimo ’me u tla thabela litholoana tsa mosebetsi oa hao!

²⁴ Ho lebella hore ho kula, masoabi esita le lefu li tla fela, hase toro feela. Nahana kamoo ba tsositsoeng ba lebeletseng ho fumana bophelo bo phethahetseng, ba tla thaba kateng! Ba tla bona ha seo Hosea 13:14 e se buang se phethahala ka ho feletseng lefatšeng: “Ke tla ba lopolla letsohong la Sheole; ke tla ba lokolla lefung. Metsu ea hao e hokae, Uena Lefu? Ho timetsa ha hao ho kae, Uena Sheole?” Pauluse o ile a bontša hore temana eo e ile ea phethahala ho ba ileng ba tsohela ho ea phela leholimong.—1 Bakorinthe 15:55-57.

25. U tla ikutloa joang lefatšeng le lecha?

²⁵ Ha ho lebaka la hore motho a thatafalloe ho lumela hore tsoho e tla ba teng lefatšeng. (Zakaria 8:6) Ha Amose le Mikea ba bolela esale pele hore batho ba Molimo ba ne ba tla khutla botlamuoeng, e ka ’na eaba ho ne ho bonahala ho le thata ho lumela hore seo se tla etsahala. Empa ua tseba hore se ile sa fela sa etsahala. (Amose 9:14, 15; Mikea 2:12; 4:1-7) Ba khutlileng ba ile ba araba ka ho re: “Re ile ra ba joaloka ba lorang. Nakong eo melomo ea rōna ea tlala litšeho, maleme a rōna a tlala mohoo oa thabo. . . . Jehova o entse ntho e khōlō ka seo a se entseng ho rōna. Re thabile.” (Pesaleme ea 126:1-3) U tla ikutloa joalo lefatšeng le lecha ha u fumana “tlhohonolofatso ho fihlela ho se ho se letho le hlokoang.”

26. Ba lulang ba hopola letsatsi la Jehova ba letetsoe ke eng?

²⁶ Ka mor’a hore “letsatsi la Jehova” le tlose bokhopo lefatšeng, “borena e tla ba ba Jehova” ka botlalo. (Obadia 15, 21) Na eo e ke ke ea e-ba tlhohonolofatso e babatsehang bakeng sa bafo bohle ba hae ba lefatšeng? U ka ba e mong oa bao mantsoe ana a Malakia khaolo 3 a tla phethahala ho bona: “‘Ka sebele e tla ba ba ka,’ ho boletse Jehova oa mabotho, . . . ‘Ke tla ba bontša qenehelo, feela joalokaha motho a bontša qenehelo ho mora oa hae ea mo sebeletsang.’” (Malakia 3:17) Ho hlakile hore botšepehi ba hao, bo ka u bulelang monyetla oa ho pholoha hona joale, ka nako eo bo tla u bulela monyetla oa hore u tšolleloe “tlhohonolofatso ho fihlela ho se ho se letho le hlokoang.” Ke tšepo e babatsehang hakaakang!

[Mongolo o botlaaseng ba leqephe]

SEO U ITHUTILENG SONA SE U AMME JOANG?

• U ruile molemo joang ha batho ba Jehova ba hloekisoa moeeng kajeno?—Daniele 12:10; Malakia 3:12.

• Ke hobane’ng ha u batla ho eketsa mahlabelo ao u a nyehelang ho Molimo?—Hosea 14:2; 1 Petrose 2:5.

LULA U HOPOLA LETSATSI LA JEHOVA

• Ke hobane’ng ha u lumela hore ke habohlokoa hore u lule u hopola Habakuke 2:4?—Hosea 2:18, 20.

• Baprofeta ba 12 ba leolitse tebello ea hao ea lefatše le lecha joang?—Pesaleme ea 126:1-3.

• Ke hobane’ng ha u ikemiselitse hore u lule u hopola letsatsi la Jehova?—Joele 2:1, 2; Habakuke 2:2, 3.

[Setšoantšo se leqepheng la 180, 181]

Jehova o ’nile a hloekisa batho ba hae e le sehlopha. Na ebe rōna ka bomong ho sa ntsane ho hlokahala hore re hloekisoe?

[Setšoantšo se leqepheng la 187]

Joele

[Litšoantšo tse leqepheng la 188, 189]

Bahlanka ba Jehova ba pota-potiloe ke batho ba ratang ’nete le toka